—

Ir-rikorrenti jsostnu li kien hemm ksur tal-Artikolu 105 TFUE safejn il-Kummissjoni eżerċitat il-marġni ta’ diskrezzjoni tagħha illegalment meta ddeċidiet li ma twettaqx investigazzjoni iktar profonda wara l-ilment li kienu ppreżentaw. Ir-rikorrenti jaffermaw f'dan ir-rigward li l-konvenuta invokat evalwazzjonijiet żbaljati tal-provi li kienu pprovdew sabiex tipprova l-ksur tal-Artikoli 101 u 102 TFUE, u naqset ukoll li tieħu inkunsiderazzjoni l-ġurisprudenza rilevanti.

—

Skont ir-rikorrenti, fid-deċiżjoni kkontestata, il-Kummissjoni ddeċidiet, b'mod żbaljat u fl-assenza ta’ xi evalwazzjoni teknika jew legali, li ma kienx probabbli li tistabbilixxi ksur tal-Artikolu 102 TFUE, kemm f'termini ta’ dominanza (relatati mal-eżistenza tal-programm ta’ privattivi Philips kif ukoll l-aġir tagħha indipendenti mill-kompetituri u l-fornituri) u f'termini ta’ aġir abbużiv li jikkonsisti fl-istabbiliment ta’ prezzijiet diskriminatorji u l-impożizzjoni ta’ ffirmar ta’ kuntratti ta' liċenzja minħabba ksur allegat tal-privattivi kollha tagħha, li qatt ma ġew ippruvati.

—

Ir-rikorrenti jsostnu f'dan ir-rigward li l-Kummissjoni ma evalwatx sew il-provi prodotti insostenn tal-ksur tal-Artikolu 101 TFUE, billi kkonkludiet li l-programm PLP (“Patent Licensing Program”) u l-kuntratti ta’ liċenzji inkroċjati bejn Philips, Osram u Zumtobel jikkostitwixxu ftehim jew prattika miftiehma fis-sens ta’ dan l-artikolu, li hija aċċettat in-natura unilaterali tal-aġir mingħajr twettiq ta’ kontrolli (li għalhekk jammonta għal għarfien tal-ksur tal-Artikolu 102 TFUE) u ma kkunsidratx il-fatt li, għall-kuntrarju, kuntratt imfassal unilateralment, bħal dak inkwistjoni, jista’ jaħbi preċiżament ftehim illegali. Barra minn dan huwa l-fatt li ma kienx jaqa’ fuq l-assoċjazzjonijiet li għamlu l-ilment biex juru l-eżistenza ta’ dannu reali fis-suq tal-fornitur, peress li kien biżżejjed għalihom li jipprovdu informazzjoni li abbażi tagħhom il-Kummissjoni setgħet imbagħad u kellha d-dmir li tagħmel analiżi fil-fond.