[pic] | IL-KUMMISSJONI EWROPEA |

Brussel 25.11.2010

KUMM(2010) 692 finali

RAPPORT MILL-KUMMISSJONI LILL-PARLAMENT EWROPEW U LILL-KUNSILL

dwar l-applikazzjoni tar-Regolament tal-Kunsill (KE) Nru 3/2008 dwar azzjonijiet ta’ informazzjoni u promozzjoni għall-prodotti agrikoli fis-suq intern u fil-pajjiżi terzi

{SEG(2010) 1434 finali}

WERREJ

RAPPORT MILL-KUMMISSJONI LILL-PARLAMENT EWROPEW U LILL-KUNSILL dwar l-applikazzjoni tar-Regolament tal-Kunsill (KE) Nru 3/2008 dwar azzjonijiet ta’ informazzjoni u promozzjoni għall-prodotti agrikoli fis-suq intern u fil-pajjiżi terzi 1

I. Daħla 3

II. Implimentazzjoni tal-politika ta' promozzjoni 2006-2010 3

II.A Programmi ta' promozzjoni kofinanzjati 3

II.A.1 Tibdil introdott mir-Rapport 2006 3

II.A.2 Aspetti baġitarji: riżorsi u infiq tal-fondi disponibbli 4

II.A.3 Analiżi tal-programmi ta' promozzjoni 5

II.B Attivitajiet promozzjonali ġestiti direttament mid-DĠ AGRI 9

II.B.1 Missjonijiet ta' livell għoli 9

II.B.2 Kampanja promozzjonali għall-ikel organiku u l-biedja organika 9

II.B.3 Nefqa oħra taħt il-ġestjoni diretta 9

III. Evalwazzjoni 9

III.A Awditjar intern tad-DĠ Agrikoltura u Żvilupp Rurali u rapporti tal-Qorti tal-Awdituri 9

III.B Aspetti pożittivi u negattivi tal-iskema ta' promozzjoni kif rappurtat mill-Qorti tal-Awdituri 9

III.C Evalwazzjoni fuq il-livell ta' pajjiżi/żoni jew setturi ta' produzzjoni 9

III.D Evalwazzjoni fuq il-livell ta' programmi kofinanzjati 9

III.D.1 Elementi ta' valutazzjoni introdotti wara l-2006 9

III.D.2 L-ewwel valutazzjoni tal-impatt tal-programmi 9

III.E. Evalwazzjoni tal-attivitajiet taħt il-ġestjoni diretta tal-Kummissjoni 9

III.E.1 Missjonijiet ta' livell għoli: evalwazzjoni tal-impatti tagħhom 9

III.E.2 Valutazzjoni tal-kampanja promozzjonali tal-biedja organika 2006-2009 9

IV. Konklużjonijiet ġenerali 9

I. Daħla

L-iskema ta' promozzjoni, stabbilita fil-bidu tas-snin 2000, ila mill-bidu nett tagħha tkun immonitorjata regolarment permezz ta' rapporti ppreżentati mill-Kummissjoni lill-Kunsill u lill-Parlament Ewropew. Diġà ġew ippreżentati żewġ rapporti fl-2004 u l-2006. L-Artikolu 18 tar-Regolament tal-Kunsill (KE) Nru 3/2008 jirrikjedi li l-Kummissjoni tressaq it-tielet rapport sal-aħħar tal-2010[1].

Dan ir-rapport ikopri l-operat tal-iskema ta' promozzjoni bejn l-2006[2] u l-ewwel nofs tal-2010. Huwa primarjament jittratta t-titjib fl-immaniġġar u l-valutazzjoni tal-impatt kif ukoll l-aspetti ta' simplifikazzjoni (iż-żewġ regolamenti distinti li huma mmirati rispettivament għall-pajjiżi terzi u s-swieq interni li ngħaqdu f'wieħed). Ir-rapport jiffoka fuq id-Deċiżjonijiet kollha tal-Kummissjoni adottati mill-aħħar rapport u janalizza d-dejta disponibbli rigward il-promozzjoni ta' prodotti agrikoli.

