EUR-Lex Access to European Union law
This document is an excerpt from the EUR-Lex website
Document 52011DC0455
COMMUNICATION FROM THE COMMISSION TO THE EUROPEAN PARLIAMENT, THE COUNCIL, THE EUROPEAN ECONOMIC AND SOCIAL COMMITTEE AND THE COMMITTEE OF THE REGIONS European Agenda for the Integration of Third-Country Nationals
KOMUNIKAZZJONI MILL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT SOĊJALI U EKONOMIKU EWROPEW U LILL-KUMITAT TAR-REĠJUNI Aġenda Ewropea għall-Integrazzjoni ta' Persuni bin-Nazzjonalità ta' Pajjiżi Terzi
KOMUNIKAZZJONI MILL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT SOĊJALI U EKONOMIKU EWROPEW U LILL-KUMITAT TAR-REĠJUNI Aġenda Ewropea għall-Integrazzjoni ta' Persuni bin-Nazzjonalità ta' Pajjiżi Terzi
/* KUMM/2011/0455 finali */
KOMUNIKAZZJONI MILL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT SOĊJALI U EKONOMIKU EWROPEW U LILL-KUMITAT TAR-REĠJUNI Aġenda Ewropea għall-Integrazzjoni ta' Persuni bin-Nazzjonalità ta' Pajjiżi Terzi /* KUMM/2011/0455 finali */
WERREJ 1........... L-INTEGRAZZJONI BĦALA MOD
KIF INWETTQU L-POTENZJAL TAL-MIGRAZZJONI 2 2........... L-IMMANIĠĠJAR
TAL-INTEGRAZZJONI HIJA RESPONSABBILTÀ KOMUNI 4 A........... INTEGRAZZJONI PERMEZZ
TAL-PARTEĊIPAZZJONI.......................................... 4 B........... AKTAR AZZJONI FIL-LIVELL LOKALI................................................................... 9 C........... INVOLVIMENT TAL-PAJJIŻI
TAL-ORIĠINI.......................................................... 10 3........... IT-TRIQ ’IL QUDDIEM.......................................................................................... 12
1.
L-INTEGRAZZJONI BĦALA MOD KIF INWETTQU
L-POTENZJAL TAL-MIGRAZZJONI
Fl-aħħar deċenni,
il-migrazzjoni fil-biċċa l-kbira tal-Istati Membri tal-UE
żdiedet. Il-migranti minn pajjiżi terzi jirrappreżentaw madwar
erbgħa fil-mija tal-popolazzjoni totali fl-UE[1]. Hekk, il-mod kif inhi
magħmula l-popolazzjoni tal-UE qed jinbidel, u s-soċjetajiet Ewropej
qed iħabbtu wiċċhom ma' diversità li qed tiżdied. Dan
iwassal għal kundizzjonijiet ġodda għall-koeżjoni soċjali
u għal rispons governattiv għat-tħassib tal-pubbliku. L-Ewropa hija wkoll influwenzata bil-kbir
mit-tibdiliet demografiċi, inkluża l-popolazzjoni li qed
tixjieħ, medji ogħla tal-għomor tal-bniedem u popolazzjoni
fl-età tax-xogħol li qed tonqos[2].
Il-migrazzjoni legali tista' tgħin biex jiġu indirizzati dawn
il-kwistjonijiet, flimkien mal-massimizzazzjoni tal-użu tal-forza
tax-xogħol u tal-ħiliet li diġà huma disponibbli fl-UE u
mat-titjib tal-produttività tal-ekonomija tal-UE. Ix-xejriet demografiċi
jvarjaw minn reġjun għall-ieħor u jeħtieġ li jiġu
indirizzati permezz ta' soluzzjonijiet imfasslin apposta. Jekk trid tikseb
il-benefiċċji sħaħ tal-migrazzjoni, l-Ewropa
jeħtieġ li ssib mod kif tkampa aħjar mas-soċjetajiet
diversi u multikulturali tagħha permezz ta' integrazzjoni aktar effettiva
tal-migranti tagħha. L-Istrateġija Ewropa 2020[3] u l-Programm ta' Stokkolma[4] jirrikonoxxu bis-sħiħ
il-potenzjal tal-migrazzjoni fil-bini ta' ekonomija kompetittiva u sostenibbli
u jistabbilixxu, bħala mira politika ċara, l-integrazzjoni effettiva
tal-migranti legali msejsa fuq ir-rispett ta' jeddijiet il-bniedem u
tal-promozzjoni tagħhom[5]. L-Istati Membri kkonfermaw l-impenn
tagħhom biex ikomplu jiżviluppaw l-idea fundamentali
tal-integrazzjoni bħala mutur għall-iżvilupp ekonomiku u
għall-koeżjoni soċjali, sabiex jitjieb aktar il-kontribut
tal-migranti għat-tkabbir ekonomiku u għall-għana kulturali[6]. Diġà hemm qafas
għall-koperazzjoni tal-UE dwar l-integrazzjoni permezz tal-Prinċipji
Bażiċi Komuni għal-Linja Politika dwar l-Integrazzjoni
tal-Immigranti fl-Unjoni Ewropea, li l-Kunsill qabel dwarhom fl-2004[7]. Il-Prinċipji jisħqu
li l-integrazzjoni hija proċess dinamiku bidirezzjonali ta’ akkomodazzjoni
reċiproka bejn l-immigranti u s-soċjetajiet li jilqgħuhom.
L-azzjonijiet kollha tal-UE li ppreżentat il-Kummissjoni fl-Aġenda
Komuni tal-2005 għall-Integrazzjoni tlestew[8].
Madanakollu, il-kuntest soċjali, ekonomiku u politiku nbidel u mhux
il-miżuri kollha favur l-integrazzjoni rnexxielhom jilħqu l-miri
tagħhom. Il-linji politiċi favur l-integrazzjoni jeħtieġu
wkoll ir-rieda u l-impenn min-naħa tal-migranti li jkunu parti
mis-soċjetà li tilqagħhom. L-introduzzjoni ta' dispożizzjoni legali
ġdida fit-Trattat rigward appoġġ mill-UE għall-promozzjoni
tal-integrazzjoni ta' persuni bin-nazzjonalità ta' pajjiżi terzi[9] li joqogħdu fl-Istati
Membri legalment (l-Artikolu 79.4 TFUE) tippermetti aktar azzjoni komuni
filwaqt li tiġi eskluża l-armonizzazzjoni. Din l-azzjoni trid
tagħti kas tal-fatt li l-kuntest demografiku, soċjali, ekonomiku u politiku
nbidel. Iċ-ċifri[10] jikkonfermaw li l-aktar sfidi
urġenti jinkludu: · il-livelli baxxi prevalenti ta' migranti li għandhom xogħol,
speċjalment fir-rigward tal-migranti nisa, · qgħad li qed jikber u livelli għoljin ta' nies 'bi kwalifiki
ogħla minn dawk meħtiġin', · riskji li qed jikbru tal-esklużjoni soċjali, · differenzi fil-kisbiet ta' riżultati fl-edukazzjoni, · tħassib tal-pubbliku dwar in-nuqqas ta' integrazzjoni
tal-migranti. L-Aġenda Ewropea mġedda
għall-Integrazzjoni taċ-Ċittadini minn Pajjiżi Terzi hija
kontribut għad-dibattitu dwar kif l-integrazzjoni għandha tiġi
mifhuma u sostnuta aħjar. Tissuġġerixxi diversi metodi li
nistgħu nirrikorru għalihom, skont l-isfidi differenti
tal-integrazzjoni li jħabbtu wiċċhom magħhom tipi
differenti ta' migranti, kemm dawk bi ftit ħiliet kif ukoll dawk
b'ħafna, kif ukoll il-benefiċjarji tal-protezzjoni internazzjonali.
