EUR-Lex Access to European Union law
This document is an excerpt from the EUR-Lex website
Document 52012PC0729
Proposal for a COUNCIL RECOMMENDATION On Establishing a Youth Guarantee
Proposta għal RAKKOMANDAZZJONI TAL-KUNSILL Dwar it-Twaqqif ta’ Garanzija għaż-Żgħażagħ
Proposta għal RAKKOMANDAZZJONI TAL-KUNSILL Dwar it-Twaqqif ta’ Garanzija għaż-Żgħażagħ
/* COM/2012/0729 final - 2012/0351 (NLE) */
Proposta għal RAKKOMANDAZZJONI TAL-KUNSILL Dwar it-Twaqqif ta’ Garanzija għaż-Żgħażagħ /* COM/2012/0729 final - 2012/0351 (NLE) */
MEMORANDUM TA’ SPJEGAZZJONI 1. KUNTEST TAL-PROPOSTA Il-qgħad
għoli, u dejjem jiżdied, fost iż-żgħażagħ
għandu konsegwenzi drammatiċi għall-ekonomiji tagħna,
is-soċjetajiet tagħna u għaż-żgħażagħ
infushom. Ir-rata
ta’ qgħad fost iż-żgħażagħ madwar l-UE laħqet
il-livell għoli ta’ 22,7 % (fit-tielet kwart tas-sena 2012),
id-doppju tar-rata tal-adulti[1],
u l-prospetti ma juru ebda xejra li r-rata se tibda tonqos. Madwar 5,5 miljun
żagħżugħ huma qiegħda u aktar minn 7,5 miljun
żagħżugħ taħt il-25 sena fil-preżent ma
għandhomx xogħol, u lanqas ma huma qed jieħdu xi forma ta’
edukazzjoni jew taħriġ (not in employment, education or training,
NEETs). Iżda
lil hinn mill-effetti immedjati tal-kriżi, anki b’rati aktar baxxi,
il-qgħad u l-inattività fost iż-żgħażagħ lis-soċjeta
qed jiswewlha ħafna u qed jikkawżawlha l-ħsara. Qed jiswewha
llum, f’dawk li huma benefiċċji li jitħallsu u f’dawk li huma
pagi u taxxi mitlufa, imma se jkomplu jiswewha wkoll fil-ġejjieni,
minħabba li jwasslu għal għadd ta’ effetti li ma jitilqux kif
ġib u laħaq, b’impatti negattivi fit-tul fuq il-livelli tad-dħul
fil-ġejjieni, ir-riskji ta' qgħad fil-ġejjieni, l-istat
tas-saħħa, il-benesseri u r-riżervi tal-pensjonijiet. L-Ewropa
ma tistax taffordja li titlef it-talent u l-ġejjieni tagħha. Il-ħtieġa
li tieħu azzjoni u li ssostni ż-żgħażagħ
fit-tranżizzjoni tagħhom mill-iskola għax-xogħol kienet
diġà ġiet identifikata qabel il-kriżi. Fl-2005, il-Kunsill
qabel, fil-kuntest tal-Linji Gwida għall-Politika dwar l-Impjiegi
(2005-2008), li l-politiki jridu jiżguraw li “fil-każ
taż-żgħażagħ, kull persuna qiegħda għandha
tiġi offruta bidu ġdid qabel ma tagħlaq sitt xhur bla
xogħol”. Fl-2008, il-Kunsill naqqas il-perjodu ta’ żmien għal
“mhux aktar minn erba’ xhur” għaż-żgħażagħ
jitilqu mill-iskola. Minħabba
li sal-2010 t-tali miżura kienet għadha ma ġietx implimentata
fl-UE, kemm il-Parlament Ewropew (PE) u kemm il-Forum
taż-Żgħażagħ Ewropej kienu għalkollox favur li
fil-livell tal-UE jiġu stabbiliti l-Garanziji
għaż-Żgħażagħ. Fil-qafas
tal-Istrateġija Ewropa 2020 u l-inizjattiva ewlenija
“Żgħażagħ fl-Azzjoni”, il-Kummissjoni appellat b’mod
partikolari lill-Istati Membri biex jiżguraw li
ż-żgħażagħ kollha jkollhom impjieg, ikomplu
l-edukazzjoni jew jinħarġulhom miżuri ta' attivazzjoni fi
żmien erba’ xhur minn meta jitilqu mill-iskola, kif ukoll biex jipprovdu
din il-"Garanzija għaż-Żgħażagħ". Fis-snin
2011 u 2012 kien hemm bosta appelli biex dan isir, b’mod partikolari
mill-Kunsill Ewropew, mill-Parlament Ewropew u mill-Forum
taż-Żgħażagħ Ewropej, iżda mingħajr xi
suċċess kbir mill-pubbliku ġenerali. Fil-Pakkett
dwar l-Impjiegi ta’ April 2012, il-Kummissjoni ħabbret li sa tmiem is-sena
kienet se tipproponi Rakkomandazzjoni tal-Kunsill dwar il-Garanziji
għaż-Żgħażagħ. Fid-29 ta’ Ġunju 2012,
il-Kunsill Ewropew ħeġġeġ lill-Istati Membri biex
iżidu l-isforzi tagħhom biex jiżdied ix-xogħol fost
iż-żgħażagħ, bi “l-għan li sa ftit xhur wara li
jitilqu mill-iskola, iż-żgħażagħ jirċievu offerta
ta’ xogħol ta' kwalità tajba, edukazzjoni kontinwa, apprendistat jew
taħriġ”. Ikkonkludiet ukoll li dawn il-miżuri jistgħu
jiġu sostnuti mill-Fond Soċjali Ewropew (ESF) u li l-Istati Membri
għandhom jużaw il-possibilitajiet ta’ ffinanzjar ta’ sussidji
għal reklutaġġ temporanju mill-Fond. Fl-Istħarriġ
Annwali dwar it-Tkabbir tal-2013[2],
il-Kummissjoni enfasizzat li l-Istati Membri għandhom jiggarantixxu li
ż-żgħażagħ jgħaddu mill-iskola għall-post
tax-xogħol, kif ukoll li jiżviluppaw u jimplimentaw Garanziji
għaż-Żgħażagħ li permezz tagħhom dawk li
għandhom inqas minn 25 sena jingħataw offerta ta’ xogħol,
edukazzjoni kontinwa, apprendistat jew taħriġ fi żmien erba’
xhur minn meta joħorġu mill-iskola jew minn meta jispiċċaw
qiegħda. Tali skemi jistgħu jiġu kofinanzjati mill-Fond
Soċjali Ewropew. Il-Kummissjoni
qed tippreżenta proposta għal Rakkomandazzjoni tal-Kunsill biex
tiżgura li ż-żgħażagħ jirċievu offerta ta’
xogħol ta' kwalità tajba, aktar edukazzjoni jew taħriġ fi
żmien erba' xhur minn meta jsiru qiegħda jew itemmu edukazzjoni
