Deċiżjoni tal-Kummissjoni

tat- 30 ta’ Novembru 2009

li tistabbilixxi l-kriterji ekoloġiċi għall-għoti tal-Ekotikketta Komunitarja għal għamara tal-injam

(notifikata bid-dokument numru C(2009) 9522)

(Test b’relevanza għaż-ŻEE)

(2009/894/KE)

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament (KE) Nru 1980/2000 tal-Parlament Ewropew u tal-Kunsill tas- 17 ta’ Lulju 2000 dwar skema riveduta tal-għoti tal-Ekotikketta Komunitarja [1], u partikolarment it-tieni sottoparagrafu tal-Artikolu 6(1) tiegħu,

Wara li kkonsultat il-Bord għall-Ittikkettar Ekoloġiku tal-Unjoni Ewropea,

Billi:

(1) Skont ir-Regolament (KE) Nru 1980/2000, l-Ekotikketta Komunitarja tista’ tingħata lil prodott li jkollu l-karatteristiċi li jippermettulu jikkontribwixxi b’mod sinifikanti għat-titjib marbut mal-aspetti ambjentali prinċipali.

(2) Ir-Regolament (KE) Nru 1980/2000 jipprovdi li l-kriterji speċifiċi dwar l-Ekotikketta, imfassla abbażi tal-abbozz tal-kriterji magħmul mill-Bord għall-Ekotikkettar tal-Unjoni Ewropea, għandhom jiġu stabbiliti skont gruppi ta’ prodotti.

(3) Il-kriterji ekoloġiċi, kif ukoll ir-rekwiżiti tal-valutazzjoni u tal-verifika relatati, għandhom ikunu validi għal erba’ snin mid-data tan-notifika ta’ din id-Deċiżjoni.

(4) Il-miżuri stipulati f’din id-Deċiżjoni huma skont l-opinjoni tal-Kumitat stabbilit bl-Artikolu 17 tar-Regolament (KE) Nru 1980/2000,

ADOTTAT DIN ID-DEĊIŻJONI:

Artikolu 1

Il-grupp ta’ prodotti "għamara tal-injam" għandu jinkludi unitajiet waħedhom jew li huma parti minn għamara kbira, ta’ għamara domestika li jintużaw biex wieħed jerfa’, idendel, jimtedd, ipoġġi, jaħdem jew jiekol, kemm għall-użu fuq ġewwa u kemm fuq barra, jew użati ġewwa għal skopijiet ta’ negozju. L-iskopijiet ta’ negozju għandhom jinkludu għamara tal-uffiċċju u tal-iskola, kif ukoll għamara għal restoranti u lukandi.

Għandhom ikunu ssodisfati l-kundizzjonijiet li ġejjin:

(a) Il-prodott għandu jkun magħmul minn tal-anqas 90 % w/w injam solidu jew materjal abbażi ta’ njam. Ħġieġ, jekk jista’ jiġi sostitwit faċilment f’każ ta’ ħsara jew ksur, jista’ jiġi eskluż mill-kalkolu tal-piż, kif jistgħu jkunu wkoll apparat tekniku u fittings.

(b) Il-piż ta’ kwalunkwe materjal individwali, minbarra njam solidu u materjal abbażi ta’ njam, ma għandux jeċċedi 3 % tal-piż totali tal-prodott. Il-piż totali flimkien ta’ dawn il-materjali ma għandux jeċċedi 10 % tal-piż totali tal-prodott.

Artikolu 2

Sabiex jingħata l-Ekotikketta Komunitarja skont ir-Regolament (KE) Nru 1980/2000, oġġett tal-għamara tal-injam irid jaqa’ fil-grupp ta’ prodotti "għamara tal-injam" kif inhu definit fl-Artikolu 1 ta’ din id-Deċiżjoni u għandu jikkonforma mal-kriterji ekoloġiċi stabbiliti fl-Anness.

Artikolu 3

Il-kriterji ekoloġiċi għall-grupp ta’ prodotti "għamara tal-injam", kif ukoll ir-rekwiżiti għall-valutazzjoni u l-verifika relatati, għandhom ikunu validi għal erba’ snin mid-data tan-notifika ta’ din id-Deċiżjoni.

Artikolu 4

Għal skopijiet ta’ amministrazzjoni, in-numru tal-kodiċi mogħti lill-grupp ta’ prodotti "għamara tal-injam" għandu jkun "36".

Artikolu 5

Din id-Deċiżjoni hija indirizzata lill-Istati Membri.

Magħmul fi Brussell, it- 30 ta’ Novembru 2009.

Għall-Kummissjoni

Günter Verheugen

Viċi President

[1] ĠU L 237, 21.9.2000, p. 1.

--------------------------------------------------

ANNESS

QAFAS

L-għanijiet tal-kriterji

Dawn il-kriterji għandhom l-għan b’mod partikolari li jippromwovu tnaqqis tal-impatt ta’ għamara tal-injam fuq l-ambjent u fuq is-saħħa tal-bniedem matul iċ-ċiklu tal-ħajja tagħha.

B’mod aktar speċifiku:

- l-użu ta’ materjali prodotti b’mod aktar sostenibbli;

- tnaqqis tal-użu ta’ sustanzi perikolużi u ta’ emissjonijiet ta’ sustanzi li jniġġsu;

- prodott ittestjat għad-durabilità.

Rekwiżiti ta’ valutazzjoni u verifika

Ir-rekwiżiti speċifiċi tal-valutazzjoni u l-verifika huma indikati f’kull kriterju. Fejn ikun xieraq, jistgħu jintużaw metodi tal-ittestjar differenti minn dawk indikati għal kull kriterju jekk l-ekwivalenza tagħhom hija aċċettata mill-Entità Kompetenti li tivvaluta l-applikazzjoni.

