1. Daħla

Il-Kummissjoni fl-istrateġija tagħha Ewropa 2020[1], tenfasizza r-rwol tar-riċerka u l-innovazzjoni bħala elementi essenzjali biex l-Unjoni Ewropea titħejja għall-isfidi tal-ġejjieni. L-orjentamenti għall-"PAK lejn l-2020"[2] jenfassizzaw li l-innovazzjoni hija indispensabbli għat-tħejjija tas-settur agrikolu tal-Unjoni għall-ġejjieni. Il-"Baġit għall-Ewropa 2020"[3] jinkludi EUR 4.5 biljun għar-riċerka u l-innovazzjoni fl-oqsma tas-sigurtà tal-ikel, il-bijoekonomija, u l-agrikoltura sostenibbli.

Dan ir-rwol ċentrali tar-riċerka u l-innovazzjoni jiġi żviluppat aktar fl-inizjattiva ewlenija tal-UE 2020 "Unjoni tal-Innovazzjoni"[4] li tintroduċi l-kunċett ta' Sħubijiet Ewropej għall-Innovazzjoni (European Innovation Partnerships, EIP) bħala mod ġdid kif titrawwem l-innovazzjoni. Tnediet diġà EIP pilota dwar "Tixjiħ Attiv u b'Saħħtu". Barra minn hekk, twettqet ħidma ta' tħejjija biex jiġu żviluppati EIPs dwar "Materja Prima", "Ewropa effiċjenti fl-użu tal-Ilma", u l-"Agrikoltua". L-EIPs isegwu l-missjoni li x-xjenza u l-applikazzjoni ta' approċċi innovattivi fil-prattika jitqarrbu. Il-Kunsill enfasizza l-ħtieġa li l-EIPs ikollhom mira ċara, kif ukoll l-importanza tal-involviment tal-Istati Membri u s-simplifikazzjoni effettiva ta' strumenti eżistenti.

Din il-Komunikazzjoni tippreżenta l-kunċett tal-EIP "Produttività u Sostenibbiltà fil-qasam Agrikolu" msemmija fl-"Unjoni tal-Innovazzjoni". L-EIP issegwi l-orjentamenti strateġiċi ta' "Ewropa 2020" u "L-PAK fid-dawl tas-sena 2020". Tibbaża fuq il-konsultazzjonijiet tal-partijiet interessati, u se tqis l-esperjenza tal-passat mill-EIP pilota dwar "Tixjiħ Attiv u b'Saħħtu", inkluż l-iżvilupp tal-"Pjan Strateġiku ta' Implimentazzjoni" tagħha, kif ukoll id-diskussjonijiet fil-Kunsill u l-ħtiġijiet u l-ideat espressi mill-partijiet interessati.

2. Sfidi tas-Soċjetà

Sas-sena 2050, id-domanda dinjija għall-ikel mistennija tiżdied b’70 % (FAO). Iż-żieda drastika fid-domanda globali għall-ikel se tkun akkumpanjata minn żieda qawwija fid-domanda għall-għalf, għall-fibra, għall-bijomassa u għall-bijomaterjali. Mingħajr dubju dan se jagħti bidu għal reazzjoni ta' provvista ta' prodotti agrikoli fl-Unjoni li hija waħda mill-akbar fornituri tas-swieq globali agrikoli. Is-settur agrikolu fl-Unjoni jirrappreżenta 18 % tal-esportazzjonijiet tal-ikel fid-dinja, li jiswew EUR 76 biljun. F'valuri ta' produzzjoni, is-settur agrikolu fl-Unjoni jipprovdi aktar minn 40 % tal-produzzjoni tal-ikel totali fl-OECD. Naturalment, il-kontribuzzjonijiet għall-produzzjoni tal-ikel fl-Unjoni jvarjaw bejn l-Istati Membri u r-reġjuni, minħabba differenzi kbar fl-iżvilupp ekonomiku u teknoloġiku tas-setturi tal-biedja.

Tul dawn l-aħħar deċennji, l-agrikoltura esperjenzat qligħ konsiderevoli mill-produttività; madankollu, f'dawn l-aħħar snin, din ix-xejra naqqset ir-ritmu fil-pajjiżi żviluppati. Dan il-qligħ inkiseb parzjalment akkost ta' pressjoni serja fuq ir-riżorsi naturali u l-ambjent. 45 % tal-ħamrija fl-Ewropa għandha problemi marbuta mal-kwalità, u l-livelli baxxi ta' materja organika li fiha huma xhieda ta' dan. Kważi kwart tal-ħamrija fl-Ewropa tippreżenta grad ta' erożjoni moderata jew serja. Għadd ta' ekosistemi prezzjużi, u magħhom, għadd ta' servizzi prezzjużi tal-ekosistemi saritilhom ħsara jew saħansitra sparixxew. Tul dawn l-aħħar 20 sena l-għasafar li jinsabu f'ħabitats agrikoli naqsu b'20 sa 25 %, u l-friefet li jinsabu fil-bwar b'70 %, flimkien ma theddid serju għad-dakkara bħan-naħal. Madwar 40 % tal-art agrikola hija vulnerabbli għat-tniġġis min-nitrati, u dan jhedded ir-riżorsi tal-ilma. Barra minn hekk, l-agrikoltura tirrappreżenta 9 % tal-emissjonijiet ta' gassijiet serra fl-Unjoni.