Jeħtieġ li l-Ewropa tieħu attitudni pożittiva lejn
id-diversità u li tipprovdi garanziji b'saħħithom
għall-jeddijiet fundamentali u għat-trattament indaqs, b'mod li jibni
fuq ir-rispett reċiproku bejn kulturi u tradizzjonijiet differenti. Hemm
bżonn ukoll ta' azzjonijiet immirati lejn il-gruppi vulnerabbli ta'
migranti. Filwaqt li tibbaża ruħha fuq
esperjenzi minn madwar l-UE kollha kemm hi, din il-Komunikazzjoni tenfasizza
l-isfidi Ewropej rigward l-integrazzjoni. Sabiex jiġu indirizzati dawn
l-isfidi, tipproponi rakkomandazzjonijiet u oqsma fejn trid tittieħed
azzjoni. Flimkien mad-Dokument ta' Ħidma tal-Pesunal tal-Kummissjoni ta'
magħha, tipprovdi ħarsa ġenerali lejn l-inizjattivi li
ħadet l-UE biex tiġi sostnuta l-integrazzjoni ta' persuni
bin-nazzjonalità ta' pajjiżi terzi. L-UE tista' tikkontribwixxi biex
tingħata direzzjoni u gwida lill-isforzi tal-Istati Membri permezz ta'
strumenti differenti. L-Aġenda Ewropea għall-Integrazzjoni ma tistax
titwettaq permezz tal-istrumenti Ewropej waħedhom. L-integrazzjoni hija
proċess dinamiku u li jieħu ż-żmien, u titlob li jsiru
sforzi minn firxa wiesgħa ta' atturi f'oqsma differenti ta' linji
politiċi u f'diversi livelli. Hija din
ir-raġuni għaliex ir-rakkomandazzjonijiet inklużi f'din
il-komunikazzjoni huma mmirati lejn l-atturi kollha involuti fil-proċess
tal-integrazzjoni.
2.
L-IMMANIĠĠJAR TAL-INTEGRAZZJONI HIJA
RESPONSABBILTÀ KOMUNI
Fid-dawl ta' dan ta' hawn fuq, huwa ċar
li jeħtieġ li l-linji politiċi favur l-integrazzjoni
joħolqu kundizzjonijiet favorevoli għas-sehem ekonomiku,
soċjali, kulturali u politiku tal-migranti sabiex jitwettaq il-potenzjal
tal-migrazzjoni. Is-soluzzjonijiet effettivi għall-isfidi li toffri
l-integrazzjoni jridu jinstabu f'kull kuntest nazzjonali u lokali, iżda
minħabba li dawn l-isfidi huma komuni għal bosta Stati Membri, dawn
jistgħu jaqsmu bejniethom l-esperjenzi. Għalkemm id-determinazzjoni
tal-istrateġiji għall-integrazzjoni mhix il-prerogattiva tal-UE, l-UE
tista' tipprovdi qafas għall-moniteraġġ, għall-valutazzjoni
komparattiva u għall-iskambju tal-prattika tajba, u toħloq
inċentivi permezz tal-istrumenti finanzjarji Ewropej. Eżempji ta'
skambju tal-prattika tajba u tal-konoxxenza huma ppreżentati fid-Dokument
ta' Ħidma tal-Pesunal tal-Kummissjoni li jakkumpanja lil din
il-Komunikazzjoni. L-integrazzjoni hija marbuta ma' qafas ta'
leġiżlazzjoni u ta' linji politiċi li huwa ddefinit u kkoordinat
fil-livell tal-UE[11].
Li niżguraw li jkun hemm qafas leġiżlattiv għat-trattament
indaqs u għall-għoti ta' livell xieraq ta' jeddijiet lill-migranti
kollha huwa parti mill-azzjoni tal-UE favur l-integrazzjoni. Jeħtieġ
li fl-oqsma rilevanti kollha jingħata kas bis-sħiħ
tal-prijoritajiet tal-integrazzjoni, sabiex nikkontribwixxu b'mod koerenti biex
jintrebħu l-isfidi tal-integrazzjoni u jintlaħqu prijoritajiet
politiċi oħrajn. L-integrazzjoni hija proċess li
l-ħin kollu jevolvi, li jitlob moniteraġġ mill-qrib, sforzi ma
jaqtgħu xejn, metodi innovattivi u ideat kuraġġużi. Mhux
faċli biex jiġu ddefiniti s-soluzzjonijiet iżda jekk il-migranti
jirnexxilhom jintegraw fl-UE, dan ikun ifisser kontribut sinifikanti biex l-UE
tilħaq l-għanijiet li ffissat fl-Istrateġija Ewropa 2020,
jiġifieri li sal-2010 r-rata tal-okkupazzjoni tkun telgħet għal
75%, li r-rati ta' nies li jitilqu mill-iskola kmieni jitnaqqsu għal
taħt l-10%, li jkun hemm aktar mill-popolazzjoni li jtemmu l-edukazzjoni
terzjarja u li 20 miljun ruħ jintrefgħu mill-faqar u
mill-esklużjoni soċjali[12]. L-azzjonijiet proposti jiffukaw fuq l-oqsma
ewlenin li ġejjin: A. Integrazzjoni permezz
tal-parteċipazzjoni. B. Aktar azzjoni fil-livell lokali. C. Involviment tal-pajjiżi
tal-oriġini. A. INTEGRAZZJONI PERMEZZ TAL-PARTEĊIPAZZJONI L-integrazzjoni hija proċess li jibda
fost in-nies, u jeħtieġ li l-linji politiċi favur
l-integrazzjoni jiġu żviluppati b'metodu ġenwin li jibda minn
isfel u jibqa' tiela' għal fuq, qrib il-livell lokali. Tali linji politiċi
jinkludu azzjonijiet bħas-sostenn għat-tagħlim tal-ilsna,
miżuri introduttorji, aċċess għax-xogħol,
għall-edukazzjoni u għat-taħriġ vokazzjonali, u
l-ġlieda kontra d-diskriminazzjoni, u li kollha kemm huma għandhom
l-għan li jkabbru l-parteċipazzjoni tal-migranti fis-soċjetà. L-integrazzjoni titlob l-impenn,
mis-soċjetà li tilqa' lill-migranti, li takkomodahom, tirrispetta
l-jeddijiet u l-kulturi tagħhom, u tgħarrafhom dwar l-obbligi
tagħhom. Fl-istess ħin, jeħtieġ li l-migranti juru li jridu
