WERREJ

Mandat......................................................................................................................................... 3

Struttura....................................................................................................................................... 3

1........... L-evoluzzjoni tas-sitwazzjoni tas-suq għall-ħalib u għall-prodotti tal-ħalib.......................... 3

1.1........ L-iżviluppi tas-suq sal-lum............................................................................................... 3

1.1.1..... Il-produzzjoni tal-ħalib.................................................................................................... 3

1.1.2..... Il-prezzijiet tal-ħalib tal-UE mal-ħruġ mill-azjenda agrikola............................................... 4

1.1.3..... Il-prezzijiet, il-livelli tal-ħażniet u l-esportazzjonijiet tal-prodotti tal-ħalib............................ 4

1.1.4..... L-istimi tal-marġnijiet tal-azjendi agrikoli tal-ħalib fl-UE.................................................... 5

1.2........ Il-prospetti tas-suq fuq perjodu ta’ żmien medju.............................................................. 5

2........... It-tneħħija gradwali mingħajr xkiel tal-kwoti tal-ħalib........................................................ 7

2.1........ Il-produzzjoni tal-ħalib ipparagunata mal-limiti massimi tal-kwoti...................................... 7

2.2........ L-evoluzzjoni fil-prezzijiet tal-kwoti tal-ħalib.................................................................... 7

3........... Rimarki ta’ konklużjoni................................................................................................... 8

ANNESS I. IL-PRODUZZJONI TAL-ĦALIB U L-IŻVILUPPI FIL-PREZZIJIET................... 10

ANNESS II. IL-PROSPETTI FUQ PERJODU TA’ ŻMIEN MEDJU FIS-SETTUR TAL-ĦALIB     11

ANNESS III. IL-PRODUZZJONI TAL-ĦALIB META PPARAGUNATA MAL-KWOTA.... 15

ANNESS IV. L-IŻVILUPPI FIL-PREZZIJIET TAL-KWOTI TAL-ĦALIB TAL-UE............... 17

RAPPORT TAL-KUMMISSJONI LILL-KUNSILL U LILL-PARLAMENT EWROPEW

L-evoluzzjoni tas-sitwazzjoni tas-suq u l-kundizzjonijiet konsegwenti għat-tneħħija gradwali mingħajr xkiel tas-sistema tal-kwoti tal-ħalib – it-tieni rapport ta’ impatt tajjeb (“soft landing”)

Mandat

L-Artikolu 184(6) tar-Regolament tal-Kunsill (KE) Nru 1234/2007 tat-22 ta’ Ottubru 2007 li jistabbilixxi organizzazzjoni komuni ta’ swieq agrikoli u dwar dispożizzjonijiet speċifiċi għal ċerti prodotti agrikoli (Ir-Regolament Waħdieni dwar l-OKS) jistipula li l-Kummissjoni għandha tippreżenta rapport qabel il-31 ta’ Diċembru 2010 u l-31 ta’ Diċembru 2012 lill-Parlament Ewropew u lill-Kunsill rigward l-evoluzzjoni tas-sitwazzjoni tas-suq u l-kundizzjonijiet konsegwenti għat-tneħħija gradwali mingħajr xkiel tas-sistema tal-kwoti tal-ħalib, flimkien, jekk ikunu meħtieġa, ma’ proposti adattati. L-ewwel l-hekk imsejjaħ rapport ta’ “soft landing” ġie ppubblikat fit-8 ta’ Diċembru 2010 bil-COM(2010) 727 finali, filwaqt li r-rapport preżenti jikkostitwixxi t-tieni rapport tas-sensiela.

Struttura

Dan ir-rapport jikkonsisti minn tliet partijiet: l-ewwel waħda tiddeskrivi l-evoluzzjoni tas-sitwazzjoni tas-suq għall-ħalib tal-baqar minn nofs l-2010 (id-data tat-tmiem tal-ewwel rapport ta’ “soft landing”) u tispjega fil-qosor il-prospetti fuq perjodu ta’ żmien medju, it-tieni taqsima teżamina kif seħħet it-tneħħija gradwali tas-sistema tal-kwoti tal-ħalib filwaqt li r-rimarki tal-aħħar ġew ippreżentati fit-tielet kapitolu.

