MEMORANDUM TA’ SPJEGAZZJONI

1. INTRODUZZJONI – GħALIEX HIJA MEħTIEġA R-RIFORMA

1.1. Is-sistema tal-finanzjament tal-UE għadda żmienha

Is-sistema tal-finanzjament tal-UE evolviet b'mod konsiderevoli mill-1957 'l hawn. Għall-bidu serrħet l-aktar fuq il-kontribuzzjonijiet mill-Istati Membri. Mill-1970 'l hawn, iddaħħlet sistema ta' riżorsi proprji li tiżgura l-awtonomija tal-finanzi tal-UE. Għall-bidu din kienet imsejsa fuq ir-riżorsi proprji tradizzjonali li kellhom rabta mal-linji politiċi tal-UE, iżda l-iżvilupp progressiv tar-riżorsi proprji msejsin fuq il-VAT u fuq l-ING fissru ċaqliqa lejn finanzjament imsejjes l-aktar fuq l-aggregati statistiċi, li ma juru l-ebda rabta mal-prijoritajiet tal-linji politiċi tal-UE.

B'mod parallel mal-evoluzzjoni fil-mod kif inhuma magħmulin ir-riżorsi proprji, iddaħħlu għadd ta' mekkaniżmi korrettivi msejsin fuq prinċipji ffissati fil-Laqgħa Għolja Ewropea li saret f'Fontainebleau f'Ġunju 1984. B'mod partikulari, " kwalunkwe Stat Membru li jkollu piż baġitarju li jkun eċċessiv meta mqabbel mal-ġid relattiv tiegħu jista' jgawdi minn korezzjoni fiż-żmien opportun ". Dawn il-mekkaniżmi huma damma ta' miżuri diversi, li jirriżultaw minn negozjati suċċessivi li kellhom it-tendenza li jżidu miżuri ġodda mal-korp ta' korrezzjonijiet eżistenti.

Ir-rapport dwar it-tħaddim tas-sistema tar-riżorsi proprji[1] juri li s-sistema ta' finanzjament ta' bħalissa tagħti riżultati fqar fir-rigward tal-biċċa l-kbira tal-kriterji tal-valutazzjoni. Is-sistema tal-finanzjament mhix trasparenti biżżejjed u tant hija kumplessa li huma biss għadd żgħir ta' speċjalisti li jifhmu għal kollox kif taħdem. Dan jillimita s-superviżjoni demokratika tas-sistema. Barra minn dan, l-Istati Membri jipperċepixxu s-sistema bħala waħda inġusta. Kontributuri kbar għall-baġit iqisu li l-kontribuzzjonijiet netti tagħhom huma għoljin wisq, filwaqt li għadd ta' Stati Membri li jgawdu mil-linji politiċi dwar ir-ridistribuzzjoni, bħall-koeżjoni, qed iħabbtu wiċċhom ma' żidiet fil-kontribuzzjonijiet għall-baġit tal-UE biex jiġu ffinanzjati l-mekkaniżmi ta' korrezzjoni.

Aktar importanti minn hekk, x'aktarx, huwa l-fatt li l-mod kif qed jiġi ffinanzjat il-baġit tal-UE – b'ħafna politiċi nazzjonali jqisu l-kontribuzzjonijiet mill-Istati Membri lill-UE sempliċiment bħala nefqiet – inevitabbilment joħloq tensjoni li tavvelena kull dibattitu dwar il-Baġit tal-UE. L-iżvilupp progressiv tal-mekkaniżmi tal-korrezzjoni hu biss sintomu wieħed ta' din il-problema. Il-pressjoni biex jiġu ddeterminati minn qabel l-allokazzjonijiet nazzjonali huwa ieħor. L-iffukar dejjem jiżdied fuq mod dejjaq kif issir il-kontabilità, bl-objettiv ewlieni li nimmassimizzaw ir-redditu, mhux biss ilewwen lid-dibattiti pubbliċi dwar il-valur tal-infiq. Iwassal ukoll biex xi nies jiddubitaw mill-benefiċċji tas-sħubija nnifisha fl-UE.

Id-diffikultajiet li ltqajna magħhom biex intlaħqu ftehimiet dwar kwistjonijiet baġitarji fl-UE fis-seklu 21 huma parzjalment ir-riżultat tal-organizzazzjoni inadegwata tal-finanzi pubbliċi tal-UE. Għal bosta snin, il-finanzjament tal-UE kien primarjament ittrattat bħala mekkaniżmu ta' kontabilità b'żewġ objettivi ewlenin: li jiġi żgurat li jkun hemm biżżejjed finanzjament tan-nefqiet tal-UE u li jiġu inkorporati l-għadd dejjem jiżdied ta' mekkaniżmi ta' korrezzjoni. Kif ġie spjegat hawn fuq, dan il-mod ta' kif isiru l-affarijiet wasal sal-limiti tiegħu. Issa huwa ż-żmien li nikkunsidraw metodu differenti għall-finanzjament tal-UE.

1.2. Paradigma ġdida għall-finanzjament tal-UE

L-isfidi konsiderevoli li jeżistu fil-qasam tal-finanzi pubbliċi u l-prijoritajiet li qed jitfaċċaw jaffettwaw lill-kunċetti relatati mal-bbaġit tal-UE li rabbew għeruq sodi. Qed titfaċċa paradigma ġdida għall-finanzjament tal-UE, u hija msejsa fuq żewġ pilastri.

L-ewwel nett, is-sistema tal-finanzjament tal-UE jista' jkollha sehem sostanzjali fl-isforzi li qed isiru madwar l-Unjoni kollha kemm hi biex jiġi kkonsolidat il-baġit. Sal-2010, wara l-kriżi ekonomika u finanzjarja dinjija, id-defiċit annwali totali tas-27 Stat Membru tal-UE kien stmat li jammonta għal EUR 826.9 biljun[2]. Id-defiċits pubbliċi f'diversi mill-ikbar Stati Membri kienu fil-fatt ikbar mid-daqs tal-baġit tal-UE kollu kemm hu. Dawn l-aħħar xhur enfasizzaw id-diffikultajiet persistenti li jħabbtu wiċċhom magħhom għadd ta' Stati Membri. L-isforzi biex jiġi kkonsolidat il-baġit se jsiru aktar diffiċli minħabba l-kost tal-popolazzjonijiet li qed jixjieħu[3] u sfidi oħrajn, bħat-tibdil fil-klima. F'dan il-kuntest, ħames kapijiet ta' Stati jew gvernijiet saħqu li "il-qafas finanzjarju multiannwali li jmiss se jiġi hekk kif l-Istati Membri jagħmlu sforzi straordinarji biex inaddfu l-finanzi pubbliċi"[4].

Aktar rinfurzar tad-dixxiplina baġitarja fil-livell tal-UE se jaffettwa l-aspetti kollha tal-baġit tal-UE, mhux biss in-nefqiet tal-UE iżda wkoll l-introjti tal-UE. L-iżviluppar tas-sistema tar-riżorsi proprji se jikkontribwixxi għall-isforzi usa' tal-Istati Membri biex jiġi kkonsolidat il-baġit. L-introduzzjoni progressiva ta' riżorsi ġodda tiftaħ il-bieb biex riżorsi oħrajn jitnaqqsu, jitħallew jispiċċaw bil-ftit il-ftit jew jinqatgħu. B'riżultat ta' dan il-kontribuzzjonijiet tal-Istati Membri għall-baġit tal-UE se jiċkienu u l-Istati Membri se jkollhom grad addizzjonali ta' libertà fl-immaniġġjar ta' riżorsi nazzjonali skarsi. Kif indikat fir-Reviżjoni tal-Baġit tal-UE, l-introduzzjoni ta' riżorsi proprji ġodda "mhix argument dwar id-daqs tal-baġit – hija dibattitu dwar it-taħlita t-tajba ta' riżorsi"[5].

It-tieni nett, ħlief għar-riżorsi proprji tradizzjonali (prinċipalment id-dazji doganali li joriġinaw mill-unjoni doganali), ir-riżorsi tal-UE bħalissa ma jixhdu l-ebda rabta mal-objettivi tal-linji politiċi tal-UE, u lanqas ma jsostnuhom. Minkejja dan, kif indikat fir-Reviżjoni tal-Baġit tal-UE, l-introduzzjoni ta' riżorsi proprji ġodda tista' "tirrifletti ċ-ċaqliqa progressiva tal-istruttura tal-baġit lejn linji politiċi eqreb lejn iċ-ċittadini u timmira lejn sitwazzjoni fejn ikun hemm beni pubbliċi tal-UE u valur miżjud ogħla tal-UE. Hija tista' tappoġġa l-kisba ta' objettivi importanti tal-linji politiċi tal-UE jew internazzjonali, ngħidu aħna b'rabta mal-iżvilupp, it-tibdil fil-klima jew is-swieq finanzjarji – u tkun marbuta mill-qrib magħha.

Jistgħu jiġu żviluppati flussi ġodda ta' introjti biex nieħdu vantaġġ mill-mod supranazzjonali ta' kif isiru l-affarijiet u mill-massa kritika li tista' tinkiseb fil-livell tal-UE. Fejn il-mobbiltà ta' xi bażijiet tat-taxxa hija għolja wisq biex tippermetti li tittieħed azzjoni effettiva mill-Istati Membri waħedhom, jew fejn azzjonijiet limitati meħudin minn xi Stati Membri iżda mhux minn oħrajn joħolqu frammentazzjoni tas-suq intern, azzjoni min-naħa tal-UE tista' żżid il-valur. It-tassazzjoni tas-settur finanzjarju hija partikularment rilevanti f'dan ir-rigward. Fil-komunikazzjoni li ħarġet f'Ottubru 2010 dwar it-tassazzjoni tas-settur finanzjarju l-Kummissjoni indikat li taxxi ġodda għas-settur finanzjarju "jistgħu jgħinu biex jinħolqu l-kundizzjonijiet għal aktar tkabbir sostenibbli, kif previst fl-istarteġija Ewropa 2020"[6]. Fil-ħarifa l-Kummissjoni ħabbret proposta leġiżlattiva għal taxxa tal-UE fuq it-tranżazzjonijiet finanzjarji. Barra minn hekk, jekk is-sistema tal-VAT tiġi żviluppata aktar fil-kuntest ta' riżorsa proprja ġdida, dan jista' wkoll isaħħaħ is-suq intern u jwassal għal kisbiet fl-effiċjenza ekonomika.

