An Coimisiún Eorpach

ACHOIMRE AR:

CAD IS AIDHM LE HAIRTEAGAIL AN CHONARTHA SIN?

Leagtar amach iontu ról, comhdhéanamh, cumhachtaí, nósanna imeachta ceapacháin agus feidhme an Choimisiúin Eorpaigh, brainse feidhmiúcháin AE.

PRÍOMHPHOINTÍ

Ról

1. Molann sé dlíthe nua — is é an Coimisiún an t–aon institiúid AE a chuireann dlíthe i láthair go foirmiúil lena nglacadh ag Parlaimint na hEorpa agus ag an gComhairle.

2. Bainistíonn sé beartais AE agus leithdháileann sé maoiniú AE — socraíonn an Coimisiún tosaíochtaí caiteachais in éineacht leis an gComhairle agus le Parlaimint na hEorpa, agus dréachtaíonn sé an buiséad agus cuireann sé chun feidhme é.

3. Forfheidhmíonn sé dlí AE — in éineacht le Cúirt Bhreithiúnais AE, cinntíonn an Coimisiún go gcuirtear dlí AE i bhfeidhm mar is ceart i ngach tír AE.

4. Déanann sé ionadaíocht ar son AE go hidirnáisiúnta — labhraíonn sé ar son tíortha AE uile i gcomhlachtaí idirnáisiúnta (amhail an Eagraíocht Dhomhanda Trádála — EDT).

Comhdhéanamh

Tá an Coimisiún faoi stiúir pholaitiúil foirne ina bhfuil 28 Coimisinéir. Áirítear i gColáiste na gCoimisinéirí Coimisinéir amháin ó gach tír AE agus cuimsítear ann:
- uachtarán;
- 6 leasuachtarán lena n–áirítear an chéad leasuachtarán agus Ardionadaí an Aontais do Ghnóthaí Eachtracha agus don Bheartas Slándála agus Leasuachtarán an Choimisiúin (Ardionadaí/Leasuachtarán),
- 21 Choimisinéir i gceannas ar phunanna.
Tá obair an Choimisiúin eagraithe i ranna ar a dtugtar Ard-Stiúrthóireachtaí (ASanna), agus tá gach ceann díobh freagrach as réimse beartais faoi leith.

An t–uachtarán

Ainmníonn an Chomhairle Eorpach iarrthóir le bheith ina uachtarán, ag cur san áireamh torthaí thoghcháin Pharlaimint na hEorpa. Ní foláir nó go bhfuil tacaíocht ag an iarrthóir ó fhormhór de chomhlachtaí Pharlaimint na hEorpa chun go dtoghfar é/í. Tá sé/sí freagrach as:
- na treoirlínte polaitiúla do Choláiste na gCoimisinéirí a bhunú;
- cinneadh a dhéanamh faoi eagrú inmheánach an Choimisiúin agus freagracht as réimsí beartais faoi leith a tharmligean chuig na Coimisinéirí aonair — féadfar na cúraimí sin a athleithdháileadh le linn a am/ham san oifig;
- leasuachtaráin a cheapadh as Comhaltaí an Choimisiúin, seachas an tArdionadaí/Leasuachtarán.
Féadfaidh sé/sí chomh maith a iarraidh ar Choimisinéir a phost/post a fhágáil gan cead ón gColáiste.

Ceapachán

Trí chomhaontú comhchoiteann leis an uachtarán tofa, glacann an Chomhairle liosta na ndaoine a bhfuil sé beartaithe aici iad a cheapadh mar Chomhaltaí an Choimisiúin, seachas an tArdionadaí/Leasuachtarán.
Ceapann an Chomhairle Eorpach an tArdionadaí/Leasuachtarán, i gcomhaontú le hUachtarán an Choimisiúin.
Roghnaítear Comhaltaí an Choimisiúin dá n–inniúlacht ghinearálta agus dá neamhspleáchas.
Faomhtar an Coláiste iomlán le vóta Pharlaimint na hEorpa.

Tábla achomair

An Conradh ar an Aontas Eorpach	17	Ról agus comhdhéanamh an Choimisiúin; ceapachán agus cumhachtaí Uachtarán an Choimisiúin
An Conradh ar an Aontas Eorpach	18	Ceapachán agus cumhachtaí an Ardionadaí/Leasuachtaráin
An Conradh ar Fheidhmiú an Aontais Eorpaigh	244, 245, 246, 247, 248, 249, 250	Feidhmiú an Choimisiúin

PRÍOMHDHOICIMÉID

Leagan comhdhlúite den Chonradh ar an Aontas Eorpach — Teideal III — Forálacha maidir leis na hinstitiúidí — Airteagal 17 agus Airteagal 18 (IO C 202, 7.6.2016, lgh. 26-27)

Leagan comhdhlúite den Chonradh ar Fheidhmiú an Aontais Eorpaigh — Cuid a Sé — Forálacha institiúideacha agus airgeadais — Teideal I — Forálacha institiúideacha — Caibidil 1 — Na hinstitiúidí — Roinn 4 — An Coimisiún — Airteagail 244, 245, 246, 247, 248, 249 agus 250 (IO C 202, 7.6.2016, lgh. 155-157)

DOICIMÉID GHAOLMHARA

Cinneadh 2013/272/AE ón gComhairle Eorpach an 22 Bealtaine 2013 maidir le líon comhaltaí an Choimisiúin Eorpaigh (IO L 165, 18.6.2013, lgh. 98)

Nuashonraithe 11.10.2017