formali. Din il-proposta tistabbilixxi wkoll kif għandha tiġi
stabbilita l-Garanzija għaż-Żgħażagħ. Il-proposta
telenka linji gwida abbażi ta’ sitt assi ‑ it-twaqqif ta’
sħubiji sodi mal-partijiet kollha interessati; l-iżgurar ta’
intervent u attivazzjoni minn kmieni biex jiġi evitat li
ż-żgħażagħ isiru NEETs; it-teħid ta’ miżuri
ta' sostenn li jippermettu l-integrazzjoni tax-xogħol, b’mod li jsir
użu sħiħ mill-finanzjament tal-UE għal dak il-għan;
il-valutazzjoni u t-titjib kontinwu tal-iskemi ta’ Garanzija għaż-Żgħażagħ;
u l-implimentazzjoni tal-iskemi f’qasir żmien. Il-proposta ssemmi wkoll
kif il-Kummissjoni se tappoġġa l-azzjoni tal-Istati Membri: il-qafas
ta’ finanzjament mill-UE, l-iskambju ta’ prattiki tajba fost l-Istati Membri,
il-monitoraġġ tal-azzjonijiet tal-Istati Membri bħala parti
mill-eżerċizzju tas-Semestru Ewropew l-appoġġ lil
attivitajiet maħsuba li joħolqu għarfien. Il-proposta
hija akkumpanjata minn Dokument ta’ Ħidma tal-Persunal (SWD), li
jidħol f’aktar dettalji dwar x'jikkostitwixxi Garanzija
għaż-Żgħażagħ, jindirizza kwistjonijiet dwar
il-kost u l-benefiċċji ta’ skemi bħal dawn, u jiddeskrivi
wieħed wieħed l-ingredjenti meħtieġa biex il-Garanzija
għaż-Żgħażagħ tkun suċċess. Barra minn
hekk, f'anness, is-SWP jippreżenta politiki li jappoġġaw
l-impjiegi taż-żgħażagħ li diġà hemm fis-seħħ
fis-27 Stat Membru u fil-Kroazja, b’mod li jirrifletti d-diversi punti li
minnhom telqu dawn il-pajjiżi bil-għan li jwaqqfu skemi
b’saħħithom ta’ Garanziji
għaż-Żgħażagħ. 2. RIŻULTATI
TAL-KONSULTAZZJONIJIET MAL-PARTIJIET INTERESSATI U L-VALUTAZZJONIJIET
TAL-IMPATT Il-Presidenza
Daniża organizzat grupp ta’ ħidma dwar il-modi kif wieħed jista’
jwaqqaf Garanzija għaż-Żgħażagħ fil-qafas
tal-Laqgħa Informali tal-Ministri tax-Xogħlijiet u tal-Affarijiet
Soċjali li saret f'Horsens bejn l-24 u l-25 ta' April 2012.
F'din il-laqgħa, ġie enfasizzat li l-politiki dwar l-edukazzjoni u
t-taħriġ għandhom jissieħbu mal-politiki dwar l-impjiegi,
li l-isforzi għandhom ikunu kkonċentrati fuq gruppi
problematiċi, jiġifieri dawk li ma għandhomx kwalifiki/gradi
edukattivi u li l-approċċi għandhom jiġu adattati
għall-kuntest nazzjonali u għal kwistjonijiet speċifiċi
individwali. Fl-aħħar nett, ġie enfasizzat li l-awtoritajiet
pubbliċi jeħtieġ li jappoġġaw
iż-żgħażagħ, b’mod partikolari dawk l-aktar
vulnerabbli, iżda wkoll li ż-żgħażagħ
għandhom jinvolvu ruħhom fil-proċess u jaċċettaw
id-dmirijiet u r-responsabbiltajiet. Il-Fond Soċjali Ewropew kien imsemmi
bħala sors potenzjali ta’ finanzjament, speċjalment fid-dawl tal-ħtieġa
li jiġu implimentati miżuri ta’ awsterità/konsolidament fiskali. Bħala
parti mill-kwestjonarju annwali mibgħut lin-Netwerk tas-Servizzi
tal-Impjiegi Pubbliċi (Public Employment Services, PES) dwar
il-kapaċità ta' aġġustament tagħhom għall-kriżi,
edizzjoni tal-2012, imniedi f’Jannar, inkluda modulu dwar l-azzjonijiet
meħuda biex jiġi indirizzat il-qgħad fost
iż-żgħażagħ. It-tweġibiet għall-kwestjonarju
kienu kkunsidrati fit-tfassil tal-SWP li jsostni l-proposta preżenti. F’Ġunju 2012,
fil-kuntest tal-laqgħa tal-Kapijiet tal-PES (Heads of PES, HoPES)
taħt il-Presidenza Daniża, membri ta’ dan in-netwerk intalbu
jirrappurtaw dwar l-iżviluppi li seħħew minn Jannar 2012 li
fil-mira tagħhom kien hemm speċifikament
iż-żgħażagħ. Bħala
segwitu għal Pakkett dwar l-Impjiegi, il-prospett ta’ inizjattiva dwar
Garanzija għaż-Żgħażagħ ġiet diskussa
mal-imsieħba soċjali bejn id-19 u
l-20 ta' Ġunju 2012. Fil-konferenza
"Impjiegi għall-Ewropa”[3],
li saret bejn is-6 u s-7 ta’ Settembru 2012 fi Brussell u li
għaliha attendew il-partijiet interessati rilevanti kollha, inklużi
l-imsieħba soċjali u l-organizzazzjonijiet
taż-żgħażagħ, maġġoranza kbira ta' kelliema
esprimew l-appoġġ tagħhom biex titwaqqaf Garanzija
għaż-Żgħażagħ fl-UE, u dan filwaqt li rrikonoxxew
li hemm bżonn li ż-żgħażagħ jingħataw bidu
tajjeb fil-ħajja, b'mod partikolari fi żmien diffiċli
bħalma hu bħalissa. Ir-rappreżentanti
tal-Forum taż-Żgħażagħ Ewropej u
tal-organizzazzjonijiet tal-imsieħba soċjali transsettorjali
ltaqgħu f'Settembru 2012. L-inizjattiva
ta’ Garanzija għaż-Żgħażagħ ġiet diskussa
għal darb'oħra mal-Imsieħba Soċjali fil-Kumitat tad-Djalogu
Soċjali fit-23 ta’ Ottubru 2012. 3. ELEMENTI ĠURIDIĊI
TAL-PROPOSTA Bażi ġuridika: Għal proposta
dwar Garanzija għaż-Żgħażagħ mal-Politiki dwar
l-Impjiegi (it-Titolu IX tat-TFUE) bħala centre de gravité,
l-Artikolu 292 tat-TFUE jikkostitwixxi bażi legali xierqa
għall-adozzjoni ta’ rakkomandazzjoni. Il-kompetenza tal-Unjoni fejn
