[pic] | KUMMISSJONI TAL-KOMUNITAJIET EWROPEJ |

Brussel 15.9.2006

KUMM(2006) 538 finali

Proposta għal

DIRETTIVA TAL-KUNSILL

li temenda d-Direttiva tal-Kunsill 91/414/KEE għall-inklużjoni tal-fenarimol bħala sustanza attiva

(preżentat mill-Kummissjoni)

MEMORANDUM TA’ SPJEGAZZJONI

Konklużjonijiet:

Il-proposta ta' abbozz mehmuża għal Direttiva tal-Kunsill tikkonċerna l-inklużjoni tal-fenarimol taħt kundizzjonijiet stretti bħala sustanza attiva fil-lista pożittiva (Anness I) tad-Direttiva tal-Kunsill 91/414/KEE dwar it-tqegħid ta' prodotti ta' protezzjoni għall-pjanti fis-suq. Din temenda u tirrestrinġi l-Proposta inizjali li tressqet lill-Kunsill aktar kmieni.

Il-tħassib espress minn bosta Stati Membri fil-qafas tad-dibattiti li għaddejin fil-Kunsill jirrifletti l-ġudizzju tagħhom li l-miżuri ta' taffija tar-riskji previsti mill-Kummissjoni li mhumiex, fil-prattika tagħhom, suffiċjenti biex inaqqsu jew itaffu r-riskju għal livell aċċettabbli f’dan il-każ partikolari. Sabiex jiġi rifless b’mod korrett il-livell għoli ta’ protezzjoni għas-saħħa tal-bniedem u ta’ l-annimali u l-ambjent sostenibbli mixtieq fil-Komunità, il-Kummissjoni tqis li jixraq, flimkien mal-kundizzjonijiet u mat-taffija tar-riskju msemmi akter kmieni, li jitnaqqas iktar il-perjodu ta’ inklużjoni għal 18-il xahar minflok seba’ snin. Dan jenfasizza l-bżonn għal valutazzjoni mill-ġdid ta' prijorità għal din is-sustanza.

Sfond:

Id-Direttiva tal-Kunsill 91/414/KEE toħloq programm ta’ qafas armonizzat għall-awtorizzazzjoni u t-tqegħid fis-suq ta’ prodotti ta’ protezzjoni tal-pjanti. Is-sustanzi attivi li jridu jintużaw bħala prodotti għall-protezzjoni tal-pjanti huma evalwati u awtorizzati fil-livell Komunitarju u huma elenkati fl-Anness I għad-Direttiva. Il-prodotti individwali għall-protezzjoni tal-pjanti li fihom sustanzi attivi huma evalwati u awtorizzati mill-Istati Membri skond regoli armonizzati.

Id-dejta ppreżentata mill-industrija kienet inizjalment evalwata minn Stat Membru rapporteur, f'dan il-każ ir-Renju Unitu wara, abbażi ta’ l-abbozz tar-rapport ta’ l-evalwazzjoni tagħhom, mill-Kummissjoni u l-Istati Membri kollha fi ħdan il-qafas tal-Kumitat Permanenti dwar il-Katina Alimentari u s-Saħħa ta’ l-Annimali.

Minħabba l-profil perikoluż tas-sustanza, il-kundizzjonijiet ta’ inklużjoni jipprovdu restrizzjonijiet lil dawn l-uċuħ ta’ l-art li effettivament kienu kkunsidrati waqt l-evalwazzjoni Komunitarja u li għalihom kien mistenni użu aċċettabbli bil-kundizzjoni li jiġu applikati miżuri preskrittivi ferm għat-taffija tar-riskju.

L-abbozz tad-Direttiva tressaq fit-3 ta' Marzu 2006 quddiem il-Kumitat Permanenti dwar il-Katina Alimentari u s-Saħħa ta' l-Annimali.

6 Stati Membri (134 vot) ivvutaw favur,

16-il Stat Membru (156 vot) ivvutaw kontra u

3 Stati Membri (31 vot) astjenew

Il-Kumitat ma ta l-ebda opinjoni. Konsegwentement, skond l-Artikolu 19 tad-Direttiva 91/414/KEE u bi qbil ma’ l-Artikolu 5 tas-Deċiżjoni tal-Kunsill 1999/468/KE, il-Kummissjoni jeħtiġilha tissottometti lill-Kunsill proposta relatata mal-miżuri li għandhom jittieħdu, u l-Kunsill ikollu tliet xhur sabiex jaġixxi permezz ta' maġġoranza kwalifikata.

