Foirmiúlachtaí tuairiscithe le haghaidh long

 

ACHOIMRE AR:

Treoir 2010/65/AE maidir le foirmiúlachtaí tuairiscithe le haghaidh long ag teacht isteach chuig calafoirt AE agus/nó ag imeacht ó chalafoirt AE

CAD IS AIDHM LEIS AN TREOIR?

• Féachtar léi laghdú a dhéanamh ar mhéid na bhfoirmiúlachtaí tuairiscithe le haghaidh long ag teacht isteach chuig calafoirt AE agus/nó ag imeacht ó chalafoirt AE chun iompar muirí a éascú.
• Rinneadh í a leasú le Treoir (AE) 2017/2109 maidir le clárú daoine ar bord long paisinéirí agus Treoir (AE) 2019/883 maidir le saoráidí glactha calafoirt don seachadadh dramhaíola ó longa.

PRÍOMHPHOINTÍ

Raon feidhme

Tá feidhm ag an treoir maidir le foirmiúlachtaí tuairiscithe is infheidhme maidir le hiompar muirí le haghaidh long ag teacht isteach i gcalafoirt thíortha AE agus ag imeacht ó chalafoirt thíortha AE.

Ní mór do thíortha AE a áirithiú go n–iarrfar na foirmiúlachtaí tuairiscithe ag a gcalafoirt ar bhealach comhchuibhithe agus comhordaithe. Ní mór don mháistir, nó do dhuine ar bith eile a bheidh údaraithe go cuí ag oibreoir na loinge, fógra a thabhairt don údarás náisiúnta inniúil, sula dtiocfaidh sé nó sí isteach i gcalafort AE, faoin bhfaisnéis a theastaíonn faoi na foirmiúlachtaí tuairiscithe.

Tarchur leictreonach sonraí

Maidir le tíortha AE:

• b’éigean dóibh glacadh le foirmiúlachtaí tuairiscithe a chur isteach go leictreonach trí ionad ilfhreastail tráth nach déanaí ná an 1 Meitheamh 2015; is é san ionad ilfhreastail náisiúnta aonair seo a thuairiscítear an fhaisnéis uile uair amháin agus trína gcuirtear an fhaisnéis sin ar fáil do na húdaráis inniúla éagsúla agus do thíortha AE;
• ní mór dóibh a áirithiú go gcuirfear an fhaisnéis a gheofar i gcomhréir le foirmiúlachtaí tuairiscithe ar fáil ina gcórais náisiúnta SafeSeaNet agus codanna den fhaisnéis sin a chur ar fáil do thíortha eile AE tríd an gcóras SafeSeaNet;
• ní mór dóibh glacadh le foirmeacha FAL (foirmeacha speisialta arna bhforbairt ag an Eagraíocht Mhuirí Idirnáisiúnta chun trácht idirnáisiúnta muirí a éascú) chun foirmiúlachtaí tuairiscithe a chomhlíonadh agus bhí siad fós ábalta glacadh le faisnéis i bhformáid páipéir go dtí an 1 Meitheamh 2015.

Díolúintí

Tá longa a thagann faoi raon feidhme Threoir 2002/59/CE (féach an achoimre) agus a oibríonn idir calafoirt atá suite i gcríoch chustaim AE, gan teacht ó chalafort lasmuigh de AE, gan stopadh ag calafort lasmuigh de AE nó gan dul i treo calafoirt lasmuigh de AE, díolmhaithe ón oibleagáid an fhaisnéis a sholáthar.

Leasuithe

• Le Treoir Leasaitheach (AE) 2017/2109 tugadh isteach rialacha úra a bhfuil sé mar aidhm leo clárú daoine a thaistealaíonn ar bord long paisinéirí a dhigitiú. Féachtar léi a áirithiú go mbeidh fáil láithreach ar líon beacht na bpaisinéirí agus faisnéis eile le húsáid ag seirbhísí cuardaigh agus tarrthála (SAR) i gcás timpiste. Faoi na ceanglais úra, ní mór líon na ndaoine ar bord a chur in iúl trí bhíthin na n–ionad ilfhreastail náisiúnta nó, má roghnaíonn tír AE déanamh amhlaidh, don údarás ainmnithe tríd an gcóras aitheantais uathoibríoch* sula n–imeoidh an long.
• Le Treoir (AE) 2019/883 maidir le saoráidí glactha calafoirt don seachadadh dramhaíola ó longa leasaítear an iarscríbhinn a ghabhann le Treoir 2010/65/AE maidir leis an bhfaisnéis atá le cur ar fáil do na húdaráis i ndáil le dramhaíl ó longa, lena n–áirítear iarmhair.