1.           L-evoluzzjoni tas-sitwazzjoni tas-suq għall-ħalib u għall-prodotti tal-ħalib

1.1.        L-iżviluppi tas-suq sal-lum

Il-volatilità – għalkemm mhux sal-punt osservat fl-2007-2009 – baqgħet tippersisti fis-suq tal-ħalib sa tmiem l-2010. Hija naqset xi ftit fl-2011 u sa issa fl-2012. Il-prezzijiet fl-2010 u fl-2011 varjaw f’livelli għoljin, biex wasslu għal żieda fil-produzzjoni u korrezzjoni tal-prezz fl-ewwel nofs tal-2012. Il-prezzijiet reġgħu bdew jiċċaqilqu ’l fuq fit-tielet trimestru tal-2012.

1.1.1      Il-produzzjoni tal-ħalib

Il-forniment tal-ħalib tal-baqra fl-UE żdied b’mod konsistenti tul dawn l-aħħar tliet snin: + 1,4 % fl-2010, + 2 % fl-2011 u xi 1,5 % fl-ewwel seba’ xhur tal-2012 meta pparagunat mal-istess perjodu fl-2011.

Il-produzzjoni tal-ħalib espandiet ukoll fir-reġjuni fornituri tal-ħalib prinċipali tad-dinja: il-produzzjoni kollha flimkien tal-Istati Uniti tal-Amerika (USA), tan-New Zealand, tal-Awstralja u tal-Arġentina żdiedet b’5,3 % matul l-2010-2011. Din ix-xejra qed tkompli fl-2012, għalkemm qed jiġi osservat xi tnaqqis fl-USA wara l-mewġa ta’ sħana ta’ dan is-sajf. Meta pparagunata mal-istess perjodu tal-2011, il-produzzjoni tal-ħalib fl-2012 żdiedet bi + 2,8 % fl-USA, bi + 11,4 % fin-New Zealand (sa Lulju biss), bi + 4,7 % fl-Awstralja u bi + 5,9 % fl-Arġentina fl-ewwel tmiem xhur tal-2012 (ara l-grafika 1 fl-Anness I).

1.1.2.     Il-prezzijiet tal-ħalib tal-UE mal-ħruġ mill-azjenda agrikola

Il-prezzijiet medji tal-ħalib tal-UE mal-ħruġ mill-azjenda agrikola żdiedu b’mod kostanti minn April sa Novembru 2010. Huma baqgħu madwar 33 c/kg sa April 2011 u reġgħu żdiedu għal 35,1 c/kg f’Novembru 2011 bħala medja peżata għall-UE-27 (ara l-grafika 2 fl-Anness I). F’Diċembru 2011, f’Jannar u fi Frar 2012 tfaċċat korrezzjoni staġjonali, li kienet tammonta għal – 2 %. Għal finijiet ta’ paragun, il-korrezzjoni staġjonali kienet ta’ - 3 % fil-bidu tal-2010 u ta’ - 1 % fil-bidu tal-2011.

Madankollu, fl-2012, ix-xejra ’l isfel kompliet sas-sajf, billi ġiet issuperata x-xejra staġjonali u billi kien hemm reazzjoni għall-pressjoni minn żieda fil-provvista tal-ħalib fl-UE u barra mill-UE. Il-prezz medju tal-ħalib tal-UE mal-ħruġ mill-azjenda agrikola l-aktar riċenti huwa stmat li jlaħħaq 31,3 c/kg għal Awwissu 2012, li huwa 9,5 % taħt il-prezz medju ta’ Lulju 2011, imma 1,2 % ogħla minn dak ta’ Lulju 2010 u 27 % ogħla mil-livell l-aktar baxx ta’ Mejju 2009.