Il-Kummissjoni ressqet abbozz ta' Proposta lill-Kunsill għal Direttiva li segwiet l-istess strateġija, jiġifieri, l-inklużjoni tas-sustanza taħt kundizzjonijiet restrittivi ħafna. Fid-dawl tad-dibattiti reċenti fil-Kunsill, madankollu. Il-Kummissjoni tikkunsidra xieraq li tirrevedi l-proposta tagħha inizjali billi tirrestrinġi iktar il-perjodu ta’ inklużjoni għal 18-il xahar.

L-abbozz tad-Direttiva mhuwiex suġġett għad-dritt ta’ skrutinju tal-Parlament Ewropew (l-Artikolu 8 tad-Deċiżjoni tal-Kunsill 1999/468/KE).

Proposta għal

DIRETTIVA TAL-KUNSILL

li temenda d-Direttiva tal-Kunsill 91/414/KEE għall-inklużjoni tal-fenarimol bħala sustanza attiva

(Test b’relevanza għaż-ŻEE)

IL-KUNSILL TA’ L-UNJONI EWROPEA,

Wara li kkunsidra it-Trattat li jistabbilixxi l-Komunità Ewropea,

Wara li kkunsidrat id-Direttiva tal-Kunsill 91/414/KEE tal-15 ta' Lulju 1991 dwar it-tqegħid fis-suq ta' prodotti tal-protezzjoni tal-pjanti[1], u b'mod partikolari l-Artikolu 6(1) tagħha,

Billi:

(1) Ir-Regolament tal-Kummissjoni (KEE) Nru 3600/92 tal-11 ta' Diċembru 1992 li jistipola regoli dettaljati għall-implimentazzjoni ta' l-ewwel stadju tal-programm ta' xogħol imsemmi fl-Artikolu 8(2) tad-Direttiva tal-Kunsill 91/414/KEE dwar it-tqegħid fis-suq ta' prodotti għall-protezzjoni tal-pjanti[2], jistabbilixxi lista ta' sustanzi attivi li għandhom jiġu assessjati, bil-ħsieb li jiġu possibilment inklużi fl-Anness I tad-Direttiva 91/414/KEE. Dik il-lista tinkludi l-fenarimol .

(2) Dwar il-fenarimol , l-effetti fuq is-saħħa tal-bniedem u l-ambjent ġew assessjati skond id-dispożizzjonijiet preskritti fir-Regolament (KEE) Nru 3600/92 għal firxa ta' użi proposti min-notifikatur. Permezz tar-Regolament tal-Kummissjoni (KE) Nru 933/94 tas-27 ta' April ta' l-1994 li jipprovdi s-sustanzi attivi ta' prodotti ta' protezzjoni ta' pjanti u jawtorizza r-rapporteur ta' l-Istati Membri għall-implimentazzjoni tar-Regolament (KEE) Nru 3600/92[3], ir-Renju Unit ġie nnominat bħala Stat Membru Rapporteur. Ir-Renju Unit ressaq ir-rapport ta' stima u r-rakkomandazzjonijiet relevanti lill-Kummissjoni fit-30 ta' April 1996 skond l-Artikolu 7(1)(c) tar-Regolament (KEE) Nru 3600/92.

(3) Ir-rapport evalwattiv ġie rivedut mill-Istati Membri u mill-Kummissjoni fi ħdan il-Kumitat Permanenti dwar il-Katina Alimentari u s-Saħħa ta' l-Annimali.

