Borradh a chur faoi thurasóireacht idirnáisiúnta san Eoraip

ACHOIMRE AR:

Teachtaireacht ón gCoimisiún Eorpach (COM(2010) 352 final) — an Eoraip, an ceann scríbe turasóireachta is fearr ar domhan — creat nua polaitíochta le haghaidh na turasóireachta san Eoraip

CAD É IS AIDHM LEIS AN TEACHTAIREACHT?

• D’fhonn seasamh na hEorpa mar an ceann scríbe turasóireachta is fearr ar domhan a choinneáil, chuir an Coimisiún Eorpach sraith moltaí le haghaidh gníomhaíochtaí comhordaithe ar leibhéal an Aontais Eorpaigh (AE) chun cinn.
• Tá siad sin deartha chun iomaíochas earnáil na turasóireachta agus a hacmhainn le haghaidh fás inbhuanaithe agus seachadadh cáilíochta a mhéadú.

PRÍOMHPHOINTÍ

• Tá ról tábhachtach ag an turasóireacht i ngeilleagar AE. Tá 1.8 milliún gnó rannpháirteach, go leor acu ar scála beag. Tá 5.2 % de mhuintir na hEorpa fostaithe san earnáil agus rannchuidíonn sí le breis is 5 % d’olltáirgeacht intíre AE.
• Tá roinnt dúshlán le sárú ag turasóireacht AE agus roinnt deiseanna ag an earnáil óna dteastaíonn cur chuige comhbheartaithe:
  • iomaíochas a mhéadú ó chinn scríbe eile;
  • fágann treochtaí déimeagrafacha go bhfuil níos mó agus níos mó turasóirí aosta in AE agus ní mór dó a chuid táirgí agus bonneagar turasóireachta a chur in oiriúint dá réir sin;
  • ní mór do tháirgí turasóireachta a bheith níos inbhuanaithe freisin, agus tiomantais a bhaineann le hathrú aeráide agus an spleáchas ar uisce agus ar fhuinneamh á gcur san áireamh;
  • tairgeann teicneolaíochtaí faisnéise agus cumarsáide deiseanna nua nach mór a scrúdú.

Clár oibre nua i gcomhair gnímh

Ag teacht leis an straitéis fáis “Eoraip 2020”, dírítear sa chlár oibre le haghaidh gnímh ar leibhéal AE ar mhaithe leis an turasóireacht, atá leagtha síos i dteachtaireacht 2010, ar cheithre thosaíocht:

• 1.

  Iomaíochas in earnáil turasóireachta na hEorpa trí:

  • borradh a chur faoi nuálaíocht sa turasóireacht trí, mar shampla, trí chuidiú dul in oiriúint d’fhorbairtí margaidh i réimse na teicneolaíochta faisnéise agus cumarsáide agus na nuálaíochta (e.g. turasóireacht dhigiteach);
  • scileanna pearsanta a fheabhsú san earnáil trí dheiseanna a thairgtear i gcláir AE éagsúla a chur chun cinn, cosúil le réimsí na foghlama ar feadh an tsaoil sa chlár Erasmus+ nó sa chlár COSME le haghaidh fiontar beag agus meánmhéide (FBManna);
  • dul i ngleic le nádúr séasúrach an éilimh trí, mar shampla, malairtí turasóireachta deonaí a spreagadh idir tíortha AE, go háirithe i rith an tséasúir ísil;
  • éagsúlú a chur chun cinn i seirbhísí turasóireachta go háirithe trí dhíriú níos fearr ar chomhoidhreacht AE a chur chun cinn, mar aon le hoidhreacht “nádúrtha” a chomhtháthú i straitéisí turasóireachta;
  • sonraí socheacnamaíocha maidir le turasóireacht ar leibhéal AE a chomhdhlúthú.

• 2.

