Lejn Politika Kriminali tal-UE: L-iżgurar ta' implimentazzjoni effettiva tal-politiki tal-UE permezz tal-liġi kriminali

Din il-Komunikazzjoni għandha l-għan li tippreżenta qafas għall-iżvilupp ulterjuri ta' Politika Kriminali tal-UE taħt it-Trattat ta' Lisbona. Issa l-UE għandha bażi legala espliċita għall-adozzjoni ta' direttivi dwar il-liġi kriminali biex tiżgura l-implimentazzjoni effettiva tal-politiki tal-UE li ġew suġġetti għal miżuri ta' armonizzazzjoni. Politika kriminali tal-UE għandha jkollha bħala l-għan ġenerali t-trawwim tal-fiduċja taċ-ċittadini fil-fatt li jgħixu f'Ewropa ta' libertà, sigurtà u ġustizzja, li l-liġi tal-UE li tħares l-interessi tagħhom hija implimentata u infurzata bis-sħiħ u li fl-istess ħin l-UE se taġixxi fir-rispett sħiħ tas-sussidjarjetà u l-proporzjonalità u l-prinċipji bażiċi l-oħra tat-Trattat.

Tħassib għaċ-ċittadini tal-UE

Iċ-ċittadini tal-UE jikkunsidraw il-kriminalità bħala problema importanti li qed tiffaċċja l-Unjoni. Meta jiġu mitluba jidentifikaw il-kwistjonijiet li fuqhom għandhom jiffukaw l-attenzjoni tagħhom l-istituzzjonijiet Ewropej fis-snin li ġejjin biex isaħħu l-Unjoni Ewropea, iċ-ċittadini jikklassifikaw il-ġlieda kontra l-kriminalità fost l-ewwel erba' oqsma ta' azzjoni.[1] L-UE ilha tieħu miżuri fil-qasam tal-liġi kriminali għal aktar minn għaxar snin biex tiġġieled aħjar kontra kriminalità li qed issir dejjem aktar internazzjonali u dejjem aktar sofistikata. Dawn il-miżuri kisbu grad ta' approssimazzjoni tad-definizzjonijiet u l-livelli tas-sanzjonijiet għal ċerti reati partikolarment serji, bħat-terroriżmu, it-traffikar tal-bnedmin, u t-traffikar tad-droga, u l-frodi li taffettwa lill-interessi finanzjarji tal-UE.[2] Minħabba nuqqas ta' bażi legali espliċita f'dan ir-rigward qabel it-Trattat ta' Lisbona[3], ittieħdu biss ftit li xejn miżuri għall-iskop tat-tisħiħ tal-infurzar tal-politiki tal-UE.[4] Din il-Komunikazzjoni se tiffoka fuq dan l-aspett tal-liġi kriminali tal-UE.

Il-valur miżjud ta' liġi kriminali tal-UE

Il-liġi kriminali huwa qasam tal-politika sensittiv fejn id-differenzi fost is-sistemi nazzjonali jibqgħu sostanzjali, pereżempju rigward it-tipi u l-livelli ta' sanzjonijiet kif ukoll il-klassifikazzjoni ta' ċerta mġiba bħala reat amministrattiv jew kriminali. Madankollu, l-UE tista’ tindirizza lakuni u nuqqasijiet kull fejn l-azzjoni tal-UE twassal għal valur miżjud. Fid-dawl tad-dimensjoni transkonfinali ta' ħafna reati, l-adozzjoni ta’ miżuri tal-liġi kriminali tal-UE tista' tgħin biex tiżgura li l-kriminali la jistgħu jinħbew wara l-fruntieri u lanqas jabbużaw mid-differenzi bejn is-sistemi legali nazzjonali għal skopijiet kriminali.

Tisħiħ ta' fiduċja reċiproka

Regoli minimi komuni f'ċerti oqsma tal-kriminalità huma essenzjali biex tissaħħaħ il-fiduċja reċiproka bejn l-Istati Membri u l-ġudikaturi nazzjonali. Dan il-livell għoli ta' fiduċja huwa indispensabbli għal kooperazzjoni bla diffikultajiet fost il-ġudikaturi fi Stati Membri differenti. Il-prinċipju tar-rikonoxximent reċiproku tal-miżuri ġudizzjarji, li huwa l-bażi ta' kooperazzjoni ġudizzjarja f'materji kriminali[5], jista' jaħdem b'mod effettiv fuq din il-bażi.

L-iżgurar ta' infurzar effettiv

Il-liġi kriminali jista' jkollha wkoll rwol importanti biex tiżgura l-implimentazzjoni tal-politiki tal-Unjoni Ewropea. Dawn il-politiki jiddependu fuq l-implimentazzjoni effettiva mill-Istati Membri. L-Unjoni waħedha ma tistax tiżgura li r-regoli tagħha, li jvarjaw mill-ħarsien ambjentali u l-konservazzjoni tar-riżorsi tas-sajd għas-sikurezza fit-toroq, ir-regolamentazzjoni tas-servizzi finanzjarji, il-protezzjoni tad-dejta u l-protezzjoni tal-interessi finanzjarji tal-UE, ikollhom l-effett mixtieq għaċ-ċittadin.

L-Istati Membri huma obbligati li jiżguraw li l-politiki tal-Unjoni jiġu implimentati u normalment jistgħu jiddeċiedu huma stess dwar il-mezzi ta' infurzar. F'dan ir-rigward, il-kontrolli u l-ispezzjonijiet għandhom rwol importanti. F'każijiet fejn dawn l-għażliet ta' infurzar fl-Istati Membri ma jagħtux ir-riżultat mixtieq u l-livelli ta’ infurzar jibqgħu irregolari, l-Unjoni nnifisha tista' tistabbilixxi regoli komuni biex tiżgura l-implimentazzjoni, inkluż, jekk neċessarju, ir-rekwiżit ta' sanzjonijiet kriminali għal ksur tal-liġi tal-UE.

