[pic] | KUMMISSJONI TAL-KOMUNITAJIET EWROPEJ |

Brussel 14.9.2006

KUMM(2006) 537 finali

Proposta għal

DIRETTIVA TAL-KUNSILL

li temenda d-Direttiva tal-Kunsill 91/414/KEE għall-inklużjoni tal-methamidophos bħala sustanza attiva

(preżentata mill-Kummissjoni)

MEMORANDUM TA’ SPJEGAZZJONI

Konklużjonijiet:

L-abbozz anness ta' proposta għal Direttiva tal-Kunsill jirrigwarda l-inklużjoni tal- methamidophos , taħt kundizzjonijiet stretti, bħala sustanza attiva fil-lista pożittiva (Anness I) tad-Direttiva tal-Kunsill 91/414/KEE li tikkonċerna t-tqegħid fis-suq ta' prodotti għall-protezzjoni tal-pjanti. L-abbozz jemenda u jirrestrinġi l-Proposta inizjali li tressqet quddiem il-Kunsill aktar kmieni.

It-tħassib li wrew l-Istati Membri fil-qafas tad-dibattiti li hemm għaddejjin fil-Kunsill jirrifletti l-ġudizzju tagħhom li l-miżuri għat-taffija tar-riskji previsti mill-Kummissjoni, fil-prattika tagħhom, mhumiex suffiċjenti biex inaqqsu jew jimminimizzaw ir-riskju għal livell aċċettabbli f’dan il-każ partikolari. Sabiex jirriflettu sewwa l-livell għoli ta’ protezzjoni tas-saħħa tal-bniedem u ta’ l-annimali, kif ukoll l-ambjent sostenibbli mixtieq fil-Komunità, il-Kummissjoni tikkunsidra bħala xieraq li, flimkien mal-kundizzjonijiet u t-taffija tar-riskji proposti qabel, il-perjodu ta’ inklużjoni jkompli jitnaqqas għal 18-il xahar minflok seba’ snin, li jenfasizza l-ħtieġa prijoritarja għall-evalwazzjoni mill-ġdid tas-sustanza.

L-isfond:

Id-Direttiva tal-Kunsill 91/414/KEE toħloq qafas armonizzat għall-awtorizzazzjoni u t-tqegħid fis-suq tal-prodotti għall-protezzjoni tal-pjanti. Is-sustanzi attivi li jkunu maħsuba għall-użu bħala prodotti għall-protezzjoni tal-pjanti jiġu evalwati u awtorizzati fuq il-livell Komunitarju, u elenkati fl-Anness I tad-Direttiva. Prodotti individwali għall-protezzjoni tal-pjanti li jkun fihom sustanzi attivi jiġu evalwati u awtorizzati mill-Istati Membri, taħt regoli armonizzati.

Id- data mressqa mill-industrija inizjalment ġiet evalwata minn Stat Membru rapporteur , f'dan il-każ l-Italja, u wara, fuq il-bażi ta' l-abbozz tar-rapport ta' l-evalwazzjoni tagħha, mill-Kummissjoni u l-Istati Membri kollha fi ħdan il-qafas tal-Kumitat Permanenti dwar il-Katina Alimentari u s-Saħħa ta' l-Annimali.

Fid-dawl tal-profil perikoluż tas-sustanza, il-kundizzjonijiet għall-inklużjoni ipprovdew restrizzjonijiet għal dawk l-uċuħ tar-raba' li effettivament kienu ġew ikkunsidrati matul l-evalwazzjoni Komunitarja u li għalihom kien ġie mistenni użu aċċettabbli, bil-kundizzjoni li kellhom jiġu applikati miżuri preskrittivi ħafna għat-taffija tar-riskju.

Fit-3 ta' Marzu 2006, l-abbozz tad-Direttiva tressaq quddiem il-Kumitat Permanenti dwar il-Katina Alimentari u s-Saħħa ta' l-Annimali.

