Bearta sriantacha i gcoinne na hIaráine
ACHOIMRE AR:
Cinneadh 2010/413/CBES maidir le bearta sriantacha i gcoinne na hIaráine
Rialachán (AE) Uimh. 267/2012 maidir le bearta sriantacha i gcoinne na hIaráine agus lena n–aisghairtear Rialachán (AE) Uimh. 961/2010
Cinneadh 2011/235/CBES maidir le bearta sriantacha atá dírithe ar dhaoine agus ar eintitis áirithe i bhfianaise na staide san Iaráin
Rialachán (AE) Uimh. 359/2011 maidir le bearta sriantacha atá dírithe ar dhaoine, ar eintitis agus ar chomhlachtaí áirithe i bhfianaise na staide san Iaráin
CAD IS AIDHM LEIS NA CINNTÍ AGUS LEIS NA RIALACHÁIN?
- Leagtar amach le Cinneadh 2010/413/CBES agus Rialachán (AE) Uimh. 267/2012 sraith smachtbhannaí agus beart eile mar fhreagairt ar imní na Comhairle Eorpaí atá ag dul i méid faoi chlár núicléach na hIaráine agus i bhfianaise rún Chomhairle Slándála na Náisiún Aontaithe (UNSCR) 1929 (2010).
- Díríonn na bearta ar thrádáil, ar an earnáil airgeadais, ar earnáil iompair na hIaráine, ar earnálacha lárnacha sa tionscal ola agus gáis agus ar an gCór Gharda Réabhlóideach Ioslamaí.
- Le Cinneadh 2011/235/CBES agus Rialachán (AE) Uimh. 359/2011 leagtar amach córas smachtbhannaí maidir le daoine aonair atá freagrach as sáruithe tromchúiseacha ar chearta an duine san Iaráin.
PRÍOMHPHOINTÍ
Soláthraítear le hAirteagal 215 den Chonradh ar Fheidhmiú an Aontais Eorpaigh agus le hAirteagal 29 den Chonradh ar an Aontas Eorpach an creat ginearálta le haghaidh smachtbhannaí AE a bhaineann leis an Iaráin.
Cinneadh 2010/413/CBES agus Rialachán (AE) Uimh. 267/2012
Trasuítear leis an gcinneadh agus leis an rialachán smachtbhannaí na Náisiún Aontaithe mar bheart leantach ar UNSCR lena gceanglaítear ar an Iaráin stop a chur le húráiniam a shaibhriú chun críocha leathadh núicléach. Forchuirtear leo réimse smachtbhannaí eacnamaíocha agus airgeadais uathrialacha AE ar an Iaráin, lena n–áirítear an méid a leanas.
Trádáil in earraí éagsúla:
- toirmeasc ar onnmhairí arm chun na hIaráine;
- toirmeasc ar onnmhairí earraí dé–úsáide agus earraí a d’fhéadfaí a úsáid i ngníomhaíochtaí a bhaineann le saibhriú núicléach;
- toirmeasc ar allmhairí amhola, gáis nádúrtha, táirgí peitriceimiceacha agus peitriliam;
- toirmeasc ar an bpríomhthrealamh a úsáidtear san earnáil fuinnimh a dhíol nó a sholáthar;
- toirmeasc ar dhíol nó ar sholáthar óir, miotal lómhar eile agus diamant;
- toirmeasc ar threalamh cabhlaigh áirithe;
- toirmeasc ar bhogearraí áirithe.
An earnáil airgeadais:
- sócmhainní Bhanc Ceannais na hIaráine a reo agus sócmhainní bainc thráchtála mhóra na hIaráine a reo;
- meicníochtaí maidir le fógra agus údarú a leagan síos le haghaidh aistrithe cistí os cionn méideanna áirithe chuig institiúidí airgeadais na hIaráine.
Earnáil an iompair:
- cosc a chur ar rochtain ar aerfoirt AE d’eitiltí lasta ón Iaráin;
- toirmeasc ar chothabháil agus ar sheirbhís aerárthaí lasta na hIaráine nó soithí a iompraíonn ábhair nó earraí toirmiscthe;
- srianta taistil agus reo sócmhainní arna bhforchur i gcoinne daoine agus eintitis bhreise liostaithe.