Koerenza u konsistenza

Filwaqt li miżuri tal-liġi kriminali tal-UE jistgħu jkollhom rwol importanti bħala komplement għas-sistemi tal-liġi kriminali nazzjonali, huwa ċar li l-liġi kriminali tirrifletti l-valuri bażiċi, id-drawwiet u l-għażliet ta’ kwalunkwe soċjetà partikolari. It-Trattat ta' Lisbona jaċċetta din id-diversità.[6] Għal din ir-raġuni, huwa partikolarment importanti li jiġi żgurat li l-leġiżlazzjoni tal-UE dwar il-liġi kriminali tkun konsistenti u koerenti, sabiex ikollha valur miżjud reali.[7]

Qafas legali ġdid

Il-qafas legali taħt it-Trattat ta' Lisbona jipprovdi opportunitajiet ġodda għall-iżvilupp ta' leġiżlazzjoni dwar il-liġi kriminali tal-UE. Il-qafas legali jippermetti b'mod partikolari lill-istituzzjonijiet tal-UE u l-Istati

Membri jaħdmu flimkien fuq bażi ċara lejn liġi kriminali tal-UE koerenti u konsistenti li fl-istess ħin tipproteġi effettivament id-drittijiet tal-persuni suspettati u akkużati u l-vittmi u tippromwovi l-kwalità tal-ġustizzja. Qabel it-Trattat ta’ Lisbona, il-qafas legali applikabbli għall-parti l-kbira tal-leġiżlazzjoni tal-liġi kriminali[8] kellu għadd ta’ nuqqasijiet. Dawn kienu jinkludu l-aktar il-ħtieġa għal approvazzjoni unanima tal-Istati Membri kollha, il-konsultazzjoni biss tal-Parlament Ewropew u n-nuqqas ta' proċedimenti ta' ksur quddiem il-Qorti tal-Ġustizzja tal-Unjoni Ewropea biex tiġi żgurata l-implimentazzjoni korretta mill-Istati Membri.

L-arranġament legali l-ġdid jagħti rwol sostanzjali lill-Parlament Ewropew permezz tal-proċedura ta’ kodeċiżjoni u kontroll ġudizzjarju sħiħ lill-Qorti tal-Ġustizzja tal-Unjoni Ewropea. Il-Kunsill jista’ jadotta proposta jekk maġġoranza kkwalifikata tal-Istati Membri jappoġġawha. Barra minn hekk, it-Trattat ta' Lisbona jsaħħaħ sostanzjalment ir-rwol tal-parlamenti nazzjonali. Dawn jistgħu jagħtu l-opinjonijiet tagħhom dwar l-abbozzi tal-leġiżlazzjoni u għandhom sehem importanti fil-monitoraġġ tar-rispett tal-prinċipju tas-sussidjarjetà. Fil-qasam tal-liġi kriminali, dan ir-rwol tal-parlamenti nazzjonali huwa iktar b'saħħtu milli hu fil-kuntest ta' politiki oħra tal-UE.[9]

Miżuri tal-liġi kriminali jinkludu regoli intrusivi, li jistgħu jirriżultaw fiċ-ċaħda tal-libertà. Huwa minħabba dan li l-Karta tad-Drittijiet Fundamentali – li saret legalment vinkolanti permezz tat-Trattat ta’ Lisbona[10] – tipprovdi limiti importanti għall-azzjoni tal-UE f’dan il-qasam. Il-Karta, li hija l-boxxla tal-politiki kollha tal-UE, tipprovdi nukleu ta' regoli bażiċi vinkolanti li jipproteġu liċ-ċittadini.  

Fil-każ ta' leġiżlazzjoni dwar il-liġi kriminali sostantiva jew il-proċedura kriminali, l-Istati Membru jistgħu jużaw l-hekk imsejjaħ "brejk ta' emerġenza", jekk jikkunsidraw li l-leġiżlazzjoni proposta tolqot aspetti fundamentali tas-sistema tal-liġi kriminali nazzjonali tagħhom: f 'dan il-każ il-proposta tiġi riferita lill-Kunsill Ewropew.

Id-Danimarka mhijiex qed tipparteċipa f'miżuri li qed jiġu adottati dwar il-liġi kriminali sostantiva, filwaqt li r-Renju Unit u l-Irlanda jipparteċipaw biss fl-adozzjoni u l-applikazzjoni ta' strumenti speċifiċi wara deċiżjoni li jipparteċipaw ("opt-in").[11]

Għaliex l-UE għandha taġixxi – il-valur miżjud ta' leġiżlazzjoni dwar il-liġi kriminali tal-UE

It-Trattat ta' Lisbona jagħti l-UE kompetenza kemm fil-qasam tal-proċedura kriminali kif ukoll tal-liġi kriminali sostantiva. Filwaqt li mhuwiex ir-rwol tal-UE li tissostitwixxi l-kodiċijiet kriminali nazzjonali, il-leġiżlazzjoni dwar il-liġi kriminali tal-UE tista', madankollu, iżżid, fil-limiti tal-kompetenza tal-UE, valur importanti għas-sistemi tal-liġi kriminali nazzjonali eżistenti.

· Il-liġi kriminali tal-UE trawwem il-fiduċja taċ-ċittadini fl-użu tad-dritt tagħhom għall-moviment liberu u x-xiri ta' oġġetti jew servizzi minn fornituri minn Stati Membri oħra permezz ta' ġlieda aktar effettiva kontra l-kriminalità u l-adozzjoni ta' standards minimi għad-drittijiet proċedurali fi proċedimenti kriminali kif ukoll għall-vittmi tal-kriminalità.

· Illum, ħafna reati serji, inklużi vjolazzjonijiet ta’ leġiżlazzjoni armonizzata tal-UE, huma transkonfinali. Għalhekk hemm l-inċentiv u l-possibbiltà għall-kriminali li jagħżlu l-Istat Membru bis-sistema ta' sanzjonar l-aktar klementi f’ċerti oqsma tal-kriminalità sakemm ma jkun hemm grad ta’ approssimazzjoni tal-liġijiet nazzjonali li jipprevjeni l-eżistenza ta' dan it-tip ta' "rifuġji".

· Regoli komuni jsaħħu l-fiduċja reċiproka fost il-ġudikaturi u l-awtoritajiet għall-infurzar tal-liġi tal-Istati Membri. Dan jiffaċilita r-rikonoxximent reċiproku ta’ miżuri ġudizzjarji minħabba li l-awtoritajiet nazzjonali jħossuhom aktar komdi jirrikonoxxu deċiżjonijiet meħuda fi Stat Membru ieħor jekk id-definizzjonijiet tar-reati kriminali sottostanti jkunu kompatibbli u jkun hemm approssimazzjoni minima tal-livell tas-sanzjoni. Regoli komuni jiffaċilitaw ukoll il-kooperazzjoni fir-rigward tal-użu ta’ miżuri investigattivi speċjali f’każijiet transkonfinali.

· Il-liġi kriminali tal-UE tgħin biex tipprevjeni u tissanzjona reati serji kontra l-liġi tal-UE f'oqsma importanti ta' politika, bħall-ħarsien tal-ambjent jew l-impjieg illegali.

1. Kamp ta' applikazzjoni għal-liġi kriminali tal-UE

L-UE tista' tadotta taħt l-Artikolu 83 tat-Trattat dwar il-Funzjonament tal-Unjoni Ewropea (TFUE) direttivi b'regoli minimi dwar il-liġi kriminali tal-UE għal reati differenti.

