EUR-Lex Access to European Union law
This document is an excerpt from the EUR-Lex website
Document 52011DC0531
COMMUNICATION FROM THE COMMISSION TO THE EUROPEAN PARLIAMENT, THE COUNCIL, THE EUROPEAN ECONOMIC AND SOCIAL COMMITTEE AND THE COMMITTEE OF THE REGIONS The Sixth Community Environment Action Programme FINAL ASSESSMENT
KOMUNIKAZZJONI MILL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT SOĊJALI U EKONOMIKU EWROPEW U LILL-KUMITAT TAR-REĠJUNI Is-Sitt Programm ta' Azzjoni Ambjentali tal-KomunitàVALUTAZZJONI FINALI
KOMUNIKAZZJONI MILL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT SOĊJALI U EKONOMIKU EWROPEW U LILL-KUMITAT TAR-REĠJUNI Is-Sitt Programm ta' Azzjoni Ambjentali tal-KomunitàVALUTAZZJONI FINALI
/* KUMM/2011/0531 finali */
/* KUMM/2011/0531 finali */ KOMUNIKAZZJONI MILL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT SOĊJALI U EKONOMIKU EWROPEW U LILL-KUMITAT TAR-REĠJUNI Is-Sitt Programm ta' Azzjoni Ambjentali tal-KomunitàVALUTAZZJONI FINALI
KUNTEST POLITIKU Id-dinja llum hija ferm differenti minn dik li kienet fl-2002 meta kien ġie varat is-Sitt Programm ta' Azzjoni Ambjentali għal medda ta' għaxar snin (Environmental Action Programme – EAP)[1]. Qed tirkupra minn kriżi finanzjarja u ekonomika profonda li wriet biċ-ċar ir-riskji sistemiċi li jirriżultaw meta kollox jibqa' għaddej bħas-soltu mingħajr ma ssir evalwazzjoni kritika tas-sitwazzjoni. Dan jerġa' juri l-importanza tal-kunċetti tat-tkabbir ekoloġiku u ekonomija effiċjenti fl-użu tar-riżorsi u b'livelli baxxi ta' karbonju li jistgħu joffru gwida politika tajba għat-trasformazzjoni ekonomika globali fit-tul. L-aġenda attwali tal-UE toffri bosta opportunitajiet sabiex il-politika ambjentali tevolvi f'din id-direzzjoni. L-Istrateġija Ewropa 2020[2], bl-importanza li tagħti lill-effiċjenza fl-użu tar-riżorsi, flimkien mal-governanza ekonomika fl-għamla tas-semestru Ewropew, huma oqfsa effettivi sabiex jiġi żgurat li l-għanijiet ambjentali jkunu integrati fl-aġenda soċjoekonomika ġenerali. Dan l-aħħar, il-Kummissjoni adottat strateġija ambizzjuża ġdida[3] biex sal-2020 twaqqaf it-telf tal-bijodiversità u tas-servizzi tal-ekosistema fl-UE kif ukoll Komunikazzjoni dwar it-tħejjijiet għall-Konferenza ta' Rio+20[4]. Adottat ukoll, dan l-aħħar, Pjan Direzzjonali lejn ekonomija b'livelli baxxi ta' karbonju sal-2050[5], White Paper dwar it-Trasport[6], u Komunikazzjonijiet dwar l-Enerġija 2020[7] u Pjan dwar l-Effiċjenza Enerġetika 2011[8]. Il-Kummissjoni qed tippjana wkoll li fl-2011 tadotta Pjan Direzzjonali għal Ewropa effiċjenti fl-użu tar-riżorsi. L-agenda għall-2012 tinkludi pjan għal politika dwar l-ilma u reviżjoni tal-Pjan ta' Azzjoni dwar il-Konsum u l-Produzzjoni Sostenibbli u l-Pjan ta' Azzjoni għal Politika Industrijali Sostenibbli[9]. Il-politika dwar il-kwalità tal-arja għandha tiġi riveduta fl-2013. Il-Kummissjoni ppreżentat proposti dwar il-qafas finanzjarju multiannwali li jmiss u qed tħejji proposti biex tirriforma il-Politika Agrikola Komuni (PAK), il-Politika Komuni tas-Sajd (PKS) u l-Politika ta' Koeżjoni. Dawn l-inizjattivi ġodda kollha se jikkumplimentaw il-leġiżlazzjoni ambjentali eżistenti li ġiet ikkonsolidata tul l-aħħar snin u li tkopri l-oqsma kollha tal-ambjent, bl-eċċezzjoni tal-ħamrija. Ladarba tiġi implimentata din il-leġiżlazzjoni, bl-għajnuna wkoll tal-Komunikazzjoni tal-Kummissjoni dwar l-implimentazzjoni tal-leġiżlazzjoni ambjentali tal-UE li għandha tiġi adottata fl-2011, din se tgħin fil-protezzjoni tal-ambjent u tillimita l-konsegwenzi negattivi fuq is-saħħa. Il-Programmi ta' Azzjoni Ambjentali ggwidaw l-iżvilupp tal-politika ambjentali tal-UE sa mill-bidu tas-snin sebgħin u s-Sitt EAP għandu jitqies bħala parti minn proċess kontinwu li ilu għaddej għal madwar 40 sena. Is-Sitt EAP kien l-ewwel Programm ta' Azzjoni Ambjentali li ġie adottat mill-Kunsill u l-Parlament Ewropew permezz tal-proċedura ta' kodeċiżjoni. Kemm ilu fis-seħħ kien hemm żewġ proċessi ta' tkabbir li raw lill-Komunità tikber minn ħmistax-il Stat Membru għal Unjoni ta' sebgħa u għoxrin u li, permezz ta' livell ogħla ta' protezzjoni tal-ambjent, ġie xprunat mill-implimentazzjoni tal-leġiżlazzjoni ambjentali tal-UE. Din il-Komunikazzjoni tippreżenta valutazzjoni finali tal-Programm u tagħti wkoll xi indikazzjonijiet ċari dwar it-tfassil tal-politika ambjentali llum u fil-futur. SEJBIET ġENERALI Din il-valutazzjoni finali hija msejsa fuq valutazzjoni esterna, ir-riżultati ta' konsultazzjoni pubblika[10] u r-rapport tal-EEA "L-Ambjent Ewropew – l-Istat u l-Prospetti 2010" (SOER 2010)[11]. Sa mill-bidu tiegħu, għandu jiġi rikonoxxut li s-Sitt EAP kien wieħed minn għadd ta' inizjattivi li xprunaw il-politika ambjentali u mhijiex faċli li jinfirdu minn xulxin il-kontribuzzjonijiet rispettivi ta' dawn l-inizjattivi. Għaldaqstant l-approċċ għal din il-valutazzjoni kien wieħed pragmatiku, li jikkonsisti f'valutazzjoni tas-sorsi differenti msemmija hawn fuq, sabiex jiddentifika l-aktar kisbiet u nuqqasijiet importanti għall-miri u għanijiet differenti ddefiniti fis-Sitt EAP. Minkejja dawn it-twissijiet, il-konklużjoni ġenerali ta' din il-valutazzjoni finali hija li, kollox ma' kollox, is-Sitt EAP sewa biex jiġi pprovdut qafas prinċipali għall-politika ambjentali. Il-biċċa l-kbira tal-azzjonijiet stabbiliti fil-Programm kienu jew huma fil-proċess li jitlestew. It-tħejjija