L-agrikoltura u l-forestrija għamlu passi kbar 'il quddiem fir-rikonċiljazzjoni tal-produzzjoni mal-ħtieġa ta' mmanniġġjar sostenibbli tar-riżorsi naturali u fil-preservazzjoni tal-ambjent. Madankollu, dawn l-iżviluppi pożittivi jistgħu jiġu mhedda miż-żieda mhux mistennija fil-produzzjoni agrikola minħabba domanda globali dejjem akbar. Jekk din iż-żieda tiġi ssodisfata bl-approċċi attwali, dan jirriżulta f'aktar ħsara fir-riżorsi naturali u l-ambjent.

Dawn il-fenomeni mhumiex ristretti biss għall-partijiet tas-settur agrikolu fl-Unjoni li huma l-aktar avvanzati teknoloġikament. L-Ewropa għandha wkoll potenzjal kbir f'oqsma kkaratterizzati minn azjendi agrikoli żgħar u tradizzjonali. Madankollu, jekk dawk l-azjendi agrikoli jsegwu x-xejra ta' żvilupp stabbilita, se tiġi kkawżata ħsara ambjentali kbira fuq il-ħabitats u l-bijodiversità eżistenti, li spiss ikunu rikki, u fuq il-funzjonalità tal-ħamrija u r-riżorsi tal-ilma.

Bidla lejn mogħdija ta' tkabbir differenti hija meħtieġa sabiex tiġi stabbilita produzzjoni kompetittiva u sostenibbli ta' ikel, għalf, fibra, bijomassa u bijomaterjali. Biex dan jinkiseb, l-effiċjenza fil-provvista trid tiġi kkumplimentata minn tnaqqis fit-telf drammattiku li jseħħ wara l-ħsad. Bl-istess mod jeħtieġ li jkun inkluż adattament għat-tibdil fil-klima u l-użu bil-għaqal tal-bijodiversità u r-restawr tal-ekosistemi u s-servizzi tal-ekosistemi; trid tkun ibbażata fuq il-partikolaritajiet ta' kull territorju u l-potenzjal offrut mid-diversità ġenetika sabiex nikkombinaw il-bażi ġenetika rikka tagħna mal-prattiki agrikoli varji, ġodda u qodma, u niżguraw allokazzjoni u użu aħjar tar-riżorsi limitati tagħna. Il-ktajjen alimentari jvarjaw u l-ispeċifitajiet tagħhom jeħtieġ li jiġu integrati: Ktajjen tal-provvista "twal" jinvolvu aspetti bħall-konservazzjoni u l-ħżin, filwaqt li ktajjen tal-provvista "qosra" jikkonċentraw fuq il-provvediment lokali tal-ikel u attributi ta' kwalità partikolari. Jeħtieġ li l-konsumaturi jkunu fil-qalba ta' dan kollu, sabiex il-produzzjoni taqbad direzzjoni li twassal għal ikel li jkun sikur, ta' kwalità għolja u prodott b'mod sostenibbli.

Iż-żieda fil-produzzjoni jeħtieġ li sseħħ flimkien ma' vijabbiltà ekonomika mtejba għall-produtturi primarji li jkunu raw is-sehem tagħhom tal-valur miżjud fil-katina alimentari jonqos tul l-aħħar deċennju. Mingħajr profitabbiltà akbar fl-azjendi agrikoli, is-sostenibbiltà se ssir sfida dejjem akbar.

Produzzjoni agrikola akbar u sostenibbli tista' tinkiseb biss permezz ta' sforzi kbar ta' riċerka u innovazzjoni fil-livelli kollha. Ripetutament, ir-riċerkaturi u l-partijiet interessati enfasizzaw in-nuqqas bejn il-provvediment ta' riżultati ta' riċerka u l-applikazzjoni ta' approċċi innovattivi fil-prattiki tal-biedja. Approċċi ġodda jdumu wisq biex jiġu applikati, u l-ħtiġijiet tal-biedja prattika ma jiġux ikkomunikati biżżejjed lill-komunità xjentifika. Għalhekk, innovazzjonijiet importanti ma jiġux implimentati fl-iskala meħtieġa, u oqsma ta' riċerka rilevanti mhux dejjem jirċievu l-attenzjoni li jeħtieġu.

Żieda fil-produttività u l-kompetittività tal-agrikoltura tesiġi, l-ewwel nett, titjib fl-effiċjenza fl-użu tar-riżorsi sabiex il-produzzjoni tiżdied b'inqas ilma, enerġija, fertilizzanti (speċjalment il-fosforu u n-nitroġenu), u pestiċidi. Teħtieġ ukoll żieda fl-użu tas-sorsi rinnovabbli tal-enerġija u tnaqqis tal-iskart, skont l-orjentamenti mogħtija fil-"Pjan Direzzjonali għal Ewropa b'Użu Effiċjenti tar-Riżorsi"[5]. Is-sostenibbiltà teħtieġ li jitnaqqas it-tniġġis, li jiġu protetti l-kwalità u l-funzjonalità tal-ħamrija, li jiġu ppreservati l-bijodiversità u s-servizzi tal-ekosistemi, kif ukoll tnaqqis fl-emissjonijiet tal-gassijiet serra. Is-soluzzjonijiet jeħtieġ li jmorru lil hinn minn azjenda agrikola individwali u jintegraw ukoll il-kuntest ġeografiku usa', inklużi l-forestrija u r-riżervi naturali. Appoġġi xierqa ta' teknoloġija, ICT u navigazzjoni satellitari, kif ukoll għodod ġodda ta' ġestjoni, jipprovdu potenzjal għal żvilupp importanti. L-edukazzjoni u t-taħriġ huma essenzjali għall-iżvilupp tal-ħiliet meħtieġa. It-tisħiħ tal-pożizzjoni tal-bdiewa fil-katina tal-provvista jeħtieġ approċċi innovattivi li jżidu t-trasparenza, l-informazzjoni, u l-kapaċità tal-ġestjoni u jwasslu għal prodotti ġodda ta' kwalità.