jidħlu l-politiki dwar ix-xogħol hija ddefinita fit-Titlu IX
tat-TFUE, li ma jipprevedix bażi legali speċifika
għall-adozzjoni ta’ rakkomandazzjoni. B’mod partikolari,
l-Artikolu 149 tat-TFUE jistipula biss “miżuri ta' inċentiva li
jkunu mmirati sabiex jinkoraġġixxu l-kooperazzjoni bejn Stati Membri
u sabiex isostnu l-azzjoni tagħhom fil-qasam tal-impjiegi permezz ta'
inizjattivi li jkollhom l-għan li jkun żviluppat l-iskambju ta'
informazzjoni u tal-aħjar prattiċi”, li ma jirriflettix in-natura ta’
din ir-Rakkomandazzjoni. Is-sussidjarjetà u l-proporzjonalità:
Il-Kummissjoni, flimkien mal-Istati Membri kollha, hija mħassba sew
bis-sitwazzjoni preżenti tas-suq tax-xogħol
għaż-żgħażagħ u bid-deterjorazzjoni persistenti
tagħha. Il-livelli drammatiċi tal-qgħad fost
iż-żgħażagħ taffettwa l-Ewropa kollha kemm hi: il-prezz
ta’ dan kollu huwa għoli llum u se jkun hekk ukoll fil-ġejjieni. Dak
li se nkunu qed niffrankaw permezz tal-Garanzija
għaż-Żgħażagħ imur lil hinn minn
sempliċement iffrankar li jsir fuq in-nefqa għall-protezzjoni
soċjali. L-evitar tal-qgħad u d-deterjorament tal-ħiliet iwassal
għal benefiċċji fit-tul
għaż-żgħażagħ u għall-ekonomija permezz ta’
inqas qgħad fiċ-ċiklu tal-ħajja, dħul ogħla (u
għalhekk dħul ogħla anki mit-taxxi u kontribuzzjonijiet
ogħla wkoll tas-sigurtà soċjali) u permezz ta' inqas problemi
soċjali u dawk marbutin mas-saħħa[4]. Wara
n-nuqqas ta’ implimentazzjoni ta’ għadd ta’ appelli politiċi kemm
mill-Kunsill u kemm mill-Parlament Ewropew biex jitwaqqfu skemi ta’ Garanzija
għaż-Żgħażagħ, issa hemm bżonn li din
ir-rakkomandazzjoni tinħareġ lill-Istati Membri. Tabilħaqq, sa
issa kien hemm biss numru limitat ta' Stati Membri li ħadu miżuri
marbuta mal-implimentazzjoni ta' skema komprensiva ta' Garanziji
għaż-Żgħażagħ. L-għoti
ta' linji gwida fil-livell tal-UE dwar għodda li jikkontribwixxu għal
skema ta’ Garanziji għaż-Żgħażagħ effettiva
għandu jippermetti lill-Istati Membri jagħmlu l-aħjar użu
tal-Fondi ta' Koeżjoni, u b'mod partikolari tal-Fond Soċjali Ewropew,
sabiex jiġu indirizzati l-qgħad fost
iż-żgħażagħ u l-inattività. Il-proposta
tirrikonoxxi li s-sitwazzjonijiet differenti fl-Istati Membri individwali (jew
fil-livell reġjonali jew lokali) jista’ jwasslu għal differenzi
fil-mod kif titwaqqaf l-iskema u kif tkompli tiġi implimentata. 4. IMPLIKAZZJONI BAĠITARJA
Mhux rilevanti 5. ELEMENTI FAKULTATTIVI Mhux rilevanti 2012/0351 (NLE) Proposta għal RAKKOMANDAZZJONI TAL-KUNSILL Dwar it-Twaqqif ta’ Garanzija
għaż-Żgħażagħ IL-KUNSILL TAL-UNJONI EWROPEA, Wara li kkunsidra t-Trattat dwar
il-Funzjonament tal-Unjoni Ewropea, u b’mod partikolari l-Artikolu 292
tiegħu, Wara li kkunsidra l-proposta tal-Kummissjoni
Ewropea, Billi: (1) L-investiment tal-lum
fil-kapital uman taż-żgħażagħ Ewropej iwassal
għal benefiċċji fit-tul u jikkontribwixxi għal tkabbir
ekonomiku sostenibbli u inklużiv. L-Ewropa tkun tista’ tibbenefika b’mod
sħiħ mill-benefiċċji kollha ta’ forza tax-xogħol
attiva, innovattiva u tas-sengħa, filwaqt li tevita l-kosti enormi ta’
żgħażagħ li la jkunu qed jaħdmu, la jedukaw
ruħhom u lanqas jitħarrġu (“NEETs”), li bħalissa jammontaw
għal 1,2 % tal-PGD[5]. (2) Iż-żgħażagħ
intlaqtu partikolarment ħażin matul il-kriżi. Huma vulnerabbli
minħabba l-perjodi ta’ tranżizzjoni li għaddejjin minnhom
fil-ħajja, in-nuqqas ta’ esperjenza professjonali, minħabba li
kultant ma jkunux edukati u mħarrġa biżżejjed,
minħabba li l-kopertura ta’ ħarsien soċjali tagħhom spiss
tkun waħda limitata, minħabba l-aċċess ristrett għal
riżorsi finanzjarji, u l-kundizzjonijiet tax-xogħol prekarji. In-nisa
żgħażagħ aktar hemm ċans li jintlaqtu minn paga baxxa
u minn impjiegi prekarji, filwaqt li l-ġenituri
żgħażagħ, primarjament l-ommijiet
żgħażagħ, ikunu neqsin minn miżuri ta’ bilanċ
xieraq bejn il-ħajja u x-xogħol. Barra minn hekk, xi
żgħażagħ huma fi żvantaġġ partikolari jew
fir-riskju li jiġu diskriminati. Għalhekk hemm bżonn ta’ miżuri
ta’ sostenn xierqa. (3) Fl-Ewropa hemm 7,5 miljun
NEETs, u jirrappreżentaw 12,9 % tal-Ewropej
żgħażagħ (15-24). Ħafna ma għandhomx iktar minn
livell ta’ edukazzjoni sekondarja, ikunu ħarġu kmieni
mill-edukazzjoni u mit-taħriġ, u spiss huma migranti jew ġejjin
minn kuntesti żvantaġġati. It-terminu “NEETs” ikopri s-sottogruppi
varji ta’żgħażagħ bi ħtiġijiet differenti. (4) Mat-30,1 % tan-nies
qiegħda taħt il-25 sena ilhom qiegħda għal aktar minn
12-il xahar. Barra minn dan, hemm għadd dejjem ikbar ta’
żgħażagħ li ma jfittxux ix-xogħol attivament, hekk li
jistgħu jibqgħu mingħajr appoġġ strutturali fejn
tidħol l-integrazzjoni mill-ġdid fis-suq tax-xogħol.