tal-programm offriet opportunità lill-partijiet ikkonċernati li jkollhom analiżi komprensiva u fehim aħjar tal-politika ambjentali tal-UE kollha kemm hi. Peress li ġie adottat b'kodeċiżjoni, il-partijiet interessati jqisuh bħallikieku għandu iktar leġittimità minn programmi preċedenti. Dan jgħin sabiex ikun hemm sens usa' ta' sjieda għal proposti sussegwenti ta' politika. Bosta partijiet interessati jqisu s-Sitt EAP bħala punt ta' referenza, mhux biss fuq livell nazzjonali, iżda f'ċerti Stati Membri, saħansitra fuq livelli reġjonali u lokali, u jitqies bħala siewi biex permezz tiegħu tiġi difiża l-politika ambjentali kontra d-domandi ta' politiki li jikkompetu bejniethom, jiġi żgurat finanzjament xieraq u tiġi pprovduta prevedibbiltà għan-negozju fir-rigward ta' ċerti żviluppi futuri ta' politika. Is-seba' strateġiji tematiċi tas-Sitt EAP[12] – l-arja, il-pestiċidi, il-prevenzjoni u r-riċiklaġġ tal-iskart, ir-riżorsi naturali, il-ħamrija, l-ambjent tal-baħar, l-ambjent urban – ġew żviluppati sabiex isaħħu l-integrazzjoni tal-politika u jtejbu l-bażi ta' għarfien. Minkejja li l-progress ivarja fost l-oqsma koperti mill-istrateġiji tematiċi, f'ċerti każijiet it-tħejjija tagħhom għenet sabiex tinbena r-rieda politika għall-adozzjoni ta' miri u skedi effettivi u l-implimentazzjoni sussegwenti tagħhom. Dan inkoraġġixxa approċċ aktar ħolistiku għat-tfassil tal-politika ambjentali u stabbilixxa kunsens fuq kif l-aħjar wieħed għandu jipproċedi fid-dawl tat-tħassib dwar il-kompetenzi jew in-nuqqas ta' dejta soda. L-istrateġiji tal-baħar, tal-ħamrija, dawk urbani u dawk dwar ir-riżorsi huma meqjusa mill-partijiet interessati bħala dawk li taw l-aktar impetu. Uħud minn dawn xprunaw strumenti leġiżlattivi speċifiċi. Dawk dwar l-arja, il-pestiċidi, u l-prevenzjoni u riċiklaġġ tal-iskart iffukaw aktar fuq analiżi tal-miżuri eżistenti sabiex titjieb il-koerenza u jiġu indirizzati defiċjenzi speċifiċi. Madankollu, l-evidenza dwar il-ħila tas-Sitt EAP li jħeġġeġ l-adozzjoni ta' strumenti ambjentali speċifiċi mhijiex waħda konvinċenti. Parti mill-varjazzjonijiet fil-progress lejn l-għanijiet stabbiliti fis-Sitt EAP tista' tiġi spjegata mid-disinn tal-Programm, speċjalment fid-dawl tal-livelli rispettivi ta' ambizzjoni fl-oqsma tematiċi differenti. Pereżempju, l-għanijiet stipulati għat-tibdil fil-klima sussegwentement tilfu mill-validità tagħhom wara żviluppi politiċi dinamiċi f'dak il-qasam li ma kienux xrpunati mis-Sitt EAP. B'kuntrast ma' dan, il-mira tal-2010 għall-bijodiversità ma' ntlaħqitx hekk kif l-impenn b'saħħtu meħud inizjalment mill-Istati Membri ma ssarrafx f'mezzi adegwati. Filwaqt li l-intenzjoni tat-Trattat kienet li l-programmi ġenerali ta' azzjoni ambjentali kellhom jiffukaw fuq għanijiet prijoritarji, il-proċess ta' kodeċiżjoni irriżulta f'Sitt EAP b'għadd kbir ta' azzjonijiet, li jvarjaw kemm fl-ambitu kif ukoll fl-effett. Dan, flimkien ma' nuqqas ta' viżjoni fit-tul, ikkomprometta l-ħila tal-Programm li jwassal messaġġ ċar li seta' għen sabiex jżomm il-profil tiegħu b'mod aktar effikaċi matul il-perjodu li kien fis-seħħ. L-istrateġiji tematiċi ġew żviluppati bi spejjeż sinifikanti f'termini ta' ħin u riżorsi umani: l-aħħar strateġija ġiet adottata saħansitra fl-2006. L-implimentazzjoni u l-infurzar mhux adegwati tal-leġiżlazzjoni ambjentali tal-UE kienu wkoll fattur li xekkel il-progress. Il-qafas ta' żmien ta' għaxar snin għas-Sitt EAP mhux dejjem kien wieħed xieraq. Dan wera li kien twil biżżejjed biex jiġu koperti t-tfassil u l-adozzjoni tal-politika kif ukoll l-ewwel stadji tal-implimentazzjoni tagħha f'ċerti oqsma (pereżempju dak tal-iskart). F'oqsma oħra (pereżempju dawk tar-riżorsi u l-bijodiversità) wera li kien qasir wisq minħabba l-ħtieġa ta' aktar tagħrif jew minħabba xkiel ieħor. Fl-aħħarnett, filwaqt li s-Sitt EAP influwenza l-qafas finanzjarju multiannwali 2007-2013[13], iż-żmien tal-adozzjoni tiegħu fl-2002 kien tard wisq għall-perjodu 2000-2007[14], mil-lat ta' finanzjament. OQSMA PRIJORITARJI Din it-taqsima tipprovdi valutazzjoni aktar dettaljata tal-oqsma prijoritarji tas-Sitt EAP – in-natura u l-bijodiversità, l-ambjent u s-saħħa, ir-riżorsi naturali u l-iskart, it-tibdil fil-klima u l-kwistjonijiet internazzjonali - f'termini tal-kontribuzzjoni tagħhom, il-kisbiet u n-nuqqasijiet tal-politika ambjentali matul il-perjodu konċernat kif ukoll it-tagħlimiet miksuba. In-natura u l-bijodiversità Kontribuzzjoni: Fir-rigward tan-natura u l-bijodiversità, is-Sitt EAP instiga l-iżvilupp tal-istrateġiji tematiċi dwar il-protezzjoni tal-ħamrija u l-protezzjoni u l-konservazzjoni tal-ambjent tal-baħar. Dan enfasizza l-ħtieġa li tinbena bażi ta' għarfien aktar b'saħħitha, jitjieb il-finanzjament u jissaħħu l-attivitajiet attwali. Fittex ukoll li jqajjem kuxjenza politika dwar in-natura u l-bijodiversità fuq l-istess livell ta' kwistjonijiet ambjentali oħra, b'mod partikolari, it-tibdil fil-klima, u enfasizza l-ħtieġa li jiżdied ir-rikonoxximent tal-valur ekonomiku tal-bijodiversità u s-servizzi tal-ekosistema fil-proċess tal-politika. Kisbiet: In-netwerk Natura 2000 tas-siti protetti ġie estiż sabiex ikopri madwar 17 % tal-erja totali tal-art tal-UE, filwaqt li l-Istrateġija Tematika għall-Protezzjoni tal-Ħamrija12 enfasizzat l-importanza tal-ħamrija bħala riżorsa ewlenija u fil-ħarsien tal-bijodiversità. L-Istrateġija Tematika dwar il-Protezzjoni