MEMORANDUM TA’ SPJEGAZZJONI

(1) Ir-Regolament tal-Kunsill (KE) Nru 765/2006 tat-18 ta' Mejju 2006 jipprovdi għall-iffriżar tal-assi tal-President Lukashenko u ta' ċerti uffiċjali tal-Bjelorussja.

(2) Permezz tad-Deċiżjoni tal-Kunsill 2012/ … /PESK ta' …ta’ Jannar 2012, il-Kunsill iddeċieda li r-restrizzjonijiet dwar l-iffriżar ta' fondi u riżorsi ekonomiċi għandhom ikunu applikati kontra (i) persuni responsabbli għal każijiet ta’ vjolazzjoni serja tad-drittijiet tal-bniedem jew għal ripressjoni tas-soċjetà ċivili u tal-oppożizzjoni demokratika, inklużi b'mod partikolari persuni f'pożizzjoni ta' tmexxija u kontra (ii) persuni u entitajiet li jibbenefikaw mir-reġim ta' Lukashenko jew jappoġġjawh, inklużi b'mod partikolari persuni u entitajiet li jipprovdu appoġġ finanzjarju jew materjali lir-reġim.

(3) Din il-miżura taqa' fil-kamp ta' applikazzjoni tat-Trattat dwar il-Funzjonament tal-Unjoni Ewropea u għalhekk hija meħtieġa azzjoni regolatorja fil-livell tal-Unjoni sabiex tidħol fis-seħħ, partikolarment bil-ħsieb li tiġi żgurata l-applikazzjoni uniformi tagħha mill-operaturi ekonomiċi fl-Istati Membri kollha.

(4) Għal din ir-raġuni, ir-Rappreżentant Għoli tal-Unjoni għall-Affarijiet Barranin u l-Politika ta' Sigurtà u l-Kummissjoni Ewropea jipproponu li jiġi emendat ir-Regolament tal-Kunsill (UE) Nru 765/2006.

2012/0016 (NLE)

Proposta Konġunta għal

REGOLAMENT TAL-KUNSILL

li jemenda r-Regolament tal-Kunsill (KE) Nru 765/2006 dwar miżuri restrittivi kontra l-Bjelorussja

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 215 tiegħu,

Wara li kkunsidra d-Deċiżjoni tal-Kunsill 2012/…/PESK ta' ... ta’ Jannar 2012[1] li temenda d-Deċiżjoni tal-Kunsill 2010/639/PESK dwar miżuri restrittivi kontra l-Bjelorussja.

Wara li kkunsidra l-proposta konġunta tar-Rappreżentant Għoli tal-Unjoni għall-Affarijiet Barranin u l-Politika ta’ Sigurtà u tal-Kummissjoni Ewropea,

Billi:

(1) Ir-Regolament tal-Kunsill (KE) Nru 765/2006 tat-18 ta' Mejju 2006[2] jipprovdi għall-iffriżar tal-assi tal-President Lukashenko u ta' ċerti uffiċjali tal-Bjelorussja.

(2) Permezz tad-Deċiżjoni tal-Kunsill 2012/ … /PESK ta' … ta’ Jannar 2012, il-Kunsill iddeċieda li r-restrizzjonijiet dwar l-iffriżar ta' fondi u riżorsi ekonomiċi għandhom ikunu applikati kontra (i) persuni responsabbli għal każijiet ta’ vjolazzjoni serja tad-drittijiet tal-bniedem jew għal ripressjoni tas-soċjetà ċivili u tal-oppożizzjoni demokratika, inklużi b'mod partikolari persuni f'pożizzjoni ta' tmexxija u kontra (ii) persuni u entitajiet li jibbenefikaw mir-reġim ta' Lukashenko jew jappoġġjawh, inklużi b'mod partikolari persuni u entitajiet li jipprovdu appoġġ finanzjarju jew materjali lir-reġim.

(3) Din il-miżura taqa' fil-kamp ta' applikazzjoni tat-Trattat dwar il-Funzjonament tal-Unjoni Ewropea u għalhekk hija meħtieġa azzjoni fil-livell tal-Unjoni sabiex tidħol fis-seħħ, partikolarment bil-ħsieb li tiġi żgurata l-applikazzjoni uniformi tagħha mill-operaturi ekonomiċi fl-Istati Membri kollha.

