MEMORANDAM TA' SPJEGAZZJONI

1. ĠUSTIFIKAZZJONI U GĦAN

Fil-livell Ewropew, it-trasportaturi ta’ materjali radjuattivi huma koperti mil-leġiżlazzjoni tat-trasport taħt it-Trattat dwar il-Funzjonament tal-Unjoni Ewropea (TFUE) u l-leġiżlazzjoni tal-aspetti speċifiċi għar-radjazzjoni inkluża l-protezzjoni tas-saħħa tal-ħaddiema u l-pubbliku ġenerali taħt it-Trattat li jistabbilixxi l-Komunità Ewropea tal-Enerġija Atomika (Euratom).

Il-leġiżlazzjoni tat-TFUE ġiet issimplifikata bid-Direttiva 2008/68/KE tal-Parlament Ewropew u tal-Kunsill tal-24 ta’ Settembru 2008 dwar it-trasport intern ta’ oġġetti perikolużi bil-kombinazzjoni tal-modi kollha tat-trasport intern.

Id-Direttiva tal-Kunsill 96/29/Euratom tat-13 ta’ Mejju 1996 tistabbilixxi l-istandards tas-sigurtà [sikurezza] bażiċi għall-protezzjoni tas-saħħa tal-ħaddiema u tal-pubbliku ġenerali minn perikli li joriġinaw mir-radjazzjoni jonizzanti. Skont l-Artikolu 30 tat-Trattat, dawn l-istandards bażiċi jfissru:

(a) dożi massimi permissibbli kompatibbli ma’ sikurezza adegwata;

(b) livelli massimi permissibbli ta’ esponiment u kontaminazzjoni;

(c) il-prinċipji fundamentali li jirregolaw is-sorveljanza tas-saħħa tal-ħaddiema.

L-Istati Membri, skont l-Artikolu 33, għandhom jistabbilixxu dispożizzjonijiet xierqa sabiex jiżguraw il-konformità mal-istandards bażiċi.

Għal raġunijiet ta’ protezzjoni tas-saħħa tal-ħaddiema u tal-pubbliku ġenerali u sabiex ix-xogħol tagħhom jiġi ffukat aħjar, l-awtoritajiet tal-Istati Membri jeħtieġ li jkunu jafu liema persuni, organizzazzjonijiet jew intrapriżi jridu jikkontrollaw. Għal dan il-għan, l-Artikoli 3 u 4 tad-Direttiva jesiġu li l-Istati Membri jissottomettu ċerti prattiki li jinvolvu periklu minn radjazzjoni jonizzanti għal sistema ta’ rappurtar (notifika) u awtorizzazzjoni jew projbizzjoni minn qabel ta’ ċerti prattiki.

Id-Direttiva 96/29/Euratom tapplika għall-prattiki kollha li jinvolvu riskju minn radjazzjoni jonizzanti li tkun ġejja minn sors artifiċjali jew minn sors ta’ radjazzjoni naturali, inkluż it-trasport.

Peress li t-trasport huwa l-unika prattika "mobbli", u meta titqies in-natura transkonfinali spissa ta’ operazzjonijiet tat-trasport, trasportatur jista’ jkollu jsegwi dawn il-proċeduri ta’ rappurtar u awtorizzazzjoni f’diversi Stati Membri. Barra minn hekk, l-Istati Membri implimentaw dawn il-proċeduri f’sistemi differenti, biex b’hekk żiedu l-kumplessità ta’ operazzjonijiet tat-trasport bħal dawn.

Is-sostituzzjoni ta’ dawn il-proċeduri ta’ rappurtar u awtorizzazzjoni nazzjonali b’sistema ta’ reġistrazzjoni unika għall-prattika tat-trasport ser tikkontribwixxi għaldaqstant għas-simplifikazzjoni tal-proċedura, għat-tnaqqis tal-piż amministrattiv, għat-tneħħija ta’ ostakli għad-dħul, filwaqt li l-livelli għoljin ta’ protezzjoni mir-radjazzjoni jinżammu.

Dan ir-Regolament jissostitwixxi s-sistemi ta’ rappurtar u awtorizzazzjoni fl-Istati Membri bl-implimentazzjoni tad-Direttiva tal-Kunsill 96/29/Euratom b’reġistrazzjoni unika. Ir-Regolament jistabbilixxi Sistema Ewropea għar-Reġistrazzjoni tat-Trasportaturi. Trasportaturi għandhom japplikaw permezz ta’ interfaċċja tal-web ċentrali. Dawn l-applikazzjonijiet jiġu eżaminati mill-awtorità kompetenti nazzjonali rispettiva li toħroġ ir-reġistrazzjoni jekk l-applikant jissodisfa l-istandards bażiċi tas-sikurezza. Fl-istess ħin, is-sistema tippermetti li l-awtoritajiet kompetenti jkollhom ħarsa ġenerali aħjar tat-trasportaturi li huma attivi fil-pajjiż tagħhom. Is-sistema għandha tkun disponibbli, ittestjata u funzjonali meta dan ir-Regolament jidħol fis-seħħ.

Ir-Regolament jadotta approċċ iggradat billi jeskludi mill-proċedura tar-reġistrazzjoni t-trasportaturi li jittrasportaw esklussivament "pakketti ta’ eċċezzjoni". Min-naħa l-oħra, ir-Regolament iħalli f’idejn l-Istati Membri sabiex iżidu rekwiżiti ta’ reġistrazzjoni addizzjonali għal trasportaturi ta’ materjali fissili u b’radjuattività għolja.