Produzzjoni li tkun sostenibbli jeħtieġ li tintegra s-sostituzzjoni tal-input u l-produzzjoni bl-użu intelliġenti u r-riċiklaġġ tal-bijomassa u l-bijoraffinerija; u jeħtieġ li tnaqqas it-telf ta' wara l-ħsad. L-isfida teżisti għall-katina tal-provvista kollha mill-produzzjoni primarja sal-konsumatur. Il-konsumaturi jistgħu jnaqqsu l-pressjoni għal aktar produzzjoni primarja billi jbiddlu d-drawwiet ta' konsum tagħhom. L-edukazzjoni u t-taħriġ joffru potenzjal enormi għal titjib fin-nutrizzjoni, stili ta' ħajja aktar b'saħħithom, u tnaqqis fil-ħela tal-ikel. Il-kriterji tas-sostenibbiltà, stabbiliti f'punti importanti tul il-katina tal-provvista kollha, ikunu jikkontribwixxu għal aktar trasparenza, fiduċja, u għarfien.

3. Inrawwmu Agrikoltura Kompetittiva u Sostenibbli fl-Unjoni

L-EIP għandha l-għan li trawwem agrikoltura u forestrija kompetittivi u sostenibbli li "jiksbu aktar b'inqas" u jaħdmu f'armonija mal-ambjent. L-EIP se tgħin biex jinbena settur primarju kompetittiv li jiżgura disponibbiltà globali tal-ikel, prodotti u produzzjoni diversifikati, provvista fuq terminu ta' żmien twil ta' materja prima varja għal użi għall-ikel u anke mhux għall-ikel, kif ukoll allokazzjoni aħjar ta' valur miżjud tul il-katina tal-ikel.

Sabiex iż-żieda fil-produttività u l-produzzjoni agrikoli jsiru sostenibbli, ir-riżorsi naturali jeħtieġ li jiġu mmaniġġjati tajjeb, skont ir-rekwiżiti ambjentali. L-art se tkun partikolarment importanti, għaliex din se turi jekk il-bidla lejn xejriet ta' produzzjoni aktar sostenibbli kinitx ta' suċċess jew fallietx. L-art hija r-riżorsa essenzjali għall-produzzjoni agrikola. L-użu tal-art jinteraġixxi b'diversi modi mal-kwalità u l-kwantità tal-ilma, il-bijodiversità, u l-provvediment tas-servizzi tal-ekosistemi.

It-tibdil fil-klima jenfasizza l-fatt li l-ħamrija hija riżorsa partikolarment vulnerabbli. Il-funzjonijiet tal-ħamrija inkluża l-istabbiltà tal-ħamrija, iċ-ċiklu tal-ilma tal-ħamrija, il-kapaċità ta' lqugħ tan-nutrijenti, u l-integrità bijotika tal-ħamrija huma parametri essenzjali tal-produttività tal-art. Il-funzjoni tagħha bħala bir tal-karbonju tagħti lill-ħamrija rwol essenzjali fil-mitigazzjoni tat-tibdil fil-klima. Ġestjoni xierqa tal-art jeħtieġ li tipprevjeni d-degradazzjoni u l-erożjoni tal-ħamrija, tistabbilizza l-funzjonijiet tal-ħamrija, u tindirizza l-mitigazzjoni tat-tibdil fil-klima u l-adattament għaliha.

Meta tqiesu dawn l-objettivi, ġew identifikati żewġ miri ewlenin għall-EIP:

· Bħala indikatur għall-promozzjoni tal-produttività u l-effiċjenza tas-settur agrikolu, l-EIP għandha l-għan li twaqqaf ix-xejra reċenti ta' tnaqqis fil-qligħ mill-produttività sal-2020[6].

· Bħala indikatur għas-sostenibbiltà tal-agrikoltura, l-EIP għandha l-għan tiżgura l-funzjonalità tal-ħamrija[7] fl-Ewropa f'livell sodisfaċenti sal-2020. Il-funzjonalità tal-ħamrija tinkorpora l-kapaċità produttiva tal-ħamrija u r-rwoli essenzjali tagħha fil-mitigazzjoni tat-tibdil fil-klima u l-adattament għalih u l-istabbilità tal-ekosistemi.