L-ewwel nett, jistgħu jiġu adottati miżuri taħt l-Artikolu 83(1) TFUE fil-każ ta' lista ta' għaxar reati elenkati espliċitament (l-hekk imsejħa “Euro crimes”) li jirreferu għat-terroriżmu, it-traffikar tal-bnedmin, l-isfruttament tan-nisa u t-tfal, it-traffikar illeċitu tad-droga, it-traffikar illeċitu tal-armi, il-ħasil tal-flus, il-korruzzjoni, il-falsifikazzjoni ta' mezzi ta' ħlas, il-kriminalità tal-informatika u l-kriminalità organizzata.[12] Dawn huma reati li jistħoqqilhom, skont it-Trattat innifsu u mill-istess definizzjoni tagħhom, approċċ tal-UE minħabba n-natura partikolarment serja tagħhom u d-dimensjoni transkonfinali tagħhom. Il-parti l-kbira tat-tipi ta' reati huma diġà koperti mil-leġiżlazzjoni ta' qabel Lisbona, li kienet jew li hija fil-proċess li tiġi aġġornata. "Euro crimes" addizzjonali jistgħu biss ikunu definiti mill-Kunsill li jaġixxi unanimament, bil-kunsens tal-Parlament Ewropew.

It-tieni nett, l-Artikolu 83(2) TFUE jippermetti lill-Parlament Ewropew u lill-Kunsill, fuq proposta mill-Kummissjoni, biex “[j]ekk l-approssimazzjoni tal-liġijiet u r-regolamenti tal-Istati Membri f'materji kriminali tkun indispensabbli sabiex tiġi assigurata l-implimentazzjoni effiċjenti ta' politika tal-Unjoni f'qasam li kien suġġett għall-miżuri ta' armonizzazzjoni, [jadottaw] direttivi li jistabbilixxu r-regoli minimi fir-rigward tad-definizzjoni ta' reati kriminali u sanzjonijiet fil-qasam ikkonċernat". Din il-klawżola ma telenkax reati speċifiċi, iżda tagħmel is-sodisfazzjoni ta' ċerti kriterji legali prekundizzjoni għall-adozzjoni ta’ miżuri tal-liġi kriminali fil-livell tal-UE. Għalhekk huwa notevolment fir-rigward tal-Artikolu 83(2) TFUE li politika kriminali tal-UE hija partikolarment meħtieġa; u fejn din il-Komunikazzjoni hija maħsuba biex tipprovdi gwida speċifika. L-aktar importanti, huwa f’dan il-qasam li l-istituzzjonijiet tal-UE jeħtieġu jagħmlu għażliet ta' politika jekk jużawx jew ma jużawx il-liġi kriminali (minflok miżuri oħra, bħal sanzjonijiet amministrattivi) bħala għodda ta' infurzar; u biex jiddeterminaw liema politiki tal-UE jeħtieġu l-użu tal-liġi kriminali bħala għodda addizzjonali ta’ infurzar.

Eżempju: Ir-regoli tal-UE dwar l-imġiba tas-suq finanzjarju huma każ ċar fejn il-liġi kriminali tista' tkun għodda supplimentari utli biex jiġi żgurat infurzar effettiv. Kif uriet il-kriżi finanzjarja, ir-regoli tas-suq finanzjarju mhumiex dejjem rispettati u applikati biżżejjed. Dan jista' jimmina serjament il-fiduċja fis-settur finanzjarju. Konverġenza akbar bejn is-sistemi legali fl-Istati Membri, inkluż fil-liġi kriminali, tista' tgħin biex jiġi evitat ir-riskju tal-funzjonament ħażin tas-swieq finanzjarji u tgħin l-iżvilupp ta' kundizzjonijiet ekwi fi ħdan is-suq intern.[13]

Minbarra dan, l-Artikolu 325(4) tat-Trattat jipprovdi għall-possibbiltà speċifika li jittieħdu miżuri fil-qasam tal-prevenzjoni ta' u l-ġlieda kontra l-frodi li taffettwa l-interessi finanzjarji tal-Unjoni, qasam li fih diġà teżisti xi leġiżlazzjoni pre-Lisbona.[14] Dan huwa qasam ta' importanza kbira għall-kontribwenti tat-taxxa tal-UE, li qed jiffinanzjaw il-baġit tal-UE u li leġittimament jistennew miżuri effettivi kontra attivitajiet illegali mmirati lejn il-finanzi pubbliċi tal-UE, eż. fil-kuntest tal-fondi agrikoli u reġjonali tal-UE jew l-għajnuna għall-iżvilupp.[15]

2. Liema prinċipji għandhom jiggwidaw il-leġiżlazzjoni dwar il-liġi kriminali tal-UE?

Bl-istess mod bħal fil-liġi nazzjonali, il-leġiżlazzjoni dwar il-liġi kriminali tal-UE għandha tiġi kkunsidrata bir-reqqa. Il-liġi kriminali, kemm nazzjonali kif ukoll Ewropea, tikkonsisti f'regoli b’impatt sinifikanti fuq l-individwi. Għal din ir-raġuni, u minħabba li l-liġi kriminali għandha dejjem tibqa' miżura tal-aħħar rikors, il-leġiżlazzjoni ġdida għandha teħtieġ ir-rispett ta' prinċipji legali fundamentali.

2.1. Prinċipji ġenerali li għandhom jiġu rispettati

Ir-rekwiżit ġenerali tas-sussidjarjetà għal-leġiżlazzjoni tal-UE għandu jingħata attenzjoni speċjali fir-rigward tal-liġi kriminali. Dan ifisser li l-UE tista’ tilleġiżla biss jekk l-għan ma jistax jintlaħaq b'mod aktar effettiv minn miżuri fil-livell nazzjonali jew il-livell reġjonali u lokali iżda li, pjuttost minħabba li l-iskala jew l-effetti tal-miżura proposta, dan jista' jintlaħaq aħjar fil-livell tal-Unjoni.

Barra minn hekk, id-drittijiet fundamentali, hekk kif garantiti fil-Karta tad-Drittijiet Fundamentali tal-UE u fil-Konvenzjoni Ewropea għall-Protezzjoni tad-Drittijiet tal-Bniedem u l-Libertajiet Fundamentali, iridu jiġu rispettati fi kwalunkwe qasam tal-politika tal-Unjoni. Miżuri tal-liġi kriminali huma sensittivi għad-drittijiet fundamentali. Dawn inevitabbilment jinterferixxu mad-drittijiet individwali, kemm dawk tal-persuna suspettata, kif ukoll dawk tal-vittma jew tax-xhieda. Fl-aħħar mill-aħħar, dawn jistgħu jirriżultaw f'ċaħda tal-libertà u għalhekk jeħtieġu attenzjoni partikolari mil-leġiżlatur.