Il-Liġi Komunitarja u r-regoli internazzjonali l-oħra rigward il-protezzjoni fiżika, is-salvagwardji, u r-responsabbiltà ta’ terzi persuni jibqgħu japplikaw. Dan hu minnu, b’mod partikolari, għad-Direttiva 2008/68/KE.

2. BAŻI LEGALI

Id-dispożizzjonijiet ta’ dan ir-Regolament huma relatati mal-istandards bażiċi għall-protezzjoni tas-saħħa tal-ħaddiema u tal-pubbliku ġenerali. Konsegwentement, il-bażi legali magħżula hija t-Trattat li jistabbilixxi l-Komunità Ewropea tal-Enerġija Atomika, u b’mod partikolari l-Artikoli 31 u 32 tiegħu.

3. SUSSIDJARJETÀ U PROPORZJONALITÀ

Il-prinċipju tas-sussidjarjetà japplika sakemm il-proposta ma taqax taħt il-kompetanza esklussiva tal-Komunità. Peress li s-setgħat leġiżlattivi tal-Komunità taħt it-Titolu II il-Kapitolu 3 tat-Trattat tal-EURATOM huma esklussivi fin-natura tagħhom, mhumiex suġġetti għall-prinċipju tas-sussidjarjetà.

Il-proporzjonalità hija żgurata wkoll. Il-mekkaniżmu propost, skont il-valutazzjoni tal-impatt imwettqa fit-tħejjija, iżomm bilanċ prudenti bejn il-protezzjoni effettiva tal-ħaddiema u tal-pubbliku matul operazzjonijiet tat-trasport, l-interessi leġittimi tal-partijiet interessati involuti u l-interessi tal-Istati Membri. Fuq kollox, l-għażla preferuta hija l-minimu neċessarju sabiex jintlaħqu b’mod effettiv l-għanijiet stabbiliti filwaqt li l-ispejjeż jinżammu fi ħdan limiti raġonevoli.

2011/0225 (NLE)

Proposta għal

REGOLAMENT TAL-KUNSILL

li jistabbilixxi sistema Komunitarja għar-reġistrazzjoni tat-trasportaturi ta’ materjali radjuattivi

IL-KUNSILL TAL-UNJONI EWROPEA,

Wara li kkunsidra t-Trattat li jistabbilixxi l-Komunità Ewropea tal-Enerġija Atomika, u b’mod partikolari t-tieni paragrafu tal-Artikolu 31 u l-Artikolu 32 tiegħu,

Wara li kkunsidra l-proposta tal-Kummissjoni, imfassla wara li kisbet l-opinjoni ta’ grupp ta’ persuni maħtura mill-Kumitat Xjentifiku u Tekniku,

Wara li kkunsidra l-opinjoni tal-Kumitat Ekonomiku u Soċjali Ewropew[1],

Wara li kkunsidra l-opinjoni tal-Parlament Ewropew[2],

Billi:

(1) L-Artikolu 33 tat-Trattat jesiġi li l-Istati Membri jistabbilixxu d-dispożizzjonijiet xierqa sabiex jiżguraw il-konformità mal-istandards tas-sikurezza bażiċi għall-protezzjoni tas-saħħa tal-ħaddiema u tal-pubbliku ġenerali minn perikli li joriġinaw minn radjazzjoni jonizzanti.

(2) L-istandards tas-sikurezza bażiċi huma stabbiliti bid-Direttiva tal-Kunsill 96/29/Euratom tat-13 ta’ Mejju 1996[3]. Dik id-Direttiva tapplika għall-prattiki kollha li jinvolvu riskju ta’ radjazzjoni jonizzanti li toriġina minn sors ta’ radjazzjoni artifiċjali jew naturali, inkluż it-trasport.

(3) Sabiex tiġi żgurata l-konformità mal-istandards bażiċi, hu neċessarju li jiġu stabbiliti liema persuni, organizzazzjonijiet jew intrapriżi għandhom jiġu kkontrollati mill-awtoritajiet tal-Istati Membri. Għal dan il-għan, id-Direttiva 96/29/Euratom tesiġi li l-Istati Membri jissottomettu ċerti prattiki li jinvolvu periklu minn radjazzjoni jonizzanti għal sistema ta’ rappurtar u awtorizzazzjoni minn qabel jew li jipprojbixxu ċerti prattiki.

(4) Peress li t-trasport huwa l-uniku prattika li għandha natura transkonfinali, it-trasportaturi ta’ materjali radjuattivi jistgħu jkunu meħtieġa jsegwu r-rekwiżiti relatati mas-sistemi ta’ rappurtar u awtorizzazzjoni f’diversi Stati Membri. Dan ir-Regolament jissostitwixxi dawn is-sistemi ta’ rappurtar u awtorizzazzjoni fl-Istati Membri b’sistema ta’ reġistrazzjoni unika valida fil-Komunità Ewropea tal-Enerġija Atomika kollha (minn hawn il-quddiem 'il-Komunità').

