Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 42015Y1215(01)

Riżoluzzjoni tal-Kunsill u tar-Rappreżentanti tal-Gvernijiet tal-Istati Membri, imlaqqgħin fi ħdan il-Kunsill, dwar Pjan ta' Ħidma tal-Unjoni Ewropea għaż-Żgħażagħ għall-2016-2018

OJ C 417, 15.12.2015, p. 1–9 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

Date of document:
15/12/2015; Data tal-pubblikazzjoni
Author:
Il-Kunsill tal-Unjoni Ewropea, Ir-Rappreżentanti tal-Gvernijiet tal-Istati Membri
Form:
Riżoluzzjoni
Authentic language:
Ingliż

15.12.2015   

MT

Il-Ġurnal Uffiċjali tal-Unjoni Ewropea

C 417/1

Riżoluzzjoni tal-Kunsill u tar-Rappreżentanti tal-Gvernijiet tal-Istati Membri, imlaqqgħin fi ħdan il-Kunsill, dwar Pjan ta' Ħidma tal-Unjoni Ewropea għaż-Żgħażagħ għall-2016-2018

(2015/C 417/01)

IL-KUNSILL TAL-UNJONI EWROPEA U R-RAPPREŻENTANTI TAL-GVERNIJIET TAL-ISTATI MEMBRI,

I.   INTRODUZZJONI

1.

JIRRIKONOXXU li, mindu saret l-adozzjoni tar-Riżoluzzjoni dwar Qafas Imġedded għall-kooperazzjoni Ewropea fil-qasam taż-Żgħażagħ 2010-2018, u l-adozzjoni tal-Pjan ta' Ħidma tal-UE għaż-Żgħażagħ għall-2014-2015, il-kriżi kompliet ikollha impatt profond u sproporzjonat fuq iż-żgħażagħ fl-Ewropa u t-transizzjoni tagħhom lejn il-ħajja adulta.

2.

Jirrikonoxxu li hemm il-ħtieġa għal kooperazzjoni transsettorjali msaħħa fil-qasam taż-żgħażagħ fil-livell tal-UE sabiex jiġu indirizzati b'mod adegwat dawn l-isfidi.

3.

JIEĦDU NOTA tal-intenzjoni tal-Kummissjoni Ewropea li tipprijoritizza l-ġlieda kontra r-radikalizzazzjoni, il-marġinalizzazzjoni taż-żgħażagħ kif ukoll il-promozzjoni tal-inklużjoni taż-żgħażagħ fil-ħajja soċjali, kulturali u ċivika taħt il-Qafas Strateġiku għall-Kooperazzjoni Ewropea fl-Edukazzjoni u t-Taħriġ (“ET 2020”), il-qafas imġedded għall-kooperazzjoni Ewropea fil-qasam taż-żgħażagħ (2010-2018), il-Pjan ta' Ħidma tal-UE għall-Isport (2014-2017) u l-Pjan ta' Ħidma għall-Kultura (2015-2018). (1)

4.

JIEĦDU NOTA tar-Rapport konġunt tal-UE dwar iż-Żgħażagħ 2015 (2) tal-Kunsill u tal-Kummissjoni, b'mod partikolari t-taqsima 5 tiegħu, “It-triq 'il quddiem fil-kooperazzjoni tal-UE fil-qasam taż-żgħażagħ”.

Konsegwentement JAQBLU li jistabbilixxu Pjan ta' Ħidma ta' 36 xahar tal-UE għaż-Żgħażagħ għal azzjoni mill-Istati Membri u l-Kummissjoni għall-perijodu mill-1 ta' Jannar 2016 sal-31 ta' Diċembru 2018, sabiex jappoġġaw l-implimentazzjoni tal-Qafas Imġedded għall-Kooperazzjoni Ewropea fil-qasam taż-żgħażagħ (2010-2018).

II.   PRINĊIPJI

5.

