DOKUMENT KONĠUNT TA’ ĦIDMA TAL-PERSUNAL

SOMMARJU EŻEKUTTIV TAL-VALUTAZZJONI TAL-IMPATT Dikjarazzjoni ta’ ċaħda ta’ responsabbiltà legali: Dan ir-rapport jimpenja biss lis-servizzi tal-Kummissjoni li huma involuti fil-preparazzjoni tiegħu u ma jippreġudikax il-forma finali ta' kwalunkwe deċiżjoni li għandha tittieħed mill-Kummissjoni.

Li jakkumpanja d-dokument

Proposta għal Direttiva tal-Parlament Ewropew u tal-Kunsill dwar l-armonizzazzjoni tal-liġijiet tal-Istati Membri biex it-tagħmir tar-radju isir disponibbli għall-kummerċjalizzazzjoni

Introduzzjoni

Dan ir-rapport fil-qosor tal-Valutazzjoni tal-Impatt jindirizza r-reviżjoni possibbli tad-Direttiva R&TTE, [1]. id-Direttiva 1999/5/KE dwar it-tagħmir tar-radju u tagħmir terminali tat-telekomunikazzjoni[2]. Id-Direttiva tkopri suq stmat għal EUR 63 biljun (2007), inkluż inter alia s-settijiet tat-telefowns ċellulari, it-trażmittenti tan-netwerks ċellulari u tat-telefonija fissa[3]. Din tarmonizza r-rekwiżiti regolatorji fil-livell tal-UE għall-ħarsien tas-saħħa u s-sikurezza, il-kompatibilità elettromanjetika, u l-evitar ta' interferenza ta' ħsara.

1.           Definizzjoni tal-problema

1.1.        Livell baxx ta' konformità

Ġie osservat livell baxx ta' konformità mar-rekwiżiti tad-Direttiva. Evidenza disponibbli minn Awtoritajiet tas-Sorveljanza tas-Suq tal-UE (MSAs) juru valuri li jvarjaw bejn 28% u 56% għall-konformità mar-rekwiżiti essenzjali, u anke valuri iktar baxxi minn hekk għall-konformità amministrattiva.

L-infurzar effiċjenti mill-MSAs huwa imfixkel ferm mit-traċċabilità limitata tal-prodotti u l-manifatturi. Meta ma jkunx jista' jinstab punt ta' kuntatt validu, l-MSAs huma obbligati jduru l-katina kollha tad-distribuzzjoni sabiex jikkuntattjaw il-persuna responsabbli mit-tqegħid tal-prodott fis-suq tal-UE.

Barra minn hekk, id-Direttiva ħafna drabi hija ambigwa u kumplessa bla bżonn (ara 2.2 hawn taħt), u titlob għal sforz relattivament għoli mill-manifatturi biex jifhmu l-obbligi tagħhom.

1.2.        Problemi relatati ma’ dispożizzjonijiet legali tad-Direttiva

Id-Direttiva qed titqies wisq kumplessa u ambigwa. Xi kwistjonijiet soġġetti għal interpretazzjonijiet differenti huma:

· Jekk rekwiżit essenzjali fl-Artikolu 3.2 ("l-użu effettiv tal-ispettru tar-radju... biex tiġi evitata interferenza ta' ħsara") huwiex applikabbli għal trażmettituri biss jew anke għall-prestazzjoni tar-riċezzjoni minn tagħmir tar-radju

· Id-distinzjoni bejn l-obbligu għat-twaħħil ta' "Sinjal ta' Twissija" fuq prodotti soġġetti għal restrizzjonijiet tal-użu u l-obbligu li tiġi nnotifikata l-kummerċjalizzazzjoni tal-apparat li jopera f'meded mhux armonizzati

Dawn l-ambigwitajiet u oħrajn iwasslu għal diverġenzi fl-applikazzjoni tad-Direttiva u huma ta' tfixkil għas-Suq Intern.