2.2. Approċċ f’żewġ fażijiet fil-leġiżlazzjoni dwar il-liġi kriminali

Il-leġiżlatur tal-UE għandu jimxi fuq żewġ fażijiet beta jieħu deċiżjoni dwar miżuri tal-liġi kriminali bl-għan li jiżguraw l-implimentazzjoni effettiva tal-politiki tal-UE li huma s-suġġett ta' miżuri ta' armonizzazzjoni.

2.2.1. Fażi 1: Id-deċiżjoni dwar jekk għandhomx jiġu adottati miżuri tal-liġi kriminali jew le

· In-Neċessità u l-Proporzjonalità - il-liġi kriminali bħala mezz tal-aħħar rikors (“ ultima ratio”)

Investigazzjonijiet u sanzjonijiet kriminali jistgħu jkollhom impatt sinifikanti fuq id-drittijiet taċ-ċittadini u jinkludu effett ta' stigmatizzazzjoni. Għalhekk, il-liġi kriminali għandha dejjem tibqa' miżura tal-aħħar rikors. Dan huwa rifless fil-prinċipju ġenerali tal-proporzjonalità (kif inkorporat fit-Trattat dwar l-Unjoni Ewropea[16] u, speċifikament fil-każ tal-pieni kriminali, fil-Karta tad-Drittijiet Fundamentali tal-UE[17]). Għal miżuri tal-liġi kriminali li jappoġġjaw l-infurzar tal-politiki tal-UE[18], it-Trattat jesiġi espliċitament test dwar jekk miżuri tal-liġi kriminali humiex “essenzjali” biex jintlaħaq l-għan ta' l-implimentazzjoni effiċjenti ta' politika.

Għalhekk, il-leġiżlatur irid janalizza jekk miżuri minbarra miżuri tal-liġi kriminali, eż. reġimi ta' sanzjoni ta’ natura amministrattiva jew ċivili, jistgħux jiżguraw suffiċjentement l-implimentazzjoni tal-politika u jekk il-liġi kriminali tistax tindirizza l-problemi b'mod aktar effikaċi. Dan se jeħtieġ analiżi bir-reqqa fil-Valutazzjonijiet tal-Impatt qabel kwalunkwe proposta leġiżlattiva, inkluż pereżempju u skont l-ispeċifiċitajiet tal-qasam tal-politika kkonċernat, valutazzjoni ta’ jekk is-sistemi tas-sanzjonijiet tal-Istati Membri jiksbux ir-riżultat mixtieq u d-diffikultajiet li jiltaqgħu magħhom l-awtoritajiet nazzjonali li jimplimentaw il-liġi tal-UE fil-prattika.

2.2.2. Fażi 2: Prinċipji li jiggwidaw id-deċiżjoni dwar liema tip ta’ miżuri tal-liġi kriminali għandhom jiġu adottati

Jekk il-Fażi 1 turi l-ħtieġa għal-liġi kriminali, id-domanda li jmiss hija liema miżuri konkreti għandhom jittieħdu.

· Regoli minimi

Il-leġiżlazzjoni tal-UE rigward id-definizzjoni ta' reati u sanzjonijiet kriminali hija limitata għal "regoli minimi" taħt l-Artikolu 83 tat-Trattat. Din il-limitazzjoni teskludi armonizzazzjoni sħiħa. Fl-istess ħin, il-prinċipju taċ-ċertezza legali jeħtieġ li biex tiġi meqjusa bħala kriminali, il-kondotta għandha tkun definita b'mod ċar.

Madankollu, Direttiva tal-UE dwar il-liġi kriminali m'għandha l-ebda effett dirett fuq ċittadin; l-ewwel trid tiġi implimentata fil-liġi nazzjonali. Għalhekk, ir-rekwiżiti għal ċertezza legali mhumiex l-istess bħalma huma fil-leġiżlazzjoni dwar il-liġi kriminali nazzjonali. Il-fattur importanti hija ċ-ċarezza għal-leġislatur nazzjonali dwar ir-riżultati li għandhom jinkisbu fl-implimentazzjoni tal-leġiżlazzjoni tal-UE.

Fir-rigward ta' sanzjonijiet, "regoli minimi" jistgħu jkunu rekwiżiti ta' ċerti tipi (eż. multi, priġunerija, skwalifika) jew livelli ta' sanzjonijiet jew id-definizzjoni ta' liema ċirkostanzi għandhom ikunu kkunsidrati bħala ċirkostanzi aggravanti jew mitiganti li tapplika għall-UE kollha. F'kull każ, l-istrument tal-UE jista' biss jistabbilixxi liema sanzjonijiet għandhom ikunu “mill-inqas” disponibbli għall-imħallfin f’kull Stat Membru.

· Neċessità u proporzjonalità

Il-kondizzjoni tan-"neċessità" stipulata hawn fuq tapplika wkoll fil-livell tad-deċiżjoni dwar liema miżuri tal-liġi kriminali għandhom jiġu inklużi fi strument leġiżlattiv partikolari. It-"test tan-neċessità" isir aktar importanti aktar mar-regoli previsti jkunu dettaljati fir-rigward tat-tip u l-livell tas-sanzjonijiet li għandhom jinħtieġu mill-Istati Membri. Ir-rekwiżit espliċitu tal-Karta tad-Drittijiet Fundamentali[19] li jgħid li "is-severità tal-piena m'għandhiex tkun sproporzjonata għar-reat" japplika.

· Evidenza fattwali ċara

Biex tiġi stabbilita n-neċessità għal regoli minimi dwar il-liġi kriminali, l-istituzzjonijiet tal-UE jeħtieġ li jkunu kapaċi jistrieħu fuq evidenza fattwali ċara dwar in-natura jew l-effetti tar-reat inkwistjoni u dwar is-sitwazzjoni legali diverġenti fl-Istati Membri kollha li tista’ tipperikola l-infurzar effettiv ta' politika tal-UE suġġetta għall-armonizzazzjoni. Għalhekk l-UE jeħtieġ li jkollha għad-disposizzjoni tagħha dejta statistika mill-awtoritajiet nazzjonali li jippermettulha tivvaluta s-sitwazzjoni fattwali. Bħala parti mill-azzjoni ta' segwitu tagħha, il-Kummissjoni se tiżviluppa pjanijiet biex tiġbor aktar dejta u evidenza statistika biex tindirizza l-oqsma koperti mill-Artikolu 325(4) u l-Artikolu 83(2).