(5) Għat-trasportaturi bl-ajru u bil-baħar, tali sistemi ta’ reġistrazzjoni u ċertifikazzjoni diġà jeżistu. Ir-Regolament tal-Kunsill (KEE) Nru 3922/91 tas-16 ta’ Diċembru 1991 dwar l-armonizzazzjoni ta’ rekwiżiti tekniċi u proċeduri amministrattivi fil-qasam tal-avjazzjoni ċivili[4] jistabbilixxi li t-trasportaturi tal-ajru jeħtieġu ċertifikat ta’ operatur tal-ajru speċifiku għat-trasportazzjoni ta’ oġġetti perikolużi. Għat-trasport bil-baħar, id-Direttiva 2002/59/KE tal-Parlament Ewropew u tal-Kunsill tas-27 ta’ Ġunju 2002 tistabbilixxi sistema għall-monitoraġġ u l-informazzjoni dwar it-traffiku tal-bastimenti fil-Komunità[5]. Iċ-ċertifikati maħruġa mill-awtoritajiet tal-avjazzjoni ċivili u s-sistema ta’ rappurtar għal bastimenti marittimi huma kkunsidrati li jimplimentaw b’mod sodisfaċenti r-rekwiżiti ta’ rappurtar u awtorizzazzjoni tad-Direttiva 96/29/Euratom. Għalhekk, reġistrazzjoni ta’ trasportaturi bl-ajru u bil-baħar taħt dan ir-Regolament mhijiex neċessarja biex tippermetti lill-Istati Membri jiżguraw il-konformità mal-istandards bażiċi f’dawn il-modi ta’ trasport.

(6) Trasportaturi ta’ materjal radjuattiv huma suġġetti għal għadd ta’ rekwiżiti tal-leġiżlazzjoni tal-Unjoni u tal-Euratom kif ukoll strumenti legali internazzjonali. Ir-Regolamenti tal-Aġenzija Internazzjonali tal-Enerġija Atomika (IAEA) għat-Trasport Sikur ta’ Materjal Radjuattiv (TS-R-1) u r-Regolamenti Modali għat-Trasport ta’ Oġġetti Perikolużi jibqgħu japplikaw direttament jew jiġu implimentati mill-Istati Membri taħt id-Direttiva 2008/68/KE tal-Parlament Ewropew u tal-Kunsill tal-24 ta’ Settembru 2008 dwar it-trasport intern ta’ oġġetti perikolużi[6] għat-trasport bit-triq, bil-ferrovija u fl-ilmijiet navigabbli interni. Id-dispożizzjonijiet ta’ din id-Direttiva huma, madankollu, mingħajr preġudizzju għall-applikazzjoni ta’ dispożizzjonijiet oħra fl-oqsma tas-sikurezza u s-saħħa okkupazzjonali u l-protezzjoni ambjentali.

ADOTTA DAN IR-REGOLAMENT

Artikolu 1 Suġġett u kamp ta' applikazzjoni

(1) Dan ir-Regolament jistabbilixxi sistema Komunitarja għar-reġistrazzjoni ta’ trasportaturi ta’ materjali radjuattivi li tiffaċilita l-kompitu tal-Istati Membri biex jiżguraw li l-istandards bażiċi għall-protezzjoni tas-saħħa tal-ħaddiema u tal-pubbliku ġenerali minn perikli li joriġinaw minn radjazzjonijiet jonizzanti stabbiliti fid-Direttiva 96/29/Euratom qed jiġu osservati.

(2) Dan ir-Regolament għandu japplika għal kwalunkwe trasportatur li jittrasporta materjali radjuattivi fi ħdan il-Komunità, minn pajjiżi terzi għall-Komunità u mill-Komunità għal pajjiżi terzi. Dan ma għandux japplika għal trasportaturi li jittrasportaw materjali radjuattivi bl-ajru u bil-baħar.

Artikolu 2 Definizzjonijiet

Għall-finijiet ta’ dan ir-Regolament

(1) "trasportatur" tfisser kwalunkwe persuna, organizzazzjoni jew intrapriża pubblika li twettaq il-prattika ta’ trasport ta’ materjal radjuattiv bi kwalunkwe mezz tat-trasport fil-Komunità inklużi trasportaturi li jwettqu attivitajiet abbażi ta’ arranġamenti ta’ kiri jew kumpens;

(2) "awtorità kompetenti" tfisser kwalunkwe awtorità maħtura mill-Istat Membru sabiex twettaq kompiti skont dan ir-Regolament;

(3) "trasport" tfisser l-operazzjonijiet kollha tat-trasport mill-post tal-oriġini għall-post tad-destinazzjoni, inklużi t-tagħbien, il-ħżin waqt it-tranżitu u l-ħatt ta’ materjal radjuattiv;

(4) "materjal radjuattiv" tfisser kwalunkwe materjal li fih radjunuklidi fejn kemm il-konċentrazzjoni tal-attività kemm l-attività totali fil-kunsinna jaqbżu l-valuri speċifikati fil-paragrafi 402–407 tar-Regolamenti tal-IAEA għat-Trasport Sikur ta’ Materjal Radjuattiv, Rekwiżiti tas-Sikurezza Nru TS-R-1, 2009, Vjenna;

(5) "oġġetti perikolużi ta’ konsegwenzi għoljin - materjal radjuattiv" tfisser materjali radjuattivi li għandhom il-potenzjal li jintużaw ħażin f’inċident terroristiku u li jistgħu, b'riżultat ta' dan, jipproduċu konsegwenzi serji bħal diżgrazzji tal-massa jew qerda tal-massa kif iddefinit fl-Appendiċi A.9. tas-Sensiela dwar is-Sikurezza Nukleari tal-IAEA Nru 9 “Security in the Transport of Radioactive Material”, Vjenna, 2008;

(6) "pakkett ta’ eċċezzjoni" tfisser kwalunkwe pakkett li fih il-kontenut radjuattiv permess ma jaqbiżx il-livelli ta’ attività stabbiliti fit-Tabella V tat-Taqsima IV tar-Regolamenti għat-Trasport Sikur ta’ Materjal Radjuattiv Nru TS-R-1 jew wieħed minn għaxra ta’ dawn il-limiti għat-trasport bil-posta u li huma tikkettati bħala NU Nru 2908, 2909, 2910 jew 2911;

(7) "materjal fissili" tfisser uranju-233, uranju-235, plutonju-239 u plutonju-241 jew kwalunkwe kombinazzjoni ta’ dawn ir-radjunuklidi.