Kemm il-prezzijiet spot tal-ħalib kif ukoll il-prezzijiet tal-prodotti tal-ħalib l-iktar reċenti u disponibbli fiż-żmien meta tfassal ir-rapport kienu qed jindikaw rkupru fil-futur qrib, li għandu jiġi segwit fi stadju sussegwenti minn prezzijiet ogħla tal-ħalib mal-ħruġ mill-azjenda agrikola.

1.1.3.     Il-prezzijiet, il-livelli tal-ħażniet u l-esportazzjonijiet tal-prodotti tal-ħalib

Minħabba rkupru sinifikanti fil-prezzijiet fl-2010 u fil-parti l-kbira tal-2011 flimkien ma’ sensiela ta’ żviluppi favorevoli tas-suq, ma kien hemm l-ebda xiri sfurzat ta’ intervent fil-perjodu 2010-12 u l-ħażniet pubbliċi huma battala kemm għall-butir kif ukoll għat-trab tal-ħalib xkumat. Is-76 000 t ta’ butir u l-257 000 t ta’ trab tal-ħalib xkumat li nxtraw għall-ħażniet pubbliċi matul il-kriżi tal-2009 kienu rilaxxati lura lis-suq, parti minnhom b’sejħa miftuħa għall-offerti, parti minnhom bl-iskema tal-persuni l-iktar fil-bżonn, mingħajr ma ddisturbaw is-suq.

L-irkupru fil-prezzijiet tal-prodotti tal-ħalib fl-2010 kien dovut għal żieda fid-domanda, b’mod partikolari mill-ekonomiji emerġenti u għal provvisti limitati mill-Emisferu tan-Nofsinhar. L-istess sitwazzjoni kienet tipprevali fl-ewwel nofs tal-2011. Imma minn nofs l-2011 il-prezzijiet tal-prodotti tal-ħalib ġew taħt pressjoni wara żieda fid-disponibbiltà tal-prodotti tal-ħalib mir-reġjuni fornituri prinċipali tal-ħalib tad-dinja. Pressjoni ’l isfel kompliet fl-ewwel xhur tal-2012 sakemm il-prezzijiet tal-prodotti tal-ħalib tal-UE sabu livell tal-qiegħ f’madwar 120 % tal-prezz ta’ intervent (virtwali) fi tmiem Mejju. F’Ġunju, il-prezzijiet bdew jiżdiedu u l-iżviluppi sad-data tat-tfassil tar-rapport preżenti komplew ikunu ’l fuq, b’mod partikolari minħabba tnaqqis fid-disponibbiltà tal-ħalib mill-US wara mewġa ta’ sħana bla preċedent u tnaqqis simultanju fil-produzzjoni tal-ħalib fl-UE wkoll, filwaqt li l-Emisferu tan-Nofsinhar kien fl-istaġun xitwi – ta’ produzzjoni baxxa – tiegħu.

L-esportazzjonjiet tal-UE żdiedu fl-2010 u fl-2011 għall-prodotti tal-ħalib prinċipali kollha, bl-eċċezzjoni tal-butir/taż-żejt tal-butir u tat-trab tal-ħalib intier. L-esportazzjonijiet tal-UE kienu partikolarment dinamiċi għat-trab tal-ħalib xkumat. Sa issa, fl-2012, ġiet ikkonfermata prestazzjoni tajba fl-esportazzjoni, inkluż irkupru evidenti tal-esportazzjonijiet tal-butir li, fuq bażi kumulattiva, issuperaw il-livelli tal-2011 fl-ewwel seba’ xhur tal-2012. Dan inkiseb mingħajr rifużjonijiet tal-esportazzjoni.

1.1.4.     L-istimi tal-marġnijiet tal-azjendi agrikoli tal-ħalib fl-UE

Fuq il-bażi tad-dejta tan-Netwerk tad-Dejta tal-Kontabbiltà Agrikola (FADN), matul il-parti l-kbira tal-2011, żieda fil-kostijiet operattivi tpaċiet b’żieda fil-prezzijiet tal-ħalib. Fl-ewwel trimestru tal-2012, il-marġnijiet tal-ħalib fl-UE naqsu wara li naqsu l-prezzijiet tal-ħalib mal-ħruġ mill-azjenda agrikola filwaqt li xorta baqgħu ’l fuq minn dawk tal-ewwel trimestru tal-2011.