jintegraw u jirrispettaw ir-regoli u l-valuri tas-soċjetà li jkunu qed
jgħixu fiha. 1. Il-kontribut
soċjoekonomiku tal-migranti 1.1. Il-ksib tal-konoxxenza
tal-ilsna Hemm qbil ġenerali li l-kisba ta'
ħakma tal-ilsna hija kruċjali għall-integrazzjoni. Ħiliet
imtejbin fl-użu tal-ilsna jwasslu għal opportunitajiet aħjar ta'
xogħol, għall-indipendenza u għall-parteċipazzjoni
tal-migranti nisa fis-suq tax-xogħol. It-taħriġ fl-ilsna, kif ukoll
il-programmi introduttorji, iridu jkunu aċċessibbli kemm
finanzjarjament kif ukoll ġeografikament. Huwa importanti li jiġu offruti
livelli differenti ta' korsijiet tal-ilsna msejsin fuq il-konoxxenza
tal-parteċipanti u fuq il-kundizzjonijiet għat-tagħlim. Jista'
jkun rilevanti li, meta jiġu biex jiġu ddeterminati l-livelli
tal-ħiliet fl-ilsna, jintuża l-Qafas ta' Referenza Komuni Ewropew
għall-Ilsna (Common European Framework of Reference for Languages, CEFR),
li huwa bażi żviluppata mill-Kunsill tal-Ewropa
għar-rikonoxximent reċiproku tal-kwalifiki tal-ilsna[13]. 1.2. Parteċipazzjoni fis-suq
tax-xogħol F'bosta Stati Membri, teżisti differenza
konsiderevoli fil-livelli tal-impjiegi bejn persuni bin-nazzjonalità ta'
pajjiżi terzi u ċ-ċittadini tal-UE. Fl-2010, ir-rata
tal-okkupazzjoni tal-persuni b'nazzjonalità ta' pajjiżi terzi fl-età ta'
bejn l-20 u l-64 kienet 10 punti perċentwali inqas minn dik
tal-popolazzjoni totali fl-istess faxxa ta' età fil-livell tal-UE[14]. B'mod partikulari, ir-rati
tal-impjieg tan-nisa migranti huma sostanzjalment iktar baxxi, kemm mir-rata
medja tal-impjieg kif ukoll mir-rati tal-impjieg tal-migranti rġiel[15]. Minħabba li
l-parteċipazzjoni fis-suq tax-xogħol hija waħda mill-aħjar
modi, u fost l-aktar konkreti, biex wieħed jintegra ruħu
fis-soċjetà, sforzi biex jitnaqqsu dawn id-differenzi għandhom ikunu
mmirati kemm għall-migranti tax-xogħol kif ukoll għall-migranti
li jiġu fl-UE fil-kuntest tal-għaqda mill-ġdid tal-familja jew
bħala benefiċjarji tal-protezzjoni internazzjonali. Fl-Istati Membri kollha fejn hija disponibbli
d-dejta wieħed jista' jinnota l-kwalifikazzjoni ogħla milli hemm
bżonn fost il-persuni bin-nazzjonalità ta' pajjiżi terzi,
speċjalment tan-nisa[16].
Il-migranti qiegħda jew il-migranti li jagħmlu xogħlijiet li
jirrikjedu kwalifiki iktar baxxi minn dawk li għandhom huma riżorsa
mhux użata tajjeb biżżejjed u ħela ta' kapital uman. Barra
minn hekk, din is-sitwazzjoni tista' titqies mill-migranti bħala
degradanti. Għandhom jiġu
żviluppati servizzi li jkollhom l-għan li jippermettu r-rikonoxximent
ta' kwalifiki u kompetenzi mill-pajjiż tal-oriġini, b'mod li
jiġu ffaċilitati l-possibbiltajiet tal-immigranti li jsibu
xogħol li jkun jaqbel mal-ħiliet tagħhom. Mappatura
tal-isfond edukattiv, tal-esperjenza ta' qabel fid-dinja tax-xogħol,
tal-paragunabbiltà tad-diplomi u tal-kwalifiki, u li tidentifika
l-ħtieġa li jista' jkun hemm għal taħriġ hija l-ewwel
pass. It-tieni nett, huwa importanti wkoll li jkun
hemm trasparenza fl-informazzjoni rigward il-postijiet tax-xogħol
disponibbli u dwar is-sostenn tas-servizz pubbliku dwar l-impjiegi. L-irwol ta'
min iħaddem u tas-sħab soċjali fil-promozzjoni tad-diversità u
fil-ġlieda kontra d-diskriminazzjoni, huwa kruċjali. Għandhom
jissaħħu wkoll l-irwol importanti tal-migranti bħala
imprendituri kif ukoll il-kreattività u l-kapaċità tagħhom li
jagħmlu innovazzjonijiet[17],
bl-appoġġ tal-awtoritajiet, permezz ta' informazzjoni dwar
il-kundizzjonijiet biex wieħed jibda negozju. It-tielet nett, jeħtieġ li jiġu
organizzati programmi introduttorji sabiex migranti li jkunu għadhom kif
waslu jsibu appoġġ biex isibu xogħol u f'oqsma vitali
oħrajn tas-soċjetajiet li jilqgħu. Il-miżuri introdutturji jistgħu jiġu inkwadrati fi ftehim
kuntrattwali sabiex jiġi żgurat l-impenn u jiddaħħlu
l-obbligi u l-jeddijiet fuq iż-żewġ naħat. 1.3. Sforzi fis-sistema edukattiva Il-biċċa l-kbira tal-pajjiżi
tal-UE għandhom proporzjon li qed jikber ta' studenti bi sfond ta'
migrazzjoni[18].
Jeħtieġ li s-sistemi tal-iskejjel jadattaw għad-diversità li qed
tiżdied fost l-istudenti, sabiex joffru edukazzjoni ta' kwalità għal
kulħadd u sabiex jagħmlu kapital mill-potenzjal ta' din id-diversità.
Sabiex jiġi ffaċilitat it-tagħlim b'suċċess
tal-ilsien, ikun ta' benefiċċju jekk jittieħdu miżuri minn
età bikrija, sa mill-istadju preskolari. Il-livell edukattiv medju ta' persuni
bin-nazzjonalità ta' pajjiżi terzi huwa iktar baxx minn dak
taċ-ċittadini tal-UE[19].
