Dikjarazzjoni: Dan is-sommarju eżekuttiv jorbot biss lis-servizzi tal-Kummissjoni involuti fit-tħejjija tiegħu u ma jippreġudikax il-forma finali ta’ xi deċiżjoni li tista' tittieħed mill-Kummissjoni.

DOKUMENT TA’ ĦIDMA TAL-PERSUNAL TAL-KUMMISSJONI

SOMMARJU EŻEKUTTIV TAL-VALUTAZZJONI TAL-IMPATT

Li jakkumpanja d-dokument

Abbozz ta' Proposta għal Regolament li jemenda r-Regolament (KE) Nru 273/2004 dwar il-prekursuri tad-droga

1.           Definizzjoni tal-problema

1.1.        Għaliex hija problema l-prevenzjoni ineffettiva tad-dirottament tal-anidride aċetiku?

Il-prekursuri tad-drogi huma kimiċi li għandhom firxa wiesgħa ta’ użi leġittimi, iżda jistgħu wkoll jiġu użati ħażin għall-manifattura illeċita ta' drogi narkotiċi u ta’ sustanzi psikotropiċi. Sabiex ikun evitat id-dirottament tagħhom ‑ għall-produzzjoni illegali tad-droga minflok għall-kummerċ legali ‑ ġie stabbilit qafas regolatorju speċifiku (kemm fil-livell internazzjonali[1] u kemm fl-UE[2]) sabiex ikunu identifikati t-tranżazzjonijiet suspettużi.

Il-prevenzjoni ineffettiva tad-dirottament tal-Anidride Aċetiku (AA), il-prekursur ewlieni tad-droga għall-produzzjoni tal-eroina, fil-qafas tal-leġiżlazzjoni applikabbli tas-suq intern dwar il-prekursuri tad-droga ġiet identifikata bħala l-akbar problema matul l-aħħar snin[3]. L-AA, dirottat mill-kummerċ legali tiegħu fl-Ewropa, jiġi ttraffikat lejn l-Afganistan, li hu s-sors globali ewlieni tal-eroina, li minnha l-Ewropa biss tikkonsma kważi 20%.

Il-kawżi ewlenin tal-problema u tal-konsegwenzi tagħha jidhru hawn taħt:

KAWŻA || PROBLEMA || KONSEGWENZI DIRETTI || KONSEGWENZI INDIRETTI

Fl-2008, fl-UE twaqqfu jew ġew sekwestrati 241 tunnellata ta’ AA, li kienu jkunu biżżejjed biex jiġu prodotti bejn 150 u 223 tunnellata ta’ eroina, li jammontaw għal madwar 50% tal-produzzjoni Afgana fis-sena. Anke jekk l-istatistika fl-2009-2010 wriet tnaqqis sinifikanti ta' AA imwaqqaf jew sekwestrat fl-UE[4], bosta Stati Membri, kif ukoll il-Bord Internazzjonali għall-Kontroll tan-Narkotiċi (INCB), iħossu li l-mekkaniżmi tar-Regolament (KE) Nru 273/2004 għall-kontroll tal-AA ma humiex biżżejjed.

1.2.        Min jintlaqat?

L-Istati Membri jintlaqtu meta jiġu biex iwettqu azzjonijiet ta’ infurzar kif ukoll fejn jidħlu l-ispejjeż li jirriżultaw mill-użu tal-eroina. Barra minn hekk, il-pubbliku jħallas ukoll il-prezz tal-kriminalità relatata mad-droga.

Iċ-ċittadini tal-UE jiġu affettwati mill-provvista tal-eroina prodotta mill-AA dirottat kif ukoll mill-kriminalità relatata mad-droga.

Il-kumpaniji li jipproduċu jew jikkummerċjalizzaw l-AA jistgħu jesperjenzaw (attentati) ta’ dirottament fi kwalunkwe stadju tal-maniġġ tas-sustanza. Apparti milli jħarsu l-istabbilimenti u l-proċessi tagħhom kontra s-serq, dawn għandhom jirreġistraw l-istabbilimenti tagħhom mal-awtoritajiet u jridu jkunu viġilanti biex jevalwaw b’mod kritiku jekk il-klijenti tagħhom jużawx is-sustanza biss għall-iskopijiet leċiti li jkunu ġew iddikjarati[5]. It-tranżazzjonijiet suspettużi għandhom jiġu nnotifikati lill-awtoritajiet. L-utenti aħħarin (li jixtru l-AA biss għal skopijiet ta' produzzjoni) ikollhom obbligi aktar limitati: ma jkollhomx għalfejn jirreġistraw iżda jkunu jridu jipprovdu dikjarazzjoni mill-klijent meta jagħmlu l-ordnijiet.