Artikolu 3 Dispożizzjonijiet ġenerali

(1) It-trasportaturi ta’ materjali radjuattivi għandu jkollhom reġistrazzjoni valida miksuba skont l-Artikolu 5. Ir-reġistrazzjoni għandha tippermetti lit-trasportatur iwettaq il-prattika tat-trasport fl-Unjoni Ewropea kollha.

(2) Operazzjonijiet tat-trasport individwali għandhom ikunu akkumpanjati minn kopja taċ-ċertifikat tar-reġistrazzjoni tat-trasportatur jew minn liċenzja jew reġistrazzjoni miksuba skont il-proċedura nazzjonali applikabbli fil-każ tat-trasport imsemmi fil-paragrafu (3).

(3) Detentur ta’ liċenzji jew reġistrazzjonijiet validi maħruġa skont id-Direttiva 96/29/Euratom għall-immaniġġjar ta’ materjal radjuattiv jew għall-użu ta’ tagħmir li fih materjal jew sorsi radjuattivi jista’ jittrasporta dawn il-materjali jew sorsi mingħajr ir-reġistrazzjoni taħt dan ir-Regolament jekk it-trasportazzjoni hija inkluża fil-liċenzji jew ir-reġistrazzjonijiet għall-Istati Membri kollha fejn isir it-trasport.

(4) Rekwiżiti ta’ rappurtar u awtorizzazzjoni nazzjonali li huma addizzjonali għar-rekwiżiti stabbiliti b’dan ir-Regolament jistgħu japplikaw biss għat-trasportaturi tal-materjali li ġejjin:

– materjal fissili, minbarra uranju naturali jew uranju mfaqqar li ġie rradjat f’reattur termali biss;

– oġġetti perikolużi ta’ konsegwenzi għoljin - materjali radjuattivi.

Artikolu 4 Sistema Elettronika għar-Reġistrazzjoni tat-Trasportaturi (ESCReg)

(1) Għas-superviżjoni u l-kontroll tat-trasport ta’ materjal radjuattiv, għandha tiġi stabbilita Sistema Elettronika għar-Reġistrazzjoni tat-Trasportaturi (ESCReg) mill-Kummissjoni li tkun responsabbli wkoll għall-manutenzjoni tagħha. Il-Kummissjoni għandha tiddefinixxi informazzjoni addizzjonali, kif ukoll speċifikazzjonijiet u rekwiżiti tekniċi tal-ESCReg.

(2) L-ESCReg għandha tagħti aċċess ristrett u sikur lill-awtoritajiet kompetenti tal-Istati Membri, lit-trasportaturi rreġistrati u lill-applikanti, soġġett għad-dispożizzjonijiet rilevanti dwar il-protezzjoni ta' dejta personali, kif stabbiliti b’mod partikolari bid-Direttiva 95/46/KE tal-Parlament Ewropew u tal-Kunsill[7]. L-awtoritajiet kompetenti għandu jkollhom aċċess għad-dejta kollha disponibbli.

(3) Il-Kummissjoni ma għandhiex tkun responsabbli għall-kontenut u l-eżattezza tal-informazzjoni sottomessa permezz tal-ESCReg.

Artikolu 5 Proċedura ta’ reġistrazzjoni

(1) Trasportatur għandu japplika għar-reġistrazzjoni permezz tal-ESCReg.

(2) It-trasportatur applikant għandu jissottometti l-formola tal-applikazzjoni elettronika mimlija stabbilita fl-Anness I.

(3) Mal-mili u s-sottomssjoni tal-formola tal-applikazzjoni, l-applikant għandu jirċievi konferma awtomatika li l-applikazzjoni tkun waslet, flimkien man-numru tal-applikazzjoni.

(4) Jekk l-applikant ikun stabbilit fi Stat Membru wieħed jew aktar, l-applikazzjoni għandha tiġi pproċessata mill-awtorità kompetenti tal-Istat Membru fejn ikun stabbilit l-uffiċċju prinċipali tal-applikant.

(5) Jekk l-applikant ikun stabbilit f’pajjiż terz, l-applikazzjoni għandha tiġi pproċessata mill-awtorità kompetenti tal-Istat Membru fejn it-trasportatur għandu l-ħsieb li jidħol għall-ewwel darba fit-territorju tal-Unjoni.

(6) L-awtorità kompetenti tal-Istat Membru li toħroġ l-ewwel ċertifikat ta’ reġistrazzjoni ta’ trasportatur għandha toħroġ ukoll iċ-ċertifikat l-ġdid f’każ ta’ modifika tad-dejta skont l-Artikolu 6.