(4) Ġew mressqa żewġ mistoqsijiet fir-rigward tal-fenarimol lill-Kumitat Xjentifiku dwar il-Pjanti ("il-Kumitat Xjentifiku"). Il-Kumitat Xjentifiku ġie mistoqsi biex jikkummenta dwar l-interpretazzjoni ta’ l-istudji multiġenerazzjonali u biex jikkunsidra l-effetti ta’ l-inibizzjoni ta’ l-aromatose tal-fenarimol. Il-Kumitat Xjentifiku, apparti dan, intalab jagħti l-opinjoni tiegħu dwar l-istabbiliment ta' livelli Aċċettabbli ta' Teħid ta' Kuljum ( Acceptable Daily Intake (ADI)), u Livell Aċċettabbli għall-Esponiment ta' l-Operaturi ( Acceptable Operator Exposure Level (AOEL))[4]. Il-Kumitat Xjentifiku ikkonkluda li l-effetti tal-fenarimol fuq il-fertilità maskili li tidher fil-firien kellu jiġi kkunsidrat relevanti għall-evalwazzjoni tar-riskju għall-bniedem għalkemm il-bniedem huwa inqas sensittiv mill-firien għall-effetti ta’ l-inibizzjoni ta’ l-aromatose. Kien konkluż ukoll li l-effetti tal-fenarimol fuq il-parturizzjoni fil-firien jista’ jiġi kkunsidrat li mhuwiex rilevanti għall-evalwazzjoni tar-riskju għall-bneidem. Ġie konkluż ukoll li, minbarra il-fertilità mnaqqsa minn naħa tal-maskil u l-effetti marbuta mal-parturizzjoni ttardjata, ma kien hemm l-ebda evidenza konvinċenti għal effetti riproduttivi ħżiena oħra marbuta ma’ l-inibizzjoni ta’ l-aromatase mill-fenarimol . F-aħħarnett, il-Kumitat Xjentifiku qabel li l-istudji tossikoloġiċi mressqa jippermettu li jiġu stabbiliti l-ADI u l-AOEL b’mod affidabbli. It-tieni opinjoni [5] indirizzat il-mistoqsija dwar jekk l-istrateġija li ttieħdet biex il-Konċentrazzjonijiet ta’ l-Ambjent Previsti (PEC) jiġu kkalkulati fil-ħamrija kienetx adattata. Il-Kumitat ippropona taħlita ta’ dejta dwar id-dissipazzjoni ta’ l-għelieqi u dwar id-degradazzjoni fil-laboratorju biex jiġi kkalkulat il-PEC akkumulat fil-ħamrija. Din l-opinjoni ġiet eżaminata minn Stat Membru rapporteur li kkunsidra minkejja dan, li din l-proċedura ma kinitx iktar iġġustifkata milli wieħed jistrieħ biss fuq il-kejl tad-dissipazzjoni ta’ l-għelieqi. Għalhekk ġie deċiż li jiġu mistennija r-riżultati ta’ l-istudji tad-dissipazzjoni ta’ l-għelieqi li kienu għaddejjin. Ir-riżultati interim minn dawn l-istudji huma konsistenti mar-riżultati tal-kalkulazzjoni tal-mudell u b’mod konsegwenti l-mistoqsija ġiet ikkunsidrata li ġiet indirizzata f’mod adegwat. Għalhekk kien konkluż, li fil-każi kollha, kienu tqiesu r-rakkomandazzjonijiet mill-Kumitat Xjentifiku meta nkitbet din id-Direttiva u r-rapport rilevanti ta’ reviżjoni.

(5) Minn eżamijiet varji li saru deher li l-prodotti għall-protezzjoni tal-pjanti li fihom il-fenarimol jistgħu jissodisfaw, b’mod ġenerali, il-kundizzjonijiet stipolati fl-Artikolu 5(1) (a) u (b) tad-Direttiva 91/414/KEE, b’mod partikolari fir-rigward ta' l-użi li ġew eżaminati u spjegati fir-rapport ta’ reviżjoni tal-Kummissjoni, sakemm jiġu applikati l-miżuri adegwati ta’ taffija. Peress li l-fenarimol huwa sustanza perikoluża, l-użu tiegħu għandu jiġi ristrett. B'mod partikolari, hemm tħassib dwar l-effetti tossiċi intrinsiċi tiegħu, inklużi proprjetajiet li potenzjalment iħawdu l-endokrini. Sal-lum għad ma hemmx qbil bejn ix-xjenzjati dwar id-dimensjonijietpreċiżi tar-riskju. Bl-applikazzjoni tal-prinċipju prekawzjonarju, u bil-kunsiderazzjoni tal-qagħda preżenti ta' l-għarfien xjentifiku, għandhom jiġu imposti miżuri għat-taffija tar-riskju sabiex jintlaħaq il-livell għoli ta' protezzjoni li l-Komunità għażlet għas-saħħa tal-bniedem u ta' l-annimali, kif ukoll ta' l-ambjent.