IQISU li l-Pjan ta' Ħidma, waqt li tiġi mħarsa s-sussidjarjetà, għandu jkun irregolat mill-prinċipji gwida li ġejjin. Dan għandu:

—

jibni fuq il-kisbiet tal-Pjan preċedenti ta' Ħidma għaż-Żgħażagħ (2014-2015);

—

jagħti impetu u prominenza kif adatt lill-ħidma fil-livell tal-UE fil-qasam taż-żgħażagħ;

—

jiżgura, permezz ta' kooperazzjoni transettorjali, is-sensibilizzazzjoni ta' oqsma oħra ta' politika tal-UE dwar il-kwistjonijiet speċifiċi li jiffaċċjaw iż-żgħażagħ;

—

jikkontribwixxi għall-prijoritajiet globali tal-aġendi tal-politika ta' sigurtà, ekonomika u soċjali tal-UE;

—

jaħdem favur politika għaż-żgħażagħ ibbażata fuq l-għarfien u l-evidenza;

—

jibqa' strument flessibbli li jista' jwassal għal reazzjonijiet xierqa u f'waqthom għal ambjent ta' politika li qed jinbidel;

—

jippromwovi approċċ kooperattiv u miftiehem bejn l-Istati Membri u l-Kummissjoni li jippermettilhom joħolqu valur miżjud fir-rigward tat-temi ta' prijorità li jinsabu fil-paragrafu 6 (ara hawn taħt);

—

jibni fuq sinerġiji mal-programm Erasmus+, inter alia billi jikkontribwixxi għall-identifikazzjoni ta' prijoritajiet speċifiċi għaż-żgħażagħ għall-programm ta' ħidma annwali Erasmus+;

—

jinvolvi ż-żgħażagħ bl-użu ta' proċeduri konsultattivi biex jiġi żgurat li l-Pjan ta' Ħidma jindirizza l-kwistjonijiet li huma rilevanti għalihom.

6.

JAQBLU li, fid-dawl tal-iżviluppi attwali, it-temi li ġejjin għandhom jingħataw prijorità mill-Istati Membri u l-Kummissjoni fil-kooperazzjoni tagħhom fil-livell tal-UE għall-perijodu kopert minn dan il-Pjan ta' Ħidma sa tmiem l-2018:

Il-ħidma fost iż-żgħażagħ u l-kooperazzjoni transsettorjali għandhom jissaħħu bl-għanijiet li ġejjin, f'konformità mal-prijoritajiet maqbula fir-Rapport Konġunt tal-UE dwar iż-Żgħażagħ 2015:

A.

Żieda fl-inklużjoni soċjali taż-żgħażagħ kollha, b'kont meħud tal-valuri Ewropej sottostanti;

B.

Parteċipazzjoni akbar taż-żgħażagħ kollha fil-ħajja demokratika u ċivika fl-Ewropa;

C.

Transizzjoni aktar faċli taż-żgħażagħ miż-żgħożija għall-ħajja adulta, b'mod partikolari l-integrazzjoni fis-suq tax-xogħol;

D.

Appoġġ għas-saħħa u l-benessri taż-żgħażagħ, inkluża s-saħħa mentali;

E.

Kontribut biex jiġu indirizzati l-isfidi u l-opportunitajiet tal-era diġitali għall-politika dwar iż-żgħażagħ, il-ħidma fost iż-żgħażagħ u ż-żgħażagħ;

F.

Kontribut biex ikun hemm reazzjoni għall-opportunitajiet u l-isfidi li joħolqu n-numri dejjem jikbru ta'migranti u refuġjati żgħażagħ fl-Unjoni Ewropea.

7.

JAQBLU li, filwaqt li l-azzjoni tal-Istati Membri u l-Kummissjoni, kif stipulat fl-Anness I, għandha tkun immirata lejn iż-żgħażagħ kollha, għandha tingħata enfasi partikolari lill-gruppi li ġejjin:

—

Zgħażagħ fir-riskju ta' emarġinazzjoni

—

Żgħażagħ barra mill-edukazzjoni, impjieg jew taħriġ (NEET)

—

Żgħażagħ li ġejjin minn ambjent ta' migrazzjoni, inklużi immigranti li għadhom jaslu u refuġjati żgħażagħ.

8.

JAQBLU li l-Pjan ta' Ħidma jista' jiġi rivedut mill-Kunsill fid-dawl tar-riżultati miksuba u l-iżviluppi tal-politika fil-livell tal-UE.

9.

JAQBLU dwar lista ta' azzjonijiet speċifiċi konformi ma' dawn it-temi ta' prijorità u dwar skeda ta' żmien għall-implimentazzjoni tagħhom, kif jinsabu fl-Anness I.

III.   METODI U STRUTTURI TA' ĦIDMA

10.

JIRRIKONOXXU li:

Hemm ħtieġa li jiġu rinfurzati l-integrazzjoni taż-żgħażagħ u l-kooperazzjoni transettorjali orjentata lejn ir-riżultati fi ħdan il-Kunsill sabiex jiġi garantit, meta jkun possibbli, li t-tfassil tal-politika fl-oqsma kollha rilevanti jieħu kont tal-aspirazzjonijiet, il-kondizzjonijiet u l-ħtiġijiet taż-żgħażagħ.