2.           Analiżi tas-sussidjarjetà

Ir-Regolament (KE) Nru 273/2004 dwar il-prekursuri tad-droga huwa bbażat fuq l-Artikolu 114 tat-TFUE (li qabel kien l-Artikolu 95 TKE). Ir-Regolament stipula rekwiżiti komuni għall-monitoraġġ u l-kontroll tal-kummerċ tal-prekursuri tad-droga, u dan sabiex tkun żgurata l-libertà tal-kummerċ leċitu ta’ dawn il-kimiki fl-UE. Għalkemm l-Art. 10 tar-Regolament jitlob lill-Istati Membri biex jadottaw miżuri nazzjonali b’mod li jippermettu lill-awtoritajiet kompetenti jwettqu l-kompiti tagħhom ta’ kontroll u ta’ monitoraġġ, kwalunkwe reviżjoni ġenerali tal-mekkaniżmu ta' kontroll u ta’ monitoraġġ tkun trid tiġi adottata fil-livell Ewropew sabiex ma jinħolqux ostakli bla bżonn lill-kummerċ leċitu tal-prekursuri tad-droga fl-UE.

3.           Objettivi

L-objettivi ta’ politika ġenerali

· Li tikkontribwixxi fil-ġlieda globali kontra t-traffiku illeċitu tad-drogi. Il-prevenzjoni tad-dirottament tal-prekursuri tad-droga huwa element importanti li permezz tiegħu l-UE tissodisfa l-obbligi tagħha skont l-Artikolu 12 tal-Konvenzjoni tan-Nazzjonijiet Uniti tal-1988.

· L-iżgurar tal-funzjonament tajjeb tas-suq intern fil-każ tal-prekursuri tad-drogi, billi jiġi żgurat li l-operaturi jkunu suġġetti għal regoli armonizzati fl-UE filwaqt li jiġi evitat piż amministrattiv bla bżonn għall-intrapriżi u għall-awtoritajiet kompetenti.

L-objettivi speċifiċi tal-politika

· Il-prevenzjoni tat-tentattivi ta’ dirottament fis-suq intern tal-UE, hekk li jitrażżan is-sehem ta’ AA dirottat li jkun oriġina mill-UE għall-produzzjoni ta’ drogi illeċiti, jiġifieri l-eroina.

· Jiġu evitati distorsjonijiet tas-suq li jirriżultaw minn kontroll mhux armonizzat tal-prekursuri tad-droga fl-UE u b’hekk jiġu limitati l-ispejjeż għall-operaturi involuti fil-katina tal-valur tal-prekursuri tad-droga.

L-objettivi tal-politika operazzjonali

· Li jonqsu t-tentattivi ta' dirottament u ta' sekwestri fl-UE.

· Li jkun introdott standard ta’ kontrolli uniformi, effikaċi u effiċjenti tal-prekursuri tad-droga fis-suq intern tal-UE.

4.           Għażliet ta’ Politika

Għażla 1: ebda azzjoni: Il-leġiżlazzjoni tal-UE tibqa’ kif inhi (l-għażla bażika)

Ir-Regolament (KE) Nru 273/2004 ma jiġix immodifikat. Il-Kummissjoni u l-Istati Membri ikomplu bl-isforzi tagħhom biex titjieb l-implimentazzjoni tar-regoli attwali. L-Istati Membri, jekk iħossu l-ħtieġa, ikunu jistgħu jadottaw leġiżlazzjoni nazzjonali ulterjuri skont l-Artikolu 10 tar-Regolament, suġġetti għal notifika u għal skrutinju skont id-Direttiva 98/34/KE.