Filwaqt li dawn il-miri ewlenin jirreferu għall-produzzjoni primarja, l-EIP se titratta wkoll il-bosta interazzjonijiet tul il-katina tal-provvista kollha sal-konsumatur. L-għanijiet speċifiċi tal-EIP se jiġu elaborati matul l-implimentazzjoni konkreta tagħha, u se jirriflettu l-orjentamenti strateġiċi tal-politiki li minnhom tiddependi.

L-għanijiet operattivi tal-EIP jinkludu t-tqarrib tar-riċerka u t-teknoloġija innovattivi mal-partijiet interessati, inklużi l-bdiewa, in-negozji, l-industrija, is-servizzi ta' konsulenza u l-NGOs. Dan għandu jgħin sabiex ir-riżultati tar-riċerka jissarrfu f'innovazzjoni reali, trasferiment aktar veloċi tal-innovazzjoni fil-prattika, l-għoti ta' informazzjoni mill-prattika għax-xjenza fir-rigward ta' ħtiġijiet ta' riċerka, titjib fl-iskambju tal-għarfien, u żieda fl-għarfien dwar il-ħtieġa għal sforzi konġunti biex ikun hemm investiment fl-innovazzjoni sostenibbli.

L-EIP tipprova kemm jista' jkun tikseb sinerġija billi trawwem l-iskambju bejn sħab minn oqsma, setturi, inizjattivi u proġetti differenti tal-politika, biex b'hekk tikkontribwixxi għal effikaċja akbar tal-istrumenti tal-politika eżistenti u tikkumplimentahom ma' azzjonijiet ġodda fejn meħtieġ.

4. Benefiċċji u Opportunitajiet

Is-settur agrikolu u dak tal-ikel ikkombinati flimkien bħalissa jfissru 17-il miljun impjieg (7,6 % tat-total tal-impjiegi) u għal 3,5 % tat-total tal-Valur Miżjud Gross fl-UE-27. L-EIP se tirrinforza l-pożizzjoni tal-agrikoltura tal-Unjoni bħala riżorsa kompetittiva u effiċjenti u tikkontribwixxi għal forestrija u prattiki tal-użu tal-art aktar sostenibbli. Setturi lil hinn u fi ħdan is-settur agrikolu li jipprovdu teknoloġiji "ekoloġiċi" lill-produtturi primarji jeħtieġ li jiġu integrati fl-EIP u jibbenefikaw minnha wkoll.

Biex jiżviluppaw il-potenzjal sħiħ tagħhom, ir-rwol tal-bdiewa fil-katina tal-provvista jeħtieġ li jissaħħaħ. Bidliet fid-domanda tal-konsumaturi lejn ikel sikur, favur is-saħħa u ta' kwalità għolja jindikaw importanza dejjem akbar għas-swieq lokali. Is-suq kostantament dejjem akbar għall-ikel, l-għalf, il-fibra, il-bijomaterjali, u l-bijoenerġija jipprovdi żvilupp ekonomiku, impjiegi, u possibbiltajiet għall-innovazzjoni soċjali. L-użu tad-diversità ġenetika Ewropea jirrilaxxa potenzjal enormi għall-iżvilupp. Għalhekk, opportunitajiet ta' prodotti u swieq ġodda qed jinfetħu għall-produtturi primarji, u l-EIP se tgħinhom jaħtfuhom.

Fin-nuqqas ta' xprun ta' innovazzjoni bħall-EIP, l-agrikoltura tal-Unjoni se taffronta diffikultajiet fiż-żieda tal-produzzjoni filwaqt li tevita aktar deterjorament fil-kapaċitajiet produttivi u r-riżorsi naturali, b'mod partikolari l-ħamrija, l-ilma, u s-servizzi tal-ekosistemi. L-istudju TEEB dwar "Economics of Ecosystems and Biodiversity" (Il-qasam ekonomiku b'rabta mal-ekosistemi u l-bijodiversità) jissuġġerixxi li l-valur tal-preservazzjoni tal-bijodiversità mis-sistemi terrestri se jkun bejn wieħed u ieħor jammonta għal 7 % tal-PDG stmat fl-2050. Bħala eżempju, l-istudju jirreferi għad-dakkir mill-insetti, stmat EUR 15 biljun fis-sena. Minbarra dan, l-EIP se tgħin tiżgura s-sekwestru tal-karbonju u timmitiga l-emissjonijiet tal-gassijiet serra (greenhouse gases, GHG) kif ukoll tnaqqas il-ħtiġijiet enerġetiċi. Għarfien aħjar dwar aspetti rigward in-nutrizzjoni se jibdlu l-imġiba tal-konsumaturi u jipprovdu benefiċċji għal diversità akbar u kwalità ogħla tal-prodotti.

5. Nimmobilizzaw il-potenzjal

L-Istati Membri u l-partijiet interessati ripetutament esprimew interess qawwi fil-promozzjoni tal-innovazzjoni fl-agrikoltura permezz ta' approċċ mifrux mal-Unjoni kollha. Il-Kunsill Ewropew tal-20 ta' Ġunju 2008 indika li "jeħtieġ li titkompla l-innovazzjoni, ir-riċerka u l-iżvilupp tal-produzzjoni agrikola, partikolarment biex jitjiebu l-effiċjenza fl-enerġija, it-tkabbir fil-produttività u l-abbiltà tagħha li tadatta għat-tibdil fil-klima.” Konklużjonijiet simili ntlaħqu minn organizzazzjonijiet agrikoli u Kmamar tal-Agrikoltura, u d-dikjarazzjoni tal-G20 minn Cannes tenfasizza l-ħtieġa primordjali li jsir investiment fir-riċerka u l-innovazzjoni agrikoli.