(7) Fi żmien tmien ġimgħat mill-konferma tal-ħruġ tal-konferma tar-riċevuta tal-applikazzjoni l-awtorità kompetenti għandha toħroġ ċertifikat ta’ reġistrazzjoni ta’ trasportatur jekk tikkunsidra li l-informazzjoni sottomessa hija kompluta u li hija skont ir-rekwiżiti applikabbli ta’ dan ir-Regolament, u tad-Direttiva 96/29/Euratom u d-Direttiva 2008/68/KE.

(8) Iċ-ċertifikat ta’ reġistrazzjoni ta’ trasportatur għandu jinkludi l-informazzjoni stabbilita fl-Anness II u għandu jinħareġ fil-forma ta’ ċertifikat ta’ reġistrazzjoni standardizzat permezz tal-ESCReg.

(9) Kopja taċ-ċertifikat ta’ reġistrazzjoni ta’ trasportatur għandha tiġi pprovduta awtomatikament permezz tal-ESCReg lill-awtoritajiet kompetenti kollha tal-Istati Membri fejn it-trasportaturi għandhom il-ħsieb li joperaw.

(10) Jekk l-awtorità kompetenti tiċħad il-ħruġ taċ-ċertifikat ta’ reġistrazzjoni ta’ trasportatur abbażi tal-fatt li l-applikazzjoni ma tkunx kompluta jew ma tkunx konformi mar-rekwiżiti applikabbli, għandha twieġeb lill-applikant bil-miktub fi żmien tmien ġimgħat minn meta tkun ħarġet il-konferma tar-riċevuta. L-awtorità kompetenti għandha tipprovdi dikjarazzjoni tar-raġunijiet taċ-ċaħda.

(11) Kopja taċ-ċaħda u dikjarazzjoni tar-raġunijiet għandhom jiġu pprovduti awtomatikament permezz tal-ESCReg lill-awtoritajiet kompetenti kollha tal-Istati Membri fejn it-trasportaturi għandhom il-ħsieb li joperaw.

(12) F’każ ta’ ċaħda tal-ħruġ taċ-ċertifikat ta’ reġistrazzjoni ta’ trasportatur, l-applikant jista’ jressaq rikors skont ir-rekwiżiti legali nazzjonali applikabbli.

(13) Ċertifikat validu ta’ reġistrazzjoni għandu jiġi rikonoxxut mill-Istati Membri kollha.

(14) Iċ-ċertifikat ta’ reġistrazzjoni ta’ trasportatur huwa validu għal perjodu ta’ ħames snin u jista’ jiġġedded wara applikazzjoni mit-trasportatur.

Artikolu 6 Modifika tad-dejta

(1) It-trasportatur għandu jkun responsabbli biex jiżgura li d-dejta pprovduta fil-formola tal-applikazzjoni għar-reġistrazzjoni Komunitarja tat-trasportaturi sottomessa lill-ESCReg tibqa’ eżatta.

(2) It-trasportatur għandu japplika għal ċertifikat ġdid fil-każ ta’ modifika tad-dejta inkluża fil-parti A tal-formola tal-applikazzjoni għar-reġistrazzjoni Komunitarja tat-trasportaturi.

Artikolu 7 Assigurazzjoni tal-konformità

(1) Jekk trasportatur ma jikkonformax mar-rekwiżiti ta’ dan ir-Regolament l-awtorità kompetenti tal-Istat Membru fejn ikun ġie skopert in-nuqqas ta' konformità għandha tapplika l-miżuri ta’ infurzar fi ħdan il-qafas legali ta’ dak l-Istat Membru, bħal notifiki bil-miktub, miżuri ta’ taħriġ u edukazzjoni, sospensjoni, revoka jew modifika tar-reġistrazzjoni jew prosekuzzjoni, skont kemm ikun sinifikanti mil-lat ta' sikurezza n-nuqqas ta' konformità u r-rekord tal-konformità tat-trasportatur.

(2) Din l-awtorità kompetenti għandha tikkomunika lit-trasportatur u lill-awtoritajiet kompetenti tal-Istati Membri konċernati fejn it-trasportatur kien qed jippjana li jittrasporta materjali radjuattivi, l-informazzjoni dwar l-azzjoni ta’ infurzar applikata u dikjarazzjoni tar-raġunijiet għall-applikazzjoni ta’ dik l-azzjoni. Jekk it-trasportatur ma jikkonformax mal-azzjoni ta’ infurzar applikata skont il-paragrafu 1, l-awtorità kompetenti tal-Istat Membru fejn ikun stabbilit l-uffiċċju prinċipali tat-trasportatur jew, jekk it-trasportatur ikun stabbilit f’pajjiż terz, l-awtorità kompetenti tal-Istat Membru, fejn it-trasportatur kellu l-ħsieb li jidħol għall-ewwel darba fit-territorju tal-Komunità għandha tirrevoka r-reġistrazzjoni.

(3) L-awtorità kompetenti għandha tikkomunika lit-trasportatur u lill-awtoritajiet kompetenti l-oħra konċernati r-revoka flimkien ma’ dikjarazzjoni tar-raġunijiet.

Artikolu 8 Awtoritajiet kompetenti u punt tal-kuntatt nazzjonali

(1) L-Istati Membri għandhom jaħtru awtorità kompetenti u punt tal-kuntatt nazzjonali għat-trasport ta’ materjali radjuattivi.

