Mionairm agus airm éadroma: a gcarnadh a chomhrac

ACHOIMRE AR:

Straitéis AE chun carnadh agus gáinneáil aindleathach i mionairm agus armlón a chomhrac

CAD IS AIDHM LEIS AN STRAITÉIS?

Soláthraítear plean gníomhaíochta inti chun an bhagairt a bhaineann le carnadh agus gáinneáil aindleathach i mionairm agus in airm éadroma (SALW)* mar aon lena n-armlón a chomhrac, ag baint tairbhe as an raon leathan sásraí atá ar fáil don Aontas Eorpach.

PRÍOMHPHOINTÍ

• Sa Straitéis SALW tugtar le chéile cumais shibhialta agus mhíleata thíortha AE, ionstraimí an Chomhbheartais Eachtraigh agus Slándála (CBES) agus an Chomhbheartais Slándála agus Cosanta (CBSC), agus gníomh póilíní, custaim agus na mbreithiúna laistigh den Aontas Eorpach chun a cuspóirí a chur chun cinn.
• Tá gá le hiltaobhachas éifeachtúil chun sásraí idirnáisiúnta, réigiúnacha, agus náisiúnta a fhorbairt.
• Ar an leibhéal idirnáisiúnta, tugtar tús áite do
  • clár gníomhaíochta na Náisiún Aontaithe ar SALW a chur i bhfeidhm;
  • SALW a rianú trí shásra tuairiscithe domhanda (iTrace II); agus
  • an Prótacal i gcoinne Monarú Aindleathach agus Gáinneáil Arm Tine a dhaingniú.
• Féachfaidh AE chomh maith le cur ina luí ar thíortha nach bhfuil in AE agus ar easpórtálaithe SALW iad cloí leis an méid thuas.
• Ar an leibhéal réigiúnach, soláthraíonn AE tacaíocht airgeadais do chláir nithiúla ina ndírítear ar dhul i ngleic le bagairtí slándála a bhaineann le SALW aindleathach sa Libia, Oirdheisceart na hEorpa agus i limistéar na hEagraíochta um Shlándáil agus Comhar san Eoraip.
• Cuirtear an straitéis chun cinn chomh maith leis an Ionstraim lena gcuirtear le Cobhsaíocht agus le Síocháin, lena gcuideofar le géarchéimeanna a chosc agus freagairt dóibh, agus le timpeallacht shábháilte agus sheasta a chruthú thart ar an domhan.
• Déanann Comhairle an Aontais Eorpaigh monatóireacht leanúnach ar chur chun feidhme Straitéis SALW AE. Gach 6 mhí, cuireann an tSeirbhís Eorpach Gníomhaíochta Seachtraí tuarascáil um dhul chun cinn i láthair na Comhairle lena faomhadh.

CÚLRA

Tá na hiarmhairtí a bhaineann le carnadh iomarcach agus leathadh neamhrialaithe SALW lárnach do 4 cinn de na 5 dhúshlán (sceimhlitheoireacht, leathadh arm ollscriosta, coinbhleachtaí réigiúnacha, mainneachtain an stáit agus coireacht eagraithe) sainaitheanta i Straitéis Slándála na hEorpa.

Chun tuilleadh faisnéise a fháil, féach:

• “An comhrac in éadan charnadh iomarcach agus gháinneáil aindleachtach SALW agus a n-armlón” ar shuíomh gréasáin na Seirbhíse Eorpaí Gníomhaíochta Seachtraí.

* PRÍOMHTHÉARMAÍ

PRÍOMHDHOICIMÉAD

Straitéis AE chun carnadh agus gáinneáil aindleathach SALW agus a n-armlón a chomhrac, Comhairle an Aontais Eorpaigh, an Bhruiséil, 13 Eanáir 2006

GNÍOMHARTHA GAOLMHARA

Rialachán (AE) Uimh. 230/2014 ó Pharlaimint na hEorpa agus ón gComhairle an 11 Márta 2014 lena mbunaítear ionstraim a chuireann le cobhsaíocht agus síocháin (IO L 77, 15.3.2014, lgh. 1-10)

Cinneadh (CBES )2015/1908 ón gComhairle an 22 Deireadh Fómhair 2015 le tacú le sásra tuairiscithe domhanda ar mhionairm agus airm éadroma aindleathacha agus ar ghnáthairm agus armlón aindleathacha eile chun baol a dtrádála aindleathaí a laghdú (“iTrace II”) (IO L 278, 23.10.2015, lgh. 15-25)

Nuashonraithe 04.07.2016