(4) Għaldaqstant, ir-Regolament (KE) Nru 765/2006 għandu jiġi emendat skont dan,

ADOTTA DAN IR-REGOLAMENT:

Artikolu 1

Ir-Regolament (KE) Nru 765/2006 huwa emendat kif ġej:

L-Artikolu 2 jiġi mibdul bl-Artikolu li ġej:

“Artikolu 2

1.           Il-fondi u r-riżorsi ekonomiċi kollha li jappartjenu għal persuni fiżiċi jew ġuridiċi, entitajiet jew korpi elenkati fl-Annessi I, IA u IB, jew li huma proprjetà tagħhom jew miżmuma jew kontrollati minnhom, jiġu ffriżati.

2.           L-ebda fondi jew riżorsi ekonomiċi ma jitpoġġew, direttament jew indirettament, għad-dispożizzjoni ta’ persuni fiżiċi jew ġuridiċi, entitajiet jew korpi elenkati fl-Annessi I, IA jew IB jew isiru disponibbli b’mod li jgawdu minnhom huma .

3.           Tiġi pprojbita l-parteċipazzjoni, b'mod konxju u intenzjonat, f'attivitajiet li l-għan jew l-effett tagħhom ikun, b'mod dirett jew b'mod indirett, li jiġu evitati l-miżuri msemmija fil-paragrafi 1 u 2.

4.           L-Anness I ikun jikkonsisti f’persuni fiżiċi jew ġuridiċi, entitajiet u korpi li, skont l-Artikolu 2(1)(a) tad-Deċiżjoni tal-Kunsill 2010/639/PESK, kienu identifikati mill-Kunsill bħala persuni responsabbli għall-vjolazzjoni tal-istandards elettorali internazzjonali fl-elezzjonijiet Presidenzjali fil-Bjelorussja fid-19 ta' Marzu 2006 u fit-trażżin ripressiv tas-soċjetà ċivili u tal-oppożizzjoni demokratika, jew bħala persuni assoċjati ma' dawk responsabbli.

5.           L-Anness IA jkun jikkonsisti f’persuni fiżiċi jew ġuridiċi, entitajiet u korpi li, skont l-Artikolu 2(1)(b) tad-Deċiżjoni tal-Kunsill 2010/639/PESK, kienu identifikati mill-Kunsill bħala persuni responsabbli għall-vjolazzjoni tal-istandards elettorali internazzjonali fl-elezzjonijiet Presidenzjali fil-Bjelorussja fid-19 ta' Diċembru 2010 u fit-trażżin ripressiv tas-soċjetà ċivili u tal-oppożizzjoni demokratika, jew bħala persuni assoċjati ma' dawk responsabbli.

6.           L-Anness IB jkun jikkonsisti minn persuni fiżiċi jew ġuridiċi, entitajiet u korpi li, skont is-subparagrafi (c) u (d) tal-Artikolu 2(1) tad-Deċiżjoni tal-Kunsill 2010/639/PESK, kienu identifikati mill-Kunsill bħala persuni (i) responsabbli għal każijiet ta’ vjolazzjoni serja tad-drittijiet tal-bniedem jew għar-ripressjoni tas-soċjetà ċivili u tal-oppożizzjoni demokratika fil-Bjelorussja, jew (ii) persuni jew entitajiet li jibbenefikaw mir-reġim ta' Lukashenko jew jappoġġjawh."

Artikolu 2

L-Anness ta’ ma’ dan ir-Regolament jiżdied bħala l-Anness IB ta’ mar-Regolament (KE) Nru 765/2006.

Artikolu 3

Dan ir-Regolament jidħol fis-seħħ l-għada tal-jum tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

Dan ir-Regolament jorbot fl-intier tiegħu u japplika direttament fl-Istati Membri kollha.

Magħmul fi Brussell,

                                                                       Għall-Kunsill

                                                                       Il-President

"ANNESS IB

Ma hemmx entrati f'dan l-Anness"

[1]               ĠU L … , …1.2012, p. … .

[2]               ĠU L 134, tal-20.5. 2006, p. 1