Id-Direttiva tinkludi wkoll bosta dispożizzjonijiet amministrattivi, u l-valur ta’ xi wħud minnhom huwa dubjuż, eż. l-marka CE, in-numru tal-Korp Innotifikat u s-Sinjal ta’ Twissija jridu jitwaħħlu fuq it-tagħmir, fuq il-pakkett u fuq l-istruzzjonijiet għall-utent.

1.2.1.     Problemi fil-kamp ta' applikazzjoni tad-Direttiva R&TTE

Mhuwiex ċar kif għandha tapplika d-Direttiva għal xi kategoriji partikolari ta' tagħmir, bħal tagħmir modifikabbli bis-softwer u stallazzjonijiet magħmula minn komponenti multipli.

Id-Direttiva ma tippermettix li jinħtieġ tagħmir li jinteraġixxi ma’ aċċessorji, bħal ċarġers. Fin-nuqqas ta’ ftehimiet volontarji industrijali, in-nuqqas ta' interoperabilità hija inkonvenjent għall-utenti u toħloq ħela bla bżonn[4].

Ir-riċevituri (eż. GPS jew riċevituri Galileo) huma ġeneralment inklużi fid-Direttiva. Ir-riċevituri tax-xandir tat-TV u tar-radju, u wkoll radjaturi intenzjonali mhux kapaċi għall-komunikazzjoni (eż. iċ-ċarġers mingħajr wajers) huma esklużi mid-Direttiva, u jaqgħu taħt id-Direttiva EMC[5]. Rekwiżiti legali differenti għal tagħmir simili joħolqu inċertezza legali.

1.3.        L-ostakoli regolatorji għad-dħul fis-suq ta' tagħmir tar-radju innovattiv

L-aċċess għas-suq għal teknoloġiji ġodda tar-radju jeħtieġ konformità mad-Direttiva R&TTE. Hawnhekk huma relevanti żewġ kwistjonijiet:

· Id-dewmien eċċessiv fl-iżvilupp tal-istandards armonizzati (sa bosta snin) u fil-pubblikazzjoni ta’ referenzi fil-ĠUUE[6] (sa sena)

· Id-diffikultajiet sabiex jinkisbu opinjonijiet minn korpi nnotifikati (KN) fin-nuqqas ta' regoli approvati għall-użu tal-ispettru.

Kwistjonijiet oħra li jaffettwaw l-aċċess għas-suq tal-innovazzjonijiet jaqgħu barra mill-ambitu tad-Direttiva R&TTE, u jinkludu n-nuqqas ta’ armonizzazzjoni tal-ispettru fl-UE, u tal-proċess relattivament twil, kumpless u inċert għar-riallokazzjoni tal-użu tal-ispettru.

1.4.        Min jintlaqat?

· L-utenti tat-tagħmir R&TTE, is-servizzi pubbliċi u ċ-ċittadini esposti b'mod ġenerali għal apparat mhux konformi.

· Il-manifatturi affettwati bid-distorsjoni tal-kompetizzjoni minn prodotti mhux konformi, mill-kumplessità u l-ambigwità tad-Direttiva, u minn diffikultajiet biex jintroduċu l-innovazzjonijiet fis-suq

· L-Awtoritajiet tas-Sorveljanza tas-Suq affettwati minn diffikultajiet biex jinfurzaw id-Direttiva b’mod effiċjenti u minn inċertezza legali

