Ardoideachas — comhar idir tíortha AE agus tíortha neamh-AE

ACHOIMRE AR:

Comhar san ardoideachas le tíortha neamh-AE a neartú — COM(2001) 385 final

ACHOIMRE

CÉARD A DHÉANANN AN TEACHTAIREACHT SEO?

Leagtar amach straitéis sa teachtaireacht seo agus déantar rialacha a aithint inti chun an comhar idir tíortha an Aontais Eorpaigh (AE) agus tíortha neamh-AE sa réimse ardoideachais a neartú.

Féachtar sa teachtaireacht:

• le forbairt a dhéanamh ar AE mar ionad foghlama;
• le tacaíocht a thabhairt do thíortha comhpháirtíochta lasmuigh den AE lena n-iarrachtaí nuachóirithe;
• le comhluachanna agus le tuiscint idir cultúir a chur chun cinn;
• le tacaíocht a thabhairt do thíortha AE agus dá n-institiúidí ardoideachais lena n-iarrachtaí idirnáisiúnaithe; agus
• le caighdeán na seirbhísí agus na n-acmhainní daonna a fheabhsú trí fhoghlaim fhrithpháirteach agus trí mhalartú dea-chleachtais.

PRÍOMHPHOINTÍ

• Féachtar leis an straitéis atá leagtha amach sa teachtaireacht seo leas a bhaint as an taithí a fuarthas ó na cláir a cuireadh ar bun in AE, amhail an clár Erasmus+, clár a bhfuil mar aidhm aige, i measc rudaí eile, diminsean idirnáisiúnta an oideachais agus na hoiliúna a mhéadú trí chomhpháirtíochtaí idir institiúidí ardoideachais i dtíortha AE agus i dtíortha neamh-AE.
• Iarrtar sa straitéis ar líonraí agus ar chomhpháirtíochtaí iltaobhacha a chur ar bun ina mbeadh páirt ag na tíortha a bhfuil institiúidí ardoideachais acu, atá cosúil leis na hinstitiúidí ardoideachais atá in AE, ionas go mbeadh na hollscoileanna lena mbaineann ábalta teacht ar chomhaontú maidir le saincheisteanna áirithe, saincheisteanna amhail:
  • inneachar acadúil na gcúrsaí atá le múineadh do mhic léinn mhalairte;
  • socruithe maidir le haire a thabhairt do mhic léinn mhalairte nuair atá siad thar lear; nó
  • socruithe maidir le haitheantas a thabhairt don obair a dhéantar ag ollscoileanna baile agus ag óst-ollscoileanna, trí shamhail an Chórais Eorpaigh d’Aistriú Creidmheasa* a úsáid.
• Leagtar béim sa straitéis ar a thábhachtaí agus atá sé tuilleadh a dhéanamh, de bhreis ar mhic léinn a mhalartú, chun comhar éifeachtach a bhaint amach idir na tíortha AE agus tíortha neamh-AE ó thaobh an ardoideachais. Tá malartuithe foirne agus cláir chomhpháirteacha de dhíth freisin.
• D’fhonn AE a chur chun cinn mar ionad barr feabhais foghlama ar fud an domhain, moltar sa straitéis gur cheart an cumas le haghaidh staidéar Eorpach i dtíortha eile a mhéadú trí líonra na n-ionad staidéar AE agus na gCathaoireacha Jean Monnet (poist le haghaidh gairmithe a dhéanann speisialtóireacht ar chomhtháthú Eorpach ar fud an domhain) a leathnú.
• Comhlánaítear an straitéis seo le gníomhartha Marie Skłodowska-Curie, a fhaigheann cistiú faoin gcreatchlár Fís 2020, trí shoghluaisteacht thrasnáisiúnta na dtaighdeoirí agus na mac léinn Ph.D. a chur chun cinn.

CÚLRA

Tá an-chuid oibre déanta ag ollscoileanna san Eoraip roimhe seo ar son an chomhair idirnáisiúnta: rinne siad éascaíocht ar churaclaim idirnáisiúnta agus ar chéimeanna ilábhar a fhorbairt, rinne siad tionscadail idirnáisiúnta taighde agus nuála a mhaoiniú, agus thacaigh siad le mic léinn, le baill foirne agus le heolas a mhalartú. Cuireann an comhar sin feabhas ar chaighdeán an oideachais agus na hoiliúna agus, ina theannta sin, spreagann sé nuálaíocht agus cruthú fostaíochta trí shoghluaisteacht. Ag an am céanna, cuireann sé deiseanna ar fáil do bhaill foirne agus do mhic léinn chun go bhfaighidís léargas níos fearr ar an saol.

EOCHAIRTHÉARMAÍ

* An Córas Eorpach d’Aistriú Creidmheasa: córas creidmheasa acadúla a ceapadh chun go mbeadh sé níos éasca ar mhic léinn bogadh idir tíortha difriúla. Tá an córas á úsáid ag formhór na dtíortha sa Réimse Ardoideachais Eorpaigh agus ag a lán tíortha lasmuigh de.

GNÍOMH

Teachtaireacht ón gCoimisiún chuig Parlaimint na hEorpa agus chuig an gComhairle maidir le comhar le tríú tíortha i réimse an ardoideachais a neartú (COM(2001) 385 final, 18.7.2001)

Nuashonraithe 26.10.2015