Ir-riċerka turi li l-qgħad fost iż-żgħażagħ
jista’ jħalli effetti permanenti, bħal riskju ikbar li l-persuna
tispiċċa qiegħda fil-futur, qligħ inqas fil-futur, telf ta’
kapital uman, it-trażmissjoni minn ġenerazzjoni għal oħra
tal-faqar, jew inqas motivazzjoni li dak li jkun jibni familja, sitwazzjonijiet
li lkoll jikkontribwixxu għal xejriet demografiċi negattivi. (5) It-terminu "Garanzija
għaż-Żgħażagħ" hawnhekk jirreferi għall-fatt
li ż-żgħażagħ jirċievu offerta ta’ xogħol
ta' kwalità tajba, edukazzjoni kontinwa, apprendistat jew taħriġ fi
żmien erba’ xhur minn meta jispiċċaw qiegħda jew minn meta
jwaqqfu l-edukazzjoni formali. (6) Garanzija
għaż-Żgħażagħ tikkontribwixxi għal tlieta
mill-miri tal-istrateġija Ewropa 2020, jiġifieri li 75 %
tal-firxa tal-età bejn l-20 u l-64 sena jrid ikollhom xogħol, li
r-rati ta' tluq bikri mill-iskola għandhom ikunu taħt l-10 %, u
li mill-inqas 20 miljun persuna għandhom jinħarġu
mill-faqar u mill-esklużjoni soċjali. (7) Il-linji gwida
għall-politiki dwar ix-xogħol tal-Istati Membri[6], b’mod partikolari l-linji
gwida 7 u 8, jappellaw lill-Istati Membri biex jippromovu l-integrazzjoni
taż-żgħażagħ fis-suq tax-xogħol u biex
jgħinuhom, b'mod partikolari lin-NEETs, b'kooperazzjoni mal-imsieħba
soċjali, biex isibu impjieg inizjali, jiksbu esperjenza tax-xogħol,
jew aktar opportunitajiet ta' edukazzjoni u taħriġ, inklużi
apprendistati, u biex jintervjenu malajr meta ż-żgħażagħ
jitilfu x-xogħol. (8) Sa mill-2005, il-Kunsill
qabel, fil-kuntest tal-Linji Gwida għall-Politika dwar l-Impjiegi[7] (2005-2008), li “kull persuna
qiegħda tiġi offruta bidu ġdid qabel ma tilħaq is-sitt xhur
ta’ qgħad fil-każ ta’ żgħażagħ”. Fl-2008[8], il-Kunsill naqqas il-perjodu
ta’ żmien għal “mhux aktar tard minn erba' xhur”
għaż-żgħażagħ li jitilqu mill-iskola kmieni. (9) Fir-riżoluzzjoni
tiegħu tal-2010 “Il-promozzjoni tal-aċċess
taż-żgħażagħ għas-suq tax-xogħol,
it-tisħiħ tal-istejtus ta’ min jitħarreġ, tal-internship u
l-apprendistat”[9],
il-Parlament Ewropew talab lill-Kummissjoni Ewropea, lill-Istati Membri,
lill-imsieħba soċjali u lil partijiet interessati oħra biex
isostnu l-politiki nazzjonali dwar is-suq tax-xogħol, l-edukazzjoni u
t-taħriġ b’Garanzija għaż-Żgħażagħ. Dan
jassigura d-dritt ta’ kull żagħżugħ fl-UE li jiġi
offrut impjieg, apprendistat, taħriġ addizzjonali jew xogħol u
taħriġ ikkumbinati wara massimu ta’ erba’ xhur qiegħed. (10) Fil-Komunikazzjoni tagħha
tal-2010 “Żgħażagħ fl-Azzjoni”, il-Kummissjoni
ħeġġet lill-Istati Membri biex jintroduċu Garanziji
għaż-żgħażagħ, li l-implimentazzjoni tagħhom
sa issa kienet limitata ferm. Din ir-rakkomandazzjoni ssaħħaħ u
ttenni l-ħtieġa li l-Istati Membri jkomplu jaħdmu għal dan
l-għan, filwaqt li jgħinu wkoll fit-tfassil, fl-implimentazzjoni
ufl-evalwazzjonijiet ta’ dawn l-iskemi. (11) Il-konklużjonijiet
tal-Kunsill ta’ Ġunju 2011 "Promoting youth employment to
achieve the Europe 2020 objectives” stiednet lill-Istati Membri biex
jaġixxu rapidament billi joffru aktar edukazzjoni, taħriġ
(mill-ġdid) jew miżuri ta’ attivazzjoni
għaż-żgħażagħ li la jkunu qed jaħdmu, la
jedukaw ruħhom u lanqas jitħarrġu, u b’mod li jinkludu wkoll lil
min jitlaq kmieni mill-iskola. Dan iservi l-għan li dawn in-nies
jerġgħu jidħlu lura fl-ambitu tal-edukazzjoni,
tat-taħriġ jew fis-suq tax-xogħol fl-iqsar żmien possibbli
u jnaqqsu r-riskju ta’ faqar, ta’ diskriminazzjoni u ta’ esklużjoni
soċjali. (12) Ir-Rakkomandazzjoni
tal-Kunsill ta’ Ġunju 2011[10]
dwar “Politiki dwar linji politiċi sabiex jitnaqqas it-tluq bikri
mill-iskejjel” hija kkonċentrata fuq l-iżvilupp ta' politiki msejsa
fuq l-evidenza, komprensivi u transsettorjali li jinkludu miżuri biex
jirbħu lura lil min jitlaq kmieni mill-iskola u biex isaħħu
r-rabta bejn is-sistemi tal-edukazzjoni u tat-taħriġ u s-settur
tal-impjiegi. (13) Fit-tħejjija
tal-baġit tal-2012, il-Parlament Ewropew appoġġa dan
l-approċċ u talab lill-Kummissjoni biex timplimenta azzjoni
preparatorja biex issostni t-twaqqif ta’ Garanziji
taż-Żgħażagħ fl-Istati Membri. (14) Fil-Pakkett tagħha dwar
l-Impjiegi “Lejn irkupru li jwassal għall-ħolqien abbundanti ta’
impjiegi”[11],
il-Kummissjoni appellat għall-mobilizzazzjoni attiva min-naħa
tal-Istati Membri, tal-imsieħba soċjali u ta’ partijiet interessati
oħra biex jirrispondu għall-isfidi tal-UE fil-preżent fejn
jidħlu l-impjiegi, u b'mod partikolari l-qgħad fost
iż-żgħażagħ. Il-Kummissjoni
enfasizzat l-ikbar potenzjal għall-ġenerazzjoni tal-impjiegi
tal-ekonomija ekoloġika, tas-saħħa u l-kura soċjali, u
tas-setturi tal-ICT, u għal dan il-għan ħarġet tliet
