Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Summaries of EU Legislation

Cosaint dhlíthiúil: Topagrafaíochtaí táirgí leathsheoltóra

Date of last review:
04/11/2020
Author:
Oifig Foilseachán an Aontais Eorpaigh
Responsible entity(ies):
Ard-Stiúrthóireacht na Líonraí Cumarsáide, an Ábhair Dhigitigh agus na Teicneolaíochta
Summarised document(s):

Cosaint dhlíthiúil: Topagrafaíochtaí táirgí leathsheoltóra

 

ACHOIMRE AR:

Treoir 87/54/CEE maidir le cosaint dhlíthiúil topagrafaíochtaí táirgí leathsheoltóra

CAD IS AIDHM LEIS AN TREOIR?

  • Tá sé mar aidhm leis an treoir córas soiléir comhchuibhithe a sholáthar ar fud thíortha AE ar mhaithe le cosaint dhlíthiúil topagrafaíochtaí* (dearaí leagain amach) táirgí leathsheoltóra*.
  • Is é is cuspóir leis an gcineál áirithe sin de cheart maoine intleachtúla cosc a chur ar mhicrishlis bhunaidh nó dearaí ciorcad iomlánaithe a chóipeáil agus a thráchtálú ina dhiaidh sin, mar atá siad, nó in aon táirge ina bhfuil siad corpraithe.

PRÍOMHPHOINTÍ

Coinníollacha chun cosaint a thabhairt ar thopagrafaíochtaí táirgí leathsheoltóra

Maidir le tíortha AE:

  • ní mór dóibh reachtaíocht a ghlacadh chun topagrafaíochtaí leathsheoltóra a chosaint sa chás go gcomhlíonann a ndearadh dhá choinníoll:
    • tá siad mar thoradh ar iarracht intleachtúil an chruthaitheora féin,
    • níl siad coitianta i measc an tionscail leathsheoltóra. Sa chás go bhfuil eilimintí topagrafaíochta táirge leathsheoltóra coitianta sa tionscal, ní féidir é a chosaint ach amháin a mhéid go gcomhlíonann an teaglaim d’eilimintí den sórt sin an coinníoll thuasluaite;
  • caithfidh sé an ceart chun cosanta a dheonú don duine a chruthaíonn an topagrafaíocht, más duine aonair é an duine sin atá ina náisiúnach de thír AE nó a bhfuil gnáthchónaí air nó uirthi ansin. Féadfaidh siad a shonrú, áfach, cé dó a ndeonófar an ceart i gcás go gcruthófar topagrafaíocht le linn fhostaíocht an chruthaitheora nó faoi chonradh nach conradh fostaíochta é;
  • féadfaidh siad, faoi choinníollacha áirithe, cosaint a dheonú do dhaoine aonair, do chuideachtaí nó do dhaoine dlítheanacha eile a shaothraíonn topagrafaíocht ar bhonn tráchtála den chéad uair, is é sin topagrafaíocht:
    • nár saothraíodh ar bhonn tráchtála roimhe sin,
    • atá údaraithe go heisiach chun an topagrafaíocht ar fud an Aontais a shaothrú ar bhonn tráchtála ag an duine atá i dteideal é a údarú;
  • féadfaidh siad dul i mbun caibidlíochta le tíortha nach tíortha den Aontas Eorpach iad chun an ceart chun cosanta a leathnú chuig daoine nach gcumhdaítear sa Treoir. Nuair a dhéanann siad amhlaidh, ní mór dóibh an Coimisiún Eorpach a chur ar an eolas;
  • féadfaidh siad cosaint a dhiúltú nó a bhaint maidir le topagrafaíocht táirge leathsheoltóra i gcás nár cuireadh iarratas ar chlárú i bhfoirm chuí faoi bhráid údarás poiblí laistigh de 2 bhliain ó rinneadh é a shaothrú ar bhonn tráchtála den chéad uair;
  • féadfaidh siad a éileamh go ndéanfar ábhar lena sainaithnítear nó lena léirítear an topagrafaíocht a thaisceadh le húdaráis phoiblí. Mar sin féin, ní foláir nó nach gcuirfear an t–ábhar sin ar fáil go poiblí i gcás go bhfuil sé ina rún ceirde.