Għażla 2: obbligi ta’ rappurtar aktar b’saħħithom

L-obbligi ta’ rappurtar għall-operaturi jissaħħu biex jitkattar l-għarfien tal-Istati Membri, hekk li jkun hemm titjib fl-ispezzjonijiet fil-mira u f’attivitajiet oħra marbuta mal-infurzar. Ikunu jistgħu jiġu applikati żewġ subgħażliet, separatament jew flimkien: (a) it-tkabbir tal-frekwenza u (b) it-twessigħ tal-ambitu tar-rappurtar.

Għażla 3: obbligi aktar b’saħħithom għall-operaturi marbuta mad-dikjarazzjonijiet mill-klijent mill-utenti aħħarin

L-operaturi mhux se jitħallew jikkunsinnaw sustanzi skedati fil-kategorija 2 sakemm id-dikjarazzjoni mill-klijent, li tkun waslet mal-ordni, ma tkunx mimlija sew u sakemm dawn ma jkunux ivverifikaw li l-utent aħħari għandu motivi ġenwini għall-ordni tiegħu. Jekk meħtieġ, l-operaturi ikollhom jinvolvu l-awtoritajiet tagħhom. Il-verifika tat-tagħrif tkun trid tiġi dokumentata. Barra minn hekk, mas-sustanzi kkunsinnati tkun trid tiġi pprovduta kopja id-dikjarazzjoni mill-klijent. L-għażla tista' tissaħħaħ billi jitnaqqas jew jitneħħa l-limitu tal-kwantitajiet minimi previsti fl-Artikolu 6 tar-Regolament. Jistgħu jiġu differenzjati żewġ subgħażliet: l-obbligi japplikaw għall-AA biss (a) jew għas-sustanzi tal-kategorija 2 kollha (b).

Għażla 4: l-operaturi jintalbu jinnotifikaw sistematikament lill-utenti aħħarin ġodda lill-awtoritajiet għal verifika

L-operaturi li jqiegħdu sustanzi skedati fil-kategorija 2 fis-suq jista’ jkollhom jinnotifikaw sistematikament l-ordnijiet kollha mill-utenti aħħarin li jkunu klijenti ġodda lill-awtoritajiet, u jitħallew jikkunsinnaw biss wara li jkunu rċevew il-ftehim tal-awtoritajiet. L-awtoritajiet ikunu jridu jivverifikaw il-mottivi leġittimi tal-utenti aħħarin, jekk meħtieġ billi jikkooperaw mal-awtoritajiet ta' Stat Membru ieħor. L-għażla tista' tissaħħaħ billi jitnaqqas jew jitneħħa l-limitu tal-kwantitajiet minimi previsti fl-Artikolu 6 tar-Regolament. Jistgħu jiġu differenzjati żewġ subgħażliet: l-obbligi japplikaw għall-AA biss (a) jew għas-sustanzi tal-kategorija 2 kollha (b).

Għażla 5: tintalab ir-reġistrazzjoni tal-utenti aħħarin u jissaħħu r-rekwiżiti għar-reġistrazzjoni

L-utenti aħħarin tas-sustanzi skedati fil-kategorija 2 jintalbu jirreġistraw. In-numru ta’ reġistrazzjoni ikun irid jiġi inkluż f'kull dikjarazzjoni mill-klijent hekk li l-operaturi jkunu jistgħu jivverifikaw li l-ordnijiet huma leġittimi. L-awtoritajiet ikollhom jivverifikaw in-negozji tal-utenti aħħarin qabel ir-reġistrazzjoni sabiex jaraw li n-numru tar-reġistrazzjoni hu wieħed leġittimu. Il-leġiżlazzjoni Ewropea tkun tispeċifika rekwiżiti u kundizzjonijiet aktar dettaljati għall-għoti, ir-rifjut u l-irtirar tar-reġistrazzjoni tal-utenti aħħarin (u tal-operaturi inġenerali). L-għażla tkun tista' tissaħħaħ billi jitnaqqas jew jitneħħa l-limitu tal-kwantitajiet minimi previst fl-Artikolu 6 tar-Regolament, u/jew billi jipprevedi eżenzjonijiet għal ċerti kategoriji ta’ utenti aħħarin, bħal universitajiet jew istituzzjonijiet ta' riċerka. Jistgħu jiġu differenzjati żewġ subgħażliet: l-obbligi japplikaw għall-AA biss (a) jew għas-sustanzi tal-kategorija 2 kollha (b).

