Éicidhearthóireacht do tháirgí a bhaineann le fuinneamh

ACHOIMRE AR:

Treoir 2009/125/CE lena mbunaítear creat chun ceanglais éicidhearthóireachta do tháirgí a bhaineann le fuinneamh a leagan síos

CAD IS AIDHM LEIS AN TREOIR?

Leagtar amach leis creat don Choimisiún Eorpach chun ioscheanglais chomhchuibhithe sábháilteachta* maidir le táirgí a bhaineann le fuinneamh a dhíoltar san Aontas Eorpach (AE) a leagan síos. Níl feidhm aige maidir le modhanna iompair a úsáidtear chun daoine nó earraí a iompar.
Féachtar leis le feabhas a chur ar éifeachtúlacht fuinnimh* táirgí agus leis an gcomhshaol a chosaint, agus dá réir sin cur le forbairt inbhuanaithe, agus é sin á dhéanamh ar bhealach comhchuibhithe chun tacú le margadh aonair an Aontais Eorpaigh agus ilroinnt an mhargaidh agus praghsanna níos airde a d’fhéadfadh a bheith mar thoradh ar rialacha náisiúnta maidir leis na gnéithe céanna a sheachaint.

PRÍOMHPHOINTÍ

D’fhéadfadh sé go gclúdófaí le ceanglais éicidhearthóireachta na céimeanna uile de shaolré táirge agus den deisiú agus den athchúrsáil ag deireadh an tsaolré. Díríodh go dtí seo, i bhformhór na gcásanna, ar ídiú fuinnimh in úsáid toisc gur tugadh tús áite do ghníomhaíocht sa réimse sin. Baineann dearcadh níos iomlánaíche leis na rialacháin is déanaí, áfach, i bhfianaise iomlán an fhuinnimh a úsáidtear le linn shaolré an táirge. Maidir le táirgí leictreonacha, go háirithe, tá an chéim mhonaraíochta freagrach as aon rud ó thrian go dhá thrian fiú den fhuinneamh a úsáidtear le linn shaolré an táirge, agus moltar ceanglais maidir le húsáid an fhuinnimh chorpraithe sin a uasmhéadú le ceanglais maidir le hiontaofacht agus in–athúsáidteacht, chun saolré an táirge a shíneadh, agus in–athchúrsáilteacht, chun ábhair a aisghabháil ar bhealach níos éifeachtaí.
Bíonn marcáil CE ar na táirgí a chomhlíonann na ceanglais agus is féidir iad a dhíol áit ar bith san Aontas.

Gníomhartha cur chun feidhme

Trí bhíthin gníomhartha cur chun feidhme arna nglacadh faoin treoir, bhunaigh an Coimisiún na ceanglais éicidhearthóireachta maidir leis na hearraí seo a leanas a chur ar an margadh:

miasniteoirí tí (Rialachán (CE) Uimh. 1275/2008);
gaothráin innealltiomáinte lena bhfuil cumhacht ionchuir leictreach idir 125 W agus 500 kW (Rialachán (AE) Uimh. 327/2011);
aerchóiritheoirí agus gaothráin chompoird (Rialachán (AE) Uimh. 206/2012);
caidéil uisce (Rialachán (CE) Uimh. 547/2012);
athfhillteoirí leithleacha gan dlúthaire agus athfhillteorí gan dlúthaire a comhtháthaíodh i dtáirgí (Rialachán (AE) Uimh. 622/2012);
triomadóirí rothlaim tí (Rialachán (CE) Uimh. 2023/2533);
ríomhairí agus freastalaithe ríomhaire (Rialachán (AE) Uimh. 617/2013);
Folúsghlantóirí (Rialachán (CE) Uimh. 666/2013);
ídiú cumhachta leictrigh fuireachais sa mód ‘as’ de threalamh leictreach agus leictreonach tí agus oifige (Rialachán (AE) Uimh. 801/2013);
spástéitheoirí agus comhthéitheoirí (Rialachán (AE) Uimh. 813/2013);
téitheoirí uisce agus umair stórála uisce the (Rialachán (AE) Uimh. 814/2013);
oighinn tí, iartaí agus cochaill soirn (Rialachán (AE) Uimh. 66/2014);
claochladáin chumhachta bheag, mheánmhéide agus mhóra (Rialachán (AE) Uimh. 548/2014;
aonaid aerála (Rialachán (CE) Uimh. 1253/2014);
caibinéid ghairmiúla stórála cuisnithe, caibinéid séidte, aonaid chomhdhlúthúcháin agus fuarthóirí próiseála (Rialachán (AE) 2015/1095);
téitheoirí spáis áitiúla breosla sholadaigh (Rialachán (AE) 2015/1185);
téitheoirí spáis áitiúla (Rialachán (AE) 2015/1188);
coirí breosla sholadaigh (Rialachán (AE) 2015/1189);
tháirgí a bhaineann le fuinneamh, táirgí fuaraithe, fuarthóirí próisis ardteochta agus aonaid ghaothráin agus chorna (Rialachán (AE) 2016/2281);
freastalaithe agus táirgí stórála sonraí (Rialachán (AE) 2019/424);
mótair leictreacha agus tiomáintí luais inathraithe (Rialachán (AE) 2019/1781);
soláthairtí seachtracha cumhachta (Rialachán (AE) 2019/1782);
claochladáin chumhachta bheag, mheánmhéide agus mhóra (Rialachán (AE) Uimh. 2019/1783;
trealamh tathúcháin (Rialachán (CE) Uimh. 2019/1784);
fearais chuisniúcháin (Rialachán (CE) Uimh. 2019/2019);
foinsí solais agus gléasanna rialaithe ar leith (Rialachán (AE) 2019/2020);
fearais chúisniúcháin lena mbaineann feidhm díolacháin dhírigh (Rialachán (AE) 2019/2024);
taispeáintí leictreonacha (Rialachán (CE) Uimh. 2019/2021);