11.

JAQBLU li

—

Il-metodi ta' ħidma li ġejjin ser jappoġġjaw, fejn addattat, l-implimentazzjoni ta' dan il-Pjan ta' Ħidma: il-Metodu Miftuħ ta' Koordinazzjoni, kif maqbul fil-Qafas Imġedded għall-Kooperazzjoni Ewropea fil-Qasam taż-Żgħażagħ, u b'mod partikolari, tfassil ta' politika bbażat fuq l-għarfien u l-evidenza, gruppi ta' esperti, attivitajiet ta' tagħlim bejn il-pari, evalwazzjonijiet bejn il-pari, studji, konferenzi, seminars, disseminazzjoni tar-riżultati, il-Forum Informali ma' rappreżentanti taż-żgħażagħ, laqgħat tad-Diretturi Ġenerali għaż-Żgħażagħ u d-Djalogu Strutturat maż-żgħażagħ.

—

Il-metodi kollha, inklużi l-gruppi ta' esperti, ser jiffokaw il-ħidma tagħhom fuq it-temi ta' prijorità indikati fit-Taqsima II, paragrafu 6, u fuq azzjonijiet u dati previsti elenkati fl-Anness I. L-azzjonijiet fl-Anness I jistgħu jiġu riveduti mill-Kunsill u r-Rappreżentanti tal-Gvernijiet tal-Istati Membri mlaqqgħin fi ħdan il-Kunsill, fid-dawl tar-riżultati miksuba u l-iżviluppi ta' politika fil-livell tal-UE.

—

Il-prinċipji relatati mas-sħubija u l-funzjonament tal-gruppi ta' esperti jinsabu fl-Anness II.

—

Fir-rigward tad-dritt taż-żgħażagħ li jipparteċipaw fl-iżvilupp, l-implimentazzjoni u l-valutazzjoni ta' politiki li jaffettwawhom, il-proċeduri konsultattivi ser jippermettu li ż-żgħażagħ jipparteċipaw f'riflessjoni konġunta dwar it-temi ta' prijorità ta' dan il-Pjan ta' Ħidma.

—

Il-laqgħat informali tad-Diretturi Ġenerali għaż-Żgħażagħ għandhom jeżaminaw il-kwistjonijiet strateġiċi li jirriżultaw b'rabta ma' dan il-Pjan ta' Ħidma, kif ukoll dawk relatati b'mod aktar ġenerali mal-politika tal-UE dwar iż-żgħażagħ.

—

Fl-ewwel nofs tal-2018, l-implimentazzjoni ta' dan il-Pjan ta' Ħidma ser tiġi evalwata mill-Kunsill u l-Kummissjoni, abbażi tal-valutazzjoni konġunta tal-implimentazzjoni tiegħu, li għandha titwettaq fil-kuntest tar-Rapport tal-UE dwar iż-Żgħażagħ.

12.

FID-DAWL TA' DAN TA' HAWN FUQ, JISTIEDNU

lill-Istati Membri u lill-Kummissjoni biex jistabbilixxu gruppi ta' esperti dwar is-suġġetti li ġejjin għat-tul tal-Pjan ta' Ħidma attwali:

—

Id-definizzjoni tal-kontribut speċifiku tal-ħidma fost iż-żgħażagħ kif ukoll it-tagħlim mhux formali u informali sabiex

(a)

jiġu promossi ċ-ċittadinanza attiva u l-parteċipazzjoni taż-żgħażagħ f'soċjetajiet diversi u tolleranti kif ukoll jiġu prevenuti l-marġinalizzazzjoni u r-radikalizzazzjoni li potenzjalment jirriżultaw f'imġiba vjolenti.

(b)

ikun hemm reazzjoni għall-opportunitajiet u l-isfidi li jirriżultaw mill-għadd dejjem jikber ta' migranti u refuġjati żgħażagħ fl-Unjoni Ewropea

—

L-indirizzar tar-riskji, l-opportunitajiet, u l-implikazzjonijiet tad-diġitalizzazzjoni għaż-żgħażagħ, il-ħidma fost iż-żgħażagħ u l-politika dwar iż-żgħażagħ.

IV.   AZZJONIJIET

13.