Fejn l-applikant jintalab biex jipprovdi dokumentazzjoni, rapporti tat-testijiet tal-analiżi, jew evidenza oħra li turi l-konformità mal-kriterji, huwa mifhum li dawn jistgħu joriġinaw mingħand l-applikant u/jew il-fornitur(i) tiegħu u/jew il-fornitur(i) tagħhom, eċċ., kif xieraq.

Il-valutazzjoni tal-konformità għandha titwettaq minn laboratorji akkreditati kif xieraq (fejn huwa possibbli) li jissodisfaw ir-rekwiżiti ġenerali tal-EN ISO 17025.

Fejn ikun xieraq, l-Entitajiet Kompetenti jistgħu jitolbu dokumentazzjoni ta’ appoġġ u jistgħu jwettqu verifiki indipendenti.

Huwa rakkomandat li l-Entitajiet Kompetenti jqisu l-implimentazzjoni ta’ skemi rikonoxxuti tal-ġestjoni ambjentali, bħall-EMAS jew l-ISO14001, u d-Dikjarazzjonijiet tal-Prodotti Ambjentali meta jivvalutaw l-applikazzjonijiet u jimmonitorjaw il-konformità mal-kriterji (nota: mhuwiex meħtieg li jimplimentaw dawn id-dikjarazzjonijiet u l-iskemi ta’ ġestjoni, iżda huma mħeġġa li jagħmlu dan).

KRITERJI

Eżenzjonijiet

Għandhom japplikaw l-eżenzjonijiet li ġejjin minn uħud mill-kriterji fuq il-materjal:

(i) Materjali, minbarra njam solidu u materjali b’bażi ta’ njam, u minbarra dawk koperti mill-kriterji għat-trattament ta’ wċuħ u għall-immuntar tal-għamara, li jammontaw għal anqas minn 3 % tal-piż totali tal-prodott li għandu l-ekotikketta jistgħu jkunu eżentati mill-konformità mar-"rekwiżiti għall-injam u materjal abbażi ta’ njam".

(ii) Partijiet fissi, bħal viti u msiemer, u oġġetti żgħar tal-metall għal bibien li jiżżerżqu u għal kxaxen huma eżentati mill-konformità mal-kriterji kollha għall-materjali.

Valutazzjoni u verifika: Għandha tingħata informazzjoni xierqa fuq dawk il-materjali li huma eżentati mill-konformità ma’ wħud mill-kriterji. Il-kalkolu tal-perċentwali tal-materjali li jistgħu jkunu eżentati għandhom jinkludu l-ammont ta’ dawn il-materjali f’materjali komposti, ikun xi jkun il-perċentwali tal-materjal kompost fl-għamara finali li għandha Ekotikketta. Il-kalkolu tal-piż totali ma għandux jinkludi l-piż tal-fittings.

1. Deskrizzjoni tal-prodott

Għandha tingħata deskrizzjoni tal-prodott (deskrizzjoni tal-funzjoni, isem il-prodott jew kodiċi tar-referenza; jekk ikunu disponibbli diversi tipi tal-istess prodott, tingħata deskrizzjoni tas-sottotipi li għalihom tapplika l-applikazzjoni). L-informazzjoni għandha tingħata fuq il-piż totali tal-prodott, il-materjali użati fil-prodott, inklużi l-partijiet fissi u l-fittings, u l-piż rispettiv tagħhom.

Valutazzjoni u verifika: L-applikant għandu jipprovdi deskrizzjoni tal-prodott lill-Entità Kompetenti, li fihom tkun inkluża l-informazzjoni deskritta hawn fuq.

2. Sustanzi perikolużi

(a) L-ebda sustanza jew preparazzjoni li għandha, jew li waqt l-applikazzjoni tista’ tingħatalha, xi waħda minn dawn il-frażijiet ta’ riskju li ġejjin (jew kombinazzjonijiet tagħhom) ma tista’ tiġi miżjuda mal-prodott tal-injam:

- R23: (tossiku jekk ikun hemm inalazzjoni),

- R24: (tossiku jekk ikun hemm kuntatt mal-ġilda),

- R25: (tossiku jekk jinbela’),

- R26: (tossiku ħafna jekk ikun hemm inalazzjoni),

- R27: (tossiku ħafna jekk ikun hemm kuntatt mal-ġilda),

- R28: (tossiku ħafna jekk jinbela’),

- R39 (periklu ta’ effetti serji ħafna li huma irriversibbli),

- R40 (evidenza limitata ta’ effett karċinoġeniku),

- R42 (jista’ jikkawża sensibilizzazzjoni jekk ikun hemm inalazzjoni),

- R43 (jista’ jikkawża sensibilizzazzjoni jekk ikun hemm kuntatt mal-ġilda),

- R45 (jista’ jikkawża l-kanċer),

- R46 (jista’ jikkawża ħsara ġenetika li tintiret),

- R48 (periklu ta’ ħsara serja għas-saħħa jekk ikun hemm esponiment fit-tul),

- R49 (jista’ jikkawża l-kanċer jekk ikun hemm inalazzjoni),

- R50 (tossiku ħafna għall-organiżmi akkwatiċi),

- R51 (tossiku għall-organiżmi akkwatiċi),

- R52 (jagħmel il-ħsara lill-organiżmi akkwatiċi),

- R53 (jista’ jikkawża effetti negattivi fit-tul fl-ambjent akkwatiku),

- R60 (jista’ jnaqqas il-fertilità),

- R61 (jista’ jikkawża ħsara lit-tarbija mhux imwielda),

- R62 (riskju possibbli li tonqos il-fertilità),

- R63 (riskju possibbli ta’ ħsara lit-tarbija mhux imwielda),

- R68 (riskju possibbli ta’ effetti li huma irriversibbli),

kif inhu stipulat fid-Direttiva tal-Kunsill 67/548/KEE tas- 27 ta’ Ġunju 1967 (id-Direttiva Dwar il-Preparazzjonijiet Perikolużi) rigward l-approssimazzjoni tal-liġijiet, tar-regolamenti u tad-dispożizzjonijiet amministrattivi dwar il-klassifikazzjoni, l-imballaġġ u l-ittikkettjar ta’ sustanzi perikolużi [1] (id-Direttiva Dwar Sustanzi Perikolużi), u l-emendi sussegwenti tagħha, u b’kunsiderazzjoni għad-Direttiva tal-Parlament Ewropew u tal-Kunsill 1999/45/KE [2] (id-Direttiva Dwar il-Preparazzjonijiet Perikolużi).

Alternattivament, il-klassifikazzjoni tista’ titqies skont ir-Regolament (KE) Nru 1272/2008 tal-Parlament Ewropew u tal-Kunsill tas- 16 ta’ Diċembru 2008 dwar il-klassifikazzjoni, l-ittikkettar u l-imballaġġ tas-sustanzi u t-taħlitiet, li jemenda u jħassar id-Direttivi 67/548/KEE u 1999/45/KE, u li jemenda r-Regolament (KE) Nru 1907/2006 [3]. F’dan il-każ l-ebda sustanza jew preparazzjoni ma tista’ tiġi miżjuda mal-materja prima li tiġi assenjata, jew li tista’ tiġi assenjata fil-ħin tal-applikazzjoni, dawn id-dikjarazzjonijiet ta’ periklu li ġejjin (jew kombinazzjonijiet tagħhom): H300, H301, H310, H311, H317 H330, H331, H334, H351, H350, H340, H350i, H400, H410, H411, H412, H413, H360F, H360D, H361f, H361d H360FD, H361fd, H360Fd, H360Df, H341, H370, H372.

(b) Il-prodott ma għandux ikun fih aġenti aloġenati organiċi li jgħaqqdu (binding agents), azidirin jew polyaziridins kif ukoll pigmenti u addittivi bbażati fuq:

- ċomb, kadmju, kromju (VI), merkurju u l-komponenti tagħhom,

- arseniku, boron u ram,

- landa organika.

(c) Retardanti tal-fjammi li huma kimikament marbuta mal-matriċi/materjal jew mal-wiċċ tal-matriċi/materjal (retardanti tal-fjammi reattivi) biss jistgħu jintużaw fil-prodott. Jekk ir-retardanti tal-fjammi użati għandhom xi waħda mill-frażijiet-R elenkati hawn taħt, dawn ir-retardanti tal-fjammi għandhom, mal-applikazzjoni, jibdlu n-natura kimika tagħhom sabiex ma jibqgħux jiġġustifikaw klassifikazzjoni taħt kwalunkwe minn dawn il-frażijiet-R. (Anqas minn 0,1 % tar-retardanti tal-fjammi fuq il-matriċi/materjal jistgħu jibqgħu fil-forma ta’ qabel l-applikazzjoni.)

- R40 (evidenza limitata ta’ effett karċinoġeniku),

- R45 (jista’ jikkawża l-kanċer),

- R46 (jista’ jikkawża ħsara ġenetika li tintiret),

- R49 (jista’ jikkawża l-kanċer jekk ikun hemm inalazzjoni),

- R50 (tossiku ħafna għall-organiżmi akkwatiċi),

- R51 (tossiku għall-organiżmi akkwatiċi),

- R52 (ta’ ħsara għall-organiżmi akkwatiċi),

- R53 (jista’ jikkawża effetti negattivi fit-tul fl-ambjent akkwatiku),

- R60 (jista’ jnaqqas il-fertilità),

- R61 (jista’ jikkawża ħsara lit-tarbija mhux imwielda),

- R62 (riskju possibbli li tonqos il-fertilità),

- R63 (riskju possibbli ta’ ħsara lit-tarbija mhux imwielda),

- R68 (riskju possibbli ta’ effetti li huma irriversibbli),

kif inhu stipulat fid-Direttiva 67/548/KEE u l-emendi sussegwenti tagħha.

Ir-retardanti tal-fjammi li huma biss fiżikament imħallta fil-matriċi/materjali huma esklużi (retardanti tal-fjammi addittivi).

Alternattivament, il-klassifikazzjoni tista’ titqies skont ir-Regolament (KE) Nru 1272/2008. F’dan il-każ l-ebda sustanza jew preparazzjoni ma tista’ tiġi miżjuda mal-materja prima li tkun ġiet assenjata, jew li tista’ fil-ħin tal-applikazzjoni tiġi assenjata, kwalunkwe mid-dikjarazzjonijiet ta’ periklu li ġejjin (jew kombinazzjonijiet tagħhom): H351, H350, H340, H350i, H400, H410, H411, H412, H413, H360F, H360D, H361f, H361d H360FD, H361fd, H360Fd, H360Df, H341.

Valutazzjoni u verifika: L-applikant għandu jippreżenta dikjarazzjoni tal-konformità ma’ dan il-kriterju, flimkien ma’ lista tal-ingredjenti u d-dokumentazzjoni relatata, bħal Dokumenti tal-Informazzjoni dwar is-Sigurtà.

3. Rekwiżiti għall-injam u materjal b’bażi ta’ njam

(a) Ġestjoni sostenibbli tal-foresti

Il-produttur għandu jkollu politika ta’ akkwist sostenibbli ta’ njam u sistema biex jittraċċa u jivverifika l-oriġini tal-injam u jsegwih minn mindu jkun għadu fil-foresti sa ma jasal fl-ewwel punt ta’ lqugħ.