Il-kunċett u l-kontenut tal-"Produttività u s-Sostenibbiltà Agrikoli" tal-EIP ġew diskussi ma' firxa wiesgħa ta' partijiet interessati. Il-partijiet interessati enfasizzaw il-ħtieġa għal EIP agrikola u enfasizzaw il-ħtieġa li jiġi eliminat id-distakk bejn il-prattika tal-biedja u x-xjenza permezz ta' netwerking intelliġenti.

L-EIP se tinkoraġġixxi sħab f'livelli istituzzjonali u ġeografiċi differenti u f'setturi differenti biex jikkollaboraw u japprofittaw minn potenzjal enormi għas-sinerġiji. Se ssir enfasi partikolari fuq l-użu tal-opportunitajiet ipprovduti minn oqsma politiċi differenti, b'mod partikolari l-Politika Agrikola Komuni (PAK), il-Politika għar-Riċerka u l-Innovazzjoni fl-Unjoni, il-Politika ta' Koeżjoni, il-Politika Ambjentali u dwar it-Tibdil fil-Klima, il-Politika dwar il-Konsumatur u s-Saħħa, il-politika dwar l-Edukazzjoni u t-Taħriġ, il-Politika Industrijali, u l-Politika dwar l-Informazzjoni. Kooperazzjoni mill-qrib u skambju ta' esperjenza se jiġu żgurati ma' Sħubijiet Ewropej għall-Innovazzjoni oħra, inklużi l-EIP dwar il-"Materja Prima" u l-EIP dwar "Ewropa effiċjenti fl-użu tal-ilma". Din tal-aħħar hija marbuta mal-EIP agrikola, għaliex se tkopri l-infrastruttura tal-ilma u l-allokazzjoni tal-ilma fiż-żoni rurali, filwaqt li l-EIP agrikola se tindirizza l-ġestjoni tal-ilma u t-tnaqqis tat-tniġġis fil-livell tal-azjendi agrikoli.

6. Traspożizzjoni tal-Innovazzjoni fil-Prattika Agrikola

L-EIP se tkopri stadji multipli: mill-proċess ewlieni tar-riċerka għat-tixrid tar-riżultati tar-riċerka għall-iżvilupp tal-prodotti u t-tekniki u l-integrazzjoni tagħhom fil-proċess tal-produzzjoni. Il-proċessi taċ-ċertifikazzjoni li jikkonfermaw il-valur miżjud dejjem akbar tal-prodotti tar-riċerka wkoll se jkollhom rwol importanti.

Sabiex l-innovazzjoni tiġi trasposta fil-prattika agrikola, l-EIP se tuża firxa tal-politiki eżistenti, b'mod partikolari l-Politika dwar l-Iżvilupp Rurali tal-PAK u l-Politika tal-Unjoni għar-Riċerka u l-Innovazzjoni, biex azzjonijiet innovattivi konkreti jiġu ffinanzjati. Filwaqt li l-Programmi tal-Iżvilupp Rurali normalment jaġixxu fi ħdan il-konfini tar-reġjuni tal-programmi, l-aktar fil-livell lokali, reġjonali, jew nazzjonali, azzjonijiet innovattivi fil-livell transreġjonali, transkonfinali, jew tal-Unjoni jeħtieġ li jiġu kofinanzjati mill-Politika tal-Unjoni għar-Riċerka u l-Innovazzjoni. Għandhom jinstabu sinerġiji mal-opportunitajiet ipprovduti mill-Politika ta' Koeżjoni, b'mod partikolari permezz ta' strateġiji ta' innovazzjoni reġjonali u programmi ta' kooperazzjoni transnazzjonali u interreġjonali.

Il-valur miżjud tal-EIP jinsab, l-ewwel nett, fil-potenzjal tagħha li tiffoka l-politiki eżistenti fuq l-innovazzjoni u, it-tieni, fin-natura tagħha bħala pjattaforma dinamika tgħaqqad flimkien lill-bdiewa, lill-partijiet interessati, u lir-riċerkaturi. L-implimentazzjoni se tkun iddirezzjonata lejn gruppi operattivi bħala entitajiet li jaġixxu b'mod ewlieni, bl-involviment ta' dawk ikkonċernati bħall-bdiewa, ix-xjenzati, il-konsulenti, l-NGOs, u/jew l-impriżi. Il-gruppi operattivi se jieħdu l-awtorità f'dak li għandu x'jaqsam ma' suġġetti ta' interess u se jwettqu proġetti li jkollhom l-għan jittestjaw u japplikaw prattiki, proċessi, prodotti, servizzi, u teknoloġiji innovattivi. Fil-livell transkonfinali jew tal-Unjoni, gruppi operattivi se jaġixxu b'mod partikolari permezz ta' inizjattivi raggruppati u proġetti pilota u ta' dimostrazzjoni. L-azzjonijiet konkreti se jissawwru bil-bażi ta' għarfien ipprovduta permezz tal-Qafas tal-UE għar-Riċerka u l-Innovazzjoni.

