Sábháilteacht bréagán san Aontas Eorpach a áirithiú

ACHOIMRE AR:

Treoir 2009/48/CE maidir le sábháilteacht bréagán

CAD IS AIDHM LEIS AN TREOIR?

• Leagtar amach na ceanglais sábháilteachta léi nach mór a chomhlíonadh le bréagáin arna gcur ar fáil san Aontas Eorpach (AE). Deartar na ceanglais sin chun ardleibhéal sláinte agus sábháilteachta a sholáthar, chun an pobal agus an comhshaol a chosaint agus chun saorghluaiseacht bréagán in AE a ráthú.
• Sainaithnítear freagrachtaí sainiúla na n-oibritheoirí éagsúla léi sa slabhra soláthair ó dhéantóir go hallmhaireoir/miondíoltóir/dáileoir.

PRÍOMHPHOINTÍ

• Is bréagáin ann ná táirgí a cheaptar nó a bheartaítear, go heisiach nó go neamheisiach, lena n-úsáid ag leanaí faoi 14 bliana d’aois chun súgradh leo.
• Tá saineolas mionsonraithe ag monaróirí ar a gcuid bréagán agus, mar sin, bíonn orthu a chinntiú go gcloíonn na bréagáin sin leis na ceanglais sábháilteachta uile is infheidhme.
• Ní ceadmhach d’allmhaireoirí bréagáin atá lasmuigh den Aontas Eorpach a chur ar an margadh ach amháin sa chás go gcloíonn na bréagáin sin leis na ceanglais sábháilteachta uile is infheidhme.
• Ní mór do dháileoirí agus do mhiondíoltóirí gníomhú le haire cheart maidir leis na ceanglais sábháilteachta is infheidhme.
• Déanann údaráis náisiúnta maoirseacht ar an margadh.
• Ní foláir nó go mbeidh dearbhú comhréireachta “AE” ag gabháil le bréagáin agus ní foláir nó go mbeidh an mharcáil CE orthu ionas gur féidir iad a dhíol ar fud an Aontais Eorpaigh.
• Níl feidhm ag an reachtaíocht maidir leis na bréagáin a leanas (i measc bréagáin eile):
  • trealamh do chlós súgartha le haghaidh úsáid phoiblí;
  • meaisíní súgartha uathoibríocha le haghaidh úsáid phoiblí;
  • feithiclí bréagáin le hinnill dhócháin;
  • innill ghaile bhréagáin;
  • tabhaill agus catapailt.
• Déantar an treoir a nuashonrú go tréimhsiúil, chun teorainneacha slána a leagan síos do cheimiceáin a úsáidtear i mbréagáin de ghnáth (amhail caidmiam, bairiam, nicil, bisfeanól-A, formaildéad agus luaidhe) go háirithe maidir le leanaí faoi bhun 3 bliana d’aois agus i mbréagáin atá beartaithe le cur sa bhéal. Baineann leasuithe le 5 bliana anuas le gnéithe amhail:
  • luaidhe, an monaiméir bisfeanól-A agus an monaiméir agus an leasaitheach feanól in 2017;
  • cróimiam VI in 2018;
  • alúmanam agus formaildéad in 2019;
  • cumhráin ailléirgineacha a thoirmeasc agus a lipéadú in 2020;
  • anailín in 2021.
• D’fhoilsigh an Coimisiún Eorpach agus an Sainghrúpa um Shábháilteacht Bréagán treoirdhoiciméid chun cuidiú le déantóirí, allmhaireoirí, dáileoirí, agus údaráis phoiblí an treoir a chur i bhfeidhm.

CÉN UAIR ATÁ TOSACH FEIDHME NA TREORACH?

B’éigean an treoir a thrasuí sa dlí náisiúnta faoin 20 Eanáir 2011. Tá na rialacha sin i bhfeidhm ón 20 Iúil 2011.

CÚLRA

Le haghaidh tuilleadh faisnéise, féach:

• Treoir 2009/48/CE maidir le Sábháilteacht Bréagán (An Coimisiún Eorpach)

PRÍOMHDHOICIMÉAD

Treoir 2009/48/CE ó Pharlaimint na hEorpa agus ón gComhairle an 18 Meitheamh 2009 maidir le sábháilteacht bréagán (IO L 170, 30.6.2009, lgh. 1-37).

Rinneadh leasuithe comhleanúnacha ar Threoir 2009/48/CE a chorprú sa bhuntéacs. Níl de luach ar an leagan comhdhlúite seo ach luach doiciméadach amháin.

DOICIMÉID GHAOLMHARA

Cinneadh Cur Chun Feidhme (AE) 2021/1992 ón gCoimisiún an 15 Samhain 2021 maidir le caighdeáin chomhchuibhithe i ndáil le bréagáin a dréachtaíodh chun tacú le Treoir 2009/48/CE ó Pharlaimint na hEorpa agus ón gComhairle (IO L 405, 16.11.2021, lgh. 14-19).

Treoir (AE) 2021/903 ón gCoimisiún an 3 Meitheamh 2021 lena leasaítear Treoir 2009/48/CE ó Pharlaimint na hEorpa agus ón gComhairle maidir le teorainnluachanna sonracha le haghaidh anailín i mbréagáin áirithe (Téacs atá ábhartha maidir le LEE) (IO L 197, 4.6.2021, lgh. 110-113).