(6) L-Artikoli 5(4) u 6(1) tad-Direttiva 91/414/KEE jistipulaw li l-inklużjoni ta’ sustanza fl-Anness I tista’ tiġi suġġetta għal restrizzjonijiet u kundizzjonijiet. F'dan il-każ, ir-restrizzjonijiet dwar il-perjodu ta' inklużjoni u l-uċuħ tar-raba' awtorizzati huma miżuri li jitqiesu li huma ta' ħtieġa. Il-miżuri oriġinali ppreżentati lill-Kumitat Permanenti dwar il-Katina ta' l-Ikel u s-Saħħa ta' l-Annimali, ipproponew ir-restrizzjoni tal-perjodu ta' l-inklużjoni ta seba’ snin li tfisser li l-Istati Membri għandhom jagħtu prijorità lir-reviżjoni tal-prodotti tal-protezzjoni tal-pjanti li fihom il-fenarimol u li diġà jinsabu fis-suq. Sabiex jiġu evitati d-diskrepanzi fil-livell għoli mixtieq ta' protezzjoni, l-inklużjoni fl-Anness I tad-Direttiva 91/414/KEE kienet maħsuba biex tkun limita għall-użi tal-fenarimol li tassew ġew assessjati fl-evalwazzjoni Komunitarja u li l-użi proposti għalihom tqiesu li jissodisfaw il-kundizzjonijiet tad-Direttiva 91/414. Dan jimplika li użi oħra, li f'dan l-assessjar ma ġewx koperti jew inkella ġew koperti parzjalment, qabel ma jitqiesu biex jiddaħħlu fl-Anness I tad-Direttiva 91/414/KEE kellhom l-ewwel ikunu suġġetti għal eżami komplet. Fl-aħħarnett, minħabba l-livell ta' periklu tal-fenarimol, kien ikkunsidrat ta’ ħtieġa li fuq il-livell Komunitarju jsir provvediment għal armonizzazzjoni minima ta' ċerti miżuri għat-taffija tar-riskju li l-Istati Membri kellhom japplikawhom meta jagħtu l-awtorizzazzjonijiet.

(7) Skond il-proċeduri stabbiliti bid-Direttiva 91/414, l-approvazzjoni tas-sustanzi attivi, inkluż id-definizzjoni tal-miżuri tal-maniġment tar-riskji, tiġi deċiża mill-Kummissjoni. L-Istati Membri għandhom ir-responsabbilità għall-implimentazzjoni, l-applikazzjoni u l-kontroll tal-miżuri li għandhom itaffu r-riskji ġġenerati. Il-ħsibijiet espressi minn bosta Stati Membri jirriflettu il-ġudizzju li r-restrizzjonijiet żejda huma meħtieġa biex jitnaqqas ir-riskju għal-livell li tista' tiġi aċċettabbli u konsistenti mal-livell għoli ta’ protezzjoni li hija mixtieqa fi ħdan il-Komunità. Fil-preżenti, hija kwistjoni ta’ maniġment tar-riskju biex jistabbilixxu livell adegwat ta’ sikurezza u protezzjoni għall-produzzjoni kontinwa, il-kummerċjalizzazzjoni u l-użu tal-fenarimol

(8) Bħala konsegwenza ta’ dan ta’ hawn fuq, il-Kummissjoni eżaminat mill-ġdid il-pożizzjoni tagħha. Sabiex tirrifletti b’mod korrett il-livell għoli ta protezzjoni tas-saħħa ta’ l-annimali u ambjent sostenibbli mixtieq fi ħdan il-Komunità, flimkien mal-prinċipji stipolati fil-premessa 5, biex iktar jitnaqqas il-perjodu ta' inklużjoni - minn seba' snin għal 18-il xahar, li tenfasizza l-ħtieġa għal evalwazzjoni mill-ġdid ta’ din is-sustanza

(9) Jista’ jkun mistenni li l-prodotti ta’ protezzjoni għall-pjanti li fihom il-carbedazim jissodisfaw ir-rekwiżiti mniżżla fl-Artikolu 5(1) (a) u (b) tad-Direttiva 91/414 KEE, fir-rigward l-użi li ġew eżaminati u ddettaljati fir-rapport tar-reviżjoni tal-Kummissjoni u li jipprovdu l-applikazzjoni tal-miżuri tat-taffija għar-riskji meħtieġa.