II. Implimentazzjoni tal-politika ta' promozzjoni 2006-2010

L-iskema ta' promozzjoni tal-UE hija politika orizzontali li tkopri kważi s-setturi agrikoli kollha u tenfasizza l-karatteristiċi ġenerali u l-valur miżjud tal-PAK: kwalità, sikurezza, saħħa, tikkettar, metodi speċifiċi ta' produzzjoni, rispett għall-ambjent, benessri tal-annimali, eċċ. Hija tikkumplimenta inizjattivi nazzjonali li jappoġġjaw jew jistimulaw l-isforzi ta' promozzjoni privati u pubbliċi li jsiru fuq il-livell tal-Istati Membri.

II.A Programmi ta' promozzjoni kofinanzjati

II.A.1 Tibdil introdott mir-Rapport 2006

L-iskema ta' promozzjoni kienet imtejba fid-dawl tar-rakkomandazzjonijiet tal-aħħar rapport: il-konsolidazzjoni regolatorja rikjesta saret billi ngħaqdu ż-żewġ regolamenti eżistenti tal-Kunsill f'wieħed (Ir-Regolament (KE) Nru 3/2008 tal-Kunsill u ż-żewġ regolamenti tal-Kummissjoni f'ieħor (ir-Regolament (KE) Nru 501/2008 tal-Kummissjoni)[3]. L-arranġamenti li permezz tagħhom l-Istati Membri jiddikjaraw l-ispejjeż tagħhom tjiebu wkoll, b'tali mod li jippermettu l-monitoraġġ regolari tal-implimentazzjoni baġitarja. Ir-rakkomandazzjoni dwar l-entità ta' implimentazzjoni inżammet u anke tfasslu u ġew adottati linjigwida ċari u robusti għall-preparazzjoni tal-programmi ta' promozzjoni. Ħafna titjib ieħor inbeda mid-dipartimenti tal-Kummissjoni matul il-perjodu ta' rappurtar, f'konformità mar-rakkomandazzjonijiet tal-Qorti tal-Awdituri, kif jidher fil-punt IIIb hawn taħt. Dawn l-adattamenti kollha huma rrappurtati fl-Anness 1 għad-Dokument ta' Ħidma tal-Persunal tal-Kummissjoni li jakkumpanja dan ir-rapport.

II.A.2 Aspetti baġitarji: riżorsi u infiq tal-fondi disponibbli

Tabella 1: Approprjazzjonijiet baġitarji għall-promozzjoni ta' prodotti agrikoli

f’EUR |

Intestatura tal-baġit | 2006 | 2007 | 2008 | 2009 | 2010 |

Azzjonijiet ta' promozzjoni: |

05 02 10 01 Ġestjoni Kondiviża | 42 000 000 | 38 000 000 | 45 000 000 | 56 000 000 | 56 000 000 |

Azzjonijiet ta' promozzjoni: |

05 02 10 02 Ġestjoni diretta | 10 000 000 | 7 295 000 | 5 371 000 | 2 119 000 | 1 210 000 |

Promozzjoni Totali | 52 000 000 | 45 295 000 | 50 371 000 | 58 119 000 | 57 210 000 |

Mill-2007 'l quddiem, tista' tkun osservata żieda sinifikanti fl-approprjazzjonijiet allokati mill-awtorità baġitarja għal programmi ta' informazzjoni u promozzjoni għall-prodotti agrikoli. L-approprjazzjoni tal-baġit 2009, eċċezzjonalment għolja, ingħatat sabiex tkun ikkunsidrata n-nefqa akkumulata ogħla fuq il-programmi ta' promozzjoni multiannwali approvati fl-2007 u l-2008 ('piż tal-passat' ikbar ladarba f'dawk is-snin kien hemm baġit ogħla tal-programmi aċċettati). L-istess japplika għall-2010. Iż-żieda msemmija iktar 'il fuq tikkuntrasta mal-waqgħa fil-'ġestjoni diretta' tar-riżorsi baġitarji. Ir-raġunijiet ewlenin għal dan it-tnaqqis huwa n-nuqqas ta' kontribut volontarju għall-Kunsill Internazzjonali taż-Żebbuġ (International Olive Council (IOC)[4], it-tmiem tal-programm European Authentic Tastes (EAT – Togħmiet Ewropej Awtentiċi) li jippromwovi t-tikketti ta' kwalità tal-UE fl-Amerika ta' Fuq u ċ-Ċina u t-tmiem tal-kampanja ta' promozzjoni tal-biedja organika.