Iż-żgħażagħ bi sfond ta' migrazzjoni jinsabu f'riskju
akbar li jitilqu mis-sistema tal-edukazzjoni u tat-taħriġ
mingħajr ma jkunu kisbu kwalifika sekondarja ogħla. Jeħtieġ
li jsiru sforzi addizzjonali sabiex iż-żgħażagħ
migranti ma jitilqux l-iskola kmieni[20]. Jeħtieġ li l-għalliema u membri
oħra tal-istaff jirċievu tħarriġ dwar
l-immaniġġjar tad-diversità. Anki l-ingaġġ tal-migranti
bħala għalliema jew fil-forza tax-xogħol li tieħu ħsieb
lit-tfal jista' jkun utli kemm biex jinkuraġġixxi t-tagħlim fi
klassijiet b'konċentrazzjoni ta' migranti kif ukoll bħala mezz kif
is-sistemi nazzjonali tal-edukazzjoni jinfetħu aktar għal kulturi
Ewropej u non-Ewropej oħrajn. Il-klassijiet tal-ilsna
għall-ġenituri b'rabta mal-gwida, il-mentoring u t-tutoring ta'
wliedhom fl-iskola, huma eżempji ta' azzjonijiet utli. L-iskejjel fi
nħawi partikularment żvantaġġati b'konċentrazzjoni
kbira ta' żgħażagħ migranti jista' jiżviluppaw
programmi, sistemi tal-mentoring u aċċess għat-taħriġ
speċjalizzati bil-għan li jkollhom vantaġġi kompetittivi. 1.4. Niżguraw kundizzjonijiet
aħjar tal-għajxien Miżuri favur l-inklużjoni
soċjali li jkunu mmirati lejn il-migranti għandu jkollhom l-għan
li jwarrbu x-xkiel li jista' jkun hemm għall-aċċess effettiv
għas-servizzi soċjali u tas-saħħa u jissieltu kontra
l-faqar u l-esklużjoni ta' dawk li huma l-aktar vulnerabbli[21]. L-integrazzjoni
tal-benefiċjarji tal-protezzjoni internazzjonali titlob attenzjoni
partikulari. Spiss ikunu għaddew mit-tiġrib, li minħabba fih
ikunu jeħtieġu servizzi soċjali u psikoloġiċi
speċifiċi. Għaldaqstant, il-linji politiċi għandhom
ikunu mfasslin biex jimminimizzaw l-iżolament ta' dawk li jgawdu
mill-protezzjoni internazzjonali u r-restrizzjonijiet għal jeddijiethom, u
biex jipprovdu għal tagħlim effettiv tal-lingwi, għal
aċċess għall-akkomodazzjoni, għal aċċess
għas-servizzi tas-saħħa f'sistemi tas-saħħa li
jippromwovu l-integrazzjoni u għal programmi tal-promozzjoni
tas-saħħa adattati kulturalment. Għandha ssir enfasi wkoll fuq
l-aċċess għat-taħriġ vokazzjonali u
għall-assistenza fit-tiftix għal xogħol. Is-sitwazzjoni tal-persuni Roma li
għandhom in-nazzjonalità ta' pajjiżi terzi u li joqogħdu fl-UE
legalment titlob attenzjoni partikulari. 1.5. Użu aħjar
tal-finanzjament tal-UE Għalhekk, għandu jsir użu
aħjar mill-istrumenti eżistenti tal-UE biex tiġi sostnuta
l-parteċipazzjoni tal-migranti u t-twettiq ta' linji politiċi favur
integrazzjoni minn isfel għal fuq. Il-Fond Ewropew
għall-Integrazzjoni ta’ Ċittadini ta’ Pajjiżi Terzi u l-Fond
Ewropew għar-Refuġjati jappoġġjaw miżuri bħalma
huma skemi tal-ilqugħ u introduttorji, parteċipazzjoni fil-ħajja
soċjali u ċivika, u aċċess indaqs għas-servizzi. Dawn
huma kkumplimentati minn miżuri sabiex jiġi ffaċilitat
l-aċċess għas-suq tax-xogħol u l-integrazzjoni fih, li huma
ffinanzjati taħt il-Fond Soċjali Ewropew, u l-Fond Ewropew
għall-Iżvilupp Reġjonali jista' jsostni firxa wiesgħa ta'
miżuri favur l-integrazzjoni fil-kuntest tal-iżvilupp reġjonali. Rakkomandazzonijiet Jeħtieġ
li l-Istati Membri jiżguraw: ·
l-għoti ta' korsijiet tal-ilsna, li jkunu
jirriflettu l-ħtiġijiet li jvarjaw tal-migranti fi stadji differenti
tal-proċess tal-integrazzjoni tagħhom; ·
l-organizzazzjoni ta' programmi introduttorji
għal migranti li jkunu għadhom kif waslu, inklużi korsijiet
tal-ilsna u tal-orjentazzjoni ċivika. Jeħtieġ li dawn
il-programmi jkunu jindirizzaw il-ħtiġijiet speċifiċi
tan-nisa migranti sabiex jippromwovu l-parteċipazzjoni tagħhom
fis-suq tax-xogħol u jsaħħu l-indipendenza ekonomika
tagħhom. ·
miżuri biex jiġu ppreżentati
bid-dettall u vvalutati l-ħtiġijiet tal-individwu u biex jiġu
vvalidati l-kwalifiki u l-esperjenzi professjonali; ·
li l-parteċipazzjoni tal-migranti fis-suq
tax-xogħol tikber permezz ta' linji politiċi attivi dwar is-suq
tax-xogħol; ·
li fis-sistemi edukattivi jsiru sforzi li jarmaw
lill-għalliema u lill-mexxejja tal-iskejjel bil-ħiliet biex
jimmaniġġjaw id-diversità; jiġu rreklutati għalliema minn
sfondi ta' migrazzjoni; u l-parteċipazzjoni tat-tfal migranti
fl-edukazzjoni sa mit-tfulija bikrija tagħhom; u ·
attenzjoni speċjali
għall-ħtiġijiet speċifiċi ta' gruppi vulnerabbli ta'
migranti. Jeħtieġ
li l-Kummissjoni tappoġġa: ·
l-iskambju tal-prattika u l-kordinazzjoni
tal-linji politiċi fl-oqsma tax-xogħol, tal-edukazzjoni u tal-linji
politiċi soċjali; u ·
użu aħjar mill-istrumenti finanzjarji
eżistenti tal-UE biex tiġi sostnuta l-parteċipazzjoni
tal-migranti. 2. Jeddijiet
u obbligi – biex naslu għal trattament ugwali u għal sens ta'
appartenenza Ir-rispett għall-valuri universali u
għall-jeddijiet fundamentali tal-bniedem huwa minqux fit-Trattat.
Għandhom jissaħħu l-isforzi biex tiġi missielta
d-diskriminazzjoni u biex il-migranti jingħataw l-istrumenti biex
jiġu mgħarrfin dwar il-valuri fundamentali tal-UE u tal-Istati Membri
tagħha. Il-parteċipazzjoni tal-migranti
fil-proċess demokratiku hija importanti għall-integrazzjoni
tagħhom. L-ostakli għall-parteċipazzjoni politika tal-migranti
f'termini ta' xkiel leġiżlattiv u strutturali għandhom
jingħelbu kemm jista' jkun. Jeħtieġ li jissaħħaħ
l-involviment tar-rappreżentanti tal-migranti, inklużi n-nisa,
fit-tfassil u fl-implimentazzjoni tal-linji politiċi u l-programmi favur
l-integrazzjoni. Il-programmi li jħajru lil dak li jkun
jinvolvi ruħu u t-tqegħid ta' persuni f'impjieg jistgħu
jgħinu biex tinbena l-kapaċità fl-organizzazzjonijiet tal-migranti u
jinkuraġġixxu u jsostnu l-parteċipazzjoni ta' dawn
l-organizzazzjonijiet fil-livell lokali, bħall-bordijiet tal-iskejjel,
l-amministrazzjonijiet tal-akkomodazzjoni eċċ. Miżuri biex tissaħħaħ
il-parteċipazzjoni demokratika jistgħu jinkludu t-taħriġ u
l-mentors, l-għoti lill-migranti ta' aċċess għall-jeddijiet
tal-vot fl-elezzjonijiet lokali, il-ħolqien ta' korpi konsultattivi
lokali, reġjonali u nazzjonali, l-inkuraġġiment
tal-intraprenditorija, tal-kreattività u tal-innovazzjoni[22]. Rakkomandazzonijiet Jeħtieġ
li l-Istati Membri jiżguraw: ·
miżuri biex iwettqu fil-prattika
l-prinċipju tat-trattament indaqs u biex ma jitħalliex li
sseħħ diskriminazzjoni istituzzjonali kif ukoll dik ta' kuljum; u ·
sforzi biex jitneħħew l-ostakli
għall-parteċipazzjoni politika tal-migranti. Jeħtieġ li jkompli jissaħħaħ
l-involviment tar-rappreżentanti tal-migranti fit-tfassil u
fl-implimentazzjoni tal-linji politiċi u l-programmi favur
l-integrazzjoni. Jeħtieġ
li l-Kummissjoni tiżgura: ·
l-implimentazzjoni
sħiħa u tajba tad-direttivi eżistenti dwar
in-nondiskriminazzjoni u fil-qasam tal-migrazzjoni legali. B. AKTAR
AZZJONI FIL-LIVELL LOKALI Jeħtieġ li l-linji politiċi
favur l-integrazzjoni jkunu fformulati u implimentati bl-involviment attiv
tal-awtoritajiet lokali. L-awtoritajiet lokali huma responsabbli għal
firxa wiesgħa ta' servizzi u attivitajiet u għandhom sehem importanti
x'jagħtu biex tingħaġen l-interazzjoni bejn il-migranti u
s-soċjetà li tilqagħhom. 1. Nindirizzaw
b'mod speċjali l-inħawi urbani żvantaġġati Bosta migranti imorru
jgħixu fi nħawi urbani, fejn iħabbtu wiċċhom ma' sfidi
partikulari biex jintegraw. Il-linji politiċi favur l-integrazzjoni
għandhom jindirizzaw b'mod speċifiku l-isfidi ta' viċinati
neqsin mill-kumditajiet essenzjali sabiex l-inħawi urbani jkunu jistgħu
jistimulaw l-attività ekonomika u kulturali u jikkontribwixxu
għall-koeżjoni soċjali. F'diversi Stati
Membri ġew żviluppati b'suċċess kuntratti u ftehimiet
oħrajn bejn l-awtoritajiet nazzjonali, reġjonali u lokali biex
isostnu l-iżvilupp urban. Huwa fundamentali li f'tali ftehimiet ikunu
involuti r-rappreżentanti tal-organizzazzjonijiet u l-abitanti lokali.