(2) L-Istati Membri għandhom jibagħtu lill-Kummissjoni mhux aktar tard minn xahar wara d-dħul fis-seħħ ta’ dan ir-Regolament l-isem(ismijiet), l-indirizz(i) u l-informazzjoni kollha neċessarja għal komunikazzjoni rapida mal-awtoritajiet kompetenti u mal-punt tal-kuntatt nazzjonali għat-trasport ta’ materjali radjuattivi, kif ukoll kwalunkwe bidla sussegwenti tat-tali dejta.

(3) Il-Kummissjoni għandha tikkomunika din l-informazzjoni u kwalunkwe bidla fiha lill-awtoritajiet kompetenti kollha fil-Komunità permezz tal-ESCReg.

Artikolu 9 Kooperazzjoni bejn awtoritajiet kompetenti

L-awtoritajiet kompetenti tal-Istati Membri għandhom jikkooperaw bil-għan li jiġu armonizzati r-rekwiżiti tagħhom għall-ħruġ ta’ reġistrazzjoni u biex jiżguraw l-applikazzjoni u l-infurzar armonizzati ta’ dan ir-Regolament.

Fejn hemm diversi awtoritajiet kompetenti fi ħdan Stat Membru, dawn għandhom jikkollaboraw u jikkooperaw mill-qrib abbażi ta’ ftehimiet legali jew formali bejniethom billi jkopru r-responsabbiltajiet ta’ kull awtorità. Dawn għandhom jikkomunikaw ma' xulxin u jipprovdu informazzjoni lil xulxin, lill-punt tal-kuntatt nazzjonali, u lill-organizzazzjonijiet oħra governattivi u mhux governattivi li għandhom responsabbiltajiet relatati.

Artikolu 10 Grupp ta’ esperti

Il-Kummissjoni għandha tistabbilixxi grupp ta’ esperti b’Deċiżjoni tal-Kummissjoni abbażi tal-Artikolu 135 tat-Trattat Euratom.

Il-grupp għandu jagħti pariri u jgħin lill-Kummissjoni fit-twettiq tal-kompiti tagħha pprovduti f’dan ir-Regolament.

Il-grupp għandu jkun magħmul minn esperti nnominati mill-Istati Membri u esperti nnominati mill-Kummissjoni u għandu jkun ippresedut minn rappreżentant tal-Kummissjoni.

Artikolu 11 Dħul fis-seħħ

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

Għandu japplika minn sitt xhur wara d-dħul fis-seħħ tiegħu.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, […]

                                                                       Għall-Kunsill

                                                                       Il-President                                                                        […]

ANNESS I FORMOLA TAL-APPLIKAZZJONI GĦAR-REĠISTRAZZJONI KOMUNITARJA TAT-TRASPORTURI

JEKK JOGĦĠBOK IBGĦAT DIN L-APPLIKAZZJONI BILLI TUŻA BISS IL-WEBSAJT TAS-SISTEMA ELETTRONIKA SIKURA TAL-KUMMISSJONI EWROPEA GĦAR-REĠISTRAZZJONI TAT-TRASPORTATURI (ESCReg)

L-INFORMAZZJONI FIL-PARTI A HIJA SUĠĠETTA GĦAL REĠISTRAZZJONI ĠDIDA JEKK TINTALAB MODIFIKA.

L-informazzjoni Pprovduta f'din il-formola tal-applikazzjoni se tiġi proċessata mill-Kummissjoni Ewropea skont ir-Regolament Euratom xxxxx

         ĊERTIFIKAT ĠDID TA’ REĠISTRAZZJONI

         MODIFIKA TA’ REĠISTRAZZJONI EŻISTENTI

         TIĠDID TA’ REĠISTRAZZJONI EŻISTENTI

Numru/i taċ-Ċertifikat tar-Reġistrazzjoni:

Jekk jogħġbok agħti d-dettalji għaliex qed tintalab varjazzjoni ta’ reġistrazzjoni eżistenti

1. IDENTIFIKAZZJONI TAL-APPLIKANT:

PARTI A || PARTI B

ISEM IL-KUMPANIJA: INDIRIZZ SĦIĦ: NUMRU TAR-REĠISTRAZZJONI NAZZJONALI: || 1. Isem, pożizzjoni, indirizz sħiħ, numru tat-telefown u indirizz tal-posta elettronika tar-rappreżentant responsabbli tal-organizzazzjoni tat-trasportatur (persuna mogħtija s-setgħa sabiex tikkommetti lill-organizzazzjoni tat-trasportaturi): 2. Isem, pożizzjoni, indirizz sħiħ, numru tat-telefown u indirizz tal-posta elettronika tal-persuna tal-kuntatt għall-awtoritajiet dwar kwistjonijiet tekniċi/amministrattivi (li hija responsabbli għall-konformità mar-regolamenti għall-attivitajiet mobilizzati mill-kumpanija tat-trasportatur): 3. Isem, pożizzjoni, indirizz sħiħ tal-konsulent tas-sikurezza (għal modi tat-trasport intern biss u jekk huma differenti minn 1 jew 2): 4. Isem, pożizzjoni u indirizz sħiħ tal-persuna responsabbli għall-implimentazzjoni tal-Programm ta’ Protezzjoni mir-Radjazzjoni jekk tkun differenti minn 1 jew 2 jew 3.

