Plean Gníomhaíochta an Aontais Eorpaigh (AE) chun Drugaí a Chomhrac (2013-16)

Leagtar síos sa phlean gníomhaíochta seo cúig thosaíocht chun drugaí a chomhrac: éileamh a laghdú, soláthar a laghdú, comhordú náisiúnta agus comhordú ar fud an AE, comhar idirnáisiúnta, agus tuiscint níos fearr ar fheiniméan na ndrugaí.

ACHT

Plean Gníomhaíochta an AE chun Drugaí a Chomhrac don tréimhse 2013-16

ACHOIMRE

Tá Plean Gníomhaíochta an AE chun Drugaí a Chomhrac 2013-16 ar an chéad cheann de dhá phlean a ceapadh chun Straitéis Drugaí AE don tréimhse 2013-20 a chur i bhfeidhm. Féachtar leis an straitéis soláthar agus éileamh araon a laghdú agus dul i ngleic leis an díobháil shóisialta agus shláinte a bhaineann le húsáid drugaí agus le trádáil i ndrugaí.

Bunaithe ar an chreat a leagtar amach sa Straitéis Drugaí AE, cumhdaítear sa phlean gníomhaíochta 5 réimse thosaíochta:

Éileamh laghdaithe

Cuspóir: laghdú intomhaiste ar úsáid fhoriomlán drugaí agus ar úsáid fhadhbach drugaí, andúil i ndrugaí agus díobháil shóisialta agus shláinte atá bainteach le drugaí a laghdú, moill a chur le tosú úsáid drugaí.

• Úsáid drugaí a chosc/moill a chur letosú úsáid drugaí;
• Cóireáil agus athshlánú ó dhrugaí a fheabhsúchun úsáid drugaí aindleathacha, andúil i ndrugaí agus an díobháil a bhaineann le húsáid drugaí a laghdú , agus chun tacú le hathshlánú agus le comhtháthú sóisialta nó le hathimeascadh úsáideoirí drugaí;
• Deimhin a dhéanamh de go roinntear dea-chleachtais agus go leagtar amach íoschaighdeáin cáilíochta ar fud an AE i gcomhair beart um laghdú ar éileamh.

Soláthar laghdaithe

Cuspóir: laghdú intomhaiste ar infhaighteacht agus ar sholáthar drugaí aindleathacha san AE.

• Feidhm a bhaint as an bhfaisnéis atá ar fáil agus ionstraimí comhroinnte eolais sa chaoi is éifeachtaí agus is féidir chun forfheidhmiú dhlí na ndrugaí ar fud an AE a fheabhsú;
• Comhar idir na húdaráis breithiúnais i mBallstáit an AE a fheabhsú agus dlíthe an AE a neartú, mar shampla, i ndáil le drugaí nua sícighníomhacha agus le réamhtheachtaithe;
• Straitéis a dhréachtú chun dul i ngleic le ról na dteicneolaíochtaí nua cumarsáide agus le hóstáil láithreán gréasáin gaolmhar maidir le soláthar drugaí.

Comhoibriú feabhsaithe

Cuspóir: comhordú níos éifeachtaí maidir le beartais drugaí, lena mbaineann rialtais náisiúnta, institiúidí Eorpacha, comhlachtaí eile an AE (m.sh. Europol agus an Lárionad Faireacháin Eorpach um Dhrugaí agus um Andúil i nDrugaí), grúpaí saoránach, eagraíochtaí idirnáisiúnta agus tíortha nach tíortha den AE iad. Is tábhachtach iad na gníomhartha seo a leanas ach go háirithe:

• deimhin a dhéanamh de go bhfuil beartais drugaí inmheánacha agus seachtracha an AE i gcomhréir lena chéile;
• deimhin a dhéanamh de go mbaintear cur chuige cothromúil comhtháthaithe amach maidir le ceapadh beartas náisiúnta i ndáil le drugaí agus go nglacann saoránaigh páirt ann (m.sh. grúpaí ógra).

Comhar neartaithe idirnáisiúnta

Cuspóir: idirphlé agus comhar idir an AE, tíortha nach tíortha den AE iad agus eagraíochtaí idirnáisiúnta.

• Straitéis Drugaí an AE a chomhtháthú i mbeartas eachtrach foriomlán an AE;
• Cabhrú le clár oibre na Náisiún Aontaithe um beartas drugaí a mhúnlú agus comhordú an AE le comhlachtaí idirnáisiúnta atá ag obair sa réimse a neartú;
• Cabhrú le tíortha atá ag fanacht le dul isteach san AE, nó le tíortha is iarrthóirí ionchasacha, oiriúnú do dhlíthe an AE i réimse na ndrugaí.

Tuiscint fheabhsaithe ar fheiniméan na ndrugaí

Cuspóir: fianaise fhónta uileghabhálach ar ar féidir beartais agus gníomhartha drugaí a bhunú.

• Infheistiú i dtaighde, i mbailiú sonraí, i bhfaireachán, i measúnú agus i malartú eolais ar dhrugaí;
• Cumas a chothú agus a fhorbairt thar raon ghréasán na n-eagraíochtaí agus laistigh de a sholáthraíonn eolas faoi dhrugaí san AE agus a théann i mbun taighde ina leith, agus i measc na n-eagraíochtaí a dhéanann faireachán agus measúnú ar fhorbairtí sa réimse seo chomh maith;
• Scaipeadh torthaí taighde agus measúnaithe a fheabhsú.

Dréachtófar Plean Gníomhaíochta don tréimhse 2017-20 roimh 2016, tar éis d’athbhreithniú meántéarmach a bheith déanta ar an Straitéis Drugaí AE.

DOICIMÉAD DÁ DTAGRAÍTEAR

Straitéis Drugaí AE (2013-20)

Nuashonraithe 17.03.2014