Treoir (AE) 2020/2088 ón gCoimisiún an 11 Nollaig 2020 lena leasaítear Iarscríbhinn II le Treoir 2009/48/CE ó Pharlaimint na hEorpa agus ón gComhairle maidir le lipéadú cumhrán ailléirgineach i mbréagáin (IO L 423, 15.12.2020, lgh. 53-57).

Treoir (AE) 2020/2089 ón gCoimisiún an Dé hAoine 11 Nollaig 2020 lena leasaítear Treoir 2009/48/CE ó Pharlaimint na hEorpa agus ón gComhairle maidir le toirmeasc ar chumhráin ailléirgineacha i mbréagáin (IO L 423, 15.12.2020, lgh. 58-61).

Treoir (AE) 2019/1929 ón gCoimisiún an 19 Samhain 2019 lena leasaítear Aguisín C a ghabhann le hIarscríbhinn II a ghabhann le Treoir 2009/48/CE ó Pharlaimint na hEorpa agus ón gComhairle chun críocha teorainnluachanna sainiúla a ghlacadh le haghaidh ceimiceán arna n–úsáid i mbréagáin áirithe, i ndáil le formaildéad (IO L 299, 20.11.2019, lgh. 51-54).

Treoir (AE) 2019/1922 ón gCoimisiún an 18 Samhain 2019 lena leasaítear, chun críocha oiriúnú d’fhorbairtí teicniúla agus eolaíochta, pointe 13 de chuid III d’Iarscríbhinn II le Treoir 2009/48/CE ó Pharlaimint na hEorpa agus ón gComhairle maidir le sábháilteacht bréagán, i dtaca le halúmanam (IO L 298, 19.11.2019, lgh. 5-7).

Treoir (AE) 2018/725 ón gCoimisiún an 16 Bealtaine 2018 lena leasaítear, chun críocha oiriúnú d’fhorbairtí teicniúla agus eolaíochta, pointe 13 de chuid III d’Iarscríbhinn II le Treoir 2009/48/CE ó Pharlaimint na hEorpa agus ón gComhairle maidir le sábháilteacht bréagán, i dtaca le cróimiam VI (IO L 122, 17.5.2018, lgh. 29-31).

Treoir (AE) 2017/898 ón gCoimisiún an 24 Bealtaine 2017 lena leasaítear, chun críocha teorainnluachanna sainiúla a ghlacadh le haghaidh ceimiceán arna n–úsáid i mbréagán, Aguisín C le hIarscríbhinn II le Treoir 2009/48/CE ó Pharlaimint na hEorpa agus ón gComhairle maidir le sábháilteacht bréagán, i dtaca le bisfeanól-A (IO L 138, 25.5.2017, lgh. 128-130).

Treoir (AE) 2017/774 ón gCoimisiún an 3 Bealtaine 2017 lena leasaítear, chun críocha teorainnluachanna sainiúla a ghlacadh le haghaidh ceimiceán arna n–úsáid i mbréagán, Aguisín C le hIarscríbhinn II le Treoir 2009/48/CE ó Pharlaimint na hEorpa agus ón gComhairle maidir le sábháilteacht bréagán, i dtaca le feanól (IO L 115, 4.5.2017, lgh. 47-49).

Treoir (AE) 2017/738 ón gCoimisiún an 27 Márta 2017 lena leasaítear, chun críocha oiriúnú do dhul chun cinn teicniúil, Iarscríbhinn II le Treoir 2009/48/CE ó Pharlaimint na hEorpa agus ón gComhairle maidir le sábháilteacht bréagán, i dtaca le luaidhe (IO L 110, 27.4.2017, lgh. 6-8).

Rialachán (CE) Uimh 1272/2008 ó Pharlaimint na hEorpa agus ón gComhairle an 16 Nollaig 2008 maidir le haicmiú, lipéadú agus pacáistiú substaintí agus meascán, agus lena leasaítear agus lena n–aisghairtear Treoracha 67/548/CEE agus 1999/45/CE, agus lena leasaítear Rialachán (CE) Uimh 1907/2006 (IO L 353, 31.12.2008, lgh. 1-1355).

Féach an leagan comhdhlúite.

Rialachán (AE) Uimh. 1907/2006 ó Pharlaimint na hEorpa agus ón gComhairle an 18 Nollaig 2006 maidir le Clárú, Meastóireacht, Údarú agus Srianadh Ceimiceán (REACH), lena mbunaítear Gníomhaireacht Eorpach Ceimiceán, lena leasaítear Treoir 1999/45/CE agus lena n–aisghairtear Rialachán (CEE) Uimh. 793/93 ón gComhairle agus Rialachán (CE) Uimh. 1488/94 ón gCoimisiún chomh maith le Treoir 76/769/CEE ón gComhairle agus Treoracha 91/155/CEE, 93/67/CEE, 93/105/CE agus 2000/21/CE ón gCoimisiún (IO L 396, 30.12.2006, lgh. 1-849). Téacs athfhoilsithe i gceartúchán (IO L 136, 29.5.2007, lgh. 3-280).

Féach an leagan comhdhlúite.

Nuashonraithe 01.09.2022