5 Stati Membri (79 vot) ivvutaw favur,19-il Stat Membru (235 vot) ivvutaw kontra,Stat Membru 1 (7 voti) astjena.

Il-Kumitat ta opinjoni mhux favorevoli. B'konsegwenza, skond l-Artikolu 19 tad-Direttiva 91/414/KEE u skond l-Artikolu 5 tad-Deċiżjoni tal-Kunsill 1999/468/KE, il-Kummissjoni jeħtiġilha tressaq lill-Kunsill proposta rigward il-miżuri li għandhom jittieħdu, filwaqt li l-Kunsill għandu tliet xhur biex jaġixxi b'maġġoranza kwalifikata.

Il-Kummissjoni għaddiet lill-Kunsill abbozz ta’ Proposta għal Direttiva li segwiet l-istess strateġija, jiġifieri l-inklużjoni tas-sustanza taħt kundizzjonijiet restrittivi ħafna. Madankollu, fid-dawl tad-dibattiti riċenti fil-Kunsill, il-Kummissjoni tikkunsidra li huwa xieraq li tirrevedi l-proposta inizjali tagħha billi tirrestrinġi iktar il-perjodu ta’ inklużjoni għal 18-il xahar.

L-abbozz tad-Direttiva mhuwiex suġġett għad-dritt ta' l-iskrutinju tal-Parlament Ewropew (Artikolu 8 tad-Deċiżjoni tal-Kunsill 1999/468/KE).

Proposta għal

DIRETTIVA TAL-KUNSILL

li temenda d-Direttiva tal-Kunsill 91/414/KEE għall-inklużjoni tal- methamidophos bħala sustanza attiva

(Test b’rilevanza għaż-ŻEE)

IL-KUNSILL TA’ L-UNJONI EWROPEA,

Wara li kkunsidrat i-Trattat li jistabbilixxi l-Komunità Ewropea,

Wara li kkunsidrat id-Direttiva tal-Kunsill 91/414/KEE tal-15 ta’ Lulju 1991 li tikkonċerna t-tqegħid fuq is-suq ta’ prodotti għall-protezzjoni tal-pjanti[1], u partikolarment l-Artikolu 6(1) tagħha,

Billi:

(1) Ir-Regolament tal-Kummissjoni (KEE) Nru 3600/92 tal-11 ta' Diċembru ta' l-1992 li jistabbilixxi r-regoli dettaljati għall-implimentazzjoni ta’ l-ewwel stadju tal-programm ta’ xogħol imsemmi fl-Artikolu 8(2) tad-Direttiva tal-Kunsill 91/414/KEE li tikkonċerna t-tqegħid fis-suq ta’ prodotti għall-protezzjoni tal-pjanti[2] jistabbilixxi lista ta' sustanzi attivi li għandhom jiġu assessjati, bil-ħsieb ta' l-inklużjoni possibbli tagħhom fl-Anness I tad-Direttiva 91/414/KEE. Dik il-lista tinkludi l- methamidophos .

(2) Dwar il- methamidophos , l-effetti fuq is-saħħa tal-bniedem u l-ambjent ġew assessjati skond id-dispożizzjonijiet preskritti fir-Regolament (KEE) Nru 3600/92 għal firxa ta' użi proposti minn min jinnotifika. Permezz tar-Regolament tal-Kummissjoni (KE) Nru 933/94 tas-27 ta' April 1994 li jistipola s-sustanzi attivi għall-prodotti dwar il-protezzjoni ta' pjanti u għan-nominazzjoni ta' Stat Membru Rapporteur għall-implimentazzjoni tar-Regolament tal-Kummissjoni (KEE) Nru 3600/92[3], l-Italja ġiet innominata bħala l-Istat Membru Rapporteur. L-Italja ressqet lill-Kummissjoni r-rapport rilevanti ta' l-assessjar u r-rakkomandazzjonijiet fit-30 ta' Lulju 1999 skond l-Artikolu 7(1)(c) tar-Regolament (KEE) Nru 3600/92.