u l-Konservazzjoni tal-Ambjent Marin12 stabbilixxiet is-sisien għall-bijodiversità marina, filwaqt li naqas it-tniġġis tax-xmajjar u l-lagi min-nitrat u l-fosforu. Minbarra dan, il-bini ta' bażi ta' għarfien kien element ewlieni ta' xprunar, perezempju l-inizjattiva TEEB ( The Economics of Ecosystems and Biodiversity )[15] li tat spinta lill-proċess attwali li jiġi stabbilit valur monetarju fuq il-kapital naturali u s-servizzi tal-ekosistema. Ix-xenarju bażi għall-Bijodiversità 2010 tal-UE se jservi ta' parametru ta' referenza u flimkien mas-SEBI 2010 aġġornat ( Streamlining European 2010 Biodiversity Indicators )[16] se jkunu strumentali sabiex jitkejjel il-progress fil-ġejjieni. Fl-aħħarnett, ġiet adottata reċentament strateġija ta' għaxar snin għall-protezzjoni tal-bijodiversità3. Nuqqasijiet: L-għan ġenerali tas-Sitt EAP li jitwaqqaf it-tnaqqis tal-bijodiversità sal-2010 ma ntlaħaqx u x-xejra ġenerali tal-biċċa l-kbira tal-indikaturi rilevanti għall-bijodiversità kienet waħda negattiva, anke jekk din kienet b'varjazzjonijiet reġjonali sinifikanti, pereżempju, abbandun tal-art, frammentazzjoni tal-ħabitat li tirriżulta mill-iżviluppi fl-infrastrutturi tat-trasport, it-tixrid urban, u prattiki agrikoli mhux xierqa. Proporzjon sostanzjali tal-ilma ħelu Ewropew huwa fir-riskju li ma jiksibx status tajjeb sal-201511. Huwa stmat li bejn 10 u 15 % minn fost l-aktar minn 10,000 speċijiet mhux nattivi għandhom impatti negattivi fuq in-natura u l-bijodiversità. Evalwazzjonijiet bijoġeografiċi dettaljati tal-ispeċijiet u t-tipi ta' ħabitats Ewropej elenkati fid-Direttiva dwar il-Ħabitats tal-UE[17] jindikaw li 17 % biss tat-tipi ta' ħabitats u tal-ispeċijiet għandhom "status ta' konservazzjoni favorevoli"[18]. L-iżvilupp ta' netwerk ta' żoni tal-baħar protetti sar bil-mod hekk kif, sa llum, is-siti ddeżinjati jammontaw għal madwar 6 % tal-ispeċijiet u 10 % tal-ħabitats. Minkejja li l-użu sostenibbli tal-ħamrija ġie enfasizzat bħala prijorità fis-Sitt EAP, il-Kunsill ma kienx kapaċi jwettaq progress fuq din il-kwistjoni, b'mod partikolari, permezz tal-adozzjoni tad-Direttiva Qafas dwar il-Ħamrija li ġiet proposta[19]. Sa llum, dan illimita l-ħila li jintlaħaq l-għan tas-Sitt EAP dwar il-prattiki ta' mmaniġġjar tal-ħamrija fl-UE. Tagħlimiet miksuba: Seta' sar aktar progress sabiex tintlaħaq il-mira li jiġi mwaqqaf it-tnaqqis tal-bijodiversità sal-2010 kieku ġiet indirizzata bl-attenzjoni politika u l-impenji finanzjarji meħtieġa, kemm mill-UE kif ukoll mill-Istati Membri. L-ambjent u s-saħħa Kontribuzzjoni: Is-Sitt EAP wassal għal eżerċizzju utli ta' analiżi tal-impenji eżistenti u l-azzjonijiet ippjanati u għal iffukar ikbar fuq ir-rabiet bejn il-fatturi ambjentali u s-saħħa tal-bniedem. Għen ukoll sabiex imexxi 'il quddiem ċerta azzjoni li nkella ma kinitx tkun possibbli li titwettaq, pereżempju, dik fuq l-ambjent urban, jew azzjoni li kienet iddum iktar jew tkun anqas komprensiva mingħajr l-impetu tal-Programm, pereżempju dik fir-rigward tal-pestiċidi. L-Istrateġija Tematika dwar it-Tniġġis tal-Arja12 tal-2005 stabbilixxiet qafas metodoloġiku komprensiv u ħolistiku msejjes fuq bażi solida ta' għarfien li se tkompli tipprovdi l-bażi għal politika integrata dwar il-kwalità tal-arja. Kisbiet: Filwaqt li l-protezzjoni tas-saħħa tal-bniedem kienet l-għan ta' bosta politiki ambjentali, pereżempju dawk fuq l-arja, l-ilma u l-kimiki, il-Pjan ta' Azzjoni dwar l-Ambjent u s-Saħħa 2004-2010[20] għen sabiex tiżdied il-kuxjenza u l-informazzjoni dwar ir-rabtiet bejn l-ambjent u s-saħħa. Ġiet adottata leġiżlazzjoni komprensiva fl-oqsma tal-kimiki, il-pestiċidi u l-ilma, għalkemm iż-żminijiet twal ta' implimentazzjoni jfissru li l-impatt tagħha għad trid tieħu ż-żmien tagħha. Il-livelli ta' SO2, NOx u ċomb fl-arja naqsu matul l-aħħar disa' snin. Flimkien ma' dan, twettqu miżuri ġodda li ma kinux fis-Sitt EAP u li jirreflettu t-tibdiliet fil-prijoritajiet ta' politika minħabba r-riskji akbar ta' skarsezza ta' ilma u ta' nirien fil-foresti. Nuqqasijiet: X'aktarx mhux se tintlaħaq għal kollox il-mira tas-Sitt EAP li, fuq medda ta' ġenerazzjoni waħda, il-kimiki jkunu prodotti u użati biss b'mod li ma jwasslux għal impatt negattiv sinifikanti fuq is-saħħa u l-ambjent. Flimkien ma' dan, id-dejta dwar il-konċentrazzjonijiet tal-kimiki fl-ambjent u fil-bnedmin, u l-effetti ta' esponiment għal taħlit kumpless ta' kimiki, għadha waħda skarsa. L-Istrateġija Tematika għall-Ambjent Urban12 ma tidhirx li kellha impatti sinifikanti fir-rigward tal-għan tas-Sitt EAP li jtejjeb il-kwalità tal-arja tal-ambjent urban. Materja partikulata u l-ożonu jibqgħu kwistjonijiet ta' tħassib, b'mod partikolari, il-konċentrazzjonijiet ta' PM10 f'bosta żoni urbani tal-UE għadhom iwasslu, b'mod sinifikanti, għal imwiet aktar bikrija u diżabbiltà minn mard respiratorju, mard kardjovaskulari u l-kanċer. Huwa stmat li madwar 40 % tal-popolazzjoni tgħix f'żoni urbani b'livelli ta' storbju bil-lejl li jaqbżu l-livelli rrakkomandati mill-Organizzazzjoni Dinjija tas-Saħħa. L-aċċess għal ilma ta' kwalità sodisfaċenti mhuwiex suffiċjenti u jirrappreżenta riskju għas-saħħa f'għadd ta' żoni rurali. Hemm ukoll għadd ta' lakuni fil-leġiżlazzjoni, mhux biss dawk ambjentali iżda wkoll, pereżempju, dawk fir-rigward tal-arja interna (peress li ċ-ċittadini Ewropej iqattgħu madwar 90 % tal-ħin tagħhom ġewwa) u