Għajnuna mill-Istat — films u xogħlijiet awdjoviżivi oħra

 

SOMMARJU TA’:

Il-Komunikazzjoni mill-Kummissjoni dwar għajnuna mill-Istat għall-films u xogħlijiet awdjoviżivi oħra

X’INHU L-GĦAN TAL-KOMUNIKAZZJONI?

• Din għandha l-għan li tispjega kriterji ċari li jservu ta’ qafas għall-intervent finanzjarju tal-pajjiżi tal-UE favur l-industriji tal-films u dawk awdjoviżivi.
• Tistabbilixxi r-regoli għall-valutazzjoni ta’ jekk l-iskemi nazzjonali ta’ appoġġ lis-settur awdjoviżiv jaffettwawx il-kundizzjonijiet u l-kompetizzjoni tal-kummerċ fl-UE sa limitu li jmur kontra l-interess komuni, u jekk għalhekk jikkonformawx mar-regoli tal-UE dwar l-għajnuna mill-Istat.

PUNTI EWLENIN

Regoli għall-valutazzjoni ta’ skemi ta’ appoġġ lis-settur awdjoviżiv

Il-Komunikazzjoni tal-2013 taġġorna r-regoli originarjament imfassla mill-Kummissjoni Ewropea fl-2001. Ir-regoli l-ġodda jinkludu l-elementi ewlenin li ġejjin:

• dawn ikopru l-aspetti kollha tal-ħolqien ta’ film mill-kunċett tal-istorja sat-twassil lill-udjenza li huma kulturali, skont it-“test kulturali” nazzjonali fis-seħħ;
• għajnuna għal-logħob tal-vidjow mhijiex koperta (mhux il-logħob kollu jikkwalifika bħala xogħol awdjoviżiv);
• dawn jillimitaw il-possibbiltà għall-pajjiżi tal-UE li jirrikjedu li ċerta parti mill-baġit appoġġat tal-films tintefaq fil-pajjiż tal-UE li jagħti l-għajnuna bħala kundizzjoni għall-għoti ta’ appoġġ għall-produzzjoni;
• dawn fil-prinċipju jippermettu għajnuna sa 50 %, 60 % għal koproduzzjonijiet iffinanzjati minn aktar minn pajjiż wieħed tal-UE u li jinvolvu produtturi minn aktar minn pajjiż wieħed tal-UE u sa 100 % għal xogħlijiet diffiċli u xi koproduzzjonijiet internazzjonali ma’ pajjiżi b’introjtu baxx;
• id-distribuzzjoni u l-promozzjoni tal-attivitajiet jistgħu jiġu appoġġati sal-istess limiti bħal dawk applikati għall-produzzjoni;
• l-għajnuna għal attivitajiet ta’ qabel il-produzzjoni tista’ tibbenefika wkoll minn għajnuna sa 100 %;
• dawn jippermettu appoġġ għall-attivitajiet ta’ qabel il-produzzjoni, ta’ produzzjoni, ta’ promozzjoni u ta’ distribuzzjoni, filwaqt li jeskludu għajnuna li tkun immirata b’mod speċifiku lejn attività waħda mill-katina tal-valur tal-produzzjoni;
• dawn iżidu t-trasparenza lejn iċ-ċittadini minħabba li dan li ġej irid jiġi ppubblikat fuq sit web pubbliku:
  • it-test sħiħ tal-iskema ta’ għajnuna approvata u d-dispożizzjonijiet ta’ implimentazzjoni tagħha,
  • għal għotjiet ta’ għajnuna li jaqbżu l-EUR 500 000, id-dettalji tal-benefiċjarju tal-għajnuna u l-ammont tal-għajnuna.

MINN META BDIET TAPPLIKA L-KOMUNIKAZZJONI?

Din ilha tapplika mis-16 ta’ Novembru 2013.