pjanijiet ta' azzjoni li jakkumpanjawha biex ikun hemm segwitu tagħhom. Il-Kummissjoni mbagħad enfasizzat ukoll sitt
oqsma prijoritarji promettenti għall-innovazzjoni industrijali li
jikkontribwixxu għat-tranżizzjoni lejn ekonomija baxxa fil-karbonju u
effiċjenti fir-riżorsi[12]. Fil-Pakkett dwar l-Impjiegi, il-Kummissjoni
enfasizzat ukoll li t-trawwim ta' mħuħ intraprenditorjali,
id-disponibbiltà akbar ta’ sostenn lil servizzi għall-ftuħ ta’
negozju u ta’ mikrofinanzjament, kif ukoll it-twaqqif ta’ skemi li jikkonvertu
l-benefiċċji tal-qgħad f'għotjiet għall-ftuħ ta’
negozju jkollhom rwol importanti anki
għaż-żgħażagħ. Barra
minn hekk, il-Pakkett ippropona l-użu ta’ sussidji tal-pagi biex
tingħata spinta fejn jidħol l-ingaġġar ta’ ħaddiema
ġodda u t-tnaqqis tar-rata fiskali (prinċipalment il-kontribuzzjoni
tas-sigurtà soċjali mill-impjegaturi) hekk li jiżdied ix-xogħol
u jkun hemm riformi bilanċjati fil-leġiżlazzjoni dwar
il-ħarsien tal-impjiegi, affarijiet li lkoll jistgħu jgħinu
liż-żgħażagħ biex ikollhom aċċess għal
impjiegi ta’ kwalità. (15) F'Mejju 2012,
il-Parlament Ewropew[13]
ħeġġeġ lill-Istati Membri biex jieħdu miżuri
konkreti u fil-pront fil-livell nazzjonali biex jiżguraw li
ż-żgħażagħ ikollhom xogħol, edukazzjoni jew
taħriġ (mill-ġdid) diċenti fi żmien erba' xhur minn
meta joħorġu mill-iskola. Il-Parlament Ewropew enfasizza li biex
l-iskema ta’ Garanziji taż-Żgħażagħ tabilħaqq
ittejjeb is-sitwazzjoni taż-żgħażagħ li la jkunu qed
jirċievu edukazzjoni, la taħriġ u lanqas ma għandhom
xogħol, u biex din twassal biex gradwalment tingħeleb il-problema
tal-qgħad fost iż-żgħażagħ fl-UE,
jeħtieġ li tali skema tkun infurzata bil-liġi. (16) Fid-29 ta’ Ġunju 2012,
il-Kunsill Ewropew appella biex jiġġeddu l-isforzi biex jitkattar
ix-xogħol fost iż-żgħażagħ, bi “l-għan li sa
ftit xhur wara li joħorġu mill-iskola, iż-żgħażagħ
jirċievu offerta ta’ xogħol ta' kwalità tajba, edukazzjoni kontinwa,
apprendistat jew taħriġ”. Il-Kunsill ikkonkluda wkoll li dawn
il-miżuri jistgħu jiġu sostnuti mill-Fond Soċjali Ewropew
(ESF) u li l-Istati Membri għandhom jużaw il-possibilitajiet ta’
ffinanzjar ta’ sussidji għal reklutaġġ temporanju mill-Fond. (17) Il-Komunikazzjoni
tal-Kummissjoni tal-20 ta' Novembru 2012 “Nikkunsidraw
l-edukazzjoni mill-Ġdid”[14]
tipprovdi l-kontribuzzjoni tal-UE għal dan ix-xogħol minn perspettiva
edukattiva. Din telabora l-kwistjonijiet ewlenin marbuta mar-riforma u l-effiċjenza
tas-sistemi tal-edukazzjoni u t-taħriġ – biex il-ħiliet
disponibbli jiġu allinjati mal-ħtiġijiet tas-suq
tax-xogħol, kemm tal-lum u kemm tal-ġejjieni, biex ikunu stimulati
toroq miftuħa u flessibbli ta’ tagħlim u biex jiġi promoss sforz
kollaborattiv fost il-partijiet interessati kollha, inkluż dak
tal-finanzjament. (18) Fl-Istħarriġ Annwali
dwar it-Tkabbir tal-2013 (AGS)[15],
il-Kummissjoni enfasizzat li l-Istati Membri għandhom jiggarantixxu li
ż-żgħażagħ jgħaddu mill-iskola għall-post
tax-xogħol, kif ukoll li jiżviluppaw u jimplimentaw Garanziji
għaż-Żgħażagħ li permezz tagħhom dawk li
għandhom inqas minn 25 sena jingħataw offerta ta’ xogħol,
edukazzjoni kontinwa, apprendistat jew taħriġ fi żmien erba’
xhur minn meta joħorġu mill-iskola jew minn meta jispiċċaw
qiegħda. (19) Il-Garanzija
għaż-Żgħażagħ għandha tiġi implimentata
minn skema li tikkonsisti minn miżuri ta' sostenn, u għandha tkun
waħda li tqis iċ-ċirkostanzi nazzjonali, reġjonali u
lokali. Dawn il-miżuri huma bbażati fuq sitt linji ewlenin: il-bini
ta’ approċċi bbażati fuq is-sħubijiet, interventi u
attivazzjoni fil-pront, miżuri ta’ sostenn li jippermettu l-integrazzjoni
fis-suq tax-xogħol, l-użu tal-Fondi Strutturali tal-UE,
il-valutazzjoni u t-titjib kontinwu tal-iskema, u l-implimentazzjoni rapida
tagħha. Bħala tali, dawn għandhom l-għan li jipprevjenu
l-ħruġ bikri mill-iskola, li jrawmu l-impjegabbiltà u li
jneħħu l-ostakli prattiċi għax-xogħol. Jistgħu
jiġu appoġġati mill-Fondi Strutturali tal-UE u għandhom
jiġu sorveljati u mtejba kontinwament. (20) Il-koordinazzjoni effettiva u
s-sħubijiet fl-oqsma ta’ politika (ix-xogħol, l-edukazzjoni,
iż-żgħażagħ, l-affarijiet soċjali,
eċċ.) huma kruċjali biex ikun hemm qabża fl-opportunitajiet
ta’ xogħol, ta’ apprendistati u ta’ taħriġ ta’ kwalità. (21) L-iskemi ta’ Garanzija
għaż-Żgħażagħ jeħtieġ li jqisu
d-diversità u l-punti ta’ tluq differenti tal-Istati Membri fir-rigward
tal-livelli tal-qgħad fost iż-żgħażagħ, il-qafas
istituzzjonali, u l-kapaċità tad-diversi atturi tas-suq tax-xogħol.
Għandhom iqisu wkoll sitwazzjonijiet differenti fejn jidħlu
l-baġits pubbliċi u r-restrizzjonijiet finanzjarji b’rabta
mal-allokazzjoni tar-riżorsi[16].