Għażla 6: l-AA titmexxa mill-kategorija 2 għall-kategorija 1

L-AA titmexxa minn kategorija 2 għall-kategorija 1, li jkun ifisser li dawk kollha involuti fil-kummerċ u l-użu tal-AA ikunu jridu jiksbu liċenzja qabel ma jakkwistaw jew joħorġu l-AA fis-suq, u jkollhom jikkonformaw mar-rekwiżiti l-oħra kollha tal-operaturi liċenzjati.

5.           Valutazzjoni tal-Impatti

L-ispejjeż miż-żieda fil-piżijiet amministrattivi skont l-għażliet differenti ġew ikkwantifikati u huma mqassra fit-tabella komparattiva fit-Taqsima 6. Il-benefiċċji huma deskritti abbażi tal-kwalità.

5.1.        Għażla 1: ebda azzjoni

L-ebda piż amministrattiv addizzjonali ma jiġi impost fil-livell Ewropew sew fuq l-intrapriżi kif ukoll fuq l-awtoritajiet kompetenti, imma tkun mistennija żieda fil-piżijiet amministrattivi fil-livell nazzjonali kemm-il darba l-Istati Membri jintroduċu miżuri nazzjonali kumplimentari.

Fejn tidħol l-effettività fil-prevenzjoni ta’ dirottament, l-istatistika riċenti ta’ kunsinni sekwestrati u mwaqqfa indikaw tnaqqis evidenti, li jissuġġerixxi li l-isforzi biex titjieb l-implimentazzjoni diġà ġabet titjib tanġibbli f’dik li hi l-effettività tal-leġiżlazzjoni attwali biex tipprevjeni d-dirottament.

Min-naħa l-oħra, il-punti dgħajfa identifikati tar-Regolament (KE) Nru 273/2004 se jibqgħu hemm – anke jekk dawn jistgħu jitnaqqsu permezz ta’ implimentazzjoni aħjar. L-Istati Membri xorta jistgħu jaraw il-ħtieġa li jadottaw aktar miżuri nazzjonali biex isaħħu l-kontroll tal-kummerċ tal-prekursuri tad-drogi[6]. Din tista’ taħdem kontra l-objettiv biex jitħares is-suq intern. Fl-aħħar nett, il-kritika internazzjonali li l-UE (kondiviża wkoll minn xi Stati Membri) tibqa’ "inattiva" minkejja l-appelli kontinwi biex issaħħaħ il-kontroll tal-leġiżlazzjoni tas-suq intern tagħha se tibqa’ hemm.

5.2.        Għażla 2: obbligi ta’ rappurtar aktar b’saħħithom

Fejn tidħol l-effettività fil-prevenzjoni ta’ dirottament, l-awtoritajiet kompetenti għandhom jistennew li jkollhom għarfien aħjar tal-flussi tal-kummerċ legali. Dan jista’ jwassal biex jiġu individwati aktar faċilment xejriet kummerċjali mhux tas-soltu li jindikaw dirottament. Madankollu, sabiex tkun tista’ titqabbel id-dejta kummerċjali mill-operaturi kollha fl-UE, irid jinġabar ammont kbir ħafna ta' dejta li tkun trid titqabbel bejn il-fruntieri interni tal-UE. Anki din il-kontroverifika madwar l-UE tista’ tirriżulta ineffettiva minħabba li 0.2% biss tal-produzzjoni totali tal-AA tiġi dirottata, tant li l-approċċ "ivverifika t-tranżazzjonijiet kollha" huwa inqas promettenti minn azzjonijiet immirati u bbażati fuq ir-riskju.

L-Istati Membri forsi jibqgħu tal-fehma li biex jissaħħaħ il-kontroll tal-kummerċ tal-prekursuri tad-droga jkun hemm bżonn li jiġu adottati aktar miżuri nazzjonali. Dan jaħdem kontra l-objettiv li tiġi evitata l-frammentazzjoni tas-suq intern.