Le Rialachán (AE) 2023/826, lena n–aisghairtear Rialachán (CE) Uimh. 1275/2008 agus 107/2009, lena leagtar síos ceanglais éicidhearthóireachta maidir le hídiú leictreachais móid “as”, móid fuireachais, agus móid fuireachais líonra trealamh tí agus oifige leictreach agus trealamh tí agus oifige leictreonach, agus beidh sé i bhfeidhm ón 9 Bealtaine 2025.

CÉN UAIR ATÁ TOSACH FEIDHME NA RIALACHA?

B’éigean an treoir a thrasuí sa dlí náisiúnta an 20 Samhain 2010. Tá na rialacháin lena leagtar síos ceanglais maidir le lipéadú le haghaidh grúpaí sonracha táirgí ceangailteach i ngach Ballstát agus cruthaítear leo oibleagáidí ón dáta (na dátaí) cur i bhfeidhm atá leagtha síos sna rialacháin aonair.

Cuirfear an rialachán nua maidir le héicidhearthóireacht le haghaidh táirgí inbhuanaithe a glacadh in 2024 in ionad na Treorach de réir chéile mar an bonn dlíthiúil le haghaidh rialacha táirgeshonracha a ghlacfaidh an Coimisiún sna blianta amach romhainn.

CÚLRA

Le haghaidh tuilleadh faisnéise, féach:

Maidir le lipéad fuinnimh agus éicidhearthóireacht (An Coimisiún Eorpach).
Rialacháin maidir le héicidhearthóireacht le haghaidh táirgí inbhuanaithe (An Coimisiún Eorpach).

PRÍOMHTHÉARMAÍ

Éicidhearthóireacht. Gnéithe comhshaoil a chomhtháthú i ndearthóireacht táirgí d’fhonn feabhas a chur ar fheidhmíocht chomhshaoil an táirge le linn a shaolré.

Éifeachtúlacht fuinnimh. Níos lú fuinnimh a úsáid chun an tseirbhís chéanna a chur ar fáil. Tá cuisneoirí agus meaisíní níocháin atá tíosach ar fhuinneamh ina samplaí de tháirgí.

PRÍOMHDHOICIMÉAD

Treoir 2009/125/CE ó Pharlaimint na hEorpa agus ón gComhairle an 21 Deireadh Fómhair 2009 lena mbunaítear creat chun ceanglais éicidhearthóireachta do tháirgí a bhaineann le fuinneamh a leagan síos (IO L 285, 31.10.2009, lgh. 10–35).

Rinneadh leasuithe comhleanúnacha ar Threoir 2009/125/CE a chorprú sa bhuntéacs. Níl de luach ar an leagan comhdhlúite seo ach luach doiciméadach amháin.

DOICIMÉID GHAOLMHARA

Rialachán (AE) 2023/826 ón gCoimisiún an 17 Aibreán 2023 lena leagtar síos ceanglais éicidhearthóireachta maidir le hídiú leictreachais móide “as”, móid fuireachais, agus móid fuireachais líonra trealamh tí agus oifige leictreach agus trealamh tí agus oifige leictreonach de bhun Threoir 2009/125/CE ó Pharlaimint na hEorpa agus ón gComhairle agus lena n-aisghairtear Rialachán (CE) Uimh. 1275/2008 ón gCoimisiún agus Rialachán (CE) Uimh. 107/2009 ón gCoimisiún (Téacs atá ábhartha maidir le LEE) (IO L 103, 18.4.2023, lgh. 29–47).

Rialachán (AE) 2019/424 ón gCoimisiún an 15 Márta 2019 lena leagtar síos ceanglais éicidhearthóireachta le haghaidh táirge stórála sonraí de bhun Threoir 2009/125/CE ó Pharlaimint na hEorpa agus ón gComhairle agus lena leasaítear Rialachán (CE) Uimh. 617/2013 ón gCoimisiún (IO L 74, 18.3.2019, lgh. 46–66).