· It-tfassil tas-sanzjonijiet għar-reat

L-iżvilupp tal-leġiżlazzjoni dwar il-liġi kriminali, notevolment sabiex tissaħħaħ l-effikaċja tal-politiki tal-UE teħtieġ ukoll kunsiderazzjoni bir-reqqa ta', pereżempju, dawn il-kwistjonijiet li ġejjin:

– jekk għandhomx jiġu inklużi tipi ta’ sanzjonijiet għajr minn priġunerija u multi biex jiġi żgurat livell massimu ta’ effettività, proporzjonalità u dissważività, kif ukoll il-ħtieġa għal miżuri addizzjonali, bħall-konfiska; kif ukoll

– jekk għandhiex tiġi imposta responsabbiltà kriminali jew mhux kriminali fuq persuni legali, b'mod partikolari fir-rigward tal-oqsma ta' kriminalità fejn l-entitajiet legali għandhom rwol partikolarment importanti bħala awturi.

X'inhu l-kontenut possibbli tar-regoli minimi tal-UE dwar il-liġi kriminali?

Id-definizzjoni tar-reati, jiġifieri d-deskrizzjoni ta' kondotta li hija meqjusa bħala kriminali, dejjem tkopri l-kondotta tal-awtur prinċipali iżda tkopri wkoll, fil-biċċa l-kbira tal-każijiet, kondotta anċillari bħall-istigazzjoni, l-għajnuna u l-kompliċità. F’xi każijiet, it-tentattiv biex jitwettaq ir-reat huwa kopert ukoll.

L-istrumenti kollha tal-liġi kriminali tal-UE jinkludu fid-definizzjoni tagħhom il-kondotta intenzjonali, iżda f’xi każijiet ukoll kondotta negliġenti serja. Xi strumenti jkomplu jiddefinixxu dawk li għandhom jitqiesu bħala ċirkostanzi "aggravanti" jew "mitiganti" għad-determinazzjoni tas-sanzjoni f’każ partikolari.

Ġeneralment, il-leġiżlazzjoni tal-UE tkopri reati mwettqa minn persuni naturali kif ukoll minn persuni legali bħal kumpaniji jew assoċjazzjonijiet. Dawn tal-aħħar jistgħu jkunu importanti f'ħafna oqsma, eż. fir-responsabbiltà għal tixridiet taż-żejt. Madankollu, fil-leġiżlazzjoni eżistenti, l-Istati Membri dejjem tħallew l-għażla dwar it-tip ta' responsabbiltà li l-persuni legali jkollhom fir-rigward ta' reati kriminali, minħabba li l-kunċett tar-responsabbiltà kriminali ta' persuni legali ma jeżistix fis-sistemi legali nazzjonali kollha.

Barra minn hekk, il-leġiżlazzjoni tal-UE tista' tkopri regoli dwar il-ġurisdizzjoni, kif ukoll aspetti oħra li huma kkunsidrati bħala parti mid-definizzjoni bħala elementi neċessarji għall-applikazzjoni effettiva tad-dispożizzjoni legali.

Fir-rigward tas-sanzjonijiet, il-liġi kriminali tal-UE tista' tobbliga lill-Istati Membri japplikaw sanzjonijiet kriminali effettivi, proporzjonati u dissważivi għal kondotta speċifika. L-effettività teżiġi li s-sanzjoni tkun adattata biex jintlaħaq l-għan mixtieq, jiġifieri l-osservanza tar-regoli; il-proporzjonalità teħtieġ li s-sanzjoni tkun proporzjonata għall-gravità tal-kondotta u l-effetti tagħha u ma tistax teċċedi dak li hu meħtieġ biex jintlaħaq l-għan; u d-dissważività teħtieġ li s-sanzjonijiet jikkostitwixxu deterrent adegwat għal awturi potenzjali futuri.

Xi kultant, il-liġi kriminali tal-UE tiddetermina aktar speċifikament, liema tipi u/jew livelli ta’ sanzjonijiet għandhom ikunu applikabbli. Dispożizzjonijiet dwar il-konfiska jistgħu jiġu inklużi wkoll. Mhuwiex l-għan ewlieni ta' approssimazzjoni fl-UE kollha li jiżdiedu l-livelli ta' sanzjoni applikabbli rispettivi fl-Istati Membri iżda pjuttost li jitnaqqas il-grad ta' varjazzjoni bejn is-sistemi nazzjonali u li jiġi żgurat li r-rekwiżiti ta' sanzjonijiet "effettivi, proporzjonati u dissważivi" jkunu tabilħaqq sodisfatti fl-Istati Membri kollha.

3. Liema huma l-oqsma ta' politika tal-UE fejn il-liġi kriminali tal-UE tista' tkun meħtieġa?

Miżuri tal-liġi kriminali jistgħu jitqiesu bħala element li jiżgura l-infurzar effettiv tal-politiki tal-UE, kif rikonoxxut mit-Trattat dwar il-Funzjonament tal-Unjoni Ewropea. Il-politiki tal-UE jkopru varjetà wiesgħa ta’ suġġetti, fejn ġew żviluppati regoli komuni matul l-aħħar deċennji għall-benessri taċ-ċittadini. Dawn l-oqsma ta' politika jvarjaw mill-unjoni doganali u r-regoli tas-suq intern għall-ħarsien tal-ambjent.

F'dawn l-oqsma kollha ta' politika, l-Istati Membri huma obbligati li jiżguraw li l-ksur tal-liġi tal-UE jiġi sanzjonat b’pieni effettivi, proporzjonati u dissważivi. L-Istati Membri jistgħu ġeneralment jagħżlu n-natura tas-sanzjoni li m'għandhiex għalfejn tkun kriminali iżda tista' tkun ukoll amministrattiva.

Fejn id-diskrezzjoni tal-Istati Membri fl-implimentazzjoni tal-liġi tal-UE ma twassalx għall-infurzar effettiv mixtieq, jista' jkun meħtieġ li jiġi rregolat, permezz ta' regoli minimi fil-livell tal-UE, liema sanzjonijiet l-Istati Membri jridu jipprevedu fil-leġiżlazzjoni nazzjonali tagħhom. L-approssimazzjoni tal-livelli tas-sanzjonijiet se tista' tkun ikkunsidrata, b'mod partikolari, jekk analiżi tal-leġiżlazzjoni dwar is-sanzjonijiet attwali ta' natura amministrattiva jew kriminali turi differenzi sinifikanti bejn l-Istati Membri u jekk dawk id-differenzi jwasslu għal applikazzjoni inkonsistenti tar-regoli tal-UE.

