MEMORANDUM TA' SPJEGAZZJONI

1. IL-KUNTEST TAL-PROPOSTA

Meta mqabbla maċ-ċentri globali tat-teknoloġija avvanzata u l-innovazzjoni, li jikkompetu magħha, b’mod partikolari l-Istati Uniti, l-industrija tal-kapital ta’ riskju Ewropea tidher fframmentata u mxerrda. Din il-frammentazzjoni kif ukoll it-tixrid inisslu nuqqas ta' rieda, statistikament sinifikanti, fl-investituri biex jinvestu f’fondi ta’ kapital ta’ riskju: Xi Stati Membri għandhom reġimi tal-fondi ta’ kapital ta’ riskju ddedikati b’regoli dwar il-kompożizzjoni tal-portafoll, it-tekniki tal-investiment u l-miri tal-investiment eliġibbli. Madankollu, il-maġġoranza tal-Istati Membri m’għandhomx reġimi speċifiċi bħal dawn tal-fondi ta’ kapital ta’ riskju, u minflok huma japplikaw regoli ġenerali tal-liġi tal-kumpaniji u l-obbligi tal-prospett għall-attivitajiet tal-maniġers tal-fondi kollha li jixtiequ joffru ‘allokazzjonijiet privati’ tal-kapital ta’ riskju fil-ġurisdizzjonijiet tagħhom.

Bħala konsegwenza tal-frammentazzjoni fir-regolamenti, investituri potenzjali tal-'kapital ta’ riskju' bħal ma huma individwi għonja, fondi tal-pensjonijiet jew kumpaniji tal-assigurazzjoni jsibuha diffiċli u aktar għalja li jibdew jindirizzaw uħud mill-investimenti tagħhom lejn il-kapital ta’ riskju. Frammentazzjoni fir-regolamenti timpedixxi wkoll lill-fondi speċjalizzati ta' kapital ta’ riskju milli jżidu ammont sinifikanti ta’ kapital minn barra l-pajjiż.

Marbuta mill-qrib mal-problema deskritta hawn fuq hija l-kwistjoni rigward jekk l-Ewropa ma tiddedikax biżżejjed fondi għall-finanzjament tal-industriji innovattivi li għadhom jibdew. Waqt li l-Istati Uniti, fil-perjodu mill-2003 sal-2010, indirizzat madwar EUR 131 biljun għall-Venture Capital Funds (VCFs), il-VCFs Ewropej irnexxilhom jiġbru EUR 28 biljun biss f’dan il-perjodu.

Il-preferenza attwali tal-investituri potenzjali hija li jippreferu l-investimenti ta' ekwità privata minflok ta' kapital ta’ riskju. Fil-perjodu ta’ referenza 2003-2010, il-fondi ddedikati għall-kapital ta’ riskju ammontaw għal EUR 64 biljun minn total ta’ EUR 437 biljun investiti fil-qasam aktar wiesa’ tal-ekwità privata. Għaldaqstant il-kapital ta’ riskju jirrappreżenta biss 14.6% tal-ammont konġunt – bl-ekwità privata tirrapreżenta 85.4%. Meta wieħed iħares lejn dan il-perjodu ta’ referenza fuq bażi annwali, il-flus miżjuda mill-ekwità privata kull sena jaqbżu b’ammont kbir il-flus miżjuda mill-kapital ta’ riskju.

Sakemm tippersisti din il-preferenza favur l-ekwità privata – settur li jinvesti f’kumpaniji maturi u jorganizza x-xiri b’azzjoni ta’ lieva finanzjarja – il-fondi disponibbli mhumiex indirizzati lejn il-finanzjament ta’ ekwità għat-tnissil u l-bidu ta’ impriżi li jinsabu fil-fażi li jew jirnexxu jew ifallu fl-iżvilupp korporattiv tagħhom. In-nuqqas ta’ riżorsi finanzjarji li attwalment huma diretti lejn il-kapital ta’ riskju huwa direttament responsabbli għad-daqs subottimali tal-VCF medja Ewropea.

Id-daqs medju ta’ fond ta’ kapital ta’ riskju Ewropew huwa inqas, b’mod sinifikanti, mid-daqs ottimali għal dan it-tip ta’ strument ta’ finanzjament. Waqt li fond ta’ kapital ta’ riskju (VCF) medju fl-Istati Uniti jiġbor EUR 130 miljun ta’ assi fil-ġestjoni, id-daqs medju ta’ VCF Ewropew huwa ta’ madwar EUR 60 miljun.

Bħala konsegwenza, il-kapital ta’ riskju, f’dan l-istadju, iwettaq rwol minuri fil-finanzjament tal-SMEs. L-SMEs jiddependu primarjament fuq is-self mill-banek. Is-self bankarju jirrappreżenta aktar minn 80 % tal-finanzjament tagħhom, filwaqt li 2 % biss tal-finanzjament tagħhom huwa fornut mill-ispeċjalisti tal-kapital ta’ riskju. Iċ-ċifra korrispondenti għall-Istati Uniti hija ta’ 14 %.

Dawn ir-riżultati huma partikolarment impressjonanti minħabba l-fatt li ħafna SMEs, wara l-kriżi finanzjarja tal-2008 u l-2009, kellhom iħallsu rati tal-imgħax aktar għolja għas-self bankarju.[1] Barra minn hekk, bħala konsegwenza tal-kriżi finanzjarja tal-2008 u l-2009, il-provvediment u l-estensjoni tal-linji tal-kreditu mill-banek lill-SMEs naqsu b’mod sinifikanti, u għalhekk it-tfittxja u d-domanda tal-SMEs għal sorsi ta’ finanzjament alternattivi saru aktar urġenti.[2] Madankollu, il-kapital ta’ riskju, minħabba nuqqas ta’ riżorsi kapitali suffiċjenti, ma kienx kapaċi jimla dan il-vojt evidenti.

L-assenza ta’ settur ta’ kapital ta’ riskju effiċjenti twassal biex l-innovaturi u l-impriżi tan-negozju innovattivi Ewropej jaħdmu f’livell aktar baxx mill-potenzjal kummerċjali tagħhom. Dan, imbagħad, huwa negattiv għall-kompetittività globali tal-Ewropa. Dan il-punt jista’ jkun indikat billi titqabbel l-importanza relattiva tal-investimenti tal-kapital ta’ riskju bħala strument ta’ finanzjament (espressa bħala perċentwal tal-PDG) f’suq innovattiv ħafna, bħall-Istati Uniti (0.14 %), mal-medja Ewropea (0.03 %).

Din is-sitwazzjoni hija kkonfermata wkoll meta tiġi vvalutata mill-perspettiva tal-portafoll ġenerali tal-fondi ta’ kapital ta’ riskju ġestiti minn maniġer ta’ fond partikolari. Skont l-aħħar ċifri disponibbli mill-Assoċjazzjoni Ewropea tal-Ekwità Privata u l-kapital ta’ riskju (EVCA), 98 % tal-maniġers ta’ fondi ta’ kapital ta’ riskju jiġġestixxu portafoll ta’ fondi li jkun aktar baxx mil-limitu ta’ EUR 500 miljun tad-Direttiva dwar Maniġers ta’ Fondi ta’ Investiment Alternattivi (AIFMD).[3]

L-indirizzar ta’ dawn il-problemi u l-appoġġ għall-imprendituri Ewropej huma għaldaqstant kruċjali. Suq Ewropew tal-kapital ta’ riskju li qed jikseb suċċess huwa objettiv tal-Istrateġija Ġenerali Ewropa 2020,[4] waqt li l-Kunsill Ewropew ta’ Frar 2011 għamel sejħa għat-tneħħija tal-ostakli regolatorji li għad baqa’ għall-kapital ta’ riskju transkonfinali. Bħala xogħol ta’ segwitu, il-Kummissjoni Ewropea mpenjat ruħha fl-Att dwar is-Suq Uniku[5] (SMA) biex tiżgura li sal-2012 il-fondi ta’ kapital ta’ riskju stabbiliti fi kwalunkwe Stat Membru jkunu jistgħu jżidu l-kapital u jinvestu b’mod liberu fl-UE kollha. Qafas ġdid għall-fondi ta’ kapital ta’ riskju huwa wkoll wieħed mill-prijoritajiet ewlenin tal-pjan ta’ azzjoni għall-SMEs [daħħal referenza] li għandu l-għan li jkattar it-tkabbir tal-SMEs billi jtejjeb l-aċċess tagħhom għall-finanzjament. Il-komunikazzjoni tal-Kummissjoni "Pjan Direzzjonali lejn l-Istabbiltà u t-Tkabbir" adottata fit-12 ta’ Ottubru 2011 identifikat ukoll it-tkattir tal-aċċess għall-kapital ta’ riskju bħala strument importanti biex tingħata spinta lit-tkabbir fi ħdan l-UE u għaldaqstant tagħmel sejħa għal adozzjoni rapida tal-proposti rilevanti mill-Parlament Ewropew u l-Kunsill.[6]

Ir-Regolament propost jindirizza dawn il-problemi. Huwa introduċa rekwiżiti uniformi għall-maniġers tal-impriżi ta’ investiment kollettiv li joperaw taħt id-denominazzjoni "Fond Ewropew ta' Kapital ta’ Riskju". Huwa jintroduċi rekwiżiti rigward il-portafoll tal-investiment, it-tekniki tal-investiment u l-impriżi eliġibbli li fond li jikkwalifika ta' kapital ta’ riskju jista’ jindirizza. Huwa jintroduċi wkoll regoli uniformi rigward liema kategoriji ta’ investituri jistgħu jkunu indirizzati minn fond li jikkwalifika ta' kapital ta’ riskju u rigward l-organizzazzjoni interna tal-maniġers li jikkummerċjalizzaw fondi li jikkwalifikaw bħal dawn. Minħabba li l-maniġers tal-impriżi ta’ investiment kollettiv li joperaw taħt id-denominazzjoni "Fond Ewropew ta' Kapital ta’ Riskju" se jkunu suġġetti għal regoli sostantivi identiċi fl-UE kollha, huma se jibbenefikaw minn rekwiżiti uniformi għar-reġistrazzjoni u passaport għall-UE kollha, li se jgħinu biex jinħolqu kundizzjonijiet ekwi għall-parteċipanti kollha fis-suq ta' kapital ta’ riskju.

Regoli uniformi għall-fondi ta’ kapital ta’ riskju jistgħu jagħtu wkoll spinta importanti lill-iżvilupp ta’ oqsma oħra tar-regolamentazzjoni tal-investimenti tal-kapital ta’ riskju. Oqfsa prudenzjali għall-kumpaniji tal-assigurazzjoni (Solvenza II) u l-banek (Regolament u Direttiva tar-Rekwiżiti Kapitali) jittrattaw l-investimenti tal-kapital ta’ riskju bħala riskju għoli għall-finijiet tal-kalkolu tar-rekwiżiti kapitali. Il-Kummissjoni se tivvaluta l-impatti ta’ rekwiżiti bħal dawn, sabiex tidentifika jekk dawn ir-rekwiżiti kapitali għandhomx bżonn jinbidlu fuq medda ta’ żmien medja jew fit-tul. L-istabbiliment ta’ qafas għall-UE kollha għall-fondi ta’ kapital ta’ riskju b’sett uniformi ta’ regoli dwar il-kompożizzjoni tal-portafoll u l-kundizzjonijiet operattivi kif previsti minn dan ir-Regolament jista’ jħaffef tali valutazzjoni.

Kif hemm enfasizzat ukoll fil-pjan ta’ azzjoni tal-SMEs, kunċett komuni ta’ fond ta’ kapital ta’ riskju se jkun punt tat-tluq tajjeb għal aktar tiftix mal-Istati Membri għal soluzzjonijiet għall-problemi tat-taxxi li jistgħu jxekklu l-investimenti transkonfinali minn fondi bħal dawn. Fl-2012, il-Kummissjoni se tlesti l-eżami tagħha rigward l-ostakli tat-taxxi għall-investiment transkonfinali ta' kapital ta’ riskju bil-għan li tippreżenta s-soluzzjonijiet fl-2013 immirati lejn l-eliminazzjoni tal-ostakli waqt li fl-istess ħin ma tħallix l-evitar u l-evażjoni tat-taxxa. Tali soluzzjonijiet – għalkemm indipendenti minn dan ir-Regolament – huma kumpliment importanti għalih, sabiex ikun żviluppat suq funzjonali b’mod sħiħ għall-fondi ta’ kapital ta’ riskju u għall-SMEs fi ħdan l-UE. Huma jiżguraw il-fluss effiċjenti tal-kapital għall-fondi li jikkwalifikaw ta' kapital ta’ riskju u finalment l-impriżi li jikkwalifikaw fil-portafoll li fihom il-fondi jinvestu.

Ir-Regolament propost huwa kumplimentari għar-Regolament propost dwar il-Fondi tal-Intraprenditorija Soċjali Ewropea (EuSEFs). Iż-żewġ proposti għandhom l-għan li jilħqu għanijiet differenti u ż-żewġ proposti, jekk ikunu adottati, se jeżistu flimkien bħala atti legali awtonomi f’indipendenza reċiproka.

2. RIŻULTATI TAL-KONSULTAZZJONIJIET MAL-PARTIJIET INTERESSATI U L-VALUTAZZJONIJIET TAL-IMPATT 2.1. Konsultazzjoni mal-partijiet interessati

Il-bidu tax-xogħol fuq il-kapital ta’ riskju jmur lura għall-1998 meta l-importanza tal-ħolqien ta’ suq tal-kapital ta’ riskju li jiffunzjona tajjeb,[7] bil-kapital ta’ riskju bħala parti essenzjali, kienet diġà rrikonoxxuta fil-Komunikazzjoni tal-Kummissjoni dwar il-Pjan ta’ Azzjoni għall-Kapital ta’ Riskju (Risk Capital Action Plan - RCAP).[8] Minn dak iż-żmien, il-Kummissjoni ġabret aktar evidenza permezz ta’ workshops , konsultazzjonijiet u gruppi ta’ esperti ddedikati, hekk kif indirizzat l-ostakli legali, regolatorji u tat-taxxi eżistenti li jxekklu l-funzjonament ottimali tas-swieq tal-kapital ta’ riskju.

