Comhairle eolaíochta do chomhbheartas iascaigh an Aontais Eorpaigh
ACHOIMRE AR:
Chinneadh 2005/629/CE lena mbunaítear Coiste Eolaíoch, Teicniúil agus Eacnamaíoch um Iascach
ACHOIMRE
CÉARD A DHÉANANN AN CINNEADH SEO?
— |
Bunaítear leis an Coiste Eolaíoch, Teicniúil agus Eacnamaíoch um Iascach. Cuirtear ionchur ar fáil ag an gcoiste chun cabhrú leis an gCoimisiún Eorpach comhbheartas iascaigh an Aontais Eorpaigh (AE) a chur i bhfeidhm.
|
— |
Leagtar amach ann an ról, an struchtúr agus na nósanna imeachta chun baill an choiste a cheapadh.
|
PRÍOMHPHOINTÍ
Ról
Téann an Coimisiún i gcomhairle leis an gcoiste maidir leis na cúrsaí go léir a bhaineann le caomhnú agus le bainistiú beo-acmhainní uisceacha (beatha ainmhíoch agus fásra muirí), agus go sonrach maidir le gnéithe bitheolaíochta, eacnamaíocha, comhshaoil, sóisialta agus teicniúla.
Tá tuairim an choiste go ríthábhachtach chun inbhuanaitheacht chomhbheartas iascaigh AE a chinntiú. Tá ról tábhachtach aici maidir le comhairle a thabhairt ar ghnéithe mar iad seo a leanas:
— |
uastorthaí inbhuanaithe (MSYanna — leibhéal uasghabhála ar féidir é a shaothrú go rialta gan ídiú fadtéarmach na n-acmhainní iascaigh); agus
|
— |
gabhálacha iomlán incheadaithe (TACanna — uaschainníochtaí speicis éisc áirithe ar féidir iad a ghabháil thar thréimhse áirithe ama i réigiún sonrach).
|
Baill agus a gceapacháin
Tá idir 30 agus 35 shaineolaí oirirce agus theicneolaí iascaireachta sa choiste, sna réimsí seo a leanas: bitheolaíocht agus éiceolaíocht mhuirí, eolaíocht iascaigh agus na ceisteanna eacnamaíocha, staitistiúla agus taighde a bhaineann le hiascaigh.
Déantar baill a cheapadh ó liosta tiomsaithe tar éis don Choimisiún glao oscailte iarratas a fhoilsiú ar a láithreán gréasáin. Ceaptar iad le haghaidh 3 bliana, le ceapacháin eile ar bhonn atrátha.
Is féidir leis an gcoiste a mheithleacha féin a bhunú maidir le ceisteanna sonracha tar éis dul i gcomhairle leis an gCoimisiún. Is féidir le hionadaithe an Choimisiúin agus saineolaithe eile seachtracha freastal ar chruinnithe an choiste agus ar chruinnithe na meithleacha.
Oibriú an choiste
Téann an Coimisiún i gcomhairle leis an gcoiste go rialta, nó nuair a mheastar gá a bheith leis, maidir le ceisteanna a bhaineann le caomhnú agus bainistiú beo-acmhainní uisceacha.
Cuirtear tuairim an choiste san áireamh nuair a dhéantar tograí ar bhainistiú iascaigh. Is féidir leis an gcoiste tuairimí ar chúrsaí iascaigh a chur ar aghaidh chuig an gCoimisiún freisin as a stuaim féin.
Foilsíonn an coiste tuarascáil bhliantúil ar:
— |
staid na stoc éisc agus treochtaí sa tionscal iascaigh, ag leagadh béime ar impleachtaí eacnamaíocha staid na stoc éisc;
|
— |
an obair atá déanta chun taighde eolaíochta, teicniúil agus eacnamaíoch sna hearnálacha iascaigh agus uisceshaothraithe a chomhordú (e.g. feirmeoireacht éisc agus sliogéisc).
|
Rialacha nós imeachta
Glactar le rialacha inmheánacha an choiste tar éis dul i gcomhairle leis an gCoimisiún. Treoraítear a chuid oibre le prionsabail barr feabhais, neamhspleáchais agus trédhearcachta, fad a choimeádtar rúndacht maidir le cúrsaí cánach agus gnó. Foilsítear na rialacha seo ar láithreán gréasáin an Choimisiúin.
CATHAIN A BHEIDH FEIDHM AG AN GCINNEADH SEO?
Cuireadh an cinneadh i bhfeidhm an 26 Lúnasa 2005.
CÚLRA
Coiste Eolaíoch, Teicniúil agus Eacnamaíoch um Iascach
GNÍOMH
Cinneadh 2005/629/CE ón gCoimisiún an 26 Lúnasa 2005 lena mbunaítear Coiste Eolaíoch, Teicniúil agus Eacnamaíoch um Iascach (IO L 225, 31.8.2005, lgh. 18-22)
Ionchorpraíodh sa bhuntéacs leasuithe i ndiaidh a chéile ar Chinneadh 2005/629/CE. Is chun críocha doiciméadúcháin amháin an leagan comhdhlúite seo.
Nuashonraithe 11.01.2016