Faċilità ta' netwerk tal-EIP se tiġi stabbilita fi ħdan il-qafas tan-Netwerk tal-Iżvilupp Rurali. In-netwerk se janima l-attivitajiet fil-livell tal-Unjoni, nazzjonali, reġjonali u lokali. Se jinkoraġġixxi l-istabbiliment ta' gruppi operattivi u se jgħarraf dwar l-opportunitajiet ipprovduti bil-politiki tal-Unjoni. Min-naħa tagħhom, il-gruppi operattivi huma meħtieġa jirrapportaw lura lin-netwerk dwar il-proġetti tagħhom. Għalhekk, in-netwerk se jaġixxi bħala medjatur fit-tisħiħ tal-komunikazzjoni u l-kooperazzjoni bejn ix-xjenza u l-prattika. Se jgħin fil-kondiviżjoni tal-esperjenza, inklużi fallimenti, esperjenzi miksuba, u prattika tajba. Barra minn hekk, se jipprevedi mekkaniżmu sistematiku ta' provvediment ta' informazzjoni biex il-ħtiġijiet tal-prattika jiġu inkorporati fl-aġenda tar-riċerka.

Implimentazzjoni tal-EIP li tkun ta' suċċess tiddependi mill-provvediment u t-trasferiment ta' għarfien rilevanti minn firxa wiesgħa ta' dixxiplini li jiffurmaw parti mill-komunità Ewropea tar-riċerka. Input konsiderevoli għad-diskussjoni u l-iżvilupp ta' orjentamenti tematiċi konsistenti u rilevanti huma mistennija mill-Inizjattivi ta' Programmazzjoni Konġunta (Joint Programming Initiatives, JPI), il-Kumitat Permanenti dwar ir-Riċerka Agrikola (Standing Committee on Agricultural Research, SCAR), l-ERA-NETs[8] u l-Pjattaformi Teknoloġiċi Ewropej. Dawn l-inizjattivi għandhom jikkontribwixxu għad-dibattitu dwar azzjonijiet innovattivi potenzjali u diskussjonijiet dwar l-esperjenzi li jkunu nkisbu. Jistgħu jinkoraġġixxu l-istabbiliment ta' gruppi operattivi bil-għan li l-azzjoni innovattiva tiġi mmultiplikata. In-netwerk tal-EIP se jikkontribwixxi għal konnessjoni aħjar ta' dawk l-inizjattivi. Il-monitoraġġ u l-evalwazzjoni marbuta miegħu se jiżguraw implimentazzjoni tajba.

7. Struttura Governattiva

Bord ta' tmexxija ta' livell għoli, ta' għadd limitat u li jikkonsisti minn rappreżentanti mill-Istati Membri u l-partijiet interessati kemm min-naħa tal-provvista kif ukoll tad-domanda u maħtura fil-kapaċità personali tagħhom, se jipprovdi pariri strateġiċi u gwida permezz ta' pjan strateġiku ta' implimentazzjoni li jidentifika oqsma ta’ prijorità għall-azzjoni u rakkomandazzjonijiet dwar kif jistgħu jinkisbu l-għanijiet tal-EIPs.

B'segwitu għall-esperjenza tal-EIP pilota dwar "Tixjiħ Attiv u b'Saħħtu", il-ħidma tal-grupp ta' tmexxija se sseħħ flimkien mal-involviment sħiħ tal-Istati Membri u l-partijiet interessati fl-azzjonijiet konkreti u fis-segwitu tal-EIP agrikola. Dan se jintlaħaq ukoll permezz ta' gruppi ffukati u seminars tematiċi, li għandhom jiġu stabbiliti min-netwerk.

L-EIP se tiddependi minn politiki eżistenti tal-Unjoni. Il-finanzjament, l-implimentazzjoni, u l-prijoritizzazzjoni tal-azzjonijiet se jkunu bbażati fuq mekkaniżmi rispettivi inkorporati f'dawk il-politiki. Il-Politika dwar l-Iżvilupp Rurali titlob lill-Istati Membri jiddefinixxu avvenimenti importanti kkwantifikati (anke għall-innovazzjoni) li jirriflettu l-għanijiet tal-Ewropa 2020. Il-politika tal-UE għar-Riċerka u l-Innovazzjoni se tappoġġa proġetti skont l-orjentamenti strateġiċi u l-mekkaniżmi ta' teħid ta' deċiżjonijiet ta' "Orizzont 2020". In-netwerk tal-EIP se juża l-mekkaniżmi eżistenti għar-rapportar lill-Istati Membri u lill-Awtoritajiet ta' Ġestjoni tal-Iżvilupp Rurali kif ukoll għall-interazzjoni magħhom, inklużi wkoll il-Kumitat ta' Żvilupp Rurali u l-Kumitati ta' Monitoraġġ.