Skont l-ewwel stimi għat-tieni trimestru tal-2012, l-ispejjeż għall-għalf mixtri żdiedu b’6 % filwaqt li l-kostijiet operattivi totali naqsu bi ftit (- 2 %) minħabba tnaqqis sinifikanti fil-kostijiet tal-enerġija (- 10 %). L-indiċi tal-marġni gross niżel bi 17 % minħabba tnaqqis ta’ 8 % fil-prezz tal-ħalib mal-ħruġ mill-azjenda agrikola. L-indiċi tal-marġni gross issa qiegħed 24 % taħt dak tat-tieni trimestru tal-2011, li kien it-tieni l-ogħla sa mill-2007 (sena ta’ referenza għall-UE-27).

Is-sitwazzjoni tvarja minn Stat Membru għall-ieħor u wkoll fi ħdan l-Istati Membri, skont is-sistema ta’ biedja tal-ħalib magħżula u skont it-taħlita ta’ prodotti użati mis-settur tal-ħalib.

1.2.        Il-prospetti tas-suq fuq perjodu ta’ żmien medju

Il-prospetti tas-suq fuq perjodu ta’ żmien medju għall-UE ġew simulati b’verżjoni modifikata tal-mudell Aglink-Cosimo fuq is-suppożizzjoni li ma kien hemm l-ebda bidla fil-Politika Agrikola Komuni (PAK) wara d-deċiżjonijiet tal-Kontroll tas-Saħħa u l-ebda bidla fil-politiki kummerċjali. Din il-perspettiva mhijiex maħsuba sabiex tikkostitwixxi tbassir tal-iżviluppi futuri tas-suq, imma pjuttost sabiex tiddeskrivi x’jista’ jiġri b’sett speċifiku ta’ suppożizzjonijiet u ta’ ċirkustanzi, li kienu ġġudikati plawżibbli fiż-żmien meta saru l-projezzjonijiet. Barra minn hekk, ir-riżultati tal-projezzjonijiet li ġew ippreżentati f’dan ir-rapport huma provviżorji u jistgħu jvarjaw mill-valuri finali, li għandhom jiġu ppubblikati sa Novembru 2012.

Is-suq dinji u l-ambjent tal-politika huma bbażati fuq l-OECD-FAO Agricultural Outlook 2012-2021, adattati skont projezzjonijiet makroekonomiċi iktar reċenti minn Settembru 2012. Uħud mill-iktar muturi importanti tal-projezzjonijiet tas-suq huma l-prospetti għal tkabbir tal-prodott domestiku gross (PDG) tal-UE (tnaqqis ċkejken fl-2012, segwit minn irkupru ekonomiku sussegwenti), id-deprezzament preżunt tal-Euro matul l-ewwel tliet snin tal-perjodu tal-projezzjoni segwit minn apprezzament fl-2014 u fl-2015, u aġġornament tal-projezzjonijiet tal-prezzijiet tas-suq dinji tal-OECD u tal-FAO għall-prodotti tal-ħalib li jinkorpora l-impatt tan-nixfa tal-2012 fl-US u f’xi pajjiżi Ewropej. Fil-każ li waħda minn dawn il-projezzjonijiet/suppożizzjonijiet ma timmaterjalizzax, dan għandu jaffettwa l-projezzjonijiet li jirriżultaw b’mod sinifikanti. Barra minn hekk, l-istess bħal fi kwalunkwe mudell ieħor fuq perjodu ta’ żmien medju sa twil, l-aspettattivi għal volatilità ikbar tal-prezzijiet ma ġewx inkorporati fil-mudell Aglink-Cosimo.