Cearta eisiacha

Is cearta eisiacha iad na cearta a dheonaítear. Áirítear orthu sin:

  • an ceart chun atáirgeadh ar thopagrafaíocht chosanta a údarú nó a thoirmeasc; agus
  • an ceart chun saothrú tráchtála nó an t-allmhairiú chun críche topagrafaíochta nó táirge leathsheoltóra a mhonaraítear ag úsáid na topagrafaíochta a údarú nó a thoirmeasc.

Níl feidhm ag an gceart eisiach chun atáirgeadh a údarú nó a thoirmeasc maidir le hatáirgeadh de na cineálacha seo a leanas:

  • chun críocha príobháideacha le haghaidh aidhmeanna neamhthráchtála;
  • chun anailís nó meastóireacht a dhéanamh ar na coincheapa, na próisis, na córais nó na teicnící a chuimsítear sa topagrafaíocht nó ar an topagrafaíocht féin nó iad a theagasc.

Ní leathnaítear an chosaint a thugtar do thopagrafaíochtaí táirgí leathsheoltóra chuig aon choincheap, próiseas, córas, teicníc nó faisnéis ionchódaithe a chuimsítear sa topagrafaíocht seachas an topagrafaíocht féin.

Clárú

  • Sa chás gur coinníoll é clárú na topagrafaíochta chun cearta eisiacha a dheonú, tiocfaidh na cearta sin i bhfeidhm ar:
    • ar an dáta a chuirfear an t iarratas ar chlárú isteach; nó
    • ar an dáta a dhéanfar an topagrafaíocht a shaothrú ar bhonn tráchtála ar dtús áit ar bith ar domhan, cibé acu is túisce.
  • Sa chás nach coinníoll é clárú chun cearta eisiacha a dheonú, tiocfaidh na cearta i bhfeidhm nuair a dhéantar an topagrafaíocht a shaothrú ar bhonn tráchtála áit ar bith ar domhan nó nuair a dhéantar í a fheistiú nó a ionchódú den chéad uair.

Dul in éag na gceart

Rachaidh na cearta eisiacha in éag 10 mbliana ó dheireadh na bliana féilire inar saothraíodh an topagrafaíocht ar bhonn tráchtála den chéad uair. Nuair a bhíonn clárú ag teastáil, ríomhtar an tréimhse 10 mbliana mar a leanas:

  • ó dheireadh na bliana féilire inar cuireadh an t–iarratas ar chlárúchán isteach; nó ó
  • dheireadh na bliana féilire inar saothraíodh an topagrafaíocht ar bhonn tráchtála den chéad uair, cibé acu is túisce.

Cosaint dhlíthiúil a leathnú chuig tíortha nach tíortha den Aontas Eorpach iad

Leathnaíodh cosaint dhlíthiúil topagrafaíochtaí táirgí leathsheoltóra chuig daoine aonair, cuideachtaí agus daoine dlítheanacha eile ó:

  • na Stáit Aontaithe (Cinneadh 93/16/CEE),
  • Ceanada (Cinneadh 94/700/CE),
  • Comhalta den Eagraíocht Dhomhanda Trádála (Cinneadh 94/824/CE), agus
  • Oileán Mhanann (Cinneadh 96/644/CE).

CMI a fhorfheidhmiú

Le Rialachán (AE) Uimh. 608/2013 maidir le forfheidhmiú údarás custaim ar chearta maoine intleachtúla, lenar aisghaireadh Rialachán (CE) Uimh. 1383/2003, rinneadh liosta na gceart cosanta a leathnú chun topagrafaíochtaí táirgí leathsheoltóra a áireamh ón 1 Eanáir 2014.

CÉN UAIR ATÁ TOSACH FEIDHME NA TREORACH?

Tá sí i bhfeidhm ón 23 Nollaig 1986 agus b’éigean dlí a dhéanamh di i dtíortha AE faoin 7 Samhain 1987.

CÚLRA

Ar leibhéal idirnáisiúnta, laistigh den Eagraíocht Dhomhanda um Maoin Intleachtúil, glacadh Conradh Washington um Chosaint Maoine Intleachtúla i leith Ciorcaid Iomlánaithe in 1989. Foráiltear leis cosaint do thopagrafaíochtaí ciorcad iomlánaithe. Cé nach bhfuil an conradh tagtha i bhfeidhm, corpraíodh a ábhar trí thagairt don Chomhaontú maidir le Gnéithe de Chearta Maoine Intleachtúla a bhaineann le Trádáil (ar a dtugtar Comhaontú TRIPS de ghnáth — féach an achoimre) a síníodh faoin Eagraíocht Dhomhanda Trádála.