Jekk l-azzjoni tal-UE tkun meħtieġa, jeħtieġ li l-leġiżlatur tal-UE jiddeċiedi jekk humiex meħtieġa sanzjonijiet kriminali jew jekk sanzjonijiet amministrattivi komuni humiex biżżejjed. Dan se jiddependi fuq evalwazzjoni każ b'każ tal-problemi speċifiċi ta' infurzar f’qasam ta' politika skont il-prinċipji gwida msemmija hawn fuq.

Hemm għadd ta’ oqsma tal-politika li ġew armonizzati u fejn ġie stabbilit li huma meħtieġa miżuri tal-liġi kriminali fil-livell tal-UE. Dan jikkonċerna notevolement miżuri kontra prattiċi li jikkawżaw ħsara serja u kontra profitti illegali f’xi setturi ekonomiċi sabiex jiġu protetti l-attivitajiet ta' negozji leġittimi u salvagwardjati l-interessi tal-kontribwenti tat-taxxa:

· is-settur finanzjarju, eż. dwar manipulazzjoni tas-suq jew informazzjoni privileġġjata;[20]

· il-ġlieda kontra l-frodi li taffettwa l-interessi finanzjarji tal-Unjoni Ewropea, sabiex jiġi żgurat li flus il-kontribwenti tat-taxxa jkollhom l-istess livell ta' protezzjoni madwar l-Unjoni. F'Komunikazzjoni riċenti, il-Kummissjoni stabbiliet firxa ta’ għodod li għandhom jiġu kkunsidrati biex tissaħħaħ din il-protezzjoni,[21] inkluż proċedura kriminali, definizzjonijiet komuni ta’ reati u regoli dwar il-ġurisdizzjoni.

· il-ħarsien tal-euro mill-iffalsifikar permezz tal-liġi kriminali sabiex tissaħħaħ il-fiduċja pubblika fis-sigurtà tal-mezzi tal-ħlas.

Il-Kummissjoni se tkompli tirrifletti fuq modi kif il-liġi kriminali tista' tikkontribwixxi għall-irkupru ekonomiku billi tgħin biex tiġi indirizzata l-ekonomija illegali u l-kriminalità finanzjarja.

F'oqsma armonizzati oħra ta' politika, ir-rwol potenzjali tal-liġi kriminali bħala għodda neċessarja biex jiġi żgurat infurzar effettiv jista' wkoll jiġi esplorat aktar. Eżempji indikattivi jistgħu jkunu:

· it-trasport bit-triq, dwar, eż, ksur serju ta' regoli soċjali, tekniċi, tas-sigurtà u tas-suq għat-trasporti professjonali tal-UE;[22]

· il-protezzjoni tad-dejta, għal każijiet ta’ ksur serju ta’ regoli eżistenti tal-UE;[23]

· ir-regoli doganali li jikkonċernaw l-approssimazzjoni ta' reati u pieni doganali;[24]

· il-ħarsien ambjentali, jekk il-leġiżlazzjoni dwar il-liġi kriminali eżistenti f’dan il-qasam[25] teħtieġ tisħiħ ulterjuri fil-ġejjieni sabiex tiġi pprevenuta u sanzjonata ħsara ambjentali;

· il-politika tas-sajd, li fiha l-UE adottat kampanja ta' "tolleranza żero" kontra s-sajd illegali, mhux rappurtat u mhux regolat.

· politiki tas-suq intern kontra prattiċi illegali bħall-iffalsifikar u l-korruzzjoni jew kunflitti ta' interess mhux dikjarati fil-kuntest ta' sejħiet pubbliċi għall-offerti.

Dawn huma oqsma li se jeħtieġu aktar valutazzjoni dwar jekk u f’liema oqsma regoli minimi dwar id-definizjoni ta' reati u sanzjonijiet kriminali jistgħu jkunu essenzjali sabiex jiżguraw l-implimentazzjoni effettiva tal-leġiżlazzjoni tal-UE.

Din l-analiżi għandha tqis dan li ġej:

Is-serjetà u n-natura tal-ksur tal-liġi għandhom jiġu kkunsidrati. Għal ċerti atti illegali meqjusa bħala partikolarment gravi, sanzjoni amministrattiva tista' ma tkunx rispons qawwi biżżejjed. Fuq l-istess linja, sanzjonijiet tal-liġi kriminali jistgħu jintgħażlu meta jkun meqjus importanti li tiġi enfasizzata diżapprovazzjoni qawwija sabiex tiġi żgurata deterrenza. Id-dħul ta' kundanni fil-kondotta jista' jkollhom natura deterrenti partikolari. Fl-istess ħin, proċedimenti kriminali ta' spiss jipprovdu għal protezzjoni akbar tad-drittijiet tal-akkużat, li jirriflettu s-serjetà tal-akkuża. L-effiċjenza tas-sistema ta' sanzjoni għandha tiġi kkunsidrata, kif ukoll sa fejn u r-raġunijiet għaliex is-sanzjonijiet eżistenti ma jilħqux il-livell ta’ infurzar mixtieq. It-tip ta' sanzjoni li huwa meqjus l-aktar xieraq biex jintlaħaq l-għan globali ta' effettività, proporzjonalità u dissważività għandhu jintgħażel. Sanzjoni amministrattiva ta' spiss tista' tiġi deċiża u eżegwita mingħajr dewmien, u proċeduri twal u li jeżiġu ħafna riżorsi jistgħu b'hekk jiġu evitati. Sanzjonijiet amministrattivi jistgħu għal din ir-raġuni jiġu kkunsidrati għal oqsma li fihom, pereżempju, ir-reat mhuwiex partikolarment serju jew li jitwettaq f'okkażjonijiet numerużi kif ukoll f'oqsma fejn is-sanzjonijiet u l-proċeduri amministrattivi huma adattati u effettivi għal raġunijiet oħra (eż. evalwazzjonijiet ekonomiċi kumplessi). F’ħafna każijiet, il-liġi amministrattiva tipprevedi wkoll firxa usa' ta' sanzjonijiet possibbli, minn multi u sospensjoni tal-liċenzji għall-esklużjoni mid-dritt għal benefiċċji pubbliċi, li jistgħu jiġu adattati għas-sitwazzjoni speċifika. F’ħafna każijiet, is-sanzjonijiet amministrattivi jistgħu għalhekk ikunu suffiċjenti jew anke aktar effettivi mis-sanzjonijiet kriminali.