L-oriġini tal-injam għandha tkun dokumentata. Il-produttur irid jiżgura li l-injam kollu ġej minn sorsi legali. L-injam ma għandux jiġi minn żoni protetti jew żoni li qegħdin fil-proċess uffiċjali sabiex jiġu protetti, foresti li ilhom jikbru ħafna u foresti b’valur ta’ konservazzjoni għoli ħafna definiti fil-proċessi nazzjonali tal-partijiet interessati sakemm ma jkunx ċar li x-xiri sar skont ir-regolamenti tal-konservazzjoni nazzjonali.

- Sat- 30 ta’ Ġunju 2011, għal prodotti tal-injam li jitpoġġew fis-suq bl-Ekotikketta, tal-anqas 50 % ta’ kwalunkwe njam solidu u 20 % ta’ materjal abbażi ta’ njam iridu joriġinaw jew minn foresti b’ġestjoni sostenibbli li ġew iċċertifikati minn skemi ta’ partijiet terzi indipendenti li jissodisfaw il-kriterji elenkati fil-paragrafu 15 tar-Riżoluzzjoni tal-Kunsill tal- 15 ta’ Diċembru 1998 dwar Strateġija għall-Forestrija għall-UE u żvilupp ulterjuri tagħha, jew minn materjali riċiklati.

- Mill- 1 ta’ Lulju 2011, sal- 31 ta’ Diċembru 2012 għal prodotti tal-injam li jitpoġġew fis-suq bl-Ekotikketta, tal-anqas 60 % ta’ kwalunkwe njam solidu u 30 % ta’ materjal abbażi ta’ njam iridu joriġinaw jew minn foresti b’ġestjoni sostenibbli li ġew iċċertifikati minn skemi ta’ partijiet terzi indipendenti li jissodisfaw il-kriterji elenkati fil-paragrafu 15 tar-Riżoluzzjoni tal-Kunsill tal- 15 ta’ Diċembru 1998 dwar Strateġija għall-Forestrija għall-UE u żvilupp ulterjuri tagħha, jew minn materjali riċiklati.

- Mill- 1 ta’ Jannar 2013, għal prodotti tal-injam li jitpoġġew fis-suq bl-Ekotikketta, tal-anqas 70 % ta’ kwalunkwe njam solidu u 40 % ta’ materjal abbażi ta’ njam iridu joriġinaw jew minn foresti b’ġestjoni sostenibbli li ġew iċċertifikati minn skemi ta’ partijiet terzi indipendenti li jissodisfaw il-kriterji elenkati fil-paragrafu 15 tar-Riżoluzzjoni tal-Kunsill tal- 15 ta’ Diċembru 1998 dwar Strateġija għall-Forestrija għall-UE u żvilupp ulterjuri tagħha, jew minn materjali riċiklati.

Valutazzjoni u verifika: Biex jissodisfa dawn il-kundizzjonijiet, l-applikant għandu juri li kull wieħed mill-prodotti tal-injam li għandhom Ekotikketta, meta jiġi introdott fis-suq wara d-dati murija fil-kriterju ser jilħqu l-livell xieraq ta’ njam ċertifikat. Jekk dan ma jistax jintwera, l-entità kompetenti għandha toħroġ biss il-liċenzja tal-Ekotikketta għall-perjodu li għalih tista’ tintwera l-konformità. L-applikant għandu jipprovdi dokumentazzjoni xierqa mill-fornitur tal-injam fejn jindika t-tipi, il-kwantitajiet u l-oriġini eżatta tal-injam użat fil-produzzjoni tal-għamara. L-applikant għandu jipprovdi ċertifikat(i) xieraq/xierqa li juri/u li l-iskema taċ-ċertifikazzjoni tissodisfa kif suppost ir-rekwiżiti kif stabbiliti fil-paragrafu 15 tar-Riżoluzzjoni tal-Kunsill tal- 15 ta’ Diċembru 1998 dwar Strateġija għall-Forestrija għall-UE.

Definizzjoni: Materjal b’bażi ta’ njam ifisser materjal magħmul billi jiġu mwaħħla flimkien permezz ta’ sustanzi adeżivi u/jew kolla, wieħed jew aktar minn dawn il-materjali: fibri tal-injam, u/jew folji tal-injam bil-qoxra mneħħija jew imqaxxra, u/jew fdalijiet ta’ njam minn foresti, kultivazzjonijiet, injam maqtugħ, fdalijiet mill-industrija tal-mases rotob tal-injam/karta, u/jew injam riċiklat. Materjali b’bażi ta’ njam jinkludu: hardboard, fiberboard, fiberboard b’densità medja, chipboard, OSB (Oriented Strand Board), plywood, u pannelli ta’ njam solidu. It-terminu "materjal b’bażi ta’ njam" jirreferi wkoll għal materjali komposti magħmula minn pannelli abbażi ta’ njam miksija bi plastik, jew plastik laminat, jew metalli, jew materjali oħra li jiksu u pannelli abbażi tal-injam lesti/semimanifatturati.

Materjali abbażi ta’ njam lesti jew semimanifatturati, u materjal b’bażi ta’ njam miksi bi plastik, jew plastik laminat, jew metalli, jew materjal ieħor tal-kisi għandhom jikkonformaw mal-kriterji għat-trattament ta’ wċuħ flimkien mal-kriterji stabbiliti taħt din it-taqsima.

