(1)

Le hAirteagal 48l de Rialachán (AE) 2016/1011, ceanglaítear ar ESMA muirear a ghearradh ar riarthóirí tagarmharcanna criticiúla agus riarthóirí tagarmharcanna tríú tír, táillí a bhaineann le hiarratais ar údarú de bhun Airteagal 34 agus ar aitheantas faoi Airteagal 32 den Rialachán sin agus táillí bliantúla a bhaineann lena chúraimí a chomhlíonadh i gcomhréir leis an Rialachán sin i ndáil le tagarmharcanna criticiúla agus riarthóirí tagarmharcanna tríú tír aitheanta. Ceanglaítear le hAirteagal 48l(2) de Rialachán (AE) 2016/1011 go mbeidh táillí den sórt sin comhréireach le láimhdeachas an riarthóra tagarmharcanna lena mbaineann agus go gcumhdófar leo na costais uile arna dtabhú ag ESMA maidir le húdarú nó aitheantas agus feidhmiú a chúraimí i ndáil le riarthóirí tagarmharcanna criticiúla agus riarthóirí tagarmharcanna tríú tír i gcomhréir leis an Rialachán sin.

(2)

Ba cheart táillí a ghearrfar as gníomhaíochtaí ESMA i ndáil le riarthóirí tagarmharcanna criticiúla agus tagarmharcanna tríú tír a shocrú ar leibhéal lena seachnófaí carnadh suntasach easnaimh nó barrachais. I gcás ina mbíonn barrachas nó easnamh suntasach arís is arís eile ann, ba cheart leibhéal na dtáillí a athbhreithniú.

(3)

Ba cheart táillí a bhaineann le hiarratais ar údarú (“táillí údarúcháin”) agus aitheantas (“táillí aitheantais”) a ghearradh ar riarthóirí tagarmharcanna criticiúla agus ar riarthóirí tagarmharcanna tríú tír chun costais ESMA a chumhdach i ndáil le hiarratais ar údarú agus ar aitheantas a phróiseáil, lena n-áirítear costais chun a fhíorú go bhfuil iarratais comhlánaithe, faisnéis bhreise a iarraidh, cinntí agus costais a dhréachtú a bhaineann le measúnú a dhéanamh ar thábhacht shistéamach tagarmharcanna criticiúla chomh maith le comhlíonadh riarthóirí tagarmharcanna tríú tír.

(4)

Ós rud é go bhfuil an measúnú ar iarratais chomh dian céanna ó thaobh acmhainní de, is cuma más riarthóirí móra nó riarthóirí beaga a chuireann isteach iad, ba cheart táille aitheantais cnapshuime a bheith sa táille aitheantais agus an táille sin mar an gcéanna le haghaidh gach riarthóir tríú tír.

(5)

Ar bhonn an ualaigh oibre a bhfuil coinne leis agus an chostais lena mbainfidh le haghaidh ESMA, le bheith cumhdaithe go hiomlán leis an táille aitheantais aonuaire, ba cheart an costas a bhaineann le hiarratas ar aitheantas a mheasúnú a shocrú ag EUR 40 000.

(6)

Tá tagarmharcanna criticiúla faoi réir grinnscrúdú níos déine faoi Rialachán (AE) 2016/1011, agus ní mór dá riarthóirí ceanglais eagraíochtúla níos déine a chomhlíonadh. Mar thoradh air sin, tá ualach oibre níos mó ag ESMA leis an bpróiseas údarúcháin. Dá bhrí sin, ba cheart an táille údarúcháin do riarthóir tagarmharcanna criticiúla a bheith i bhfad níos airde ná an táille chun iarratas ar aitheantas a mheasúnú.

(7)

D’fhonn cáilíocht agus iomláine na n-iarratas a fhaightear a chur chun cinn agus i gcomhréir le cur chuige ESMA maidir le clárú na n-eintiteas a ndéanann sé maoirseacht orthu, ba cheart an táille aitheantais a bheith dlite tráth a chuirtear isteach an t-iarratas.