JISTIEDNU LILL-ISTATI MEMBRI, BIL-KUNSIDERAZZJONI DOVUTA GĦALL-PRINĊIPJU TAS-SUSSIDJARJETÀ, BIEX:

—

jaħdmu flimkien bl-appoġġ tal-Kummissjoni billi jużaw il-metodi ta' ħidma speċifikati b'din ir-Riżoluzzjoni;

—

ikomplu jippromwovu l-involviment attiv tal-ministeri għaż-żgħażagħ fit-tfassil tal-politika nazzjonali relatata mal-Istrateġija Ewropa 2020 u s-Semestru Ewropew, b'segwitu għall-Konklużjonijiet tal-Kunsill dwar “Il-massimizzazzjoni tal-potenzjal tal-politika dwar iż-żgħażagħ fl-indirizzar tal-għanijiet tal-Istrateġija Ewropa 2020”;

—

jieħdu kont kif mistħoqq tal-Qafas Imġedded għall-kooperazzjoni Ewropea fil-qasam taż-Żgħażagħ 2010-2018 u ta' dan il-Pjan ta' Ħidma meta jiżviluppaw il-politika fil-livell nazzjonali u f'dak reġjonali, fejn xieraq;

—

jgħarrfu lill-awtoritajiet rilevanti, iż-żgħażagħ u l-organizzazzjonijiet taż-żgħażagħ dwar il-progress li jkun sar fl-implimentazzjoni tal-Pjan ta' Ħidma tal-UE għaż-Żgħażagħ, sabiex jiġu żgurati r-rilevanza u l-viżibilità tal-attivitajiet.

14.

JISTIEDNU LILL-PRESIDENZI TAL-KUNSILL BIEX:

—

abbażi tar-riżultati tal-evalwazzjoni ta' nofs it-terminu tal-Istrateġija tal-UE għaż-Żgħażagħ, jikkunsidraw segwitu xieraq;

—

jieħdu kont, fil-kuntest tat-Triju ta' Presidenzi, it-temi ta' prijorità tal-Pjan tal-Ħidma tal-UE meta jiżviluppaw il-programm tagħhom;

—

jinformaw lill-Grupp ta' Ħidma dwar iż-Żgħażagħ tal-Kunsill dwar il-ħidma mwettqa minn korpi preparatorji oħrajn tal-Kunsill li għandha impatt dirett jew indirett fuq iż-żgħażagħ jew il-politika dwar iż-żgħażagħ;

—

jieħdu kont, fil-kuntest tat-Triju ta' Presidenzi, tal-elementi pendenti tal-Pjan ta' Ħidma preċedenti (2014-2015);

—

jikkunsidraw li jipproponu Pjan ta' Ħidma ġdid fl-aħħar tas-36 xahar koperti minn din ir-Riżoluzzjoni, abbażi tal-valutazzjoni u l-evalwazzjoni msemmija fil-punt 11;

—

jipprovdu opportunitajiet lill-Istati Membri u lill-partijiet ikkonċernati fil-qasam taż-żgħażagħ biex jiddiskutu l-futur tal-kooperazzjoni Ewropea fil-qasam taż-żgħażagħ wara l-2018;

—

jipproponu lid-Diretturi Ġenerali għaż-Żgħażagħ fil-laqgħa informali tas-soltu tagħhom biex jiddiskutu u jsegwu r-riżultati miksuba taħt il-Pjan ta' Ħidma, biex meta jkun xieraq jorganizzaw laqgħat transettorjali konġunti u straordinarji tad-Diretturi Ġenerali, sabiex ixerrdu r-riżultati b'mod wiesa' u sabiex jikkontribwixxu għal valutazzjoni tal-implimentazzjoni tal-Pjan ta' Ħidma tal-UE għaż-Żgħażagħ.

15.

JISTIEDNU LILL-KUMMISSJONI BIEX:

—

tappoġġa t-tisħiħ tal-kapaċitajiet tal-ħaddiema li jaħdmu maż-żgħażagħ u fil-ħidma fost iż-żgħażagħ, permezz tal-implimentazzjoni tal-programm Erasmus +, bħala wieħed mill-elementi ewlenin għall-iżvilupp ta' ħidma ta' kwalità fost iż-żgħażagħ fl-Ewropa;

—

tappoġġa u taħdem mal-Istati Membri fl-implimentazzjoni ta' dan il-Pjan ta' Ħidma, b'mod partikolari l-azzjonijiet deskritti fl-Anness;

—

tgħarraf lill-Istati Membri dwar inizjattivi u studji, li għaddejjin jew dawk ippjanati, tal-politika tal-UE dwar iż-żgħażagħ u ta' oqsma ta' politika rilevanti oħra li jħallu impatt fuq iż-żgħażagħ u dwar l-iżviluppi rispettivi fil-Kummissjoni;

—

tikkonsulta u tgħarraf regolarment lill-partijiet ikkonċernati fil-livell Ewropew, inklużi s-soċjetà ċivili u r-rappreżentanti taż-żgħażagħ, dwar il-progress tal-Pjan ta' Ħidma sabiex tiżgura r-rilevanza u l-viżibbiltà tal-attivitajiet.