Fuq il-bażi ta’ dawn il-projezzjonijiet, il-prospetti fuq perjodu ta’ żmien medju għas-swieq tal-ħalib jidhru favorevoli. Espansjoni kontinwa tad-domanda dinjija, li tirriżulta minn tkabbir fil-popolazzjoni u fl-ekonomija globali, flimkien ma’ preferenza dejjem ikbar għall-prodotti tal-ħalib (anki minħabba konsum per capita li qed jikber) mistennija jkunu l-muturi prinċipali. Domanda sostnuta għall-importazzjonijiet, partikolarment mill-pajjiżi emerġenti, għandu jkollha impatt pożittiv fuq il-prezzijiet tal-prodotti tal-ħalib, biex b’hekk jitkabbar il-potenzjal tal-esportazzjoni tal-UE. Madankollu, huwa previst li l-ishma tas-suq tal-UE se jonqsu xi ftit għall-maġġoranza tal-prodotti tal-ħalib, minħabba rata ogħla ta’ żieda fl-esportazzjonijiet minn pajjiżi oħrajn.

Huwa previst li mill-2012 ’il quddiem il-produzzjoni tal-ħalib tal-UE se tkompli tiżdied b’rata ta’ tkabbir moderat imma li tibqa’ taħt ir-rata ta’ tkabbir potenzjali pprovduta mit-tneħħija gradwali tal-iskema tal-kwoti tal-ħalib (ara l-grafika 3 u l-grafika 4 fl-Anness II). Huwa previst li l-produzzjoni tal-ħalib tal-UE se tirreġistra żieda kumulattiva ta’ madwar 8 % mill-2009 sal-2022, filwaqt li l-ħalib ikkunsinnat lill-imħaleb għandu jiżdied b’madwar 10 %. Sal-aħħar sena tal-kwoti (2014-15), huwa previst li l-kunsinni tal-ħalib tal-UE jkunu madwar 6 % taħt il-kwota. Huwa previst li l-iskadenza tal-iskema tal-kwoti tal-ħalib se jkollha impatt limitat fuq il-kunsinni tal-ħalib fil-livell aggregat tal-UE.

Il-projezzjonjiet għall-ġobon u għall-prodotti tal-ħalib frisk huma pjuttost pożittivi (ara l-grafika 5 fl-Anness II). Huwa previst li l-produzzjoni tal-UE tal-prodotti tal-ħalib frisk (inklużi l-ħalib għax-xorb, il-krema, il-jogurts, eċċ.) se tiżdied bi kważi 8 % (mill-2009 sal-2022) u tal-ġobon bi kważi 10 %. Il-prospetti għad-domanda kemm fis-suq domestiku kif ukoll f’dak dinji jidhru pożittivi, u minkejja EUR li qed tissaħħaħ lejn it-tieni parti tal-perjodu tal-projezzjoni, domanda sostanzjali fis-suq dinji għandha tippermetti żieda progressiva tal-esportazzjonijiet tal-UE. Madankollu, minħabba żviluppi iktar dinamiċi fis-suq dinji l-UE gradwalment se titlef sehem mis-suq dinji, għalkemm dan xorta se jibqa’ jammonta għal madwar 31 % tal-esportazzjonijiet globali fl-2022.

Il-produzzjoni tat-trab tal-ħalib intier fl-UE mistennija tibqa’ relattivament stabbli fuq perjodu ta’ żmien qasir (ara l-grafika 6 fl-Anness II). Il-prospetti għall-esportazzjonijiet fuq perjodu ta’ żmien medju huma sostnuti minn żieda fid-domanda dinjija, immexxija miċ-Ċina. Is-sehem tal-UE fl-esportazzjonijiet globali mistenni jonqos b’mod gradwali għal 14 % sal-2020 (minn 25 % fl-2009).

Huwa previst li l-produzzjoni tat-trab tal-ħalib xkumat fl-UE se tiżdied b’madwar 28 % matul il-prospettiva kollha (ara l-grafika 7 fl-Anness II). Domanda globali qawwija għall-importazzjonijiet għandha tikkontribwixxi għal suq ibbilanċjat, li jixpruna prospettiva favorevoli għall-esportazzjonijiet. L-UE għandha tara s-sehem mis-suq dinji tagħha jilħaq kważi 31 % tal-esportazzjonijiet globali fl-2022.