tal-emissjonijiet mill-apparat domestiku u kummerċjali. Flimkien ma' dan, il-limiti nazzjonali tal-emissjonijiet għad iridu jiġu riveduti u d-depożitu eċċessiv ta' nitroġenu atmosferiku għadha kwistjoni miftuħa madwar l-UE. Tagħlimiet miksuba: Teħtieġ aktar attenzjoni lill-appoġġ għall-implimentazzjoni, kemm fuq livelli nazzjonali kif ukoll dawk reġjonali. Is-sejbiet u l-informazzjoni mir-riċerka dwar l-impatti tal-kwalità ambjentali fuq is-saħħa għandhom jiġu integrati aħjar fl-għan usa' ta' politika tat-titjib tas-saħħa pubblika. L-ambjent urban jeħtieġ li jkun rifless aħjar fl-iżvilupp tal-politika peress li madwar 75 % tal-popolazzjoni tal-UE tgħix f'żoni urbani. Riżorsi naturali u skart Kontribuzzjoni: Is-Sitt EAP saħħaħ ir-rabta bejn il-politika dwar l-iskart u l-politika dwar ir-riżorsi u għen sabiex jiġi rrinfurzat l-immaniġġjar tal-iskart u nimxu 'il quddiem lejn politika msejsa fuq konsum u produzzjoni sostenibbli. L-Istrateġija Tematika għall-Użu Sostenibbli tar-Riżorsi Naturali12 ispirat riċerka ulterjuri, wasslet għall-ħolqien ta' fora ġodda[21] u ffurmat in-nukleu tal-ħidma attwali fuq l-effiċjenza fl-użu tar-riżorsi. L-Istrateġija Tematika għall-Prevenzjoni u r-Riċiklaġġ tal-Iskart12 ipprovdiet qafas strateġiku komuni għal-leġiżlazzjoni tal-UE dwar l-iskart. Kisbiet: L-użu tar-riżorsi ma għadux jikber bl-istess rata tat-tkabbir ekonomiku. Il-Pjan ta’ Azzjoni dwar il-Konsum u l-Produzzjoni Sostenibbli u dwar Politika Industrijali Sostenibbli9 jistabbilixxi sensiela integrata ta' miżuri sabiex prodotti mmanifatturati fl-Ewropa jkunu aktar ekoloġiċi, li jinkludu l-ħolqien ta' pjattaforma b'bosta partijiet interessati, jiġifieri l-Forum tan-Negozju, li ġie ddisinjat sabiex iħeġġeġ konsum aktar sostenibbli. Miżuri adottati dan l-aħħar bħad-Direttiva dwar l-Ekodisinn[22], ir-Regolament rivedut dwar l-Ekotikketta u l-inizjattiva dwar l-Akkwist Pubbliku Ekoloġiku huma mfassla b'tali mod li jkollhom impatti pożittivi fuq l-użu tar-riżorsi fil-futur. Il-leġiżlazzjoni dwar l-iskart ukoll ġiet mmodernizzata u ssemplifikata b'mod sinifikanti sabiex tindirizza aħjar l-għanijiet prinċipali tas-Sitt EAP. Il-leġiżlazzjoni dwar l-immaniġġjar tal-iskart saret aktar komprensiva billi inkorporat analiżi taċ-ċiklu tal-ħajja permezz ta' miri għall-użu mill-ġdid, ir-riċiklaġġ u l-irkupru kif ukoll billi naqqset il-periklu ta' ċertu skart. L-ammont ta' sustanzi potenzjalment ta' ħsara fl-elettronika li titqiegħed fis-suq tal-UE diġà ġew imnaqqsa sostanzjalment bħala riżultat tad-Direttiva dwar ir-Restrizzjonijiet fuq l-Użu Perikoluż ta' Sustanzi[23]. Nuqqasijiet: F'termini assoluti l-użu tar-riżorsi għadu qed jiżdied u dan mhuwiex kompatibbli mal-mira li tiġi rispettata l-kapaċità ta' ġarr tal-ambjent fit-tul. Differenzi sostanzjali fil-produttività tar-riżorsi jippersistu fost l-Istati Membri. Hemm ukoll dipendenza dejjem akbar fuq l-importazzjonijiet li issa jammontaw għal 20 % tar-riżorsi kollha kkunsmati u li l-impatt tagħhom, fil-biċċa l-kbira, għadu mhux magħruf. B'kuntrast mal-għan tas-Sitt EAP li jitnaqqas il-volum globali ta' skart iġġenerat fl-UE jidher li, fl-aħjar xenarju, il-ġenerazzjoni tal-iskart ġiet sempliċement stabbilizzata u jista' jkun li qiegħda saħansitra tiżdied. Minkejja li d-Direttiva Qafas dwar l-Iskart tqiegħed enfasi akbar fuq il-prevenzjoni tal-iskart milli kien iseħħ qabel, in-nuqqas ta' bażi ta' għarfien soda biżżejjed kif ukoll iċ-ċirkostanzi differenti fuq livell nazzjonali ma ppermettewx li jkun hemm miżuri aktar tanġibbli jew iffissar ta' miri. Tagħlimiet miksuba: Huwa stmat li l-ikel u x-xorb, it-trasport privat u d-djar jammontaw għal bejn 70 % u 80 % tal-impatt ambjentali tal-UE fuq il-konsum[24]. Minbarra dan, huwa stmat li aktar minn 80 % tal-impatti ambjentali kollha relatati mal-prodotti huma ddeterminati matul il-fażi ta' disinn tal-prodott11. Jeħtieġ aktar ffukar fuq dawn l-oqsma u l-ekodisinn sabiex jiġu indirizzati l-impatti ambjentali tal-attivitajiet u mġiba tal-bnedmin. L-implimentazzjoni tal-leġiżlazzjoni dwar l-iskart tkompli tippreżenta sfida, speċjalment, hekk kif il-kummerċ fl-iskart qed jiżdied. Tibdil fil-klima Kontribuzzjoni: Minkejja li s-Sitt EAP għen fil-qasam tat-tibdil fil-klima, l-aktar permezz tal-iffissar tal-prijoritajiet u l-immobilizzar ta' appoġġ istituzzjonali usa', elementi esterni oħra ta' xprunar kienu aktar b'saħħithom, pereżempju, l-iżviluppi internazzjonali, il-kuxjenza pubblika, l-analiżi Stern dwar l-ekonomija tat-tibdil fil-klima u l-ispejjeż tan-nuqqas ta' azzjoni, ir-Raba' Rapport ta' Valutazzjoni tal-IPCC li pprovda bażi xjentifika soda għat-tibdil fil-klima, it-tħassib ġeopolitiku fir-rigward tad-dipendenza fuq il-fjuwil fossili, il-prezzijiet tal-enerġija u s-sigurtà tal-enerġija, u l-evidenza dejjem akbar tal-effetti tat-tibdil fil-klima madwar id-dinja u l-ispejjeż assoċjati magħhom, l-aktar minħabba għadd dejjem akbar ta' avvenimenti estremi tat-temp f'bosta partijiet tad-dinja. Kisbiet: Minkejja li ma ntlaħqux l-ambizzjonijiet fir-rigward tal-azzjoni mill-komunità internazzjonali, l-għanijiet u l-ambizzjonijiet tas-Sitt EAP fir-rigward tal-miri u l-progress fuq livell ta' UE ġew issuperati. Il-Pakkett dwar il-Klima u l-Enerġija tal-2007 jistabbilixxi l-miri 2020 għat-tnaqqis tal-emissjonijiet tal-gassijiet serra, is-sehem tal-enerġija rinovabbli kif ukoll l-effiċjenza