—

tħeġġeġ komunikazzjoni aħjar tas-sinerġiji fi ħdan il-programmi tal-UE kif ukoll il-kooperazzjoni ma' organizzazzjonijiet internazzjonali oħra bħall-Kunsill tal-Ewropa.

16.

JISTIEDNU LILL-ISTATI MEMBRI U LILL-KUMMISSJONI, FIL-LIMITI TAL-KOMPETENZI RISPETTIVI TAGĦHOM, BIL-KUNSIDERAZZJONI DOVUTA GĦALL-PRINĊIPJU TAS-SUSSIDJARJETÀ, BIEX:

—

ikomplu jikkooperaw mill-qrib fil-livell ta' esperti f'konformità mal-Annessi I u II ta' din ir-Riżoluzzjoni;

—

jieħdu kont tal-prijoritajiet ta' dan il-Pjan ta' Ħidma fit-tħejjija tal-programm ta' ħidma annwali tal-Erasmus+ fil-qasam taż-żgħażagħ, inter alia rigward l-objettivi ġenerali tal-Programm ta' Ħidma annwali tal-Erasmus+, il-Ftehim ta' Sħubija mal-Kunsill tal-Ewropa, u l-Wiki taż-Żgħażagħ;

—

iħeġġu lil setturi oħra biex jieħdu kont tad-dimensjoni taż-żgħażagħ meta jifformulaw, jimplimentaw u jevalwaw politika u azzjonijiet f'oqsma oħrajn ta' politika, b'attenzjoni partikolari biex jiżguraw l-inklużjoni bikrija u effettiva tad-dimensjoni taż-żgħażagħ fil-proċess ta' żvilupp tal-politika;

—

jippromwovu rikonoxximent aħjar tal-kontribut tal-politika dwar iż-żgħażagħ għall-miri ġenerali tal-politika Ewropea li jindirizzaw liż-żgħażagħ, billi jqisu l-effetti pożittivi fuq iċ-ċittadinanza attiva, l-impjiegi, l-inklużjoni soċjali, il-kultura u l-innovazzjoni, l-edukazzjoni u t-taħriġ kif ukoll is-saħħa u l-benesseri.

(1)  COM(2015) 185 final.

(2)  Dok. 13635/15

ANNESS I

Azzjonijiet, Strumenti, Skadenzi bbażati fuq temi ta' prijorità

Azzjonijiet ibbażati fuq temi ta' prijorità

Metodu ta' ħidma/Strument

Riżultat u data prevista

Ref.

 

Prijorità A:

Żieda fl-inklużjoni soċjali taż-żgħażagħ kollha, b'kont meħud tal-valuri Ewropej sottostanti

Kunsill u korpi preparatorji

Ir-rwol tas-settur taż-żgħażagħ fil-prevenzjoni tar-radikalizzazzjoni vjolenti

L-ewwel nofs tal-2016

(poss.) Dibattitu tal-Kunsill

A1

Għarfien u tfassil ta' politika bbażat fuq l-evidenza

Studju tal-Kummissjoni dwar sistemi u oqfsa ta' kwalità tal-ħidma fost iż-żgħażagħ fl-Unjoni Ewropea

It-tieni nofs tal-2016:

Il-Manwal għall-Implimentazzjoni

A2

Djalogu strutturat/Kunsill u korpi preparatorji

“Ħiliet u kompetenzi essenzjali taż-żgħażagħ f'Ewropa diversa, konnessa u inklużiva għall-parteċipazzjoni attiva fil-ħajja tal-komunità u tax-xogħol.”

L-ewwel nofs tal-2017:

(poss.) Riżoluzzjoni tal-Kunsill

A3

Prijorità B:

Parteċipazzjoni akbar taż-żgħażagħ kollha fil-ħajja demokratika u ċivili fl-Ewropa

Grupp ta' Esperti

Id-definizzjoni tal-kontribut speċifiku tal-ħidma fost iż-żgħażagħ kif ukoll it-tagħlim mhux formali u informali sabiex jiġu promossi ċ-ċittadinanza attiva u l-parteċipazzjoni taż-żgħażagħ f'soċjetajiet diversi u tolleranti kif ukoll il-prevenzjoni tal-marġinalizzazzjoni u r-radikalizzazzjoni li potenzjalment jirriżultaw f'imġiba vjolenti.