Integrazzjoni effettiva teħtieġ ukoll miżuri ta' sostenn sabiex
jiġi żgurat li jkun hemm infrastrutturi soċjali u
riġenerazzjoni urbana, imsejsin fuq metodu integrat sabiex tiġi
evitata s-segregazzjoni. 2. Titjib
tal-koperazzjoni f'aktar minn livell wieħed Anki jekk
il-miżuri favur l-integrazzjoni huma l-aktar għall-awtoritajiet
lokali, huwa importanti li jkun hemm koperazzjoni mill-qrib bejn il-livelli
differenti tal-gvernanza sabiex jiġu kkordinati l-provvediment,
il-finanzjament u l-evalwazzjoni tas-servizzi. L-integrazzjoni effettiva tista'
sseħħ biss jekk ikun hemm sħubija bejn il-firxa kollha ta' dawk
li għandhom interess, bħall-istituzzjonijiet Ewropej, l-Istati Membri
u l-atturi nazzjonali, reġjonali u lokali. L-UE tista' tipprovdi qafas
għall-moniteraġġ, għall-valutazzjoni komparattiva, u
għall-iskambju tal-prattika tajba fost id-diversi livelli tal-gvernanza, u
tista' wkoll toħloq inċentivi għall-promozzjoni ta' mudelli
lokali u reġjonali tajbin. Jeħtieġ li l-'patti territorjali'
bejn il-partijiet interessati rilevanti f'livelli differenti jipprovdu
lill-parteċipanti kollha l-flessibbiltà meħtieġa tal-mezzi biex
jilħqu ċerti miri ffissati fil-linji politiċi, filwaqt li
jipprovdu l-possibbiltà li l-istrumenti tal-linji politiċi kif ukoll
il-kanali u l-proċeduri tal-finanzjament jiġu ssimplifikati. F'dan
ir-rigward, il-Kumitat tar-Reġjuni jista' jkollu sehem x'jagħti. Eżempji: Il-proġett INTI-Cities sar biex jivvaluta
l-linji politiċi lokali favur l-integrazzjoni, il-prattiki lokali u
l-arranġamenti tal-gvernanza lokali fuq il-bażi ta' parametru
referenzjarju u ġie ttestjat b'suċċess fil-muniċipalitajiet
ta' Ħelsinki, Roterdam, Malmo, Dusseldorf, Ġenova u Lijon. Barra minn
hekk, il-proġett DIVE ġie żviluppat biex jevalwa kif
il-muniċipalitajiet jużaw il-prinċipji tad-diversità u
tal-ugwaljanza meta jaġixxu bħala min iħaddem, bħala
xerrejja ta' prodotti u ta' servizzi, bħala dawk li jfasslu l-linji
politiċi u bħala fornituri tas-servizzi. Il-parametru referenzjarju
tad-DIVE ġie applikat fil-prattika f'Amsterdam, f'Leeds, f'Berlin u
f'Ruma. L-ibliet li ħadu sehem fid-DIVE impenjaw ruħhom favur Karta
dwar l-Integrazzjoni tal-Ibliet[23]. Ir-Reġjun ta' Valenzja għandu qafas legali
li jipprovdi għall-koperazzjoni attiva bejn firxa ta' atturi
għall-integrazzjoni tal-migranti tal-ewwel ġenerazzjoni. Barra minn
hekk, ġie ffirmat 'Patt għall-Immigrazzjoni' bejn il-gvern reġjonali,
it-trejdjunjins u l-assoċjazzjoni ta' min iħaddem sabiex tiġi
mmaniġġjata d-diversità fil-post tax-xogħol u sabiex
titħeġġeġ il-parteċipazzjoni attiva tal-ħaddiema
migranti, filwaqt li 'Patt Lokali għall-Integrazzjoni' jġib flimkien
lil awtoritajiet pubbliċi mil-livell lokali, minn dak provinċjali u
minn dak reġjonali sabiex tingħata spinta l-koperazzjoni u tiġi
żgurata l-koerenza tal-azzjonijiet żviluppati f'oqsma differenti biex
isostnu l-integrazzjoni. 3. Sostenn
finanzjarju mill-UE għal azzjoni lokali Irriżulta li l-Fond Ewropew
għall-Integrazzjoni ta’ ċittadini ta’ pajjiżi terzi hu siewi
biex jiġu appoġġati l-isforzi tal-Istati Membri biex jippermettu
lil persuni bin-nazzjonalità ta' pajjiżi terzi jissodisfaw
il-kundizzjonijiet tar-residenza u biex tiġi ffaċilitata
l-integrazzjoni tagħhom[24].