Tabella 2: Nefqa baġitarja għall-promozzjoni ta' prodotti agrikoli

f’EUR |

Intestatura tal-baġit | 2006 | 2007 | 2008 | 2009 | 2010 |

Azzjonijiet ta' promozzjoni: |

05 02 10 01 Ġestjoni Kondiviża | 34 163 896 | 47 873 132 | 49 431 246 | 46 514 165 | M.A. |

Azzjonijiet ta' promozzjoni: |

05 02 10 02 Ġestjoni diretta | 4 733 973 | 2 723 506 | 3 753 884 | 911 554 | M.A. |

Promozzjoni Totali | 38 897 869 | 50 596 638 | 53 185 130 | 47 425 719 | M.A. |

Rata ta' implimentazzjoni (nefqa bħala % tal-approprjazzjonijiet)[5] | 75 % | 112 % | 106 % | 82 % | M.A. |

Ix-xejra tar-rata tal-implimentazzjoni għandha tkun enfasizzata: ġestjoni soda tas-settur tal-promozzjoni għenet biex jitwaqqaf in-nuqqas ta' konsum li kien wieħed mill-fatturi ewlenin tas-settur sal-2006. Madankollu, is-sena baġitarja 2009 kienet affettwata minn avvenimenti eċċezzjonali u mhux mistennija. tliet programmi ta' promozzjoni li diġà kienu approvati mill-Kummissjoni fl-2008 ma kinux iffirmati u assoċjazzjoni intersettorjali involuta fil-kofinanzjament ta' diversi programmi ta' promozzjoni li kienu għaddejjin kellha twaqqaf l-attivitajiet tagħha fl-2009, minħabba deċiżjoni tal-Qorti Suprema Nazzjonali f'pajjiżha. Dawn l-avvenimenti wasslu għal tnaqqis mhux previst kemm fin-nefqa għal dik is-sena kif ukoll fir-rata ta' implimentazzjoni.

II.A.3 Analiżi tal-programmi ta' promozzjoni

- Programmi ta' promozzjoni aċċettati u rifjutati

Matul il-perjodu kopert minn dan ir-rapport, l-Istati Membri kollha ħadu sehem fl-isforzi ta' promozzjoni, fattur li wera interess ġenerali fl-iskema. B'kollox id-dipartimenti tal-Kummissjoni rċivew 430 proposta għal programm, b'baġit totali ta' EUR 505.6 miljun wara l-ewwel għażla mill-awtoritajiet nazzjonali; 183 minnhom kienu aċċettati għall-kofinanzjar mill-Komunità b'ammont totali ta' EUR 248.6 miljun. Minn dawn, 134 kienu jikkonċernaw is-suq intern u 49 kienu jimmiraw is-swieq ta' pajjiżi terzi.

Tabella 3: Programmi approvati u rifjutati minn Lulju 2006 sa Lulju 2010

[pic]

F'dak li jirrigwarda t-tul ta' żmien tal-programmi aċċettati, 150 minnhom (82 %), se jdumu 3 snin (ara l-Grafika 1) Kij jidher mill-Grafika 2, 20 % tal-programmi għandhom baġit ta' inqas minn EUR 1 miljun, 25 % bejn EUR 1 miljun u EUR 2 miljuni, 36 % bejn EUR 2 miljuni u EUR 4 miljun u 19 % iktar minn EUR 4 miljun.