(b) Fibri tal-injam riċiklati

Injam post consumer, laqx jew fibri applikati fil-produzzjoni ta’ materjal b’bażi ta’ njam (input), għandu tal-anqas jikkonforma mad-dispożizzjonijiet tal-istandard tal-industrija tal-EPF, kif irrappurtat fil-paragrafu 6 tad-dokument "Standard tal-EPF għall-kundizzjonijiet ta’ kunsinna ta’ njam riċiklat" tal- 24 ta’ Ottubru 2002. It-tabella tal-istandard ta’ referenza hija mehmuża wkoll fl-appendiċi.

Valutazzjoni u verifika: Għandha tingħata dikjarazzjoni li l-injam post-consumer huwa applikat fil-produzzjoni ta’ materjali b’bażi ta’ njam. Barra minn dan, ir-riżultati tat-testijiet għandhom jiġu ppreżentati biex tkun verifikata l-konformità mal-valuri tal-limitu kif stipulat fl-appendiċi.

(c) Sustanzi tal-mili u sustanzi preservattivi

(i) Għamara ta’ ġewwa ma għandhiex tkun mimlija b’sustanzi tal-mili.

Għall-għamara l-oħra kollha, fejn jintużaw is-sustanzi tal-mili jew preservattivi, dawn għandhom jissodisfaw ir-rekwiżiti dwar is-sustanzi perikolużi (it-Taqsima 2).

(ii) L-injam solidu, wara t-tqattigħ, ma għandux ikun trattat b’sustanzi jew preparazzjonijiet li jkun fihom sustanzi li huma inklużi fil-listi li ġejjin:

- Il-klassifika rakkomandata mill-WHO ta’ pestiċidi perikolużi klassifikati bħala klassi 1a (estremament perikolużi),

- Il-klassifika rakkomandata mill-WHO ta’ pestiċidi perikolużi klassifikati bħala klassi 1b (perikolużi ħafna).

Barra minn dan, it-trattament tal-injam għandu jkun skont id-dispożizzjonijiet tad-Direttiva tal-Kunsill 79/117/KEE [4] u d-Direttiva tal-Kunsill 76/769/KEE [5].

Valutazzjoni u verifika: L-applikant għandu jippreżenta dikjarazzjoni li turi konformità ma’ dan il-kriterju, lista tas-sustanzi li ġew użati u dokument ta’ informazzjoni għal kull wieħed minnhom.

(d) L-użu ta’ sustanzi u preparazzjonijiet perikolużi fil-produzzjoni ta’ materjali b’bażi ta’ njam

Minbarra r-rekwiżiti tat-Taqsima 2 dwar sustanzi perikolużi, is-sustanzi u l-preparazzjonijiet kollha użati fil-produzzjoni tal-materjal b’bażi ta’ njam għandhom jissodisfaw dan li ġej:

(i) Injam verġni ma għandux ikun trattat b’sustanzi jew preparazzjonijiet li jkun fihom sustanzi li huma inklużi fil-listi li ġejjin:

- Il-klassifika rakkomandata mill-WHO ta’ pestiċidi perikolużi klassifikati bħala klassi 1a (estremament perikolużi),

- Il-klassifika rakkomandata mill-WHO ta’ pestiċidi perikolużi klassifikati bħala klassi 1b (perikolużi ħafna).

Barra minn dan, it-trattament tal-injam għandu jkun skont id-dispożizzjonijiet tad-Direttiva 79/117/KEE u d-Direttiva 76/769/KEE.

(ii) Il-kontenut ta’ formaldehyde liberu fi prodotti u preparazzjonjiet użati fil-pannelli ma għandux jeċċedi 0,3 % (w/w). Il-kontenut ta’ formaldehyde liberu f’aġenti li jgħaqqdu, sustanzi adeżivi, u kolla għal pannelli tal-plywood jew pannelli tal-injam laminati ma għandux jeċċedi 0,5 % (w/w).

Valutazzjoni u verifika: L-applikant għandu jipprovdi dikjarazzjonijiet xierqa li jivverifikaw li r-rekwiżiti ta’ hawn fuq intlaħqu. Għall-prodotti kimiċi użati fil-produzzjoni tal-materjali b’bażi ta’ njam għandu jiġi ppreżentat Dokument tal-Informazzjoni dwar is-Sigurtà tal-Materjal jew dokumentazzjoni ekwivalenti li tinkludi informazzjoni dwar il-klassifikazzjoni tal-periklu għas-saħħa.

(e) Emissjonijiet ta’ formaldehyde minn materja prima mhux ittrattata tal-injam

Materjali b’bażi ta’ njam huma permessi biss f’biċċa għamara jekk jikkonformaw mar-rekwiżiti li ġejin:

(i) Chipboard: l-emissjoni ta’ formaldehyde miċ-chipboard fl-istat primarju tagħhom, jiġifieri qabel ma jinħadmu bil-magni jew jinksew, ma għandhiex taqbeż 50 % tal-valur massimu li jippermetti li tiġi kklassifikata bħala E1 skont l-istandard EN 312.

Valutazzjoni u verifika: L-applikant u/jew il-fornitur tiegħu għandhom jipprovdu evidenza li l-materjali b’bażi ta’ njam jikkonformaw ma’ dan ir-rekwiżit skont l-istandard Ewropew EN 312-1

(ii) Fiberboard: Il-formaldehyde imkejjel fi kwalunkwe fiberboard użat ma għandux jaqbeż 50 % tal-valur massimu li jippermetti li jiġi kklassifikat bħala ta’ kwalità ta’ klassi A skont l-EN 622-1. Madankollu, il-fiberboards ikklassifikati bħala Klassi A ser jiġu aċċettati jekk ma jirrappreżentawx aktar minn 50 % tal-injam u l-materjali b’bażi ta’ njam totali użati fil-prodott.