2.           Analiżi tas-sussidjarjetà

Is-Suq Uniku huwa qasam ta’ “kompetenza kondiviża” skont l-Artikolu 4 tat-Trattat dwar il-Funzjonament tal-Unjoni Ewropea (TFUE). Id-Direttiva riveduta għandha tkun ibbażata fuq l-Artikoli 26 (is-Suq Intern) u 114 (l-Approssimazzjoni tal-Liġijiet) tat-TFUE. Hija meħtieġa l-azzjoni fil-livell tal-UE għall-adattament, l-iċċarar jew is-simplifikazzjoni tad-dispożizzjonijiet li huma l-pedament tas-Suq Intern f’dan il-qasam. Dan ma jistax isir mill-Istati Membri waħedhom. Obbligu ġdid possibbli biex jiġi rreġistrat fil-livell tal-UE manifattur u/jew prodott (l-għażliet A2, A3, A4) se jaffettwa s-suq kollu tal-UE; il-vantaġġi tiegħu fir-rigward ta' miżuri simili fil-livell nazzjonali huma ċari. L-Għażla C2 taffettwa r-regolamentazzjoni tal-ispettru, qasam prinċipalment fi ħdan il-kompetenza tal-Istati Membri; dan huwa diskuss hawn taħt. Għall-għażliet l-oħra kkunsidrati, id-dritt tal-UE li taġixxi u l-valur miżjud ta’ azzjoni fil-livell tal-UE jistgħu jitqiesu mhux kontroversjali.

3.           Objettivi

Ir-reviżjoni tad-Direttiva R&TTE għandha l-għan li tiżgura l-implimentazzjoni aħjar tar-rekwiżiti essenzjali fid-Direttiva. Għandha żżomm u ttejjeb is-Suq Uniku, tevita l-kosti u l-piżijiet mhux meħtieġa, b’mod partikolari għall-SMEs, u tappoġġja l-innovazzjoni. L-għanijiet speċifiċi u operazzjonali huma dawn li ġejjin:

A         Biex jintlaħqu l-infurzar u l-konformità aħjar mad-Direttiva:

· Jissaħħu l-obbligi tal-operaturi ekonomiċi, u jittejbu l-għodda legali disponibbli għall-MSAs b'mod partikolari fir-rigward tat-traċċabilità tal-prodotti

B         Ssir disponibbli bażi ġuridika soda għall-implimentazzjoni tar-rekwiżiti essenzjali:

· Biex tikkjarifika, tissimplifika jew toħnoq għadd ta’ dispożizzjonijiet u obbligi amministrattivi; biex ittejjeb il-koerenza ma' leġiżlazzjoni oħra tal-UE.

· Sabiex tiffaċilita l-applikazzjoni tad-Direttiva għal xi teknoloġiji speċifiċi; sabiex tippermetti l-armonizzazzjoni tal-interfaċċji bejn it-tagħmir u l-aċċessorji

· Sabiex tinkludi fl-ambitu tad-Direttiva t-tagħmir kollu li għalih huwa rilevanti l-evitar tal-interferenza ta' ħsara

C         Biex jitneħħew l-ostakli għall-aċċess għas-suq ta' tagħmir tar-radju innovattiv:

· Biex jiġi ssimplifikat t-tfassil tad-deċiżjonijiet regolatorji u jitnaqqas id-dewmien assoċjat

4.           Għażliet ta’ Politika

4.1.        Għażliet li jindirizzaw l-objettiv A

- L-Għażla A0 hija l-istatus quo.

-L-Għażla A1 hija allinjament mal-Qafas Leġiżlattiv Ġdid (QLĠ) għall-kummerċjalizzazzjoni tal-oġġetti

- L-Għażla A2 tinkludi l-Għażla A1 kif ukoll l-obbligu għall-manifatturi biex jirreġistraw id-data ta' kuntatt tagħhom f’sistema ta’ reġistrazzjoni ċentrali tal-UE. Numru uniku ta' reġistrazzjoni tal-kumpaniji għandu jitwaħħal fuq il-prodotti kollha kkummerċjalizzati fl-UE.

- L-Għażla A3 tinkludi l-Għażla A1 kif ukoll l-obbligu għall-manifattur biex jirreġistra f’sistema ta’ reġistrazzjoni ċentrali tal-UE kull tip ta' prodott ġdid u jtella' fl-internet parti mill-fajl tekniku. Għandu jitwaħħal numru ta' reġistrazzjoni speċifiku għall-prodott fuq kull prodott korrispondenti.