Aisghairm

Aisghairfear Treoir 2010/65/AE le Rialachán (AE) 2019/1239 maidir le timpeallacht Eorpach Ionaid Ilfhreastail Mhuirí ón 15 Lúnasa 2025 i leith. Bunaítear leis an rialachán úr creat maidir le timpeallacht Eorpach Ionaid Ilfhreastail Mhuirí (EMSWe) atá neodrach ón taobh teicniúil agus idir-inoibritheach ina bhfuil comhéadain chomhchuibhithe chun tarchur leictreonach faisnéise a éascú i ndáil le hoibleagáidí um thuairisciú le haghaidh long a bheidh ag teacht isteach i gcalafoirt AE, a bheidh ag fanacht i gcalafoirt AE agus a bheidh ag imeacht ó chalafoirt AE.

CÉN UAIR ATÁ TOSACH FEIDHME NA TREORACH?

Tá feidhm ag an treoir i dtíortha AE ón 19 Bealtaine 2012 agus b’éigean dlí a dhéanamh di i dtíortha AE ar an dáta céanna.

CÚLRA

Le haghaidh breis faisnéise, féach:

• Timpeallacht Eorpach Ionaid Ilfhreastail Mhuirí (An Coimisiún Eorpach);

I ndiaidh na ráige de COVID-19 agus d’fhonn bearta a thabhairt isteach dul i ngleic le tionchar na géarchéime, ghlac an Coimisiún Eorpach an méid seo a leanas:

• Communication from the Commission — Guidelines on protection of health, repatriation and travel arrangements for seafarers, passengers and other persons on board ships.

PRÍOMHTHÉARMAÍ

PRÍOMHDHOICIMÉAD

Treoir 2010/65/AE ó Pharlaimint na hEorpa agus ón gComhairle an 20 Deireadh Fómhair 2010 maidir le foirmiúlachtaí tuairiscithe le haghaidh long ag teacht isteach i gcalafoirt na mBallstát agus/nó ag imeacht ó chalafoirt na mBallstát agus lena n–aisghairtear Treoir 2002/6/CE (IO L 283, 29.10.2010, lgh. 1-10)

Rinneadh leasuithe comhleanúnacha ar Threoir 2010/65/AE a chorprú sa bhuntéacs. Níl de luach ar an leagan comhdhlúite seo ach luach doiciméadach amháin.

DOICIMÉID GHAOLMHARA

Treoir (AE) 2019/883 ó Pharlaimint na hEorpa agus ón gComhairle an 17 Aibreán 2019 maidir le saoráidí glactha calafoirt don seachadadh dramhaíola ó longa, lena leasaítear Treoir 2010/65/AE agus lena n–aisghairtear Treoir 2000/59/CE (IO L 151, 7.6.2019, lgh. 116-142)

Rialachán (AE) 2019/1239 ó Pharlaimint na hEorpa agus ón gComhairle an 20 Meitheamh 2019 lena mbunaítear timpeallacht Eorpach Ionaid Ilfhreastail Mhuirí agus lena n–aisghairtear Treoir 2010/65/AE (IO L 198, 25.7.2019, lgh. 64-87)

Treoir (AE) 2017/2109 ó Pharlaimint na hEorpa agus ón gComhairle an 15 Samhain 2017 lena leasaítear Treoir 98/41/CE ón gComhairle maidir le clárú daoine a sheolann ar bord long paisinéirí a oibríonn isteach i gcalafoirt Bhallstáit an Chomhphobail nó amach as calafoirt Bhallstáit an Chomhphobail agus Treoir 2010/65/AE ó Pharlaimint na hEorpa agus ón gComhairle maidir le foirmiúlachtaí tuairiscithe le haghaidh long atá ag teacht isteach i gcalafoirt na mBallstát agus/nó ag imeacht ó chalafoirt na mBallstát (IO L 315, 30.11.2017, lgh. 52-60)

Nuashonraithe 12.01.2020