Fil-15 ta’ Ġunju 2011, is-servizzi tal-Kummissjoni nedew konsultazzjoni pubblika[9] dwar l-elementi ewlenin ta’ qafas Ewropew potenzjali għall-fondi ta’ kapital ta’ riskju, li għalqet fl-10 ta’ Awwissu 2011. Waslu tmienja u erbgħin risposta li jistgħu jkunu kkonsultati fil-websajt li ġejja http://ec.europa.eu/internal_market/consultations/2011/venture_capital_en.htm.

2.2. Valutazzjoni tal-impatt

F’konformità mal-politika tagħha dwar "regolamenti aħjar", il-Kummissjoni wettqet valutazzjoni tal-impatt ta’ alternattivi politiċi. Dawn l-alternattivi fihom firxa wiesgħa ta’ għażliet potenzjali:

· L-introduzzjoni ta’ passaport ġdid tal-kapital ta’ riskju fi ħdan id-Direttiva 2011/61/KE (AIFMD)

· It-tnaqqis jew it-tneħħija tal-livelli tal-AIFMD

· Il-ħolqien ta’ regoli speċjali għall-kapital ta’ riskju bħala parti mid-dispożizzjonijiet ta’ implimentazzjoni tal-AIFM-D ('livell 2')

· Il-ħolqien ta’ passaport tal-kapital ta’ riskju bħala strument legali awtonomu

· Il-ħolqien ta’ netwerk amministrattiv biex jissaħħaħ ir-rikonoxximent miż-żewġ naħat tar-regoli nazzjonali li jirregolaw il-kapital ta’ riskju jew 'il-allokazzjonijiet privati'.

Dawn l-għażliet kollha kienu analizzati fil-kuntest tal-objettivi ġenerali, jiġifieri li l-SMEs Ewropej isiru aktar kompetittivi f’suq globali, imma wkoll fil-kuntest tal-objettivi aktar speċifiċi u operattivi ta’ din l-inizjattiva: (i) li jkun stabbilit kunċett Ewropew ta’ "fond ta’ kapital ta’ riskju" (ii) li tinħoloq sistema Ewropea li tippromwovi ż-żieda transkonfinali tal-fondi ta’ kapital ta’ riskju, (iii) li jinħoloq approċċ regolatorju komuni li jirregola fondi bħal dawn, inkluż il-ħolqien ta’ netwerk għall-kooperazzjoni regolatorja fis-superviżjoni ta’ fondi tal-investiment bħal dawn.

L-impatti inklużi l-ispejjeż u l-benefiċċji għall-manigers tal-fondi ta’ kapital ta’ riskju, l-SMEs, is-soċjetà, l-ekonomija b’mod ġenerali, l-ambjent u l-kuntest globali kienu analizzati wkoll. Tali analiżi kkonkludiet favur il-ħolqien ta’ passaport tal-kapital ta’ riskju bħala strument awtonomu. L-impatt tal-għażla ppreferuta mistenni li jkun ta' benefiċċju għall-maniġers tal-fondi ta’ kapital ta’ riskju billi jtejjeb il-kundizzjonijiet operattivi tagħhom fl-UE li mbagħad għandhom iwasslu għal konformità u tnaqqis fl-ispejjeż amministrattivi u l-ħolqien ta’ opportunitajiet ġodda għal żieda fil-fondi. Dan għandu jirriżulta f’aktar opportunitajiet ta’ negozju u f’aktar finanzjament li jkun indirizzat lejn l-SMEs ġodda u innovattivi u dan kollu imbagħad għandu jagħti spinta lil-kompetittività u t-tkabbir tal-Ekonomija Ewropea.

Tqiesu l-kummenti mill-Bord tal-Valutazzjoni tal-Impatt espressi fl-opinjoni tagħhom tal-11 ta’ Novembru . B’mod partikolari, l-analiżi tal-problemi ġiet imsaħħa bi spjegazzjoni sa fejn il-livelli baxxi ta’ żieda fil-fondi transkonfinali ta' kapital ta’ riskju jistgħu jkunu attribwiti għall-frammentazzjoni tar-regoli fl-UE. L-għażliet intrabtu b’mod aħjar mal-problemi speċifiċi identifikati u l-analiżi tal-impatti tagħhom ġiet approfondita. Finalment, l-arranġamenti għall-monitoraġġ u l-konformità ġew iċċarati aktar.

3. ELEMENTI LEGALI TAL-PROPOSTA 3.1. Il-bażi legali

Il-proposta hija bbażata fuq l-Artikolu 114 tat-TFUE bħala l-aktar bażi legali xierqa f’dan il-qasam. Prinċipalment il-proposta għandha l-għan li ttejjeb l-affidabbiltà u ċ-ċertezza legali tal-attivitajiet ta’ kummerċjalizzazzjoni mwettqa mill-operaturi li jużaw id-denominazzjoni "Fond Ewropew ta' Kapital ta’ Riskju". Biex jintlaħaq dan il-għan, il-proposta tintroduċi standards uniformi rigward il-kompożizzjoni tal-portafoll tal-"Fondi Ewropej ta' Kapital ta’ Riskju", l-istrumenti ta’ investiment li jistgħu jużaw tali fondi, u l-miri tal-investiment li huma eliġibbli għal finanzjament minn fondi tal-investiment kolletivi li joperaw taħt id-denominazzjoni "Fond Ewropew ta' Kapital ta’ Riskju".

Il-proposta tintroduċi wkoll regoli uniformi fir-rigward tal-kategoriji tal-investituri li jitqiesu bħala eliġibbli li jinvestu f’"Fondi Ewropej ta' Kapital ta’ Riskju". Regolament jitqies bħala l-istrument legali l-aktar xieraq biex jintroduċi rekwiżiti uniformi diretti lejn il-parteċipanti kollha fis-suq tal-kapital ta’ riskju – l-investituri tal-kapital ta’ riskju, il-fondi ta’ kapital ta’ riskju u l-kumpaniji fil-mira tal-finanzjament tal-kapital ta’ riskju. Regolament jitqies ukoll bħala l-aktar strument xieraq biex jinħolqu regoli uniformi rigward min jista’ jkun investitur tal-kapital ta’ riskju, rigward min jista’ juża d-denominazzjoni "Fond Ewropew ta' Kapital ta’ Riskju" u rigward it-tipi ta’ impriżi li jistgħu jirċievu finanzjament minn tali fondi li jikkwalifikaw. Fl-aħħar nett, Regolament jitqies bħala l-aktar strument xieraq biex ikun żgurat li l-parteċipanti kollha huma suġġetti għal rekwiżiti uniformi rigward is-sottoskrizzjoni għal "Fondi Ewropej ta' Kapital ta’ Riskju" u l-istrateġiji tal-investiment segwiti u l-istrumenti tal-investiment użati mill-"Fondi Ewropej ta' Kapital ta’ Riskju".

3.2. Is-sussidjarjetà u l-proporzjonalità

Essenzjalment, il-proposta għandha l-għan li toħloq ambjent ta’ kummerċjalizzazzjoni affidabbli, sikur u legalment stabbli għall-kummerċjalizzazzjoni tal-Fondi Ewropej ta' Kapital ta’ Riskju. Id-determinazzjoni tal-karatteristiċi essenzjali ta’ Fond Ewropew ta' Kapital ta’ Riskju, f’termini tal-kompożizzjoni tal-portafoll tiegħu, il-miri tal-investiment u l-gruppi ta’ investituri eliġibbli, ma tistax titħalla fid-diskrezzjoni tal-Istati Membri minħabba li dan inissel applikazzjoni differenti u mhux konsistenti ta’ dawn ir-rekwiżiti li jiddefinixxu fl-UE kollha. Definizzjonijiet u rekwiżiti operattivi uniformi jridu jwettqu rwol ċentrali fl-istabbiliment ta’ sett ta’ regoli komuni għas-suq Ewropew għall-fondi ta’ kapital ta’ riskju tal-UE u l-maniġers tagħhom. Barra minn hekk, il-maniġers kollha tal-fondi ta’ investiment kollettivi li joperaw f’dan is-suq u jużaw id-denominazzjoni "Fond Ewropew ta' Kapital ta’ Riskju" iridu jkunu suġġetti għall-istess rekwiżiti organizzattivi u tat-twettiq tan-negozju.

Fir-rigward tar-reġistrazzjoni u s-superviżjoni tal-maniġers tal-"Fondi Ewropej ta' Kapital ta’ Riskju" il-proposta għandha l-għan li ssib bilanċ bejn il-ħtieġa għal superviżjoni effettiva tal-Fondi Ewropej ta' Kapital ta’ Riskju, l-interess tal-awtoritajiet kompetenti nazzjonali meta tali fondi huma jew iddomiċiljati jew offruti lill-kategoriji ta’ investituri eliġibbli u l-irwol koordinattiv tal-AETS. Sabiex jinħoloq proċess kontinwu għas-superviżjoni, l-awtorità kompetenti fl-Istat Membru fejn il-maniġer ta’ "Fond Ewropew ta' Kapital ta’ Riskju" li jikkwalifikaw huwa ddomiċiljat għandha tivverifika d-dokumenti tar-reġistrazzjoni sottomessi mill-maniġer applikant u, wara li tivvaluta jekk l-applikant ipprovdiex garanzija biżżejjed tal-kapaċità tiegħu li jikkonforma mar-rekwiżiti tar-Regolament, tirreġistra lill-applikant. Meta tissorvelja l-maniġer irreġistrat, l-awtorità kompetenti li rreġistrat lill-maniġer għandha tikkoopera mal-awtoritajiet kompetenti f’dawk l-Istati Membri fejn huwa kkummerċjalizzat il-fond li jikkwalifika. L-AETS għandha żżomm bażi ta' dejta ċentrali li telenka l-maniġers irreġistrati kollha li huma eliġibbli li jużaw id-denominazzjoni fond Ewropew ta' Kapital ta’ Riskju.

Fir-rigward tal-proporzjonalità, il-proposta ssib il-bilanċ xieraq bejn l-interess pubbliku li jippromwovi l-iżvilupp ta’ swieq tal-kapital ta’ riskju aktar likwidi u l-kosteffiċjenza tal-miżuri proposti. Meta pprevediet sistema ta’ reġistrazzjoni sempliċi, il-proposta qieset b’mod sħiħ il-ħtieġa li jinstab bilanċ bejn is-sigurtà u l-affidabilità assoċjata mal-użu tad-denominazzjoni "Fond Ewropew ta' Kapital ta’ Riskju" mal-operat effiċjenti tas-suq tal-kapital ta’ riskju u l-ispiża għall-partijiet interessati differenti tiegħu.

3.3. Konformità mal-Artikoli 290 u 291 tat-TFUE

Fit-23 ta’ Settembru 2009, il-Kummissjoni adottat proposti għal Regolamenti li jistabbilixxu l-ABE, l-AEAPX, u l-AETS. F’dan ir-rigward il-Kummissjoni tixtieq tfakkar id-Dikjarazzjonijiet fir-rigward tal-Artikoli 290 u 291 tat-TFUE li hija għamlet fl-adozzjoni tar-Regolamenti li jistabbilixxu l-Awtoritajiet Superviżorji Ewropej u li skont dawn: "Fir-rigward tal-proċess għall-adozzjoni ta' standards regolatorji, il-Kummissjoni tenfasizza n-natura unika tas-settur tas-servizzi finanzjarji, li jkompli mal-istruttura Lamfalussy u li kien speċifikament rikonoxxut fid-Dikjarazzjoni 39 għat-TFUE. Madankollu, il-Kummissjoni għandha dubji serji dwar jekk ir-restrizzjonijiet fuq ir-rwol tagħha meta tadotta atti delegati u provvedimenti ta' implimentazzjoni humiex skont l-Artikoli 290 u 291 tat-TFUE."

3.4. Preżentazzjoni tal-Proposta

Artikolu 1 – Skop

L-Artikolu 1 juri l-iskop tar-Regolament previst. L-Artikolu jagħmilha ċara li d-denominazzjoni "Fond Ewropew ta' Kapital ta’ Riskju" għandha tkun irriżervata għal dawk il-maniġers tal-fondi li jikkonformaw ma’ sett ta’ kriterji tal-kwalità uniformi li japplikaw għall-kummerċjalizzazzjoni tal-fondi li jikkwalifikaw ta' kapital ta’ riskju tagħhom fl-Unjoni. F’dan ir-rigward, l-Artikolu 1 jenfasizza l-għan li jkun stabbilit kunċett uniformi ta’ dak li jikkostitwixxi fond li jikkwalifika ta' kapital ta’ riskju. Dan il-kunċett huwa żviluppat sabiex tkun żgurata l-kummerċjalizzazzjoni bla xkiel ta’ fondi bħal dawn fl-Unjoni kollha.

Artikolu 2 – Il-kamp ta' applikazzjoni

L-Artikolu 2 jispeċifika li dan ir-Regolament japplika għall-maniġers tal-impriżi ta’ investiment kollettiv kif iddefiniti fl-Artikolu 3(b) ta’ dan ir-Regolament, sakemm dawn il-maniġers huma stabbiliti fl-Unjoni u rreġistrati mal-awtorità kompetenti tal-Istat Membru ta’ domiċilju tagħhom skont id-Direttiva 2011/61/KE u huma jiġġestixxu portafolji ta’ fondi li jikkwalifikaw ta' kapital ta’ riskju, li l-assi ġestiti tagħhom b’kollox ma jaqbżux il-limitu ta’ EUR 500 miljun.