enerġetika. L-Iskema tal-UE għan-Negozjar tal-Emissjonijiet tal-2005[25] stabbilixxiet prezz fuq il-karbonju, u d-Direttiva dwar in-Nitrati u l-Miżbliet[26] irnexxilha tnaqqas l-emissjonijiet ta' gassijiet serra. L-adattament irriżulta bħala qasam ġdid tat-tfassil tal-politika. Id-Direttiva dwar il-Ġbir u l-Ħżin tal-Karbonju[27] ġiet adottata minkejja li ma kinitx inkluża fis-Sitt EAP. B'mod ġenerali, miri kwantifikabbli vinkolanti, bħall-mira tal-Protokoll ta' Kjoto għat-tnaqqis tal-emissjonijiet bi 8 % sal-2012, ukoll ġew issuperati. Nuqqasijiet: Miri kwantifikabbli, bħall-mira li l-enerġija rinovabbli tammpnta għal 12 % tal-użu totali tal-enerġija sal-2010[28], kienu iktar ta' aspirazzjoni fin-natura tagħhom u aktar diffiċli biex jinkisbu. Flimkien ma' dan, iż-żiediet fl-emissjonijiet tal-gassijiet fil-qasam tat-trasport għadhom marbuta mill-qrib mat-tkabbir ekonomiku11. Bejn l-1990 u l-200811 żdiedu wkoll l-emissjonijiet mill-idrofluworkabonji iżda xorta għadhom mhumiex regolati fuq livell internazzjonali. Tagħlimiet miksuba: Is-Sitt EAP ikkontribwixxa lil interess pubbliku akbar fuq din il-kwistjoni. Madankollu, dik li rriżultat bhala l-aktar importanti kienet il-ħila li jsir każ ċar għall-azzjoni msejjes fuq l-ispejjeż u l-benefiċċji, kif ukoll li jkun hemm impenn politiku lejn għanijiet ewlenin ta'politika fil-livell ta' Kapijiet ta' Stat tal-UE. Kwistjonijiet internazzjonali Kontribuzzjoni: Is-Sitt EAP tenna l-impenji tal-UE (a) li jiġu integrati l-kunsiderazzjonijiet ambjentali fir-relazzjonijiet esterni kollha tal-UE u (b) lejn id-dimensjoni esterna tal-Istrateġija ta' Żvilupp Sostenibbli tal-UE. Kisbiet: L-impenji internazzjonali tal-UE fl-ambitu tal-Konvenzjoni dwar id-Diversità Bijoloġika u l-ftehim ta' Nagoya tal-2010 dwar il-miri tal-bijodiversità reċentament għenu sabiex tiġi mmexxija 'il quddiem l-azzjoni fuq il-bijodiversità fuq livell internazzjonali, u ċerti Ftehimiet Ambjentali Multilaterali oħra, bħall-Konvenzjoni ta’ Rotterdam dwar il-Proċedura ta’ Kunsens Infurmat minn Qabel[29] u l-Konvenzjoni ta' Stokkolma dwar il-Pollutanti Organiċi Persistenti kellhom suċċess notevoli[30]. L-UE ppromwoviet ukoll, b’mod attiv, il-koordinazzjoni bejn it-tibdil fil-klima u l-bijodiversità fuq livell internazzjonali. Il-kapitoli dwar l-iżvilupp sostenibbli ġew inklużi fil-ftehimiet dwar il-kummerċ ħieles u ppruvat tikseb anqas ostakli għall-kummerċ fl-oġġetti u s-servizzi ambjentali. Fl-aħħar, iżda mhux l-inqas, l-UE kellha impatt globali b’saħħtu permezz tal-leġiżlazzjoni ambjentali tagħha hekk kif pajjiżi li jesportaw lejn l-UE kellhom jadottaw standards tal-UE għall-prodotti. Nuqqasijiet: Minkejja l-isforz tal-UE biex issaħħaħ il-kooperazzjoni multilaterali u turi l-impenn tagħha lejn il-konvenzjonijiet u ftehimiet internazzjonali, ftit li xejn kien hemm progress lejn governanza ambjentali globali msaħħa. Għalkemm kwistjonijiet ambjentali ta’ tħassib ġew promossi fil-politiki tal-UE dwar ir-relazzjonijiet kummerċjali, dawn setgħu kienu integrati aħjar fi kwistjonijiet fundamentali bħall-aċċess għas-swieq fil-ftehimiet kummerċjali. L-integrazzjoni tad-dimensjoni ambjentali fl-għajnuna għall-iżvilupp kien wisq dipendenti fuq il-prijorità mogħtija lilha mill-pajjiżi benefiċjarji. Tagħlimiet miksuba : L-isfidi ambjentali, li huma dejjem aktar globali, jeħtieġu sforz aktar koeżiv u ffukat fi ħdan l-UE sabiex ir-rwol tagħha ikun aktar effikaċi fit-tfassil tal-politika internazzjonali u tkompli tirsisti għal governanza ambjentali globali aħjar. Il-punt tat-tluq għandu jkun viżjoni miftiehma li tistabbilixxi għanijiet ewlenin għall-azzjoni futura tal-EU fl-indirizzar tal-problemi ambjentali globali u reġjonali. Dan għandu jgħin sabiex ir-riżorsi finanzjarji limitati jiġu mmobilizzati bl-aħjar mod. L-impronta ekoloġika esterna dejjem akbar tal-UE[31] għandha titqies flimkien mal-effikaċja tad-dimensjoni ambjentali fil-politiki għall-għajnuna. Tista' titqajjem u għandha titqajjem aktar kuxjenza dwar l-ispejjeż u l-benefiċċji tal-kwistjonijiet ambjentali kif ukoll l-ispejjeż li jirriżultaw minn nuqqas ta' azzjoni. L-UE għandha tippromwovi wkoll “ekonomija ekoloġika” fuq livell globali, billi tintegra aspetti ambjentali, soċjali u ekonomiċi bħat-taffija tal-faqar. L-EFFIKAċJA TAL-APPROċċI U STRUMENTI STRATEġIċI Flimkien mal-oqsma prijoritarji msemmija hawn fuq, is-Sitt EAP jirreferi għal firxa ta’ approċċi u strumenti ta’ tfassil tal-politika inklużi l-koerenza u l-integrazzjoni, il-finanzi u l-implimentazzjoni kif ukoll l-infurzar. Dawn huma vvalutati hawn taħt. Kontribuzzjoni: Is-Sitt EAP ikkumplimenta l-Istrateġija ta’ Lisbona[32] u l-Istrateġija tal-Iżvilupp Sostenibbli[33] u ffoka b’mod partikolari fuq l-integrazzjoni tal-kwistjonijiet ambjentali ta’ tħassib fl-oqsma kollha ta’ politika, l-aktar permezz tal-Istrateġiji Tematiċi. Enfasizza il-ħtieġa li jiġu razzjonalizzati l-infiq u l-finanzjament ambjentali fin-netwerk Natura 2000. Sittax fil-mija tal-baġit multiannwali tal-Unjoni għall-2007-2013[34], li jkopri t-tieni nofs tas-Sitt EAP, huwa nominalment allokat lill-appoġġ lil għanijiet ambjentali inkluż il-programm LIFE ddedikat lilhom[35]. Is-Sitt EAP inkoraġġixxa u ppromwova bis-saħħa l-prinċipji u l-istrumenti għal tfassil aħjar tal-politika, b’mod partikolari l-valutazzjonijiet tal-impatt u l-użu akbar ta’ strumenti msejsa fuq is-suq. Enfasizza