Għall-qafas finanzjarju multiannwali li jmiss, il-Kummissjoni tipposponi
li l-istruttura tal-istrumenti tan-nefqa tiġi ssimplifikata billi
l-għadd ta' programmi jitnaqqas għal struttura b'żewġ
pilastri, inkluż Fond għall-Migrazzjoni u l-Ażil[25]. Komponent minnhom se jkun
azzjonijiet b'sostenn għall-integrazzjoni ta' persuni bin-nazzjonalità ta'
pajjiżi terzi. Il-finanzjament se jkollu wkoll dimensjoni esterna li se
tkopri l-azzjonijiet kemm fl-UE kif ukoll fil-pajjiżi terzi. Jeħtieġ li l-enfasi tal-finanzjament
li se tagħmel l-UE fil-futur favur l-integrazzjoni jkun fuq metodu lokali
u aktar immirat, b'appoġġ għal strateġiji konsistenti li
jkunu maħsubin speċifikament biex jippromwovu l-integrazzjoni
fil-livell lokali. Dawn l-istrateġiji jkunu implimentati l-aktar
mill-awtoritajiet lokali jew reġjonali u minn atturi li mhumiex parti
mill-Istat skont is-sitwazzjoni partikulari tagħhom. Ir-riżultati
jitkejlu f'termini tal-kontribut tagħhom għall-objettiv ġenerali
ta' aktar parteċipazzjoni, fuq il-bażi ta' 1) żieda fir-rata
tal-impjieg; 2) livell ogħla ta' edukazzjoni; 3) inklużjoni
soċjali aħjar; u 4) ċittadinanza attiva. Rakkomandazzonijiet Jeħtieġ
li l-Istati Membri jiżguraw: ·
strateġiji komprensivi favur
l-integrazzjoni, imfasslin u mwettqin bl-involviment effettiv ta' dawk kollha
li għandhom interess fil-livell lokali u f'dak reġjonali, b'metodu
'minn isfel għal fuq'. Jeħtieġ
li l-atturi fil-livelli kollha tal-governanza jagħtu l-appoġġ
tagħhom għal: ·
'Patti territorjali', bħala qafas
għall-koperazzjoni bejn il-partijiet interessati rilevanti f'livelli
differenti, li għandhom jiġu żviluppati għat-tfassil u
t-twettiq tal-linji politiċi favur l-integrazzjoni. Jeħtieġ
li l-Kummissjoni tappoġġa: ·
l-involviment tal-atturi lokali u reġjonali
fid-definizzjoni tal-linji politiċi favur l-integrazzjoni fil-qafas
tal-programmi tal-UE, permezz ta' sħubija strateġika mal-Kumitat
tar-Reġjuni u man-netwerks Ewropej tal-ibliet u r-reġjuni. u ·
aktar ipprogrammar ikkordinat tal-istrumenti
finanzjarji eżistenti tal-UE b'enfasi fuq l-azzjoni lokali. Dan għandu jsir bl-użu tal-Fond
Ewropew għall-Integrazzjoni ta’ ċittadini ta’ pajjiżi terzi,
il-Fond Ewropew għar-Refuġjati, il-Fond Soċjali Ewropew u l-Fond
Ewropew għall-Iżvilupp Reġjonali. C. INVOLVIMENT TAL-PAJJIŻI
TAL-ORIĠINI Il-pajjiżi tal-oriġini għandhom
sehem x'jagħtu b'appoġġ għall-proċess
tal-integrazzjoni, bi tliet modi: 1) billi jħejju għall-integrazzjoni
sa minn qabel it-tluq tal-migranti; 2) billi jsostnu lill-migranti meta jkunu
fl-UE, pereżempju. permezz ta' appoġġ permezz tal-ambaxxati; 3)
billi jħejju għar-ritorn temporanju jew definittiv tal-migranti li
jkunu kisbu l-esperjenza u l-konoxxenza. 1. Miżuri
ta' qabel it-tluq b'sostenn għall-integrazzjoni Il-pajjiżi tal-oriġini jistgħu
jgħinu lill-migranti billi jagħtuhom tagħrif qabel ma jitilqu,
ngħidu aħna rigward il-viżi u l-permessi tax-xogħol
meħtiġin, kif ukoll b'tagħlim tal-ilsna jew billi joffrulhom
taħriġ vokazzjonali sabiex isaħħulhom il-ħiliet
tagħhom. Għal dan il-fini, jeħtieġ li jingħata sostenn
lill-pajjiżi terzi rigward il-miżuri ta' qabel it-tluq, u wkoll
sabiex jitjiebu l-metodi għar-rikonoxximent tal-kwalifiki u l-ħiliet
tal-migranti. Sabiex in-nies li tixtieq temigra lejn l-UE
tiġi assistita biex taċċessa l-informazzjoni meħtieġa
dwar il-proċeduri tal-applikazzjonijiet, aktar tard matul dis-sena
l-Kummissjoni se tvara l-'Portal tal-UE dwar l-Immigrazzjoni'. 2. Kuntatti
ta' benefiċċju bejn il-komunitajiet imxerrdin ma' pajjiżi
oħra u l-pajjiżi tal-oriġini tagħhom Ir-rimessi kif ukoll it-trasferiment tal-ħiliet,
tal-innovazzjoni u tal-konoxxenza jistgħu jiffavorixxu l-investimenti
sostenibbli u l-iżvilupp tal-pajjiżi tal-oriġini. Il-promozzjoni tal-imprenditorija
transnazzjonali permezz ta' strateġija aktar dinamika se tiffavorixxi
lill-imprendituri li joperaw kemm fl-Istati Membri tal-UE kif ukoll
f'pajjiżi sħab. Tali impriżi jistgħu joħolqu
x-xogħol fil-pajjiżi tal-oriġini u jġibu magħhom
benefiċċji kemm f'termini tal-integrazzjoni tal-migranti kif ukoll
ta' aktar kummerċ bejn il-pajjiżi. 3. Il-migrazzjoni
ċirkulari u l-iżvilupp fil-pajjiżi tal-oriġini Jeħtieġ li l-migranti temporarji u
ċirkulari jkunu sostnuti permezz ta' qafas imsejjes fuq il-jeddijiet li
jkun jista' jiggarantixxi stejtus legali ċar u jiffaċilita
l-mobbiltà. Sħubiji dwar il-mobbiltà ma' pajjiżi sħab
jistgħu jservu ta' qafas adatt għall-promozzjoni ta' inizjattivi dwar
l-integrazzjoni fl-Istati Membri tal-UE, li minnu jistgħu jgawdu wkoll
il-pajjiżi tal-oriġini. Messaġġi politiċi pożittivi
miż-żewġ naħat jistgħu jgħinu biex jinħoloq
ambjent aktar favorevoli għall-integrazzjoni kif ukoll
għall-migrazzjoni temporanja u ċirkulari. Rakkomandazzjonijiet Jeħtieġ
li-Istati Membri u l-pajjiżi tal-oriġini jiżguraw: ·
sostenn lill-migranti qabel it-tluq sabiex
tiġi ffaċilitata l-integrazzjoni, li jkun parti mill-oqfsa
tad-djalogu u tal-koperazzjoni bejn l-UE u l-pajjiżi sħab. Element
importanti ħafna f'dan ir-rigward huwa t-titjib tal-metodi użati
għar-rikonoxximent tal-kwalifiki u tal-ħiliet tal-migrant.
3.
IT-TRIQ ’IL QUDDIEM
L-immaniġġjar tal-integrazzjoni huwa
kruċjali biex jitwettaq il-potenzjal sħiħ tal-migrazzjoni, kemm
għall-migranti kif ukoll għall-UE. Huwa fundamentali li jkun hemm
linji politiċi effettivi favur l-integrazzjoni sabiex jiġu
rrikonċiljati t-tkabbir ekonomiku u l-koeżjoni soċjali, u sabiex
nindirizzaw is-sitwazzjoni fejn is-soċjetajiet Ewropej qed isiru dejjem
aktar diversi. Dan il-proċess jitlob
għal dibattitu strutturat u infurmat. Għandna bżonn ta'
strateġiji koerenti sabiex ikun hemm parteċipazzjoni aħjar
mill-migranti fis-soċjetajiet fejn jgħixu.
3.1.