Ar an 20 Iúil 2015, ghlac agus d’aontaigh an Iaráin agus “E3/AE+3*” UNSCR 2231 (2015). Leis an rún seo:
- formhuiníodh an plean cuimsitheach comhpháirteach gníomhaíochta;
- ceadaíodh díolúintí áirithe ó bhearta sriantacha atá ann cheana; agus
- sainíodh an sceideal agus na gealltanais atá le déanamh ag na páirtithe go léir chun deireadh a chur le bearta sriantacha i gcoinne na hIaráine.
Ar an 16 Eanáir 2016 (Lá Forfheidhmithe), chuir na Náisiúin Aontaithe deireadh le cuid dá mbearta sriantacha a bhaineann le hábhar núicléach, mar atá leagtha síos le UNSCR 2231 (2015), agus chuir an Chomhairle deireadh le gach smachtbhanna eacnamaíoch agus airgeadais AE a bhaineann le hábhar núicléach i gcoinne na hIaráine. Mar sin féin, tá roinnt srianta fós i bhfeidhm.
Cinneadh 2011/235/CBES agus Rialachán (AE) Uimh. 359/2011
Foráiltear le Cinneadh 2011/235/CBES do thoirmeasc taistil agus reo ar chistí* agus ar acmhainní eacnamaíocha* do dhaoine aonair atá freagrach as sáruithe tromchúiseacha ar chearta an duine san Iaráin, agus dóibh siúd a bhaineann leo. Le Rialachán (AE) Uimh. 359/2011 tugtar éifeacht do Chinneadh 2011/235/CBES a mhéid a bhaineann sé leis an méid seo a leanas.
Bearta chun cur faoi chois inmheánach a chomhrac
- Tá sé toirmiscthe na nithe seo a leanas a dhíol, a sholáthar, a aistriú nó a onnmhairiú, cibé acu de thionscnamh an Aontais é nó nach ea, chuig aon duine nó comhlacht san Iaráin nó le húsáid san Iaráin:
- trealamh a d’fhéadfaí a úsáid le haghaidh cur faoi chois inmheánach mar atá liostaithe in Iarscríbhinn III;
- trealamh, teicneolaíocht nó bogearraí a shainítear in Iarscríbhinn IV, gan údarú roimh ré ón tír ábhartha AE.
- Tá sé toirmiscthe cúnamh teicniúil, seirbhísí bróicéireachta agus maoiniú a chur ar fáil d’aon duine nó comhlacht san Iaráin nó le húsáid san Iaráin má bhaineann na seirbhísí le trealamh a d’fhéadfaí a úsáid le haghaidh cur faoi chois inmheánach mar atá liostaithe in Iarscríbhinn III.
- Tá sé toirmiscthe aon teileachumarsáid nó faireachán idirlín nó seirbhísí idircheaptha a chur ar fáil do rialtas na hIaráine, do chomhlachtaí poiblí, do chorparáidí agus do ghníomhaireachtaí nó d’aon duine nó eintiteas a ghníomhaíonn thar a gceann.
Smachtbhannaí airgeadais
- I Rialachán (AE) Uimh. 359/2011 déantar achoimre ar:
- reo ar chistí agus acmhainní eacnamaíocha ar leis na daoine aonair nó na comhlachtaí atá liostaithe in Iarscríbhinn I iad nó atá ina seilbh nó á gcoinneáil acu;
- toirmeasc ar chistí nó acmhainní eacnamaíocha a chur ar fáil do dhaoine aonair, d’eintitis nó do chomhlachtaí atá liostaithe in Iarscríbhinn I;
- toirmeasc ar ghníomhaíochtaí d’aon ghnó chun na bearta thuas a shárú.
- Is éard atá in Iarscríbhinn I liosta de dhaoine arna sainaithint ag an gComhairle, de réir Chinneadh 2011/235/CBES mar dhaoine aonair atá freagrach as sáruithe tromchúiseacha ar chearta an duine san Iaráin, agus iad siúd a bhaineann leo.
- Féadfaidh tíortha AE a údarú ar bhonn eisceachtúil cistí reoite nó acmhainní eacnamaíocha a scaoileadh, lena n–áirítear le haghaidh costais bhunúsacha amhail bia, cógais agus fóntais agus táillí gairmiúla réasúnta.