Artikolu 3 - Definizzjonijiet

L-Artikolu 3 fih definizzjonijiet essenzjali li jiddelimitaw il-kamp ta' applikazzjoni tar-Regolament propost. Kunċetti ewlenin bħal fond li jikkwalifikaw ta' kapital ta’ riskju, l-istrumenti li jikkwalifikaw tal-investiment u l-miri li jikkwalifikaw tal-investiment huma ddefiniti. Essenzjalment, dawn id-definizzjonijiet għandhom l-għan li jiġbdu linja ċara ta’ demarkazzjoni bejn il-kunċett ta’ fond li jikkwalifika ta' kapital ta’ riskju u fondi oħra li jidħlu għal strateġiji oħra ta’ investiment, anqas speċjalizzati, pereżempju l-ekwità privata.

F’konformità mal-għan li jkunu llimitati b’mod preċiż il-fondi li jikkwalifkaw u li fir-rigward tagħhom maniġer ta’ fond ta’ kapital ta’ riskju għandu jibbenefika mid-drittijiet skont dan ir-Regolament, l-Artikolu 3, paragrafu (a) jistipula li fond li jikkwalifika ta' kapital ta’ riskju għandu jkun fond li jiddedika mill-inqas 70 fil-mija tal-kontribuzzjonijiet kapitali aggregati tiegħu u l-kapital impenjat mhux mitlub għal investimenti f’impriżi żgħar u medji (SME) li joħorġu strumenti ta’ ekwità jew kważi ekwità direttament lill-investitur tal-kapital ta’ riskju ("miri tal-investiment"). Dan jimplika li pereżempju l-ispejjeż operattivi li għandhom ikunu ddebitati lill-fond li jikkwalifika ta' kapital ta’ riskju kif jista’ jkun maqbul mal-investituri, jridu jsiru mit-30 fil-mija li baqa’ tal-kontribuzzjonijiet kapitali impenjati.

Huwa importanti li jkun iċċarat li l-fond ta’ kapital ta’ riskju jrid jikseb dawn l-istrumenti direttament mingħand l-SME li toħroġhom. L-akkwist dirett huwa salvagwardja essenzjali minħabba li għandu l-għan li jiddifferenzja l-fondi li jikkwalifikaw ta' kapital ta’ riskju mill-kategorija aktar wiesgħa tal-fondi ta’ ekwità privata (li huma kkummerċjalizzati f’titoli maħruġa fi swieq sekondarji). L-Artikolu 3 fih aktar definizzjonijiet meħtieġa għall-applikazzjoni tar-Regolament propost.

Artikolu 4 – L-użu tad-denominazzjoni "Fond Ewropew ta' Kapital ta’ Riskju"

L-Artikolu 4 jinkludi l-prinċipju ewlieni li l-fondi biss li jikkonformaw mal-kriterji uniformi stabbiliti minn dan ir-Regolament huma eliġibbli li jużaw id-denominazzjoni "Fond Ewropew ta' Kapital ta’ Riskju" biex jikkummerċjalizzaw il-fondi li jikkwalifikaw ta' kapital ta’ riskju fl-Unjoni.

Artikolu 5 – Kompożizzjoni tal-portafoll

L-Artikolu 5 jinkludi dispożizzjoni ddettaljata dwar il-kompożizzjoni tal-portafoll li jikkaratterizza Fond Ewropew ta' Kapital ta’ Riskju. F’dan ir-rigward, l-Artikolu 5 jinkludi regoli uniformi dwar il-miri tal-investiment għall-fondi li jikkwalifikaw ta' kapital ta’ riskju, strumenti tal-investiment eliġibbli, regoli dwar il-limiti li bihom fond li jikkwalifika ta' kapital ta’ riskju jista’ jkabbar l-iskopertura tiegħu. Sabiex il-fondi li jikkwalifikaw ta' kapital ta’ riskju jkollhom ċertu grad ta’ flessibilità fil-ġestjoni tal-investiment u l-likwidità tagħhom, kummerċjalizzazzjoni sekondarja se tkun permessa sa' limitu massimu ta’ mhux aktar minn 30 fil-mija tal-kontribuzzjonijiet kapitali aggregati u l-investimenti kapitali mhux mitluba.

Artikolu 6 – Investituri eliġibbli

L-Artikolu 6 jinkludi dispożizzjonijiet dettaljati dwar l-investituri eliġibbli li jinvestu f’fondi li jikkwalifikaw ta' kapital ta’ riskju: skont dan l-Artikolu, il-fondi li jikkwalifikaw jistgħu jkunu kkummerċjalizzati biss lil investituri rikonoxxuti bħala investituri professjonali fid-Direttiva 2004/39/KE. Il-kummerċjalizzazzjoni lil investituri oħra bħal ma huma ċerti individwi ta’ valur għoli hija permessa biss jekk huma jimpenjaw 'biljett' minimu ta’ EUR 100 000 għall-fond u jekk ċerti proċeduri jkunu segwiti mill-maniġer tal-fond sabiex il-maniġer tal-fond ikun assigurat b’mod raġonevoli li dawn l-investituri oħra huma kapaċi jagħmlu d-deċiżjonijiet tal-investiment tagħhom proprju u jifhmu r-riskji involuti.

Artikolu 7 – Regoli tal-imġiba u l-evitar tal-kunflitti ta’ interess

L-Artikolu 7 fih prinċipji ġenerali li jirregolaw l-imġiba ta’ maniġer li jikkwalifika ta' kapital ta’ riskju, notevolment fit-twettiq tal-attivitajiet tiegħu u r-relazzjoni tiegħu mal-investituri.

Artikolu 8 – Kunflitti ta’ interess

L-Artikolu 8 fih regoli għall-immaniġġjar tal-kunflitti ta’ interess mill-maniġer tal-kapital ta’ riskju. Dawn ir-regoli jirrikjedu wkoll lill-maniġer li jkollu l-arranġamenti organizzattivi u amministrattivi meħtieġa fis-seħħ biex jiżgura l-ġestjoni xierqa tal-kunflitti ta’ interess.

Artikolu 9 – Arranġamenti organizzattivi oħra

L-Artikolu 9 jirrikjedi li maniġer ta’ fond ta’ kapital ta’ riskju jżomm riżorsi umani u tekniċi adegwati kif ukoll fondi proprji biżżejjed skont kif meħtieġ għal ġestjoni xierqa tal-fondi li jikkwalifikaw ta' kapital ta’ riskju.

Artikolu 10 – Valutazzjoni

L-Artikolu 10 jindirizza l-valutazzjoni tal-assi tal-fond li jikkwalifika ta' kapital ta’ riskju. Ir-regoli dwar dan għandhom ikunu stabbiliti fid-dokumenti statutorji ta’ kull fond li jikkwalifika ta' kapital ta’ riskju. L-Artikolu 11 – Rapport annwali

L-Artikolu 11 jinkludi regoli dwar ir-rapporti annwali li l-maniġers tal-fond ta’ kapital ta’ riskju jridu jħejju fir-rigward tal-fondi li jikkwalifikaw ta' kapital ta’ riskju li huma jiġġestixxu. Ir-rapport għandu jiddeskrivi l-kompożizzjoni tal-portafoll tal-fond u l-attivitajiet tas-sena li tkun għaddiet.

Artikolu 12 – Żvelar lill-investituri

L-Artikolu 12 jinkludi r-rekwiżiti ewlenin tal-iżvelar li jridu jsiru mill-maniġer tal-fond ta’ kapital ta’ riskju fir-rigward tal-fondi li jikkwalifikaw ta' kapital ta’ riskju. L-aktar importanti hu li dawn ir-rekwiżiti jistabbilixxu l-obbligi tal-iżvelar prekuntrattwali relatati mal-istrateġija u l-objettivi tal-fond li jikkwalifika tal-investiment, l-istrumenti tal-investiment li jintużaw, l-informazzjoni dwar l-ispejjeż u l-imposti assoċjati, u l-profil tar-riskji u l-benefiċċji tal-investiment propost minn fond li jikkwalifika. Dan jinkludi wkoll l-informazzjoni dwar kif hija kkalkulata r-remunerazzjoni tal-maniġer tal-fond ta’ kapital ta’ riskju.

Artikolu 13 – Superviżjoni

L-Artikolu 13: sabiex ikun żgurat li l-awtorità kompetenti tal-Istat Membru ta’ domiċilju se tkun tista’ tissorvelja l-konformità tal-maniġer tal-fond ta’ kapital ta’ riskju mar-rekwiżiti uniformi stabbiliti f’dan ir-Regolament, il-maniġer tal-fond ta’ kapital ta’ riskju għandu jinforma lill-awtorità kompetenti dwar l-intenzjoni tiegħu li jikkummerċjalizza l-fondi li jikkwalifikaw ta' kapital ta’ riskju taħt id-denominazzjoni "Fond Ewropew ta' Kapital ta’ Riskju." Il-maniġer għandu jipprovdi wkoll l-informazzjoni meħtieġa inkluża dik dwar l-arranġamenti li jikkonformaw ma’ dan ir-Regolament u l-fondi li huwa għandu l-intenzjoni li jikkummerċjalizza. Meta l-awtorità kompetenti tkun sodisfatta li l-informazzjoni meħtieġa hija kompluta u li l-arranġamenti huma adattati għall-konformità mar-rekwiżiti stabbiliti f’dan ir-Regolament, hija għandha tirreġistra l-maniġer ta’ fond ta’ kapital ta’ riskju. Din ir-reġistrazzjoni għandha tkun valida fl-Unjoni kollha u tippermetti lill-maniġer ta’ fond ta’ kapital ta’ riskju li jikkummerċjalizza l-fondi li jikkwalifikaw ta' kapital ta’ riskju taħt id-denominazzjoni "Fondi Ewropej ta' Kapital ta’ Riskju".

Artikolu 14 – Aġġornament tal-informazzjoni dwar il-fondi li jikkwalifikaw ta' kapital ta’ riskju

L-Artikolu 14 jinkludi regoli dwar iċ-ċirkustanzi meta l-informazzjoni pprovduta lill-awtorità kompetenti fl-Istat Membru ta’ domiċilju tkun teħtieġ li tiġi aġġornata.

Artikolu 15 – Notifiki transkonfinali

L-Artikolu 15 jiddeskrivi l-proċess tan-notifiki transkonfinali bejn l-awtoritajiet superviżorji kompetenti li huwa skattat mir-reġistrazzjoni tal-maniġer tal-fond ta’ kapital ta’ riskju.

Artikolu 16 – bażi ta' dejta tal-AETS

L-Artikolu 16 jafda l-AETS bil-kompitu li żżomm bażi ta' dejta ċentrali li telenka l-fondi li jikkwalifikaw ta' kapital ta’ riskju kollha li huma rreġistrati fl-Unjoni.

Artikolu 17 – Superviżjoni minn awtorità kompetenti

L-Artikolu 17 jistipula li l-awtorità kompetenti tal-Istat Membru ta’ domiċilju tissorvelja r-rekwiżiti ta’ dan ir-Regolament.

Artikolu 18 – Setgħat superviżorji

L-Artikolu 18 jispeċifika lista ta’ setgħat superviżorji li l-awtoritajiet kompetenti għandhom ikollhom għad-dispożizzjoni tagħhom biex jiżguraw il-konformità mal-kriterji uniformi tar-Regolament.

Artikolu 19 – Sanzjonijiet

L-Artikolu 19 fih dispożizzjonijiet dwar sanzjonijiet biex ikun żgurat infurzar xieraq tar-rekwiżiti ta’ dan ir-Regolament.

Artikolu 20 – Ksur ta’ dispożizzjonijiet ewlenin

L-Artikolu 20 jispeċifika li l-ksur ta’ dispożizzjonijiet ewlenin ta’ dan ir-Regolament bħall-kompożizzjoni tal-portafoll, l-investituri eliġibbli u l-użu tad-denominazzjoni "Fond Ewropew ta' Kapital ta’ Riskju" għandu jkun issanzjonat bil-projbizzjoni tal-użu tad-denominazzjoni u t-tneħħija tal-maniġer tal-fond ta’ kapital ta’ riskju mir-reġistru.

Artikolu 21 – Kooperazzjoni superviżorja

L-Artikolu 21 jinkludi regoli dwar l-iskambju tal-informazzjoni superviżorja bejn l-awtoritajiet kompetenti fl-Istati Membri ta’ domiċilju u ospitanti u l-AETS.

Artikolu 22 – Segretezza professjonali

L-Artikolu 22 jinkludi dispożizzjonijiet dwar il-livell meħtieġ ta’ segretezza professjonali li għandu japplika għall-awtoritajiet nazzjonali rilevanti kollha u għar-Regolatur Ewropew tat-Titoli u s-Swieq (AETS).

Artikolu 23 – Kundizzjonijiet għall-għoti tas-setgħa

L-Artikolu 23 jistabbilixxi l-kundizzjonijiet li taħthom il-Kummissjoni tingħata s-setgħa li tadotta atti ddelegati.

Artikolu 24 - Analiżi

L-Artikolu 24 jinkludi klawsoli rigward l-analiżi tar-Regolament propost u proposti potenzjali tal-Kummissjoni għal modifika ta’ dan tal-aħħar.

4. IMPLIKAZZJONIJIET BAĠITARJI

Ma jinħolqu l-ebda implikazzjonijiet baġitarji.

2011/0417 (COD)

Proposta għal

REGOLAMENT TAL-PARLAMENT EWROPEW U TAL-KUNSILL

dwar Fondi Ewropej ta' Kapital ta' Riskju

(Test b’rilevanza għaż-ŻEE)

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea, u b'mod partikolari l-Artikolu 114 tiegħu,

Wara li kkunsidraw il-proposta tal-Kummissjoni Ewropea,[10]

Wara li ntbagħat l-abbozz tal-att leġiżlattiv lill-Parlamenti nazzjonali,

Wara li kkunsidraw l-opinjoni tal-Bank Ċentrali Ewropew,[11]

Wara li kkunsidraw l-opinjoni tal-Kumitat Ekonomiku u Soċjali Ewropew,[12]

Filwaqt li jaġixxu skont il-proċedura leġiżlattiva ordinarja,

Billi:

(1) Il-kapital ta’ riskju jipprovdi finanzjament lill-impriżi li ġeneralment huma żgħar ħafna, fl-istadji inizjali tal-eżistenza korporattiva tagħhom u li juru potenzjal qawwi għal tkabbir u espansjoni. Barra minn hekk, il-fondi ta’ kapital ta’ riskju jipprovdu lil dawn l-impriżi b’kompetenzi u għarfien prezzjużi, kuntatti tan-negozju, l-ekwità tad-ditti u pariri strateġiċi. Meta jipprovdu finanzjament u pariri lil dawn l-impriżi, il-fondi ta’ kapital ta’ riskju jistimulaw it-tkabbir ekonomiku, jikkontribwixxu għall-ħolqien tal-impjiegi, jagħtu spinta lill-impriżi innovattivi, iżidu l-investiment tagħhom fir-riċerka u l-iżvilupp u jkattru l-intraprenditorija, l-innovazzjoni u l-kompetittività fl-Unjoni.

