Scoileanna — Clár oibre AE chun feabhas a chur ar inniúlachtaí agus ar an bhfoghlaim don 21ú haois

ACHOIMRE AR:

Teachtaireacht (COM(2008) 425 final) — Feabhas a chur ar inniúlachtaí don 21ú hAois: Clár oibre le haghaidh comhair Eorpaigh maidir le scoileanna

CAD IS AIDHM LEIS AN TEACHTAIREACHT?

• Tá sé mar aidhm léi cuidiú le hathchóiriú a dhéanamh ar chóras scoileanna ionas gur féidir le gach duine óg a lánacmhainneacht a fhorbairt.
• Sainaithnítear inti na réimsí inar gá athrú a dhéanamh má táthar le daoine óga a ullmhú go hiomlán don todhchaí i scoileanna san Aontas Eorpach (AE).

PRÍOMHPHOINTÍ

Baintear leas sa teachtaireacht as na freagairtí ar chomhairliúchán poiblí an Choimisiúin Eorpaigh in 2007, as obair a rinne saineolaithe ó thíortha AE, agus as taighde idirnáisiúnta chun clár oibre a mholadh chun comhar maidir le scoileanna a neartú. Sainaithnítear dúshláin inti i dtrí réimse agus moltar réimsí i gcomhair forbartha:

• 1.

  Príomhinniúlachtaí

Ní mór daoine a ullmhú le “scileanna úra do phoist úra”, rud a ardóidh na leibhéil scileanna ar an iomlán. Ní mór dóibh a bhfoghlaim féin a bhainistiú

• ag obair go neamhspleách agus go comhoibríoch araon,
• faisnéis agus tacaíocht a iarraidh nuair is gá, agus
• leas a bhaint as deiseanna uile na dteicneolaíochtaí úra.

Neartaítear sealbhú inniúlachtaí amhail an fhiontraíocht agus teangacha i dtimpeallacht scoile ina spreagtar an nuálaíocht agus an chruthaitheacht. Dírítear i gclár an Choimisiúin orthu seo a leanas:

• an litearthacht agus an uimhearthacht a fhorbairt, lena n-áirítear spriocanna a leagan síos;
• inniúlachtaí trasnacha agus inniúlachtaí bunaithe ar ábhair a neartú;
• cur chuige cuimsitheach maidir le hinniúlachtaí a ghlacadh, ina gcuimseofar iad seo a leanas
  • curaclaim,
  • ábhair fhoghlama,
  • oiliúint múinteoirí,
  • foghlaim phearsantaithe agus
  • teicnící um measúnú.

• 2.

  Foghlaim ardchaighdeáin do gach scoláire

Ní sholáthraítear an deis oideachais cheannann chéanna do gach dalta i gcóras scoile ar bith ach níor cheart go mbeadh bearna ar bith sa cháilíocht idir scoileanna. Ba cheart do lucht déanta beartas difríochtaí a laghdú agus feabhas a chur ar an rannpháirtíocht trí dhíriú orthu siúd a bhfuil leibhéil scileanna níos ísle acu. Dírítear i gclár an Choimisiúin orthu seo a leanas:

• rochtain níos fearr ar oideachas réamhscolaíochta ardchaighdeáin;
• tionchar cothromais chórais oideachais na scoileanna a thomhas agus a fheabhsú, agus difríochtaí cáilíochta idir scoileanna a laghdú;
• a chinntiú go n-éascaítear aistrithe rathúla idir na cineálacha agus na leibhéil éagsúla scoile leis na gcórais scoile;
• luathfhágáil scoile a laghdú; agus
• tacaíocht níos fearr agus foghlaim phearsantaithe a sholáthar laistigh de scoileanna príomhshrutha do scoláirí ag a bhfuil riachtanais speisialta.

• 3.

  Múinteoirí agus foireann na scoile

Tá cáilíocht na múinteoirí ar an ngné is tábhachtaí laistigh de scoil a théann i gcion ar fheidhmíocht na scoláirí. Tá na scileanna de dhíth ar an bhfoireann chun dóthain deiseanna a chur ar fáil do gach dalta chun na hinniúlachtaí is gá a fhoghlaim. Ba cheart do mhúinteoirí dreasachtaí leordhóthanacha a bheith acu le linn a ngairmeacha chun athbhreithniú a dhéanamh ar a riachtanais foghlama agus chun eolas, scileanna agus inniúlachtaí a fhoghlaim, lena n-áirítear i dteangacha. Dírítear i gclár an Choimisiúin orthu seo a leanas:

• a chinntiú go bhfuil oideachas tosaigh, ionduchtú agus forbairt ghairmiúil leanúnach múinteoirí comhordaithe, soiléir, go bhfuil acmhainní leordhóthanacha ar fáil dóibh agus go bhfuil a gcáilíocht dearbhaithe; agus feabhas a chur ar sholáthar, ar cháilíocht agus ar ghlacadh oideachas múinteoirí inseirbhíse.
• athbhreithniú a dhéanamh ar earcaíocht múinteoirí chun na hiarrthóirí is cumasaí a mhealladh, na hiarratasóirí is fearr a roghnú, agus múinteoirí maithe a chur i scoileanna dúshlánacha; agus
• feabhas a chur ar earcaíocht ceannairí scoile agus iad a ullmhú chun díriú ar fheabhas a chur ar fhoghlaim na scoláirí agus ar fhoireann na scoile a fhorbairt.

CÚLRA

Tá tuilleadh faisnéise le fáil iontu seo a leanas:

• Beartas scoileanna ar shuíomh gréasáin an Choimisiúin Eorpaigh.

PRÍOMHDHOICIMÉAD

Teachtaireacht ón gCoimisiún chuig Parlaimint na hEorpa, chuig an gComhairle, chuig Coiste Eacnamaíoch agus Sóisialta na hEorpa agus chuig Coiste na Réigiún — Feabhas a chur ar inniúlachtaí don 21ú hAois: Clár Oibre le haghaidh Comhair Eorpaigh maidir le Scoileanna (COM(2008) 425 final, 3.7.2008)

DOICIMÉID GHAOLMHARA

Conclúidí ón gComhairle maidir le leibhéal na mbunscileanna a ardú i gcomhthéacs an chomhair Eorpaigh i ndáil le scoileanna don 21ú haois (IO C 323, 30.11.2010, lgh. 11-14)

Conclúidí ón gComhairle agus ó Ionadaithe Rialtais na mBallstát, ag teacht le chéile laistigh den Chomhairle an 21 Samhain 2008 maidir le daoine óga a ullmhú don 21ú haois; clár oibre le haghaidh comhair Eorpaigh maidir le scoileanna (IO C 319, 13.12.2008, lgh. 20-22)

Teachtaireacht ón gCoimisiún chuig Parlaimint na hEorpa, chuig an gComhairle, chuig Coiste Eacnamaíoch agus Sóisialta na hEorpa agus chuig Coiste na Réigiún: Athmhachnamh ar an Oideachas: Infheistiú i scileanna le haghaidh torthaí socheacnamaíocha níos fearr (COM(2012) 669 final, 20.11.2012)

Nuashonraithe 08.11.2016