It-tiswir mill-ġdid tas-sisien tas-sistema tal-finanzjament tal-UE se tiġġenera dibattitu dwar l-inċidenza tar-riżorsi speċifiċi, lil hinn mil-lenti tal-kontabilità, li hija ristretta għall-kalkoli tal-bilanċi netti.

Fl-istess ħin, jeħtieġ li jinżammu l-elementi importanti tas-sistema ta' bħalissa tal-finanzjament, bħar-riżorsi proprji tradizzjonali u riżorsa proprja residwa msejsa fuq l-ING, li jippermettu stabbiltà baġitarja u baġit ibbilanċjat. Iżda dan tal-aħħar jista' jinkiseb b'riżorsa proprja residwa msejsa fuq l-ING u b'taħlita fundamentalment differenti ta' riżorsi.

1.3. It-Trattat ta' Lisbona joħloq qafas legali ġdid

It-Trattat dwar il-Funzjonament tal-Unjoni Ewropea (TFUE) introduċa bidliet importanti, mhux biss għall-proċedura baġitarja tal-UE iżda wkoll għall-mod kif jiġi ffinanzjat il-baġit tal-UE. Hemm żewġ dispożizzjonijiet tat-trattat li f'dan il-kuntest jixirqilhom attenzjoni partikulari:

1. L-Artikolu 311(3) TFUE issa jipprovdi li l-Kunsill "jista' jistabbilixxi kategoriji ġodda ta' riżorsi proprji jew jabolixxi kategorija eżistenti" fil-kuntest ta' Deċiżjoni dwar ir-riżorsi proprji. Dan jiftaħ il-bieb għat-tnaqqis tal-għadd ta' riżorsi proprji eżistenti u għall-ħolqien ta' oħrajn ġodda.

2. L-Artikolu 311(4) TFUE jipprovdi, minn mindu daħal fis-seħħ m'ilux, li l-"Kunsill, li jaġixxi permezz ta' regolament skont il-proċedura leġislattiva speċjali, għandu jistabbilixxi miżuri li jimplimentaw is-sistema tar-riżorsi proprji ta' l-Unjoni safejn dan ikun previst fid-Deċiżjoni [dwar ir-riżorsi proprji]". Din id-dispożizzjoni tintroduċi l-possibbiltà li jiġu ddefiniti miżuri speċifiċi ta' implimentazzjoni relatati mas-sistema tar-riżorsi proprji f'regolament ta' implimentazzjoni fil-limiti stabbiliti mid-Deċiżjoni dwar ir-riżorsi proprji.

Il-proposti tal-Kummissjoni jagħmlu użu sħiħ minn dawn il-possibbiltajiet ġodda billi jipproponu l-eliminazzjoni tar-riżorsa proprja bbażata fuq il-VAT u l-ħolqien ta' riżorsi proprji ġodda, u billi jipproponu organizzazzjoni ġdida tal-miżuri ta' implimentazzjoni għas-sistema tar-riżorsi proprji.

L-opportunità offruta minn dan il-qafas ġdid ittieħdet biex is-sistema ssir waħda biżżejjed flessibbli fil-qafas u fil-limiti stabbiliti mid-Deċiżjoni dwar ir-riżorsi proprji billi tpoġġi l-arranġamenti prattiċi kollha għar-riżorsi tal-Unjoni li jeħtieġ li jiġu rregolati minn proċedura aktar simplifikata f'regolament ta' implimentazzjoni minflok fid-Deċiżjoni nnifisha. Dawn il-proposti jirriflettu l-intenzjonijiet tal-leġiżlatur kif espressi fil-Konvenzjoni dwar il-futur tal-Ewropa u kif approvati mill-konferenza intergovernamentali sussegwenti.

2. TLIET PROPOSTI – DEċIżJONI WAħDA

Id-Deċiżjoni proposta dwar ir-riżorsi proprji fiha tliet elementi ewlenin: is-simplifikazzjoni tal-kontrubuzzjonijiet tal-Istati Membri, l-introduzzjoni ta' riżorsi proprji ġodda u r-riforma tal-mekkaniżmi ta' korrezzjoni. Ir-rapport tal-Kummissjoni dwar it-tħaddim tas-sistema tar-riżorsi proprji jitfa' enfasi fuq kif kull waħda minn dawn il-proposti tirrelata mal-bqija u fuq kif tikkumplimentahom. Meta wieħed jeħodhom flimkien, dawn il-proposti jikkostitwixxu pakkett bilanċjat li wieħed irid iħares lejh bħala xi ħaġa sħiħa fil-kuntest ta' deċiżjoni waħda.

2.1. Nissimplifikaw il-kontribuzzjoni tal-Istati Membri

Il-Kummissjoni tipproponi li r-riżorsa proprja bbażata fuq il-VAT titneħħa hekk kif jiddaħħlu riżorsi proprji ġodda. Dan huwa konformi mal-fehmiet espressi mill-biċċa l-kbira tal-Istati Membri u mill-istituzzjonijiet tal-UE fil-konsultazzjonijiet li saru b'rabta mar-Reviżjoni tal-Baġit.

Ir-riżorsa proprja eżistenti bbażata fuq il-VAT hija kumplessa, tirrikjedi ħafna xogħol amministrattiv biex wieħed jasal għal bażi armonizzata, u toffri ftit li xejn, jew xejn, valur miżjud meta mqabbla ma' riżorsa proprja bbażata fuq l-ING. It-twarrib tagħha se jissimplifika b'mod konsiderevoli l-kontribuzzjonijiet nazzjonali u se jnaqqas il-piż amministrattiv kemm għall-Kummissjoni kif ukoll għall-Istati Membri.

Meta wieħed iqis il-kumplessitajiet amministrattivi marbutin ma' din ir-riżorsa proprja u r-rati baxxi ta' ġbir ta' bħalissa, it-tneħħija tagħha bil-ftit il-ftit tkun inqas effiċjenti minn eliminazzjoni f'daqqa tagħha f'data partikulari. Għalhekk, qed jiġi propost li din ir-riżorsa tiġi abolita fil-31 ta' Diċembru 2013. Kemm-il darba d-Deċiżjoni tidħol fis-seħħ aktar tard, din id-dispożizzjoni tiġi ippromulgata fuq bażi retroattiva, skont prattika komuni li ntużat fir-reviżjonijiet passati tad-deċiżjonijiet dwar ir-riżorsi proprji. L-Użu ta l-31 ta' Diċembru bħala l-punt tat-tmiem jevita l-kalkolu tar-riżorsa għal frazzjoni ta' sena partikulari.

Wara t-tmiem tar-riżorsa proprja bbażata fuq il-VAT, se jkun hemm bżonn li jsir aktar xogħol: li jiġu mmaniġġati d-dikjarazzjonjiet annwali tal-VAT għas-sena ta' qabel it-tmiem tar-riżorsa, li jsir l-eżerċizzju annwali tal-bilanċ tal-VAT, li jsiru l-kontrolli sabiex tingħata garanzija dwar il-preċiżjoni tal-kalkoli, li jitlesta ċ-ċiklu tas-superviżjoni, li jiġu mmaniġġati r-riservi, il-każijiet ta' ksur tar-regoli, il-korrezzjonijiet u r-rikonċiljazzjonijiet tal-kontabbiltà pendenti. L-estinzjoni aħħarija tal-attivitajiet kollha relatati mar-riżorsa proprja bbażata fuq il-VAT se tieħu diversi snin.

2.2. L-introduzzjoni ta' riżorsi proprji ġodda

Il-Kummissjoni identifikat sitt kandidati potenzjali bħala riżorsi proprji fir-Reviżjoni tal-Baġit tal-UE. Dawn kienu suġġetti għal analiżi bir-reqqa, li kienet tinkludi b'mod partikulari l-kriterji ta' valutazzjoni stabbiliti fir-Reviżjoni tal-Baġit.

Din l-analiżi tefgħat enfasi fuq l-elementi ewlenin li ġejjin:

3. It-tassazzjoni fuq it-tranżazzjonijiet finanzjarji (TTF) tista' tikkostitwixxi fluss ġdid ta' introjtu, li jista' jnaqqas il-kontribuzzjonijiet eżistenti tal-Istati Membri, jagħti lill-Istati Membri aktar spazju biex jimmanuvraw u jikkontribwixxu għall-isforz ġenerali għall-konsolidazzjoni tal-baġit. Għalkemm xi forma ta' tassazzjoni fuq it-tranżazzjonijiet finanzjarji teżisti diġà f'għadd limitat ta' Stati Membri, l-analiżi għamlitha ċara wkoll li azzjoni fil-livell tal-UE tista' tkun kemm aktar effettiva kif ukoll aktar effiċjenti minn azzjoni mhux ikkordinata mill-Istati Membri, meta wieħed iżomm quddiem għajnejh il-livell ta' attività transkonfinali u l-mobbiltà kbira tal-bażijiet għat-taxxa. Barra minn hekk, din jista' jkollha rwol fit-tnaqqis tal-frammentazzjoni eżistenti tas-suq intern. Għalhekk, fil-ħarifa tal-2011 il-Kummissjoni se tippreżenta proposta għal taxxa tal-UE fuq it-tranżazzjonijiet finanzjarji. Taxxa fuq it-tranżazzjonijiet finanzjarji li tkun tista' tinġabar fil-livell tal-UE tnaqqas il-problemi ta' juste retour li ġew osservati fis-sistema ta' bħalissa. L-inizjattiva tal-UE se tikkostitwixxi l-ewwel pass lejn l-applikazzjoni tat-TTF fil-livell globali.

4. L-iżvilupp ta' riżorsa ġdida tal-VAT iġġib impetus ġdid fl-iżvilupp tas-suq intern billi ssaħħaħ l-armonizzazzjoni tas-sistemi nazzjonali tal-VAT. Ir-riżorsa ġdida tal-VAT tkun aspett wieħed ta' sistema tal-VAT riveduta b'mod li jidher ċar fl-UE wara l-ħruġ tal-Green Paper dwar il-futur tal-VAT. L-inizjattiva l-ġdida se tinkludi l-eliminazzjoni ta' għadd ta' eżenzjonijiet jew eċċezzjonijiet li huma ta' detriment għall-funzjonament tajjeb tas-suq intern kif ukoll miżuri biex jitnaqqas il-frodi tal-VAT fl-UE.