8. Oqsma ta' Azzjonijiet Innovattivi

Skont l-esperjenza miksuba permezz tal-EIP pilota, il-kontenut u l-prijoritajiet li għandhom jintlaħqu mill-EIP għandhom jemerġu b'mod miftuħ u jirriflettu l-ħtieġa għal soluzzjonijiet varji. Sabiex it-teknoloġiji, il-metodi, u l-proċessi l-ġodda jiġu attwati fil-prattika tal-biedja u jinħoloq spazju għal mistoqsijiet u gwida prattiċi huwa meħtieġ approċċ minn isfel għal fuq, ikkombinat ma' netwerking effettiv. Skont il-konklużjonijiet imressqa mill-OECD[9], l-EIP mhux se tiddependi minn mudell ta' innovazzjoni wieħed. Barra minn hekk, jitqies il-fatt li l-innovazzjoni tista' tkun teknoloġika, mhux teknoloġika, jew soċjali, u tista' tkun ibbażata fuq prattiki ġodda jew tradizzjonali.

Bosta oqsma ta' prijorità indikattivi għar-riċerka u l-innovazzjoni ntgħażlu abbażi ta' input u skambju ma' partijiet interessati u riċerkaturi. Il-lista stabbilita hawn taħt ma għandhiex tieħu preċedenza fuq azzjonijet ta' innovazzjoni fuq il-post. L-implimentazzjoni tal-EIP tista' tikkumplimentaha.

· Żieda fil-produttività, l-output, u l-effiċjenza fl-użu tar-riżorsi agrikoli

Dan il-qasam ta' azzjonijiet ta' innovazzjoni għandu l-għan iżid l-output agrikolu, filwaqt li jiżgura l-użu effiċjenti u sostenibbli tar-riżorsi. Sistemi ta' produzzjoni b'input baxx jimmiraw lejn l-użu sostenibbli tan-nutrijenti (inklużi l-fosforu u n-nitroġenu) u l-pestiċidi, l-użu ottimizzat tal-enerġija, l-ilma, u r-riżorsi ġenetiċi, u dipendenza aktar baxxa minn inputs esterni. Huwa meħtieġ progress fil-qasam ta' ġestjoni integrata ta' organiżmi ta' ħsara, kontroll bijoloġiku ta' mard tal-pjanti u ta' organiżmi ta' ħsara, użu mtejjeb ta' prodotti għall-protezzjoni tal-pjanti, u tnaqqis tal-emissjonijiet tal-gassijiet serra mill-produzzjoni tal-annimali u mill-ħamrija. Soluzzjonijiet għar-riċiklaġġ u t-tnaqqis ta' telf ta' wara l-ħsad għandhom inaqqsu l-pressjonijiet fuq ir-riżorsi naturali. Il-potenzjal għal teknoloġiji ekoloġiċi, bħall-ICT, biedja ta' preċiżjoni, u sistemi ta' twissija dwar organiżmi ta' ħsara, għandhom jiġu esplorati.

· Innovazzjoni li tappoġġa ekonomija bijoloġika

Soluzzjonijiet innovattivi għandhom jiġu adattati għall-katina tal-provvista kollha kif ukoll għall-ekonomija bijoloġika li dejjem qed tikber. Għandhom jinstabu soluzzjonijiet għal bijoraffineriji u riċiklaġġ u l-użu intelliġenti tal-bijomassa mill-uċuħ, foresti, u skart tal-ikel, filwaqt li jiġi vvalorizzat il-potenzjal sekwenzjali mingħajr ma titnaqqas il-materja organika tal-ħamrija. Għandha titqies ukoll is-sostituzzjoni tal-produzzjoni primarja tal-proteini bl-alka jew bil-bijofermentazzjoni. It-trobbija tal-annimali u tal-pjanti tista' tiġi esplorata biex tinkiseb produzzjoni ogħla, emissjonijiet imnaqqsa u/jew reżistenza itjeb għall-mard, kif ukoll kwalità ogħla tal-prodotti finali (eż. profili nutrizzjonali itjeb).

· Bijodiversità, Servizzi tal-ekosistemi, u l-funzjonalità tal-ħamrija

Innovazzjoni li ssaħħaħ ġestjoni sostenibbli tal-azjendi agrikoli u tal-prattiki tal-forestrija tibbenifika wkoll is-servizzi tal-ekosistemi u l-funzjonalità tal-ħamrija. Għandha ssir enfasi partikolari fuq sistemi agroekoloġiċi integrati, inklużi t-tisħiħ tal-bijodiversità tal-ħamrija, is-sekwestru tal-karbonju, iż-żamma tal-ilma, l-istabbilità u r-reżiljenza tal-ekosistemi, u l-funzjonijiet tad-dakkir. Is-soluzzjonijiet jistgħu jiffukaw fuq ġestjoni tal-art imtejba (inkluż ħidma tal-art imnaqqsa u manutenzjoni ta' infrastrutturi ekoloġiċi), ippjanar spazjali integrat u sistemi ġodda ta' agroforestrija, kif ukoll metodi naturali ta' konservazzjoni tal-ekosistemi. Żoni oħra jinkludu l-ottimizzazzjoni tal-użu ta' riżorsi ġenetiċi, sistemi ta' input baxx/organiċi, żieda fid-diversità ġenetika użata fl-agrikoltura, u l-iżvilupp ta' bijorimedjazzjoni għal ħamrija mniġġsa, kif ukoll strateġiji innovattivi għall-adattament għat-tibdil fil-klima.

· Prodotti innovattivi u servizzi għall-katina tal-provvista integrata.