Koperazzjoni, konsultazzjoni u kordinazzjoni
msaħħin
L-isfidi tal-integrazzjoni se jkollhom
jintlaqgħu permezz ta' sħubija bejn il-gvernijiet nazzjonali, u
l-awtoritajiet reġjonali u lokali, filwaqt li jiġi żgurat li
jkun hemm djalogu mal-partijiet interessati rilevanti fil-livelli kollha
tal-gvernanza. Hemm bżonn ukoll ta' koperazzjoni akbar mal-pajjiżi
tal-oriġini. Il-metodu ta' 'proċess li jinvolvi tliet partijiet' bejn
il-migranti, is-soċjetajiet li jilqgħuhom u l-pajjiżi
tal-oriġini jista' jissaħħaħ. Jeħtieġ li l-UE
tipprovdi s-sostenn meħtieġ lil dan il-proċess. Il-Kummissjoni għandha sehem importanti
biex iġġib flimkien lill-atturi rilevanti fi djalogu dwar l-isfidi
ewlenin rigward l-integrazzjoni. L-iskambju tal-konoxxenza u tal-prattika tajba
bejn l-Istati Membri jseħħ fin-netwerk tal-Punti Nazzjonali ta'
Kuntatt dwar l-Integrazzjoni, li jista' jkompli jiġi żviluppat
permezz ta' laqgħat immirati u ta' eżerċizzji ta' valutazzjoni
komparattiva. Il-kordinazzjoni u l-moniteraġġ tal-iżviluppi
rigward il-linji politiċi fl-oqfsa eżistenti tal-linji politiċi
fost l-istituzzjonijiet tal-UE, u f'koperazzjoni mill-qrib tal-Istati Membri,
jistgħu jikkontribwixxu għal linji politiċi aktar
effiċjenti u effettivi favur l-integrazzjoni. Ir-rappreżentanti
tas-soċjetà ċivili mil-livell tal-Istati Membri u minn dak tal-UE
jiltaqgħu fil-Forum Ewropew dwar l-Integrazzjoni li ħolqitu
l-Kummissjoni flimkien mal-Kumitat Ekonomiku u Soċjali Ewropew.
Jeħtieġ li l-proċessi ta' konsultazzjoni jkomplu jissaħħu
permezz ta' laqgħat strateġiċi, ngħidu aħna flimkien
mal-Kumitat tar-Reġjuni u mal-assoċjazzjonijiet tal-ibliet. Il-Forum
jista' jkun sostnut minn fora nazzjonali, reġjonali jew lokali. Il-Websajt
Ewropea dwar l-Integrazzjoni tiġbor informazzjoni importanti mingħand
diversi kategoriji ta' partijiet interessati u tipprovdi għodda
interattiva għall-iskambju ta' informazzjoni biex tiġi
żviluppata aktar permezz ta' profili online.
3.2.
Niżviluppaw sett ta' għodod Ewropew
flessibbli
Sabiex
nirrinforzaw il-kordinazzjoni u l-iskambju tal-konoxxenza, qed jiġi
żviluppat sett ta' għodod Ewropew flessibbli, li jkun jippermetti
lill-awtoritajiet fl-Istati Membri jagħżlu l-miżuri li l-aktar
li jistgħu jkunu effettivi fil-kuntest tagħhom.
L-hekk imsejħin 'moduli Ewropej' qed jitfasslu biex isostnu l-linji
politiċi u l-prattiki. Il-moduli jibnu fuq l-esperjenzi tal-Istati Membri
u ta' atturi oħrajn u jistgħu jiġu adattati skont
il-ħtiġijiet tal-Istati Membri, ir-reġjuni jew l-ibliet individwali[26]. Il-moduli jkunu jikkostitwixxu
qafas ta' referenza Ewropew għat-tfassil u għat-twettiq tal-prattiki
favur l-integrazzjoni fl-Istati Membri. Qed jiġu żviluppati fi tliet
oqsma tematiċi: 1) korsijiet introduttorji u tal-ilsna; 2) impenn qawwi
mis-soċjetà li tilqa' lill-migranti; u 3) parteċipazzjoni attiva
tal-migranti fl-aspetti kollha tal-ħajja kollettiva.
3.3.
Monitoraġġ tar-riżultati
Il-linji politiċi dwar il-migrazzjoni u
dwar l-integrazzjoni jserrħu bil-kbir fuq statistika ta' kwalità
għolja biex ikunu jistgħu jitfasslu l-linji politiċi u biex
jiġu mmoniterjati r-riżultati. Jeħtieġ li
l-istituzzjonijiet tal-UE u l-Istati Membri jaħdmu flimkien biex
jiżviluppaw qafas għall-integrazzjoni tal-istatistiki dwar
il-migrazzjoni u biex titjieb il-kapaċità biex tinġabar u tiġi
ppubblikata statistika dwar il-migranti u dwar il-qagħda
soċjoekonomika tagħhom. Ġew identifikati 'indikaturi' Ewropej
komuni f'erba' oqsma li huma ta' rilevanza għall-integrazzjoni:
ix-xogħol, l-edukazzjoni, l-inklużjoni soċjali u
ċ-ċittadinanza attiva[27].
Dawn se jintużaw biex jiġu mmoniterjati r-riżultati tal-linji
politiċi favur l-integrazzjoni, bil-għan li tikber il-paragunabbiltà
u li jissaħħaħ il-proċess Ewropew tat-tagħlim.
L-indikaturi komuni se jagħmluha possibbli li jiġu vvalutati
l-isforzi favur l-integrazzjoni b'rabta ma' miri Ewropej fl-oqsma
tax-xogħol, tal-edukazzjoni u tal-inklużjoni soċjali u, b'hekk,
titjieb il-kordinazzjoni tal-linji politiċi nazzjonali u tal-UE. Il-Kummissjoni
se timmoniterja l-iżviluppi u se tfassal rakkomandazzjonijiet, fi djalogu
mal-Istati Membri. Rakkomandazzonijiet Jeħtieġ li l-Kummissjoni tappoġġa: ·
l-użu
ulterjuri u l-kordinazzjoni tal-pjattaformi Ewropej għall-konsultazzjoni u
għall-iskambju tal-konoxxenza (inklużi l-Punti Nazzjonali ta' Kuntatt
dwar l-Integrazzjoni, il-Forum Ewropew dwar l-Integrazzjoni u l-Websajt Ewropea
dwar l-Integrazzjoni) jiġu integrati, sabiex jitjieb l-input tagħhom
fit-teħid tad-deċiżjonijiet, il-moniteraġġ u
l-kordinazzjoni rigward il-linji politiċi; ·
l-iżvilupp
ulterjuri ta' sett ta' għodod flessibbli, li jkun jinkludi 'moduli
Ewropej', biex isostni l-linji politiċi u l-prattiki nazzjonali u lokali.
Se jiġi implimentat, f'alleanza strateġika mal-Kumitat
tar-Reġjuni, mill-awtoritajiet nazzjonali, reġjonali u lokali u
mis-soċjetà ċivili; u ·
'indikaturi' komuni
Ewropej fl-oqsma tax-xogħol, tal-edukazzjoni, tal-inklużjoni
soċjali u taċ-ċittadinanza attiva biex jiġu mmoniterjati
r-riżultati tal-linji politiċi favur l-integrazzjoni u li
għandhom iservu bħala bażi għal segwitu sistematiku. [1] Diżaggregazzjoni tal-popolazzjoni skont
iċ-ċittadinanza li saret fl-2010 uriet li kien hemm 32.4 miljun
barrani joqogħdu fl-Istati Membri tal-UE-27 (6.5% tal-popolazzjoni
totali). Minn dawk, 12.3 miljun kienu persuni bin-nazzjonalità tal-UE-27 li
joqogħdu fi Stat Membru ieħor u 20.1 miljun kienu ċittadini minn
pajjiż li mhux fl-UE-27 (4% tal-popolazzjoni totali), http://epp.eurostat.ec.europa.eu/portal/page/portal/population/introduction.
