Trádáil bó-ainmhithe agus mucra laistigh de AE

ACHOIMRE AR:

Treoir 64/432/CEE maidir le fadhbanna sláinte ainmhithe a imríonn tionchar ar thrádáil bó-ainmhithe agus mucra laistigh d’AE

CAD IS AIDHM LEIS AN TREOIR?

• Leagtar amach ann rialacha maidir le trádáil bó-ainmhithe* nó mucra* laistigh den Aontas Eorpach (AE), lena bpórú, le bainne agus feoil a tháirgeadh, lena marú nó lena gcur ar taispeáint.
• Ní chumhdaítear faoin treoir ainmhithe a úsáidtear le haghaidh imeachtaí spóirt nó cultúrtha.

PRÍOMHPHOINTÍ

• Níl iompar ainmhithe atá cumhdaithe faoin treoir chuig tír AE eile údaraithe ach amháin sna cásanna seo a leanas maidir leis na hainmhithe:
  • ní thaispeánann siad comharthaí galair ar bith;
  • ní bhfuarthas iad ó fhoinse thoirmiscthe nó shrianta faoi dhlí AE nó faoi dhlí náisiúnta;
  • aithníodh iad go hoifigiúil, de réir threoracha agus rialacháin AE;
  • tá deimhniú sláinte ag gabháil leo le linn iompair;
  • tagann siad ó thréad atá saor go hoifigiúil ó eitinn, ó bhrúsallóis nó ó liúcóis bhólachta eansótach (maidir le bó-ainmhithe amháin);
  • ní dhéanfaidh siad teagmháil le hainmhithe de stádas sláinte níos ísle le linn iompair.
• Ní mór do na feithiclí a úsáidtear le hainmhithe a iompar a bhfolláine a urramú agus ní mór:
  • go bhfuil siad tógtha ionas nach n-éalóidh dramhaíl, easair nó beathú ainmhithe ar bith ó fheithicil;
  • go nglantar agus go ndíghalraítear iad i ndiaidh iad a úsáid, agus más gá, sula gcuirtear lódáil úr ainmhithe orthu, ag baint leas as modhanna ceadaithe;
  • go bhfuil taifead á iompar orthu maidir leis an suíomh, lena n-áirítear dáta agus am ghluaiseacht na n-ainmhithe, maidir le sonraí ar na hainmhithe atá á n-iompar, agus maidir le faisnéis faoi ghlanadh agus faoi dhíghalrú na feithicle, a bheidh le coinneáil ar feadh 3 bliana ar a laghad.
• Ní mór ainmhithe atá le marú a mharú laistigh de 72 uair an chloig má iompraítear díreach chuig an seamlas iad, nó laistigh de 3 lá má thagann siad trí ionad bailiúcháin ceadaithe.
• Ní mór láithreacht amhrasta galar ar bith ar an ngabháltas a chur in iúl don údarás inniúil.
• Ní mór don tréidlia oifigiúil deimhnithe sláinte a dhréachtú i ndiaidh cigireachta.
• Ní mór do gach déileálaí, a n-áitreabh agus a ngabháltais, a bheith cláraithe agus faofa, agus ní mór do thíortha AE córas faireacháin a thabhairt isteach, lena mbainfidh pionóis chun comhlíonadh a chinntiú.

Aisghairm

Déanfar Treoir 64/432/CEE a aisghairm le Rialachán (AE) 2016/429 ón 21 Aibreán 2021.

CÉN UAIR ATÁ A THOSACH FEIDHME?

Bhí sé le corprú i ndlí náisiúnta sé thír bhunaidh Chomhphobal Eacnamaíochta na hEorpa (AE anois) faoin 30 Meitheamh 1965.

CÚLRA

Chun tuilleadh faisnéise a fháil, féach:

• “Bó-ainmhithe — Trádáil — Roimh agus le linn iad a sheoladh” ar shuíomh gréasáin an Choimisiúin Eorpaigh.
• Commission Implementing Regulation (EU) 2020/466 of 30 March 2020 on temporary measures to contain risks to human, animal and plant health and animal welfare during certain serious disruptions of Member States’ control systems due to coronavirus disease (COVID-19)

* PRÍOMHTHÉARMAÍ

PRÍOMHDHOICIMÉAD

Treoir 64/432/CEE ón gComhairle an 26 Meitheamh 1964 maidir le fadhbanna sláinte ainmhithe a imríonn tionchar ar thrádáil bó-ainmhithe agus mucra laistigh den Chomhphobal (leagan speisialta Béarla: Sraith I Imleabhar 1963-1964, lgh. 164-184)

Rinneadh leasuithe comhleanúnacha ar Threoir 64/432/CEE a chorprú sa bhuntéacs. Níl de luach ar an leagan comhdhlúite seo ach luach doiciméadach amháin.

GNÍOMHARTHA GAOLMHARA

Rialachán (AE) 2016/429 ó Pharlaimint na hEorpa agus ón gComhairle an 9 Márta 2016 maidir le galair in-tarchurtha ainmhithe agus lena leasaítear agus lena aisghairtear gníomhartha áirithe sa réimse sláinte ainmhithe (“Dlí Sláinte Ainmhithe”) (IO L 84, 31.3.2016, lgh. 1-208)

Nuashonraithe 04.05.2020