Valutazzjoni u verifika: L-applikant u/jew il-fornitur tiegħu għandhom jipprovdu evidenza li l-materjali b’bażi ta’ njam jikkonformaw ma’ dan ir-rekwiżit skont l-istandard Ewropew EN 622-1.

(f) Injam modifikat ġenetikament

Il-prodott ma għandux ikun fih injam OMĠ.

Valutazzjoni u verifika: l-applikant għandu jipprovdi dikjarazzjoni li ma ntuża l-ebda njam OMĠ.

4. Kriterji għat-trattament ta’ wċuħ

It-trattament ta’ wċuħ jirreferi għall-proċess tat-trattament ta’ wċuħ jew għal partijiet singoli/komponenti tal-għamara, jew għall-għamara kollha kemm hi.

(a) It-trattament ta’ wċuħ bi plastik u metalli

Plastik u metall għandhom ikunu permessi f’perċentwali sa 2 % tal-piż totali ta’ biċċa għamara. Dawn għandhom jikkonformaw mar-rekwiżiti ġenerali dwar sustanzi perikolużi ddikjarati fit-Taqsima 2.

Valutazzjoni u verifika: L-applikant għandu jipprovdi dokumentazzjoni xierqa li turi konformità ma’ dawn il-kriterji.

(b) Trattamenti ta’ wċuħ oħra li mhumiex plastik u metalli

Dan il-kriterju huwa marbut mal-kisi ta’ għamara u materjali tal-injam.

(i) Sustanzi u preparazzjonijiet perikolużi (inkluż il-kontenut tal-VOC)

Il-materjali, sustanzi u preparazzjonijiet kollha użati jridu jikkonformaw mar-rekwiżiti dwar sustanzi perikolużi stabbiliti fit-taqsima 2.

Valutazzjoni u verifika: L-applikant għandu jipprovdi dikjarazzjoni tal-konformità ma’ dan il-kriterju, flimkiem ma’ lista ta’ ingredjenti u dokumentazzjoni relatata, bħal Dokumenti dwar il-Materjali u Dejta dwar is-Sikurezza.

Barra minn dan, sustanzi kimiċi klassifikati bħala perikolużi għall-ambjent minn manifattur/fornitur tal-kimiċi skont is-sistema ta’ klassifikazzjoni Komunitarja (it-28 Emenda għad-Direttiva 67/548/KEE) għandhom jikkonformaw ma’ wieħed minn dawn iż-żewġ limiti li ġejjin:

- Sustanzi kimiċi klassifikati bħala perikolużi għall-ambjent skont id-Direttiva 1999/45/KE ma għandhomx jiġu miżjuda mas-sustanzi u l-preparazzjonijiet għat-trattament ta’ wċuħ. Madankollu, il-prodotti jista’ jkun fihom sa 5 % ta’ komposti organiċi volatili (VOC) kif definit fid-Direttiva tal-Kunsill 1999/13/KE [6] (VOC għandu jfisser kull kompost organiku li f’293.15 K ikollu pressa ta’ fwar ta’ 0,01 kPa jew aktar, jew li jkollu volatilità korrispondenti taħt kundizzjonijiet tal-użu partikolari.). Jekk ikun meħtieġ li l-prodott jitħallat bl-ilma, il-kontenut tal-prodott imħallat bl-ilma ma għandux jeċċedi l-valuri tal-limitu msemmija qabel.

- Il-kwantità applikata (żebgħa mxarrba/verniċ) ta’ sustanzi li jagħmlu ħsara lill-ambjent skont id-Direttiva 1999/45/KE ma għandhomx jeċċedu 14 gm/m2 tal-erja tal-wiċċ u l-kwantità applikata (żebgħa mxarrba/verniċ) tal-VOC ma għandhiex teċċedi 35 g/m2.

Valutazzjoni u verifika: L-applikant għandu jipprovdi dikjarazzjoni ta’ konformità ma’ dan il-kriterju, flimkien ma’ dokumenti li jappoġġaw din id-dikjarazzjoni, li jinkludu:

- riċetta kompleta bit-tqassim tal-kwantitajiet u n-numri tas-CAS għal sustanzi kostitwenti,

- il-metodu tal-ittestjar u r-riżultati tat-testijiet għal kull sustanza preżenti fil-prodott, skont id-Direttiva 67/548/KEE,

- dikjarazzjoni li tgħid li s-sustanzi kostitwenti kollha ġew iddikjarati,

- l-għadd ta’ kisjiet u l-kwantità applikata għal kull kisja għal kull metru kwadru tal-wiċċ.

Metodu tal-applikazzjoni:

Il-gradi standard ta’ effikaċja li ġejjin jintużaw sabiex ikun ikkalkulat il-konsum ta’ prodott għat-trattament tal-wiċċ u tal-kwantità applikata: Apparat li jisprejja mingħajr riċiklaġġ 50 %, apparat li jisprejja b’riċiklaġġ 70 %, sprejjar elettrostatiku 65 %, sprejjar, qanpiena/diska 80 %, kisi bir-romblu 95 %, kisi komplut 95 %, kisi bil-vakwu 95 %, tgħaddis 95 %, tlaħliħ 95 %.

(c) Formaldehyde

L-emissjonijiet ta’ formaldehyde minn sustanzi u preparazzjonijiet għat-trattament tal-wiċċ li jilliberaw il-formaldehyde għandhom ikunu anqas minn 0,05 ppm.

Valutazzjoni u verifika: L-applikant u/jew il-fornitur tiegħu għandhom jipprovdu dikjarazzjoni li r-rekwiżit ta’ hawn fuq ġew issodisfati, flimkien mal-informazzjoni dwar il-formolazzjoni tat-trattament tal-wiċċ (pereżempju dokumenti ta’ informazzjoni dwar is-sikurezza tal-materjali).