[pic] | [pic] |

Kif jidher mit-Tabella 4 ta' hawn taħt, kważi l-prodotti kollha elenkati fl-Anness 1 għar-Regolament (KE) Nru 501/2008 ibbenefikaw minn dawn l-isforzi ta' promozzjoni. Il-prodotti magħmula mill-ħalib kienu l-ikbar benefiċjarji f'termini ta' programmi aċċettati (36), segwiti minn prodotti ta' kwalità (DPO, IĠP, organiċi u reġjuni mbiegħda: 32), frott u ħaxix, friski u pproċessati (30), prodotti tal-laħam, inkluż it-tjur (23), inbejjed u xarbiet alkoliċi (20), żejt taż-żebbuġa (8), eċċ.

Tabella 4

Programmi aċċettati (suq intern u pajjiżi terzi) skont is-settur u l-baġit

Prodotti | Baġit Totali (EUR miljuni) | Kofinanzjar tal-UE (EUR miljuni) | % | Għadd ta' programmi approvati |

Ċanga & laħam tal-majjal (ipproċessat jew le) | 9.3 | 4.6 | 1.86 % | 5 |

Kittien tal-fibra | 3.3 | 1.7 | 0.67 % | 1 |

Frott u ħaxix friski | 89.0 | 44.6 | 17.93 % | 24 |

Għasel u prodotti tal-apikultura | 4.3 | 2.1 | 0.86 % | 8 |

Tikkettar tal-bajd | 1.0 | 0.5 | 0.20 % | 1 |

Ħalib u prodotti tal-ħalib | 116.4 | 56.6 | 22.76 % | 36 |

Prodotti varji | 34.3 | 17.2 | 6.90 % | 14 |

Żejt taż-żebbuġa u żebbuġ tal-ikel | 34.2 | 15.5 | 6.22 % | 8 |

Biedja organika u prodotti organiċi | 35.7 | 17.9 | 7.18 % | 15 |

Ortikultura ornamentali | 14.9 | 7.4 | 2.99 % | 9 |

Ir-reġjuni l-aktar imbiegħda | 16.1 | 7.5 | 3.03 % | 2 |

DPO, IĠP u STG | 39.4 | 19.7 | 7.93 % | 15 |

Laħam tat-tjur | 13.3 | 6.6 | 2.67 % | 6 |

Frott u ħaxix ipproċessat. | 16.9 | 8.4 | 3.39 % | 6 |

Laħam ta' kwalità | 30.2 | 15.1 | 6.08 % | 11 |

Laħam tat-tjur ta' kwalità | 1.7 | 0.8 | 0.34 % | 1 |

Żjut taż-żrieragħ | 1.3 | 0.6 | 0.26 % | 1 |

Xarbiet alkoħoliċi | 4.2 | 2.1 | 0.84 % | 2 |

Inbejjed | 39.1 | 19.6 | 7.87 % | 18 |

Total | 504.6 | 248.6 | 100.00 % | 183 |

Ir-raġunijiet ewlenin għar-rifjut matul il-perjodu ta' referenza kienu: l-azzjonijiet ma kinux deskritti f'dettall biżżejjed li jagħti lid-dipartimenti tal-Kummissjoni stampa ċara tal-programm; il-baġit ma kienx iddettaljat biżżejjed tant li jippermetti l-valutazzjoni tal-valur għall-flus tal-programm, kif rikjest mir-Regolament tal-Kunsill (KE) Nru 3/2008, Artikolu 7(2); ir-raġunijiet għall-proposta tal-programm ma ngħatawx; l-elementi li jagħtu prova li l-entità ta' implimentazzjoni kienet magħżula sew kienu nieqsa. Fis-snin iktar riċenti, raġuni sinifikanti oħra għar-rifjut kien in-nuqqas ta' objettivi SMART[6], jew ta' metodi li għandhom jintużaw għall-evalwazzjoni u l-valutazzjoni tal-impatt tal-programm.

- Programmi ta' pajjiżi terzi

Minkejja l-impenn iddikjarat tal-Kummissjoni li żżid il-promozzjoni f'pajjiżi terzi, matul il-perjodu ta' referenza, dawn il-programmi kienu jammontaw biss għal 27 % tal-programmi proposti kollha (49/183). Huma rċivew 23 % tal-fondi Komunitarji allokati għall-programmi ta' promozzjoni aċċettati (EUR 57.6 miljun/EUR 250.5 miljun).