Il-prospettiva tindika stabbilità kontinwata tas-suq għall-butir, li tirriżulta minn kundizzjonijiet pożittivi tas-suq tul il-perjodu tal-projezzjoni, bi prezzijiet fuq livelli relattivament għoljin u b’domanda soda tal-UE (ara l-grafika 8 fl-Anness II).

2.           It-tneħħija gradwali mingħajr xkiel tal-kwoti tal-ħalib

2.1.        Il-produzzjoni tal-ħalib ipparagunata mal-limiti massimi tal-kwoti

Wara d-deċiżjoni li jiżdiedu l-kwoti tal-ħalib bi 2 % fl-1 ta’ April 2008, il-ftehim tal-Kontroll tas-Saħħa ta’ Novembru 2008 wassal għal żieda annwali fil-kwoti tal-ħalib b’1 % fuq ħames snin konsekuttivi, li bdew fl-1 ta’ April 2009, flimkien ma’ aġġustament tal-fattur ta’ korrezzjoni tax-xaħam li rriżulta f’żieda de facto oħra ta’ 1 % fil-kwoti. Għad fadal żieda annwali waħda ta’ 1 % (fl-1 ta’ April 2013) sakemm is-sistema tal-kwoti tiskadi fl-1 ta’ April 2015 [1].

Sena wara l-oħra, il-kwoti tal-ħalib gradwalment qed isiru inqas rilevanti, għaliex il-produzzjoni effettiva tal-ħalib qiegħda tkun inqas minn dawn il-limiti fil-maġġoranza tal-Istati Membri. Fis-sena tal-kwoti 2010-11, ħames Stati Membri biss qabżu l-kwota tal-ħalib tagħhom, filwaqt li l-produzzjoni globali tal-UE kienet 6 % taħt il-kwota. Skont in-notifiki rċevuti mill-Istati Membri, ġie stmat li s-sena tal-kwoti 2011-12 intemmet b’kunsinni tal-ħalib tal-UE ta’ madwar 4,7 % taħt il-kwota u sitt Stati Membri biss qabżu l-kwoti nazzjonali tagħhom (ara l-Anness III). L-għadd ta’ Stati Membri li qabżu l-kwoti tagħhom jibqa’ limitat u l-produzzjoni żejda kkonċernata tammonta għal inqas minn 0,2 % tal-ħalib kollu kkunsinnat jew kopert b’bejgħ dirett.

Wara tnaqqis żgħir fil-kunsinni tal-ħalib fl-2009, prezzijiet favorevoli tal-ħalib mal-ħruġ mill-azjenda agrikola u kundizzjonijiet tajba tat-temp taw lok għal żieda fil-livelli ta’ produzzjoni kemm fl-2010 kif ukoll fl-2011. Meta ż-żieda fil-produzzjoni – mhux biss fl-UE imma fir-reġjuni fornituri tal-ħalib kollha madwar id-dinja – eżerċitat pressjoni ’l isfel fuq il-prezzijiet tal-ħalib mal-ħruġ mill-azjenda agrikola, il-produzzjoni tal-ħalib bdiet tirrispondi bi tnaqqis fix-xhur sussegwenti. Dawk l-iżviluppi juru li r-reazzjoni tal-produzzjoni qed tissawwar gradwalment skont is-sinjali tas-suq imma li wkoll li l-kundizzjonijiet tat-temp huma parteċipant reali fis-suq tal-ħalib.

Billi l-kwoti tal-ħalib isiru dejjem inqas rilevanti, il-provvista tal-ħalib tal-UE tkun tista’ tirreaġixxi aħjar għall-opportunitajiet tas-suq, ir-reazzjoni tal-bdiewa għas-sinjali tal-prezzijiet tkun inqas mgħawġa u jkunu jistgħu jinkisbu gwadanni fl-effiċjenza permezz ta’ ristrutturar.