(d) Plastiċizzanti

Jekk tiġi applikata xi sustanza plastiċizzanti matul il-proċess tal-manifattura, il-ftalati għandhom ikunu konformi mar-rekwiżiti għas-sustanzi perikolużi stabbiliti fit-taqsima 2.

Barra minn dan, id-DNOP (di-n-octyl phthalate), id-DINP (di-isononyl phthalate), id-DIDP (di-isodecyl phthalate) mhumiex permessi fil-prodott.

Valutazzjoni u verifika: L-applikant għandu jipprovdi dikjarazzjoni ta’ konformità ma’ dan il-kriterju.

(e) Bijoċidi

Il-prodotti bijoċidali li fihom sustanzi attivi bijoċidali inklużi fl-Anness IA tad-Direttiva 98/8/KE tal-Parlament Ewropew u tal-Kunsill [7], u awtorizzati għall-użu fl-għamara, għandhom ikunu permessi għall-użu.

Valutazzjoni u verifika: L-applikant għandu jipprovdi dikjarazzjoni li r-rekwiżiti ta’ dan il-kriterju ġew issodisfati, flimkien ma’ lista ta’ prodotti bijoċidali użati.

5. Kriterji għall-immuntar ta’ għamara

Dan il-kriterju huwa marbut mal-inkullar ta’ komponenti inklużi fl-immuntar ta’ għamara. pereżempju, sustanzi adeżivi

(a) Sustanzi perikolużi f’addittivi u aġenti li jgħaqqdu

Dawn iridu jikkonformaw mar-rekwiżiti stabbiliti fit-taqsima 2 dwar sustanzi perikolużi.

Valutazzjoni u verifika: L-applikant għandu jipprovdi dikjarazzjonijiet xierqa li jivverifikaw li r-rekwiżiti ta’ hawn fuq ġew issodisfati. Għal kull prodott kimiku użat fl-immuntar ta’ għamara, għandu jiġi ppreżentat Dokument ta’ Dejta dwar is-Sikurezza jew dokumentazzjoni ekwivalenti li jinkludu informazzjoni dwar il-klassifikazzjoni ta’ periklu għas-saħħa. Rapporti tat-testijiet jew dikjarazzjoni mill-fornitur għandhom jiġu ppreżentati għall-kontenut ta’ formaldehyde liberu.

(b) VOC

Il-kontenut tal-VOC ta’ sustanzi adeżivi użati fl-immuntar ta’ għamara ma għandux jeċċedi 5 % (w/w). (VOC għandu jfisser kull kompost organiku li f’293,15 K ikollu pressa ta’ fwar ta’ 0,01 kPa jew aktar, jew li jkollu volatilità korrispondenti taħt kundizzjonijiet tal-użu partikolari).

Valutazzjoni u verifika: Għandha tiġi ppreżentata dikjarazzjoni mill-applikant li tindika s-sustanzi adeżivi kollha użati fl-immuntar tal-għamara, kif ukoll konformità ma’ dan il-kriterju.

6. Kriterji għall-prodott finali

(a) Durabilità u sikurezza

Il-prodott għandu jissodisfa r-rekwiżiti dwar id-durabilità, is-saħħa, is-sikurezza u l-istabbiltà fl-istandards EN applikabbli għall-użu tal-prodott. Jekk ma jeżisti l-ebda standard EN, għandhom jintużaw ir-rekwiżiti fl-istandards ISO. Jekk ma jeżisti l-ebda standard EN jew ISO, għandha ssir evalwazzjoni tad-durabilità, is-saħħa, is-sikurezza u l-istabbiltà tal-prodott fuq il-bażi tad-disinn u l-għażla tal-materjali minn istituzzjoni għall-ittestjar indipendenti.

Il-manwal tal-utent ser jipprovdi lista ta’ normi u standards li għandhom jintużaw għall-valutazzjoni tad-durabilità.

Minħabba l-importanza tal-kriterju tad-durabilità u sabiex tittejjeb l-istima tad-durabilità ta’ prodott, l-EUEB għandu jibda inizjattiva biex jippromwovi l-adozzjoni tal-istandards tad-durabilità EN li jridu jkunu disponibbli għar-reviżjoni li jmiss ta’ dawn il-kriterji.

Valutazzjoni u verifika: Il-produttur għandu jipprovdi dikjarazzjoni kompluta flimkien ma’ dokumentazzjoni dwar il-metodi tal-ittestjar imwettqa mill-istituzzjoni akkreditata u r-riżultati tat-testijiet.

(b) Manutenzjoni

Il-manutenzjoni ta’ prodotti għandha tkun possibbli mingħajr solventi b’bażi organika.

Il-manifattur għandu jiggarantixxi l-possibbiltà li tinkiseb parti għall-bdil (oġġetti funzjonali oriġinali jew oġġetti li jissodisfaw funzjonijiet ekwivalenti) fuq talba, matul il-perjodu attwali tal-manifattura industrijali tagħhom u għal perjodu ta’ 5 snin mid-data meta titwaqqaf il-produzzjoni tas-serje rilevanti.

Valutazzjoni u verifika: L-applikant u/jew il-fornitur tiegħu għandhom jipprovdu dikjarazzjoni kompluta b’dokumenti li juru li dan il-kriterju ġie ssodisfat.