2. NATURA TAT-TRASPORT:

PARTI A || PARTI B

       TRIQ        FERROVIJA        ILMIJIET NAVIGABBLI INTERNI  || 1 Persunal involut u mħarreġ għat-trasport (informazzjoni)        1 sa 5          5 sa 10        10 sa 20                  >20 2 Settur tal-attività tat-trasport: deskrizzjoni ġenerali tan-natura tal-attivitajiet tat-trasport li għandhom jitwettqu (informazzjoni)  użu mediku  użu industrijal, użu f'ittestjar mhux distruttiv, riċerka          użu f'ċiklu tal-fjuwil nukleari             skart  oġġetti perikolużi ta’ konsegwenzi għoljin - materjali radjuattivi

3. KOPERTURA ĠEOGRAFIKA

Jekk jogħġbok immarka mil-lista ta’ hawn taħt dawk l-Istati Membri li fihom huwa ppjanat li jiġi ttrasportat il-materjal radjuattiv u agħżel in-natura tal-attività

Jekk attivitajiet huma mobilizzati wkoll fi Stati Membri għajr l-Istat Membru fejn saret l-applikazzjoni għar-reġistrazzjoni, aktar dettalji speċifiċi għal kull pajjiż; jiġifieri tranżitu biss, jew postijiet ewlenin ta’ tagħbien/ħatt fi ħdan il-pajjiż partikolari; frekwenza:

PARTI A || PARTI B

L-Awstrija Il-Belġju Il-Bulgarija Ċipru Ir-Repubblika Ċeka Id-Danimarka L-Estonja Il-Finlandja Franza Il-Ġermanja Il-Greċja L-Ungerija L-Irlanda L-Italja Il-Latvja Il-Litwanja Il-Lussemburgu Malta Il-Pajjiżi l-Baxxi Il-Polanja Il-Portugall Ir-Rumanija Is-Slovakkja Is-Slovenja Spanja L-Isvezja Ir-Renju Unit ||  tranżitu  ħatt  tagħbien postijiet ewlenin tat-tagħbien: postijiet ewlenin tal-ħatt: frekwenza:  kuljum  kull ġimgħa  kull xahar  inqas frekwenti

4. TIP TA’ KONSENJI

Reġistrazzjoni ntalbet għal:

PARTI A TIP TA’ PAKKETT – Klassifikazzjoni skont it-TS-R-1 || PARTI B: Għadd stmat ta’ pakketti /sena

NU 2908 MATERJAL RADJUATTIV, PAKKETT TA’ EĊĊEZZJONI — PAKKETT VOJT NU 2909 MATERJAL RADJUATTIV, PAKKETT TA’ EĊĊEZZJONI — OĠĠETTI MANIFATTURATI MINN URANJU NATURALI jew URANJU MFAQQAR jew TORJU NATURALI NU 2910 MATERJAL RADJUATTIV, PAKKETT TA’ EĊĊEZZJONI — KWANTITÀ LIMITATA TA’ MATERJAL NU 2911 MATERJAL RADJUATTIV, PAKKETT TA’ EĊĊEZZJONI — STRUMENTI jew OĠĠETTI NU 2912 MATERJAL RADJUATTIV, ATTIVITÀ SPEĊIFIKA BAXXA (LSA-I), mhux fissili jew fissili ta’ eċċezzjoni NU 2913 MATERJAL RADJUATTIV, OĠĠETTI B’WIĊĊ KONTAMINAT (SCO-I jew SCO-II), mhux fissili jew fissili ta’ eċċezzjoni NU 2915 MATERJAL RADJUATTIV, PAKKETT TAT-TIP A, mingħajr forma speċjali, mhux fissili jew fissili ta’ eċċezzjoni NU 2916 MATERJAL RADJUATTIV, PAKKETT TAT-TIP B(U), mhux fissili jew fissili ta’ eċċezzjoni NU 2917 MATERJAL RADJUATTIV, PAKKETT TAT-TIP B(M), mhux fissili jew fissili ta’ eċċezzjoni NU 2919 MATERJAL RADJUATTIV, TRASPORTAT TAĦT FTEHIM SPEĊJALI, mhux fissili jew fissili ta’ eċċezzjoni NU 2977 MATERJAL RADJUATTIV, EŻAFLUWORUR TAL-URANJU, FISSILI NU 2978 MATERJAL RADJUATTIV, EŻAFLUWORUR TAL-URANJU, mhux fissili jew fissili ta’ eċċezzjoni NU 3321 MATERJAL RADJUATTIV, ATTIVITÀ SPEĊIFIKA BAXXA (LSA-II), mhux fissili jew fissili ta’ eċċezzjoni NU 3322 MATERJAL RADJUATTIV, ATTIVITÀ SPEĊIFIKA BAXXA (LSA-III), mhux fissili jew fissili ta’ eċċezzjoni NU 3323 MATERJAL RADJUATTIV, PAKKETT TAT-TIP C, mhux fissili jew fissili ta’ eċċezzjoni NU 3324 MATERJAL RADJUATTIV, ATTIVITÀ SPEĊIFIKA BAXXA (LSA-II), FISSILI NU 3325 MATERJAL RADJUATTIV, ATTIVITÀ SPEĊIFIKA BAXXA (LSA-III), FISSILI NU 3326 MATERJAL RADJUATTIV, OĠĠETTI B’WIĊĊ KONTAMINAT (SCO-I jew SCO-II), FISSILI NU 3327 MATERJAL RADJUATTIV, PAKKETT TAT-TIP A, FISSILI, mingħajr forma speċjali NU 3328 MATERJAL RADJUATTIV, PAKKETT TAT-TIP B(U), FISSILI NU 3329 MATERJAL RADJUATTIV, PAKKETT TAT-TIP B(M), FISSILI NU 3330 MATERJAL RADJUATTIV, PAKKETT TAT-TIP C, FISSILI NU 3331 MATERJAL RADJUATTIV, TRASPORTAT TAĦT FTEHIM SPEĊJALI, FISSILI NU 3332 MATERJAL RADJUATTIV, PAKKETT TAT-TIP A, B’FORMA SPEĊJALI, mhux fissili jew fissili ta’ eċċezzjoni NU 3333 MATERJAL RADJUATTIV, PAKKETT TAT-TIP A, B’FORMA SPEĊJALI, FISSILI ||