5. L-analiżi uriet li dawn ir-riżorsi proprji jistgħu jiddaħħlu fil-livell tal-UE fil-perjodu bejn l-2014 u l-2020 wara perjodu xieraq ta' tħejjija teknika. It-tagħqid ta' dawn ir-riżorsi flimkien iġib miegħu vantaġġi addizzjonali meta mqabbel mal-introduzzjoni ta' riżorsa proprja ġdida waħda biss. Dan ikun jiżgura tqassim ġust tal-impatt fid-diversi Stati Membri u l-massa kritika meħtieġa biex il-kontribuzzjonijiet eżistenti tal-Istati Membri għall-baġit tal-UE jitnaqqsu sostanzjalment.

Fuq il-bażi tal-analiżi tagħha, il-Kummissjoni tipproponi l-introduzzjoni ta' riżorsa proprja ta' taxxa fuq it-tranżazzjonijiet finanzjarji mhux aktar tard mill-1 ta' Jannar 2018 u ta' riżorsa ġdida tal-VAT mhux aktar tard mill-1 ta' Jannar 2018. Iż-żmien meta jiddaħħlu dawn ir-riżorsi proprji ġodda jirrifletti ż-żmien meħtieġ biex jitlesta l-qafas legali, u biex tiġi adottata u implimentata l-leġiżlazzjoni rilevanti. Il-Kummissjoni se tippreżenta r-regolamenti jew emendi ddettaljati rilevanti għall-atti legali eżistenti, kfi ukoll ir-regolamenti ta' implimentazzjoni relatati, skont l-Artikolu 322(2) TFUE sa tmiem l-2011.

L-impatt li hu stmat li se jkun hemm fuq l-istruttura tar-riżorsi proprji huwa ppreżentat fil-qosor fit-tabella hawn taħt. Din turi ċ-ċaqliqa mill-kontribuzzjonijiet nazzjonali eżistenti għar-riżorsi proprji l-ġodda. Ir-riżorsi proprji l-ġodda jkunu jiffinanzjaw madwar 40% tan-nefqiet tal-UE. Ir-riżorsi proprji tradizzjonali jkunu jirrappreżentaw qrib l-20% tat-total. Ir-riżorsa proprja bbażata fuq l-ING tibqa' l-aktar riżorsa individwali importanti, u tiffinanzja madwar 40% tal-baġit.

Kif inhu stmat li se tevolvi l-istruttura tal-finanzjament tal-UE (2012-2020)

Abbozz tal-baġit 2012 | 2020 |

EUR biljun | % tar-riżorsi proprji | EUR biljun | % tar-riżorsi proprji |

Ir-riżorsi proprji tradizzjonali | 19.3 | 14.7 | 30.7 | 18.9 |

Il-kontribuzzjonijiet nazzjonali eżistenti li minnhom | 111.8 | 85.3 | 65.6 | 40.3 |

Riżorsa proprja bbażata fuq il-VAT | 14.5 | 11.1 | - | - |

Riżorsa proprja bbażata fuq il-GNI | 97.3 | 74.2 | 65.6 | 40.3 |

Riżorsi proprji ġodda li minnhom | - | - | 66.3 | 40.8 |

Riżorsa ġdida tal-VAT | - | - | 29.4 | 18.1 |

Taxxa tal-UE fuq it-tranżazzjonijiet finanzjarji | - | - | 37.0 | 22.7 |

Riżorsi proprji totali | 131.1 | 100.0 | 162.7 | 100.0 |

2.3. Ir-riforma tal-mekkaniżmi ta’ korrezzjoni

Il-Kunsill Ewropew ta' Fontainebleau tal-1984 stabbilixxa prinċipji gwida importanti sabiex tiġi ggarantita l-ġustizzja fil-baġit tal-UE. B'mod partikulari, dak il-Kunsill indika li "l-linja politika dwar l-infiq hija fl-aħħar mill-aħħar il-mezz essenzjali biex tiġi solvuta l-kwistjoni tal-iżbilanċi baġitarji". Minkejja dan, huwa rrikonoxxa li "kwalunkwe Stat Membru li jkollu piż baġitarju li jkun eċċessiv meta mqabbel mal-ġid relattiv tiegħu jista' jgawdi minn korezzjoni fiż-żmien opportun".

Dawn il-prinċipji ġew ikkonfermati u ġew applikati konsistentement f'Deċiżjonijiet suċċessivi dwar ir-riżorsi proprji. Illum il-ġurnata, huma erbgħa l-Istati Membri li ngħatawlhom mekkaniżmi temporanji tal-korrezzjoni, iżda dawn se jintemmu fl-2013. Il-korrezzjoni mogħtja lir-Renju Unit u t-tnaqqis mogħti fuq il-finanzjament tagħha lil erba' Stati Membri (il-Ġermanja, il-Pajjiżi l-Baxxi, l-Awstrija u l-Isvezja), kif ukoll il-korrezzjoni moħbija li tikkonsisti fiż-żamma, permezz tal-ispejjeż tal-ġbir, ta' 25% tal-ammonti miġburin mill-Istati Membri għar-riżorsi proprji tradizzjonali, se jibqgħu japplikaw sakemmm tidħol fis-seħħ Deċiżjoni ġdida dwar ir-riżorsi proprji. Fil-kuntest ta' din ir-reviżjoni profonda tal-finanzjament tal-UE, jeħtieġ li nagħtu ħarsa mill-ġdid lejn dawn il-mekkaniżmi tal-korrezzjoni.

Mill-analiżi tas-sistema ta' bħalissa joħorġu żewġ lezzjonijiet importanti:

L-ewwel nett, is-sitwazzjoni oġġettiva ta' għadd ta' Stati Membri evolviet bis-saħħa matul iż-żmien. Dan irid ikun rifless kif għandu jkun fis-sistema tal-korrezzjonijiet.

Fuq il-bażi tal-prinċipji ta' Fontainebleau, il-korrezzjoni tar-Renju Unit ġiet iġġustfikata għal kollox meta ġiet stabbilita fl-1984. Dak iż-żmien ir-Renju Unit, li kien wieħed mill-ifqar Stati Membri, kien wieħed mill-akbar kontributuri netti għall-baġit tal-UE, li kien jikkonsisti l-aktar f'nefqa agrikola. Huwa kkontribwixxa ammont relattivament kbir għal sistema ta' finanzjament tal-UE li kienet tiddependi bil-kbir fuq ir-riżorsa proprja bbażata fuq il-VAT, li l-bażi għaliha kienet partikularment kbira fir-Renju Unit.

Il-kundizzjonijiet oġġettivi li jirfdu l-mekkaniżmi ta' bħalissa tal-korrezzjoni evolvew konsiderevolment mill-1984 'l hawn. Il-proprozjon tal-PAK fil-baġit tal-UE u l-finanzjament ibbażat fuq il-VAT naqsu b'mod konsiderevoli. L-aktar importanti, illum il-ġurnata r-Renju Unit huwa wieħed mill-aktar Stati Membri għonja tal-UE. Fuq il-bażi ta' dawn l-elementi u ta' valutazzjoni tal-piż baġitarju u tal-ġid relattiv tar-Renju Unit meta mqabbel ma' dak ta' Stati Membri oħrajn, jeħtieġ li l-korrezzjoni tar-Renju Unit tiġi vvalutata mill-ġdid.

Kif evolvew il-parametri ewlenin (1984-2011)

1984 | 2005 | 2011 |

Proporzjon tal-PAK fil-baġit (% tat-total) | 69% | 50% | 44% |

Kontribuzzjoni bbażata fuq il-VAT (% tat-total) | 57% | 16% | 11% |

Il-ġid tar-Renju Unit (ING per capita PPS) | 93% tal-EU-10 | 117% tal-EU-25 | 111% tal-EU-27 |

Sors: Il-Kummissjoni Ewropea, DĠ Baġit

Fuq il-bażi tal-qafas finanzjarju 2014-2020 propost mill-Kummissjoni[7] u anki jekk il-kost kollu kemm hu tat-tkabbir jitħalla jinqasam b'mod ġust fost l-Istati Membri li huma aktar għonja mill-oħrajn, jidher li għadd limitat ta' Stati Membri, inkluż ir-Renju Unit, xorta waħda jibqgħu jħabbtu wiċċhom ma' piż baġitarju li jista' jitqies eċċessiv meta mqabbel mal-ġid relattiv tagħhom.

Għalhekk, din id-Deċiżjoni tipproponi l-inklużjoni ta' korrezzjonijiet temporanji favur il-Ġermanja, il-Pajjiżi l-Baxxi, l-Isvezja u r-Renju Unit mill-2014 'il quddiem. Dawn il-korrezzjonijiet iridu jirriflettu, inter alia, l-iżviluppi importanti fil-finanzjament tal-UE stabbiliti f'din id-Deċiżjoni, l-evoluzzjoni tan-nefqa proposta fil-qafas finanzjarju inkluża t-tlestija tal-introduzzjoni progressiva tan-nefqa f'dawk l-Istati Membri li daħlu fl-UE fl-2004 u fl-2007, u l-livell għoli ta' prosperità miksub mill-Istati Membri msemmijin hawn fuq.

It-tieni nett, is-sistema l-ġdida ta' korrezzjoni trid tkun trasparenti u sempliċi, miftuħa b'mod ġenwin għall-iskrutinju tal-pubbliku u għal dak parlamentari, prevedibbli u effiċjenti. Trid ukoll tkun tiżgura li jkun hemm trattament indaqs tal-Istati Membri.

Kif inhi kkalkulata llum il-ġurnata, il-korrezzjoni tar-Renju Unit hija mekkaniżmu kumpless għall-aħħar. Hija tinkorpora inċentivi ekonomiċi intrinsikament perversi, mhux l-inqas fost dawn l-ikkanċellar awtomatiku (permezz ta' tnaqqis fil-korrezzjoni) ta' għajnuna mħallsa mill-UE lir-Renju Unit, ngħidu aħna meta jseħħu katastrofijiet, bħall-għargħar. Hija wkoll il-bażi tat-tnaqqis fil-finanzjament tal-korrezzjoni tar-Renju Unit għall-Ġermanja, għall-Pajjiżi l-baxxi u għall-Isvezja. Bl-eliminazzjoni tar-riżorsa proprja bbażata fuq il-VAT, xi dejta li hija essenzjali għall-kalkolu tal-korrezzjoni tar-Renju Unit mhix se tibqa' disponibbli, u dan idaħħal argument tekniku favur reviżjoni fil-fond tal-mekkaniżmu.

