Sábháilteacht innealra

ACHOIMRE AR:

Treoir 2006/42/CE maidir le hinnealra

CAD IS AIDHM LEIS AN TREOIR?

Faoin treoir seo, féadfar innealra a chloíonn le ceanglais sláinte agus sábháilteachta an Aontais Eorpaigh (AE) a bhogadh faoi shaoirse ar fud an Aontais Eorpaigh. Is ionann sin agus go mbíonn oibrithe agus baill an phobail dea–chosanta nuair a úsáideann siad innealra nó nuair a thagann siad i dteagmháil leis.
Tá na ceanglais sláinte agus sábháilteachta éigeantach, ach tá na caighdeáin lena dtugtar toimhde comhréireachta* leis na ceanglais, a bhfuil a dtagairtí foilsithe in Iris Oifigiúil an Aontais Eorpaigh, deonach.
Níl feidhm ag an treoir ach maidir le táirgí a chuirtear ar mhargadh AE den chéad uair.
Cuireann an treoir le nuálaíocht, le héifeachtúlacht agus le hiomaíochas AE.
Rinneadh é a aisghairm le Rialachán (AE) 2023/1230 (féach an achoimre), ach beidh sé i bhfeidhm go dtí an 19 Eanáir 2027.

PRÍOMHPHOINTÍ

Raon feidhme

Cumhdaítear leis an treoir innealra, trealamh inmhalartaithe, comhpháirteanna sábháilteachta, gabhálais ardaithe, slabhraí, téada agus caolrabhaisc, gléasanna inbhainte traiseolta mheicniúil agus innealra nach bhfuil críochnaithe go hiomlán.
Ní chumhdaítear leis an treoir cineálacha eile innealra, amhail innealra a úsáidtear i bpáirceanna aonaigh, sa tionscal núicléach, i saotharlanna agus i mianaigh nó ag an arm nó na póilíní.

Oibleagáidí na monaróirí

Ní mór do mhonaróirí:

measúnú riosca a dhéanamh chun na ceanglais sláinte agus sábháilteachta a bhaineann lena n–innealra a shainaithint;
an measúnú riosca a chur san áireamh agus innealra á dhearadh agus á thógáil acu;
na teorainneacha a bhaineann le húsáid an innealra a shocrú;
guaiseacha féideartha ar bith a shainaithint;
an baol go mbeadh gortú trom nó damáiste trom mar thoradh ar a n–innealra a mheas, agus bearta a dhéanamh chun é a dhéanamh níos sábháilte.
a áirithiú go gcloíonn a n–innealra leis na ceanglais bhunúsacha sláinte agus sábháilteachta atá liostaithe in Iarscríbhinn I a ghabhann leis an treoir;
doiciméad teicniúil a sholáthar ina dtaispeántar go gcloíonn an t–innealra le ceanglais na treorach;
a áirithiú go bhfuil nósanna imeachta maidir le measúnú um chomhlíonadh á gcur i bhfeidhm acu agus go bhfuil an fhaisnéis riachtanach go léir á cur ar fáil acu, lena n–áirítear treoracha cóimeála agus úsáide;
an dearbhú comhréireachta a líonadh amach agus a áirithiú go bhfuil marcáil comhréireachta CE curtha ar an innealra ionas gur féidir é a úsáid áit ar bith san Aontas Eorpach.

Cumhachtaí an Choimisiúin Eorpaigh gníomhartha tarmligthe agus gníomhartha cur chun feidhme a ghlacadh

Faoi Rialachán leasaitheach (AE) 2019/1243, tugtar an chumhacht don Choimisiún Eorpach gníomhartha tarmligthe a ghlacadh chun liosta táscach de na comhpháirteanna sábháilteachta in Iarscríbhinn V a ghabhann le Treoir 2006/42/CE a leasú.

Chun coinníollacha aonfhoirmeacha a áirithiú maidir le cur chun feidhme Threoir 2006/42/CE, tugtar cumhachtaí don Choimisiún bearta riachtanacha a thabhairt isteach chun déileáil le hinnealra a d’fhéadfadh a bheith guaiseach trí bhíthin gníomhartha cur chun feidhme. Ní mór na cumhachtaí sin a fheidhmiú i gcomhréir le Rialachán (AE) Uimh. 182/2011 (féach an achoimre).

Aisghairm

Aisghaireadh Treoir 2006/42/CE le Treoir (AE) 2023/1230 agus cuireadh an treoir sin ina hionad (féach an achoimre) ón 20 Eanáir 2027 i leith.

CÉN UAIR ATÁ TOSACH FEIDHME NA RIALACHA?

B’éigean Treoir 2006/42/CE a thrasuí sa dlí náisiúnta faoin 29 Meitheamh 2008. Ba cheart go mbeadh feidhm ag na rialacha nua sin ón 29 Nollaig 2009.

CÚLRA

Leasaíodh Treoir 98/37/CE (agus a leasuithe ina dhiaidh sin) le Treoir 2006/42/CE agus cuireadh in ionad na Treorach sin í.

Le haghaidh tuilleadh faisnéise, féach:

Innealra (An Coimisiún Eorpach).

PRÍOMHTHÉARMAÍ

Toimhde na comhréireachta. I gcás ina gcloíonn monaróirí le caighdeáin chomhchuibhithe maidir le dearadh agus monarú a dtáirgí, meastar go bhfuil a dtáirgí i gcomhréir le rialacha ábhartha an Aontais.

PRÍOMHDHOICIMÉAD

Treoir 2006/42/CE ó Pharlaimint na hEorpa agus ón gComhairle an 17 Bealtaine 2006 maidir le hinnealra, agus lena leasaítear Treoir 95/16/CE (athmhúnlú) (IO L 157, 9.6.2006, lgh. 24–86).

Rinneadh leasuithe comhleanúnacha ar Threoir 2006/42/CE a chorprú sa bhuntéacs. Níl de luach ar an leagan comhdhlúite seo ach luach doiciméadach amháin.

DOICIMÉID GHAOLMHARA

Rialachán (AE) Uimh. 182/2011 ó Pharlaimint na hEorpa agus ón gComhairle an 16 Feabhra 2011 lena leagtar síos na rialacha agus na prionsabail ghinearálta a bhaineann le sásraí lenar féidir le Ballstáit feidhmiú chumhachtaí cur chun feidhme an Choimisiúin a rialú (IO L 55, 28.2.2011, lgh. 13–18).

Teachtaireacht ón gCoimisiún i gcreat chur i bhfeidhm na Treorach 2006/42/CE ó Pharlaimint na hEorpa agus ón gComhairle maidir le hinnealra, agus lena leasaítear Treoir 95/16/CE (Foilseachán teideal agus tagairtí de chaighdeán chomhchuibhithe faoi reachtaíocht an Aontais maidir le comhchuibhiú) (IO C 54, 13.2.2015, lgh. 1–79).

Cinneadh Uimh. 768/2008/CE ó Pharlaimint na hEorpa agus ón gComhairle an 9 Iúil 2008 maidir le creat coiteann le haghaidh margaíocht táirgí, agus lena n–aisghairtear Cinneadh 93/465/CEE ón gComhairle (IO L 218, 13.8.2008, lgh. 82–128).

Nuashonraithe 14.07.2023