Rátaí comhshó idir airgeadraí náisiúnta agus an euro

ACHOIMRE AR:

Rialachán (CE) Uimh. 2866/98 — rátaí comhshó idir an euro agus airgeadraí na dtíortha a bheidh ag glacadh an euro

CAD IS AIDHM LEIS AN RIALACHÁN?

Leagtar amach ann na rátaí comhshó idir an euro agus na hairgeadraí náisiúnta a bhí i mBallstáit an limistéir euro roimhe sin.
Glacadh na rátaí sin an 31 Nollaig 1998 nuair a ghlac an chéad 11 Bhallstát de chuid an Aontais Eorpaigh an euro (an Bheilg, an Ghearmáin, Éire, an Spáinn, an Fhrainc, an Iodáil, Lucsamburg, an Ísiltír, an Ostair, an Phortaingéil agus an Fhionlainn).

PRÍOMHPHOINTÍ

Chun bheith ina bhall de limistéar an euro, an tríú céim in aontas eacnamaíoch agus airgeadaíochta AE, ní mór do Bhallstát coinníollacha eacnamaíocha agus dlíthiúla áirithe, ar a dtugtar na critéir um chóineasú a chomhlíonadh. Tá na critéir sin deartha lena áirithiú gur féidir le tíortha cobhsaíocht a léiriú — laistigh de theorainneacha sainithe áirithe — i bpraghsanna, i staid airgeadais a rialtais, i rátaí malairte agus i rátaí úis fadtéarmacha.
Leasaíodh an rialachán roinnt uaireanta chun rátaí comhshó tíortha úra ag teacht isteach i limistéar an euro a ghlacadh:
- An Ghréig in 2001;
- An tSlóivéin in 2007;
- An Chipir agus Málta in 2008;
- An tSlóvaic in 2009;
- An Eastóin in 2011;
- An Laitvia in 2014;
- An Liotuáin in 2015.
- An Chróit in 2023.
De réir Airteagal 140 den Conradh ar Fheidhmiú an Aontais Eorpaigh, is í Comhairle an Aontais Eorpaigh a shocraíonn na rátaí comhshó idir an euro agus airgeadraí na mBallstát. Cinneann an Chomhairle le haontoilíocht thíortha an limistéir euro agus na tíre lena mbaineann, ag gníomhú di ar thogra ón gCoimisiún Eorpach agus i ndiaidh di dul i gcomhairle leis an mBanc Ceannais Eorpach.

Tá na rátaí comhshó socraithe go neamh–inchúlghairthe.

1 euro =	Ráta malairte	An t-airgeadra náisiúnta roimhe sin
	40.34	Francanna na Beilge
	1.96	Mairg na Gearmáine
	15.65	Krooni na hEastóine
	0.79	Puint na hÉireann
	340.75	Drachmaí na Gréige
	166.39	Pesetas na Spáinne
	6.56	Francanna na Fraince
	7.53	Kuna na Cróite
	1 936.27	Liranna na hIodáile
	0.59	Puint na Cipire
	0.70	Lati na Laitvia
	3.45	Litai na Liotuáine
	40.34	Francanna Lucsamburg
	0.43	Liranna Mhálta
	2.20	Gildir na hOllainne
	13.76	Scillingí na hOstaire
	200.48	Escudo na Portaingéile
	239.64	Tolair na Slóivéine
	30.13	Koruna na Slóvaice
	5.95	Mairg na Fionlainne

CÉN UAIR ATÁ TOSACH FEIDHME AN RIALACHÁIN?

Tá sé i bhfeidhm ón 1 Eanáir 1999.

CÚLRA

Le haghaidh tuilleadh faisnéise, féach:

An euro (An Coimisiún Eorpach)
Ár gcuid airgid (An Banc Ceannais Eorpach).

PRÍOMHDHOICIMÉAD

Rialachán (CE) Uimh. 2866/98 an 31 Nollaig 1998 maidir leis na rátaí comhshó idir an euro agus airgeadraí na mBallstát a bheidh ag glacadh an euro (IO L 359, 31.12.1998, lgh. 1-2).

Rinneadh leasuithe ina dhiaidh sin ar Rialachán (CE) Uimh. 2866/98 a chorprú sa bhuntéacs. Níl de luach ar an leagan comhdhlúite seo ach luach doiciméadach amháin.

Nuashonraithe 26.07.2022