CÉN UAIR ATÁ TOSACH FEIDHME NA G CINNTÍ AGUS NA RIALACHÁN?
- Tá Cinneadh 2010/413/CBES i bhfeidhm ón 26 Iúil 2010 agus tá Rialachán (AE) Uimh. 267/2012 i bhfeidhm ón 24 Márta 2012.
- Tá Cinneadh 2011/235/CBES i bhfeidhm ón 12 Aibreán 2011 agus tá Rialachán (AE) Uimh. 359/2011 i bhfeidhm ón 14 Aibreán 2011.
CÚLRA
Féach freisin:
PRÍOMHTHÉARMAÍ
E3/AE+3: An Fhrainc, an Ghearmáin, an Ríocht Aontaithe agus AE+, an tSín, an Rúis agus na Stáit Aontaithe.
Reo ar chistí: cosc a chur ar aon bhogadh, aistriú, athrú, úsáid cistí, ar rochtain ar chistí nó déileáil leo ar bhealach ar bith a mbeadh aon athrú ar a méid, suim, suíomh, úinéireacht, seilbh, cineál, ceann scríbe nó eile lena mbeifí ábalta na cistí a úsáid, lena n–áirítear bainistíocht punainne mar thoradh air.
Reo acmhainní eacnamaíocha: cosc a chur ar úsáid acmhainní eacnamaíocha (sócmhainní de gach cineál, cibé acu inláimhsithe, doláimhsithe, inchorraithe nó dochorraithe, is féidir a úsáid chun cistí, earraí nó seirbhísí a fháil) chun cistí, earraí nó seirbhísí a fháil ar bhealach ar bith, lena n–áirítear díol, fruiliú nó morgáistiú.
PRÍOMHDHOICIMÉID
Cinneadh 2010/413/CBES ón gComhairle an 26 Iúil 2010 maidir le bearta sriantacha i gcoinne na hIaráine agus lena n–aisghairtear Comhsheasamh 2007/140/CBES (IO L 195, 27.7.2010, lgh. 39-73)
Rinneadh leasuithe comhleanúnacha ar Chinneadh 2010/413/CBES a ionchorprú sa bhuntéacs. Níl de luach ar an leagan comhdhlúite seo ach luach doiciméadach amháin.
Rialachán (AE) Uimh. 267/2012 ón gComhairle an 23 Márta 2012 maidir le bearta sriantacha i gcoinne na hIaráine, agus lena n–aisghairtear Rialachán (AE) Uimh. 961/2010 (IO L 88, 24.3.2012, lgh. 1-112)
Féach an leagan comhdhlúite.
Cinneadh 2011/235/CBES ón gComhairle an 12 Aibreán 2011 maidir le bearta sriantacha atá dírithe ar dhaoine agus ar eintitis áirithe i bhfianaise na staide san Iaráin (IO L 100, 14.4.2011, lgh. 51-57)
Féach an leagan comhdhlúite.
Rialachán (AE) Uimh. 359/2011 ón gComhairle an 12 Aibreán 2011 maidir le bearta sriantacha atá dírithe ar dhaoine, ar eintitis agus ar chomhlachtaí áirithe i bhfianaise na staide san Iaráin (IO L 100, 14.4.2011, lgh. 1-11)
Féach an leagan comhdhlúite.
DOICIMÉID GHAOLMHARA
Leagan comhdhlúite den Chonradh ar an Aontas Eorpach — Teideal V — Forálacha ginearálta maidir le gníomhaíochtaí seachtracha an Aontais agus forálacha sonracha maidir leis an gcomhbheartas eachtrach agus slándála — Caibidil 2 — Forálacha sonracha maidir leis an gcomhbheartas eachtrach agus slándála — Alt 1 — Forálacha comhchoiteanna — Airteagal 29 (iar–Airteagal 15 CAE) (IO C 202, 7.6.2016, lch. 33)
Leagan comhdhlúite den Chonradh ar Fheidhmiú an Aontais Eorpaigh — Cuid a Cúig — Gníomhaíocht sheachtrach an Aontais — Teideal IV — Bearta sriantacha — Airteagal 215 (iar-Airteagal 301 CCE) (IO C 202, 7.6.2016, lch. 144)
Nuashonraithe 23.01.2023