(2) Huwa meħtieġ li jiġi stabbilit qafas komuni ta’ regoli rigward l-użu tad-denominazzjoni "Fond Ewropew ta' Kapital ta’ Riskju", b’mod partikolari l-kompożizzjoni tal-portafoll tal-fondi li joperaw taħt din id-denominazzjoni, il-miri tal-investiment eliġibbli tagħhom, l-istrumenti ta’ investiment li jistgħu jutilizzaw u l-kategoriji tal-investituri li huma eliġibbli li jinvestu f’fondi bħal dawn b’regoli uniformi fl-Unjoni. Fl-assenza ta’ qafas komuni bħal dan, hemm ir-riskju li l-Istati Membri jwettqu miżuri diverġenti fil-livell nazzjonali li jkollhom impatt negattiv b’mod dirett fuq, u l-ħolqien ta’ ostakli għal, il-funzjonament tajjeb tas-suq intern, minħabba li l-fondi ta’ kapital ta’ riskju li jixtiequ joperaw fl-Unjoni jkunu suġġetti għal regoli differenti fi Stati Membri differenti. Barra minn hekk, rekwiżiti tal-kwalità diverġenti dwar il-kompożizzjoni tal-portafoll, il-miri tal-investiment u l-investituri eliġibbli jistgħu jwasslu għal livelli differenti ta’ protezzjoni tal-investitur u konfużjoni ġenerali rigward il-proposta tal-investiment assoċjata mal-"Fond Ewropew ta' Kapital ta’ Riskju". Barra minn hekk, l-investituri għandhom ikunu jistgħu jqabblu l-proposti tal-investiment ta’ fondi ta’ kapital ta’ riskju differenti. Huwa meħtieġ li jitneħħew ostakli sinifikanti għal żieda fil-fondi transkonfinali mill-fondi ta’ kapital ta’ riskju u li jkunu evitati distorsjonijiet fil-kompetizzjoni bejn dawn il-fondi, u li kwalunkwe ostakli potenzjali oħra għall-kummerċ u distorsjonijiet sinifikanti tal-kompetizzjoni ma jitħallewx jitnisslu fil-ġejjieni. Konsegwentement, il-bażi legali xierqa hija l-Artikolu 114 tat-TFUE, kif interpretat skont il-ġurisprudenza stabbilita tal-Qorti tal-Ġustizzja tal-Unjoni Ewropea.

(3) Huwa meħtieġ li jkun adottat Regolament li jistabbilixxi regoli uniformi applikabbli għall-Fondi Ewropej ta' Kapital ta’ Riskju u jimponi obbligi korrispondenti fuq il-maniġers tagħhom fl-Istati Membri kollha li jixtiequ jżidu l-kapital fl-Unjoni permezz tad-denominazzjoni "Fond Ewropew ta' Kapital ta’ Riskju". Dawn ir-rekwiżiti għandhom jiżguraw il-fiduċja tal-investituri li jixtiequ jinvestu f’fondi ta’ kapital ta’ riskju.

(4) Id-definizzjoni tar-rekwiżiti tal-kwalità għall-użu tad-denominazzjoni "Fond Ewropew ta' Kapital ta’ Riskju" f’forma ta’ Regolament għandha tiżgura li dawk ir-rekwiżiti jkunu applikabbli b’mod dirett għall-maniġers ta’ impriżi ta’ investiment kollettiv li jżidu l-fondi permezz ta’ din id-denominazzjoni. Dan għandu jiżgura kundizzjonijiet uniformi għall-użu ta’ din id-denominazzjoni billi jkunu evitati rekwiżiti nazzjonali diverġenti bħala riżultat tat-traspożizzjoni ta’ Direttiva. Dan ir-Regolament għandu jwassal biex il-maniġers tal-impriżi ta’ investiment kollettiv li jużaw din id-denominazzjoni jkollhom isegwu l-istess regoli fl-Unjoni kollha, u dan għandu jkabbar il-fiduċja tal-investituri li jixtiequ jinvestu fil-fondi ta’ kapital ta’ riskju. Ir-Regolament għandu jnaqqas ukoll il-kumplessità regolatorja u l-ispiża tal-konformità tal-maniġers ma’ regoli nazzjonali ta’ spiss diverġenti li jirregolaw il-fondi ta’ kapital ta’ riskju, speċjalment għal dawk il-maniġers li jixtiequ jżidu l-kapital fuq bażi transkonfinali. Regolament għandu jikkontribwixxi wkoll għall-eliminazzjoni ta’ distorsjonijiet kompetittivi.

(5) Sabiex tkun iċċarata r-relazzjoni bejn dan ir-Regolament u r-regoli dwar l-impriżi ta’ investiment kollettiv u l-maniġers tagħhom, huwa meħtieġ li jkun stabbilit li dan ir-Regolament għandu japplika biss għall-maniġers ta’ impriżi ta’ investiment kollettiv, apparti l-UCITS skont l-Artikolu 1 tad-Direttiva 2009/65/KE tal-Parlament Ewropew u tal-Kunsill tat-13 ta’ Lulju 2009 dwar il-koordinazzjoni ta’ liġijiet, regolamenti u dispożizzjonijiet amministrattivi fir-rigward tal-impriżi ta’ investiment kollettiv f’titoli trasferibbli (UCITS),[13] li huma stabbiliti fl-Unjoni u huma rreġistrati mal-awtorità kompetenti fl-Istat Membru ta’ domiċilju tagħhom skont id-Direttiva 2011/61/KE tal-Parlament Ewropew u tal-Kunsill tat-8 ta’ Ġunju 2011 dwar Maniġers ta’ Fondi ta’ Investiment Alternattivi u li temenda d-Direttivi 2003/41/KE u 2009/65/KE u r-Regolamenti (KE) Nru 1060/2009 u (UE) Nru 1095/2010.[14] Barra minn hekk, dan għandu japplika biss għall-maniġers li jiġġestixxu portafolli ta’ fondi li jikkwalifikaw ta' kapital ta’ riskju li l-assi amministrati tagħhom ma jaqbżux bħala total il-limitu ta’ EUR 500 miljun. Sabiex il-kalkolu ta’ dan il-limitu jsir operattiv, is-setgħa li jkunu adottati atti skont l-Artikolu 290 tat-Trattat dwar il-Funzjonament tal-Unjoni Ewropea għandha tkun iddelegata lill-Kummissjoni fir-rigward tal-ispeċifikazzjoni tal-kalkolu ta’ dan il-livell. Meta teżerċita din is-setgħa, il-Kummissjoni għandha, sabiex tiżgura l-konsistenza fir-regoli dwar l-impriżi ta’ investiment kollettiv, tqis il-miżuri adottati mill-Kummissjoni skont il-punt (a) tal-Artikolu 3(6) tad-Direttiva 2011/61/KE.

(6) Meta l-maniġers tal-impriżi ta’ investiment kollettiv ma jkunux jixtiequ jużaw id-denominazzjoni "Fond Ewropew ta' Kapital ta’ Riskju", dan ir-Regolament m’għandux japplika. F’dawn il-każijiet, għandhom ikomplu japplikaw ir-regoli nazzjonali u r-regoli ġenerali tal-Unjoni eżistenti.

(7) Dan ir-Regolament għandu jistabbilixxi regoli uniformi dwar in-natura tal-fondi li jikkwalifikaw ta' kapital ta’ riskju, notevolment dwar l-impriżi tal-portafoll li fihom il-fondi li jikkwalifikaw tal-kapital ta’ riskju għandhom ikunu permessi jinvestu kif ukolll-istrumenti tal-investiment li għandhom jintużaw. Dan huwa meħtieġ sabiex tkun tista’ tinġibed linja ta’ demarkazzjoni ċara bejn il-fondi li jikkwalifikaw tal-kapital ta’ riskju u fondi ta’ investiment alternattivi oħra li jadottaw strateġiji ta’ investiment oħra anqas speċjalizzati, pereżempju l-ekwità privata.

(8) F’konformità mal-għan li jkunu llimitati b’mod preċiż l-impriżi ta’ investiment kollettiv li se jkunu koperti minn dan ir-Regolament u sabiex ikun żgurat li jkunu ffokati fuq il-provvediment ta’ kapital lill-impriżi żgħar fl-istadji inizjali tal-eżistenza korporattiva tagħhom, id-denominazzjoni "Fond Ewropew ta' Kapital ta’ Riskju" għandha tkun limitata biss għal dawk il-fondi li jiddedikaw mill-inqas 70 fil-mija tal-kontribuzzjonijiet kapitali aggregati u tal-kapital impenjat mhux mitlub tagħhom għall-investimenti f’impriżi bħal dawn f’forma ta’ strumenti ta’ ekwità jew kważi ekwità.

(9) Sabiex tkun stabbilita salvagwardja essenzjali li tiddifferenzja l-fondi li jikkwalifikaw ta' kapital ta’ riskju skont dan ir-Regolament mill-kategorija aktar wiesgħa ta’ fondi ta’ investiment alternattivi li jikkummerċjalizzaw f’titoli maħruġa fi swieq sekondarji, huwa neċessarju li l-fondi li jikkwalifikaw ta' kapital ta’ riskju jkunu limitati li jagħmlu biss investimenti fi strumenti maħruġa b’mod dirett.

(10) Sabiex il-maniġers tal-fondi ta’ kapital ta’ riskju jkollhom ċertu grad ta’ flessibilità fl-investiment u l-ġestjoni tal-likwidità tal-fondi li jikkwalifikaw ta' kapital ta’ riskju tagħhom, għandha tkun permessa l-kummerċjalizzazzjoni sekondarja sa limitu massimu li ma jaqbiżx it-30 fil-mija tal-kontribuzzjonijiet kapitali aggregati u l-investimenti kapitali mhux mitluba. Parteċipazzjoni (holding) fuq medda ta’ żmien fil-qosor fi flus jew l-ekwivalenti ta’ flus m’għandhomx jitqiesu fil-kalkolu ta’ dan il-limitu.

(11) Sabiex ikun żgurat li d-denominazzjoni "Fond Ewropew ta' Kapital ta’ Riskju" tkun affidabbli u faċilment rikonoxxuta mill-investituri fl-Unjoni, dan ir-Regolament għandu jistabbilixxi li huma biss il-maniġers tal-fondi ta’ kapital ta’ riskju li jikkonformaw mal-kriterji ta’ kwalità uniformi kif stabbiliti f’dan ir-Regolament li għandhom ikunu eliġibbli biex jużaw id-denominazzjoni "Fond Ewropew ta' Kapital ta’ Riskju" meta jikkummerċjalizzaw il-fondi li jikkwalifikaw ta' kapital ta’ riskju fl-Unjoni.

(12) Sabiex ikun żgurat li fondi li jikkwalifikaw ta' kapital ta’ riskju jkollhom profil distint u identifikabbli li huwa adattat għall-finijiet tagħhom, għandu jkun hemm regoli uniformi dwar il-kompożizzjoni tal-portafoll u dwar it-tekniki tal-investiment li huma permessi għal fondi li jikkwalifikaw bħal dawn.

(13) Sabiex ikun żgurat li l-fondi li jikkwalifikaw ta' kapital ta’ riskju ma jikkontribwixxux għall-iżvilupp ta’ riskji sistemiċi, u sabiex ikun żgurat li, fl-attivitajiet tal-investiment tagħhom, fondi bħal dawn jikkonċentraw fuq l-appoġġ għal kumpaniji li jikkwalifikaw tal-portafoll, m’għandux ikun permess is-self jew l-azzjoni ta’ lieva finanzjarja fil-livell tal-fond. Madankollu, sabiex il-fond ikun permess ikopri l-ħtiġijiet ta’ likwidità straordinarji li jistgħu jfeġġu bejn is-sejħa ta’ kapital kommess mill-investituri u l-wasla attwali tal-kapital fil-kontijiet tiegħu, għandu jkun permess is-self fuq medda ta’ żmien fil-qosor .

(14) Sabiex ikun żgurat li l-fondi li jikkwalifikaw ta' kapital ta’ riskju huma kkummerċjalizzati lil investituri li għandhom it-tagħrif, l-esperjenza u l-kapaċità li jimmaniġġjaw r-riskji li dawn il-fondi jkollhom, u sabiex tinżamm il-fiduċja tal-investituri fil-fondi li jikkwalifikaw ta' kapital ta’ riskju, iridu jkunu stabbiliti ċerti salvagwardji. Għaldaqstant, il-fondi li jikkwalifikaw ta' kapital ta’ riskju għandhom b’mod ġenerali jkunu kkummerċjalizzati biss lil investituri li huma klijenti professjonali jew li jistgħu jkunu ttrattati bħala klijenti professjonali skont id-Direttiva 2004/39/KE tal-Parlament Ewropew u tal-Kunsill tal-21 ta’ April 2004 dwar is-swieq fl-istrumenti finanzjarji li temenda d-Direttivi tal-Kunsill 85/611/KEE u 93/6/KEE u d-Direttiva 2000/12/KE tal-Parlament Ewropew u tal-Kunsill u li tħassar id-Direttiva tal-Kunsill 93/22/KEE.[15] Din il-kategorija tinkludi l-maniġers tal-fondi ta’ kapital ta’ riskju li huma stess jinvestu f’fondi ta’ kapital ta’ riskju. Madankollu, sabiex ikun hemm bażi tal-investituri wiesgħa biżżejjed għall-investiment fil-fondi ta’ kapital ta’ riskju huwa mixtieq ukoll li ċerti investituri oħra jkollhom aċċess għall-fondi li jikkwalifikaw ta' kapital ta’ riskju, inklużi l-individwi ta’ valur għoli. Għal dawk l-investituri l-oħra, madankollu, għandhom ikunu stabbiliti salvagwardji speċifiċi sabiex ikun żgurat li l-fondi li jikkwalifikaw ta' kapital ta’ riskju huma kkummerċjalizzati biss lil dawk l-investituri li għandhom il-profil adattat biex jagħmlu tali investimenti. Dawn is-salvagwardji jeskludu l-kummerċjalizzazzjoni permezz ta’ pjanijiet ta’ tfaddil perjodiku.