(3) Ir-rapport ta' assessjar ġie eżaminat mill-Istati Membri u mill-Kummissjoni fi ħdan il-Kumitat Permanenti dwar il-Katina Alimentari u s-Saħħa ta' l-Annimali.

(4) Ir-reviżjoni tal- methamidophos kixfet għadd ta' mistoqsijiet pendenti li ġew indirizzatti mill-Bord Xjentifiku dwar is-Saħħa tal-Pjanti, il-Prodotti tal-protezzjoni tal-Pjanti u r-Residwi tagħhom ( PPR ) ta' l-Awtorità Ewropea dwar is-Sikurezza Alimentari ( EFSA ). Il-Bord Xjentifiku ntalab jiddefinixxi valur għall-grad ta' l-assorbiment dermali, ibbażat xjentifikament fuq ir-riżultati differenti ta' l-istudji mressqa min-notifikatur għall-użu fl-evalwazzjoni tar-riskju għall-bniedem mill-esponiment dermali. Barra minn hekk, il-Bord Xjentifiku ntalab jirrevedi l-estimi ta' l-evitar, il-ħin mgħoddi fit-tiftix għall-ikel fiż-żoni ttrattati u l-proporzjon tad-dieta kkontaminata miksuba miż-żoni ttrattati, u ntalab ukoll jagħti parir dwar l-implikazzjonijiet ta'l-esponiment akut, fil-qosor u fit-tul ta' l-għasafar u l-mammiferi għall-insettiċida methamidophos . Fl-opinjoni tiegħu dwar l-ewwel mistoqsija, il-Bord tal- PPR ikkonkluda[4] li, fuq il-bażi tad- data disponibbli, l-aħjar stima ta' l-assorbiment dermali tal-preparat dilwit titqies li hija madwar 5%. Dwar it-tieni mistoqsija, il-Bord tal- PPR ikkonċentra l-evalwazzjoni tiegħu fuq żewġ speċijiet li kkunsidrawhom in-notifikatur u l-Istat Membru Rapporteur, iz-zakak isfar u l-ġurdien ta' l-għelieqi, minħabba li dawn jagħmlu użu sostanzjali mill-uċuħ li għalihom huwa indikat il- methamidophos . Il-Bord tal- PPR ma qabilx[5] mal-valuri proposti min-notifikatur u l-Istat Membru Rapporteur rigward il-proporzjoni ta' dieta kontaminata definita għaz-zakak l-isfar, u lanqas ma' l-istimi li ntużaw fil-kompożizzjoni tad-dieta taz-zakak l-isfar u l-ġurdien ta' l-għelieqi. Il-Bord tal- PPR innota li dawn il-valuri jagħtu sottostima ta' l-esponiment akut ta' l-annimali individwali. Il-Bord tal- PPR żviluppa metodu ieħor għall-evalwazzjoni tar-rwol potenzjali ta' l-evitar. Il-mekkaniżmi involuti huma kumplessi, imma jidher possibbli li sew iz-zakak l-isfar kif ukoll il-ġurdien ta' l-għelieqi jieklu hekk bil-ħeffa li l-mortalità tokkorri fil-kundizzjonijiet reali. Il-Bord tal- PPR identifika diversi alternattivi għall-istudji fil-laboratorju jew reali, li jkunu jistgħu jiġu kkunsidrati biex dawn ir-riskji jiġu evalwati b'ċertezza akbar.