wkoll l-importanza ta’ sisien xjentifiċi sodi għat-tfassil tal-politika. Kisbiet: Is-Sitt EAP immira għall-koerenza matul iċ-ċiklu tal-politika ambjentali tal-UE nnifisha, billi indirizza l-għanijiet, l-istrumenti, l-implimentazzjoni u r-riżultati anke jekk dawn tal-aħħar kienu diffiċli li jiġu mkejla. B’mod partikolari, l-Istrateġiji Tematiċi kkontribwew b’sinifikanti lill-koerenza fi ħdan l-oqsma prijoritarji tal-Programm, billi naqqsu defiċjenzi importanti bħall-ambjenti tal-baħar u dawk urbani, il-ħamrija u r-riżorsi, u billi jindirizzaw lakuni iżgħar u aktar speċifiċi fil-miżuri eżistenti pereżempju tal-arja, il-pestiċidi u l-prevenzjoni u r-riċiklaġġ tal-iskart. Fir-rigward tal-integrazzjoni, is-Sitt EAP għen sabiex jiggwida l-proċess li għaddej bħalissa tal-integrazzjoni ambjentali fir-riformi tal-KAP, il-PKS u l-Politika ta’ Koeżjoni. Ġew indirizzati wkoll l-azzjonijiet tal-forestrija li wasslu għat-tfassil tal-Green Paper dwar il-protezzjoni u l-informazzjoni dwar il-foresti tal-2010. Sabiex titjieb l-implimentazzjoni tal-leġiżlazzjoni ambjentali l-Kummissjoni wettqet sforzi li jvarjaw bejn enfasi akbar fuq il-prevenzjoni tal-ksur għal aktar attivitajiet strateġiċi ta’ infurzar, bħall-iffukar fuq ksur fundamentali jew sistemiku. Id-Direttiva dwar ir-Responsabbiltà Ambjentali tinkoraġġixxi l-forniment ta’ sigurtà finanzjarja biex tirrimedja għal ħsara ambjentali. Aktar finanzjament sostanzjali kien disponibbli mill-fondi tal-Politika ta’ Koeżjoni[36] għal investimenti differenti fl-ambjent bħal fl-enerġija sostenibbli, il-bijodiversità u l-protezzjoni tan-natura jew l-infrastruttura tal-iskart u l-ilma, kif ukoll finanzjament mill-fondi agrikoli għal prestazzjoni ambjentali aħjar. Is-Sitt u s-Seba’ Programm Kwadru[37] indirizzaw dejjem aktar l-iżvilupp sostenibbli u l-ambjent. Il-Programm LIFE, minkejja d-daqs limitat tiegħu, kellu impatt viżibbli fuq l-appoġġ għall-implimentazzjoni tas-Sitt EAP u wassal sabiex ikun hemm sforzi mmirati fl-appoġġ għall-politika ambjentali. Il-Programm ta’ Assistenza għall-Konformità Ambjentali [Environmental Compliance Assistance Programme (ECAP)] joffri għajnuna speċifika lill-impriżi żgħar u ta’ daqs medju. Fuq livell internazzjonali, il-Kummissjoni ddedikat fondi mill-istrument ta’ għajnuna għall-iżvilupp[38] għall-perjodu 2007-2013, u mill-programmi ta’ kooperazzjoni ġeografika. Sar ukoll xi progress, anke jekk limitat, fit-tneħħija tas-Sussidji ta' Ħsara Ambjentali matul ir-reviżjonijiet tal-PKS u fis-settur tat-trasport u, aktar reċentament, f’dak tal-faħam. Settijiet differenti ta’ indikaturi ġew żviluppati matul iż-żmien sabiex isaħħu l-bażi ta’ għarfien. Ir-Rapporti SOER ta’ kull ħames snin mill-EEA pprovdew analiżi essenzjali filwaqt li l-Analiżi Annwali tal-Politika Ambjentali tal-Kummissjoni[39] joffru wkoll informazzjoni regolari. Flimkien ma’ dan, l-implimentazzjoni ta’ INSPIRE[40] u l-iżviluppi ulterjuri tas-Sistema dwar l-Informazzjoni Ambjentali Kondiviża se jtejbu s-sistema ta’ informazzjoni ambjentali fis-snin li ġejjin. Nuqqasijiet: Minkejja li tqajjem fl-aħħar tal-ħames EAP, u minkejja li kien hemm xi progress, jeħtieġ li jsir aktar sabiex titjieb il-koerenza bejn l-aspetti kollha tal-politika tal-UE. L-isfruttament żejjed tal-ambjent tal-baħar u, b’mod partikolari, tas-sajd għadhom problema. It-trasport għadu jimponi piż ambjentali sinifikanti u l-pressjonijiet ambjentali mill-konsum u l-produzzjoni mhux sostenibbli qiegħdin dejjem aktar jikbru. L-Istati Membri jistgħu xorta jtejbu konsiderevolment ir-rekord ta' implimentazzjoni tagħhom. Is-Sitt EAP ipprovda prevedibbiltà fuq l-inizjattivi li ġejjin sabiex ikunu mħejjija aħjar l-Istati Membri u dawk involuti fl-implimentazzjoni tal-leġiżlazzjoni. Madankollu, dan jidher li mhux qed iseħħ: proċeduri ta' ksur ambjentali għadhom jammontaw għal madwar wieħed minn kull ħames każijiet miftuħa dwar nuqqas ta' komunikazzjoni, nuqqas ta' konformità jew applikazzjoni ħażina tal-leġiżlazzjoni tal-UE. L-implimentazzjoni kienet partikolarment problematika fl-oqsma tal-konservazzjoni tan-natura, tal-iskart u tal-ilma li jammontaw għal madwar żewġ terzi tal-każijiet ta' ksur ambentali tal-UE fl-2010. Id-dibattitu politiku dwar is-Sitt EAP b’kodeċiżjoni seħħ wara dak dwar il-qafas finanzjarju. Dan kien diġà stabbilixxa linji ġenerali tal-baġit prinċipali għall-ewwel nofs tal-programm sal-2006, li ma kinitx is-sitwazzjoni ideali. Għad irid jiġi vvalutat jekk issarrfux b’mod effettiv l-għajnuna għall-iżvilupp u l-fondi mill-programmi ta’ kooperazzjoni ġeografika fi programmi/proġetti ambjentali fil-pajjiżi benefiċjarji. Minkejja żviluppi pożittivi reċenti, l-informazzjoni ambjentali, b’mod partikolari, id-dejta uffiċjali u l-istatistika, għadhom mhumiex kompluti u mhux dejjem ikunu disponibbli fil-ħin. Miżuri biex jiġu eliminati gradwalment is-sussidji ta’ ħsara ambjentali għadhom ma laħqux il-livell mixtieq u għadu ma ġiex sfruttat il-potenzjal ta' tassazzjoni orjentata lejn il-promozzjoni aħjar tas-sostenibbilità. Filwaqt li ġew sfruttati strumenti msejsa fuq is-suq f'ċerti setturi, notevolment, permezz tas-sistema ta' negozjar tal-emissjonijiet tal-gassijiet serra, il-potenzjal sħiħ tagħhom għad irid jiġi sfruttat. Tagħlimiet miksuba: In-natura dejjem tinbidel tal-isfidi ambjentali teħtieġ koerenza aħjar mill-ifformular tal-politika sat-twettiq, inkluż