[2] Iż-żieda fil-popolazzjoni totali tal-UE
fl-aħħar snin kienet ikkaġunata l-aktar mill-immigrazzjoni
netta. Fl-istess ħin, fl-aħħar ftit snin l-Unjoni esperjenzat
xejra 'l isfel fl-immigrazzjoni, Eurostat, Statistics in focus, 1/2011,
http://epp.eurostat.ec.europa.eu/cache/ITY_OFFPUB/KS-SF-11-001/EN/KS-SF-11-001-EN.PDF. [3] Konklużjonijiet tal-Kunsill Ewropew, 25/26 ta'
Marzu 2010, EUCO 7/10, CO EUR 4, CONCL 1. [4] Il-Programm ta' Stokkolma - Ewropa miftuħa u sikura
għas-servizz u l-protezzjoni taċ-ċittadini, ĠU 2010/C
115/01. [5] L-Istħarriġ Annwali tal-2011 dwar it-Tkabbir,
li jġib flimkien azzjonijiet differenti li huma essenzjali biex l-UE timxi
biex tilħaq il-miri li ffissat fl-Ewropa 2020, wera l-ħtieġa li
jsiru riformi urġenti sabiex jiġu promossi l-ħiliet u
jinħolqu l-inċentivi biex wieħed jaħdem, kemm
għall-popolazzjoni nazzjonali kif ukoll għal dik tal-migranti,
COM(2011) 11 finali, Anness 2, Macro economic report. [6] Il-Konklużjonijiet tal-Kunsill u
tar-Rappreżentanti tal-Gvernijiet tal-Istati Membri dwar l-Integrazzjoni
bħala Forza għall-Iżvilupp u l-Koeżjoni Soċjali,
dokument tal-Kunsill 9248/10. [7] Id-Dokument tal-Kunsill 14615/04, 19.11.2004. [8] COM(2005) 389 finali; SEC(2010)
357 finali. [9] Il-persuni bin-nazzjonalità ta' pajjiżi terzi huma
l-migranti li jiġu minn pajjiżi barra l-UE u li ma jkollhomx
iċ-ċittadinanza ta' pajjiż tal-UE. Dan il-grupp jinkludi kemm
persuni mweldin f'pajjiż barra mill-UE kif ukoll persuni mweldin fl-UE
iżda li ma jkollhomx iċ-ċittadinanza ta' Stat Membru. [10] Ara d-Dokument ta' Ħidma tal-Pesunal tal-Kummissjoni
li jakkumpanja lil din il-Komunikazzjoni. [11] Ħarsa ġenerali lejn l-inizjattivi li l-UE
ħadet dan l-aħħar favur l-integrazzjoni ta' persuni
bin-nazzjonalità ta' pajjiżi terzi hija ppreżentata fid-Dokument ta'
Ħidma tal-Pesunal tal-Kummissjoni li jakkumpanja lil din
il-Komunikazzjoni. [12] Konklużjonijiet tal-Kunsill Ewropew, 25/26 ta' Marzu
2010, EUCO 7/10, CO EUR 4, CONCL 1. [13] Ara CEFR, http://www.coe.int/t/dg4/linguistic/cadre_en.asp. [14] Fl-2010, ir-rata medja ta' impjieg tal-popolazzjoni totali
ta' bejn l-20 u l-64 sena kienet 68.6% (imqabbla ma' 69.1% fl-2009) u dik
tal-persuni bin-nazzjonalità ta' pajjiżi terzi ta' bejn l-20 u l-64 sena
kienet 58.5% (imqabbla ma' 59.1% fl-2009). [15] Fl-aqwa tal-età tax-xogħol, bejn il-25 u l-54 sena,
ir-rata tal-impjieg tan-nisa bin-nazzjonalità ta' pajjiż terz fl-2010 kien
kważi 20 punt perċentwali inqas mir-rata medja tal-impjieg tan-nisa
kollha f'dik il-faxxa tal-età. Eurostat, EU Labour Force Survey, quarterly data
on employment rates by sex, age groups and nationality – comparison of
employment rates for nationals and citizens of countries outside the EU-27: http://epp.eurostat.ec.europa.eu/portal/page/portal/employment_unemployment_lfs/data/database.
[16] Ethnic minority and Roma women in Europe: A case for
gender equality? Rapport ta' sintesi mħejji għall-Kummissjoni Ewropea
2009. [17] Statistika riċenti pprovduta mill-Kamra
tal-Kummerċ tar-reġjun tal-Lombardija turi li 60% tal-impriża
ġdida maħluqa fir-reġjun hija ffundata minn migranti, www.lom.camcom.it.
[18] Rapport ta' Progress, SEC(2011) 526. Madwar l-UE,
il-persentaġġ ta' persuni mhux ċittadini fil-faxxa tal-età ta'
bejn is-6 u s-17 huwa 5.7%, u 7.9% fil-faxxa tal-età ta' bejn it-18 u l-24.
Fil-Ġermanja u fl-Awtrija 'l fuq minn 9% tat-tfal li għandhom bejn 6
snin u 17-il sena mhumiex ċittadini. Fi Spanja u fl-Irlanda hemm 'il fuq
minn 11%, filwaqt li fil-Lussemburgu aktar minn 45% mhumiex ċittadini. [19] L-Istħarriġ dwar il-Forza tax-Xogħol
magħmul mill-UE juri li l-migranti huma rrappreżentati b'mod
sinifikanti inqas milli jmisshom fil-livell edukattiv medju u li huma
rrappreżentati aktar milli jmisshom bil-wisq aktar fl-iktar livell
edukattiv baxx. Fl-istess ħin, ir-rata ta' nies bi kwalifiki ogħla
milli huma mitlubin minnhom fil-każ tal-persuni bin-nazzjonalità ta'
pajjiżi terzi fl-2009 kienet 45% meta mqabbla mad-29%
għaċ-ċittadini tal-UE, , http://epp.eurostat.ec.europa.eu/portal/page/portal/employment_unemployment_lfs/data/database.
[20] COM(2010) 296; COM(2011) 18. [21] COM(2010) 758. [22] Rapport sommarju tar-raba' laqgħa tal-Forum Ewropew
dwar l-Integrazzjoni, 6-7 ta' Diċembru 2010, http://ec.europa.eu/ewsi/UDRW/images/items/static_38_812142537.pdf.
[23] Ara s-sit tal-Integrazzjoni tal-Ibliet fuq l-Internet, http://www.integratingcities.eu.
[24] Deċiżjoni tal-Kunsill tal-25 ta’ Ġunju 2007
li tistabbilixxi l-Fond Ewropew għall-Integrazzjoni ta’ ċittadini ta’
pajjiżi terzi għall-perjodu mill-2007 sal-2013 bħala parti
mill-Programm Ġenerali Solidarjetà u Ġestjoni tal-Flussi
Migratorji (2007/435/KE). Ammont ta' 825 miljun Ewro huwa disponibbli
għall-perjodu kollu kemm hu. [25] COM(2011) 500 finali. [26] Il-moduli huma evoluzzjoni naturali tal-'Handbook on
Integration for policy-makers and practitioners', (it-3et edizzjoni tal-Manwal
hija disponibbli fis-Sit Ewropew fuq l-Internet dwar l-Intregrazzjoni: http://ec.europa.eu/ewsi/en/resources/detail.cfm?ID_ITEMS=12892). [27] Konklużjonijiet tal-Kunsill Ġustizzja u
Affarijiet Interni tat-3 u l-4 ta' Ġunju 2010, dokument tal-Kunsill 9248/10;
Eurostat Methodologies and Working Papers, Indicators of Immigrant Integration
- A Pilot Study,
http://epp.eurostat.ec.europa.eu/portal/page/portal/product_details/publication?p_product_code=KS-SF-11-030.