(15) Sabiex ikun żgurat li d-denominazzjoni "Fond Ewropew ta' Kapital ta’ Riskju" tintuża biss minn maniġers tal-fondi ta’ kapital ta’ riskju, li jissodisfaw il-kriterji tal-kwalità uniformi fir-rigward tal-imġiba tagħhom fis-suq, dan ir-Regolament għandu jistabbilixxi regoli dwar it-twettiq tan-negozju u r-relazzjoni tal-maniġer tal-fond ta’ kapital ta’ riskju mal-investituri tiegħu. Għall-istess raġuni, dan ir-Regolament għandu jistabbilixxi kundizzjonijiet uniformi fir-rigward tal-immaniġġjar tal-kunflitti ta’ interess minn maniġers bħal dawn. Dawn ir-regoli għandhom ukoll jirrikjedu li l-maniġer ikollu l-arranġamenti organizzattivi u amministrattivi meħtieġa fis-seħħ biex ikun żgurat li jista’ jimmaniġġja kif jixraq il-kunflitti ta’ interess.

(16) Sabiex tkun żgurata l-integrità tad-denominazzjoni "Fond Ewropew ta' Kapital ta’ Riskju" dan ir-Regolament għandu jinkludi ukoll kriterji ta’ kwalità fir-rigward tal-organizzazzjoni tal-maniġer tal-fond ta’ kapital ta’ riskju. Għaldaqstant, dan ir-Regolament għandu jistabbilixxi rekwiżiti uniformi u proporzjonati għall-ħtieġa li jinżammu riżorsi tekniċi u umani adegwati kif ukoll fondi proprji suffiċjenti għall-ġestjoni kif jixraq tal-fondi li jikkwalifikaw ta' kapital ta’ riskju.

(17) Għall-fini tal-protezzjoni tal-investitur huwa meħtieġ li jkun żgurat li l-assi tal-fond li jikkwalifika ta' kapital ta’ riskju jiġu evalwati kif jixraq. Għaldaqstant, id-dokumenti statutorji tal-fondi li jikkwalifikaw ta' kapital ta’ riskju għandu jkun fihom regoli dwar il-valutazzjoni tal-assi. Dan għandu jiżgura l-integrità u t-trasparenza tal-valutazzjoni.

(18) Sabiex ikun żgurat li l-maniġers tal-fondi ta’ kapital ta’ riskju li jużaw id-denominazzjoni "Fondi Ewropej ta' Kapital ta’ Riskju" jagħtu rendikont suffiċjenti tal-attivitajiet tagħhom, għandhom ikunu stabbiliti regoli uniformi rigward ir-rapporti annwali.

(19) Sabiex tkun żgurata l-integrità tad-denominazzjoni "Fond Ewropew ta' Kapital ta’ Riskju" f’għajnejn l-investituri, huwa meħtieġ li din tintuża biss minn maniġers tal-fondi ta’ kapital ta’ riskju li huma trasparenti b’mod sħiħ fir-rigward tal-politika tal-investiment tagħhom u l-miri tal-investiment tagħhom. Għaldaqstant, dan ir-Regolament għandu jistabbilixxi regoli uniformi dwar ir-rekwiżiti tal-iżvelar li għandu jagħmel maniġer tal-fond ta’ kapital ta’ riskju fir-rigward tal-investituri tiegħu. B’mod partikolari, għandu jkun hemm obbligi ta’ żvelar prekuntrattwali relatati mal-istrateġija tal-investiment u l-objettivi tal-fondi li jikkwalifikaw ta' kapital ta’ riskju, l-istrumenti tal-investiment li jintużaw, l-informazzjoni dwar l-ispejjeż u l-imposti assoċjati, u l-profil tar-riskji u l-benefiċċji tal-investiment propost minn fond li jikkwalifika. Bil-għan li jinkiseb grad għoli ta’ trasparenza, rekwiżiti ta’ żvelar bħal dawn għandhom jinkludu wkoll l-informazzjoni dwar kif hija kkalkulata r-remunerazzjoni tal-maniġer tal-fond ta’ kapital ta’ riskju.

(20) Sabiex tkun żgurata superviżjoni effettiva tar-rekwiżiti uniformi li fih dan ir-Regolament, l-awtorità kompetenti tal-Istat Membru ta’ domiċilju għandha tissorvelja l-konformità tal-maniġer tal-fond ta’ kapital ta’ riskju mar-rekwiżiti uniformi stabbiliti f’dan ir-Regolament. Għal dan il-għan, il-maniġer tal-kapital li jikkwalifika tar-riskju li jixtieq jikkummerċjalizza l-fondi li jikkwalifikaw tiegħu taħt id-denominazzjoni "Fond Ewropew ta' Kapital ta’ Riskju" għandu jinforma lill-awtorità kompetenti tal-Istat Membru ta’ domiċilju tiegħu dwar din l-intenzjoni. L-awtorità kompetenti għandha tirreġistra lill-maniġer tal-fond ta’ kapital ta’ riskju jekk tkun ġiet ipprovduta l-informazzjoni kollha meħtieġa u jekk hemm fis-seħħ arranġamenti xierqa għal konformità mar-rekwiżiti ta’ dan ir-Regolament. Din ir-reġistrazzjoni għandha tkun valida fl-Unjoni kollha.

(21) Sabiex tkun żgurata superviżjoni effettiva tal-konformità mal-kriterji uniformi stabbiliti f’dan ir-Regolament, dan ir-Regolament għandu jinkludi regoli dwar iċ-ċirkustanzi fejn ikun meħtieġ li l-informazzjoni pprovduta lill-awtorità kompetenti fl-Istat Membru ta’ domiċilju tiġi aġġornata.

(22) Biex ikun hemm superviżjoni effettiva tar-rekwiżiti ta’ dan ir-Regolament, dan ir-Regolament għandu jistabbilixxi wkoll proċess għan-notifiki transkonfinali bejn l-awtoritajiet kompetenti superviżorji, li jiskatta mar-reġistrazzjoni tal-maniġer tal-fond ta’ kapital ta’ riskju fl-Istat Membru ta’ domiċilju tiegħu.

(23) Sabiex jinżammu kundizzjonijiet trasparenti għall-kummerċjalizzazzjoni ta’ fondi li jikkwalifikaw ta' kapital ta’ riskju fl-Unjoni, l-Awtorità Ewropea tat-Titoli u s-Swieq (AETS) għandha tkun fdata biż-żamma ta’ bażi ta' dejta ċentrali li telenka l-fondi li jikkwalifikaw ta' kapital ta’ riskju kollha li huma rreġistrati skont dan ir-Regolament.

(24) Sabiex tkun żgurata s-superviżjoni effettiva tal-kriterji uniformi stabbiliti f’dan ir-Regolament, dan ir-Regolament għandu jinkludi lista tas-setgħat superviżorji li l-awtoritajiet kompetenti għandhom ikollhom għad-dispożizzjoni tagħhom.

(25) Sabiex ikun żgurat infurzar kif jixraq, dan ir-Regolament għandu jinkludi sanzjonijiet għall-ksur ta' dispożizzjonijiet ewlenin ta’ dan ir-Regolament, li huma r-regoli dwar il-kompożizzjoni tal-portafoll, dwar is-salvagwardji relatati mal-identità tal-investituri eliġibbli, u dwar l-użu tad-denominazzjoni "Fond Ewropew ta' Kapital ta’ Riskju" biss minn maniġers tal-fondi ta’ kapital ta’ riskju rreġistrati. Għandu jkun stabbilit li l-ksur ta’ dawn id-dispożizzjonijiet ewlenin iwassal għal projbizzjoni tal-użu tad-denominazzjoni u t-tneħħija tal-maniġer tal-fond ta’ kapital ta’ riskju mir-reġistru.

(26) L-informazzjoni superviżorja għandha tkun skambjata bejn l-awtoritajiet kompetenti fl-Istati Membri ta’ domiċilju u ospitanti u l-AETS.

(27) Kooperazzjoni regolatorja effettiva fost l-entitajiet inkarigati bis-sorveljanza tal-konformità mal-kriterji uniformi stabbiliti f’dan ir-Regolament tirrikjedi li għandu jkun applikat livell għoli ta’ segretezza professjonali lill-awtoritajiet nazzjonali rilevanti kollha u l-AETS.

(28) L-istandards tekniċi fis-servizzi finanzjarji għandhom jiżguraw armonizzazzjoni konsistenti u livell għoli ta’ sorveljanza fl-Unjoni kollha. Bħala korp b’kompetenza speċjalizzata ħafna, ikun effiċjenti u xieraq li l-AETS tkun fdata bl-elaborazzjoni ta’ abbozz ta’ standards tekniċi ta’ implimentazzjoni meta dawn ma jinvolvux għażliet politiċi, biex ikun sottomess lill-Kummissjoni.

(29) Il-Kummissjoni għandha tingħata s-setgħa li tadotta standards tekniċi ta’ implimentazzjoni permezz ta’ atti ta’ implimentazzjoni skont l-Artikolu 291 tat-Trattat dwar il-Funzjonament tal-Unjoni Ewropea u f’konformità mal-Artikolu 15 tar-Regolament (UE) Nru 1095/2010 tal-Parlament Ewropew u tal-Kunsill tal- 24 ta’ Novembru 2010 li jistabbilixxi Awtorità Superviżorja Ewropea (Awtorità Ewropea tat-Titoli u s-Swieq) u li jemenda d-Deċiżjoni Nru 716/2009/KE u jħassar id-Deċiżjoni tal-Kummissjoni 2009/77/KE.[16] L-AETS għandha tkun fdata bl-abbozz tal-istandards tekniċi ta’ implimentazzjoni għall-format u l-metodu tal-proċedura tan-notifika fl-Artikolu 15.

(30) Sabiex ikunu speċifikati r-rekwiżiti stabbiliti f’dan ir-Regolament, is-setgħa li jkunu adottati atti skont l-Artikolu 290 tat-Trattat dwar il-Funzjonament tal-Unjoni Ewropea għandha tkun iddelegata lill-Kummissjoni fir-rigward tal-ispeċifikazzjoni tal-metodi li jridu jintużaw għall-kalkolu u l-monitoraġġ tal-livell imsemmi f’dan ir-Regolament, u l-ispeċifikazzjoni tat-tipi ta’ kunflitt ta’ interess li jeħtieġ li jkunu evitati mill-maniġers tal-fondi ta’ kapital ta’ riskju u l-passi li jridu jittieħdu f’dak ir-rigward. Hija ta’ importanza partikolari li l-Kummissjoni twettaq konsultazzjonijiet xierqa matul ix-xogħol ta’ tħejjija tagħha, inkluż fil-livell tal-esperti.

(31) Il-Kummissjoni, meta tħejji u tfassal l-atti ddelegati, għandha tiżgura t-trażmissjoni simultanja, f’waqtha u adattata tad-dokumenti rilevanti lill-Parlament Ewropew u l-Kunsill.

(32) Mill-inqas erba’ snin wara d-data li fiha dan ir-Regolament isir applikabbli għandha titwettaq analiżi ta’ dan ir-Regolament sabiex jitqies l-iżvilupp tas-suq tal-kapital ta’ riskju. Fuq il-bażi tal-analiżi, il-Kummissjoni għandha tissottometti rapport lill-Parlament Ewropew u l-Kunsill akkumpanjat, jekk ikun xieraq, minn bidliet leġiżlattivi.

(33) Dan ir-Regolament jirrispetta d-drittijiet fundamentali u josserva l-prinċipji rikonoxxuti b’mod partikolari mill-Karta tad-Drittijiet Fundamentali tal-Unjoni Ewropea, inkluż id-dritt għar-rispett lejn il-ħajja privata u tal-familja (Artikolu 7) u l-libertà tat-twettiq ta’ negozju (Artikolu 16).

(34) Id-Direttiva 95/46 tal-Parlament Ewropew u tal-Kunsill tal-24 ta’ Ottubru 1995 dwar il-protezzjoni ta’ individwi fir-rigward tal-ipproċessar ta’ dejta personali u dwar il-moviment liberu ta’ dik id-dejta[17] tirregola l-ipproċessar tad-dejta personali mwettaq fl-Istati Membri fil-kuntest ta’ dan ir-Regolament u taħt is-superviżjoni tal-awtoritajiet kompetenti tal-Istati Membri, b’mod partikolari l-awtoritajiet pubbliċi indipendenti maħtura mill-Istati Membri. Ir-Regolament (UE) Nru 45/2001 tal-Parlament Ewropew u tal-Kunsill tat-18 ta’ Diċembru 2000 dwar il-protezzjoni ta' individwu[i] fir-rigward tal-ipproċessar ta' data [dejta] personali mill-istituzzjonijiet u l-korpi tal-Komunità u dwar il-movement liberu ta' dak id-data [dejta] ,[18] jirregola l-ipproċessar tad-dejta personali mwettaq mill-AETS fi ħdan il-qafas ta’ dan ir-Regolament u taħt is-superviżjoni tal-Kontrollur Ewropew għall-Protezzjoni tad-Dejta .

(35) Dan ir-Regolament għandu jkun mingħajr preġudizzju għall-applikazzjoni tar-regoli tal-għajnuna mill-istat lill-fondi li jikkwalifikaw ta' kapital ta’ riskju.