5. PROGRAMM TA’ PROTEZZJONI MIR-RADJAZZJONI (RPP)

PARTI A: Meta nimmarka din il-kaxxa: Jiena niddikjara li aħna għandna RPP li hu implimentat kompletament u applikat b'mod strett || PARTI B: Referenza u data tad-dokument li jiddeskrivi l-RPP Upload tal-RPP

6. PROGRAMM TA’ ASSIGURAZZJONI TAL-KWALITÀ (QAP)

Dan il-QAP għandu jkun disponibbli għall-ispezzjoni mill-awtorità kompetenti (skont l-Artikolu 1.7.3 tal-ADR)

PARTI A: Meta nimmarka din il-kaxxa: Jiena niddikjara li aħna għandna QAP li hu implimentat kompletament u applikat b'mod strett || PARTI B: Referenza u data tad-dokument  ISO 9002

7. DIKJARAZZJONI

 Jiena, it-trasportatur, qiegħed hawnhekk niċċertifika li jiena nikkonforma mar-regolamenti internazzjonali, komunitarji u nazzjonali kollha relatati mat-trasport ta’ materjali radjuattivi.

 Jiena, it-trasportatur, qiegħed hawnhekk niċċertifika li l-informazzjoni inkluża f’din il-formola hija korretta.

Data ………..            Isem ………..……..    Firma………  

ANNESS II ĊERTIFIKAT ELETTRONIKU TA’ REĠISTRAZZJONI TA’ TRASPORTATURI GĦAT-TRASPORT TA’ MATERJAL RADJUATTIV

NOTA:

KOPJA TA’ DAN IĊ-ĊERTIFIKAT TA’ REĠISTRAZZJONI GĦANDHA TAKKUMPANJA KULL TRASPORT LI JAQA’ TAĦT IL-KAMP TA’ APPLIKAZZJONI TA' DAN IR-REGOLAMENT.

Dan iċ-ċertifikat ta’ reġistrazzjoni qed jinħareġ skont ir-Regolament tal-Kunsill (Euratom) xxxxx

Dan iċ-ċertifikat ma jeżonorax lit-trasportatur mill-konformità mar-regolamenti tat-trasport applikabbli l-oħra.

1) NUMRU TAR-REFERENZA TAR-REĠISTRAZZJONI: BE/ xxxx / jj-xx-ssss

2) ISEM L-AWTORITÀ / PAJJIŻ:

3) ISEM IL-KUMPANIJA & INDIRIZZ

4) MOD TAT-TRASPORT:

       TRIQ        FERROVIJA        ILMIJIET NAVIGABBLI INTERNI

7) STATI MEMBRI fejn iċ-ċertifikat huwa applikabbli

8) TIP TA’ PAKKETT– NUMRU tan-NU (ara l-anness 1- l-istess format)

9) DATA

FIRMA ELETTRONIKA

PERJODU TA’ VALIDITÀ : DATA + 5 snin

DIKJARAZZJONI FINANZJARJA LEĠIŻLATTIVA GĦAL PROPOSTI LI JKOLLHOM IMPATT BAĠITARJU LIMITAT ESKLUSSIVAMENT GĦAN-NAĦA TAD-DĦUL

1.           ISEM IL-PROPOSTA:

Regolament tal-Kunsill li jistabbilixxi sistema Komunitarja għar-Reġistrazzjoni tat-trasportaturi ta’ materjali radjuattivi

2.           LINJI BAĠITARJI:

Kapitolu u Artikolu: 320102110005 - (E)-Développement système IT

Ammont ibbaġitjat għas-sena konċernata: EUR 350000

3.           IMPATT FINANZJARJU

¨      Il-proposta ma għandha l-ebda implikazzjoni finanzjarja

¨      Il-proposta ma għandha l-ebda impatt finanzjarju fuq in-nefqa iżda għandha impatt finanzjarju fuq id-dħul – l-effett huwa kif ġej:

(miljuni ta' EUR imqarrba sa post deċimali wieħed)

|| ||

Linja baġitarja || Dħul || Perjodu ta’ 12-il xahar, li jibda minn jj/xx/ssss || [Sena n]

Artikolu 4 || || || 0.35

Sitwazzjoni wara azzjoni

|| [n+1] || [n+2] || [n+3] || [n+4] || [n+5]

Artikolu 4 || 0.05 || 0.05 || 0.05 || 0.05 || 0.05

4.           MIŻURI KONTRA L-FRODI

5.           RIMARKI OĦRA

[1]               ĠU C , , p. .

[2]               ĠU C , , p. .

[3]               ĠU L 159, 29.6.1996, p. 1.

[4]               ĠU L 373, 31.12.1991, p. 4.

[5]               ĠU L 208, 5.8.2002, p. 10.

[6]               ĠU L 260, 30.9.2008, p. 13.

[7]               ĠU L 281, 23.11.1995, p. 31.