Għalhekk, il-Kummissjoni tipproponi sistema ġdida ta' somma f'daqqa biex tieħu post il-mekkaniżmi preeżistenti ta' korrezzjoni kollha mill-1 ta' Jannar 2014 'il quddiem. It-trasformazzjoni tal-korrezzjonijiet ta' bħalissa għal tnaqqis gross b'somma f'daqqa fuq il-pagamenti tal-ING toffri vantaġġi ċari meta mqabbla ma’ kwalunkwe formula alternattiva, inkluża mekkaniżmu ġeneralizzat tal-korrezzjoni kif ipproponiet il-Kummissjoni fl-2004[8]. L-ammonti tas-somom f'daqqa huma bbażati fuq is-suppożizzjonijiet ta' bħalissa, irrispettivament mill-introduzzjoni ta' riżorsi proprji ġodda.

L-aġġornamenti għall-korrezzjonijiet tar-Renju Unit tal-2010, l-2011 u l-2012 se jiġu ttrattati skont is-sistema l-antika għal raġunijiet ta' koerenza u ta' kontinwità, iżda l-korrezzjoni tar-Renju Unit għall-2013, li kellha tiġi bbbaġitjata fl-2014, se tinbidel bis-sistema ġdida ta' korrezzjonijiet permezz ta' somma f'daqqa. Dawn il-korrezzjonijiet se jiġu ffinanzjati b'mod ġust u trasparenti, fejn kull Stat Membru jikkontribwixxi skont il-ġid relattiv tiegħu (iddefinit permezz tal-ING tiegħu bil-prezz tas-suq).

Fl-istess spirtu ta' trasparenza u ġustizzja, il-Kummissjoni tipproponi l-eliminazzjoni tal-korrezzjoni moħbija li tikkonsisti fiż-żamma, permezz tal-ispejjeż tal-ġbir, ta' 25% tal-ammonti miġburin mill-Istati Membri għar-riżorsi proprji tradizzjonali. Meta wieħed iqis il-proposta biex il-korrezzjonijiet jiġu inkorporati f'somom f'daqqa, iż-żamma għandha tiġi limitata għal 10%, skont is-sistemi li kien hemm sal-2000.

3. IL-PAKKETT TAR-RIżORSI PROPRJI

3.1. L-istrumenti legali

It-Trattat dwar il-Funzjonament tal-Unjoni Ewropea (minn hawn 'il quddiem imsejjaħ "TFUE") fih id-dispożizzjonijiet li jirfdu s-sistema tal-finanzjament tal-UE u, b'mod partikulari, ir-riżorsi proprji tagħha. It-Trattat jikkonferma l-irwol ewlieni tad-Deċiżjoni dwar ir-riżorsi proprji, li għandha tinkludi l-elementi prinċipali tas-sistema.

It-TFUE jinkludi wkoll żewġ dispożizzjonijiet rigward l-implimentazzjoni tad-Deċiżjonijiet dwar ir-riżorsi proprji, minflok il-waħda li kien hemm fit-Trattat ta' qablu dwar il-Komunità Ewropea.

6. L-Artikolu 311(4) TFUE jippovdi, minn mindu daħal fis-seħħ m'ilux, li l-"Kunsill, li jaġixxi permezz ta' regolament skond il-proċedura leġislattiva speċjali, għandu jistabbilixxi miżuri li jimplimentaw is-sistema tar-riżorsi proprji tal-Unjoni safejn dan ikun previst fid-Deċiżjoni [dwar ir-riżorsi proprji]". Il-Kunsill għandu jaġixxi wara li jkun kiseb l-approvazzjoni tal-Parlament Ewropew".

7. L-Artikolu 322(2) TFUE jipprovdi li l-"Kunsill, li jaġixxi fuq proposta tal-Kummissjoni u wara li jkun ikkonsulta l-Parlament Ewropew u l-Qorti ta' l-Awdituri, għandu jiffissa l-modalità u jistabbilixxi l-proċeduri dwar kif id-dħul mill-estimi kif previsti fl-arranġamenti li għandhom x’jaqsmu mar-riżorsi ta' l-Unjoni jkun disponibbli għall-Kummissjoni, u jiddetermina l-miżuri li għandhom jiġu applikati, jekk meħtieġa, sabiex jiġu indirizzati l-bżonnijiet finanzjarji".

Il-miżuri ta' implimentazzjoni għas-sistema tar-riżorsi proprji għalhekk jirriżultaw minn żewġ artikoli tat-TFUE u għandhom proċeduri differenti biex jiġu adottati: l-approvazzjoni tal-Parlament Ewropew hija meħtieġa biex jiġu adottati miżuri li jsiru skont l-Artikolu 311(4) TFUE u jiġi kkonsultat rigward miżuri li jsiru skont l-Artikolu 322(2). Il-miżuri ta' implimentazzjoni taħt l-Artikolu 311(4) TFUE jeħtieġ li jiġi pprovdut għalihom fid-Deċiżjoni dwar ir-riżorsi proprji, filwaqt li l-Artikolu 322(2) TFUE jgħid li jridu jittieħdu miżuri biex isir disponibbli introjtu għall-baġit tal-UE u, jekk ikun meħtieġ, jiġu ssodisfati r-rekwiżiti dwar il-kontanti.

Dan iqajjem il-kwistjoni ta' liema elementi għandhom jiġu ddefiniti fid-Deċiżjoni dwar ir-riżorsi proprji nnifisha u ta' liema miżuri ta' implimentazzjoni jridu jiġu inklużi f'liema regolamenti. Meta ġie abbozzat it-trattat, il-ħsieb tal-leġiżlatur kien li "s-sistema tar-riżorsi għandha tiddistingwi bejn żewġ bażijiet legali, kull waħda minnhom bil-proċedura separata tagħha. Waħda biex jiġi ffissat il-limiti massimu tar-riżorsi proprji u b'hekk il-kobor tal-baġit tal-Unjoni u biex jinħolqu riżorsi ġodda, li tkun irregolata mill-proċedura aktar ingombranti skont it-[Trattat] [...]; L-oħra tikkonċerna l-proċeduri prattiċi għar-riżorsi tal-Unjoni, li jkunu rregolati minn proċedura aktar issimplifikata: adozzjoni mill-Kunsill b'maġġoranza kkwalifikata […] bl-approvazzjoni tal-Parlament Ewropew"[9].

L-organizzazzjoni proposta tal-qafas leġiżlattiv għas-sistema tar-riżorsi proprji issegwi mill-qrib din il-loġika billi tiffissa s-sistema fid-Deċiżjoni dwar ir-riżorsi proprji u billi tipprovdi għall-aspetti prattiċi kollha fir-regolamenti rilevanti ta' implimentazzjoni.

3.2. L-irwol ewlieni tad-Deċiżjoni dwar ir-riżorsi proprji

Bħala l-istrument legali ewlieni li fuqu hija bbażata s-sistema tar-riżorsi proprji kollha kemm hi, id-Deċiżjoni dwar ir-riżorsi proprji se tibqa' tinkludi l-elementi prinċipali tas-sistema. Fil-kuntest stabbilit mit-TFUE, m'għandhiex bilfors tkun irreveduta ma' kull qafas finanzjarju ġdid. Minflok, għandha tkun tikkostitwixxi sies qawwi, stabbli u li jservi għal ħafna żmien li fuqu tinbena s-sistema tar-riżorsi proprji. L-approvazzjoni u r-ratifikazzjoni tagħha mill-Istati Membri jippermettu skrutinju parlamentari sħiħ u jiżguraw li s-sovranità nazzjonali tiġi rrispettata.

Il-proposta essenzjalment iżżomm l-istruttura tad-Deċiżjoni ta' bħalissa dwar ir-riżorsi proprji u tinkludi ħafna mid-dispożizzjonijiet eżistenti. Madanakollu, huma inklużi wkoll xi modifikazzjonijiet sostanzjali:

8. it-tmiem tar-riżorsi proprji bbażati fuq il-VAT fil-31 ta' Diċembru 2013 u l-inklużjoni ta' dispożizzjoni li tindirizza t-tneħħija gradwali tagħhom fid-dispożizzjonijiet finali.

9. lista ta' riżorsi proprji ġodda, inklużi ż-żmien meta jiddaħħlu u limiti rilevanti għall-applikazzjoni tagħhom. B'mod partikulari, id-Deċiżjoni fiha limitu massimu għar-rati tat-taxxa applikabbli għar-riżorsi proprji l-ġodda, filwaqt li r-regolament ta' implimentazzjoni skont l-Artikolu 311(4) jippreżenta rati speċifiċi. Dan l-arranġament jipprovdi kemm għall-kontroll meħtieġ tar-rati tat-taxxa mill-Istati Membri u mill-parlamenti rispettivi tagħhom kif ukoll għal ftit flessibbiltà taħt is-superviżjoni demokratika tal-Parlament Ewropew. Din il-flessibbilta se tkun partikularment utli fl-istadji bikrin tal-implimentazzjoni tar-riżorsi proprji ġodda, meta l-aktar li se jkun hemm inċertezzi rigward l-impatti preċiżi tagħhom. Ir-rati speċifiċi għat-tassazzjoni tat-tranżazzjonijiet finanzjarji se jiġu proposti flimkien mal-proposta leġiżlattiva konkreta fil-ħarifa;

10. id-dispożizzjonijiet relatati mal-mekkaniżmi tal-kontroll u mat-tmiem tal-korrezzjoni ta' bħalissa tar-Renju Unit. Id-Deċiżjoni tiddefinixxi t-tnaqqis b'somma f'daqqa fuq il-pagamenti tal-ING attribwit għal kull wieħed mill-Istati Membri kkonċernati għal kull sena. Id-Deċiżjoni tinkludi artikolu dwar il-finanzjament ta' dawn il-korrezzjonijiet, li jkunu bbażati fuq il-ġid relattiv tal-Istati Membri kollha.

11. it-tneħħija ta' dispożizzjonijiet li jindirizzaw id-definizzjoni tal-ING għall-finijiet tar-riżorsi proprji u l-kalkoli mill-ġdid tal-limiti massimi tar-riżorsi proprji f'każ ta' bidliet sinifikanti fl-ING. Din hija kwistjoni teknika, li hija indirizzata fir-regolament ta' implimentazzjoni skont l-Artikolu 311(4) TFUE;

12. l-introduzzjoni ta' artikolu ġdid li jagħti dettalji dwar l-elementi li għandhom jiġu inklużi fir-regolamenti ta' implimentazzjoni skont l-Artikolu 311(4) TFUE u l-Artikolu 322(2) TFUE.