(36) L-objettiv ta’ dan ir-Regolament, notevolment biex jiżgura li rekwiżiti uniformi japplikaw għall-kummerċjalizzazzjoni tal-fondi li jikkwalifikaw ta' kapital ta’ riskju, ma jistax jintlaħaq biżżejjed mill-Istati Membri. Għaldaqstant, l-Unjoni tista’ tadotta miżuri, f’konformità mal-prinċipju tas-sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju tal-proporzjonalità, kif stabbilit f’dak l-Artikolu, dan ir-Regolament jipprovdi għal sistema ta’ reġistrazzjoni sempliċi għall-maniġers tal-fondi ta’ kapital ta’ riskju, u b’hekk iqis b’mod sħiħ il-ħtieġa li jkun hemm bilanċ bejn is-sigurtà u l-affidabbiltà assoċjati mal-użu tad-denominazzjoni "Fond Ewropew ta' Kapital ta’ Riskju" u l-operat effiċjenti tas-suq tal-kapital ta’ riskju kif ukoll l-ispiża għall-partijiet interessati differenti tiegħu. Biex jagħmel dan, dan ir-Regolament ma jmurx lil hinn minn dak li hu meħtieġ sabiex jinkiseb dak l-objettiv,

ADOTTAW DAN IR-REGOLAMENT:

KAPITOLU I SUĠĠETT, KAMP TA' APPLIKAZZJONI U DEFINIZZJONIJIET

Artikolu 1

Dan ir-Regolament jistabbilixxi rekwiżiti uniformi għal dawk il-maniġers ta’ impriżi ta’ investiment kollettiv li jixtiequ jużaw id-denominazzjoni "Fond Ewropew ta' Kapital ta’ Riskju" u l-kundizzjonijiet għall-kummerċjalizzazzjoni tal-impriżi ta’ investiment kollettiv taħt din id-denominazzjoni fl-Unjoni, u b’hekk jikkontribwixxi għal-funzjonament effiċjenti tas-suq intern. Dan jistabbilixxi regoli uniformi għall-kummerċjalizzazzjoni tal-fondi li jikkwalifikaw ta' kapital ta’ riskju lill-investituri eliġibbli fl-Unjoni, għall-kompożizzjoni tal-portafoll ta’ fondi li jikkwalifikaw ta' kapital ta’ riskju, għall-istrumenti tal-investiment eliġibbli u t-tekniki li jridu jintużaw mill-fondi li jikkwalifikaw ta' kapital ta’ riskju kif ukoll għall-organizzazzjoni, l-imġiba u t-trasparenza tal-maniġers tal-fondi ta’ kapital ta’ riskju li jikkummerċjalizzaw il-fondi li jikkwalifikaw ta' kapital ta’ riskju fl-Unjoni.

Artikolu 2

1. Dan ir-Regolament japplika għall-maniġers tal-impriżi ta’ investiment kollettiv kif iddefiniti fil-punt (b) tal-Artikolu 3 li huma stabbiliti fl-Unjoni u huma suġġetti għal reġistrazzjoni mal-awtoritajiet kompetenti tal-Istat Membru ta’ domiċilju tagħhom skont il-punt (a) tal-Artikolu 3 (3) tad-Direttiva 2011/61/KE, sakemm dawk il-maniġers jiġġestixxu portafolli ta’ fondi li jikkwalifikaw ta' kapital ta’ riskju, li l-assi ġestiti tagħhom b’kollox ma jaqbżux il-limitu ta’ EUR 500 miljun jew, fl-Istati Membri fejn l-euro mhijiex il-munita uffiċjali, il-valur korrispondenti fil-munita nazzjonali fid-data tad-dħul fis-seħħ ta’ dan ir-Regolament.

2. Biex jikkalkulaw il-limitu msemmi fil-paragrafu 1 il-maniġers tal-impriżi ta’ investiment kollettiv li jiġġestixxu fondi li mhumiex fondi li jikkwalifikaw ta' kapital ta’ riskju mhux se jkollhom ħtieġa li jiġbru flimkien l-assi ġestiti f’dawk il-fondi l-oħra.

3. Il-Kummissjoni għandha tingħata s-setgħa li tadotta atti ddelegati skont l-Artikolu 23 u tispeċifika l-metodi għall-kalkolu tal-limitu msemmi fil-paragrafu 1 ta’ dan l-Artikolu u għall-monitoraġġ tal-konformità ma’ dan il-limitu fuq bażi kontinwa.

Artikolu 3

Għall-finijiet ta’ dan ir-Regolament, għandhom japplikaw id-definizzjonijiet li ġejjin:

(a) 'fond li jikkwalifika ta' kapital ta’ riskju' tfisser impriża tal-investiment kollettiv li tinvesti mill-inqas 70 fil-mija tal-kontribuzzjonijiet kapitali aggregati u l-kapital kommess mhux mitlub tagħha f’assi li huma investimenti li jikkwalifikaw;

(b) 'impriża ta’ investiment kollettiv' tfisser impriża li żżid il-kapital minn għadd ta’ investituri bil-għan li tinvestieh skont politika tal-investiment iddefinita għall-benefiċċju ta’ dawk l-investituri u li ma tirrikjedix l-awtorizzazzjoni skont l-Artikolu 5 tad-Direttiva 2009/65/KE;

(c) 'investimenti li jikkwalifikaw' tfisser strumenti ta’ ekwità jew kważi ekwità li huma

(i)      maħruġa minn impriża li tikkwalifika fil-portafoll u akkwistata direttament mill-fond li jikkwalifika ta' kapital ta’ riskju mill-impriża li tikkwalifika fil-portafoll, jew

(ii)      maħruġa minn impriża li tikkwalifika fil-portafoll fi skambju għal titolu ta’ ekwità maħruġ mill-impriża li tikkwalifika fil-portafoll, jew

(iii)     maħruġa minn impriża li tagħha l-impriża li tikkwalifika fil-portafoll hija sussidjarja b’sehem azzjonarju maġġoritarju u li hija akkwistata mill-fond li jikkwalifika ta' kapital ta’ riskju fi skambju għal strument ta’ ekwità maħruġ mill-impriża li jikkwalifika fil-portafoll;

(d) 'impriża li tikkwalifika fil-portafoll' tfisser impriża li, meta jsir investiment mill-fond li jikkwalifika ta' kapital ta’ riskju, mhijiex elenkata f’suq irregolat kif iddefinit fil-punt (14) tal-Artikolu 4 (1) tad-Direttiva 2004/39/KE li timpjega inqas minn 250 persuna, u li jew għandha dħul annwali li ma jaqbiżx EUR 50 miljun, jew għandha total fil-karta tal-bilanċ annwali li ma jaqbiżx EUR 43 miljun, u li hija nnifisha mhijiex impriża ta’ investiment kollettiv;

(e) 'ekwità' tfisser interess azzjonarju f’impriża, irrappreżentat mill-ishma jew forma oħra ta’ parteċipazzjoni fil-kapital tal-impriża li tikkwalifika fil-portafoll, maħruġa lill-investituri;

(f) 'kważi ekwità' tfisser kwalunkwe strument, li l-qligħ tiegħu huwa l-aktar ibbażat fuq il-qligħ jew it-telf tal-impriża li tikkwalifika fil-portafoll u li huwa skopert fil-każ ta’ falliment;

(g) 'kummerċjalizzazzjoni' tfisser l-offerta jew l-allokazzjoni diretta jew indiretta fuq inizjattiva tal-maniġer tal-fond ta’ kapital ta’ riskju jew f’isem il-maniġer tal-fond ta’ kapital ta’ riskju ta’ unitajiet jew ishma ta’ fond ta’ kapital ta’ riskju li jiġġestixxi lil jew mal-investituri ddomiċiljati jew b’uffiċċju rreġistrat fl-Unjoni;

(h) 'kapital impenjat' tfisser kwalunkwe impenn li minħabba fih persuna tkun obbligata takkwista interess fil-fond ta’ kapital ta’ riskju jew tagħmel kontribuzzjonijiet kapitali lill-fond ta’ kapital ta’ riskju;

(i) 'maniġer tal-fond ta’ kapital ta’ riskju' tfisser persuna ġuridika li n-negozju regolari tagħha jiġġestixxi mill-inqas fond wieħed li jikkwalifika ta’ kapital ta’ riskju;

(j) 'l-Istat Membru ta’ domiċilju ' tfisser Stat Membru fejn il-maniġer tal-fond ta’ kapital ta’ riskju huwa stabbilit jew għandu l-uffiċċju rreġistrat tiegħu;

(k) 'Stat Membru ospitanti' tfisser Stat Membru, li ma jkunx l-Istat Membru ta’ domiċilju, fejn il-maniġer tal-fond ta’ kapital ta’ riskju jikkummerċjalizza l-fondi li jikkwalifikaw ta' kapital ta’ riskju skont dan ir-Regolament;

(l) 'awtorità kompetenti' tfisser l-awtorità nazzjonali li jaħtar l-Istat Membru ta’ domiċilju, bil-liġi jew b’regolament, biex twettaq ir-reġistrazzjoni tal-maniġers tal-impriżi ta’ investiment kollettiv kif imsemmija fil-paragrafu (1) tal-Artikolu 2.

KAPITOLU II KUNDIZZJONIJIET GĦALL-UŻU TAD-DENOMINAZZJONI "FOND EWROPEW TA' KAPITAL TA’ RISKJU"

Artikolu 4

Il-maniġers tal-fondi ta’ kapital ta’ riskju li jikkonformaw mar-rekwiżiti stabbiliti f’dan il-Kapitolu għandhom ikunu intitolati li jużaw id-denominazzjoni "Fond Ewropew ta' Kapital ta’ Riskju" fir-rigward tal-kummerċjalizzazzjoni tal-fondi li jikkwalifikaw ta' kapital ta’ riskju fl-Unjoni.

Artikolu 5

1. Il-maniġer tal-fondi ta’ kapital ta’ riskju għandu jiżgura li, meta jakkwista l-assi, għajr l-investimenti li jikkwalifikaw, mhux aktar minn 30 fil-mija tal-kontribuzzjonijiet kapitali aggregati u l-kapital kommess mhux mitlub jintużaw għall-akkwist ta’ assi, għajr l-investimenti li jikkwalifikaw; parteċipazzjoni fuq medda ta’ żmien fil-qosor fi flus jew l-ekwivalenti ta’ flus m’għandhomx jitqiesu biex jiġi kkalkulat dan il-limitu.

2. Il-maniġer tal-fond ta’ kapital ta’ riskju m’għandux jissellef, joħroġ obbligi ta’ dejn, jipprovdi garanziji, fil-livell tal-fond li jikkwalifika ta' kapital ta’ riskju, u lanqas juża, fil-livell tal-fond li jikkwalifika ta' kapital ta’ riskju xi metodu li bih tiżdied l-iskopertura tal-fond, kemm jekk permezz ta’ self ta’ flus jew titoli, involviment f’pożizzjonijiet derivattivi jew bi kwalunkwe mezz ieħor.

3. Il-projbizzjoni stabbilita fil-paragrafu 2 m’għandhiex tapplika għas-self għal terminu li ma jiġġeddidx ta’ mhux aktar minn 120 jum kalendarju biex tkun ipprovduta likwidità bejn is-sejħa għall-kapital kommess u l-wasla tiegħu mingħand l-investituri.

Artikolu 6

Il-maniġers tal-fondi ta’ kapital ta’ riskju għandhom jikkummerċjalizzaw l-unitajiet u l-ishma tal-fondi li jikkwalifikaw ta' kapital ta’ riskju esklużivament lil investituri li jitqiesu li huma klijenti professjonali skont it-Taqsima I tal-Anness II tad-Direttiva 2004/39/KE jew jistgħu, meta jintalab hekk, ikunu ttrattati bħala klijenti professjonali skont it-Taqsima II tal-Anness II tad-Direttiva 2004/39/KE, jew lil investituri oħra meta:

(a) dawk l-investituri l-oħra jimpenjaw li jinvestu minimu ta’ EUR 100.000;

(b) dawk l-investituri l-oħra jiddikjaraw bil-miktub, f’dokument separat mill-kuntratt li jrid jiġi konkluż għall-impenn li jinvestu, li huma mgħarrfa rigward ir-riskji assoċjati mal-impenn jew l-investiment previst;

(c) il-maniġer tal-fond ta’ kapital ta’ riskju jwettaq valutazzjoni tal-għarfien espert, l-esperjenza u l-għarfien tal-investitur, mingħar ma jippreżumi li l-investitur għandu t-tagħrif u l-esperjenza dwar is-suq ta’ dawk elenkati fit-Taqsima I tal-Anness II tad-Direttiva 2004/39/KE;

(d) il-maniġer tal-fond ta’ kapital ta’ riskju jkun żgurat b’mod raġonevoli, fid-dawl tan-natura tal-impenn jew l-investiment previst, li l-investitur huwa kapaċi jieħu d-deċiżjonijiet tiegħu stess fir-rigward tal-investiment u jifhem ir-riskji involuti u li impenn ta’ dan it-tip huwa xieraq għal investitur bħal dan;

(e) il-maniġer tal-fond ta’ kapital ta’ riskju jikkonferma bil-miktub li huwa wettaq il-valutazzjoni msemmija fil-punt (c) u li l-kundizzjonijiet stabbiliti fil-punt (d) huma sodisfatti.

Artikolu 7

Il-maniġers tal-fondi ta’ kapital ta’ riskju għandhom, fir-rigward tal-fondi li jikkwalifikaw ta' kapital ta’ riskju li huma jiġġestixxu:

(a) jaġixxu b’ħila, reqqa u kawtela xierqa fit-twettiq tal-attivitajiet tagħhom;

(b) japplikaw politiki u proċeduri xierqa biex ikunu evitati abbużi li raġonevolment jistgħu jkunu mistennija jaffettwaw l-interessi tal-investituri u l-impriżi li jikkwalifikaw fil-portafoll;

(c) iwettqu l-attivitajiet tan-negozju tagħhom b’mod li jippromwovu l-aħjar interessi tal-fondi li jikkwalifikaw ta' kapital ta’ riskju li huma jiġġestixxu, l-investituri f’dawk il-fondi li jikkwalifikaw ta' kapital ta’ riskju li huma jiġġestixxu u l-integrità tas-suq;

(d) japplikaw livell għoli ta’ kawtela fl-għażla u l-monitoraġġ kontinwu tal-investimenti fl-impriżi li jikkwalifikaw fil-portafoll;

(e) ikollhom għarfien u fehim xierqa rigward l-impriżi li jikkwalifikaw fil-portafoll li fih jinvestu.