5.3.        Għażla 3: obbligi aktar b’saħħithom għall-operaturi marbuta mad-dikjarazzjonijiet mill-konsumatur mill-utenti aħħarin

Il-kalkolu tal-ispejjeż għal din l-għażla jiddistingwi żewġ xenarji (dettaljati fit-tabella ta’ ħarsa ġenerali fit-taqsima 6). Fl-ewwel xenarju, anki llum, l-operaturi jagħmlu negozju biss ma’ klijenti li jafuhom u li jkunu vverifikawhom. Għalhekk, l-obbligu prinċipali skont l-għażla 3, il-verifika tad-dikjarazzjoni mill-konsumatur, ċertament titqies bħala xi ħaġa li baqgħet kif kienet. L-uniċi spejjeż amministrattivi addizzjonali jkunu dawk ta’ meta tintbagħat kopja tad-dikjarazzjoni mill-konsumatur. L-operaturi jkunu jistgħu jivverifikaw huma stess lill-klijenti tagħhom, sabiex ma jkun hemm l-ebda spejjeż addizzjonali għall-awtoritajiet.

Skont it-tieni xenarju, 30% tal-operaturi għadhom mhumiex jaġixxu b’mod ideali u b'hekk ikollhom iżidu l-isforzi tagħhom. Barra minn hekk, wieħed jassumi li madwar 10% tad-dikjarazzjonijiet mill-klijent kollha jkunu jeħtieġu verifika mill-awtoritajiet, għaliex l-operaturi ma jkunux jistgħu jivverifikawhom għalkollox huma.

Fejn tidħol l-effettività fil-prevenzjoni ta’ dirottament, l-għażla 3 tista’ żżid ir-responsabbilità tal-operaturi meta jiġu biex jagħżlu l-klijenti tagħhom. Anke jekk l-operaturi diliġenti jkunu diġà wettqu l-verifiki meħtieġa, il-kjarifika tat-test legali tispiċċa twassal għal viġilanza ogħla tal-operaturi u żżid ukoll in-numru ta' każijiet fejn l-operaturi ikollhom jikkuntattjaw lill-awtoritajiet tagħhom.

Il-benefiċċji għas-suq intern jkunu probabbilment simili għal tal-għażla 1: L-Istati Membri kapaċi jibqgħu jikkunsidraw li jkun hemm bżonn li jadottaw aktar miżuri nazzjonali biex jissaħħaħ il-kontroll tal-kummerċ tal-prekursuri tad-drogi, xi ħaġa li tkun ta’ ħsara għas-suq intern.

5.4.        Għażla 4: l-operaturi jintalbu jinnotifikaw sistematikament lill-utenti aħħarin ġodda lill-awtoritajiet għal verifika

Fejn tidħol l-effettività fil-prevenzjoni ta’ dirottament, l-għażla 4 għandha tiffoka l-isforzi tal-operaturi fuq klijenti ġodda – b’mod partikolari dawk li jiddikjaraw li huma utenti aħħarin li ma jkollhomx numru ta' reġistrazzjoni, li fil-każ tagħhom huwa aktar diffiċli li wieħed jivverifika l-motivi ġenwini meta jagħmlu ordni. In-notifikazzjoni sistematika tal-klijenti ġodda kollha lill-awtoritajiet tippermettilhom iwettqu verifiki xierqa kollha. Jekk ikun hemm bżonn, dawn ikunu jistgħu jipprevjenu u/jew jissorveljaw it-twassil tal-kunsinna. Madankollu, li r-responsabbiltà tingħadda lill-awtoritajiet, li fl-aħħar mill-aħħar jiddeċiedu dwar ir-relazzjonijiet kummerċjali potenzjali ġodda, kapaċi taħdem kontra l-inċentiv ta’ viġilanza min-naħa tal-operaturi stess.

Bħalma l-għażla 4 se żżid l-għarfien tal-awtoritajiet fuq parti mill-utenti aħħarin, din probabbilment tnaqqas il-probabbiltà li l-Istati Membri jadottaw miżuri nazzjonali addizzjonali. Madankollu, xi wħud xorta jkunu jistgħu jikkunsidraw l-għażla 4 bħala waħda insuffiċjenti u jadottaw aktar miżuri ta' kontroll, xi ħaġa li tkun ta' ħsara għas-suq intern.