Is-setturi benefiċjarji ewlenin kienu l-frott u l-ħaxix frisk u pproċessat, l-inbejjed, u l-prodotti ta' kwalità u tal-ħalib. L-Amerika ta' Fuq (21), ir-Russja (20), iċ-Ċina (13) u l-Ġappun (11) kienu s-setturi ta' mira ewlenin f'termini tal-għadd ta' programmi aċċettati.

[pic]

- Programmi promozzjonali tas-suq intern

Mill-2006 sal-2010, l-għadd ta' programmi aċċettati għas-suq intern fil-fluss annwali (minbarra l-programmi tal-kriżi tal-ħalib aċċettati fl-2009) naqas b'mod sinifikanti (ara t-Tabella 3). Dan minħabba li d-dipartimenti tal-Kummissjoni applikaw kriterji iktar stretti matul l-evalwazzjoni ta' selezzjoni tagħhom. Madankollu, kif jidher fit-Tabella 3, kien hemm żieda fil-kontribuzzjoni tal-Komunità speċjalment bejn l-2006 u l-2009, meta żdiedet b'50.1 %, minn EUR 30.4 miljun għal EUR 45.8 miljun. Iċ-ċifri jinkludu programmi li jippromwovu b'mod speċifiku l-laħam tat-tjur (programm wieħed (1)) u l-prodotti tal-ħalib (13-il programm),adottati minn żewġ deċiżjonijiet ad hoc tal-Kummissjoni, sabiex ikunu affaċjati impatti ta' kriżi f'dawk is-setturi. Ix-xejra hija prinċiparjament minħabba l-fatt li programmi kumplessivi li jippromwovu iktar minn prodott wieħed kienu aċċettati, jew li iktar minn organizzazzjoni waħda minn Stat Membru wieħed jew iktar ingħaqdu biex jipproponu programm wieħed.

[pic]Il-benefiċjarji ewlenin f'termini ta' programmi huma mill-IT (17), FR (11), NL (10) u DE (9) F'termini ta' prodotti, il-benefiċjarji ewlenin kienu l-prodotti tal-ħalib (EUR 48.3 miljun), il-frott u l-ħaxix frisk jew ipproċessat (EUR 45 miljun), il-prodotti ta' kwalità inklużi l-prodotti organiċi u b'logos ta' reġjuni mbiegħda (EUR 35.8 miljun).

II.B Attivitajiet promozzjonali ġestiti direttament mid-DĠ AGRI

II.B.1 Missjonijiet ta' livell għoli

Fil-qafas stabbilit mill-Artikolu 2(3) tar-Regolament tal-Kunsill (KE) Nru 3/2008, il-missjonijiet ta' livell għoli jew l-avvenimenti promozzjonali kienu organizzati kif ġej mill-2007 sal-2010:

- Missjoni kummerċjali ta' livell għoli għall-Indja (6-10 ta' Marzu 2007)

- Avveniment promozzjonali fiċ-Ċina (14 sas-16 ta' Mejju 2008)

- Avveniment promozzjonali f'Cape Town, l-Afrika t'Isfel (8 – 10 ta' Settembru 2008)

- Missjoni kummerċjali ta' livell għoli għaċ-Ċina (18-22 ta' Mejju 2009)

- Avveniment promozzjonali f'Hong Kong (4-6 ta' Mejju 2009).

Dawn iż-żjarat offrew l-opportunità li titwettaq aġenda mimlija ħafna ta' attivitajiet inklużi seminars, laqgħat mal-istampa, parteċipazzjoni fil-fieri kummerċjali, laqgħat 'business to business' (minn negozju għal negozju) u avvenimenti fi kmamar tal-kummerċ lokali. F'kull każ, kienu appoġġati minn sforzi sistematiċi ta' relazzjonijiet pubbliċi kemm waqt kif ukoll wara l-missjoni. Matul il-perjodu ta' rappurtar, l-approprjazzjoni baġitarja għal missjonijiet ta' livell għoli kien ta' EUR 1 miljun kull sena. Għall-2010 f'Moska qed jiġi ppjanat avveniment promozzjonali ta' livell għoli bħala parti mill-Fiera Dinjija tal-Ikel (14-17 ta' Settembru 2010).