(5) L-Artikoli 5(4) u 6(1) tad-Direttiva 91/414/KE jipprovdu li l-inklużjoni ta’ sustanza fl-Anness I tista’ tiġi suġġetta għal restrizzjonijiet u kundizzjonijiet. F'dan il-każ, ir-restrizzjonijiet dwar il-perjodu ta' inklużjoni u l-uċuħ tar-raba' awtorizzati huma miżuri li jitqies li huma ta' ħtieġa. Il-miżuri oriġinali ppreżentati lill-Kumitat Permanenti dwar il-Katina Alimantari u s-Saħħa ta’ l-Annimali pproponew ir-restrizzjoni tal-perjodu ta' l-inklużjoni għal seba’ snin, li jfisser li l-Istati Membri jagħtu prijorità lir-reviżjoni tal-prodotti tal-protezzjoni tal-pjanti li fihom il- methamidophos u li diġà jinsabu fis-suq. Sabiex jiġu evitati d-diskrepanzi fil-livell għoli mixtieq ta' protezzjoni, l-inklużjoni fl-Anness I tad-Direttiva 91/414/KEE kienet maħsuba li tkun limitata għall-użi tal- methamidophos li tassew ġew assessjati fl-evalwazzjoni Komunitarja u li l-użi proposti għalihom tqiesu li jissodisfaw il-kundizzjonijiet tad-Direttiva 91/414. Dan jimplika li użi oħra, li f'dan l-assessjar ma ġewx koperti jew inkella ġew koperti parzjalment, qabel ma jkunu kkunsidrati biex jiddaħħlu fl-Anness I tad-Direttiva 91/414/KEE l-ewwel kien jeħtiġilhom ikunu suġġetti għal eżami komplet. Fl-aħħarnett, minħabba l-livell ta' periklu tal- methamidophos , tqies ta' ħtieġa li jsir provvediment għal armonizzazzjoni minima fuq il-livell Komunitarju ta' ċerti miżuri għat-taffija tar-riskju li l-Istati Membri kellhom japplikawhom meta jagħtu l-awtorizzazzjonijiet.

(6) Skond il-proċeduri stipulati fid-Direttiva 91/414, l-approvazzjoni ta’ sustanzi attivi, inkluża d-definizzjoni ta’ miżuri għat-taffija tar-riskji, għandha tiġi deċiża mill-Kummissjoni. L-Istati Membri għandhom ir-responsabbiltà ta’ l-implimentazzjoni, l-applikazzjoni u l-kontroll tal-miżuri maħsuba biex itaffu r-riskji ġġenerati mill-prodotti tal-protezzjoni tal-pjanti. It-tħassib li wrew bosta Stati Membri jirrifletti l-ġudizzju tagħhom li restrizzjonijiet addizzjonali huma meħtieġa biex jitnaqqas ir-riskju għal livell li jista’ jkun ikkunsidrat aċċettabbli u konsistenti mal-livell għoli ta’ protezzjoni mixtieq fil-Komunità. Fil-preżent, hija kwistjoni ta' ġestjoni tar-riskji li jwaqqaf livell xieraq ta' sikurezza u protezzjoni biex tissokkta l-produzzjoni, il-kummerċjalizzazzjoni u l-użu tal- methamidophos .

(7) B’konsegwenza ta’ dan ta’ hawn fuq, il-Kummissjoni eżaminat mill-ġdid il-pożizzjoni tagħha. Sabiex jirriflettu sewwa l-livell għoli ta’ protezzjoni tas-saħħa tal-bniedem u dik ta’ l-annimali kif ukoll l-ambjent sostenibbli mixtieq fil-Komunità, huwa meqjus xieraq li, flimkien mal-prinċipji stipulati fil-Premessa 5, jitnaqqas il-perjodu ta’ inklużjoni għal 18-il xahar minflok seba’ snin. Dan jerġa’ jnaqqas kwalunkwe riskju billi jiżgura evalwazzjoni mill-ġdid bi prijorità ta' din is-sustanza.

(8) Jista’ jkun mistenni li l-prodotti tal-protezzjoni tal-pjanti li fihom il- methamidophos jissodisfaw ir-rekwiżiti stipulati fl-Artikolu 5(1) (a) u (b) tad-Direttiva 91/414/KE, fir-rigward ta’ l-użi li ġew eżaminati u ddettaljati fir-rapport ta’ analiżi tal-Kummissjoni, u bil-kundizzjoni li l-miżuri ta’ taffija tar-riskji jiġu applikati.