(c) Riċiklaġġ u skart

Il-prodott għandu jkun jista’ jiġi riċiklat faċilment. Deskrizzjoni dettaljata tal-aqwa metodi biex jintrema l-prodott (użu mill-ġdid, riċiklaġġ, inizjattiva fejn l-applikant jieħu l-prodott lura, produzzjoni tal-enerġija) għandha tingħata lill-konsumatur, u dawn għandhom jingħataw grad skont l-impatt tagħhom fuq l-ambjent. Għal kull għażla, għandhom jiġu ddikjarati b’mod ċar il-prekawzjonijiet meħtieġa biex ikun limitat l-impatt fuq l-ambjent.

Valutazzjoni u verifika: L-applikant u/jew il-fornitur tiegħu għandu jipprovdi kampjun tal-informazzjoni li ser tiġi pprovduta u ġustifikazzjoni tar-rakkomandazzjonijiet.

(d) Informazzjoni għall-konsumatur

Din l-informazzjoni għandha tingħata mal-prodott li għandu Ekotikketta:

- Informazzjoni dwar l-adegwatezza għall-iskop, fuq il-bażi ta’ użu domestiku jew kuntrattwali (ħafif jew tqil, fuq ġewwa jew fuq barra),

- Informazzjoni dwar tindif u manutenzjoni,

- Istruzzjonijiet għall-bdil ta’ ħġieġ (jekk ikun hemm) fuq talba f’każ ta’ ħsara jew ksur mill-manifattur jew mill-bejjiegħ,

- Istruzzjonijiet li l-awtoritajiet lokali għandhom jiġu kkuntattjati dwar l-aqwa mod kif wieħed jarmi għamara qadima u materjali,

- Istruzzjonijiet għall-immuntar,

- L-aqwa użu mill-perspettiva ergonomika, fejn dan ikun rilevanti,

- L-isem tal-ispeċi ta’ njam solidu,

- Indikazzjoni ta’ kwalunkwe trattament jew preservattiv li ntuża fuq prodotti ta’ barra (kimiċi, bijoloġiċi jew fiżiċi),

- Rakkomandazzjoni li l-konsumatur juża prodotti li għandhom Ekotikketta tal-UE għall-preservazzjoni futura tal-għamara.

Valutazzjoni u verifika: L-applikant għandu jipprovdi kampjun tal-materjal ta’ informazzjoni pprovdut tal-prodott li għandu ekotikketta.

(e) L-ippakkjar tal-prodott finali

L-ippakkjar irid jissodisfa r-rekwiżiti li ġejjin:

(i) Ikun magħmul minn wieħed minn dawn li ġejjin:

- materjal li faċli jiġi riċiklat,

- materjali meħuda minn riżorsi rinovabbli,

- materjali maħsuba biex jerġgħu jintużaw, bħal kisi bit-tessuti.

(ii) Il-materjali kollha għandhom ikunu jistgħu jiġu separati faċilment bl-idejn f’partijiet riċiklabbli li jikkonsistu minn materjal wieħed (pereżempju kartun, karta, plastik, tessuti).

Valutazzjoni u verifika: Deskrizzjoni tal-ippakkjar tal-prodott għandha tingħata mal-applikazzjoni, flimkien ma’ dikjarazzjoni korrispondenti dwar il-konformità ma’ dawn il-kriterji.

(f) Informazzjoni dwar l-imballaġġ

It-test li ġej għandu jidher fuq l-imballaġġ:

"Għal aktar informazzjoni dwar ir-raġuni għalfejn dan il-prodott ingħata l-Fjura, jekk jogħġbok żur is-sit: http://www.ecolabel.eu"

It-test li ġej (jew test ekwivalenti) għandu jidher ukoll fuq l-imballaġġ u fil-manwal tal-utent:

"Għal aktar informazzjoni żur is-sit tal-Ekotikketta Ewropea. Informazzjoni addizzjonali tista’ tinkiseb fuq: isem/indirizz tad-dipartiment tal-konsumatur tal-applikant."

Valutazzjoni u verifika: L-applikant għandu jipprovdi kampjun tal-imballaġġ u l-manwal tal-utent tal-prodott u tal-informazzjoni mogħtija mal-prodott, flimkien ma’ dikjarazzjoni ta’ konformità ma’ kull parti ta’ dan il-kriterju.

(g) Informazzjoni li tidher fuq l-Ekotikketta

Il-kaxxa 2 tal-Ekotikketta għandha tinkludi t-test li ġej:

- injam minn foresti b’ġestjoni tajba,

- sustanzi perikolużi ristretti,

- prodott ittestjat għad-durabilità.

Valutazzjoni u verifika: L-applikant għandu jipprovdi kampjun tal-imballaġġ tal-prodott li juri t-tabella, flimkien ma’ dikjarazzjoni tal-konformità ma’ dan il-kriterju.

[1] ĠU 196, 16.8.1967, p. 1.

[2] ĠU L 200, 30.7.1999, p. 1.

[3] ĠU L 353, 31.12.2008, p. 1.

[4] ĠU L 33, 8.2.1979, p. 36.

[5] ĠU L 262, 27.9.1976, p. 201.

[6] ĠU L 85, 29.3.1999, p. 1.

[7] ĠU L 123, 24.4.1998, p. 1.

--------------------------------------------------

Appendiċi

Valuri tal-limitu ta’ elementi u sustanzi permessi f’fibri tal-injam riċiklati għall-produzzjoni ta’ materjali b’bażi ta’ njam

Elementi u komposti | Valuri tal-limitu (mg/kg materjal b’bażi ta’ njam riċiklat) |

Arseniku | 25 |

Kadmju | 50 |

Kromju | 25 |

Ram | 40 |

Ċomb | 90 |

Merkurju | 25 |

Fluworin | 100 |

Kloru | 1000 |

Pentachlorophenol (PCP) | 5 |

Żjut tal-qatran (benzo(a)pyrene) | 0,5 |

--------------------------------------------------