Tá de chuspóir leis gnéithe slándála, lena n–áirítear aitheantóirí bithmhéadracha*, a chomhchuibhiú do phasanna agus do dhoiciméid taistil thíortha AE chun iad a chosaint ar bhrionnú.
Leasaíodh é le Rialachán (EC) Uimh. 444/2009 in 2009 d’fhonn eisceachtaí a shainiú den chuid is mó do pháistí faoi bhonn 6 bliana agus do dhaoine nach bhfuil in ann go fisiceach méarloirg a thabhairt i gcomhair doiciméid taistil.

PRÍOMHPHOINTÍ

Ní úsáidfear na gnéithe bithmhéadracha i bpasanna agus i ndoiciméid taistil ach i gcomhair bharántúlacht an doiciméid agus aitheantas an tsealbhóra a dheimhniú, a mbeidh de cheart aige nó aici na sonraí pearsanta atá sa phas nó sa doiciméad taistil a dheimhniú agus, nuair is cuí, ceartú nó scriosadh a iarraidh. Is ar chúiseanna eisiúint pasanna agus doiciméad taistil amháin a bhaileofar agus a stórálfar sonraí bithmhéadracha.

Caithfear a chuimsiú i bpasanna agus i ndoiciméid taistil meán stórála ardslándála(slis) chun cuimhneamh ar shonraí digiteacha agus caithfidh go mbeidh go leor acmhainne iontu chun sláine, barántúlacht agus rúndacht na sonraí sin a dhearbhú. Sa mheán stórála tá íomhá aghaidhe agus dhá mhéarlorg a tógadh agus iad cothrom (seachas méara aonair ag rolladh, ingne go hingne). Ní mór na sonraí seo, a chaithfidh bheith i i bhformáidí idir-inoibritheacha, a chosaint.

Ainmníonn tíortha AE na húdaráis agus comhlachtaí atá údaraithe rochtain a bheith acu ar na sonraí atá sa mheán stórála doiciméad faoina reachtaíocht náisiúnta, faoi réir aon fhorálacha bainteacha de chuid dhlí AE nó comhaontuithe idirnáisiúnta. Chun a áirithiú nach mbeidh teacht ag níos mó páirtithe ná mar is gá ar an bhfaisnéis rúnaicmithe maidir le gnéithe slándála agus mionsonraí táirgthe, ainmníonn gach tír AE comhlacht amháin a bheidh freagrach as pasanna agus doiciméid taistil a sholáthar. Tá lánchead ag tíortha AE an comhlacht sin a athrú, más gá. Ar chúiseanna slándála, cuireann gach tír AE ainm an chomhlachta inniúil in iúl don Choimisiún Eorpach agus do na tíortha AE eile.

Tá na bunchaighdeáin slándála a gcaithfidh pasanna agus doiciméid taistil a eisíonn tíortha AE cloí leo leagtha amach san iarscríbhinn leis an rialachán seo. Is sonraíochtaí neamhrúnda iad seo. Cuirtear sonraíochtaí breise leis na sonraíochtaí seo ar féidir iad a choimeád faoi rún chun baol góchumtha agus brionnaithe a chosc. Glactar na sonraíochtaí breise seo trí ghníomhartha cur chun feidhme arna nglacadh ag an gCoimisiún, agus tá siad atá de réir caighdeáin idirnáisiúnta, agus baineann siad le:

gnéithe breise slándála;
an meán stórála agus a shlándáil;
riachtanais cháilíochta chomhchoiteanna i gcomhair na híomhá aghaidhe agus na méarlorg.

In 2018, ghlac an Coimisiún cinneadh cur chun feidhme lenar leagadh síos na sonraíochtaí teicniúla maidir le caighdeáin na ngnéithe slándála agus na bithmhéadrachta i bpasanna agus i ndoiciméid taistil lenar aisghaireadh cinntí dá leithéid roimhe seo agus a cuireadh in ionad na gcinntí sin.

Faoi Rialachán leasaitheach (CE) Uimh. 444/2009, tá páistí faoi bhonn 12 bhliain (aoisteorainn shealadach) díolmhaithe ó mhéarlorgaireacht, mar aon le daoine nach féidir leo é a dhéanamh go fisiceach. Níl cead ach ag baill foirne atá cáilithe agus a bhfuil an t–údarás cuí acu ó na húdaráis náisiúnta atá freagrach as pasanna agus doiciméid taistil a eisiúint aitheantóirí bithmhéadracha a thógáil. Ní mór pasanna agus doiciméid taistil a eisiúint mar cháipéisí aonair de réir riachtanais idirnáisiúnta.

Faoi fhorálacha chorpas dlí Schengen (acquis), níor ghlac an Danmhairg, an Ríocht Aontaithe agus Éire páirt sa rialachán seo agus ní raibh siad faoi cheangal leis. Chinn an Danmhairg, áfach, é a chur chun feidhme ina dlí náisiúnta. Cé nach cuid de AE iad, beidh baint ag an Íoslainn, an Iorua, an Eilvéis agus Lichtinstéin i gcur chun feidhme an rialacháin.

Ní bhaineann an rialachán seo le cártaí aitheantais a eisíonn tíortha AE chuig a náisiúnaigh ná le pasanna agus doiciméid taistil shealadacha atá bailí ar feadh 12 mhí nó níos lú.

CÉN UAIR ATÁ TOSACH FEIDHME AN RIALACHÁIN?

Bhí ar thíortha AE an rialachán seo a chur chun feidhme:

maidir leis an íomhá aghaidhe faoin 28 Lúnasa 2006;
maidir le méarloirg faoin 28 Meitheamh 2009.

CÚLRA

Le haghaidh tuilleadh faisnéise, féach:

Slándáil doiciméad (An Coimisiún Eorpach).

PRÍOMHTHÉARMAÍ

Aitheantóirí bithmhéadracha: sonraí pearsanta ar toradh iad ar phróiseáil shainiúil theicniúil a bhaineann le tréithe fisiceacha, síceolaíocha nó iompraíochta duine aonair, lena n–éascaítear nó lena ndeimhnítear aitheantas uathúil an duine sin, amhail íomhánna aghaidhe nó sonraí méarloirg.

PRÍOMHDHOICIMÉAD

Rialachán Comhairle (EC) Uimh. 2252/2004 an 13 Nollaig 2004 maidir le caighdeáin do ghnéithe slándála agus do bhithmhéadracht i bpasanna agus i ndoiciméid taistil arna n–eisiúint ag Ballstáit (IO L 385, 29.12.2004, lgh. 1-6)

Rinneadh leasuithe comhleanúnacha ar Rialachán (CE) Uimh. 2252/2004 a chorprú sa bhuntéacs. Níl de luach ar an leagan comhdhlúite seo ach luach doiciméadach amháin.

DOICIMÉID GHAOLMHARA

Cinneadh Cur Chun Feidhme 30.11.2018 ón gCoimisiún lena leagtar síos na sonraíochtaí teicniúla maidir le caighdeáin do ghnéithe slándála agus do bhithmhéadracht i bpasanna agus i ndoiciméid taistil arna n–eisiúint ag Ballstáit agus lena n–aisghairtear Cinneadh C(2006) 2909 agus Cinneadh C(2008) 8657 (C(2018) 7774 final, 30.11.2018)

Nuashonraithe 08.01.2020

Top

All