(9) Mingħajr ħsara għall-konklużjoni li l-prodotti tal-protezzjoni tal-pjanti li fihom il- methamidophos jistgħu jkunu preżunti li jissodisfaw ir-rekwiżiti stipulati fl-Artikolu 5(1)(a) u (b) tad-Direttiva 91/414/KEE, huwa f'loku li jinkiseb aktar tagħrif dwar ċerti punti speċifiċi. L-Artikolu 6(1) tad-Direttiva 91/414/KE jistipola li l-inklużjoni ta’ sustanza fl-Anness I tista’ tiġi suġġetta għall-kondizzjonijiet. Għalhekk huwa f'loku li jiġi rikjest li l- methamidophos ikun suġġett għal aktar testijiet għall-konferma ta' l-evalwazzjoni tar-riskji għall-għasafar u l-mammiferi, u li studji ta' dan it-tip għandhom jitressqu min-notifikant. Barra minn hekk, l-Istati Membri għandhom jesiġu mid-detenturi ta' l-awtorizzazzjonijiet li dawn jagħtu l-informazzoni dwar l-użu tal- methamidophos , inkluż tagħrif dwar l-inċidenzi fuq saħħet l-operaturi.

(10) Bħalma jgħodd għas-sustanzi kollha inklużi fl-Anness I tad-Direttiva 91/414/KEE, l-istatus tal- methamidophos jista' jiġi rivedut taħt l-Artikolu 5(5) ta' dik id-Direttiva, fid-dawl ta' kwalunkwe tagħrif ġdid li jsir disponibbli. Bl-istess mod, il-fatt li l-inklużjoni ta' din is-sustanza fl-Anness I tiskadi f'data partikolari ma jżommx milli l-inklużjoni tiġġedded skond il-proċeduri stipulati fid-Direttiva.

(11) L-esperjenza miksuba minn inklużjonijiet preċedenti fl-Anness I tad-Direttiva 91/414/KEE ta' sustanzi attivi assessjati fil-qafas tar-Regolament (KEE) Nru 3600/92 uriet li jistgħu jinqalgħu xi diffikultajiet fl-interpretazzjoni tad-dmirijiet tad-detenturi ta' awtorizzazzjonijiet eżistenti dwar l-aċċess għad- data . Għalhekk, sabiex jiġu evitati iżjed diffikultajiet, jidher li jeħtieġ li d-dmirijiet ta’ l-Istati Membri jiġu ċċarati, speċjalment id-dmir li jivverifikaw li d-detentur ta’ l-awtorizzazzjoni juri aċċess għal dokumentazzjoni li tissodisfa r-rekwiżiti ta’ l-Anness II ta' dik id-Direttiva. Madankollu, din il-kjarifika ma timponix xi obbligi ġodda fuq l-Istati Membri jew id-detenturi ta' l-awtorizzazzjonijiet meta mqabbla mad-direttivi li jemendaw l-Anness I li ġew adottati sallum.

(12) Perjodu raġonevoli għandu jitħalla qabel ma tiġi inkluża fl-Anness I xi sustanza attiva, biex l-Istati Membri u l-partijiet interessati jkunu jistgħu jħejju lilhom infushom biex jissodisfaw ir-rekwiżiti ġodda li jirriżultaw minn dik l-inklużjoni.