SFOND

Fl-2001, il-Kunsill adotta riżoluzzjoni dwar l-għajnuna nazzjonali għall-industriji tal-films u dawk awdjoviżivi. Dan enfasizza li l-industriji Ewropej tal-films u dawk awdjoviżivi għandhom rwol kruċjali fil-preservazzjoni tad-diversità kulturali fl-Ewropa iżda li dawn isofru minn dgħufijiet strutturali, bħal:

• in-nuqqas ta’ kapitalizzazzjoni tal-kumpaniji;
• frammentazzjoni tas-swieq finanzjarji, li huma ddominati minn produzzjonijiet mhux Ewropej; u
• ċirkolazzjoni transnazzjonali dgħajfa ta’ xogħlijiet Ewropej.

Ir-riżoluzzjoni sejħet biex:

• il-pajjiżi tal-UE jwettqu politiki nazzjonali biex jiġi appoġġat il-ħolqien ta’ prodotti tal-films u ta’ dawk awdjoviżivi, minħabba li l-għajnuna nazzjonali tista’ tikkontribwixxi għall-ħolqien ta’ suq awdjoviżiv Ewropew;
• diskussjonijiet kontinwi bejn il-pajjiżi tal-UE u l-Kummissjoni biex tiżdied iċ-ċertezza legali ta’ dawn l-arranġamenti.

L-Artikolu 107(3)(d) tat-Trattat dwar il-Funzjonament tal-Istati tal-UE li jgħinu biex jiġu promossi l-kultura u l-konservazzjoni tal-patrimonju jista’ jkun kompatibbli mas-suq komuni jekk ma jaffettwax il-kundizzjonijiet u l-kompetizzjoni tal-kummerċ fl-UE tant li jmur kontra l-interess komuni.

L-għan tad-diversità kulturali jiġġustifika n-natura speċifika tal-għajnuna nazzjonali għall-industriji tal-films u dawk awdjoviżivi: l-għajnuna nazzjonali hija essenzjali għall-kontribuzzjoni tal-ħolqien ta’ suq awdjoviżiv Ewropew.

Għal aktar informazzjoni, ara:

• Il-kompetizzjoni fis-settur tal-midja (il-Kummissjoni Ewropea).

DOKUMENT EWLIENI

Il-Komunikazzjoni tal-Kummissjoni dwar għajnuna mill-Istat għall-films u xogħlijiet awdjoviżivi oħra (ĠU C 332, 15.11.2013, pp. 1-11)

DOKUMENTI RELATATI

Il-verżjoni kkonsolidata tat-Trattat dwar il-Funzjonament tal-Unjoni Ewropea — It-Tielet Parti — Politiki tal-Unjoni u azzjonijiet interni — Titolu VII: Regoli komuni dwar il-kompetizzjoni, it-tassazzjoni u l-approssimazzjoni tal-liġijiet — Kapitolu 1: Regoli li jirregolaw il-kompetizzjoni — Taqsima 2: Għajnuniet mogħtija mill-Istati — Artikolu 107 (l-ex-Artikolu 87 TEC) (ĠU C 202, 7.6.2016, pp. 91-92)

Il-Komunikazzjoni tal-Kummissjoni li temenda l-Komunikazzjonijiet tal-Kummissjoni dwar Linji Gwida tal-UE għall-applikazzjoni tar-regoli dwar l-għajnuna mill-Istat b’rabta mal-implimentazzjoni rapida tan-netwerks tal-broadband, dwar Linji Gwida dwar l-għajnuna reġjonali mill-Istat għall-2014-2020, dwar għajnuna mill-Istat għal films u xogħlijiet awdjoviżivi oħra, dwar Linji Gwida dwar l-għajnuna mill-Istat għall-promozzjoni ta’ investimenti u finanzjament ta’ riskju u dwar il-Linji Gwida dwar l-għajnuna mill-Istat għall-ajruporti u l-linji tal-ajru (ĠU C 198, 27.6.2014, pp. 30-34)

Ir-riżoluzzjoni tal-Kunsill tat-12 ta’ Frar 2001 dwar l-għajnuna nazzjonali għall-industriji tal-films u dawk awdjoviżivi (ĠU C 73, 6.3.2001, pp. 3-4)

l-aħħar aġġornament 23.09.2019