(10) Mingħajr ħsara għall-konklużjoni li l-prodotti tal-protezzjoni tal-pjanti li fihom il-fenarimol jistgħu jkunu preżunti li jissodisfaw ir-rekwiżiti stipulati fl-Artikolu 5(1)(a) u (b) tad-Direttiva 91/414/KEE, huwa f'loku li jinkiseb aktar tagħrif dwar ċerti punti speċifiċi. Il-proprjetajiet potenzjali tal-fenarimol għat-taħwid ta' l-endokrini ġew assessjati f'test li segwa l-aħjar prattika disponibbli fil-preżent. Il-Kummissjoni hija konxja li l-Organizzazzjoni għall-Kooperazzjoni u l-Iżvilupp Ekonomiku (OECD) qiegħda tiżviluppa linji ta' gwida għall-ittestjar sabiex tirfina aktar l-assessjar tal-proprjetajiet potenzjali għat-taħwid ta' l-endokrini. Għaldaqstant huwa f'loku li jiġi rikjest li l-fenarimol għandu jiġi suġġett għal ittestjar ulterjuri bħal dan hekk kif il-Linji ta' Gwida għall-ittestjar ta' l-OECD kif maqbula jkunu disponibbli, u dawn l-istudji għandhom jiġu ppreżentati min-notifikatur. Barra minn hekk, l-Istati Membri għandhom jesiġu li d-detenturi ta' l-awtorizzazzjonijiet jagħtu l-informazzjoni dwar l-użu tal-fenarimol, inkluż tagħrif dwar l-inċidenzi fuq saħħet l-operaturi.

(11) Bħalma jgħodd għas-sustanzi kollha inklużi fl-Anness I tad-Direttiva 91/414/KEE, l-istatus tal-fenarimol jista' jiġi rivedut taħt l-Artikolu 5(5) ta' dik id-Direttiva, fid-dawl ta' kwalunkwe tagħrif ġdid li jsir disponibbli. Bl-istess mod, il-fatt li l-inklużjoni ta’ din is-sustanza fl-Anness I jiskadi f’data partikolari dan ma jfixkilx l-inklużjoni li qed tiġġedded skond il-proċeduri stipulati fid-Direttiva.

(12) L-esperjenza miksuba minn inklużjonijiet preċedenti fl-Anness I għad-Direttiva 91/414/KEE ta' sustanzi attivi evalwati fil-qafas tar-Regolament (KEE) Nru 3600/92 uriet li jistgħu jinqalgħu xi diffikultajiet fl-interpretazzjoni tad-dmirijiet tad-detenturi ta' awtorizzazzjonijiet eżistenti dwar l-aċċess għad- data . Għalhekk, sabiex jiġu evitati iżjed diffikultajiet, jidher li huwa meħtieġ li d-dmirijiet ta’ l-Istati Membri jiġu ċċarati, speċjalment id-dmir li jivverifikaw li d-detentur ta’ awtorizzazzjoni juri aċċess għal dossier li jissodisfa r-rekwiżiti ta’ l-Anness II għal dik id-Direttiva. Madankollu, din il-kjarifika ma timponix xi obbligi ġodda fuq l-Istati Membri jew id-detenturi ta' l-awtorizzazzjonijiet meta mqabbla mad-direttivi li ġew adottati sa issa li jemendaw l-Anness I.

(13) Għandu jitħalla jgħaddi perjodu ta’ żmien raġonevoli qabel ma s-sustanza attiva tiġi inkluża fl-Anness I sabiex l-Istati Membri u l-partijiet interessati jkunu jistgħu jitħallew jagħmlu t-tħejjijiet sabiex jilħqu r-rekwiżiti ġodda li jirriżultaw mill-inklużjoni.