L-għan huwa li jiġu żviluppati u mmobilizzati prodotti, mezzi u servizzi, flimkien mal-istabbiliment ta' katina tal-provvista trasparenti u sostenibbli. L-enfasi se ssir fuq sistemi tal-informazzjoni u għodod tal-ġestjoni tar-riskji itjeb, li jirriflettu l-karatteristiċi tal-prodotti u l-proċessi tal-produzzjoni, bħall-analiżi komparattiva, l-istandards tas-sostenibbiltà, il-footprinting, l-analiżi taċ-ċikli tal-ħajja (b'enfasi fuq il-ġestjoni tal-iskart) u sistemi ta' ċertifikazzjoni. Soluzzjonijiet jistgħu jinkludu innovazzjoni maniġerjali għall-bdiewa, li tirrinforza r-rwol tagħhom fil-ktajjen tal-provvista, eż. permezz ta' gruppi ta' produtturi jew ktajjen tal-provvista qosra. Għodod ta' dijanjostika ġodda jgħinu biex tiġi traċċata l-prestazzjoni ambjentali u soċjali tal-azjendi agrikoli. Is-soluzzjonijiet jinkludu wkoll l-isfruttament tad-diversità sħiħa tal-bażi ġenetika tagħna, filwaqt li joħolqu opportunitajiet ġodda u aktar sostenibbli, u jistabbilixxu innovazzjonijiet istituzzjonali (eż. swieq tal-karbonju). Sistemi effettivi ta' monitoraġġ jistgħu jkunu mmirati lejn residwi fl-ikel (eż. pestiċidi).

· Kwalità tal-ikel, sikurezza tal-ikel u stili ta' ħajja b'saħħithom

Għażliet informati mill-konsumaturi huma essenzjali bħala impulsi ta' direzzjoni għall-katina tal-provvista kollha. Oqsma ta' azzjoni jinkludu l-kwalità tal-ikel u s-sikurezza tal-ikel, pereżempju permezz tal-iżvilupp ta' skemi ġodda ta' kwalità tal-ikel u skemi ta' kura tas-saħħa għall-bhejjem. Il-bijoprospettar u l-potenzjal tal-flora medika bħala riżorsa ta' materja prima jistgħu jiġu esplorati. Oqsma oħra jistgħu jinkludu trattament naturali ta' annimali u pjanti u metodi ġodda għall-analiżi tal-kwalitajiet bijoloġiċi tal-ikel. Għodod biex jinbidlu d-drawwiet ta' konsum u għodod korrispondenti ta' informazzjoni u taħriġ jistgħu jtejbu s-saħħa pubblika, filwaqt li jkunu akkumpanjati minn ingredjenti tajbin għas-saħħa fil-prodotti (eż. ħalib jew żejt b'aċidi xaħmin omega-3) miksuba b'aktar żvilupp ta' nutrijenti u permezz tat-trobbija tal-annimali. Ir-rwol tal-konsumaturi fit-tnaqqis tat-telf ta' wara l-ħsad jista' jiġi indirizzat b'approċċi ta' imballaġġ intelliġenti kif ukoll edukazzjoni u informazzjoni.

9. Il-Passi li Jmiss

Meta titqies il-ħtieġa li xejriet ta' żvilupp jinbidlu biex jinkludu tkabbir sostenibbli fl-agrikoltura, dawn l-attivitajiet għandhom jinbdew mill-aktar fis possibbli. Din il-Komunikazzjoni għandha l-għan tinkoraġġixxi diskussjoni mal-Istati Membri, il-Parlament Ewropew u l-partijiet interessati dwar l-għanijiet strateġiċi u l-format tal-EIP agrikola.

Se jitħejja pjan strateġiku ta' implimentazzjoni li jqis l-opinjonijiet tal-Parlament Ewropew u tal-Kunsill dwar din il-Komunikazzjoni. Bħala pass ta' tħejjija, għajnuna teknika pprovduta mill-Politika tal-Iżvilupp Rurali se tintuża biex jiġu stabbiliti faċilitajiet ta' netwerks. L-istabbiliment fil-ħin ta' netwerk tal-EIP huwa meħtieġ biex tiġi żgurata informazzjoni bikrija ta' partijiet involuti u interessati rigward opportunitajiet għal azzjoni innovattiva. Dan għandu jiffaċilita l-proċess li permezz tiegħu azzjonijiet innovattivi jinbidlu f'azzjonijiet innovattivi konkreti fil-post.

[1]               COM (2010) 2020

[2]               COM(2010) 672

[3]               COM(2011) 500

[4]               COM(2010) 546

[5]               COM(2011) 571 finali

[6]               Imkejjel bħala "produttività totali tal-fatturi"

[7]               Inkluż: Li titwaqqaf ix-xejra ta' telf ta' materja organika tal-ħamrija; prattiki ta' biedja xierqa fuq art agrikola suxxettibbli għall-erożjoni.

[8]               L-iskemi tal-ERA-NET jappoġġaw il-kooperazzjoni u l-koordinazzjoni ta' attivitajiet tar-riċerka fil-livell nazzjonali jew reġjonali

[9]               Il-Manwal tal-OECD u l-Eurostat (2005), Oslo: Guidelines for Collecting and Interpreting Innovation Data, (Linji gwida għall-Ġbir u l-Interpretazzjoni tad-Dejta), Pariġi.