- L-Għażla A4 tinkludi l-Għażla A1 kif ukoll il-possibbiltà għall-Kummissjoni, biex abbażi tal-poteri delegati, tintroduċi reġistrazzjoni tal-prodott bħal dik fl-Għażla A3 għal xi kategoriji speċifiċi ta' tagħmir fejn ma jkunx intlaħaq livell għoli ta' konformità

4.2.        Għażliet li jindirizzaw l-objettiv B

- L-Għażla B0 hija l-istatus quo

- L-Għażla B1 tinkludi l-allinjament tad-definizzjonijiet u l-obbligi fid-Direttiva mal-QLĠ għas-Suq Intern għall-oġġetti, il-kjarifika tad-dispożizzjonijiet problematiċi attwali fuq il-bażi tal-"Gwida għall-implimentazzjoni tad-Direttiva” attwali, u s-simplifikazzjoni ta’ xi obbligi amministrattivi

- L-Għażla B2 tinkludi l-għażla B1, kif ukoll l-introduzzjoni ta' dispożizzjonijiet addizzjonali biex jitrattaw xi teknoloġiji speċifiċi, rekwiżit ġdid għal interoperabilità bl-aċċessorji, u estensjoni tal-ambitu għar-riċevituri u trażmettituri tar-radju kollha

- L-Għażla B3 tinkludi l-għażla B1, l-introduzzjoni ta' dispożizzjonijiet addizzjonali biex jittrattaw xi teknoloġiji speċifiċi, restrizzjoni tal-ambitu tad-Direttiva għal trażmettituri tar-radju, u s-setgħa mogħtija lill-Kummissjoni sabiex tiffaċilita l-applikazzjoni tad-Direttiva u tindirizza l-interoperabbiltà bl-aċċessorji

4.3.        Għażliet li jindirizzaw l-objettiv C

- L-Għażla C0 mhijiex xi azzjoni ġdida tal-UE.

L-Għażla C1 tinkludi miżuri mhux leġiżlattivi: li jistabbilixxu punt uniku tal-UE għat-talbiet għal-liċenzji sperimentali għall-użu tat-tagħmir tar-radju; pjan ta’ azzjoni biex titjieb il-kooperazzjoni bejn ir-regolaturi, il-korpi nnotifikati u l-korpi tal-istandardizzazzjoni; u kampanja ta' informazzjoni mmirata lejn kumpaniji u SMEs dwar il-qafas regolatorju tat-tagħmir tar-radju

- L-Għażla C2 tinkludi l-għażla C1 u żewġ bidliet legali: il-ħolqien ta' kategorija speċjali ta’ korpi nnotifikati li jiffokaw fuq it-tagħmir tar-radju aktar innovattiv; u t-twaqqif ta’ korp ċentrali tal-UE li jkollu s-setgħa li jippermetti l-kummerċjalizzazzjoni u l-użu ta' ammont limitat ta' tagħmir tar-radju fi ħdan żoni ġeografiċi ddefiniti tajjeb u perjodi ta’ żmien limitati

5.           Il-Valutazzjoni tal-Impatti

L-għażliet kollha huma evalwati f’termini ta’ effettività fil-ksib tal-objettivi. Il-konformità akkumulata hija mistennija li ġġib magħha impatti soċjali pożittivi, jiġifieri protezzjoni mtejba tas-saħħa u s-sikurezza u t-tħaddim aħjar tat-tagħmir għall-benefiċċju tal- konsumaturi, in-negozji u s-servizzi pubbliċi.

L-impatti ekonomiċi jirrelataw mat-tħaddim tas-suq intern, l-użu effiċjenti tal-ispettru u l-kosti amministrattivi kkaġunati mid-Direttiva, u xi aspetti ta' innovazzjoni. Ma ġie identifikat l-ebda impatt sinifikanti fuq l-SMEs.

5.1.        Għażliet li jindirizzaw l-objettiv ABiex jintlaħqu l-infurzar u l-konformità aħjar mad-Direttiva

Madwar 50% tal-Istati Membri u l-biċċa l-kbira tal-operaturi ekonomiċi[7] qed jipprevedu impatt għoli ta’ allinjament mal-Qafas Leġiżlattiv il-Ġdid (Għażla 1) fir-rigward tal-konformità fil-qasam tal-R&TTE.