(14) Mingħajr ħsara għall-obbligi stipulati mid-Direttiva 91/414/KEE b'konsegwenza ta’ l-inklużjoni ta' sustanza attiva fl-Anness I, l-Istati Membri għandhom jingħataw perjodu ta’ sitt xhur wara l-inklużjoni biex jirrevedu l-awtorizzazzjonijiet ta’ prodotti għall-protezzjoni tal-pjanti eżistenti li fihom il-fenarimol sabiex jaċċertaw li jkunu sodisfatti l-kundizzjonijiet stipulati fid-Direttiva 91/414/KEE, u b’mod partikolari fl-Artikolu 13 tagħha u fil-kundizzjonijiet rilevanti stipulati fl-Anness I. L-Istati Membri għandhom ivarjaw, jibdlu jew jirtiraw, kif ikun jixraq, l-awtorizzazzjonijiet eżistenti, bi qbil mad-dispożizzjonijiet tad-Direttiva 91/414/KEE.. B’deroga mill-iskadenza ta’ hawn fuq, għandu jingħata perjodu itwal għall-preżentazzjoni u l-evalwazzjoni tad-dossier sħiħ ta’ l-Anness III għal kull prodott għall-protezzjoni tal-pjanti għal kull użu maħsub skond il-prinċipji uniformi stabbiliti fid-Direttiva 91/414/KEE. Fid-dawl tal-proprjetajiet perikolużi tal-fenarimol, il-perjodu li fih l-Istati Membri għandhom jivverifikaw jekk il-prodotti tal-protezzjoni tal-pjanti li fihom il-fenarimol bħala l-uniku sustanza attiva jew flimkien ma sustanzi attivi awtorizzati oħra, jikkonformawx mad-dispożizzjonijiet ta' l-Anness VI ma għandux jaqbeż it-18-il xahar.

(15) Għalhekk huwa xieraq li tkun emendata d-Direttiva 91/414/KEE kif xieraq.

(16) Il-Kumitat Permanenti dwar il-Katina Alimentari u s-Saħħa ta’ l-Annimali, ma tax opinjoni fil-limitu ta’ żmien stabbilit mill-President tiegħu.

ADOTTAT DIN ID-DIRETTIVA:

Artikolu 1

L-Anness I tad-Direttiva 91/414/KEE huwa emendat kif stabbilit fl-Anness ta' din id-Direttiva.

Artikolu 2

L-Istati Membri għandhom jadottaw u jippublikaw dawn il-liġijiet, regolamenti u d-dispożizzjonijiet amministrattivi meħtieġa sal-30 ta' Ġunju 2007 biex ikunu konformi ma' din id-Direttiva. Huma għandhom minnufih jikkomunikaw lill-Kummissjoni t-test ta' dawk id-dispożizzjonijiet u tabella li turi l-korrelazzjoni bejn dawk id-dispożizzjonijiet u din id-Direttiva.

Għandhom japplikaw dawn id-dispożizzjonijiet mit-1 ta' Lulju 2007.

Meta l-Istati Membri jadottaw dawk id-dispożizzjonijiet, dawn għandhom jinkludu referenza għal din id-Direttiva jew ikunu akkumpanjati mit-tali referenza meta dawn jiġu ppubblikati uffiċjalment. L-Istati Membri għandhom jistabbilixxu kif għandha ssir din ir-riferenza.

Artikolu 3

1. L-Istati Membri, fejn meħtieġ, u fi qbil mad-Direttiva 91/414/KEE, jemendaw jew jirtiraw l-awtorizzazzjonijiet eżistenti għal prodotti għall-protezzjoni tal-pjanti li fihom il-fenarimol bħala sustanza attiva sat-30 ta' Ġunju 2007. Sa dik id-data, dawn għandhom, b'mod partikolari, jivverifikaw li l-kundizzjonijiet fl-Anness I ta' dik id-Direttiva rigward il-fenarimol ikunu sodisfatti, minbarra dawk identifikati fil-parti B tar-reġistrazzjoni dwar dik is-sustanza attiva, u li d-detentur ta' l-awtorizzazzjoni jkollu, jew ikollu aċċess għal, dokumentazzjoni li tissodisfa r-rekwiżiti ta' l-Anness II ta' dik id-Direttiva skond il-kundizzjonijiet ta' l-Artikolu 13.

2. B'deroga mill-paragrafu 1, għal kull prodott awtorizzat tal-protezzjoni tal-pjanti li fih il-fenarimol, l-Istati Membri għandhom jevalwaw il-prodott mill-ġdid skond il-prinċipji uniformi stipulati fl-Anness VI tad-Direttiva 91/414/KEE, fuq il-bażi ta' dokumentazzjoni li tissodisfa r-rekwiżiti ta' l-Anness III ta' dik id-Direttiva u li tikkunsidra l-parti B tar-reġistrazzjoni dwar il-fenarimol fl-Anness I ta' dik id-Direttiva. Fuq il-bażi ta' dik l-evalwazzjoni, għandhom jiddeterminaw jekk il-prodott jissodisfax ir-rekwiżiti stabbiliti fl-Artikolu 4(1)(b), (c), (d) u (e) tad-Direttiva 91/414/KEE.