Meta mqabbla mad-Deċiżjoni 2007/436/KE dwar ir-riżorsi proprji, id-Deċiżjoni ġdida proposta dwar ir-riżorsi proprji hija aktar trasparenti u tista' tinftiehem faċilment miċ-ċittadini tal-UE u mill-membri tal-Parlament Ewropew u tal-parlamenti nazzjonali.

3.3. Ir-regolament ta' implimentazzjoni

Ir-regolament il-ġdid ta' implimentazzjoni skont l-Artikolu 311(4) TFUE jinkludi dawk l-arranġamenti prattiċi kollha għar-riżorsi tal-Unjoni li għandhom jiġu rregolati bi proċedura aktar issimplifikata sabiex is-sistema ssir flessibbli biżżejjed fil-qafas u l-limiti ffissati mid-Deċiżjoni dwar ir-riżorsi proprji, bl-eżżezzjoni ta' dawk l-aspetti tas-sistema tar-riżorsi proprji li għandhom x'jaqsmu mat-tpoġġija tar-riżorsi proprji għad-dispożizzjoni u mal-issodisfar tar-rekwiżiti dwar il-kontanti (ara t-taqsima 3.4 hawn taħt).

F'dan ir-regolament ta' implimentazzjoni ddaħħlu wkoll dispożizzjonijiet ta' natura ġenerali, applikabbli għat-tipi kollha tar-riżorsi proprji u li għalihom huwa partikularment importanti li jkun hemm superviżjoni parlamentari xierqa. Dan ifisser, partikularment, aspetti ta' kontroll u superviżjoni tal-introjti u s-setgħat relatati tal-ispetturi tal-Kummissjoni.

Hekk, id-dispożizzjonijiet li ġejjin, stabbiliti skont il-lista mħejjija fid-Deċiżjoni dwar ir-riżorsi proprji, tista' tinstab f'dan ir-regolament ta' implimentazzjoni:

13. ir-rati tat-taxxa u r-rati tal-ġbir applikabbli għal kull waħda mir-riżorsi proprji stabbiliti fid-Deċiżjoni. Dan jippermetti flessibbiltà limitata fil-limiti stabbiliti fid-Deċiżjoni dwar ir-riżorsi proprji. Fin-nuqqas ta' tali flessibbiltà, il-kapaċità li jsiru aġġustamenti meħtiġin f'waqthom għar-riżorsi proprji tiġi mxekkla mill-proċedura oneruża u twila maħsuba għall-adozzjoni tad-Deċiżjonijiet dwar ir-riżorsi proprji;

14. l-Introjtu Nazzjonali Gross (ING) ta' referenza skont is-sistema Ewropea tal-kontijiet nazzjonali u reġjonali (European system of national and regional accounts, ESA) u d-dispożizzjonijiet f'każ ta' bidliet sinifikanti fih (l-irfinar tat-tiqjis tal-ING fil-kuntest tar-reviżjonijiet fl-ESA jista' jkollu impatt fuq il-limiti massimi tar-riżorsi proprji);

15. l-aġġustament għall-bilanċ baġitarju annwali. Filwaqt li l-prinċipju ġenerali tar-riporti tal-bilanċi pożittivi huwa stabbilit fid-Deċiżjoni, il-miżuri implimentattivi huma stabbiliti f'dan ir-regolament;

16. id-dispożizzjonijiet dwar il-kontroll u s-superviżjoni, inklużi rekwiżiti supplimentari dwar ir-rappurtaġġ.

Għadd minn dawn il-miżuri bħalissa huma inklużi fir-Regolament 1150/2000 il-punt (3) u ċerti elementi tal-punt (4) li għandhom x'jaqsmu notevolment mar-rappurtaġġ ta' drittijiet, frodi u irregolaritajiet u l-arranġamenti għall-Kumitat Konsultattiv dwar ir-Riżorsi Proprji (Advisory Committee on Own Resources, ACOR). Minħabba li dawn il-punti mhumiex relatati direttament la mat-tpoġġija tar-riżorsi proprji għad-dispożizzjoni u lanqas mar-rekwiżiti dwar il-kontanti, loġikament dawn il-punti jsibu posthom f'dan ir-Regolament ta' implimentazzjoni. Ittieħdet ukoll l-opportunità li jiġi ssimplifikat il-qafas legali kurrenti billi jiġu adottati u aġġornati d-dispożizzjonijiet relatati mas-setgħat u l-obbligi tal-ispetturi tal-Kummissjoni, li qabel kienu inklużi fir-Regolament tal-Kunsill 1026/99, li b'hekk se jiġi abrogat wara l-adozzjoni ta' dan ir-Regolament.

Flimkien mad-Deċiżjoni dwar ir-riżorsi proprji, dan ir-regolament ta' implimentazzjoni jiżgura li kwalunkwe aġġustament tekniku għas-sistema jkun suġġett mhux biss għall-approvazzjoni mil-leġiżlaturi nazzjonali, iżda wkoll għall-approvazzjoni tal-Parlament Ewropew.

3.4. It-tpoġġija tar-riżorsi proprji għad-dispożizzjoni

Id f'id mad-Deċiżjoni dwar ir-riżorsi proprji u r-regolamentt ta' implimentazzjoni skont l-Artikolu 311(4) TFUE, ir-regolamenti li jsiru skont l-Artikolu 322(2) TFUE jrid ikollhom l-elementi rigward it-tpoġġija tar-riżorsi proprji għad-dispożizzjoni u rigward il-miżuri biex jiġu ssodisfati r-rekwiżiti dwar il-kontanti.

Il-Kummissjoni tipproponi approċċ maqsum fuq żewġ fażijiet.

L-ewwel nett, bħala parti minn dan il-pakkett tar-riżorsi proprji, tipproponi li f'Regolament ġdid tal-Kunsill skont l-Artikolu 322(2) TFUE jiddaħħlu d-dispożizzjonijiet meħtiġin biex jiġu ddeterminati l-metodi u l-proċedura li permezz tagħhom l-Istati Membri jagħmlu disponibbli għall-Kummissjoni r-riżorsi proprji tradizzjonali (RPT) u r-riżorsa proprja bbażata fuq l-ING. Dan id-dokument jinkludi wkoll il-miżuri li għandhom jiġu applikati, jekk ikun meħtieġ, biex jiġu ssodisfati r-rekwiżiti dwar il-kontanti.

Dawn l-arranġamenti prattiċi jimplimentaw is-sistema stabbilita fid-Deċiżjoni dwar ir-riżorsi proprji rigward l-istabbiliment tar-RPT, iż-żamma tad-dokumenti ġustifikattivi, il-koperazzjoni amministrattiva, il-kontijiet li jridu jinżammu għar-riżorsi proprji, iż-żmien meta għandhom isiru disponibbli u meta jsiru aġġustamenti u, fejn ikun meħtieġ, dispożizzjonijiet rigward il-ġestjoni tal-kontanti u l-ammonti irrikuperabbli.

Fil-prattika, il-proposta tinkorpora d-dispożizzjonijiet tar-Regolament tal-Kunsill (KW, Euratom) Nru 1150/2000[10] bl-eċċezzjoni ta' dawk li mhumiex relatati strettament mat-tpoġġija tar-RPT għad-dispożizzjoni u r-riżorsa proprja bbażata fuq l-ING jew mar-rekwiżiti dwar il-kontanti. Għal raġunijiet ta' ċarezza u ta' razzjonalità, u fil-kuntest tal-pakkett tar-riżorsi proprji, ir-Regolament Nru 1150/2000 għandu għaldaqstant jitfassal mill-ġdid. Dan ma jinkludix bidliet materjali fid-dispożizzjonijiet eżistenti. Madanakollu, hemm bżonn li jsiru għadd żgħir ħafna ta' emendi sostantivi sabiex tiġi riflessa l-esperjenza riċenti fil-ġestjoni mill-Kummissjoni tar-RPT u tar-riżorsa proprja bbażata fuq l-ING.

It-tieni nett, se jkun hemm bżonn ta' dispożizzjonijiet sabiex jingħata kas tar-riżorsi proprji ġodda proposti. Dawn jistgħu jkunu jinkludu d-definizzjoni tal-fatt taxxabbli; il-punt tat-taxxa sabiex il-fatt taxxabbli jintrabat ma' entrata kontabilistika; il-forma u l-frekwenza tad-dikjarazzjoni jew tal-istqarrija li trid issir lill-Kummissjoni; l-istabbiliment tal-mekkaniżmi li permezz tagħhom irid isir il-ħlas jew jitpoġġew għad-dispożizzjoni r-riżorsi; is-sanzjonijiet applikabbli; iċ-ċirkustanzi li fihom jistgħu jsiru l-korrezzjonijiet u l-istruzzjonijiet rigward il-limiti taż-żmien biex jinżammu d-dokumenti ġustifikattivi.

Se jkun hemm bżonn ta' dispożizzjonijiet li jkopru t-temi rilevanti għar-riżorsa proprja ġdida proposta, u dawn se jkunu inklużi f'regolamenti separati, kif xieraq.

2011/0183 (CNS)

Proposta għal

DEĊIŻJONI TAL-KUNSILL

dwar is-sistema tar-riżorsi proprji tal-Unjoni Ewropea

(//KE, Euratom)

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari t-tielet paragrafu tal-Artikolu 311 tiegħu, flimkien mat-Trattat li jistabbilixxi l-Komunità Ewropea tal-Enerġija Atomika, u b’mod partikolari l-Artikolu 106(a) tiegħu,

Wara li kkunsidra l-proposta mill-Kummissjoni Europea,

Wara t-trażmissjoni tal-abbozz tal-att leġiżlattiv lill-Parlamenti nazzjonali,

Wara li kkunsidra l-opinjoni tal-Parlament Ewropew[11],

Wara li kkunsidra l-opinjoni tal-Qorti tal-Awdituri[12],

Wara li kkunsidra l-opinjoni tal-Kumitat Ekonomiku u Soċjali Ewropew[13],

Filwaqt li jaġixxi skont il-proċedura leġiżlattiva speċjali,

Billi:

17. Is-sistema tar-riżorsi proprji tal-Unjoni għandha tiżgura li jkun hemm riżorsi adegwati għall-iżvilupp xieraq tal-politika tal-Unjoni, suġġett għall-ħtieġa ta’ dixxiplina baġitarja stretta. L-iżvilupp tas-sistema tar-riżorsi proprji jista' u jeħtieġ li jikkontribwixxi għal sforzi usa' favur il-konsolidazzjoni baġitarja magħmulin fl-Istati Membri u jipparteċipa, kemm jista' jkun possibbli, fl-iżvilupp tal-linji politiċi tal-Unjoni.