L-ewwel nofs tal-2017

—

Rapport

—

(poss.) Konklużjonijiet tal-Kunsill

B1

Għarfien u tfassil ta' politika bbażat fuq l-evidenza

Studju tal-Kummissjoni dwar l-impatt tal-volontarjat transnazzjonali permezz tas-Servizz Volontarju Ewropew

L-ewwel nofs tal-2017:

—

Rapport

—

(poss.) Konklużjonijiet tal-Kunsill b'reazzjoni għall-Istudju

B2

Seminar għal dawk li jfasslu l-politika dwar iż-żgħażagħ u l-isport:

“Id-demokrazija, iż-żgħażagħ u l-isport — approċċi transsettorjali għall-parteċipazzjoni attiva u l-involviment taż-żgħażagħ fil-ħajja ċivika u demokratika permezz tal-isport.”

It-tieni nofs tal-2017:

Rapport tas-seminar dwar l-aħjar prattiki u rakkomandazzjonijiet dwar kif approċċi transsettorjali bejn iż-żgħażagħ u l-isport jistgħu jippromovu valuri demokratiċi u l-involviment ċiviku fost iż-żgħażagħ.

B3

Prijorità C:

Transizzjoni aktar faċli taż-żgħażagħ miż-żgħożija għall-ħajja adulta, b'mod partikolari l-integrazzjoni fis-suq tax-xogħol

Tagħlim bejn il-pari fost l-Istati Membri u l-Kummissjoni/id-Diretturi Ġenerali

“Il-ħidma fost iż-żgħażagħ bħala għodda rikonoxxuta u ta' valur miżjud għall-kooperazzjoni transsettorjali fl-appoġġ għat-transizzjoni taż-żgħażagħ għall-ħajja adulta u d-dinja tax-xogħol.”

It-tieni nofs tal-2017:

Rapport dwar l-aħjar prattiki u rakkomandazzjonijiet dwar il-ħidma fost iż-żgħażagħ bħala għodda rikonoxxuta u ta' valur miżjud għall-kooperazzjoni transsettorjali fl-appoġġ għat-transizzjoni taż-żgħażagħ għall-ħajja adulta u d-dinja tax-xogħol.

C1

Għarfien u tfassil ta' politika bbażat fuq l-evidenza

Studju tal-Kummissjoni dwar il-ħidma fost iż-żgħażagħ u l-intraprenditorija taż-żgħażagħ

It-tieni nofs tal-2017

—

Rapport

—

(poss.) Konklużjonijiet tal-Kunsill b'reazzjoni għall-Istudju

C2

Prijorità D:

Appoġġ għas-saħħa u l-benessri taż-żgħażagħ, inkluża s-saħħa mentali

Kunsill u korpi preparatorji

Il-kooperazzjoni transettorjali dwar il-parteċipazzjoni għall-promozzjoni tas-saħħa u l-benessri taż-żgħażagħ fit-transizzjoni għall-ħajja adulta, b'mod partikolari għal żgħażagħ bi problemi ta' saħħa mentali (1), li spiss ikunu relatati mat-transizzjoni tagħhom għall-ħajja adulta. Enfasi fuq il-kontribut possibbli tagħhom għas-soċjetà minflok il-problemi tagħhom.

(a)    L-ewwel nofs tal-2016

(poss.) Konklużjonijiet tal-Kunsill

D1

(b)    It-tieni nofs tal-2017

Tagħlim transsettorjali bejn il-pari fost l-Istati Membri

D2

Prijorità E:

Kontribut biex jiġu indirizzati l-isfidi u l-opportunitajiet tal-era diġitali għall-politika dwar iż-żgħażagħ, il-ħidma fost iż-żgħażagħ u ż-żgħażagħ

Kunsill u korpi preparatorji

Approċċi ġodda fil-ħidma fost iż-żgħażagħ sabiex jiġi massimizzat l-iżvilupp tal-potenzjal u t-talent taż-żgħażagħ u l-inklużjoni tagħhom fis-soċjetà.

Ser jiġu enfasizzati modi ta' ħidma ġodda, moderni u attraenti fost iż-żgħażagħ, inklużi prattiki ta' ħidma fost iż-żgħażagħ online, sabiex jiġu riflessi x-xejriet il-ġodda fil-ħajja taż-żgħażagħ u jiġi massimizzat l-ambitu tal-ħidma fost iż-żgħażagħ biex jinkludi iktar żgħażagħ fl-attivitajiet tagħha.