5.5.        Għażla 5: tintalab ir-reġistrazzjoni tal-utenti aħħarin u jissaħħu r-rekwiżiti għar-reġistrazzjoni

Fejn tidħol l-effettività fil-prevenzjoni ta’ dirottament ir-reġistrazzjoni tippermetti lill-Istati Membri jivverifikaw il-motivi ġenwini tal-utenti aħħarin qabel l-ewwel ordni. Dan ikun jippermetti li l-operaturi jivverifikaw aktar faċilment lill-klijenti tagħhom, minħabba li d-dikjarazzjoni mill-konsumatur tkun tinkludi numru ta’ reġistrazzjoni uffiċjali.

L-għażla 5 iżżid bil-kbir l-għarfien tal-awtoritajiet fuq l-utenti aħħarin kollha u dan jista’ jnaqqas sew mill-probabbiltà li l-Istati Membri jqisu li huwa meħtieġ li jiġu adottati aktar miżuri nazzjonali. L-għażla 5 għalhekk tkun effettiva ħafna biex tippriserva s-suq intern.

5.6.        Għażla 6: l-AA titmexxa mill-kategorija 2 għall-kategorija 1

Fejn tidħol l-effettività fil-prevenzjoni ta’ dirottament, il-benefiċċji huma mistennija li jkunu simili jew ogħla minn dawk tal-għażla 5, minħabba li l-utenti aħħarin u l-operaturi tal-AA kollha jkunu jaqgħu taħt is-sistema stretta ta' liċenzji taħt il-kontroll dirett tal-awtoritajiet. Dan iwassal ukoll biex titnaqqas bil-kbir il-probabbiltà li l-Istati Membri jadottaw aktar miżuri nazzjonali, hekk li l-għażla 6 tkun effettiva ħafna għall-preservazzjoni tas-suq intern.

6.           Tqabbil tal-Għażliet

It-tabella 1[7] tiġbor l-informazzjoni dwar il-benefiċċji mistennija (f’dik li hi effettività biex jinkisbu l-objettivi operattivi) u l-ispejjeż għal kull waħda mis-(sub)għażliet.

L-għażliet 4a u 5a għandhom l-aktar proporzjon favorevoli bejn spejjeż u benefiċċji. L-għażla 4a tidher l-aħjar waħda inkwantu tal-ispejjeż totali għall-awtoritajiet u l-kumpaniji meħuda flimkien. Madankollu, meta wieħed jinjora l-ispejjeż "ta' darba" għar-reġistrazzjoni tal-utenti aħħarin eżistenti kollha fl-għażla 5a, id-differenzi fl-ispejjeż annwali kontinwi huma inqas evidenti: L-għażla 5a hija inqas iebsa għall-kumpaniji, filwaqt li l-għażla 4a hija inqas ta’ piż fuq l-awtoritajiet.

Apparti l-ispejjeż annwali iktar baxxi għall-kumpaniji, l-għażla 5a kienet ġiet appoġġata mill-maġġoranza tal-Istati Membri matul il-konsultazzjonijiet mal-partijiet interessati. L-għażla 5a għandha wkoll tissodisfa aħjar il-kritika espressa fil-livell internazzjonali li fl-UE ma jeżistix kontroll sistematiku tal-utenti aħħarin tal-AA.

Fid-dawl tal-ispejjeż relattivament baxxi ta’ kull għażla minnhom b’rabta mal-valur ġenerali tas-suq tal-produzzjoni tal-AA Ewropea, mhuwiex mistenni impatt tanġibbli fuq il-kompetittività tal-industrija Ewropea.[8]

Tabella 1: Tabella komparattiva dwar l-ispejjeż u l-benefiċċji

Għażla || Benefiċċji/Effettività || Sspejjeż għall-kumpaniji: || Spejjeż għall-awtoritajiet || Total tal-ispejjeż

Għall-prevenzjoni ta’ dirottament || Ħarsien tas-suq internazzjoanli

1 || 0 || 0 || € 0 Riskju ta’ suq frammentat || € 0 || € 0

2 || 2a || 0 || 0 || € 5.6 miljun/sena || € 1 miljun/sena || € 6.6 miljun/sena

|| 2b || 0 || 0 || € 1.5 miljun/sena || € 0.3 miljun/sena || € 1.8 miljun/sena

|| 2a+2b || 0 || 0 || € 11.4 miljun/sena || € 2.1 miljun/sena || € 12.5 miljun/sena