(13) Mingħajr preġudizzju għall-obbligi stipulati mid-Direttiva 91/414/KEE konsegwenza ta’ l-inklużjoni tas-sustanzi attivi fl-Anness I, l-Istati Membri għandhom jitħallew għal perjodu ta’ sitt xhur wara l-inklużjoni li jirrevedu l-awtorizzazzjonijiet ta’ prodotti għall-protezzjoni tal-pjanti eżistenti li fihom il- methamidophos sabiex jaċċertaw li l-kundizzjonijiet stipulati fid-Direttiva 91/414/KEE, u b’mod partikolari l-Artikolu 13 tagħha u l-kundizzjonijiet rilevanti stipulati fl-Anness I, jiġu sodisfatti. L-Istati Membri għandhom ivarjaw, ibiddlu jew jirtiraw, kif ikun f'loku, l-awtorizzazzjonijiet eżistenti, skond id-dispożizzjonijiet tad-Direttiva 91/414/KEE. B’deroga mill-iskadenza ta’ hawn fuq, għandu jingħata perjodu itwal għall-preżentazzjoni u l-evalwazzjoni tad-dokumentazzjoni sħiħa ta’ l-Anness III għal kull prodott għall-protezzjoni tal-pjanti għal kull użu maħsub skond il-prinċipji uniformi stabbiliti fid-Direttiva 91/414/KEE. Fid-dawl tal-proprjetajiet perikolużi tal- methamidophos , il-perjodu li fih l-Istati Membri għandhom jivverifikaw jekk il-prodotti tal-protezzjoni tal-pjanti li fihom il- methamidophos , waħdu jew inkella ma' sustanzi attivi awtorizzati oħra, jikkonformawx mad-dispożizzjonijiet ta' l-Anness VI ma għandux jaqbeż 18-il xahar.

(14) Għalhekk huwa xieraq li tiġi emendata hekk id-Direttiva 91/414/KEE.

(15) Il-miżuri previsti f’din id-Direttiva ma jikkonformawx ma’ l-opinjoni mogħtija mill-Kumitat Permanenti dwar il-Katina Alimentari u s-Saħħa ta’ l-Annimali, Għaldaqstant, skond l-Artikolu 19(2) tad-Direttiva 91/414/KEE, jeħtiġilhom jiġu adottati mill-Kunsill.

ADOTTA DIN ID-DIRETTIVA:

Artikolu 1

L-Anness I tad-Direttiva 91/414/KEE huwa emendat kif stabbilit fl-Anness ta' din id-Direttiva.

Artikolu 2

L-Istati Membri għandhom jadottaw u jippubblikaw sat-30 ta' Ġunju 2007 l-aktar tard il-liġijiet, regolamenti u d-dispożizzjonijiet amministrattivi meħtieġa biex tkun imħarsa din id-Direttiva. Huma għandhom minnufih jikkomunikaw lill-Kummissjoni it-test ta’ dawn id-dispożizzjonijiet u tabella ta’ korrelazzjoni bejn dawk id-dispożizzjonijiet u din id-Direttiva.

Għandhom japplikaw dawn id-dispożizzjonijiet mill-1 ta' Lulju 2007.

Meta l-Istati Membri jadottaw dawk id-dispożizzjonijiet, dawn għandu jkun fihom referenza għal din id-Direttiva jew għandu jkollhom magħhom referenza bħal din fl-okkażjoni tal-pubblikazzjoni uffiċjali tagħhom. L-Istati Membri għandhom jiddeterminaw kif għandha ssir din ir-referenza.

Artikolu 3

1. L-Istati Membri għandhom f’konformità mad-Direttiva 91/414/KEE, fejn hu meħtieġ, jemendaw jew jirtiraw awtorizzazzjonijiet eżistenti għall-prodotti għall-protezzjoni tal-pjanti li fihom il- methamidophos bħala sustanza attiva sal-30 ta’ Ġunju 2007.

Sa dik id-data, dawn għandhom, b'mod partikolari, jivverifikaw li l-kundizzjonijiet fl-Anness I ta' dik id-Direttiva rigward il- methamidophos ikunu ssodisfati, minbarra dawk identifikati fil-parti B tar-reġistrazzjoni dwar dik is-sustanza attiva, u li d-detentur ta' l-awtorizzazzjoni jkollu, jew ikollu aċċess għal, dokumentazzjoni li tissodisfa r-rekwiżiti ta' l-Anness II ta' dik id-Direttiva skond il-kundizzjonijiet ta' l-Artikolu 13.

