Straitéis an Aontais Eorpaigh le haghaidh foraoisí agus na hearnála foraois-bhunaithe

Le hionchur ó thíortha an Aontais Eorpaigh (AE) agus ó pháirtithe leasmhara (amhail úinéirí foraoisí, an tionscal agus grúpaí comhshaoil), d’fhoilsigh an Coimisiún Eorpach straitéis sa bhliain 2013 chun a chinntiú go mbeidh foraoisí agus an earnáil foraoisí AE réidh chun dul i ngleic le dúshláin thodhchaíocha.

ACHT

Teachtaireacht ón gCoimisiún chuig Parlaimint na hEorpa, chuig an gComhairle, chuig Coiste Eacnamaíoch agus Sóisialta na hEorpa agus chuig Coiste na Réigiún: Straitéis Foraoise AE nua: le haghaidh foraoisí agus na hearnála foraois-bhunaithe (COM(2013) 659 final, 20.9.2013).

ACHOIMRE

Le hionchur ó thíortha an Aontais Eorpaigh (AE) agus ó pháirtithe leasmhara (amhail úinéirí foraoisí, an tionscal agus grúpaí comhshaoil), d’fhoilsigh an Coimisiún Eorpach straitéis sa bhliain 2013 chun a chinntiú go mbeidh foraoisí agus an earnáil foraoisí AE réidh chun dul i ngleic le dúshláin thodhchaíocha.

CÉARD A DHÉANANN AN STRAITÉIS FORAOISE AE SEO?

• 1.

  Cuirtear béim inti ar an méid a chuireann an fhoraoiseacht le hearnálacha amhail na cinn seo a leanas: forbairt tuaithe (fostaíocht agus ioncaim), an t-athrú aeráide a chomhrac (carbón a ionsú), an bhithéagsúlacht, acmhainní le haghaidh fuinnimh agus tionscail, srl.

• 2.

  Déantar scrúdú inti ar na dúshláin atá os comhair na hearnála agus ar an gcaoi a rachfar i ngleic leo.

• 3.

  Cuirtear béim inti ar an ngá atá le cur chuige iomlánaíoch, agus an tionchar a bhíonn ag beartais eile ar na foraoisí á chur san áireamh.

• 4.

  Aithnítear inti conas is féidir bainistíocht inbhuanaithe na bhforaoisí a fheabhsú.

• 5.

  Tugtar spreagadh inti do bheartais AE a bhaineann le foraoisí a chur san áireamh go hiomlán i mbeartais náisiúnta foraoisí.

• 6.

  Iarrtar inti ar Chóras Faisnéise um Fhoraoisí a bhunú chun sonraí comhchuibhithe faoi fhoraoisí a bhailiú ar fud AE.

• 7.

  Féachtar léi cur le comhordú agus le comhtháthú beartas maidir le tionscnaimh fhoraois-bhunaithe.

PRÍOMHPHOINTÍ

Tá gá le creat beartais nua chun a chinntiú go gcomhlíonfar róil éagsúla na foraoiseachta ar bhealach cothrom. Ní mór beartais a bhaineann le foraoisí a chomhordú agus sineirgíochtaí le hearnálacha eile a chur san áireamh iontu. Ní mór foraoisí a chruthú a chuireann an méid is mó is féidir le cuspóirí AE.

Aithnítear ocht dtosaíocht sa straitéis:

• Tacaíocht a thabhairt do phobail: tá beartas AE um fhorbairt tuaithe ar cheann de na príomhionstraimí a úsáidtear chun an straitéis a chur i bhfeidhm. Is féidir cistí AE a úsáid chun cabhrú le teicneolaíochtaí foraoiseachta a nuachóiriú, mar shampla, nó chun teacht aniar (.i. an cumas freagairt do thurraingí, amhail tinte agus stoirmeacha), luach comhshaoil agus cumas maolaithe (.i. de-ocsaíd charbóin a ionsú ón atmaisféar) na n-éiceachóras foraoisí a fheabhsú. Cuireann seo le hiomaíochas, le mianach saoil agus le héagsúlacht eacnamaíoch.
• Tionscail, bithfhuinneamh agus geilleagar glas níos leithne, atá iomaíoch agus inbhuanaithe agus atá bunaithe ar fhoraoisí, a chur chun cinn: is ábhar nádúrtha, in-athnuaite, in-athúsáidte agus in-athchúrsáilte é an t-adhmad. Is féidir le foraoisí agus leis na hamhábhair a mbaintear astu fostaíocht a chruthú agus ioncaim a éagsúlú.
• An t-athrú aeráide: teacht aniar na bhforaoisí agus a gcumas oiriúnaitheach a chothú agus a mhéadú, amhail trí thinte a chosc agus trí réitigh oiriúnaitheacha eile (m.sh. cineálacha speiceas, plandaí iomchuí, srl.); agus cumas maolaithe na bhforaoisí a mhéadú.
• Foraoisí a chosaint agus seirbhísí éiceachórais a fheabhsú: soláthraíonn éiceachórais foraoisí seirbhísí agus amhábhair agus bíonn siad ina n-óstach don bhithéagsúlacht. Ní mór éiceachórais foraoisí a chosaint chun a dteacht aniar agus a n-ilfheidhmiúlacht a chinntiú.
• Bunachar faisnéise na bhforaoisí a fheabhsú: cuirfidh eolas breise maidir le foraoisí ar ár gcumas tuiscint níos fearr a fháil ar na dúshláin choimpléascacha chomhshaoil agus shochaíocha atá ag teacht os comhair na hearnála.
• Táirgí nua nuálacha foraoiseachta agus breisluacha: tá limistéar taighde comhtháite uaillmhianach de dhíth (.i. ina gcomhroinntear eolas, teicneolaíocht agus taighdeoirí go réidh), atá bunaithe ar fhoraoisí, chun spreagadh a thabhairt don nuálaíocht ar fud na hearnála.
• Ag obair i gcomhar a chéile chun foraoisí a bhainistiú agus a thuiscint: is ríthábhachtach iad an comhordú, an comhar agus an chumarsáid do bheartas comhsheasmhach.
• Foraoisí ó dhearcadh domhanda: a chinntiú go bhfuil beartais agus gealltanais AE agus na mBallstát AE maidir le foraoisí (amhail dífhoraoisiú nó tacaíocht don bhainistíocht inbhuanaithe) ag teacht lena chéile ar leibhéal domhanda.

CÚLRA

Cuireann an straitéis 2013 (1998) leis an Straitéis Foraoise AE (1998) roimhe sin. Faoin straitéis, cruthaíodh creat gníomhaíochtaí chun tacú leis an mbainistíocht inbhuanaithe, ina oibríonn Ballstáit AE le chéile ar raon beartas agus tionscnamh.

Chun tuilleadh faisnéise a fháil, féach láithreán Gréasáin an Choimisiúin Eorpaigh.

Nuashonraithe 03.04.2015