It-tieni nofs tal-2016

(poss.) Konklużjonijiet tal-Kunsill

E1

Tagħlim bejn il-pari

Prattiki ġodda fil-ħidma fost iż-żgħażagħ u biex il-ħidma fost iż-żgħażagħ issir aktar attraenti għaż-żgħażagħ.

L-ewwel nofs tal-2017

Rapport dwar il-prattiki eżistenti li jirriflettu x-xejriet u rakkomandazzjonijiet dwar l-implimentazzjoni fil-prattika tal-ħidma fost iż-żgħażagħ ta' kuljum

E2

Grupp ta' Esperti

“Ir-riskji, l-opportunitajiet, u l-implikazzjonijiet tad-diġitalizzazzjoni għaż-żgħażagħ, il-ħidma fost iż-żgħażagħ u l-politika dwar iż-żgħażagħ.”

It-tieni nofs tal-2017

Rapport tal-Grupp ta' Esperti

E3

Għarfien u tfassil ta' politika bbażat fuq l-evidenza

Studju tal-Kummissjoni dwar l-impatt tal-Internet u l-mezzi ta' komunikazzjoni soċjali fuq il-parteċipazzjoni taż-żgħażagħ u l-ħidma fost iż-żgħażagħ

L-ewwel nofs tal-2018

Rapport

E4

Kunsill u korpi preparatorji

L-iżvilupp ta' metodi innovattivi fil-ħidma fost iż-żgħażagħ, inklużi l-għodod diġitali, biex jiġu indirizzati aħjar il-bżonnijiet u l-aspirazzjonijiet taż-żgħażagħ b'mod aktar effiċjenti, intelliġenti u rilevanti u biex tiġi inkoraġġuta l-kooperazzjoni transettorjali.

L-ewwel nofs tal-2018

(poss.) Konklużjonijet tal-Kunsill, b'reazzjoni, fost oħrajn, għall-azzjonijiet E3 u E4 ta' hawn fuq.

E5

Prijorità F:

Kontribut biex ikun hemm reazzjoni għall-opportunitajiet u l-isfidi li jirriżultaw mill-għadd dejjem jikber ta' migranti u refuġjati żgħażagħ fl-Unjoni Ewropea.

Grupp ta' Esperti

Id-definizzjoni tal-kontribut speċifiku tal-ħidma fost iż-żgħażagħ kif ukoll it-tagħlim mhux formali u informali sabiex ikun hemm reazzjoni għall-opportunitajiet u l-isfidi li jirriżultaw mill-għadd dejjem jikber ta' migranti u refuġjati żgħażagħ fl-Unjoni Ewropea

It-tieni nofs tal-2018

—

Rapport

—

(poss.) Konklużjonijiet tal-Kunsill b'reazzjoni għall-Istudju

F1


Oħrajn

 

Suġġett

Strument/Azzjoni

Riżultat u data prevista

 

Strateġija tal-UE għaż-Żgħażagħ

Tagħlim bejn il-pari

a.

Proposta tal-Kummissjoni għal qafas flessibbli

L-ewwel nofs tal-2016

Formalizzazzjoni tal-Qafas Flessibbli għal Attivitajiet ta' Tagħlim bejn il-Pari

O1

Għarfien u tfassil ta' politika bbażat fuq l-evidenza

b.

Evalwazzjoni ta' nofs it-terminu tal-Istrateġija tal-UE għaż-Żgħażagħ u dwar ir-Rakkomandazzjoni dwar il-Mobbiltà ta' Voluntiera Żgħażagħ fl-Unjoni Ewropea kollha

It-tieni nofs tal-2016:

(poss.) Konklużjonijiet tal-Kunsill b'reazzjoni għall-evalwazzjoni, inkluża l-evalwazzjoni tar-Rakkomandazzjoni tal-Kunsill dwar il-Mobbiltà ta' Voluntiera Żgħażagħ fl-Unjoni Ewropea kollha

O2

c.

Rapport tal-UE dwar iż-Żgħażagħ

L-ewwel nofs tal-2018:

Rapport Konġunt tal-UE dwar iż-Żgħażagħ

O3

Erasmus+

Għarfien u tfassil ta' politika bbażat fuq l-evidenza

Evalwazzjoni ta' nofs it-terminu ta' Erasmus+ u l-programmi predeċessuri tiegħu

L-ewwel nofs tal-2018:

Reazzjoni għall-evalwazzjoni f'kooperazzjoni mas-setturi rilevanti (Edukazzjoni, Taħriġ, Żgħażagħ, Sport)

O4

(1)  Inklużi problemi psikjatriċi serji u komuni, stress psikoloġiku u funzjonament psikoloġiku ħażin (temporanju) waqt perijodi ta' sfida fil-ħajja jew kriżijiet.