3 || 3a (AA biss) || + || 0 || Xen. 1 100% (jibqa’ kollox kif kien) Scen. 2: (70% jibqa’ kollox kif kien): || € 0.2 miljun/sena € 4.7 miljun/sena || Xen. 1: (ebda involviment mill-awtorità) Xen. 2: (awtoritajiet involuti f’10% tal-każijiet) || € 0 € 0.2 miljun/sena || Xen. 1: Xen. 2: || € 0.2 miljun/sena € 4.9 miljun/sena

|| 3b || + || 0 || Xen. 1: Xen. 2: || € 1 miljun/sena € 26.3 miljun/sena || Xen. 1: Xen. 2: || € 0 € 1.2 miljun/sena || Xen. 1: Xen. 2: || € 1 miljun/sena € 27.5 miljun/sena

4 || 4a (AA biss) || +[+] || ++ || € 0.04 miljun/sena || € 0.005 miljun/sena || € 0.05 miljun/sena

|| 4b || +[+] || ++ || € 0.5 miljun/sena || € 0.03 miljun /sena || € 0.53 miljun/sena

5 || 5a (AA biss) || ++ || +++ || Xen. alternattiv: (ħlasijiet għar-reġistrazzjoni tal-kumpaniji) || € 0.16 miljun + € 0.01 miljun/sena € 0.55 miljun + € 0.06 miljun/sena || Xen.. alternattiv: || € 0.39 miljun +€ 0.05 miljun/sena € 0 || Xen. alternattiv: || € 0.55 miljun + € 0.06 miljun/sena € 0.55 miljun + € 0.06 miljun/sena

|| 5b || ++ || +++ || Xen.. alternattiv: (ħlasijiet għar-reġistrazzjoni tal-kumpaniji) || € 0.5 miljun + €0.07 miljun/sena € 2.3 miljun + € 0.3 miljun/sena || Xen. alternattiv: || € 1.8 miljun + € 0.2 miljun/sena € 0 || Xen.. alternattiv: || € 2.3 miljun + € 0.3 miljun/sena € 2.3 miljun + € 0.3 miljun/sena

6 || (AA biss) || +++ || +++ || [jew: inkl. il-kummerċ estern Xen. alternattiv: (ħlasijiet għal-liċenzjar tal-kumpaniji) || € 0.3 miljun + € 0.2 miljun/sena + 0.5 miljun/sena] € 2.0 miljun + € 0.3 [jew + 0.9] miljun/sena || [jew: inkl. il-kummerċ estern Xen. alternattiv: || € 1.7 miljun + € 0.1 miljun/sena + 0.4 miljun/sena] € 0 || [jew inkl. il-kummerċ estern. Xen. alternattiv: || € 2.0 miljun + € 0.3 miljun/sena + 0.9 miljun/sena] € 2.0 miljun + € 0.3 [jew + 0.9] miljun/sena

L-alternattivi preferuti jkollhom effetti fuq l-SMEs, li jiġu f'kuntatt mal-AA primarjament bħala utenti aħħarin. Matul il-konsultazzjoni, l-għażla 5 ġiet it-tieni għażla preferuta (wara dik fejn jinżamm l-istatus quo). Dan ir-riżultat jikkorrispondi ma’ din l-analiżi li l-għażla 5 tkun ta’ inqas piż fuq l-intrapriżi.

L-ebda waħda mill-għażliet ppreferiti ma tipprevedi l-esklużjoni ġenerali tal-mikrokumpaniji, minħabba li dan jispiċċa jiffaċilita l-possibilità ta’ evażjoni mill-kontrolli tal-leġiżlazzjoni. Madankollu, il-mikrokumpaniji jibbenefikaw mill-limiti eżistenti fil-leġiżlazzjoni[9]. Fl-aħħar nett, fl-għażla 5a tkun prevista protezzjoni speċifika tal-mikroSMEs biex timpedixxi lill-Istati Membri milli jimponu spejjeż ta’ reġistrazzjoni fuq il-mikroSMEs[10] sabiex jirkupraw l-ispejjeż tagħhom stess.