Artikolu 8

1. Il-maniġers tal-fondi ta’ kapital ta’ riskju għandhom jidentifikaw u jevitaw il-kunflitti ta’ interess u, meta dawn ma jistgħux ikunu evitati, jiġġestixxu u jimmonitorjaw u, skont il-paragrafu 4, jiżvelaw, dawk il-kunflitti ta’ interess sabiex ma jitħallewx jaffettwaw ħażin l-interessi tal-fondi li jikkwalifikaw ta' kapital ta’ riskju u l-investituri tagħhom u biex jiżguraw li l-fondi li jikkwalifikaw ta' kapital ta’ riskju li huma jiġġestixxu jiġu ttrattati b’mod ġust;

2. Il-maniġer tal-fond ta’ kapital ta’ riskju għandu jidentifika b’mod partikolari dawk il-kunflitti ta’ interess li jistgħu jitnisslu bejn:

(a) il-maniġers tal-fondi ta’ kapital ta’ riskju, dawk il-persuni li effettivament iwettqu n-negozju tal-maniġer tal-fond ta’ kapital ta’ riskju, l-impjegati jew kwalunkwe persuna li direttament jew indirettament jikkontrollaw jew huma kkontrollati mill-maniġer tal-fond ta’ kapital ta’ riskju, u l-fond li jikkwalifika ta' kapital ta’ riskju ġestit mill-maniġers tal-fondi ta’ kapital ta’ riskju jew l-investituri f’dawk il-fondi li jikkwalifikaw ta' kapital ta’ riskju;

(b) il-fond li jikkwalifika ta' kapital ta’ riskju jew l-investituri f’dak il-fond li jikkwalifika ta' kapital ta’ riskju, u fond li jikkwalifika ta' kapital ta’ riskju ieħor ġestit mill-istess maniġer tal-fond ta’ kapital ta’ riskju jew l-investituri f’dak il-fond li jikkwalifika ta' kapital ta’ riskju l-ieħor.

3. Il-maniġers tal-fondi ta’ kapital ta’ riskju għandhom iżommu u joperaw arranġamenti organizzattivi u amministrattivi effettivi sabiex jikkonformaw mar-rekwiżiti stabbiliti fil-paragrafi 1 u 2.

4. Għandhom jiġu żvelati kunflitti ta’ interess kif imsemmi fil-paragrafu 1, meta l-arranġamenti organizzattivi magħmula mill-maniġer tal-fond ta’ kapital ta’ riskju biex jidentifika, jevita, jiġġestixxi u jimmonitorja l-kunflitti ta’ interess ma jkunux biżżejjed biex jiżguraw, b’fiduċja raġonevoli, li riskji ta’ ħsara għall-interessi tal-investituri se jkunu evitati. Il-maniġers tal-fondi ta’ kapital ta’ riskju għandhom jiżvelaw b’mod ċar in-natura jew is-sorsi tal-kunflitti ta’ interess lill-investituri qabel iwettqu n-negozju f’isimhom.

5. Il-Kummissjoni għandha tkun tista’ tadotta atti ddelegati skont il-miżuri tal-Artikolu 23 u tispeċifika:

(a) it-tipi ta’ kunflitti ta’ interess kif imsemmija fil-paragrafu 2 ta’ dan l-Artikolu;

(b) il-passi li l-maniġers tal-fondi ta’ kapital ta’ riskju mistennija jwettqu, f’termini tal-istrutturi u l-proċeduri organizzattivi u amministrattivi sabiex jidentifikaw, jevitaw, jiġġestixxu, jimmonitorjaw u jiżvelaw il-kunflitti ta’ interess.

Artikolu 9

Fi kwalunkwe ħin, il-maniġers tal-fondi ta’ kapital ta’ riskju għandu jkollhom biżżejjed fondi tagħhom stess u jużaw riżorsi umani u tekniċi adegwati u adattati kif ikun meħtieġ għall-ġestjoni xierqa tal-fondi li jikkwalifikaw ta' kapital ta’ riskju.

Artikolu 10

Ir-regoli għall-valutazzjoni tal-assi għandhom ikunu stabbiliti fid-dokumenti statutorji tal-fond li jikkwalifika ta' kapital ta’ riskju.

Artikolu 11

1. Il-maniġer tal-fond ta’ kapital ta’ riskju għandu jagħmel rapport annwali disponibbli għall-awtorità kompetenti tal-Istat Membru ta’ domiċilju għal kull fond li jikkwalifika ta' kapital ta’ riskju li jkun ġestit mhux aktar tard minn 6 xhur wara t-tmiem tas-sena finanzjarja. Ir-rapport għandu jiddeskrivi l-kompożizzjoni tal-portafoll tal-fond li jikkwalifika ta' kapital ta’ riskju u l-attivitajiet tas-sena li tkun għaddiet. Dan irid jinkludi l-kontijiet finanzjarji awditjati għall-fond li jikkwalifika ta' kapital ta’ riskju. Dan għandu jsir skont l-istandards tar-rappurtar eżistenti u t-termini miftehma bejn il-maniġer tal-fond ta’ kapital ta’ riskju u l-investituri. Il-maniġer tal-fond ta’ kapital ta’ riskju għandu jipprovdi r-rapport lill-investituri meta dan jintalab. Il-maniġers tal-fondi ta’ kapital ta’ riskju u l-investituri jistgħu jiftiehmu bejniethom dwar żvelar addizzjonali.

2. Meta l-maniġer tal-fond ta’ kapital ta’ riskju jkun meħtieġ jippubblika rapport finanzjarju annwali skont id-Direttiva 2004/109/KE tal-Parlament Ewropew u tal-Kunsill[19] fir-rigward tal-fond li jikkwalifika ta' kapital ta’ riskju, l-informazzjoni msemmija fil-paragrafu 1 ta’ dan l-Artikolu tista’ tkun ipprovduta jew separatament jew bħala parti addizzjonali tar-rapport finanzjarju annwali.

Artikolu 12

1. Il-maniġers tal-fondi ta’ kapital ta’ riskju għandhom jinfurmaw lill-investituri tagħhom mill-inqas dwar l-elementi li ġejjin qabel id-deċiżjoni tal-investiment tagħhom:

(a) l-identità tal-maniġer tal-fond ta’ kapital ta’ riskju u kwalunkwe fornituri ta’ servizzi oħra kuntrattati mill-maniġer tal-fond ta’ kapital ta’ riskju fir-rigward tal-ġestjoni tagħhom tal-fondi li jikkwalifikaw ta' kapital ta’ riskju, u deskrizzjoni tad-dmirijiet tagħhom;

(b) deskrizzjoni tal-istrateġija u l-objettivi tal-investiment tal-fond li jikkwalifikaw ta' kapital ta’ riskju, inkluża deskrizzjoni tat-tipi tal-impriżi li jikkwalifikaw fil-portafoll u assi oħra li fihom jista’ jinvesti l-fond li jikkwalifika ta' kapital ta’ riskju, it-tekniki li jista’ juża, u kwalunkwe restrizzjoni tal-investiment applikabbli;

(c) deskrizzjoni tal-profil tar-riskju tal-fond li jikkwalifika ta' kapital ta’ riskju u kwalunkwe riskji assoċjati mal-assi li fihom jista’ jinvesti l-fond jew it-tekniki tal-investiment li jistgħu jkunu użati;

(d) deskrizzjoni tal-proċedura tal-valutazzjoni tal-fond li jikkwalifika ta' kapital ta’ riskju u l-metodoloġija tal-ipprezzar għall-valutazzjoni tal-assi, inklużi l-metodi użati għall-valutazzjoni tal-impriżi li jikkwalifikaw fil-portafoll;

(e) deskrizzjoni ta’ kif hija kkalkulata r-remunerazzjoni tal-maniġer tal-fond ta’ kapital ta’ riskju;

(f) deskrizzjoni tat-tariffi, l-imposti u l-ispejjeż kollha u l-ammonti massimi tagħhom li jġarrbu direttament jew indirettament l-investituri;

(g) meta tkun disponibbli, il-prestazzjoni storika tal-fond li jikkwalifika ta' kapital ta’ riskju;

(h) deskrizzjoni tal-proċeduri li bihom il-fond li jikkwalifika ta' kapital ta’ riskju jista’ jibdel l-istrateġija tal-investiment jew il-politika tal-investiment tiegħu, jew it-tnejn.

2. Meta l-fond li jikkwalifika ta' kapital ta’ riskju jkun meħtieġ jippubblika prospett skont id-Direttiva 2003/71/KE tal-Parlament Ewropew u tal-Kunsill[20] jew skont il-liġi nazzjonali fir-rigward tal-fond li jikkwalifika ta' kapital ta’ riskju, l-informazzjoni msemmija fil-paragrafu 1 ta’ dan l-Artikolu tista’ tingħata jew separatament jew bħala parti mill-prospett.

KAPITOLU III SUPERVIŻJONI, KOOPERAZZJONI AMMINISTRATTIVA

Artikolu 13

1. Il-maniġers tal-fondi ta’ kapital ta’ riskju li għandhom l-intenzjoni li jużaw id-denominazzjoni "Fond Ewropew ta' Kapital ta’ Riskju" għall-kummerċjalizzazzjoni tal-fondi li jikkwalifikaw ta' kapital ta’ riskju tagħhom għandhom jinfurmaw lill-awtorità kompetenti tal-Istat Membru ta’ domiċilju tagħhom rigward din l-intenzjoni u għandhom jipprovdu l-informazzjoni li ġejja:

(a) l-identità tal-persuni li effettivament iwettqu n-negozju tal-ġestjoni tal-fondi li jikkwalifikaw ta' kapital ta’ riskju;

(b) l-identità tal-fondi li jikkwalifikaw ta' kapital ta’ riskju li l-unitajiet jew l-ishma tagħhom se jkunu kkummerċjalizzati u l-istrateġiji tal-investiment tagħhom;

(c) l-informazzjoni dwar l-arranġamenti magħmula għall-konformità mar-rekwiżiti tal-Kapitolu II;

(d) lista tal-Istati Membri fejn il-maniġer tal-fond ta’ kapital ta’ riskju għandu l-intenzjoni li jikkummerċjalizza kull fond li jikkwalifika ta' kapital ta’ riskju.

2. L-awtorità kompetenti tal-Istat Membru ta’ domiċilju għandha tirreġistra l-maniġer tal-fond ta’ kapital ta’ riskju biss jekk tkun sodisfatta li

(a) l-informazzjoni meħtieġa skont il-paragrafu 1 tkun kompluta u

(b) l-arranġamenti nnotifikati skont il-punt (c) tal-paragrafu 1 jkunu adattati sabiex ikun hemm konformità mar-rekwiżiti tal-Kapitolu II.

3. Ir-reġistrazzjoni għandha tkun valida għat-territorju kollu tal-Unjoni u għandha tippermetti lill-maniġers tal-fondi ta’ kapital ta’ riskju li jikkummerċjalizzaw il-fondi li jikkwalifikaw ta' kapital ta’ riskju skont id-denominazzjoni "Fondi Ewropej ta' Kapital ta’ Riskju" fl-Unjoni kollha.

Artikolu 14

Il-maniġer tal-fond ta’ kapital ta’ riskju għandu jinforma lill-awtorità kompetenti tal-Istat Membru ta’ domiċilju meta l-maniġer tal-fond ta’ kapital ta’ riskju jkollu l-intenzjoni li jikkummerċjalizza:

(a) fond li jikkwalifika ta' kapital ta’ riskju ġdid;

(b) fond li jikkwalifika eżistenti ta' kapital ta’ riskju fi Stat Membru mhux imsemmi fil-lista msemmija fil-punt (d) tal-Artikolu 13(1).

Artikolu 15

1. Immedjatament wara r-reġistrazzjoni ta’ maniġer ta’ fond ta’ kapital ta’ riskju, l-awtorità kompetenti tal-Istat Membru ta’ domiċilju għandha tinnotifika l-fatt li l-maniġer tal-fond ta’ kapital ta’ riskju huwa rreġistrat lill-Istati Membri indikati skont il-punt (d) tal-Artikolu 13(1) u lill-AETS.

2. L-Istati Membri ospitanti indikati skont il-punt (d) tal-Artikolu 13(1) m’għandhomx jimponu, fuq il-maniġer tal-fond ta’ kapital ta’ riskju rreġistrat skont l-Artikolu 13, xi rekwiżiti jew proċeduri amministrattivi fir-rigward tal-kummerċjalizzazzjoni tal-fondi li jikkwalifikaw ta kapital ta’ riskju tiegħu, u lanqas m’għandhom jirrikjedu xi approvazzjoni tal-kummerċjalizzazzjoni qabel isseħħ.

3. Sabiex tkun żgurata l-applikazzjoni uniformi ta’ dan l-Artikolu, l-AETS għandha tiżviluppa abbozz ta’ standards tekniċi ta’ implimentazzjoni biex tiddetermina l-format tan-notifika.

4. L-AETS għandha tissottometti dan l-abbozz ta’ standards tekniċi ta’ implimentazzjoni lill-Kummissjoni sa [daħħal id-data].

5. Il-Kummissjoni tingħata s-setgħa tadotta l-abbozz ta’ standards tekniċi ta’ implimentazzjoni msemmija fil-paragrafu 3 ta’ dan l-Artikolu skont il-proċedura stabbilita fl-Artikolu 15 tar-Regolament (UE) Nru 1095/2010.

