Eagraíocht Idir-rialtasach um Iompar Idirnáisiúnta d’Iarnród (OTIF)

 

ACHOIMRE AR:

Cinneadh 2013/103/AE lena sínítear agus lena dtugtar i crích an comhaontú maidir le haontachas AE leis an gCoinbhinsiún maidir le hIompar Idirnáisiúnta d’Iarnród (COTIF), arna leasú le Prótacal Vilnius 1999

Comhaontú maidir le haontachas AE leis an gCoinbhinsiún maidir le hIompar Idirnáisiúnta d’Iarnród (COTIF), arna leasú le Prótacal Vilnius 1999

CAD IS AIDHM LEIS AN GCOMHAONTÚ AGUS LEIS AN GCINNEADH?

Leis an gcinneadh tugtar i gcrích thar ceann an Aontais Eorpaigh an comhaontú maidir le haontachas leis an gCoinbhinsiún maidir le hIompar Idirnáisiúnta d’Iarnród (COTIF), arna leasú le Prótacal Vilnius 1999.

Leis an gcinneadh tugtar inniúlacht eisiach do AE reachtaíocht a dhéanamh ar chúrsaí iompair iarnróid éagsúla arna gcumhdach in COTIF.

PRÍOMHPHOINTÍ

An Eagraíocht Idir-Rialtasach um Iompar Idirnáisiúnta d’Iarnród (OTIF) a bunaíodh an 1 Bealtaine 1985 tar éis Choinbhinsiún 1980 maidir le hIompar Idirnáisiúnta d’Iarnród (COTIF 1980). Leasaíodh COTIF 1980 ina dhiaidh sin le Prótacal Vilnius an 3 Meitheamh 1999 (COTIF 1999 anois).

Is é an Coinbhinsiún maidir le hIompar Idirnáisiúnta d’Iarnród (COTIF) téacs bunúsach OTIF. Rialaítear leis reáchtáil na heagraíochta, mar aon lena cuspóirí, a freagrachtaí, a caidreamh lena ballstáit agus a cuid gníomhaíochtaí i gcoitinne.

Is é aidhm OTIF trácht idirnáisiúnta iarnróid a chur chun cinn, a fheabhsú agus a éascú, go háirithe tríd an méid a leanas:

• córais dlí chomhionainn a bhunú agus a fhorbairt maidir leis an méid a leanas:
  • iompar idirnáisiúnta paisinéirí agus earraí i dtrácht idirnáisiúnta d’iarnród;
  • úsáid vaigíní mar mhodh iompair i dtrácht idirnáisiúnta d’iarnród;
  • úsáid bonneagair i dtrácht idirnáisiúnta d’iarnród;
  • iompar earraí contúirteacha i dtrácht idirnáisiúnta d’iarnród;
• cur le fáil réidh le constaicí áirithe ar thrasnú teorainneacha i dtrácht idirnáisiúnta d’iarnród;
• cur le hidir-inoibritheacht agus le comhchuibhiú teicniúil in earnáil an iarnróid;
• nós imeachta aonfhoirmeach maidir le ligean isteach teicniúil ábhair iarnróid a bheartaítear lena úsáid i dtrácht idirnáisiúnta;
• Faireachán a dhéanamh ar chur i bhfeidhm na rialacha agus na moltaí uile a bunaíodh le OTIF.

Ag teacht le hAirteagal 3(2) den Chonradh ar Fheidhmiú an Aontais Eorpaigh, tá inniúlacht eisiach ag an Aontas Eorpach reachtaíocht a dhéanamh maidir le hábhair éagsúla iompair d’iarnród a chumhdaítear in COTIF. Dá bhrí sin, tá aontachas AE le COTIF riachtanach chun cur ar chumas AE a inniúlacht a fheidhmiú i gcaidreamh idirnáisiúnta iarnróid i gcás gur bunaíodh an inniúlacht inmheánach sin. Ar an gcúis sin, comhaontaíonn tíortha AE a thagann le chéile sa Chomhairle seasamh AE sula nglacann AE páirt i gcruinnithe COTIF. Cosnaíonn aontachas AE le COTIF slándáil dhlíthiúil do chomhaltaí eile de chuid OTIF a théann isteach i gcaidreamh iarnróid le tíortha AE, ós rud é nach bhféadann na Ballstáit leas a bhaint as cearta nó oibleagáidí a ghlacadh ina n–aonar a thuilleadh maidir le tíortha neamh-AE i ndáil le hábhair ina bhfuil AE ina iomláine inniúil.

Éascaíonn aontachas AE le COTIF forbairt córais dlí chomhionainn is infheidhme maidir le hiompar idirnáisiúnta paisinéirí agus lasta d’iarnród ar fud na dtíortha ar baill de OTIF iad. Ní hamháin go bhfuil aontachas ina oibleagáid dhlíthiúil do AE; tá sé ar mhaithe le hiompar iarnróid a chur chun cinn ar fud an domhain freisin.

Tá ceanncheathrú OTIF lonnaithe i mBeirn, an Eilvéis agus áirithíonn iad seo a leanas reáchtáil na heagraíochta:

• an Rúnaí Ginearálta,
• an Tionól Ginearálta,
• an Coiste Riaracháin,
• an Coiste Athbhreithnithe,
• an Coiste Saineolaithe maidir le hIompar Earraí Contúirteacha,
• Coiste na Saineolaithe Teicniúla, agus
• an Coiste Éascaithe Iarnróid.

Tá 49 ballstát ag OTIF faoi láthair ón Eoraip, ón Meánoirthear, ón Áise agus ón Afraic Thuaidh, agus 1 tír chomhlachtaithe (an Iordáin).