Wara dik id-determinazzjoni, għall-prodotti li fihom il-fenarimol, fejn ikun meħtieġ, l-Istati Membri għandhom jemendaw jew jirtiraw l-awtorizzazzjoni sat-30 ta' Ġunju 2008.

Artikolu 4

Din id-Direttiva għanda tidħol fis-seħħ fl-1 ta' Jannar 2007.

Artikolu 5

Din id-Direttiva hija indirizzata lill-Istati Membri.

Magħmula fi Brussell,

Għall-Kunsill

Il-President

ANNESS

Ir-reġistrazzjonijiet li ġejjin għandhom jinżiedu fl-aħħar tat-tabella fl-Anness I tad-Direttiva 91/414/KE.

“Nru | Isem Komuni,Numri ta' identifikazzjoni | Isem IUPAC | Purity[6] | Id-dħul fis-seħħ | Skadenza ta' żmien għall-inklużjoni | Disposizzjonijiet speċifiċi |

XX | Fenarimol Nru CAS60168-88-9 (stereokimika mhux dikjarata)Nru CIPAC380 | (()-2,4'-dichloro-(-(pyrimidin-5-yl) benzhydryl alcohol | 980 g/kg | l-1 ta’ Jannar 2007 | it-30 ta' Ġunju 2008 | PARTI A Jistgħu jiġu awtorizzati biss l-użi bħala funġiċida fuq l-uċuħ tar-raba' li ġejjin: tadam bżar fis-serer brunġiel ħjar fis-serer bettieħ pjanti ornamentali, siġar ta’ l-imxietel u pjanti perenni b'rati li ma jaqbżux 0.058 kg sustanza attiva kull ettaru għal kull applikazzjoni għat-tadam fl-għelieqi u 0.072 kg sustanza attiva kull ettaru għal kull applikazzjoni għat-tadam fis-serer; 0.072 kg ta' sustanza attiva kull ettaru kull applikazzjoni għall-bżar; 0.038 kg ta' sustanza attiva kull ettaru kull applikazzjoni għall-brunġiel; 0.048 kg ta' sustanza attiva kull ettaru kull applikazzjoni għall-ħjar; 0.024 kg sustanza attiva kull ettaru għal kull applikazzjoni għall-bettieħ fl-għelieqi u 0.048 kg sustanza attiva kull ettaru għal kull applikazzjoni għall-bettieħ fis-serer; 0.054 kg sustanza attiva kull ettaru għal kull applikazzjoni għall-pjanti ornamentali, siġar ta’ l-imxietel u l-pjanti perenni u 0.042 kg sustanza attiva kull ettaru għal kull applikazzjoni għall-pjanti ornamentali fis-serer. L-użi li ġejjin ma għandhomx jiġu awtorizzati: l-applikazzjoni fl-arja; applikazzjonijiet minn fuq id-dahar jew bl-idejn minn operaturi mhux professjonali il-ġardinaġġ domestiku. L-Istati Membri għandhom jiżguraw li jiġu applikati l-miżuri kollha għat-taffija tar-riskju. Għandha tingħata attenzjoni partikolari għall-protezzjoni ta': l-organiżmi akkwatiċi. Fejn ikun rilevanti, jJeħtieġ li tinżamm distanza adegwata bejn l-uċuħ trattati u ilmijiet tal-wiċċ. Din id-distanza tista' tkun tiddependi mill-applikazzjoni jew le ta' metodi jew tagħmir li jnaqqsu t-tifrix aċċidentali; il-ħniex. Il-kundizzjonijiet ta' l-awtorizzazzjoni għandhom jinkludu miżuri għat-taffija tar-riskju, bħalma huma l-għażla ta' l-iktar taħlit xieraq ta' l-għadd u l-ħin ta' l-applikazzjonijet, ir-rati ta' l-applikazzjoni, u, jekk meħtieġ, il-grad ta' konċentrazzjoni tas-sustanza attiva; l-għasafar u l-mammiferi Il-kundizzjonijiet ta' l-awtorizzazzjoni għandhom jinkludu miżuri għat-taffija tar-riskju, bħalma huma l-użu f'waqtu tal-prodott u l-għażla ta' dawk il-formulazzjonijiet li, minħabba l-preżentazzjoni fiżika tagħhom jew il-preżenza ta' aġenti li jiżguraw evitar adegwat, jimminimizzaw l-esponiment ta' l-ispeċi kkonċernata. l-operaturi, li jeħtiġilhom jilbsu lbies protettiv adegwat, partikolarment l-ingwanti, il-coveralls, bwiez tal-lastku u l-protezzjoni tal-wiċċ jew in-nuċċalijiet tas-sikurezza waqt it-taħlit, it-tagħbija, l-applikazzjoni u t-tindif tat-tagħmir, sakemm l-esponiment għas-sustanza attiva ma jkunx adegwatament imbarrat mid-disinn u l-kostruzzjoni tat-tagħmir innifsu, jew inkella bl-immuntar ta' komponenti protettivi speċifiċi fuq l-istess tagħmir; il-ħaddiema, li jeħtiġilhom jilbsu lbies protettiv adegwat, partikolarment l-ingwanti, jekk ikollhom jidħlu f'erja ttrattata qabel ma jkun skada l-perjodu speċifiku għad-dħul mill-ġdid. PARTI B Għall-implimentazzjoni tal-prinċipji uniformi ta' l-Anness VI, għandhom jitqiesu l-konklużjonijiet tar-rapport ta' evalwazzjoni dwar il-fenarimol u b'mod partikolari l-Appendiċi I u II tiegħu. L-Istati Membri jeħtiġilhom jiżguraw li d-detenturi ta' l-awtorizzazzjonijiet jirrappurtaw sa mhux aktar tard mill-31 ta' Diċembru ta' kull sena dwar l-inċidenzi ta' problemi tas-saħħa fost l-operaturi. L-Istati Membri jistgħu jirrikjedu li jingħata tagħrif, bħal data dwar il-bejgħ u servej tax-xejriet ta' l-użu, ħalli tkun tista' tinkiseb stampa realistika tal-kundizzjonijiet ta' l-użu u l-impatt tossikoloġiku possibbli tal-fenarimol. L-Istati Membri għandhom jitolbu li jiġu ppreżentati aktar studji biex jindirizzaw il-proprjetajiet potenzjali tal-fenarimol għat-taħwid ta' l-endokrini fi żmien sentejn mill-adozzjoni, min-naħa ta' l-Organizzazzjoni għall-Kooperazzjoni u l-Iżvilupp Ekonomiku (OECD), tal-Linji ta' Gwida għall-Ittestjar dwar it-taħwid ta' l-endokrini. Għandhom jiżguraw li n-notifikatur li fuq talba tiegħu il-fenarimol ikun ġie inkluż f’dan l-Anness jipprovdi dawn l-istudji lill-Kummissjoni fi żmien sentejn mill-addozzjoni tal-linji ta’ gwida msemmija hawn fuq.” |