Fl-AGS tal-2013, il-Kummissjoni tikkunsidra li, fejn hu possibbli,
għandhom jingħataw prijorità u jiġu msaħħa l-investimenti
fl-edukazzjoni, u dan filwaqt li tiġi żgurata l-effiċjenza ta’
tali nefqa. Trid tingħata attenzjoni partikolari wkoll liż-żamma
jew lir-riinfurzar tal-kopertura u tal-effettività tas-servizzi tax-xogħol
u tal-politiki dwar forza tax-xogħol attiva, bħalma huma
t-taħriġ għal min hu bla xogħol u l-iskemi ta’ Garanzija
għaż-Żgħażagħ. It-twaqqif ta’ skemi bħal
dawn għandu sinifikat fit-tul, iżda jinħass ukoll il-bżonn
ta’ azzjoni immedjata biex tindirizza l-effetti drammatiċi li l-kriżi
ekonomika qed ikollha fuq is-suq tax-xogħol.
JIRRAKKOMANDA LI L-ISTATI MEMBRI:
(1)
Jiżguraw li
ż-żgħażagħ kollha sal-età ta’ 25 sena
jirċievu offerta ta’ xogħol ta’ kwalità tajba, edukazzjoni kontinwa,
apprendistat jew taħriġ fi żmien erba' xhur minn meta jsiru
qiegħda jew minn meta jwaqqfu l-edukazzjoni formali. Meta jfasslu din l-iskema ta’ Garanzija
għaż-Żgħażagħ, l-Istati Membri għandhom
jikkunsidraw il-kwistjonijiet globali bħalma hu l-fatt li
ż-żgħażagħ ma humiex grupp omoġenju jħabbat
wiċċu mal-istess ambjent soċjali, kif ukoll il-prinċipji
ta’ obbligu reċiproku u l-ħtieġa li jkun indirizzat ir-riskju
ta' ċikli ta' inattività. L-iskemi ta' Garanzija
għaż-Żgħażagħ għandhom ikunu bbażati
fuq il-linji gwida li ġejjin, skont iċ-ċirkostanzi nazzjonali,
reġjonali u lokali u jqisu s-sess tal-individwu u d-diversità
taż-żgħażagħ fil-mira: It-tfassil ta’ approċċi
bbażati fuq is-sħubijiet (2)
Jidentifikaw l-awtorità pubblika responsabbli
mit-twaqqif u l-immaniġġjar tal-iskema ta’ Garanziji
għaż-Żgħażagħ u mill-koordinazzjoni ta’ sħubiji
fil-livelli u s-setturi kollha. (3)
Jaċċertaw li
ż-żgħażagħ ikollhom l-informazzjoni kollha dwar
is-servizzi u l-appoġġ disponibbli billi tissaħħaħ
il-kooperazzjoni bejn is-servizzi tax-xogħol, dawk li jagħtu pariri
dwar il-karrieri, l-istituzzjonijiet tal-edukazzjoni u t-taħriġ u
s-servizzi ta’ appoġġ liż-żgħażagħ, u billi
jintużaw b’mod sħiħ il-kanali tal-informazzjoni rilevanti
kollha. (4)
Isaħħu s-sħubijiet bejn min
iħaddem u l-atturi rilevanti tas-suq tax-xogħol (is-servizzi
tal-impjiegi, livelli differenti tal-gvern, it-trejdjunjins u s-servizzi
taż-żgħażagħ) sabiex jitkattru l-opportunitajiet ta’
xogħol, ta’ apprendistati u ta’ taħriġ
għaż-żgħażagħ. (5)
Jiżviluppaw sħubijiet bejn is-servizzi
tax-xogħol pubbliċi u privati, is-servizzi ta’ gwida għall-karrieri,
u servizzi taż-żgħażagħ speċjalizzati oħra
(NGOs, ċentri taż-żgħażagħ u
assoċjazzjonijiet) li jgħinu biex irattbu l-qabża
mill-qgħad, l-inattività jew l-edukazzjoni għax-xogħol. (6)
Jiżguraw l-involviment attiv tal-imsieħba
soċjali fil-livelli kollha f’dak li hu tfassil u implimentazzjoni ta’
politiki li għandhom iż-żgħażagħ fil-mira
tagħhom; jippromwovu sinerġiji permezz tal-inizjattivi tagħhom
biex ikunu żviluppati skemi ta’ apprendistat u taħriġ. (7)
Jiżguraw l-involviment tar-rappreżentanti
taż-żgħażagħ u/jew l-organizzazzjonijiet
taż-żgħażagħ fit-tfassil u l-implimentazzjoni
tal-iskema ta' Garanzija għaż-Żgħażagħ sabiex
jitfasslu servizzi li jaqdu l-ħtiġijiet tal-benefiċjarji, u biex
dawn l-istess rappreżentanti jkunu jistgħu jaġixxu bħala
multiplikaturi f'attivitajiet ta' sensibilizzazzjoni. Intervent u attivazzjoni fil-pront (8)
Jiżviluppaw strateġiji ta’ komunikazzjoni
effettiva biex jilħqu ż-żgħażagħ, bil-għan
li dawn jiġu identifikati mis-servizzi tal-impjiegi u jiġu
rreġistrati magħhom, u hekk ikun possibbli li dawn jiffukaw fuq
iż-żgħażagħ vulnerabbli li jiffaċċjaw
ħafna ostakli (bħall-esklużjoni soċjali, il-faqar jew
d-diskriminazzjoni) u n-NEETs, u dan filwaqt li jqisu l-isfondi differenti tagħhom
(b’mod partikolari minħabba l-faqar, xi diżabbiltà, edukazzjoni baxxa
jew minoranza etnika/familji migranti). (9)
Biex issostnu aħjar
liż-żgħażagħ, u biex jindirizzaw il-potenzjal ta’
nuqqas ta’ għarfien dwar l-offerti eżistenti, għandhom iqisu li
jistabbilixxu punt ċentrali (focal points), jiġifieri organizzazzjoni
li tiżgura l-koordinazzjoni bejn l-istituzzjonijiet kollha u
l-organizzazzjonijiet ikkonċernati, b'mod partikolari mal-awtorità
pubblika responsabbli mill-immaniġġar tal-iskema ta' Garanziji
għaż-Żgħażagħ, sabiex tkun tista’ tinqasam
informazzjoni dwar żgħażagħ li jkunu ħarġu
mill-iskola, b'mod partikolari dwar dawk li jkunu fir-riskju li ma jsibux
impjieg jew li ma jingħatawx edukazzjoni ogħla. (10)
Jippermettu lis-servizzi tax-xogħol, flimkien
mal-imsieħba l-oħra li jappoġġaw
liż-żgħażagħ, li minn kmieni jipprovdu gwida
personalizzata u ppjanar ta' azzjoni individwali, inklużi skemi ta'
appoġġ individwali mfassla apposta, ibbażati fuq
il-prinċipju tal-obbligu reċiproku. Miżuri ta’ sostenn
għall-integrazzjoni fis-suq tax-xogħol Titjib tal-ħiliet (11)
Joffru liż-żgħażagħ
b'ħiliet baxxi u lil dawk li joħorġu kmieni mill-iskola toroq
biex jaqbdu t-triq lura għall-edukazzjoni u t-taħriġ, jew biex
jattendu programmi ta’ edukazzjoni li jagħtuhom ċans ieħor,
programmi li joffru ambjenti ta' tagħlim li jirrispondu
għall-bżonnijiet speċifiċi tagħhom u li
jippermettulhom jiksbu l-kwalifika li tilfu. (12)
Jiżguraw li kull azzjoni mressqa fil-kuntest
ta’ skema ta' Garanziji għaż-Żgħażagħ u li
fil-mira tagħha jkun hemm it-tisħiħ tal-ħiliet u
l-kompetenzi, tgħin biex jiġu indirizzati d-diskrepanzi bejn
il-ħiliet li jesiġi s-suq tax-xogħol u dawk li hemm disponibbli
u biex tibda tiġi sodisfatta d-domanda tas-suq, partikolarment b’rabta
mas-setturi tal-ekonomija ekoloġika, tal-ICT u tas-saħħa. (13)
Jiżguraw li l-isforzi biex jikbru
l-ħiliet u l-kompetenzi jkunu jinkludu l-ħiliet diġitali/fl-ICT.