DÁTA TEACHT I BHFEIDHM

Tháinig an comhaontú i bhfeidhm an 1 Iúil 2011 agus d’aontaigh an tAontas Eorpach leis an gcoinbhinsiún sin, mar eagraíocht réigiúnach chomhtháite eacnamaíochta.

CÚLRA

Chun tuilleadh faisnéise a fháil, féach:

• Maidir le OTIF (OTIF).

PRÍOMHDHOICIMÉID

Cinneadh 2013/103/AE ón gComhairle an 16 Meitheamh 2011 maidir le síniú agus tabhairt i gcrích an Chomhaontaithe idir an tAontas Eorpach agus an Eagraíocht Idir-Rialtasach um Iompar Idirnáisiúnta d’Iarnród maidir le hAontachas an Aontais Eorpaigh leis an gCoinbhinsiún maidir le hIompar Idirnáisiúnta d’Iarnród (COTIF) an 9 Bealtaine 1980, arna leasú le Prótacal Vilnius an 3 Meitheamh 1999 (IO L 51, 23.2.2013, lgh. 1-7)

Comhaontú idir an tAontas Eorpach agus an Eagraíocht Idir-Rialtasach um Iompar Idirnáisiúnta d’Iarnród maidir le hAontachas an Aontais Eorpaigh leis an gCoinbhinsiún maidir le hIompar Idirnáisiúnta d’Iarnród (COTIF) an 9 Bealtaine 1980, arna leasú le Prótacal Vilnius an 3 Meitheamh 1999 (IO L 51, 23.2.2013, lgh. 8-10)

DOICIMÉID GHAOLMHARA

Cinneadh (AE) 2018/768 ón gComhairle an 22 Bealtaine 2018 lena mbunaítear an seasamh atá le glacadh, thar ceann an Aontais Eorpaigh, ag 55ú seisiún Choiste na Saineolaithe maidir le hiompar idirnáisiúnta Earraí Contúirteacha na hEagraíochta Idir-Rialtasaí um Iompar Idirnáisiúnta d’Iarnród maidir le leasuithe áirithe ar Aguisín C a ghabhann leis an gCoinbhinsiún maidir le hIompar Idirnáisiúnta d’Iarnród (IO L 129, 25.5.2018, lgh. 77-79)

Cinneadh (AE) 2018/319 ón gComhairle an 27 Feabhra 2018 lena mbunaítear an seasamh atá le glacadh thar cheann an Aontais Eorpaigh ag 26ú seisiún Choiste Athbhreithnithe na hEagraíochta Idir-Rialtasaí um Iompar Idirnáisiúnta d’Iarnród maidir le leasuithe áirithe ar an gCoinbhinsiún maidir le hIompar Idirnáisiúnta d’Iarnród agus maidir leis na hAguisíní a ghabhann leis (IO L 62, 5.3.2018, lgh. 10-17)

Leagan comhdhlúite den Chonradh ar Fheidhmiú an Aontais Eorpaigh — Cuid a hAon — Prionsabail — Teideal I — Catagóirí agus réimsí inniúlachta an Aontais — Airteagal 3 (IO C 202, 7.6.2016, lch. 51)

Cinneadh (AE) 2016/833 ón gComhairle an 17 Bealtaine 2016 lena mbunaítear an seasamh atá le glacadh, thar ceann an Aontais Eorpaigh, ag 54ú seisiún Choiste na Saineolaithe maidir le hIompar Earraí Contúirteacha arna bhunú ag an Eagraíocht Idir-Rialtasach um Iompar Idirnáisiúnta d’Iarnród (OTIF) maidir le leasuithe ar Aguisín C a ghabhann leis an gCoinbhinsiún maidir le hIompar Idirnáisiúnta d’Iarnród (IO L 140, 27.5.2016, lgh. 12-14)

Seasamh (AE) Uimh. 13/2015 ón gComhairle ar an gcéad léamh d’fhonn glacadh le Treoir ó Pharlaimint na hEorpa agus ón gComhairle maidir le taisteal láneagraithe agus socruithe taistil cuidithe, lena leasaítear Rialachán (CE) Uimh. 2006/2004 agus Treoir 2011/83/AE ó Pharlaimint na hEorpa agus ón gComhairle agus lena n–aisghairtear Treoir 90/314/CEE ón gComhairle arna glacadh ag an gComhairle an 18 Meán Fómhair 2015 (IO C 360, 30.10.2015, lgh. 1-36)

Cinneadh (AE) ón gComhairle 2015/1734 an 18 Meán Fómhair 2015 lena mbunaítear an seasamh atá le glacadh thar ceann an Aontais Eorpaigh ag 12ú Comhthionól Ginearálta na hEagraíochta Idir-Rialtasaí um Iompar Idirnáisiúnta d’Iarnród (OTIF) maidir le leasuithe áirithe ar an gCoinbhinsiún maidir le hIompar Idirnáisiúnta d’Iarnród (COTIF) agus maidir leis na hAguisíní a ghabhann leis (IO L 252, 29.9.2015, lgh. 43-48)

Faisnéis a bhaineann le teacht i bhfeidhm an Chomhaontaithe idir an tAontas Eorpach agus an Eagraíocht Idir-Rialtasach um Iompar Idirnáisiúnta d’Iarnród maidir le hAontachas an Aontais Eorpaigh leis an gCoinbhinsiún maidir le hIompar Idirnáisiúnta d’Iarnród (COTIF) an 9 Bealtaine 1980, arna leasú le Prótacal Vilnius an 3 Meitheamh 1999 (IO L 183, 13.7.2011, lch. 1)

Nuashonraithe 19.12.2018