18. Il-konsultazzjoni pubblika li nbdiet biex tħejji għar-Reviżjoni tal-Baġit tal-UE iġġenerat bosta kontributi relatati mal-funzjonament tas-sistema tal-finanzjament tal-Unjoni. Dawn indikaw livell għoli ta' sodisfazzjon bir-rizorsi proprji tradizzjonali u bl-eżistenza ta' riżorsa residwa sabiex jiġi żgurat li jkun hemm stabbiltà baġitarja u baġits ibbilanċjati. Madanakollu, għadd kbir minn dawk li taw fehmithom identifikaw ħtieġa li jitneħħew il-mekkaniżmi kollha tal-korrezzjoni u li tispiċċa r-riżorsa proprja bbażata fuq it-Taxxa fuq il-Valur Miżjud (VAT). Il-konsultazzjoni tefgħet ukoll enfasi fuq firxa wiesgħa ta' fehmiet dwar l-introduzzjoni ta' riżorsi proprji ġodda.

19. Fil-komunikazzjoni tad-19 ta' Ottubru 2010 dwar ir-Reviżjoni tal-Baġit tal-UE[14], il-Kummissjoni nnotat li l-introduzzjoni ta' fażi ġdida fl-evoluzzjoni tal-finanzjament tal-Unjoni tista' tinkludi tliet dimensjonijiet li huma marbutin mill-qrib ma' xulxin - is-simplifikazzjoni tal-kontribuzzjonijiet tal-Istati Membri, l-introduzzjoni ta' riżorsa proprja ġdida jew ta' riżorsi proprji ġodda u t-tneħħija bil-ftit il-ftit tal-mekkaniżmi kollha tal-korrezzjoni. Hekk kif jibdew jiddaħħlu l-bidliet bil-mod il-mod, jeħtieġ li jinżammu elementi essenzjali tas-sistema tal-finanzjament tal-Unjoni: finanzjament stabbli u suffiċjenti tal-baġit annwali tal-Unjoni, rispett għad-dixxiplina baġitarja u mekkaniżmu li jiggarantixxi baġit ibbilanċjat.

20. Jeħtieġ li s-sistema tar-riżorsi proprji, kemm jista' jkun possibbli, tkun isserraħ fuq riżorsi proprji awtonomi fl-ispirtu tat-Trattat, minflok fuq kontribuzzjonijiet finanzjarji mill-Istati Membri li fil-biċċa l-kbira jqisuhom bħala nefqiet nazzjonali.

21. It-Trattat ta' Lisbona introduċa fid-dispożizzjonijiet relatati mas-sistema tar-riżorsi proprji bidliet li jippermettu li jitnaqqas l-għadd ta' riżorsi eżistenti u li jinħolqu riżorsi proprji ġodda.

22. Id-Deċiżjoni dwar ir-riżorsi proprji ma tistax tidħol fis-seħħ qabel ma tiġi approvata mill-Istati Membri kollha skont ir-rekwiżiti kostituzzjonali rispettivi tagħhom, u b'hekk tiġi rrispettata bis-sħiħ is-sovranità nazzjonali.

23. Meta mqabbla mar-riżorsa proprja bbażata fuq l-Introjtu Nazzjonali Gross (ING), ir-riżorsa proprja ta' bħalissa bbażata fuq il-VAT ftit għandha valur miżjud. Tirriżulta minn kalkolu matematiku kumpless, u b'hekk tikkontribwixxi għan-nuqqas ta' trasparenza tal-kontribuzzjonijiet tal-Istati Membri għall-baġit. B'riżultat tal-kalkolu ta' bażi armonizzata u tal-eżistenza ta' mekkaniżmu ta' limitar m'hemm l-ebda rabta diretta bejn il-bażi reali tal-VAT fi Stat Membru u l-kontribuzzjoni tiegħu għall-baġit annwali tal-Unjoni. It-tneħħija tar-riżorsa proprja bbażata fuq il-VAT fil-forma ta' bħalissa tagħha mill-1 ta' Jannar 2014 'il quddiem għandha tissimplifika s-sistema tal-kontribuzzjonijiet.

24. Sabiex l-istrumenti tal-finanzjament tal-Unjoni jiġu allineati aħjar mal-prijoritajiet tal-linji politiċi tal-Unjoni, il-kontribuzzjonijiet tal-Istati Membri għall-baġit annwali tal-Unjoni jitnaqqsu u tipparteċipa fl-isforzi tagħhom biex jikkonsolidaw il-baġit, din id-Deċiżjoni jeħtieġ li tkun tinkludi riżorsi proprji ġodda – taxxa fuq it-tranżazzjonijiet finanzjarji u riżorsa ġdida tal-VAT.

25. Jeħtieġ li f'din id-Deċiżjoni jiġu stabbiliti l-prinċipji, il-fatturi varjabbli u d-dati ewlenin għal adattament tal-qafas legali tal-Unjoni għall-finjijiet tar-riżorsi proprji l-ġodda minn taxxa fuq it-tranżazzjonijiet finanzjarji u minn riżorsa ġdida tal-VAT.

26. Il-Kunsill Ewropew ta' Fontainebleau tal-1984 indika li l-linja politika dwar in-nefqa hija fl-aħħar mill-aħħar il-mezz essenzjali biex tiġi solvuta l-kwistjoni tal-iżbilanċi baġitarji. Minkejja dan, huwa rrikonoxxa li kwalunkwe Stat Membru li jkollu piż baġitarju li jkun eċċessiv meta mqabbel mal-ġid relattiv tiegħu jista' jgawdi minn korezzjoni fiż-żmien opportun. Jeħtieġ li dawk il-prinċipji jiġu kkonfermati u applikati b'mod konsistenti.

27. Jeħtieġ li kwalunkwe mekkaniżmu tal-korrezzjoni jkun marbut mill-qrib mal-linja politika dwar in-nefqa mniżżla fil-qafas finanzjarju multiannwali previst fl-Artikolu 312 tat-Trattat. Fiha nnifisha l-eżistenza passata jew attwali ta' mekkaniżmu tal-korrezzjoni ma tikkostitwixxix ġustifikazzjoni biex tinżamm fil-ġejjieni. Korrezzjoni għandha tkun trasparenti u faċli biex tinftiehem, u għandha ddum biss sakemm tibqa' taqdi l-għan tagħha, kif iddefinit mill-prinċipji ta' Fontainebleau. Għandha tevita li toħloq xi inċentiv biex il-fondi tal-Unjoni ma jintefqux kif suppost. Dawn l-objettivi jistgħu jintlaħqu l-aħjar permezz ta' sistema ta' tnaqqis b'somma f'daqqa fil-pagamenti tar-riżorsa proprja bbażata fuq l-ING.

28. Il-kundizzjonijiet oġġettivi li fuqhom huma bbażati l-mekkaniżmi tal-korrezzjoni evolvew konsiderevolment matul iż-żmien. Minkejja dan, għadd limitat ta'' Stati Membri għadhom qed iħabbtu wiċċhom ma' piż baġitarju li bħalissa jista' jitqies bħala eċċessiv meta mqabbel mal-ġid relattiv tagħhom. Għalhekk, jeħtieġ li din id-Deċiżjoni tkun tinkludi korrezzjonijiet temporanji favur il-Ġermanja, il-Pajjiżi l-Baxxi, l-Isvezja u r-Renju Unit. Jeħtieġ li dawn il-korrezzjonijiet ikunu jirriflettu, inter alia, l-iżviluppi importanti fil-finanzjament tal-Unjoni stabbiliti f'din id-Deċiżjoni, l-evoluzzjoni tan-nefqa proposta fil-qafas finanzjarju, inkluża t-tlestija tal-introduzzjoni progressiva tan-nefqa f'dawk l-Istati Membri li daħlu fl-Unjoni fl-2004 u fl-2007, u jagħtu kas tal-livelli għoljin ta' prosperità miksubin mill-Ġermanja, mill-Pajjiżi l-Baxxi, mill-Isvezja u mir-Renju Unit.

29. Sabiex jiġi żgurat il-paralleliżmu meħtieġ bejn il-qafas finanzjarju multiannwali u l-implimentazzjoni tal-mekkaniżmi tal-korrezzjoni, jeħtieġ li s-sistema l-ġdida tas-somom f'daqqa tieħu post il-mekkaniżmi preeżistenti kollha tal-korrezzjoni mill-1 ta' Jannar 2014 'il quddiem.

30. Iż-żamma, permezz tal-ispejjeż tal-ġbir, ta' 25% tal-ammonti miġburin mill-Istati Membri għar-riżorsi proprji tradizzjonali tikkostitwixxi mekkaniżmu moħbi tal-korrezzjoni. Meta wieħed iqis il-proposta biex il-mekkaniżmi tal-korrezzjonijiet jiġu inkorporati f'somom f'daqqa, iż-żamma għandha tiġi limitata għal 10%, skont is-sistemi li kien hemm sal-2000.

31. Sabiex jiġi żgurat li jkun hemm dixxiplina baġitarja stretta, u meta wieħed iqis il-Komunikazzjoni tal-Kummissjoni tas-16 ta' April 2010 dwar l-adattament tal-livell massimu tar-riżorsi proprji u tal-livell massimu għall-approprjazzjonijiet għal impenji wara d-deċiżjoni li l-FISIM jiġu applikati għall-finijiet tar-riżorsi proprji[15], jeħtieġ li l-livell massimu tar-riżorsi proprji jkun ta' 1.23% tas-somma tal-ING tal-Istati Membri bil-prezzijiet tas-suq għall-approprjazzjonijiet għal pagamenti u jeħtieġ li jiġi ffissat il-livell massimu ta' 1.29% tas-somma tal-ING tal-Istati Membri għall-approprjazzjonijiet għal impenji. Sabiex l-ammont ta' riżorsi finanzjarji mpoġġijin għad-dispożizzjoni tal-Unjoni jibqgħu mhux mibdulin, huwa xieraq li dawn il-livelli massimi espressi f'persentaġġi tal-ING jiġu adatti fejn emendi għar-Regolament tal-Parlament Ewropew u tal-Kunsill ta' […] dwar is-sistema Ewropea tal-kontijiet nazzjonali u reġjonali fl-Unjoni Ewropea[16] jkunu jfissru bidla sinifikanti fil-livell tal-ING. Tali adattament għandu jsir skont il-proċedura stabbilita skont ir-raba' paragrafu tal-Artikolu 311 tat-Trattat.