Il-biċċa l-kbira tal-MSAs iqisu li l-effett addizzjonali fir-rigward tal-infurzar tal-effiċjenza u tal-konformità ta' Għażla A2 għandu jkun pożittiv iżda limitat. L-Għażla A3 tintroduċi għodda ulterjuri ta' infurzar, billi tipprovdi aċċess rapidu għad-dokumentazzjoni teknika tal-prodotti rreġistrati u disponibbiltà onlajn tad-data ta' kuntatt speċifika għall-prodott u għalhekk inqas dewmien fl-infurzar. Waħda mill-MSA stmat gwadann globali sa 10-15% fil-ħin/riżorsi allokati lis-sorveljanza tas-suq u titjib fiż-żmien ta' reazzjoni ta’ diversi ġimgħat. Filwaqt li tiffoka biss fuq kategoriji ta' prodotti problematiċi, l-Għażla A4 għandu jkollha impatt simili fuq l-effettività bħall-Għażla A3.

Impatt negattiv minn naħa tal-Għażla A3 fuq il-piż amministrattiv huwa pperċepit bħala wisq aktar sinifikanti minn impatt negattiv mill-għażliet l-oħra. 32% minn dawk li wieġbu għall-konsultazzjoni tal-2010 (iżda 12% biss kienu SMEs) ivvalutaw l-impatt bħala sinifikanti vis-a-vis 10% biss minn dawk li jikkonċernahom l-allinjament tal-QLĠ. Jidher li l-obbligu attwali biex jiġi stabbilit fajl tekniku qabel il-kummerċjalizzazzjoni ta' prodott mhuwiex qed jiġi ssodisfat. Jekk dan ikun il-każ, il-piż addizzjonali li jirriżulta mill-ġbir, il-formatting u l-uploading ta' din l-informazzjoni jkun limitat ħafna. Għall-Għażla A4 il-kosti amministrattivi addizzjonali se jkunu limitati għal dawk il-kategoriji ta' prodotti suġġetti għal reġistrazzjoni.

Dawn u impatti oħra huma ppreżentati fil-qosor fit-tabella hawn taħt:

Tabella 1. Tabella ta' sinteżi li tqabbel l-għażliet li jindirizzaw l-objettiv D

|| L-effettività fil-kisba tal-objettiv A || Kost u effiċjenza || Koerenza

L-Għażla A0 || 0 || 0 || 0

L-Għażla A1: || +/++ Moderat għal sinifikanti || - Żieda ta’ rekwiżiti amministrattivi, b’mod partikolari għall-importaturi u d-distributuri || +++ Il-QLĠ itejjeb il-koerenza mal-Leġiżlazzjoni tal-Approċċ il-Ġdid

L-Għażla A2: || +/++ Impatt limitat ma' dak tal-A1 || -/+ Perċepiti bħala żieda żgħira ta' piż mill-manifatturi Titjib limitat fl-effiċjenza tal-MSAs || +++/- Idem QLĠ/ Ftit imbiegħda mil-leġiżlazzjoni tal-Approċċ il-Ġdid

L-Għażla A3 || +++ Strument addizzjonali għal infurzar effettiv tal-obbligi u l-edukazzjoni ta' kumpaniji || --/++ Perċepiti bħala żieda żgħira ta' piż mill-manifatturi Ittejjeb l-effiċjenza tal-MSAs Investiment stmat ta' 300000 EUR || +++/-- Idem QLĠ/ Titbiegħed mil-leġiżlazzjoni tal-Approċċ il-Ġdid

L-Għażla A4 || ++ Strument addizzjonali għal kategoriji problematiċi biss || -/+++ Żieda iżgħar fil-piż għall-industrija mill-Għażla A3 Effiċjenza globali ogħla mill-Għażla A3 || +++/- Idem QLĠ/ Titbiegħed mil-leġiżlazzjoni tal-Approċċ il-Ġdid f'każijiet ġustifikati