2. B'deroga mill-paragrafu 1, għal kull prodott awtorizzat tal-protezzjoni tal-pjanti li fih il- methamidophos , l-Istati Membri għandhom jevalwaw il-prodott mill-ġdid skond il-prinċipji uniformi stipulati fl-Anness VI tad-Direttiva 91/414/KEE, fuq il-bażi ta' dokumentazzjoni li tissodisfa r-rekwiżiti ta' l-Anness III ta' dik id-Direttiva u li tikkunsidra l-parti B tar-reġistrazzjoni dwar il- methamidophos fl-Anness I ta' dik id-Direttiva. Fuq il-bażi ta' dik l-evalwazzjoni, għandhom jiddeterminaw jekk il-prodott jissodisfax ir-rekwiżiti stabbiliti fl-Artikolu 4(1)(b), (c), (d) u (e) tad-Direttiva 91/414/KEE.

Wara dik id-determinazzjoni, għall-prodotti li fihom il- methamidophos , fejn ikun meħtieġ l-Istati Membri għandhom jemendaw jew jirtiraw l-awtorizzazzjoni sat-30 ta' Ġunju 2008.

Artikolu 4

Din id-Direttiva ser tidħol fis-seħħ nhar il-1 ta' Jannar ta' l-2007.

Artikolu 5

Din id-Direttiva hija indirizzata lill-Istati Membri.

Magħmula fi Brussell,

Għall-Kunsill

Il-President

ANNESS I

"Li ġej għandu jiġi inkluż fl-aħħar tat-tabella fl-Anness I tad-Direttiva 91/414/KE.

"Nru | Isem Komuni, Numri ta' identifikazzjoni | Isem IUPAC | Purezza[6] | Dħul fis-seħħ | Skadenza ta' l-inklużjoni | Dispożizzjonijiet speċifiċi |

XX | Methamidophos Nru CAS 10265-92-6 Nru CIPAC 355 | O, S dimethyl phosphoramidothioate | > 680 g/kg | l-1 ta' Jannar 2007 | it-30 ta' Ġunju 2008 | PARTI A Jista' jiġi awtorizzat biss l-użu bħala insettiċida fuq il-patata. Jeħtieġ li jiġu rispettati l-kundizzjonjiet ta' l-użu li ġejjin: B'rati li ma jaqbżux 0.5 kg ta' sustanza attiva kull ettaru kull applikazzjoni Massimu ta' tliet applikazzjonijiet fl-istaġun. L-użi li ġejjin ma għandhomx jiġu awtorizzati: l-applikazzjoni fl-arja; applikazzjonijiet minn fuq id-dahar jew bl-id, la hgħall-operaturi dilettanti u lanqas għal dawk professjonali; il-ġardinaġġ domestiku. L-Istati Membri għandhom jiżguraw li jiġu applikati l-miżuri kollha għat-taffija tar-riskju. Għandha tingħata attenzjoni partikolari għall-protezzjoni ta': l-għasafar u l-mammiferi Il-kundizzjonijiet ta' l-awtorizzazzjoni għandhom jinkludu miżuri għat-taffija tar-riskju, bħalma huma l-użu f'waqtu tal-prodott u l-għażla ta' dawk il-formulazzjonijiet li, minħabba l-preżentazzjoni fiżika tagħhom jew il-preżenza ta' aġenti li jiżguraw evitar adegwat, jimminimizzaw l-esponiment ta' l-ispeċi kkonċernata. l-organiżmi akkwatiċi u l-artropodi li ma jkunux fil-mira Jeħtieġ li tinżamm distanza adegwata bejn l-uċuħ trattati u l-ilmijiet tal-wiċċ, kif ukoll il-marġni tal-wiċċ tar-raba'. Din id-distanza tista' tkun tiddependi mill-applikazzjoni jew le ta' metodi jew tagħmir li jnaqqsu t-tifrix aċċidentali; l-operaturi, li jeħtiġilhom jilbsu lbies protettiv adegwat, partikolarment l-ingwanti, il-coveralls, bwiez tal-lastku u t-tagħmir għall-protezzjoni tan-nifs waqt it-taħlit, it-tagħbija, l-applikazzjoni u t-tindif tat-tagħmir. Il-miżuri ta' hawn fuq jeħtiġilhom jiġu applikati, sakemm l-esponiment għas-sustanza attiva ma jkunx adegwatament imbarri mid-disinn u l-kostruzzjoni tat-tagħmir innifsu, jew inkella bl-immuntar ta' komponenti protettivi speċifiċi fuq it-tagħmir. PARTI B Għall-implimentazzjoni tal-prinċipji uniformi ta' Anness VI, għandhom jitqiesu l-konklużjonijiet tar-rapport ta' reviżjoni dwar il-methamidophos, u partikolarment l-Appendiċijiet I u II tiegħu. L-Istati Membri jeħtiġilhom jiżguraw li d-detenturi ta' l-awtorizzazzjonijiet jirrappurtaw sa mhux aktar tard mill-31 ta' Diċembru ta' kull sena dwar l-inċidenzi ta' problemi tas-saħħa fost l-operaturi. L-Istati Membri jistgħu jirrikjedu li jingħata tagħrif, bħal data dwar il-bejgħ u s-servej tax-xejriet ta' l-użu, ħalli tkun tista' tinkiseb stampa realistika tal-kundizzjonijiet ta' l-użu u l-impatt tossikoloġiku possibbli tal-methamidophos. L-Istati Membri għandhom jitolbu s-sottomissjoni ta’ iktar studji sabiex jikkonfermaw l-evalwazzjoni tar-riskju għall-għasafar u l-mammiferi. Huma għandhom jaċċertaw lin-notifikanti li fuq talba tagħhom il-methamidophos ġie inkluż f’ dan l-Anness jipprovdu dawn l-istudji lill-Kummissjoni fi żmien sena mid-dħul fis-seħħ ta’ din id-Direttiva. |