2.2.        L-evoluzzjoni fil-prezzijiet tal-kwoti tal-ħalib

Il-prezz tal-kwota tal-ħalib suppost qiegħed jonqos hekk kif qed tiqsar ħajjet l-iskema tal-kwoti u dan huwa effettivament il-każ fil-parti l-kbira tal-Istati Membri fejn il-prezz tal-kwota huwa baxx ħafna jew huwa ugwali għal żero (ara l-Anness IV).

Fl-Istati Membri li l-kunsinni tal-ħalib tagħhom huma ferm taħt il-limiti massimi tal-kwota, il-prezz tal-kwota diġà huwa baxx ħafna jew ugwali għal żero, u ma hija mistennija l-ebda bidla fundamentali qabel ma tiskadi l-iskema tal-kwoti.

Madankollu, fl-Istati Membri li l-kunsinni tal-ħalib tagħhom huma qrib il-limiti massimi tal-kwota u f’għadd limitat ta’ Stati Membri li l-kunsinni tal-ħalib tagħhom jaqbżu l-limiti massimi tagħhom, il-prezz tal-kwota jiddependi mill-aspettattivi ta’ imposta fuq l-ammont żejjed. Fil-ġejjieni, huwa previst li x-xiri tal-kwoti se jinżel iktar lejn iż-żero, b’varjazzjonijiet minħabba produzzjoni żejda okkażjonali f’kundizzjonijiet favorevoli tat-temp u bi prezzijiet remunerattivi tal-ħalib.

3.           Rimarki ta’ konklużjoni

Il-prospetti fuq perjodi ta’ żmien medju u twil huma favorevoli għas-settur tal-ħalib skont it-tkabbir tal-popolazzjoni u l-ġibda għad-dieta tal-Punent fl-ekonomiji emerġenti. Dan madankollu ma jevitax varjazzjonijiet tas-suq fuq perjodu ta’ żmien qasir. L-iżviluppi fil-prezzijiet mill-pubblikazzjoni tal-ewwel rapport dwar “soft landing” juru tendenza lejn livelli ogħla b’xi tlugħ u nżul tul il-kurva. F’din tal-aħħar, id-diffikultajiet attwali li qed iġarrbu l-bdiewa tal-ħalib f’ċerti żoni milquta b’mod iktar serju miż-żieda fil-prezz tal-għalf ma jistgħux jaħbu l-istampa kumplessivament pożittiva tas-settur.

Eventwalment, il-bilanċ bejn il-provvista u d-domanda jiddependi fuq firxa kbira ta’ fatturi, li jvarjaw minn parametri ekonomiċi għal deċiżjonijiet ta’ politika. F’dan ir-rigward, l-hekk imsejjaħ Pakkett tal-Ħalib[2], li ilu applikabbli bis-sħiħ mit-3 ta’ Ottubru 2012, joffri għodod għall-operaturi fil-katina tal-provvista tal-ħalib sabiex il-provvista tagħhom tkun konformi mas-suq.

Kemm l-evoluzzjoni tal-produzzjoni tal-ħalib meta pparagunata mal-kwoti tal-ħalib kif ukoll ix-xejra ’l isfel fil-prezzijiet tal-kwoti juru li s-“soft landing” qiegħda fit-triq it-tajba. Fil-maġġoranza l-kbira tal-Istati Membri, il-kwoti ma għadhomx iktar rilevanti biex tiġi limitata l-produzzjoni u l-prezz tal-kwota diġà laħaq iż-żero jew qed javviċinah.

Fid-dawl ta’ din l-analiżi, il-Kummissjoni hija tal-fehma li mhi meħtieġa l-ebda bidla fil-qafas eżistenti, li ilu jipprovdi ċertezza lill-produtturi tal-ħalib sa mill-2008 u li qed juri l-effiċjenza tiegħu sabiex tiġi żgurata tneħħija gradwali mingħajr xkiel lejn sistema mingħajr kwoti.