5.2.        Għażliet li jindirizzaw l-objettiv B: Li ssir disponibbli bażi ġuridika soda għall-implimentazzjoni tar-rekwiżiti essenzjali

Tabella 2. Tabella ta' sinteżi li tqabbel l-għażliet li jindirizzaw l-objettiv B

|| L-effettività fil-ksib tal-objettiv B || Effetti sekondarji || Kost u effiċjenza || Koerenza

L-Għażla B0 || 0 || 0 || 0 || 0

L-Għażla B1 || ++ -Kjarifika sinifikanti || + Titjib fil-konformità (objettiv A) || ++ Xi tnaqqis tar-rekwiżiti amministrattivi || ++ Ittejjeb il-koerenza ma' leġiżlazzjoni oħra tal-UE

L-Għażla B2 || ++/- - Tiċċara l-applikazzjoni tad-Direttiva għal teknoloġiji speċifiċi - Obbligu ġenerali għal interoperabilità bl-aċċessorji jista' jkun inapplikabbli -Ittejjeb iċ-ċertezza legali – ir-riċevituri kollha taħt l-R&TTED - Ittejjeb il-ħarsien tal-ispettru– ir-radjaturi intenzjonali kollha huma sottoposti għall-R&TTE D || +/- - Aktar effiċjenza fl-użu tal-ispettru tar-radju permezz ta' rekwiżiti regolatorji għar-riċevituri - Rekwiżit ġenerali għal interoperabilità bl-aċċessorji jista' jiskoraġġixxi l-innovazzjoni || -- - Kost addizzjonali minħabba l- obbligu tal-interoperabbiltà ġenerali -Xi kosti addizzjonali għar-riċevituri tax-xandir u għar-radjaturi intenzjonali mingħajr kapaċita ta' komunikazzjoni ||

L-Għażla B3 || +++ -Is-setgħet tal-Kummissjoni jippermettu reazzjoni għall-kwistjonijiet futuri legali / teknoloġiċi /tas-suq -Ittejjeb iċ-ċertezza legali: ir-riċevituri kollha u t-terminali fissi sottoposti għall-EMCD -Ittejjeb il-ħarsien tal-ispettru: ir-radjaturi intenzjonali kollha sottoposti għall-R&TTE || - -Il-prestazzjoni tar-riċevituri mmexxija minn standards volontarji -Rekwiżiti essenzjali fl-Artikolu 3.3 mhux applikati għal riċevituri puri, eż. ir-riċevituri Galileo || +/- - Xi kosti addizzjonali għar-radjaturi intenzjonali mingħajr il-kapaċita ta' komunikazzjoni - Xi tnaqqis tal-kost għal tagħmir li jirċievi biss u terminali fissi || ++ -Ittejjeb il-koerenza ma' leġiżlazzjoni oħra tal-UE dwar il-kompetizzjoni - Is-setgħat ta' implimentazzjoni jiffaċilitaw l-applikazzjoni konsistenti tad-Direttiva madwar l-UE

5.3.        Għażliet li jindirizzaw l-objettiv C biex jitneħħew l-ostakli regolatorji għall-innovazzjoni fit-tagħmir tar-radju

L-Għażla C1 hija mistennija ttejjeb l-għarfien tar-Regolament fost il-kumpaniji, sabiex tiffaċilita r-rwol ta' korpi nnotifikati fil-valutazzjoni ta’ prodotti innovattivi, u sabiex jintlaħaq xi tnaqqis fid-dewmien sabiex jiġu introdotti prodotti ġodda fil-qafas regolatorju.

Korp ċentrali tal-UE fl-Għażla C2 ser inaqqas iż-żmien tal-kummerċjalizzazzjoni għall-prodotti innovattivi, sa sena u sentejn f'xi każijiet. L-industrija hija ħerqana li tinvesti fuq il-bażi ta' awtorizzazzjonijiet temporanji. Il-korp ċentrali tal-UE jeħtieġ il-persunal; l-iktar stima baxxa hija ta' 10 persuni full-time [8]. Is-setgħat tagħha jqajmu kwistjonijiet ta’ sussidjarjetà fir-rigward tal-kompetenzi nazzjonali f'dan il-qasam.

