29.5.2010   

GA

Iris Oifigiúil an Aontais Eorpaigh

L NaN/1

(1)

D’fhonn comhtháthú eacnamaíoch agus sóisialta an Aontais a fheabhsú, is gá tacú le hidirghabhálacha teoranta chun athchóiriú a dhéanamh ar fhoirgnimh atá ann cheana agus a úsáidtear chun críocha tithíochta i mBallstáit a d’aontaigh don Aontas Eorpach an 1 Bealtaine 2004 nó dá éis. Féadfaidh na hidirghabhálacha sin a bheith ann faoi na coinníollacha atá leagtha amach in Airteagal 7(2) de Rialachán (CE) Uimh. 1080/2006 ó Pharlaimint na hEorpa agus ón gComhairle an 5 Iúil 2006 maidir le Ciste Forbraíochta Réigiúnaí na hEorpa (3).

(2)

Ba cheart caiteachas a chlárú faoi chuimsiú oibríochta comhtháite um fhorbairt uirbeach nó faoi chuimsiú aise tosaíochta do limistéir a mbaineann meath fisiceach agus eisiamh sóisialta leo nó atá i mbaol meatha agus eisiaimh den sórt sin. Ar mhaithe le soiléireacht, ba cheart simpliú a dhéanamh ar na coinníollacha faoina bhféadfaidh idirghabhálacha tithíochta i limistéir uirbeacha a bheith ann. Chuige sin, ba cheart caiteachas ar idirghabhálacha tithíochta a chlárú ach paraiméadair éagsúla, is cuma cén fhoinse maoinithe atá i gceist, a chur san áireamh. Thairis sin, níor cheart a mheas gur caiteachas cáilithe é aon chaiteachas seachas caiteachas ar idirghabhálacha a bhaineann le foirgnimh atá ann cheana.

(3)

I roinnt Ballstát, i gcás pobal imeallaithe a bhfuil cónaí orthu i limistéir uirbeacha nó i limistéir thuaithe, is ionann tithíocht agus gné chinntitheach a ghabhann le lánpháirtiú. Is gá, dá bhrí sin, cáilitheacht i leith caiteachais ar idirghabhálacha i ngach Ballstát a leathnú chuig pobail a bhfuil cónaí orthu i limistéir uirbeacha nó i limistéir thuaithe.

(4)

Bíodh na pobail lonnaithe i limistéir uirbeacha nó i limistéir thuaithe, ba cheart a mheas, de bharr chaighdeán an-íseal a ndálaí tithíochta, gur caiteachas cáilithe é freisin an caiteachas ar athchóiriú tithíochta atá ann cheana nó ar thithíocht a thógáil in ionad tithíochta atá ann cheana, lena n-áirítear tithíocht nuathógtha a chur in ionad tithíochta den sórt sin.

(5)

I gcomhréir le Prionsabal Uimh. 2 de na Prionsabail Choiteanna Bhunúsacha maidir le Cuimsiú na Romach a d’athdhearbhaigh an Chomhairle ina conclúidí ar Chuimsiú na Romach an 8 Meitheamh 2009, níor cheart daoine eile a mbaineann cúinsí socheacnamaíocha comhchosúla leo a fhágáil as an áireamh le linn idirghabhálacha tithíochta atá dírithe ar ghrúpa ar leith a dhéanamh.

(6)

I gcomhréir le Prionsabal Uimh. 1 de na Prionsabail Choiteanna Bhunúsacha sin, chun na rioscaí go mbeidh deighilt ann a theorannú, ba cheart go mbeadh idirghabhálacha tithíochta do phobail imeallaithe ann faoi chuimsiú cur chuige chomhtháite, lena n-áirítear, go háirithe, gníomhaíochtaí i réimsí an oideachais, na sláinte, na ngnóthaí sóisialta, na fostaíochta agus na slándála, agus bearta dídheighilte.

(7)

Ba cheart coinníollacha comhionanna cur chun feidhme a áirithiú i ndáil le glacadh an liosta critéar is gá chun na limistéir a mbaineann meath fisiceach agus eisiamh sóisialta leo, nó atá i mbaol meatha agus eisiaimh den sórt sin, a chinneadh agus i ndáil le glacadh an liosta idirghabhálacha cáilithe. Le hAirteagal 291 den Chonradh ar Fheidhmiú an Aontais Eorpaigh, foráiltear go ndéantar rialacha agus prionsabail ghinearálta a bhaineann leis na sásraí maidir le rialú ag na Ballstáit ar fheidhmiú cumhachtaí cur chun feidhme ag an gCoimisiún a leagan síos roimh ré le rialachán arna ghlacadh i gcomhréir leis an ngnáthnós imeachta reachtach. Go dtí go nglacfar rialachán den sórt sin agus chun aon chur isteach ar ghníomhaíocht reachtach an Aontais a sheachaint, ba cheart go leanfaí d’fhorálacha Chinneadh 1999/468/CE ón gComhairle an 28 Meitheamh 1999 lena leagtar síos na nósanna imeachta maidir le feidhmiú na gcumhachtaí cur chun feidhme arna dtabhairt don Choimisiún (4) a chur i bhfeidhm.

(8)

Ba cheart, dá bhrí sin, Rialachán (CE) Uimh. 1080/2006 a leasú dá réir,