7.           Il-monitoraġġ u l-evalwazzjoni

Il-Kummissjoni:

· Il-ġbir, l-analiżi u r-rappurtar tal-istatistika annwali tal-Istati Membri dwar il-kunsinni sekwestrati jew imwaqqfa.

· Monitoraġġ tal-leġiżlazzjoni nazzjonali addizzjonali tal-Istati Membri.

· Sostenn fl-implimentazzjoni tar-Regolament emendat (l-aġġornament tal-linji gwida eżistenti, l-għodda tal-e-learning, dokument bi FAQ, eċċ)

· L-implimentazzjoni ta' bażi tad-dejta li qed jiġi żviluppat biex jiffaċilita l-ġbir u l-analiżi tal-istatistika.

· Ħames snin wara l-implimentazzjoni tal-emendi leġiżlattivi: evalwazzjoni tal-leġiżlazzjoni emendata issir b'konsultazzjoni mal-Istati Membri u mal-partijiet interessati.

L-Istati Membri:

· Attivitajiet ta’ monitoraġġ kontinwu dwar l-implimentazzjoni korretta tal-leġiżlazzjoni.

[1]               Il-Konvenzjoni tan-Nazzjonijiet Uniti kontra t-Traffikar Illeċitu tad-Drogi Narkotiċi u s-Sustanzi Psikotropiċi, disponibbli fi: http://www.incb.org/pdf/e/conv/1988_convention_en.pdf

[2]               Ir-Regolament (KE) Nru 273/2004 tal-Parlament Ewropew u tal-Kunsill tal-11 ta’ Frar 2004 u għall-Art. 32 tar-Regolament tal-Kunsill (KE) Nru 111/2005 dwar l-implimentazzjoni u l-funzjonament tal-leġiżlazzjoni tal-Komunità dwar il-monitoraġġ u l-kontroll tal-kummerċ tal-prekursuri tad-drogi.

[3]               Rapport tal-Kummissjoni dwar il-funzjonament tal-leġiżlazzjoni tal-UE eżistenti dwar il-prekursuri tad-droga (COM (2009) 709 finali), disponibbli f’: http://eur-lex.europa.eu/LexUriServ/LexUriServ.do?uri=COM:2009:0709:FIN:en:PDF

[4]               33 tunnellata fl-2009 u 21 tunnellata fl-2010.

[5]               L-AA tintuża legalment bħala aġent aċetilatizzanti fl-industrija tal-kimika, tar-ritratti u dik farmaċewtika. Tintuża fil-produzzjoni tal-plastik, tat-tessili, taż-żebgħa, tal-aġenti fotokimiċi, tal-fwejjaħ, tal-isplussivi u tal-aspirina.

[6]               Pereżempju: Il-Belġju, l-Ungerija u l-Italja jitolbu li l-operaturi tagħhom jinnotifikaw kull tranżazzjoni ta’ AA lill-awtoritajiet qabel ma tintbagħat ordni.

[7]               L-ispejjeż totali f'din it-tabella huma bbażati fuq it-total eżatt tal-komponenti individwali. Għalhekk ma jikkorrispondux bis-sħiħ mat-totali (imqarrba) tal-komponenti f’din it-tabella.

[8]               L-ispejjeż totali meħuda flimkien ta’ kull għażla minnhom ((€ 0.05 miljun għall-Għażla 4a u € 0.06 miljun għall-Għażla 5a) huma limitati ħafna b’rabta mal-valur totali tas-suq Ewropew tal-AA (> € 257 miljun/sena). Barra minn hekk, l-ispejjeż ta’ darba ta’ € 0.16 miljun għall-kumpaniji u ta’ € 0.29 miljun għall-awtoritajiet huma baxxi meta paragunati.

[9]               L-Art. 6 tar-Regolament (KE) Nru 273/2004 jipprevedi li l-kumpaniji b’bejgħ/xiri tal-AA ’l isfel mill-kwantitajiet annwali ta’ 100 l jiġu esklużi mill-biċċa l-kbira tal-obbligi fil-leġiżlazzjoni.

[10]             L-effetti tal-mogħdija tal-ispejjeż tal-awtoritajiet lill-kumpaniji ġew ikkalkulati bħala "xenarju alternattiv" fl-għażla nru 5.