Chun tuilleadh faisnéise a fháil, féach:

PRÍOMHTHÉARMAÍ

Topagrafaíocht: i gcás táirge leathsheoltóra (féach an chéad phríomhthéarma eile), sraith íomhánna gaolmhara, cibé dóigh a mbeidh siad feistithe nó ionchódaithe:
  • a léiríonn patrún tríthoiseach na sraitheanna dá bhfuil táirge leathsheoltóra comhdhéanta;
  • Tá patrún, nó cuid de phatrún, de dhromchla an táirge leathsheoltóra ag gach íomhá sa tsraith ag céim ar bith dá mhonarú.
Táirge leathsheoltóra: is ionann ciorcaid iomlánaithe, ar a dtugtar micrishliseanna (nó sliseanna) freisin, agus foirm dheiridh nó idirmheánach aon táirge:
  • ina bhfuil réimse ábhair lena n–áirítear sraith d’ábhar leathsheoltach; agus
  • ina bhfuil sraith amháin nó níos mó sraitheanna eile comhdhéanta d’ábhar seoltach, inslitheach nó leathsheoltach, agus na sraitheanna eagraithe de réir patrún tríthoiseach réamhshocraithe; agus
  • atá beartaithe chun feidhm leictreoin a fheidhmiú, go heisiach nó in éineacht le feidhmeanna eile.

Tá sliseanna leabaithe in go leor earraí tomhaltóra amhail fearais tí cosúil le meaisíní níocháin nó teilifíseáin, chomh maith le gluaisteáin, fóin phóca, ríomhairí, trealamh leighis agus meaisíní leighis.

PRÍOMHDHOICIMÉAD

Treoir ón gComhairle 87/54/CEE an 16 Nollaig 1986 maidir le cosaint dhlíthiúil topagrafaíochtaí táirgí leathsheoltóra (IO L 24, 27.1.1987, lgh. 36-40)

DOICIMÉID GHAOLMHARA

Rialachán (AE) Uimh. 608/2013 ó Pharlaimint na hEorpa agus ón gComhairle an 12 Meitheamh 2013 maidir leis an bhforghníomhú a dhéanann údaráis chustaim ar chearta maoine intleachtúla agus lena n–aisghairtear Rialachán (CE) Uimh. 1383/2003 ón gComhairle (IO L 181, 29.6.2013, lgh. 15-34)

Comhaontú maidir leis an Limistéar Eorpach Eacnamaíoch — Iarscríbhinn XVII — Maoin intleachtúil — Liosta dá bhforáiltear in Airteagal 65 (2) (IO L 1, 3.1.1994, lgh. 482-483)

LEATHNÚ AR CHOSAINT DO THÍORTHA NACH TÍORTHA DEN AONTAS EORPACH IAD

Cinneadh 96/644/CE ón gComhairle an 11 Samhain 1996 maidir le cosaint dhlíthiúil topagrafaíochtaí táirgí leathsheoltóra a leathnú chuig daoine ó Oileán Mhanann (IO L 293, 16.11.1996, lgh. 18-19)

Cinneadh na Comhairle 94/824/CE an 22 Nollaig 1994 maidir le cosaint dhlíthiúil topagrafaíochtaí táirgí leathsheoltóra a leathnú chuig daoine ó Chomhalta den Eagraíocht Dhomhanda Trádála (IO L 349, 31.12.1994, lgh. 201-202)

Cinneadh 94/700/CE ón gComhairle an 24 Deireadh Fómhair 1994 maidir le cosaint dhlíthiúil topagrafaíochtaí táirgí leathsheoltóra a leathnú chuig daoine as Ceanada (IO L 284, 1.11.1994, lgh. 61-62)

Cinneadh 93/16/CEE ón gComhairle an 21 Nollaig 1992 maidir le cosaint dhlíthiúil topagrafaíochtaí táirgí leathsheoltóra a leathnú chuig daoine as Stáit Aontaithe Mheiriceá agus críocha áirithe (IO L 11, 19.1.1993, lgh. 20-21)

Ionchorpraíodh leasuithe comhleanúnacha ar Chinneadh 93/16/CEE sa téacs bunaidh. Níl de luach ar an leagan comhdhlúite seo ach luach doiciméadach amháin.

Nuashonraithe 04.11.2020

Top