f’livell tal-Istat Membru, kemm bejn l-oqsma prijoritarji, pereżempju t-tibdil fil-klima u l-politika tal-arja, kif ukoll f’setturi oħra importanti mil-lat ambjentali. Kompromessi impliċiti fl-iżvilupp tal-politika setgħu kienu aktar viżibbli, pereżempju l-effetti tal-produzzjoni tal-bijoenerġija jew l-impatti negattivi tal-idroenerġija rinovabbli fuq bosta korpi tal-ilma. Implimentazzjoni fqira tal-leġiżlazzjoni ambjentali timmina l-ilħiq tal-għanijiet u l-kredibbiltà tal-politika ambjentali, u ma tgħinx l-iżgurar tal-impenn ta’ setturi oħra lejn prestazzjoni aħjar. L-esperjenza tal-Kummissjoni tindika dgħufijiet fl-istruttura tal-governanza ambjentali madwar l-UE, u nuqqasijiet fid-dispożizzjonijiet relatati mal-informazzjoni fil-leġiżlazzjoni ambjentali u leġiżlazzjoni oħra tal-UE fir-rigward tal-monitoraġġ u l-ispezzjonijiet. L-immassimizzar tal-effikaċja tal-finanzjament minn programmi li l-għan ewlieni tagħhom mhuwiex il-protezzjoni ambjentali jesiġi skrutinju kostanti. Meta titqies il-pressjoni fuq il-baġits pubbliċi, il-possibbiltà li jiġi mobilizzat kapital mis-settur privat għandha tiġi indirizzata b’mod adegwat u suffiċjenti fl-ewwel stadji ta’ żvilupp tal-politika ambjentali tal-UE. Minbarra dan, dawk il-politiki b’valur miżjud ċar fil-ħolqien ta’ ekonomija ekoloġija u li jistgħu jitwettqu fuq medda ta’ żmien qasir/medju għandhom jiġu prijoritizzati, pereżempju l-Akkwist Pubbliku Ekoloġiku. Jeħtieġu wkoll passi ulterjuri lejn riforma tas-sussidji ta’ ħsara ambjentali. Bażi ta’ għarfien aktar estensiva hija meħtieġa flimkien ma' fehim aħjar tal-elementi ta’ xprunari u ostakli għat-titjib u l-implimentazzjoni tal-leġiżlazzjoni. Sforzi ta’ appoġġ lill-ekoinnovazzjoni fl-Ewropa għandhom jiġu rrinfurzati sabiex jiġu indirizzati ostakli għal assorbiment mis-suq ta’ riżultati promettenti. SFIDI GħALL-ġEJJIENI Il-pillastri ewlenin tal-politika u l-leġiżlazzjoni tal-ambjent, bl-eċċezzjoni ta' dawk dwar il-ħamrija, issa huma fis-seħħ, għalkemm il-potenzjal sħiħ tagħhom li jwasslu għal titjib għad irid jiġi materjalizzat minħabba nuqqasijiet fl- implimentazzjoni. Matul il-perjodu fis-seħħ tas-Sitt EAP inbidlet l-ordni ekonomika globali. Qed jitfaċċaw atturi ekonomiċi ġodda, u hekk kif tikber il-popolazzjoni globali, id-domanda dejjem akbar għar-riżorsi qed titfa' aktar pressjoni fuq l-ambjent. L-UE espandiet permezz tal-proċessi ta' tkabbir tagħha matul dan il-perjodu u b'hekk qed issir dejjem aktar dipendenti fuq ir-riżorsi importati[41]. Il-politika tradizzjonali dwar l-ambjent għad għandha rwol importanti fil-protezzjoni tal-ambjent. Madankollu, iċ-ċirkostanzi dejjem jinbidlu u n-natura dejjem aktar interkonnessa tal-isfidi ambjentali jimplikaw ħtieġa ta' fessibbiltà u adattament. L-isfida ewlenija bażika għall-politika ambjentali futura hija li tevolvi minn waħda li tirrimedja d-degradazzjoni għal waħda li tipprevjeniha, u li tintegra aktar l-ambjent fil-politika rilevanti kollha. F'dan il-kuntest, viżjoni aktar fit-tul tista' tipprovdi sens ta' żgurar għad-direzzjoni tal-politika filwaqt li ma tiġix kompromessa l-ħtieġa li jiġu riflessi ċirkostanzi dejjem jinbidlu tul is-snin. L-Istrateġija Ewropa 2020 tipprevedi trasformazzjoni għal ekonomija ekoloġika, effiċjenti fl-użu tar-riżorsi, kompetittiva u b'livelli baxxi ta' karbonju bħala mudell potenzjalment ġdid għat-tkabbir ekonomiku sostenibbli. Il-kisba ta' benefiċċji simili għall-produttività tar-riżorsi fid-deċennji futuri, kif diġa seħħ fil-passat għall-produttività tal-ħaddiema, se jnaqqsu d-dipendenza tal-UE fuq il-materja prima u r-riżorsi naturali. L-użu aktar sostenibbli tal-art se jnaqqas il-pressjonijiet fuq l-ekosistemi u s-servizzi pprovduti minnhom. Bl-istess mod, l-iżviluppi u l-innovazzjonijiet teknoloġiċi, u partikolarment l-ekodisinn, se jgħinu fl-indirizzar ta' dawn l-isfidi u jwasslu għal tkabbir aktar sostenibbli mill-passat. Fuq livell internazzjonali , l-UE għandha tippromwovi il-potenzjal tagħha bħala suq ta' madwar 500 miljun persuna b'standards ambjentali stretti u ħiliet u prodotti relatati. B'hekk tista' tippromwovi tkabbir ekoloġiku sostenibbli lil hinn mill-fruntieri tagħha, inkluż fil-benefiċjarji ta' għajnuna mill-UE, filwaqt li tkompli tirsisti għal governanza ambjentali globali aħjar. Dan x'aktarx se jeħtieġ bidla fil-mudelli applikabbli fil-governanza ambjentali internazzjonali favur deċżjonijiet b'bażi xjentika soda. Huma essenzjali l-integrazzjoni tal-konsiderazzjonijiet ambjentali u dawk marbuta mal-livelli baxxi ta' karbonju fil-mudelli kummerċjali f'setturi oħra kif ukoll l-iżgurar tal-koerenza mill-ifformular tal-politika sal-implimentazzjoni tagħha. Għandhom jiġu indirizzati l-ostakli għall-implimentazzjoni xierqa tal-leġiżlazzjoni eżistenti, b'mod partikolari, kwistjonijiet ta' governanza fil-livelli kollha fl-Istati Membri, sabiex jiġi protett l-ambjent u jiġu limitati l-konsegwenzi negattivi fuq is-saħħa pubblika. Il-pressjonijiet ambjentali huma dejjem aktar globali u sistemiċi fin-natura tagħhom. Minħabba l-interkonnessjonijiet kumplessi, neħtieġu bażi ta' għarfien aktar estensiva sabiex nifhmu aħjar l-elementi ta' xprunar u l-ostakli, niġġustifikaw l-ispiża tal-azzjoni jew tan-nuqqas tagħha, u niżviluppaw indikaturi affidabbli sabiex inkejlu l-progress lejn futur sostenibbli għall-UE. Għandu jiġi wkoll eżaminat bis-sħiħ il-potenzjal ta' bidla