4. Konklużjoni

Għalkemm il-qafas legali l-ġdid introdott mit-Trattat ta' Lisbona ma jimmodifikax b'mod radikali l-kamp ta' applikazzjoni possibbli tal-liġi kriminali tal-UE, huwa jsaħħaħ konsiderevolment il-possibbiltà li jsir progress bl-iżvilupp ta' Politika Kriminali koerenti tal-UE li hija bbażata fuq konsiderazzjonijiet kemm ta' infurzar effettiv kif ukoll ta' protezzjoni soda tad-drittijiet fundamentali. Din il-komunikazzjoni hija l-ewwel pass fl-isforzi tal-Kummissjoni biex twaqqaf Politika Kriminali tal-UE koerenti u konsistenti billi tistabbilixxi l-mod kif l-UE għandha tuża l-liġi kriminali biex tiżgura l-implimentazzjoni effettiva tal-politiki tal-UE. Jeħtieġ li t-tfassil ta' din il-politika ikun iffukat fuq il-ħtiġijiet taċ-ċittadini tal-UE u r-rekwiżiti ta' żona ta’ libertà, sigurtà u ġustizzja tal-UE, filwaqt li jiġu rispettati bis-sħiħ is-sussidjarjetà u l-fatt li l-użu l-liġi kriminali għandu dejjem ikun l-aħħar soluzzjoni.

Għal dan il-għan, il-Kummissjoni se tfassal, f'kooperazzjoni mill-qrib mal-Parlament u mal-Kunsill, formulazzjoni standard. Dan għandu jkun ta' gwida għal-leġiżlatur tal-UE fit-tfassil ta' dispożizzjonijiet tal-liġi kriminali li jistabbilixxu regoli minimi dwar ir-reati u s-sanzjonijiet. Dan għandu jikkontribwixxi biex tiġi żgurata konsistenza, tiżdied iċ-ċertezza legali u tiġi ffaċilitata l-implimentazzjoni tal-liġi tal-UE. Il-Kummissjoni għandha wkoll twaqqaf grupp ta' esperti biex jgħin lill-Kummissjoni fil-ġbir tal-evidenza fattwali u fit-tnedija ta' aktar diskussjonijiet dwar kwistjonijiet legali importanti bil-ħsieb li tiġi żgurata l-implimentazzjoni effiċjenti tal-leġiżlazzjoni tal-UE fis-sistemi tal-liġi kriminali nazzjonali tal-Istati Membri. Dan jinkludi pereżempju:

-           ir-relazzjoni bejn is-sistemi ta’ sanzjoni kriminali u mhux kriminali; kif ukoll

-           l-interpretazzjoni ta' kunċetti tal-liġi kriminali użati regolarment fil-leġiżlazzjoni tal-UE, bħall-kunċett ta’ “sanzjonijiet effettivi, proporzjonati u dissważivi", "każijiet minuri" jew "għajnuna u kompliċità".

Abbażi ta' evalwazzjoni bir-reqqa tal-miżuri tal-liġi kriminali tal-UE eżistenti u ta' konsultazzjoni kontinwa mal-Istati Membri u l-esperti indipendenti, il-Kummissjoni se tkompli tiżviluppa l-politika kriminali tal-UE matul is-snin li ġejjin.

Il-viżjoni tagħna għal Politika Kriminali tal-UE koerenti u konsistenti sal-2020:

- Il-liġi kriminali tal-UE tista' tkun għodda importanti u aħjar fil-ġlieda kontra l-kriminalità bħala reazzjoni għat-tħassib taċ-ċittadini u biex tiġi żgurata l-implimentazzjoni effettiva tal-politiki tal-UE. .

- Fl-oqsma ta' politika tal-UE fejn hemm nuqqas identifikat ta' infurzar, il-Kummissjoni se tevalwa l-ħtieġa għal miżuri tal-liġi kriminali ġodda bbażati fuq evalwazzjoni tal-prattika tal-infurzar u fir-rispett sħiħ tal-prinċipji fundamentali tat-Trattat bħas-sussidjarjetà u l-proporzjonalità. Dan jikkonċerna b'mod partikolari l-protezzjoni tal-funzjonament tas-swieq finanzjarji, il-ħarsien tal-interessi finanzjarji tal-UE, il-protezzjoni tal-euro kontra l-iffalsifikar, ksur serju tar-regoli tat-trasport bit-triq, ksur serju tar-regoli dwar il-protezzjoni tad-dejta, ir-reati doganali, il-ħarsien ambjentali, il-politika tas-sajd u l-politiki tas-suq intern għall-ġlieda kontra l-prattiċi illegali bħall-iffalsifikar u l-korruzzjoni jew kontra l-kunflitti tal-interess mhux dikjarati fil-kuntest ta' sejħiet għall-offerti pubbliċi.

- Għandu jkun hemm fehim komuni dwar il-prinċipji gwida sottostanti tal-leġiżlazzjoni dwar il-liġi kriminali tal-UE, bħall-interpretazzjoni tal-kunċetti legali bażiċi użati fil-liġi kriminali tal-UE; u kif is-sanzjonijiet tal-liġi kriminali jistgħu jipprovdu l-aktar valur miżjud fil-livell tal-UE.

- Il-miżuri tal-liġi kriminali għandhom jiġu ankrati fis-sod fi standards għall-UE kollha għad-drittijiet proċedurali u d-drittijiet tal-vittmi skont il-Karta tad-Drittijiet Fundamentali tal-UE.

[1]               Ara l-Eurobarometer 75, Rebbiegħa 2011. L-ewwel erba’oqsma fejn l-azzjoni tal-UE għandha tiffoka huma: il-politika ekonomika u monetarja, il-politika tal-immigrazzjoni, il-politika tas-saħħa u l-ġlieda kontra l-kriminalità.

[2]               Id-Deċiżjoni Kwadru dwar il-ġlieda kontra t-terroriżmu (2002/475/ĠAI), ĠU L 164/3 22.6.2002; Id-Deċiżjoni Kwadru li tistabbilixxi dispożizzjonijiet minimi dwar l-elementi kostitwenti ta' atti kriminali u ta' pieni fil-qasam tat-traffikar illeċitu ta' drogi (2004/757/ĠAI) tal-11.11.2004; Id-Direttiva dwar il-prevenzjoni u l-ġlieda kontra t-traffikar tal-bnedmin u l-protezzjoni tal-vittmi tiegħu u li tissostitwixxi d-Deċiżjoni Qafas tal-Kunsill 2002/629/ĠAI, ĠU L 101/1 15.4.2011; Il-Konvenzjoni dwar il-ħarsien tal-interessi finanzjarji tal-Komunitajiet Ewropej, ĠU L 316/49 27.11.1995.

[3]               Ara, madankollu, is-sentenzi tal-Qorti tal-Ġustizzja tal-Unjoni Ewropea fil-kawżi C-176/03 u C-440/05.