Dawn u impatti oħra huma ppreżentati fil-qosor fit-tabella t'hawn taħt:

Tabella 3. Tabella ta' sinteżi li tqabbel l-għażliet li jindirizzaw l-objettiv C

|| L-effettività fil-ksib tal-objettiv C || Effetti sekondarji || Kost u effiċjenza || Koerenza

L-Għażla C0 || 0 || 0 || 0 || 0

L-Għażla C1 || + - Titjib inkrementali fiż-żmien ta' kummerċjalizzazzjoni fis-suq || || + - Titjib inkrementali fl-effiċjenza || + - Ittejjeb il-koerenza tal-arranġament istituzzjonali attwali

L-Għażla C2 || +/++ -Ittejjeb il-kredibbiltà tal-opinjonijiet ta’ KN 'speċjali’ - Tnaqqis importanti taż-żmien ta' kummerċjalizzazzjoni fis-suq - Awtorizzazzjoni temporanja mhux attraenti għall-investiment || -- - Kategorija speċjali ta’ KN tista' tgħawweġ il-kompetizzjoni fost il-KN - Diffikultajiet fit-treġġigħ lura tal-awtorizzazzjonijiet temporanji || -- Kosti importanti: -It-tħaddim tal-akkreditazzjoni l-ġdida ta' kategorija speċjali ta’ KN - It-twaqqif ta' ċentru ta' kompetenzi ġdid - Kosti għolja għall-irtirar ta’ tagħmir awtorizzat minn qabel || -- - Sistema doppja għal awtorizzazzjonijiet - Tqajjem kwistjonijiet ta’ sussidjarjetà

6.           Tqabbil tal-Għażliet. L-għażla ppreferuta

L-Għażla A1 għandha iżżid il-konformità permezz ta' żidiet limitati fil-kost amministrattiv. Ir-reġistrazzjoni tal-manifattur fl-Għażla A2 tipprovdi biss valur miżjud limitat. Ir-reġistrazzjoni sħiħa tal-prodotti fl-Għażla A3 hija strument qawwi addizzjonali biex titjieb l-effettività tas-sorveljanza tas-suq, iżda hija perċepita mill-industrija bħala piż addizzjonali sinifikanti. L-Għażla A4 tipprovdi approċċ flessibbli u proporzjonat: biex jitwettaq l-allinjament mal-QLĠ, u biex tiġi introdotta r-reġistrazzjoni tal-prodott skont il-livell ta' konformità mitlub f’xi kategoriji speċifiċi ta' prodotti. L-Għażla A4 għalhekk hija l-għażla ppreferuta biex tindirizza l-objettiv A.

L-Għażla B1 tikseb ċarezza, simplifikazzjoni, tnaqqis tal-piż u titjib fil-koerenza. L-Għażla B2 tkompli tiċċara u ttejjeb il-bażi legali fit-trattament ta' xi teknoloġiji speċifiċi, radjaturi u riċevituri intenzjonali. Ir-rekwiżiti fir-rigward tal-prestazzjoni tar-riċezzjoni jżidu l-effiċjenza fl-użu tal-ispettru, iżda jinvolvu kosti addizzjonali. L-Għażla B3 tippermetti li tiġi ċċarata l-applikazzjoni tad-Direttiva għal każijiet speċifiċi attwali u futuri, tistabbilixxi kriterji ċari għall-ambitu tagħha fir-rigward tal-EMCD, u tnaqqas jew tevita l-kosti. L-Għażla B3 hija għalhekk l-għażla preferuta biex tindirizza l-objettiv B.

L-Għażla C1 tipprovdi titjib inkrementali kemm fiż-żieda fl-effiċjenza kif ukoll fiż-żmien ta' kummerċjalizzazzjoni kemm għall-operaturi ekonomiċi, kif ukoll għar-regolaturi u entitajiet oħra. L-Għażla C2 tipprovdi żmien iqsar ta' kummerċjalizzazzjoni –iżda tinvolvi kosti addizzjonali mhux negliġibbli, kif ukoll xi żvantaġġi istituzzjonali. L-Għażla C1 għalhekk hija l-għażla preferuta biex tindirizza l-objettiv C.