Artikolu 16

L-AETS għandha żżomm database ċentrali, pubblikament aċċessibbli fuq l-Internet, li telenka l-maniġers tal-fondi ta’ kapital ta’ riskju kollha rreġistrati fl-Unjoni skont dan ir-Regolament.

Artikolu 17

L-awtorità kompetenti tal-Istat Membru ta’ domiċilju għandha tissorvelja l-konformità mar-rekwiżiti stabbiliti f’dan ir-Regolament.

Artikolu 18

L-awtoritajiet kompetenti , f’konformità mal-liġi nazzjonali, għandu jkollhom is-setgħat superviżorji u investigattivi kollha li huma meħtieġa għat-twettiq tal-funzjonijiet tagħhom. B’mod partikolari huma għandhom ikollhom is-setgħa li:

(a) jitolbu l-aċċess għal kwalunkwe dokument fi kwalunkwe forma, u li jirċievu jew jieħdu kopja tiegħu;

(b) jirrikjedu lill-maniġer tal-fond ta’ kapital ta’ riskju li jipprovdi l-informazzjoni mingħajr dewmien;

(c) jirrikjedu informazzjoni mingħand kwalunkwe persuna relatata mal-attivitajiet tal-maniġer ta’ fond ta’ kapital ta’ riskju jew il-fond li jikkwalifika ta' kapital ta’ riskju;

(d) iwettqu spezzjonijiet fuq il-post b'avviż minn qabel jew mingħajru;

(e) joħorġu ordni sabiex jiżguraw li l-maniġer tal-fond ta’ kapital ta’ riskju jikkonforma mar-rekwiżiti ta’ dan ir-Regolament u ma jkomplix jikser dan ir-Regolament.

Artikolu 19

1. L-Istati Membri għandhom jistabbilixxu r-regoli dwar il-miżuri amministrattivi u s-sanzjonijiet applikabbli għall-ksur tad-dispożizzjonijiet ta’ dan ir-Regolament u għandhom iwettqu l-miżuri kollha meħtieġa biex jiżguraw li huma jiġu implimentati. Il-miżuri u s-sanzjonijiet previsti għandhom ikunu effettivi, proporzjonati u dissważivi.

2. Sa [24 xahar wara d-dħul fis-seħħ ta’ dan ir-Regolament] l-Istati Membri għandhom jinnotifikaw ir-regoli msemmija fil-paragrafu 1 lill-Kummissjoni u l-AETS. Huma għandhom jinnotifikaw lill-Kummissjoni u l-AETS mingħajr dewmien rigward kwalunkwe emenda sussegwenti għalihom.

Artikolu 20

1. L-awtorità kompetenti tal-Istat Membru ta’ domiċilju għandha twettaq il-miżuri xierqa msemmija fil-paragrafu 2 meta maniġer tal-fond ta’ kapital ta’ riskju:

(a) jonqos milli jikkonforma mar-rekwiżiti li japplikaw għall-kompożizzjoni tal-portafoll bi ksur tal-Artikolu 5;

(b) jonqos milli jikkummerċjalizza l-fond li jikkwalifika ta' kapital ta’ riskju lil investituri eliġibbli bi ksur tal-Artikolu 6;

(c) jonqos milli jirreġistra mal-awtorità kompetenti tal-Istat Membru ta’ domiċilju tiegħu bi ksur tar-rekwiżiti tal-Artikolu 13.

2. Fil-każijiet imsemmija fil-paragrafu 1 l-awtorità kompetenti tal-Istat Membru ta’ domiċilju għandha twettaq il-miżuri li ġejjin, kif jixraq:

(a) tipprojbixxi l-użu tad-denominazzjoni "Fond Ewropew ta' Kapital ta’ Riskju" għall-kummerċjalizzazzjoni ta’ fond li jikkwalifika ta' kapital ta’ riskju wieħed jew aktar tal-maniġer tal-fond ta’ kapital ta’ riskju;

(b) tneħħi lill-maniġer tal-fond ta’ kapital ta’ riskju mir-reġistru.

3. L-awtorità kompetenti tal-Istat Membru ta’ domiċilju għandha tinforma lill-awtoritajiet kompetenti tal-Istati Membri ospitanti indikati skont il-punt (d) tal-Artikolu 13(1) dwar it-tneħħija tal-maniġer tal-fond ta’ kapital ta’ riskju mir-reġistru msemmi fil-punt (b) tal-paragrafu 2 ta’ dan l-Artikolu.

4. Id-dritt li jkun ikkummerċjalizzat fond li jikkwalifika ta' kapital ta’ riskju wieħed jew aktar skont id-denominazzjoni "Fondi Ewropej ta' Kapital ta’ Riskju" fl-Unjoni jiskadi b’effett immedjat mid-data tad-deċiżjoni tal-awtorità kompetenti msemmija fil-punti (a) jew (b) tal-paragrafu 2.

Artikolu 21

1. L-awtoritajiet kompetenti u l-AETS għandhom jikkoperaw ma’ xulxin kull meta jkun meħtieġ għall-finijiet tat-twettiq tad-dmirijiet rispettivi tagħhom skont dan ir-Regolament.

2. Huma għandhom jiskambjaw l-informazzjoni u d-dokumentazzjoni kollha meħtieġa biex jidentifikaw u jirrimedjaw għal kull ksur ta’ dan ir-Regolament.

Artikolu 22

1. Il-persuni kollha li jaħdmu jew li ħadmu għall-awtoritajiet kompetenti jew l-AETS, kif ukoll l-awdituri u l-esperti li jingħataw struzzjonijiet mill-awtoritajiet kompetenti, huma marbutin bl-obbligu ta’ segretezza professjonali. L-ebda informazzjoni kunfidenzjali li dawn il-persuni jirċievu matul it-twettiq tad-dmirijiet tagħhom m’għandha tkun żvelata lil xi persuna jew awtorità, ħlief f’forma sommarja jew aggregata b’tali mod li l-maniġers tal-fondi ta’ kapital ta’ riskju u l-fondi li jikkwalifikaw ta' kapital ta’ riskju ma jkunux jistgħu jiġu identifikati individwalment, mingħajr preġudizzju għall-każijiet koperti mil-liġi kriminali u l-proċeduri skont dan ir-Regolament.

2. L-awtoritajiet kompetenti tal-Istati Membri jew l-AETS m’għandhomx jinżammu milli jiskambjaw l-informazzjoni skont dan ir-Regolament jew liġijiet oħra tal-Unjoni applikabbli għall-maniġers tal-fondi ta’ kapital ta’ riskju u l-fondi li jikkwalifikaw ta' kapital ta’ riskju.

3. Meta l-awtoritajiet kompetenti u l-AETS jirċievu informazzjoni kunfidenzjali skont il-paragrafu 2, huma jistgħu jużawha biss fit-twettiq tad-dmirijiet tagħhom jew għall-finijiet tal-proċeduri amministrattivi u ġudizzjarji.

KAPITOLU IV DISPOŻIZZJONIJIET TRANŻITORJI U FINALI

Artikolu 23

1. Il-Kummissjoni tingħata s-setgħa li tadotta atti ddelegati soġġetta għall-kundizzjonijiet stabbiliti f’dan l-Artikolu.

2. Id-delegazzjoni tas-setgħa msemmija fil-paragrafu 3 tal-Artikolu 2 u l-paragrafu 5 tal-Artikolu 8 għandha tingħata lill-Kummissjoni għal perjodu ta’ erba’ snin mid-data tad-dħul fis-seħħ ta’ dan ir-Regolament. Il-Kummissjoni għandha tfassal rapport fir-rigward tad-delegazzjoni tas-setgħa sa mhux aktar tard minn disa’ xhur qabel tmiem il-perjodu ta’ erba’ snin. Id-delegazzjoni tas-setgħa għandha tkun estiża taċitament għal perjodi tal-istess tul, sakemm il-Parlament Ewropew jew il-Kunsill ma jopponux tali estensjoni mhux aktar tard minn tliet xhur qabel it-tmiem ta’ kull perjodu.

3. Id-delegazzjoni tas-setgħa msemmija fil-paragrafu 3 tal-Artikolu 2 u l-paragrafu 5 tal-Artikolu 8 tista’ tkun irrevokata fi kwalunkwe ħin mill-Parlament Ewropew jew mill-Kunsill. Deċiżjoni ta’ revoka għandha ttemm id-delegazzjoni tas-setgħa speċifikata f’dik id-deċiżjoni. Hija għandha tidħol fis-seħħ fil-jum wara l-pubblikazzjoni tad-deċiżjoni f’Il-Ġurnal Uffiċjali tal-Unjoni Ewropea jew f’data aktar tard speċifikata hemmhekk. Hija m’għandhiex taffettwa l-validità ta’ xi att iddelegat diġà fis-seħħ.

4. Malli tadotta att iddelegat, il-Kummissjoni għandha tinnotifika simultanjament lill-Parlament Ewropew u lill-Kunsill.

5. Att iddelegat adottat skont il-paragrafu 3 tal-Artikolu 2 jew il-paragrafu 5 tal-Artikolu 8 għandu jidħol fis-seħħ biss jekk ma tkun ġiet espressa l-ebda oġġezzjoni mill-Parlament Ewropew jew mill-Kunsill f’perjodu ta’ xahrejn min-notifika ta’ dak l-att lill-Parlament Ewropew u lill-Kunsill jew jekk, qabel l-iskadenza ta’ dak il-perjodu, il-Parlament Ewropew u l-Kunsill ikunu t-tnejn għarrfu lill-Kummissjoni li huma mhux se joġġezzjonaw. Dak il-perjodu għandu jiġi estiż b’xahrejn b’inizjattiva tal-Parlament Ewropew jew tal-Kunsill.

Artikolu 24

1. Sa mhux aktar tard minn erba’ snin wara d-data tal-applikazzjoni ta’ dan ir-Regolament, il-Kummissjoni għandha tirrevedi dan ir-Regolament. Ir-reviżjoni għandha tinkludi stħarriġ ġenerali tal-funzjonament tar-regoli f’dan ir-Regolament u l-esperjenza miksuba fl-applikazzjoni tagħhom, inklużi:

(a) il-punt sa fejn id-denominazzjoni "Fond Ewropew ta' Kapital ta’ Riskju" intużat mill-maniġers tal-fondi ta’ kapital ta’ riskju fi Stati Membri differenti, kemm fuq bażi nazzjonali kemm fuq bażi transkonfinali;

(b) l-ambitu ta’ dan ir-Regolament, inkluż il-livell minimu ta’ EUR 500 miljun.

2. Wara konsultazzjoni mal-AETS il-Kummissjoni għandha tissottometti rapport lill-Parlament Ewropew u lill-Kunsill akkumpanjat, jekk ikun xieraq, minn proposta leġiżlattiva.

Artikolu 25

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea. Huwa għandu japplika mit-22 ta’ Lulju 2013, ħlief għall-paragrafu 3 tal-Artikolu 2 u l-paragrafu 5 tal-Artikolu 8, li għandhom japplikaw mid-data tad-dħul fis-seħħ ta’ dan ir-Regolament.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell,

Għall-Parlament Ewropew                           Għall-Kunsill

Il-President                                                    Il-President

[1]               Skont l-aħħar servej tal-Bank Ċentrali Ewropew (BĊE) fejn aktar minn 50 % tal-SMEs fiż-żona tal-ewro fil-kampjun irrapurtaw żieda fir-rati tal-imgħax imposti mill-banek u l-issikkar ġenerali tal-istandards tal-kreditu għas-self bankarju lill-SMEs.

[2]               Fl-aħħar servej (09/2010 – 02/2011) imwettaq mill-Bank Ċentrali Ewropew (BĊE) u żviluppat flimkien mal-Kummissjoni Ewropea dwar l-aċċess għall-finanzjament tal-SMEs fiż-żona ewro, madwar 15 % tal-SMEs fil-kampjun ikkwotaw "l-aċċess għall-finanzjament" bħala l-problema l-aktar urġenti tagħhom u dan ma nbidilx meta jitqabbel ma’ servejs preċedenti. http://www.ecb.europa.eu/pub/pdf/other/accesstofinancesmallmediumsizedenterprises201104en.pdf?b704f6b228e071bea9507d7569412805

[3]               Sors: stimi tal-Assoċjazzjoni Ewropea tal-Ekwità Privata u l-Kapital ta' Riskju (EVCA) tal-2011.

[4]               http://ec.europa.eu/europe2020/index_en.htm, 3 ta’ Marzu 2010, u rrikonoxxuti wkoll fi ħdan l-Unjoni Innovattiva, http://ec.europa.eu/research/innovation-union/index_en.cfm?pg=keydocs 6 ta’ Ottubru 2010.

[5]               http://ec.europa.eu/internal_market/smact/docs/20110413-communication_en.pdf 13 ta’ April 2011

[6]               http://ec.europa.eu/commission_2010-2014/president/news/speeches-statements/pdf/20111012communication_roadmap_en.pdf

[7]               Il-kapital ta' riskju jkopri tliet tipi ta’ finanzjament: (i) investiment informali minn investituri privati (business angels), (ii) kapital ta' riskju u (iii) swieq tal-ekwità speċjalizzati fl-SMEs u kumpaniji ta’ tkabbir kbir.

[8]               Rapport Finali ta’ RCAP tal-2003: http://ec.europa.eu/internal_market/securities/riskcapital/index_en.htm

[9]               http://ec.europa.eu/internal_market/investment/venture_capital_en.htm

[10]             ĠU C , , p. .

[11]             ĠU C …p…

[12]             ĠU C , , p. .

[13]             ĠU L 302, tas-17.11.2009, p. 32.

[14]             ĠU L 174, tal-1.7.2011, p.1.

[15]             ĠU L 145, tat-30.4.2004, p. 1.

[16]             ĠU L 331, tal-15.12.2010, p. 84.

[17]             ĠU L 281 , tat-23.11.1995 p. 31.

[18]             ĠU L 8, tat-12.1.2001, p. 1.

[19]             ĠU L 390, tal-31.12.2004, p. 38.

[20]             ĠU L 345, tal-31.12.2003, p. 64.