Jippromwovu l-istatus ta’ għarfien u kompetenzi professjonali billi
jiżguraw li l-curricula u ċ-ċertifikazzjonijiet tal-ICT
ikunu jikkonformaw mal-istandards u li jkunu rikonoxxuti internazzjonalment. (14)
Jinkoraġġixxu lill-iskejjel (tal-primarja
u sekondarji), inklużi ċ-ċentri tat-taħriġ
vokazzjonali, u lis-servizzi tal-impjiegi, jippromwovu u jipprovdu gwida
kontinwa liż-żgħażagħ dwar l-intraprenditorija u
x-xogħol għal rashom, inkluż permezz ta’ korsijiet
fl-intraprenditorija. (15)
Jiżguraw is-siwi tal-ħiliet,
tal-għarfien u tal-kompetenzi miksuba permezz ta’ esperjenzi miksba
mit-tagħlim mhux formali u dak informali, billi jirrikonoxxu
l-ħiliet, l-għarfien u l-kompetenzi miksuba f'dawn l-attivitajiet u
jirrikonoxxu li dawn ikunu ta’ vantaġġ għal min ifittex
xogħol. Miżuri relatati mas-suq
tax-xogħol (16)
Inaqqsu l-kosti tax-xogħol mhux marbuta
mal-pagi sabiex jagħtu spinta lill-prospettivi ta’ reklutaġġ
fost iż-żgħażagħ. (17)
Jużaw sussidji mmirati u mfassla sew
għall-pagi u r-reklutaġġ biex iħeġġu lil min
iħaddem joħloq opportunitajiet ġodda
għaż-żgħażagħ, bħal apprendistati,
taħriġ jew pjazzament tax-xogħol, partikolarment għal dawk
l-aktar imbiegħda mis-suq tax-xogħol, u dan f'konformità mar-regoli
applikabbli għall-għajnuna mill-Istat. (18)
Jippromwovu l-mobbiltà tax-xogħol billi
liż-żgħażagħ jagħmluhom konxji minn offerti
għal impjiegi, apprendistati u taħriġ u mis-sostenn disponibbli
f'oqsma, reġjuni u pajjiżi differenti, eż. permezz ta’ servizzi
u skemi, bħall-EURES, li jinkoraġġixxu lin-nies
jiċċaqilqu u jaħdmu fl-UE. Jiżguraw li jkun disponibbli
appoġġ adegwat biex iż-żgħażagħ jiġu
megħjuna jsibu xogħol f’qasam ieħor jew fi Stat Membru
ieħor adattati għall-ambjent ġdid tagħhom. (19)
Iżidu s-servizzi ta’ appoġġ
għal min jibda negozju, inkluż permezz ta' kooperazzjoni aktar
mill-qrib bejn is-servizzi tax-xogħol, l-appoġġ lin-negozji u
l-fornituri (mikro)finanzjarji. (20)
Isaħħu l-mekkaniżmi biex
jappoġġaw liż-żagħżagħ li jitilqu minn skemi
ta’ attivazzjoni u li ma jibqax ikollhom aċċess
għall-benefiċċji. L-użu tal-Fondi Strutturali tal-UE (21)
Jagħmlu l-aħjar użu, u użu
b'mod sħiħ, mill-istrumenti ta' finanzjament tal-Politika ta’
Koeżjoni, fil-perjodu li jmiss 2014-2020, biex isostnu t-twaqqif ta’
Garanziji għaż-Żgħażagħ. Biex jintlaħaq dan
l-għan, jiżguraw li tingħata l-prijorità mistħoqqa u li
r-riżorsi korrispondenti jkunu allokati għas-sostenn tal-tfassil u
tal-implimentazzjoni tal-miżuri msemmija hawn fuq, inklużi
l-possibbiltajiet ta’ finanzjament mill-Fond Soċjali Ewropew tas-sussidji
għar-reklutaġġ fil-mira. Jagħmlu użu massimu wkoll
mill-finanzjament li jkun għad hemm disponibbli mill-perjodu ta’
pprogrammar 2007-2013. (22)
Fil-kuntest tat-tħejjija għall-perjodu
2014-2020, fil-Kuntratt tas-Sħubiji jagħtu l-attenzjoni xierqa
lill-objettivi speċifiċi marbuta mal-implimentazzjoni tal-iskemi ta’
Garanzija taż-Żgħażagħ, u fil-programmi ta’ operat
tagħhom jiddeskrivu l-azzjonijiet li jkunu se jiġu sostnuti skont
il-prijoritajiet ta’ investiment rilevanti tal-Fond Soċjali Ewropew, b’mod
partikolari dawk marbuta mal-integrazzjoni sostenibbli ta’
żgħażagħ "NEETs" fis-suq tax-xogħol u
mal-appoġġ lill-intraprendituri żgħażagħ u
lill-intrapriżi soċjali u l-kontribut rispettiv tagħhom
għall-objettivi speċifiċi. Valutazzjoni u titjib kontinwu tal-iskemi (23)
Jissorveljaw u jevalwaw l-azzjonijiet u l-programmi
kollha marbuta mal-Garanzija għaż-Żgħażagħ, hekk
li jkunu jistgħu jiġu żviluppati aktar politiki msejsa fuq
l-evidenza u l-interventi jkunu jistgħu jiġu żviluppati
abbażi ta’ x’jaħdem, fejn u għaliex, tant li jkun żgurat
l-użu effiċjenti tar-riżorsi u r-redditu pożittiv fuq
l-investiment. Iżommu stampa aġġornata ta’ kemm ikun ġie
allokat finanzjament għat-twaqqif u l-implimentazzjoni tal-Garanzija għaż-Żgħażagħ,
b'mod partikolari mill-programmi operattivi tal-Politika ta' Koeżjoni. (24)
Jippromwovu attivitajiet ta’ tagħlim
reċiproku fil-livell nazzjonali, reġjonali u lokali bejn il-partijiet
kollha involuti fil-ġlieda kontra l-qgħad fost
iż-żgħażagħ, u dan biex jitjieb it-tfassil u t-twassil
tal-iskemi ta’ Garanzija għaż-Żgħażagħ
fil-ġejjieni. Jagħmlu użu sħiħ mir-riżultati
tal-proġetti appoġġati matul l-azzjoni preparatorja dwar
l-iskemi ta’ Garanzija għaż-Żgħażagħ. (25)
Isaħħu l-kapaċitajiet ta’ dawk
kollha interessati, inklużi s-servizzi tal-impjieg rilevanti, involuti
fit-tfassil, fl-implimentazzjoni u fl-evalwazzjoni tal-iskemi ta’ Garanziji
għaż-Żgħażagħ, sabiex jiġu eliminati
l-ostakli interni u esterni marbuta mal-politika u mal-mod kif dawn l-iskemi
jiġu żviluppati. L-implimentazzjoni ta’ skemi ta' Garanziji
għaż-Żgħażagħ (26)
Jimplimentaw skemi ta’ Garanzija
għaż-Żgħażagħ mill-aktar fis possibbli u
jiżguraw li dawn ikunu integrati sew fil-programmi kofinanzjati mill-UE
tal-ġejjieni, preferibbilment sa mill-bidu tal-Qafas Finanzjarju Multiannwali
2014-2020.