(8)

Tá táillí bliantúla le gearradh freisin ar riarthóirí tagarmharcanna criticiúla agus ar thagarmharcanna aitheanta tríú tír chun costais ESMA a chumhdach i dtaca lena chúraimí a fheidhmiú faoi Rialachán (AE) 2016/1011 maidir le maoirseacht leanúnach ar riarthóirí den sórt sin. I gcás tagarmharcanna tríú tír, ba cheart leis na táillí sin cur chun feidhme agus cothabháil socruithe comhair le húdaráis tríú tír mar aon leis an bhfaireachán ar fhorbairtí rialála agus maoirseachta i dtríú tíortha a chumhdach. I gcás tagarmharcanna criticiúla, ba cheart na speansais a thabhóidh ESMA a bheith cumhdaithe ag na táillí freisin, is iad sin na speansais i ndáil leis an maoirseacht ar bhonn leanúnach ar chomhlíonadh na gceanglas a leagtar amach in Airteagal 48l agus i dTeideal VI de Rialachán (AE) 2016/1011 ag na riarthóirí sin, comhlíonadh inchomparáide san áireamh, i gcás ina ndeonaítear sin.

(9)

Braitheann an costas a bhaineann le maoirseacht leanúnach a dhéanamh ar thagarmharc criticiúil ar cibé acu a cheanglaíonn sé nó nach gceanglaíonn sé ar ESMA coláiste maoirseoirí a bhunú i leith an tagarmhairc sin agus a bheith ina chathaoirleach ar an gcoláiste sin, arb ionann ceanglas mar sin agus ualach oibre breise nach beag. Mar thoradh air sin, is iomchuí idirdhealú a dhéanamh idir an dá chás maidir le táillí maoirseachta a bhunú. I gcodarsnacht leis sin, laistigh de chatagóir na dtagarmharcanna criticiúla, níor cheart é a bheith riachtanach idirdhealú a dhéanamh idir na táillí maoirseachta i gcomhréir le láimhdeachas bliantúil an riarthóra, ós rud é, de réir sainmhínithe, go mbíonn tionchar sistéamach san Aontas ag tagarmharcanna criticiúla.

(10)

Is cinneadh é cur isteach ar aitheantas san Aontas a ghlacann riarthóirí tagarmharcanna tríú tír ar fhoras tráchtála, toisc go mbeifí ag súil go nginfí ioncam agus a dtagarmharcanna á gcur ar fáil san Aontas. Dá bhrí sin, i gcás riarthóirí tagarmharcanna aitheanta tríú tír, ba cheart táillí maoirseachta a mhodhnú mar fheidhm den ioncam a dhíorthaíonn siad as úsáid na dtagarmharcanna sin san Aontas. I gcásanna nach nginfear aon ioncam, ba cheart íostáille mhaoirseachta a shocrú ag EUR 20 000.

(11)

Chun iarratais a dhéantar arís agus arís eile, nó iarratais gan bhunús, a dhíspreagadh, níor cheart táillí aitheantais agus táillí údarúcháin a aisíoc i gcás ina dtarraingíonn iarratasóir a iarratas siar. Ós rud é gurb ionann an obair riaracháin a cheanglaítear i gcás iarratais ar aitheantas nó ar údarú a dhiúltaítear agus an obair riaracháin a cheanglaítear i gcás iarratais a nglactar leis, níor cheart táillí aitheantais agus táillí údarúcháin a aisíoc má dhiúltaítear údarú nó aitheantas a thabhairt.

(12)

I gcomhréir le Rialachán (AE) 2021/168 ó Pharlaimint na hEorpa agus ón gComhairle (2), is féidir tagarmharcanna tríú tír a úsáid san Aontas gan é a bheith de cheangal ar na riarthóirí ábhartha coibhéis, aitheantas ná formhuiniú a lorg le linn idirthréimhse atá sínithe go dtí 2023. Le linn na hidirthréimhse sin, is córas é an t-aitheantas san Aontas ina ndéanann riarthóirí tagarmharcanna atá lonnaithe i dtríú tíortha rogha a bheith páirteach, rud a léiríonn go mbeidh a dtagarmharcanna fós ar fáil lena n-úsáid san Aontas tar éis dheireadh na hidirthréimhse. Dá bhrí sin, le linn na tréimhse sin, níor cheart feidhm a bheith ag forálacha maidir le táillí aitheantais agus maoirseachta ach amháin i dtaca le riarthóirí atá lonnaithe i dtríú tíortha a rinne iarratas ar aitheantas dá dheoin féin roimh dhul in éag na hidirthréimhse a tugadh isteach le Rialachán (AE) 2021/168 agus i gcás inar dheonaigh an t-údarás inniúil náisiúnta ábhartha nó ESMA aitheantas.

(13)

Chun cur i bhfeidhm rianúil na gcumhachtaí maoirseachta a thugtar do ESMA a áirithiú, ba cheart an Rialachán seo teacht i bhfeidhm mar ábhar práinne,