Minbarra l-kunċett innifsu ta’ “soft landing”, qed jiġi espress xi tħassib fir-rigward taż-żoni rurali fejn il-produzzjoni tal-ħalib għandha rwol ċentrali, b’mod partikolari fil-kuntest tal-iskadenza tal-kwoti tal-ħalib. F’dan ir-rigward, l-inklużjoni tas-settur tal-ħalib fl-hekk imsejħa “sfidi ġodda” tat-tieni pilastru tal-PAK qed tagħti iktar appoġġ lill-bdiewa tal-ħalib biex jitħejjew għat-tmiem tal-kwoti.

Il-proposti għar-riforma tal-PAK jinkludu strumenti li jistgħu jtaffu l-impatti potenzjali. Barra minn hekk, il-Kummissjoni ħarġet sejħa miftuħa għall-offerti għal analiżi minn esperti indipendenti tal-iżviluppi futuri fis-settur tal-ħalib mill-2015 ’il quddiem u se tirrapporta lill-Parlament Ewropew u lill-Kunsill sat-30 ta’ Ġunju 2014 dwar it-tħaddim konkret tad-dispożizzjonijiet tal-Pakkett tal-Ħalib[3], li se tivvaluta, b’mod partikolari, l-effetti fuq il-produtturi tal-ħalib u fuq il-produzzjoni tal-ħalib f’reġjuni żvantaġġati b’rabta mal-għan ġenerali li tinżamm il-produzzjoni f’reġjuni bħal dawn u li tkopri l-inċentivi potenzjali sabiex il-bdiewa jiġu mħeġġa jidlu fi ftehimiet konġunti dwar il-produzzjoni.

Annessi:            I.          L-iżvilupp tal-prezz tal-ħalib

II.         Il-prospetti fuq perjodu ta’ żmien medju fis-settur tal-ħalib

III.        Il-produzzjoni tal-ħalib meta pparagunata mal-kwota

IV.        L-iżviluppi fil-prezzijiet tal-kwoti tal-ħalib tal-UE

ANNESS I.     IL-PRODUZZJONI TAL-ĦALIB U L-IŻVILUPPI FIL-PREZZIJIET

Grafika 1        L-iżviluppi fil-forniment tal-ħalib

Grafika 2        L-iżviluppi fil-prezz tal-ħalib

ANNESS II.   IL-PROSPETTI FUQ PERJODU TA’ ŻMIEN MEDJU FIS-SETTUR TAL-ĦALIB

Grafika 3        L-iżviluppi fil-provvista tal-ħalib tal-baqra u fil-merħliet tal-ħalib, 2000-2022

Grafika 4        Il-kunsinni tal-ħalib u l-użu tal-kwoti għall-ħalib tal-baqra

Grafika 5        L-iżviluppi fis-suq tal-ġobon, 2000-2022

Grafika 6        L-iżviluppi fis-suq tat-trab tal-ħalib intier, 2000-2022

Grafika 7        L-iżviluppi fis-suq tat-trab tal-ħalib xkumat, 2000-2022

Grafika 8        L-iżviluppi fis-suq tal-butir, 2000-2022

ANNESS III.  IL-PRODUZZJONI TAL-ĦALIB META PPARAGUNATA MAL-KWOTA

ANNESS IV.  L-IŻVILUPPI FIL-PREZZIJIET TAL-KWOTI TAL-ĦALIB TAL-UE

[1]               Ħlief għall-Italja, li għaliha ġiet applikata ż-żieda kumulattiva antiċipata (frontloaded) ta’ 5 % fl-1 ta’ April 2009.

[2]               Ir-Regolament (UE) Nru 261/2012 tal-Parlament Ewropew u tal-Kunsill tal-14 ta’ Marzu 2012 li jemenda r-Regolament tal-Kunsill (KE) Nru 1234/2007 fir-rigward tar-relazzjonijiet kuntrattwali fis-settur tal-ħalib u tal-prodotti tal-ħalib

[3]               Ara l-Artikolu 184(9) tar-Regolament Waħdieni dwar l-OKS (KE) Nru 1234/2007, kif ġie inserit mill-hekk imsejjaħ Regolament (UE) Nru 261/2012 dwar il-Pakkett tal-Ħalib.