JINNOTA LI L-KUMMISSJONI GĦANDHA:
Finanzjament (27)
Skont il-prijoritajiet ta’ investiment rilevanti
tal-Fond Soċjali Ewropew għall-perjodu ta’ pprogrammar ta’ bejn
l-2014 u l-2020, tħeġġeġ lill-Istati Membri biex
jagħmlu l-aħjar użu mill-Fond Soċjali Ewropew biex isostnu
t-twaqqif u l-implimentazzjoni ta’ Skemi ta' Garanziji
taż-Żgħażagħ bħala strument ta’ politika biex
jiġġieldu u jipprevjenu l-qgħad fost
iż-żgħażagħ u l-esklużjoni soċjali. (28)
Issostni l-ħidma fuq l-ipprogrammar skont
il-Fondi tal-UE għal Qafas Strateġiku Komuni (il-Fond Soċjali
Ewropew, il-Fond Ewropew għall-Iżvilupp Reġjonali, il-Fond ta'
Koeżjoni, il-Fond Agrikolu Ewropew għall-Iżvilupp Rurali,
il-Fond Ewropew għall-Affarijiet Marittimi u tas-Sajd), inkluż
permezz ta' tagħlim bejn il-pari, attivitajiet ta' networking u assistenza
teknika. Prassi tajba (29)
Tagħmel użu sħiħ mill-Programm
il-ġdid dwar il-Bidla Soċjali u l-Innovazzjoni biex jinġabru
eżempji ta’ prassi tajba dwar l-iskemi ta’ Garanzija
għaż-Żgħażagħ fil-livell nazzjonali, reġjonali
u lokali. (30)
Tuża l-Programm għat-Tagħlim
Reċiproku tal-Istrateġija Ewropea dwar l-Impjiegi biex
tinkoraġġixxi lill-Istati Membri jaqsmu bejniethom l-esperjenzi
tagħhom u jiskambjaw il-prassi tajba. Monitoraġġ (31)
Tkompli tissorvelja u tirrapporta regolarment dwar
l-iżviluppi marbuta mad-disinn, l-implimentazzjoni u r-riżultati
tal-iskemi tal-Garanzija għaż-Żgħażagħ bħala
parti mill-programm annwali tan-Netwerk Ewropew tas-Servizzi tal-Impjieg
Pubbliku. (32)
Tissorvelja l-implimentazzjoni ta’ din
ir-Rakkomandazzjoni, u permezz tal-Kumitat tal-Impjiegi tistabbilixxi
sorveljanza multilaterali tal-implimentazzjoni ta’ skemi ta' Garanziji
għaż-Żgħażagħ fil-qafas tas-Semestru Ewropew,
tanalizza l-impatt tal-politiki fis-seħħ u tindirizza, fejn ikun
il-lok, rakkomandazzjonijiet speċifiċi għall-pajjiż
lill-Istati Membri. Aktar għarfien (33)
Tappoġġa l-attivitajiet li jqajmu
għarfien dwar it-twaqqif ta’ Garanzija
għaż-Żgħażagħ fl-Istati Membri, billi tuża
l-Portal Ewropew taż-Żgħażagħ u tikkoordina b'mod
partikolari mal-kampanji ta' informazzjoni tiegħu. Magħmul fi Brussell, Għall-Kunsill Il-President [1] L-indikaturi ewlenin tal-Forza tax-Xogħol
tal-Eurostat, dejta trimestrali aġġustata kull staġun
b’żgħażagħ qed jinftiehem dawk li għandhom inqas minn
25 sena; b’adulti dawk li qabżu l-25. [2] COM(2012) 750
tat-28 ta’ Novembru 2012. [3] Aktar informazzjoni f’: http://ec.europa.eu/social/main.jsp?langId=en&catId=88&eventsId=641 [4] Aktar informazzjoni dwar l-ispejjeż u
l-benefiċċji tal-implimentazzjoni ta’ skemi ta' Garanziji
taż-Żgħażagħ tinsab fid-Dokument ta’ Ħidma
tal-Persunal li jakkumpanja din il-proposta. [5] Eurofound (2012) NEETs – Żgħażagħ
barra mill-edukazzjoni, impjieg jew taħriġ: Karatteristiċi,
spejjeż u rispons għall-politika fl-Ewropa, Uffiċċju
tal-Pubblikazzjonijiet tal-Unjoni Ewropea, il-Lussemburgu. [6] Id-Deċiżjoni tal-Kunsill 2010/707/UE – ĠU
L 308/46 tal-24 ta’ Novembru 2010. [7] Id-Deċiżjoni tal-Kunsill 2005/600/KE – ĠU
L 205/21 tas-6 ta' Awwissu 2005. [8] Linji gwida dwar għall-politika dwar l-impjiegi
(2008-2010) – Id-Deċiżjoni tal-Kunsill 2008/618/KE – ĠU
L 198/51 tas-26 ta’ Lulju 2008. [9] P7-TA(2010)
0262 tas-6 ta’ Lulju 2010. [10] ĠU C 191/01 tal-1 ta' Lulju 2011. [11] COM(2012) 173 tat-18 ta’ April 2012. [12] COM(2012) 582 tal-10 ta’ Ottubru 2012. [13] Ir-Riżoluzzjoni tal-Parlament Ewropew dwar
l-Inizjattiva dwar l-Opportunitajiet taż-Żgħażagħ
(2012/2617(RSP)), 24.5.2012. [14] COM(2012) 669
tal-20 ta’ Novembru 2012. [15] COM(2012) 750
tat-28 ta’ Novembru 2012. [16] L-ispiża fuq il-Garanzija
taż-Żgħażagħ ma taqax fil-kategorija tal-formazzjoni
tal-kapital fiss gross fil-kontijiet nazzjonali.