[1] ĠU L 230, 19.8.1991, p.1. Direttiva kif emendata l-aħħar mid-Direttiva tal-Kummissjoni … (ĠU L 238, 30.8.2006, p. 17).

[2] ĠU L 366, 15.12.1992, p.10. Regolament kif emendat l-aħħar mir-Regolament tal-Kummissjoni (KE) Nru 2266/2000 (ĠU L 259, 13.10.2000, p. 10).

[3] ĠU L 107, 28.4.1994, p.8. Regolament kif emendat l-aħħar mir-Regolament tal-Kummissjoni (KE) Nru 2230/95 (ĠU L 225, 22.9.1995, p. 1).

[4] Opinjoni tal-Kumitat Xjentifiku dwar il-Pjanti dwar l-inklużjoni possibbli tal-Fenarimol fl-Anness I tad-Direttiva 91/414/KEE dwar it-tpoġġija fis-suq ta' prodotti dwar il-protezzjoni tal-pjanti ((SCP/FENARI/005 -Finali) (Opinjoni addottata mill-Kumitat Xjentifiku nhar it-18 ta’ Mejju 2001).

[5] Opinjoni tal-Kumitat Xjentifiku dwar il-Pjanti, dwar mistoqsijiet speċifiċi mill-Kummissjoni, li jikkonċernaw l-evalwazzjoni tal-Fenarimol fil-kuntest tad-Direttiva 91/414/KEE, (Opinjoni addottata mill-Kumitat Xjentifiku dwar il-Pjanti nhar it-8 ta' Novembru 2001).

[6] Aktar dettalji dwar l-identità u l-speċifikazzjoni tas-sustanza attiva huma pprovduti fir-rapport tar-reviżjoni.