32. Sabiex tiġi implimentata din id-Deċiżjoni, huma meħtieġ li jiġi pprovdut għall-adozzjoni ta' miżuri speċifiċi ta' implimentazzjoni. Hekk, f'regolament separat ta' implimentazzjoni għandhom jiddaħħlu dispożizzjonijiet ta' natura ġenerali, applikabbli għat-tipi kollha tar-riżorsi proprji u li għalihom huwa partikularment importanti li jkun hemm superviżjoni parlamentari xierqa. Dan ifisser, b'mod partikulari, il-proċedura biex jiġi kkalkulat u bbaġitjat il-bilanċ baġitarju annwali u aspetti tal-kontroll u tas-superviżjoni tal-introjti. Jeħtieġ li dak ir-regolament ikun jinkludi wkoll ir-rati tat-taxxa u r-rati tal-ġbir għal kull waħda mir-riżorsi proprji stabbiliti fid-Deċiżjoni u kwistjonijiet tekniċi relatati mal-ING, sabiex jipermetti flessibbiltà limitata fil-limiti stabbiliti f'din id-Deċiżjoni.

33. Għal raġunijiet ta' koerenza, kontinwità u ċertezza legali, għandhom isiru dispożizzjonijiet sabiex tiġi koperta l-qalba mis-sistema introdotta permezz tad-Deċiżjoni 2007/436/KE, Euratom tas-7 ta' Ġunju 2007 dwar is-sistema tar-riżorsi proprji tal-Komunitajiet Ewropej[17] għal dik li ġġib magħha din id-Deċiżjoni. Hekk, wara t-tmiem tar-riżorsa proprja bbażata fuq il-VAT, id-Deċiżjoni 2007/436/KE, Euratom għandha tibqa' tapplika għall-kalkolu u għall-aġġustament tal-introjtu li jkun ġej mill-applikazzjoni ta' rata ta' ġbir għall-bażi tal-VAT, għall-proċeduri biex isir disponibbli u għall-arranġamenti għall-ispezzjoni, skont is-snin rilevanti. Barra minn hekk, jeħtieġ li l-kalkolu tal-korrezzjoni tal-iżbilanċi baġitarji mogħtija lir-renju Unit għas-snin sal-2012 jiġi ttrattat skont id-dispożizzjonijiet imniżżlin fid-Deċiżjoni 2007/436/KE, Euratom. Il-korrezzjoni mogħtija lir-Renju Unit għall-2013, li għandha tiġi bbaġitjata fl-2014, għandha tinbidel bi tnaqqis gross ta' somma f'daqqa fl-2014.

34. Jeħtieġ li d-Deċiżjoni 2007/436/KE, Euratom titħassar.

35. Għall-finijiet ta' din id-Deċiżjoni, jeħtieġ li l-ammonti monetarji kollha jiġu espressi f'ewro u bil-prezzijiet ta' bħalissa.

36. Sabiex tiġi żgurata t-tranżizzjoni għas-sistema l-ġdida tar-riżorsi proprji u sabiex din tkun taqbel mas-sena finanzjarja, din id-Deċiżjoni għandha tapplika mill-1 ta' Jannar 2014 'il quddiem.

ADOTTA DIN ID-DEĊIŻJONI:

Artikolu 1

Suġġett

Din id-Deċiżjoni tistabbilixxi regoli dwar l-allokazzjoni tar-riżorsi proprji tal-Unjoni sabiex jiġi żgurat il-finanzjament tal-baġit annwali tal-Unjoni.

Artikolu 2

Kategoriji tar-riżorsi proprji

1. Dħul minn dawn li ġejjin għandu jikkonstitwixxi riżorsi proprji mdaħħla fil-baġit tal-Unjoni:

(a) riżorsi proprji tradizzjonali li jikkonsistu minn imposti, primjums, ammonti addizzjonali jew kompensatorji, ammonti jew fatturi addizzjonali, id-dazji tat-Tariffa Doganali Komuni u dazji oħrajn stabbiliti jew li għandhom jiġu stabbiliti mill-istituzzjonijiet tal-Unjoni fir-rigward tal-kummerċ ma’ pajjiżi mhux membri, dazji doganali fuq prodotti taħt it-Trattat li jistabbilixxi l-Komunità Ewropea tal-Faħam u l-Azzar li skada kif ukoll kontribuzzjonijiet u dazji oħrajn previsti fi ħdan il-qafas tal-organizzazzjoni komuni tas-swieq taz-zokkor;

(b) taxxa fuq it-trażazzjonijiet finanzjarji skont [l-att leġiżlattiv] (UE) Nru […/…], bir-rati applikabbli tat-taxxa ma jaqbżux …%.

(c) parti mit-Taxxa fuq il-Valur Miżjud (VAT) fuq fornimenti ta' prodotti u servizzi, akkwisti intra-Komunitarji ta' prodotti u importazzjoni ta' prodotti suġġetti għal rata standard tal-VAT f'kull Stat Membru skont id-Direttiva tal-Kunsill 2006/112/KE[18], bir-rata applikabbli skont ir-Regolament (UE) Nru .../... ma taqbiżx iż-żewġ punti perċentwali tar-rata standard.

(d) l-applikazzjoni ta' rata unformi, li għandha tkun stabbilita bis-saħħa tal-proċedura tal-baġit fid-dawl tat-total tad-dħul l-ieħor kollu, għas-somma tal-Introjtu Nazzjonali Gross (ING) tal-Istati Membri kollha.

2. Anke dħul li jiġi minn kwalunkwe ħlas ġdid imdaħħal fil-qafas ta’ linja politika komuni, skont it-Trattat, sakemm tkun segwita l-proċedura stipulata fl-Artikolu 311 tat-Trattat, għandu jikkostitwixxi riżorsi proprji mdaħħla fil-baġit tal-Unjoni.

3. L-Istati Membri għandhom iżommu 10% tal-ammonti msemmijin fil-punt (a) tal-paragrafu 1 permezz tal-ispejjeż tal-ġbir.

4. Jekk, fil-bidu tas-sena finanzjarja, l-baġit ikun għadu ma ġiex adottat, sakemm jidħlu fis-seħħ ir-rati l-ġodda għandhom jibqgħu japplikaw ir-rati tal-ġbir tal-ING preċedenti.

Artikolu 3

Limitu massimu tar-riżorsi proprji

1. L-ammont totali ta’ riżorsi proprji allokat lill-Unjoni biex ikopru approprjazzjonijiet annwali għall-ħlasijiet m’għandux jaqbeż il-1.23 % tat-total tal-ING tal-Istati Membri kollha.

2. L-ammont totali annwali ta’ approprjazzjonijiet għal impenji mdaħħlin fil-baġit tal-Unjoni m’għandux jaqbeż il-1.29 % tat-total tal-ING tal-Istati Membri kollha.

Għandu jinżamm proporzjon ordnat bejn approprjazzjonijiet għal impenji u approprjazzjonijiet għal ħlasijiet biex jiggarantixxi l-kompatibbiltà tagħhom u biex jippermetti li jiġi rispettat il-limitu skont il-paragrafu 1 fi snin sussegwenti.

Artikolu 4

Mekkaniżmi tal-korrezzjoni

1. Ir-rata uniformi ffissata taħt l-Artikolu 2(1)(d) għandha tapplika għall-ING ta’ kull Stat Membru.

2. Għall-perjodu bejn l-2014 u l-2020 għandu jingħata tnaqqis gross fil-kontribuzzjonijiet annwali tal-ING lill-Istati Membri li ġejjin:

- EUR 2500 miljun għall-Ġermanja,

- EUR 1050 miljun għall-Pajjiżi l-Baxxi,

- EUR 350 miljun għall-Isvezja,

- EUR 3600 miljun għar-Renju Unit.

Artikolu 5

Il-finanzjament tal-mekkaniżmi tal-korrezzjoni

L-ispiża tal-korrezzjonijiet stabbiliti fl-Artikolu 4 għandhom iġarrbuha l-Istati Membri fi proprozjon għas-sehem ta' kull Stat Membru fil-pagamenti msemmijin fl-Artikolu 2(1)(d).

Artikolu 6

Il-prinċipju tal-universalità

Id-dħul li hemm referenza għalih fl-Artikolu 2 għandu jintuża bla distinzjoni biex jiffinanzja n-nefqa kollha mdaħħla fil-baġit annwali tal-Unjoni.

Artikolu 7

Riporti tal-bilanċi pożittivi

Kull ma jifdal mid-dħul tal-Unjoni fuq in-nefqa attwali totali matul sena finanzjarja għandu jkun riportat għas-sena finanzjarja sussegwenti.

Artikolu 8

Il-ġbir tar-riżorsi proprji u t-tpoġġija tagħhom għad-dispożizzjoni jew il-ħlas tagħhom lill-Kummissjoni

1. Ir-riżorsi proprji tal-Unjoni li hemm referenza għalihom fl-Artikolu 2(1)(a) u, mhux aktar tard mill-1 ta' Jannar 2018, dawk li hemm referenza għalihom fl-Artikolu 2(1)(c), għandhom ikunu miġbura mill-Istati Membri skont id-dispożizzjonijiet nazzjonali imposti b'liġi, b'regolament jew b'azzjoni amministrattiva, li għandhom, fejn xieraq, ikunu adatti biex jissodisfaw ir-rekwiżiti tar-regoli tal-Unjoni.

Il-Kummissjoni għandha teżamina d-dispożizzjonijiet nazzjonali rilevanti kkomunikati lilha mill-Istati Membri, tgħaddi lill-Istati Membri l-aġġustamenti li jidhrilha meħtieġa biex tiżgura li dawn ikunu konformi mar-regoli tal-Unjoni u tirrapporta, jekk ikun meħtieġ, lill-awtorità baġitarja.

2. Ir-riżorsi proprji tal-Unjoni msemmijin fl-Artikolu 2(1)(b) għandhom jinġabru mhux aktar tard mill-1 ta' Jannar 2018 skont il-leġiżlazzjoni rilevanti tal-Unjoni ssuplimentata, fejn ikun meħtieġ, mid-dispożizzjonijiet nazzjonali imposti b'liġi, b'regolament jew b'azzjoni amministrattiva. Dawn id-dispożizzjonijiet nazzjonali għandhom, fejn ikun xieraq, jiġu adatti biex jissodisfaw ir-rekwiżiti tar-regoli tal-Unjoni.

