Tarracóirí agus innealra talmhaíochta nó foraoiseachta: gléasanna cosanta cúlsuite

Tá ceanglais theicniúla á gcomhchuibhiú ag an Aontas Eorpach (AE) a bhaineann le struchtúir chosanta i gcás iompaithe a chuirtear le cúl tarracóirí caolrianta. Ar an chaoi seo, tá páirt á glacadh ag an AE i gcur i bhfeidhm nós imeachta cineálcheadaithe an Chomhphobail, nós imeachta a cuireadh ar bun le Treoir 74/150/CEE agus a rinneadh a aisghairm agus a ionadú ina dhiaidh sin le Treoir 2003/37/CE.

ACHT

Treoir 86/298/CE ón gComhairle maidir le struchtúir chosanta chúlsuite le haghaidh tarracóirí talmhaíochta agus foraoiseachta caolrianta le rothaí [Féach na hachtanna leasaitheacha].

ACHOIMRE

Cuirtear an treoir i bhfeidhm maidir le tarracóirí lena mbaineann na saintréithe seo a leanas:

• uas-scóip ón talamh de 600 milliméadar;
• uasrian acastóra, ar a bhfuil na boinn is leithne suite, de níos lú ná 1 150 milliméadar;
• meáchan gan ualach de bhreis is 600 cileagram.

Beidh ar na Ballstáit uile cineálcheadú comhpháirte a dhámhachtain le haghaidh gach chineál struchtúir chosanta i gcás iompaithe, agus le haghaidh fhorbhall an struchtúir leis an tarracóir, má chomhlíontar na ceanglais deartha agus tástála a leagtar amach sna hiarscríbhinní a ghabhann leis an treoir. Eisítear comhartha chineálcheadú comhpháirte an Chomhphobail Eorpaigh (CE) ina leith ansin.

Ní ceadmhach do na Ballstáit cosc a chur ar tharracóir a chur ar an mhargadh, ná diúltú do cheadú CE nó náisiúnta a dhámhachtain, má chomhlíontar ceanglais na treorach.

Cuirfidh údaráis inniúla na mBallstát a chéile ar an eolas faoi na bearta a dhéantar lena cinntiú go gcloíonn struchtúir chosanta leis an chineál comhpháirte arna ceadú. Féadfaidh na húdaráis inniúla cineálcheadú comhpháirte CE a aistarraingt, más gá, mura gcloítear leis an chineál comhpháirte arís agus arís eile.

Leasófar an treoir le dul chun cinn teicniúil a chur san áireamh.

Aisghairfear Treoir 86/298/CE le Rialachán (AE) Uimh. 167/2013 le héifeacht ón 1 Eanáir 2016.

Nuashonrú is déanaí: 02.07.2014