Kollox ma' kollox, dan il-pakkett ta' għażliet ippreferuti huwa mistenni li jżid il-konformità u ċ-ċertezza legali, iħaffef u jrendi aktar konsistenti l-applikazzjoni tad-Direttiva u jippermetti prevenzjoni iktar komprensiva mill-interferenzi dannużi, b'piż żejjed limitat għall-operaturi tas-suq. Lil hinn mis-sinerġiji bejn l-Għażliet A4 u B3 spjegati fil-Kapitolu 7 mhija mistennija l-ebda interazzjoni oħra bejn it-tliet elementi tal-għażla ppreferuta. Għalhekk, mhuwiex meqjus neċessarju li ssir valutazzjoni fil-fond addizzjonali tal-pakkett.

Fl-aħħar tal-valutazzjoni tal-impatt, ma kien hemm l-ebda indikazzjoni li l-għażliet ippreferuti jistgħu jirriżultaw f’piż sproporzjonat għall-SMEs. Għaldaqstant, ma hemm ebda element li juri l-ħtieġa għal miżuri speċifiċi għall-SMEs sabiex tiġi żgurata l-konformità mal-prinċipju tal-proporzjonalità.

7.           Monitoraġġ u Evalwazzjoni

It-tabella li ġejja tiġbor fil-qosor l-indikaturi ewlenin ta' progress lejn il-ksib tal-objettivi għar-reviżjoni tad-Direttiva:

Tabella 4 Indikaturi ewlenin ta 'progress

|| Indikatur || Approċċ

Konformità || Proporzjonijiet ta’ konformità || Rapporti perjodiċi mill-Istati Membri

Simplifikazzjoni amministrattiva u adattamenti legali || Kosti u piżijiet amministrattivi indotti, għadd ta’ dispożizzjonijiet fid-Direttiva ma jidhrux ċari || Skambju regolari mal-partijiet interessati

Ostakli regolatorji għall-innovazzjoni || Simpliċità perċeputa tal-introduzzjoni tal-innovazzjonijiet || Skambju regolari mal-partijiet interessati

Skont il-proposta, l-Istati Membri jkollhom l-obbligu li jibagħtu lill-Kummissjoni rapporti biannwali dwar l-applikazzjoni tad-Direttiva, li jipprovdu tagħrif dwar il-livelli ta' konformità mad-Direttiva.

Il-Kummissjoni qed tippjana li tirrevedi b'mod regolari l-operazzjoni ta' din id-Direttiva u tibgħat rapport dwar dan lill-Parlament Ewropew u lill-Kunsill kull ħames snin.

[1]               R&TTE = Tagħmir terminali tar-radju u t-telekomunikazzjonijiet

[2]               Direttiva 1999/5/KE ĠU L 91, 7.4.1999, p. 10–28

[3]           L-infrastruttura tat-telekomunikazzjonijiet mhux tar-radju bħalma huma s-sistemi tal-iswitching hija eskluża mill-kamp ta' applikazzjoni tad-Direttiva R&TTE

[4]               http://ec.europa.eu/enterprise/sectors/rtte/chargers/index_en.htm

[5]               Id-Direttiva dwar il-Kompatibilità Elettromanjetika, id-Direttiva 2004/108/KE

[6]               Il-Ġurnal Uffiċjali tal-Unjoni Ewropea

[7]               Matul il-konsultazzjoni pubblika tal-2010, 71% ta' dawk li rrispondew (l-MSAs kienu esklużi f'din il-mistoqsija) stennew mill-allinjament tal-NLF impatt medju sa qawwi fir-rigward tal-konformità

[8]               Għar-referenza, l-ECO, is-Segretarjat tas-CEPT, jimpjega persunal ta’ 14-il ruħ inkluż seba' esperti