Ba cheart do thír an Aontais Eorpaigh (AE) an seasamh céanna a shannadh do chiontuithe a thugtar i dtíortha AE eile is a shanntar do chiontuithe a thugtar ina cúirteanna féin.

Cinneadh Réime 2008/675/CGB ón gComhairle an 24 Iúil 2008 maidir le ciontuithe i mBallstáit an Aontais Eorpaigh a chur san áireamh i gcúrsa imeachtaí nua coiriúla.

Leagtar amach critéir faoin gcinneadh réime seo lena gcuirtear ciontuithe, a tugadh i dtír AE roimhe seo, san áireamh le linn imeachtaí coiriúla i dtír AE eile i gcoinne an duine chéanna, ach bunaithe ar fhíricí eile.

I gcomhthéacs imeachtaí nua coiriúla, ní mór do thíortha AE a chinntiú go gcuirtear ciontuithe, a tugadh roimhe sin i dtír AE eile, san áireamh faoi na coinníollacha céanna a chuirtear i bhfeidhm ar chiontuithe inmheánacha roimhe sin.

Caithfear na ciontuithe roimhe sin a chur san áireamh roimh agus le linn na trialach, agus le linn don phionós a bheith á chur i bhfeidhm freisin. Ba cheart leormhachnamh a dhéanamh orthu maidir leis na rialacha nós imeachta is infheidhme a bhaineann le:

Nuair a chuireann an tír AE a bhfuil na himeachtaí nua á reáchtáil aici ciontuithe roimhe sin san áireamh, níor cheart go gcuirfeadh sé sin isteach ar na ciontuithe roimhe sin ná go ndéanfaí na ciontuithe roimhe sin a chealú nó a athbhreithniú dá bharr.

Féadfar teorainn a chur le tionchar an chinneadh réime freisin más rud é go ndearnadh an cion, a bhfuil imeachtaí nua á reáchtáil ina leith, sular tugadh an ciontú roimhe sin nó sular cuireadh i bhfeidhm go hiomlán é. Ní gá do thíortha AE a rialacha náisiúnta féin maidir le forchur pianbhreitheanna a chur i bhfeidhm, más rud é go gcuirfí teorainn le pianbhreith a fhorchur sna himeachtaí nua dá gcuirfí na rialacha sin i bhfeidhm maidir le ciontuithe eachtrannacha. Mar sin féin, ní mór do na cúirteanna a chinntiú go gcuirfear a leithéid de chiontuithe roimhe sin san áireamh chun críocha eile.

Tugadh faoi deara i dtuarascáil ó 2014 maidir leis an gcinneadh réime a chur i bhfeidhm go mbaineann luach breise leis i ndáil le hiontaoibh as cinntí dlí choiriúil agus breithiúnacha a chur chun cinn sa limistéar Eorpach ceartais. I measc na dtíortha AE a raibh an cinneadh curtha i bhfeidhm acu, áfach, fuarthas go raibh difríochtaí móra ann maidir le comhlíonadh. Measadh go raibh forálacha leordhóthanacha cur chun feidhme ag 13 de na 22 thír AE.

An 1 Nollaig 2014, chuir an Ríocht Aontaithe (1) in iúl don Choimisiún gur theastaigh uaithi bheith rannpháirteach sa chinneadh réime. Deimhníodh é sin le Cinneadh 2014/858/AE ón gCoimisiún.

Cruthaíodh córas ríomhairithe, an Córas Faisnéis Eorpach um Thaifid Choiriúla (ECRIS) sa bhliain 2012 faoi Chinneadh Réime 2009/316/CGB. Cuireann an córas sin ar chumas thíortha an AE faisnéis faoi chiontuithe coiriúla a roinnt go héasca agus go tapa. Cinntítear inoibritheacht an chinneadh réime le ECRIS.

TAGAIRTÍ

Gníomh	Teacht i bhfeidhm	Spriocdháta don trasuí sna Ballstáit	Iris Oifigiúil
Cinneadh Réime 2008/675/CGB ón gComhairle	15.8.2008	15.8.2010	IO L 220, 15.8.2008, lgh. 32-34

Tuarascáil ón gCoimisiún chuig Parlaimint na hEorpa agus chuig an gComhairle i ndáil le Cinneadh Réime 2008/675/CGB ón gComhairle an 24 Iúil 2008 maidir le ciontuithe i mBallstáit an Aontais Eorpaigh a chur san áireamh i gcúrsa imeachtaí nua coiriúla, a chur i bhfeidhm ag na Ballstáit (COM(2014) 312 final an 2.6.2014).

Cinneadh 2014/858/AE ón gCoimisiún an 1 Nollaig 2014 maidir le fógra ó Ríocht Aontaithe na Breataine Móire agus Thuaisceart Éireann gur mian léi bheith rannpháirteach i ngníomhartha an Aontais i réimse an chomhair phóilíneachta agus bhreithiúnaigh in ábhair choiriúla arna nglacadh sular tháinig Conradh Liospóin i bhfeidhm agus nach cuid d’acquis Schengen iad (IO L 345, 1.12.2014, lgh. 6-9).

(1) Tharraing an Ríocht Aontaithe siar as an Aontas Eorpach agus tá sí ina tríú tír (tír nach tír den Aontas Eorpach í) ó bhí an 1 Feabhra 2020 ann.