ANNESS II

Prinċipji relatati mas-sħubija u l-funzjonament ta' gruppi ta' esperti stabbiliti mill-Istati Membri u l-Kummissjoni fil-qafas tal-Pjan ta' Ħidma tal-UE għaż-Żgħażagħ (1 ta' Jannar 2016-31 ta' Diċembru 2018)

Sħubija:

—

Il-parteċipazzjoni tal-Istati Membri fil-ħidma tal-gruppi hija volontarja u l-Istati Membri jistgħu jissieħbu fihom meta jridu.

—

L-Istati Membri li huma interessati jipparteċipaw fil-ħidma tal-gruppi ser jinnominaw esperti bħala membri tal-gruppi rispettivi. L-Istati Membri ser jiżguraw li l-esperti nnominati jkollhom esperjenza rilevanti fil-qasam rilevanti fil-livell nazzjonali. L-esperti nominati ser jiżguraw komunikazzjoni effettiva mal-awtoritajiet nazzjonali kompetenti. Il-Kummissjoni għandha tikkoordina l-eżerċizzju tan-nomina.

—

Kull grupp ta' esperti jista' jiddeċiedi li jistieden parteċipanti oħrajn: esperti indipendenti, rappreżentanti ta' organizzazzjonijiet taż-żgħażagħ, riċerkaturi fil-qasam taż-żgħażagħ, u partijiet ikkonċernati oħrajn, kif ukoll rappreżentanti ta' pajjiżi terzi. Kull grupp ta' esperti jista' jipproponi li jżid parteċipanti oħrajn għall-perijodu kollu tal-ħidma bir-rekwiżit li s-sħubija tagħhom tiġi approvata b'mod unanimu mill-grupp ta' esperti.

Mandat

Il-mandat tal-Grupp ta' Esperti għandu jiġi propost mill-Kummissjoni f'konformità mal-Paragrafu 12 tal-Pjan ta' Ħidma u aġġustat fid-dawl tal-kummenti li jsiru fil-Grupp ta' Ħidma tal-Kunsill dwar iż-Żgħażagħ.

Proċeduri ta' ħidma

—

Il-gruppi ta' esperti ser jikkonċentraw fuq il-kisba ta' numru żgħir ta' riżultati konkreti u utli dwar is-suġġett mitlub.

—

Sabiex jiġi implimentat dan il-Pjan ta' Ħidma, kull grupp ta' esperti ser ikun responsabbli li jaħtar il-president jew il-kopresidenti tiegħu fl-ewwel laqgħa tal-grupp ta' esperti wara l-adozzjoni tal-Pjan ta' Ħidma. L-elezzjoni tal-Presidenti ser issir b'mod miftuħ u trasparenti kkoordinat mill-Kummissjoni li taġixxi bħala s-segretarjat tal-gruppi ta' esperti. Kull grupp ta' esperti ser iħejji skeda ta' ħidma skont dan il-Pjan ta' Ħidma.

—

Il-Kummissjoni ser tipprovdi għarfien espert, kif ukoll appoġġ loġistiku għall-ħidma tal-gruppi. Sa fejn possibbli, din ser tappoġġa lill-gruppi b'mezzi oħrajn adatti (inklużi studji rilevanti għall-qasam ta' ħidma tagħhom).

Rappurtar u informazzjoni

Il-Presidenti tal-gruppi ta' esperti ser jirrappurtaw lill-Grupp ta' Ħidma dwar iż-Żgħażagħ dwar il-progress li jkun sar u l-eżiti miksuba. Jekk ikun xieraq, il-Grupp ta' Ħidma tal-Kunsill dwar iż-Żgħażagħ ser jipprovdi aktar gwida lill-grupp ta' esperti sabiex jiġu garantiti l-eżitu u l-iskeda ta' żmien mixtieqa. Id-Diretturi Ġenerali għandhom jinżammu infurmati dwar l-eżiti miksuba.

L-aġendi tal-laqgħat u r-rapporti tal-laqgħat tal-gruppi kollha ser ikunu disponibbli għall-Istati Membri kollha, irrispettivament mil-livell ta' parteċipazzjoni tagħhom f'qasam partikolari. Ir-riżultati tal-gruppi ser jiġu ppubblikati.

Top