”

[1] ĠU L 230, 19.8.1991, p. 1. Id-Direttiva kif emendata l-aħħar mid-Direttiva tal-Kummissjoni 2006/74/KE (ĠU L 238, 30.08.2006, p. 17).

[2] ĠU L 366, 15.12.1992, p. 10. Ir-Regolament kif emendat l-aħħar bir-Regolament (KE) Nru 2266/2000 (ĠU L 259, 13.10.2000, p. 10).

[3] ĠU L 107, 28.4.1994, p. 8. Ir-Regolament kif emendat l-aħħar bir-Regolament (KE) Nru 2230/95 (ĠU L 225, 22.9.1995, p. 1).

[4] L-Opinjoni tal-Bord Xjentifiku dwar is-Saħħa tal-Pjanti, il-Prodotti tal-protezzjoni tal-Pjanti u r-Residwi tagħhom fuq talba tal-Kummissjoni rigward l-evalwazzjoni tal- methamidophos fit-tossikoloġija fil-kuntest tad-Direttiva tal-Kunsill 91/414/KEE (Il-Ġurnal ta' l- EFSA (2004), 95, 1-15) adottat fl-14 ta' Settembru 2004.

[5] L-Opinjoni tal-Bord Xjentifiku dwar is-Saħħa tal-Pjanti, il-Prodotti tal-protezzjoni tal-Pjanti u r-Residwi tagħhom fuq talba tal-Kummissjoni rigward l-evalwazzjoni tal- methamidophos fl-ekotossikoloġija fil-kuntest tad-Direttiva tal-Kunsill 91/414/KEE (Il-Ġurnal ta' l- EFSA (2004), 144, 1-50) adottat fl-14 ta' Diċembru 2004.

[6] Aktar dettalji dwar l-identità u l-ispeċifikazzjoni tas-sustanza attiva huma pprovduti fir-rapport tar-reviżjoni.