Il-Kummissjoni għandha teżamina d-dispożizzjonijiet nazzjonali rilevanti kkomunikati lilha mill-Istati Membri, tgħaddi lill-Istati Membri l-aġġustamenti li jidhrilha meħtieġa biex tiżgura li dawn ikunu konformi mar-regoli tal-Unjoni u tirrapporta, jekk ikun meħtieġ, lill-awtorità baġitarja.

3. L-Istati Membri għandhom jagħmlu r-riżorsi previsti fl-Artikolu 2(1)(a), (c) u (d) disponibbli lill-Kummissjoni, skont ir-regolament adottat skont l-Artikolu 322(2) tat-Trattat.

Ir-riżorsi previsti fl-Artikolu 2(1)(b) għandhom isiru disponibbli jew jitħallsu lill-Kummissjoni skont ir-regolament adottat skont l-Artikolu 322(2) tat-Trattat.

Artikolu 9

Miżuri ta’ implimentazzjoni

Il-Kunsill għandu, skont il-proċedura stabbilita fir-raba' paragrafu tal-Artikolu 311 tat-Trattat, jistabbilixxi miżuri ta’ implimentazzjoni rigward l-elementi li ġejjin tas-sistema tar-riżorsi proprji:

(a) ir-rati tat-taxxa tar-riżorsi proprji stabbiliti skont l-Artikoli 2(1)(b) u (c) u r-rata tal-ġbir tar-riżorsa proprja stabbilita skont l-Artikolu 2(1)(d);

(b) l-ING ta' referenza, id-dispożizzjonijiet sabiex jiġi aġġustat l-ING u d-dispożizzjonijiet biex jiġu kkalkulati mill-ġdid il-livelli massimi għal pagamenti u impenji f'każ ta' bidliet sinifikanti fl-ING, għall-finijiet tal-applikazzjoni tal-Artikoli 2(1)(d) u 3;

(c) il-proċedura għall-kalkolu u l-ibbaġitjar tal-bilanċ baġitarju annwali kif stabbilit fl-Artikolu 7;

(d) id-dispożizzjonijiet u l-aranġamenti meħtiġin għall-kontroll u għas-superviżjoni tal-introjtu msemmi fl-Artikolu 2, inklużi kwalunkwe rekwiżiti supplimentari dwar ir-rappurtaġġ.

Artikolu 10

Dispożizzjonijiet finali u tranżitorji

1. Suġġett għall-paragrafu 2, id-Deċiżjoni 2007/436/KE, Euratom hija mħassra. Kwalunkwe referenzi għad-Deċiżjoni tal-Kunsill tal-21 ta’ April 1970 dwar is-sostituzzjoni tal-kontribuzzjonijiet finanzjarji mill-Istati Membri bir-riżorsi proprji tal-Komunitajiet[19], għad-Deċiżjoni tal-Kunsill 85/257/KEE, Euratom tas-7 ta’ Mejju 1985 dwar is-sistema ta’ riżorsi proprji tal-Komunitajiet[20], għad-Deċiżjoni tal-Kunsill 88/376/KEE, Euratom tal-24 ta’ Ġunju 1988 dwar is-sistema tar-riżorsi proprji tal-Komunitajiet[21], għad-Deċiżjoni tal-Kunsill 94/728/KE, Euratom tal-31 ta’ Ottubru 1994 dwar is-sistema tar-riżorsi proprji tal-Komunitajiet[22], għad-Deċiżjoni tal-Kunsill 2000/597/KE, Euratom tad-29 ta' Settembru 2000 dwar is-sistema tar-riżorsi proprji tal-Komunitajiet[23] jew għad-Deċiżjoni 2007/436/KE, Euratom għandhom jitqiesu bħala referenzi għal din id-Deċiżjoni u għandhom jinqraw skon it-tabella tal-korrelazzjonijiet stabbilita fl-Anness ta' ma' din id-Deċiżjoni.

2. L-Artikoli 2, 4, 5 u 8(2) tad-Deċiżjonijiet 94/728/KE, Euratom, 2000/597/KE, Euratom u 2007/436/KE, Euratom għandhom ikomplu japplikaw għall-kalkolu u l-aġġustament tad-dħul li jkun ġej mill-applikazzjoni ta’ rata tal-ġbir għall-bażi tal-VAT iddeterminata b'mod uniformi u limitata għal bejn 50 % u 55 % tal-PNG jew tal-ING ta’ kull Stat Membru, għall-proċedura biex isiru disponibbli u għall-arranġamenti għall-ispezzjoni, skont is-sena rilevanti, u għall-kalkolu tal-korrezzjoni tal-iżbilanċji baġitarja mogħtija lir-Renju Unit għas-snin sal-2012.

3. L-Istati Membri għandhom ikomplu jżommu, permezz tal-ispejjeż tal-ġbir, 10 % tal-ammonti msemmijin fl-Artikolu 2(1)(a) li kellhom isiru disponibbli mill-Istati Membri qabel it-28 ta’ Frar 2001 skont ir-regoli applikabbli tal-Unjoni.

L-Istati Membri għandhom ikomplu jżommu, permezz tal-ispejjeż tal-ġbir, 25 % tal-ammonti msemmijin fl-Artikolu 2(1)(a) li kellhom isiru disponibbli mill-Istati Membri bejn l-1 ta' Marzu 2001 u t-28 ta’ Frar 2014 skont ir-regoli applikabbli tal-Unjoni.

4. Għall-finijiet ta' din id-Deċiżjoni, l-ammonti monetarji kollha għandhom jiġu espressi f'ewro u bil-prezzijiet ta' bħalissa.

Artikolu 11

Id-dħul fis-seħħ

L-Istati Membri għandhom ikunu notifikati b’din id-Deċiżjoni mis-Segretarju Ġenerali tal-Kunsill.

L-Istati Membri għandhom jinnotifikaw mingħajr dewmien lis-Segretarju Ġenerali tal-Kunsill bit-tlestija tal-proċeduri għall-adozzjoni ta’ din id-Deċiżjoni skont ir-rekwiżiti kostituzzjonali rispettivi tagħhom.

Din id-Deċiżjoni għandha tidħol fis-seħħ fl-ewwel ġurnata tax-xahar ta’ wara l-wasla tal-aħħar notifika msemmija fit-tieni paragrafu.

Din għandha tapplika mill-1 ta’ Jannar 2014.

Artikolu 12

Pubblikazzjoni

Din id-Deċiżjoni għandha tiġi pubblikata f' Il-Ġurnal Uffiċjali tal-Unjoni Ewropea .

Magħmul fi Brussell,

Għall-Kunsill

Il-President

ANNESS

Tabella tal-korrelazzjonijiet

Id-Deċiżjoni 2007/436/KE | Din id-Deċiżjoni |

L-Artikolu 1 | L-Artikolu 1 |

L-Artikolu 2(1)(a) | L-Artikolu 2(1)(a) |

L-Artikolu 2(1)(b) | - |

L-Artikolu 2(1)(ċ) | L-Artikolu 2(1)(ċ) |

L-Artikolu 2(2) | L-Artikolu 2(2) |

L-Artikolu 2(3) | L-Artikolu 2(3) |

L-Artikolu 2(4) | - |

L-Artikolu 2(5) | L-Artikolu 4(1) |

L-Artikolu 2(6) | L-Artikolu 2(4) |

L-Artikolu 2(7) |

L-Artikolu 3(1) | L-Artikolu 3(1) |

L-Artikolu 3(2) | L-Artikolu 3(2) |

L-Artikolu 3(3) | - |

L-Artikolu 4 | - |

L-Artikolu 5(1) | L-Artikolu 5(1) |

L-Artikolu 5(2) | - |

L-Artikolu 5(3) | - |

L-Artikolu 5(4) | - |

L-Artikolu 6 | L-Artikolu 6 |

L-Artikolu 7 | L-Artikolu 7 |

L-Artikolu 8(1) | L-Artikolu 8 |

L-Artikolu 8(2) | - |

L-Artikolu 9 | - |

L-Artikolu 10(1) | L-Artikolu 10(1) |

L-Artikolu 10(2) | L-Artikolu 10(2) |

L-Artikolu 10(3) | L-Artikolu 10(3) |

L-Artikolu 11 | L-Artikolu 11 |

L-Artikolu 12 | L-Artikolu 12 |

[1] Dokument ta' Ħidma tal-Persunal tal-Kummissjoni "Il-finanzjament tal-baġit tal-UE: Rapport dwar it-tħaddim tas-sistema tar-riżorsi proprji", SEC(2011) 876 finali tad-29.06.2011.

[2] Sors: It-tbassir tal-ECFIN għar-Rebbiegħa 2011.

[3] Il-Kummissjoni Ewropea, id-DĠ Affarijiet Ekonomiċi u Finanzi, "2009 Ageing Report. Economic and budgetary projections for the EU-27 Member States (2008-2060)", European Economy, 2/2009.

[4] Ittra mingħand David Cameron, Angela Merkel, Nicolas Sarkozy, Mark Rutte u Mari Kiviniemi lill-President tal-Kummissjoni Ewropea, it-18 ta' Diċembru 2010.

[5] COM(2010)700, 19.10.2010.

[6] COM(2010)549, 7.10.2010.

[7] COM (2011) 398 finali, 29.06.2011.

[8] COM(2004)505 finali tal-14 ta’ Lulju 2004.

[9] Ara b'mod partikulari l-"Final report of the discussion circle on own resources" lill-Konvenzjoni Ewropea, CONV 730/03, 08/05/2003.

[10] ĠU L 130, 31.5.2000, p.1.

[11] Opinjoni mogħtija fl-XX.6.2011

[12] ĠU C

[13] ĠU C

[14] COM(2010)700, 19.10.2010.

[15] COM(2010) 162 finali.

[16] ĠU …

[17] ĠU L 163, 23.6.2007, p. 17.

[18] ĠU L 347, 11.12.2006, p. 1.

[19] ĠU L 94, 28.4.1970, p. 19.

[20] ĠU L 128, 14.5.1985, p. 15.

[21] ĠU L 185, 15.7.1988, p. 24.

[22] ĠU L 293, 12.11.1994, p. 9.

[23] ĠU L 253, 7.10.2000, p. 42.