[4]               Ara d-Direttiva 2008/99/KE dwar il-protezzjoni tal-ambjent permezz tal-liġi kriminali, ĠU L 328/28 6.12.2008; Id-Direttiva 2009/123/KE li temenda d-Direttiva 2005/35/KE dwar it-tniġġis ikkawżat minn vapuri u l-introduzzjoni ta’ penali għal ksur, ĠU L 280/52 27.10.2009; u d-Direttiva 2009/52 li tipprevedi standards minimi għal sanzjonijiet u miżuri kontra min iħaddem lil ċittadini minn pajjiżi terzi b’residenza illegali, , ĠUJ L 168/24 30.6.2009; Id- Deċiżjoni kwadru tal-Kunsill tad-29 ta' Mejju 2000 dwar li tiżdied il-protezzjoni permezz ta' pieni kriminali u sanzjonijiet oħra kontra l-iffalsifikar in konnessjoni mad-dħul tal-euro, ĠU L 140/1 14.6.2000.

[5]               Ara l-Artikolu 82(1) TFUE.

[6]               Ara l-Artikolu 67(1) TFUE: "L-Unjoni għandha tikkonsisti fi spazju ta' libertà, sigurtà u ġustizzja b'rispett għad-drittijiet fundamentali u s-sistemi u t-tradizzjonijiet legali differenti tal-Istati Membri".

[7]               Dwar il-ħtieġa għal aktar koerenza fl-iżvilupp tal-liġi kriminali tal-UE ara, bħala eżempju, il-Manifest dwar il-Politika Kriminali tal-UE tal-2009 (http://www.crimpol.eu), li tfassal minn grupp akkademiku magħmuk minn 14-il professur tal-Liġi Kriminali minn għaxar Stati Membri tal-Unjoni Ewropea.

[8]               Taħt it-Trattat KE preċedenti, filwaqt li l-istrument normali għal-leġiżlazzjoni dwar il-liġi kriminali kienu d-Deċiżjonijiet Qafas taħt l-hekk imsejjaħ "tielet pilastru", xi direttivi b’miżuri tal-liġi kriminali ġew adottati: sabiex jiżguraw l-infurzar tar-regoli dwar il-protezzjoni tal-ambjent, kontra t-tniġġis ikkawżat mill-vapuri u l-impjieg illegali (Direttivi 2008/99, 2009/123 u 2009/52), ibbażati fuq il-ġurisprudenza tal-Qorti tal-Ġustizzja (C-176/03). L-approssimazzjoni ta’ tipi u livelli ta' sanzjonijiet kienet possibbli biss fid-Deċiżjonijiet Qafas (C-440/5).

[9]               Ara il-Protokoll Nru 1 dwar "ir-rwol tal-Parlamenti nazzjonali fl-Unjoni Ewropea" u Nru 2 dwar "l-applikazzjoni tal-prinċipji ta' sussidjarjetà u ta' proporzjonalità", b'mod partikolari l-Artikolu 7(2).

[10]             Ara l-Komunikazzjoni mill-Kummissjoni: Strateġija għall-implimentazzjoni effettiva tal-Karta tad-Drittijiet Fundamentali mill-Unjoni Ewropea – COM (2010) 573 tad-19 10. 2010.

[11]             Ara l-Protokolli Nru 21 u 22.

[12]             Ara d-Deċiżjonijiet Qafas u d-Direttiva msemmija hawn fuq, fin-nota ta' qiegħ il-paġna 3. Bosta minn dawn id-Deċiżjonijiet Qafas se jiġu evalwati mill-ġdid fid-dawl tat-Trattat ta’ Lisbona fis-snin li ġejjin, inkluża d-Deċiżjoni Qafas 2000/383, kif emendata mid-Deċiżjoni Qafas 2001/888, fl-2012.

[13]             Ara l-" Komunikazzjoni dwar ir-rinfurzar tar-reġimi tas-sanzjonar fis-settur tas-servizzi finanzjarji", COM (2010) 716, it-8 12 2010.

[14]             Ara il-Konvenzjoni tal-1995 dwar il-protezzjoni tal-interessi finanzjarji tal-UE u l-Protokolli tagħha, u r-Regolament tal-Kunsill (KE, Euratom) Nru 2988/95 tat-18.12.1995 dwar il-protezzjoni tal-interessi finanzjarji tal-Komunitajiet Ewropej, dwar sanzjonijiet amministrattivi, ĠU L 312/1 23.12.1995.

[15]             Ara l-"Komunikazzjoni dwar il-protezzjoni tal-interessi finanzjarji tal-Unjoni Ewropea permezz tal-liġi kriminali u l-investigazzjonijiet amministrattivi – Politika integrata għall-ħarsien tal-flus tal-kontribwenti", COM (2011) 293, is-26 5 2011.

[16]             L-Artikolu 5(4) TUE.

[17]             L-Artikolu 49(3) tal-Karta tad-Drittijiet Fundamentali tal-UE.

[18]             L-Artikolu 83(2) TFUE.

[19]             L-Artikolu 49 tal-Karta tad-Drittijiet Fundamentali tal-UE.

[20]             Ara l-" Komunikazzjoni dwar ir-rinfurzar tar-reġimi tas-sanzjonar fis-settur tas-servizzi finanzjarji", COM (2010) 716 finali tat-8 12 2010, p.14.

[21]             Ara l-" Komunikazzjoni dwar il-protezzjoni tal-interessi finanzjarji tal-Unjoni Ewropea permezz tal-liġi kriminali u l-investigazzjonijiet amministrattivi – politika integrata għall-ħarsien tal-flus tal-kontribwenti", COM (2011) 293, tas-26 5 2011, p. 10.

[22]             Dokument ta’ Ħidma tal-Persunal tal-Kummissjoni SEC (2011) 391 tat-28.3.2011, li jakkumpanja l-White Paper 'Pjan direzzjonali għal Żona Unika Ewropea tat-Trasport – Lejn sistema tat-trasport kompetittiva u li tuża r-riżorsi b'mod effiċjenti', COM (2011) 144 tat-28 3 2011, paragrafu 176.

[23]             Ara l-Komunikazzjoni "Strateġija komprensiva dwar il-ħarsien tad-dejta personali fl-Unjoni Ewropea", COM (2010) 609 tal-4 11 2010, p. 9.

[24]             Ara l-Komunikazzjoni "Il-kisba ta' żona ta' libertà, sigurtà u ġustizzja għaċ-ċittadini tal-Ewropa - Pjan ta' Azzjoni li Jimplimenta l-Programm ta' Stokkolma", COM (2010) 171 tal-20 4 2010, p. 22.

[25]             Ara d-Direttiva 2008/99/KE dwar il-protezzjoni tal-ambjent permezz tal-liġi kriminali, ĠU L 328/28 tas-6.12.2008; u d-Direttiva 2009/123/KE dwar it-tniġġis ikkawżat minn vapuri u l-introduzzjoni ta’ penali għal ksur (ĠU L 280/52, 27.10.2009).