fl-imġiba tal- konsumaturi, kemm bħala individwi kif ukoll bħala gruppi, u, b'mod partikolari, fil-kommunitajiet urbani, sabiex jittaffu l-pressjonijiet fuq l-ambjent[42]. Għandu jitwessa' l-użu ta' strumenti msejsa fuq is-suq biex jiġu mmobilizzati xejriet ta' konsum aktar sostenibbli. Flimkien ma' dan, għandhom ikomplu l-isforzi biex jitneħħew sussidji ta' ħsara ambjentali. Fil-futur, fid-dawl tal-pressjonijiet fuq il-baġits pubbliċi, it-titjib ambjentali se jiddependi dejjem aktar fuq taħlita ta' finanzjament mis-settur pubbliku u dak privat. L-iffissar ta' għanijiet ambjentali u t-teħid ta' deċiżjoni, fl-istess waqt, dwar il-livell safejn dawn jistgħu jiġu ffinanzjati pubblikament jew privatament jistgħu jipprovdu grad ogħla ta' ċertezza dwar l-ilħiq tagħhom. Dan jimplika li l-ippjanar tal-politika ambjentali għandha tkun allinjata aħjar mal-oqfsa multiannwali ta' finanzjament, peress li dawn jistabbilixxu l-allokazzjonijiet finanzjarji ffinanzjati pubblikament fuq livell ta' UE u jiddeterminaw l-ħtiġijiet ta' kofinanzjament f'oqsma ta' politika oħrajn li fuq l-azzjonijiet tagħhom jiddependu dejjem aktar ir-riżultati ambjentali. KONKLUżJONIJIET Ir-riżultati ta' din il-valutazzjoni juru li, kollox ma' kollox, is-Sitt EAP għen sabiex jipprovdi qafas prinċipali għall-politika ambjentali għal deċennju, li matulu l-leġiżlazzjoni ambjentali ġiet ikkonsolidata u kkompletata b'tali mod li tkopri kważi l-oqsma ambjentali kollha, bl-eċċezzjoni tal-ħamrija. L-adozzjoni permezz tal-kodeċiżjoni tqieset mill-partijiet interessati bħalikieku ngħatat aktar leġittimità u għenet biex toħloq sens usa' ta sjieda għal proposti ta' politika sussegwenti. Iżda turi wkoll nuqqasijiet u limitazzjonijiet: b'mod partikolari, l-inklużjoni ta' kwistjoni fil-EAP mhija l-ebda garanzija li l-Istati Membri huma fil-verità impenjati lejn dawn l-għanijiet. Għalkemm is-Sitt EAP jinsab fl-aħħar sena tiegħu, il-Kummissjoni se tkompli tirsisti sabiex tikseb politika ambjentali, li issa hija parti integrali mill-Istrateġija Ewropa 2020, għal tkabbir intelliġenti, sostenibbli u inklussiv. Orjentazzjonijiet ta' politika ġew adottati fuq il-klima, it-trasport u l-bijodiversità. Oħrajn huma mistennija aktar tard din is-sena fir-rigward tal-effiċjenza fl-użu tar-riżorsi kif filwaqt li inizjattivi fl-oqsma tal-ilma, it-tniġġis tal-arja, il-leġiżlazzjoni dwar l-iskart u l-konsum u l-produzzjoni sostenibbli huma mistennija matul is-sena jew sentejn li ġejjin. F'dan l-isfond, il-Kummissjoni se tqis kif programm ta' azzjoni ġdid jista' jipprovdi bl-aħjar mod valur miżjud fil-kuntest għall-politika ambjentali li qed jevolvi b'mod rapidu. [1] ĠU L242/1 10.9.2002 [2] COM(2010)2020, 3.3.2010 [3] COM(2011) 363, 20.6.2011 [4] COM(2011)244, 3.5.2011 [5] COM(2011) 112, 8.3.2011 [6] COM(2011) 144, 28.3.2011. [7] COM (2010) 639 [8] COM(2011) 109, 8.3.2011 [9] COM(2008)397, 16.7.2008 [10] http://ec.europa.eu/environment/newprg/final.htm [11] http://www.eea.europa.eu/soer/ [12] COM(2005)446 (Tniġġis tal-Arja); COM(2006)372 (Użu Sostenibbli tal-Pestiċidi); COM(2005)666 (Prevenzjoni u Reċiklaġġ tal-Iskart); COM(2005)670 (Użu Sostenibbli tar-Riżorsi Naturali); COM(2006)231 (Ħarsien tal-Ħamrija); COM(2005)504 (Ħarsien u Konservazzjoni tal-Ambjent Marin); u COM(2005)718 (Ambjent Urban). [13] COM (2004) 487 [14] COM (97) 2000 [15] http://www.teebweb.org/ [16] http://biodiversity.europa.eu/topics/sebi-indicators [17] Direttiva tal-Kunsill 92/43/KEE, ĠU L 206 , 22.07.1992 [18] http://www.eea.europa.eu/publications/eu-2010-biodiversity-baseline/ [19] COM (2006) 232 [20] COM (2004) 416 [21] Iċ-Ċentru tad-Dejta ESTAT dwar ir-Riżorsi Naturali u l-Grupp Internazzjonali dwar ir-Riżorsi tal-UNEP [22] Id-Direttiva 2009/125/KE, ĠU L285/10, 31.10.2009 [23] Id-Direttiva 2002/95/KE, ĠU L37/19, 13.2.2003 [24] http://ec.europa.eu/environment/ipp/pdf/eipro_report.pdf [25] Id-Direttiva 2004/101/KE li temenda d-Direttiva 2003/87/KE, ĠU L 338, 13.11.2004, p. 18–23 [26] Id-Direttiva tal-Kunsill 91/676/KEE, GU L 375, 31/12/1991 u d-Direttiva tal-Kunsill 1999/31/KEE, ĠU L 182 , 16/07/1999 [27] Id-Direttiva 2009/31/KE, ĠU L140/114, 5.6.2009 [28] Id-Direttiva 2001/77KE ĠU L 283, 27.10.2001 [29] Konvenzjoni ta’ Rotterdam dwar il-Proċedura ta’ Kunsens Infurmat Minn Qabel [Prior Informed Consent (PIC)] għal ċerti kimiċi u pestiċidji perikolużi fil-kummerċ internazzjonali, Deċiżjoni tal-Kunsill dwar il-konklużjoni, ĠU L 063, 6.3.2003 [30] Konvenzjoni dwar il-Pollutanti Organiċi Persistenti (POPs), Deċiżjoni tal-Kunsill dwar il-konklużjoni, 14.10.2004 [31] Paragun bejn id-domanda tal-bniedem u l-kapaċita ekoloġika tad-Dinja li tirriġenera, pereżempju l-impronta tal-ilma tkejjel l-ammont totali tal-ilma użat biex jipproduċi l-oġġetti u s-servizzi kkunsmati. [32] COM (2005) 24 [33] COM (2005) 97 [34] COM (2004) 487 [35] ĠU L 149 9.6.2007 [36] Fil-perjodu ta' pprogrammar 2007-13, madwar terz (EUR 105 biljun) tal-fondi totali tal-Politika ta' Koeżjoni se jkun investit direttament jew indirettament fl-ambjent. [37] Id-Deċiżjonijiet 1513/2002/KE u 1982/2006/KE [38] CEC (2007) Strateġija Tematika għall-Ambjent u l-Ġestjoni Sostenibbli tar-Riżorsi Naturali (ENTRP) [39] COM (2009) 304 [40] ĠU L 108, 25.4.2007 [41] (b'żieda ta' aktar minn 30 % mill-1999 sal-2008, skont is-SOER tal-EEA 2010) [42] http://ec.europa.eu/consumers/behavioural_economics