  Forbairt turasóireachta atá inbhuanaithe, freagrach agus ar ardchaighdeán a fhorbairt trí:

  • chóras táscairí a fhorbairt le haghaidh bainistiú inbhuanaithe ceann scríbe; d’fhéadfaí é sin a dhéanamh d’fhonn lipéad a fhorbairt ar mhaithe le cinn scríbe turasóireachta inbhuanaithe a chur chun cinn;
  • feachtais ardaithe feasachta a eagrú ina gcuirtear turasóirí ar an eolas níos fearr faoi chinn scríbe;
  • iniúchadh a dhéanamh ar an bhféidearthacht maidir le lipéad “Turasóireachta ar Ardchaighdeán”, d’fhonn luach saothair a thabhairt as feabhsúcháin trína méadaítear sábháilteacht agus iontaoibh tomhaltóirí;
  • é a dhéanamh níos éasca na rioscaí maidir le hathrú aeráide a aithint ionas nach ndéanfaidh tionscal turasóireachta na hEorpa na hinfheistíochtaí contráilte agus é a spreagadh chun iniúchadh a dhéanamh ar sheirbhísí turasóireachta malartacha;
  • cairt a mholadh i gcomhair turasóireacht inbhuanaithe agus fhreagrach;
  • straitéis a mholadh i gcomhair turasóireacht chósta agus mhuirí inbhuanaithe;
  • comhoibriú AE le geilleagair atá ag teacht chun cinn a bhunú nó a neartú agus le tíortha Meánmhara d’fhonn samhlacha forbartha turasóireachta a chur chun cinn atá inbhuanaithe agus freagrach agus d’fhonn dea-chleachtais a mhalartú.

• 3.

  Íomhá agus infheictheacht AE a chomhdhlúthú mar shraith ceann scríbe inbhuanaithe agus ar ardchaighdeán trí:

  • tacú le cruthú “branda Eorpaigh”, i ndlúthchomhar le tíortha AE, ag comhlánú a gcuid iarrachtaí tionscnaimh, d’fhonn cur ar chumas cinn scríbe na hEorpa seasamh amach níos fearr nuair a chuirtear i gcomparáid iad le cinn scríbe turasóireachta idirnáisiúnta eile;
  • an Eoraip a chur chun cinn mar cheann scríbe turasóireachta inbhuanaithe agus ar ardchaighdeán tríd an suíomh gréasáin “visiteurope.com”, ag mórimeachtaí idirnáisiúnta nó aontaí agus taispeántais turasóireachta ar an mórchóir, mar aon le tionscnaimh amhail Laethanta Turasóireachta na hEorpa agus Fóram Turasóireachta na hEorpa;
  • rannpháirtíocht AE a neartú i gcomhlachtaí idirnáisiúnta.

• 4.

  An cumas atá ag beartais agus maoiniú AE le haghaidh fhorbairt na turasóireachta a uasmhéadú trí:

  • Comhtháthú agus comhordú níos fearr a dhéanamh ar an turasóireacht le beartais AE eile, amhail iompar, iomaíochas, cánachas, cosaint tomhaltóirí, an comhshaol, fostaíocht, oiliúint, agus cistí struchtúracha, rudaí a bhfuil tionchar díreach nó indíreach acu go léir ar thurasóireacht;
  • cláir AE i bhfabhar na turasóireachta a chur chun cinn agus a úsáid, amhail Ciste Forbraíochta Réigiúnaí na hEorpa, Ciste Sóisialta na hEorpa, an Ciste Eorpach Talmhaíochta um Fhorbairt Tuaithe, agus an Ciste Eorpach Muirí agus Iascaigh.

CÚLRA

Deonaítear le hAirteagal 195 den Chonradh ar Fheidhmiú an Aontais Eorpaigh cumhacht don Aontas Eorpach tacú le gníomhaíochtaí thíortha AE in earnáil na turasóireachta agus iad a chomhordú agus a chomhlánú.

Chun tuilleadh faisnéise a fháil, féach freisin:

• “Scileanna gairmiúla”, “Cinn Scríbe Barrfeabhais na hEorpa” agus “Turasóireacht inrochtana” ar shuíomh gréasáin an Choimisiúin Eorpaigh.

PRÍOMHDHOICIMÉAD

Teachtaireacht ón gCoimisiún chuig Parlaimint na hEorpa, chuig an gComhairle, chuig Coiste Eacnamaíoch agus Sóisialta na hEorpa agus chuig Coiste na Réigiún — an Eoraip, an ceann scríbe turasóireachta is fearr ar domhan — creat nua polaitíochta le haghaidh na turasóireachta san Eoraip (COM(2010) 352 final, 30.6.2010)

Nuashonraithe 05.09.2016