II.B.2 Kampanja promozzjonali għall-ikel organiku u l-biedja organika

Ix-xogħol fuq din il-kampanja beda fl-2006 skont il-qafas stabbilit mir-Regolament tal-Kunsill (KE) Nru 2826/2000 (iktar tard revokat bir-Regolament tal-Kunsill (KE) Nru 3/2008) biex isegwi l-Azzjoni 1 tal-Pjan ta' Azzjoni Ewropew għall-ikel organiku u l-biedja organika. B'baġit massimu ta' EUR 3 miljuni għal 3 snin u li jkopri lis-27 Stati Membri kollha, il-kampanja kienet maħsuba biex tikkumplimenta attivitajiet promozzjonali nazzjonali. Hija kienet varata fil-25 ta’ Lulju 2008.

II.B.3 Nefqa oħra taħt il-ġestjoni diretta

- Esperti esterni għall-għażla ta' programmi promozzjonali

- Studji ta' evalwazzjoni

Deskrizzjoni ddettaljata tal-attivitajiet kollha taħt il-ġestjoni diretta mid-DĠ AGRI hija moħtija fl-Anness 2 għad-Dokument ta' Ħidma tal-Kummissjoni li jakkumpnaja dan ir-rapport.

III. Evalwazzjoni

III.A Awditjar intern tad-DĠ Agrikoltura u Żvilupp Rurali u rapporti tal-Qorti tal-Awdituri

Fl-2009, il-promozzjoni tal-iskema ta' prodotti agrikoli kienet il-fokus ta' żewġ rapporti ta' awditjar wieħed mill-Qorti tal-Awdituri u l-ieħor mill-unità tal-Awditjar Intern tad-DĠ AGRI.

Ir-rapport ta' awditjar intern tad-DĠ AGRI bid-data tat-13 ta' Mejju 2009 fost l-oħrajn innota li 's-sistemi stabiliti .... jikkonformaw mar-regoli u l-proċeduri applikabbli b'mod sodisfaċenti' u li 'mill-2005, kien hemm żieda kostanti fil-kwalità tal-proċedura tal-għażla'.

Fir-rapport Speċjali tagħha Nru 10/09 ippubblikat fit-8 ta' Lulju 2009, il-Qorti tal-Awdituri evalwat l-impatt ta' diversi programmi u sabet li fil-'biċċa l-kbira tal-każijiet, is-sommarji tax-xogħol imwettaq kienu ddettaljati biżżejjed u żguraw li l-flus li ntefqu u l-miżuri mwettqa kienu konsistenti mal-għan tal-promozzjoni'. Barra minn hekk, fir-rigward tal-monitoraġġ tan-nefqa, il-Qorti sabet li l-Kummissjoni kienet ila mis-sentejn ta' qabel tintroduċi jew isaħħaħ il-proċeduri u l-għodod għall-monitoraġġ tal-programmi tal-Istati Membri u l-pretensjonijiet tal-pagamenti.

Madankollu, iż-żewġ rapporti innutaw li l-effikaċja, l-effiċjenza u l-impatt ambjentali jistagħu jitjiebu b'mod ulterjuri. Kien enfasizzat ukoll li l-Kummissjoni kellha bżonn ittejjeb iktar diversi aspetti tal-iskema promozzjonali.

Il-Qorti tal-Awdituri stiednet ukoll lill-Istati Membri biex jikkontribwixxu għat-titjib tal-proċedura tal-għażla billi jivverifikaw ir-rilevanza tal-proposti u jżidu s-selettività Ħeġġet ukoll lill-Istati Membri biex jikkomunikaw informazzjoni dwar miżuri promozzjonali nazzjonali u reġjonali eżistenti lill-Kummissjoni. Barra minn hekk, l-Istati Membri kienu inkoraġġiti jtejbu l-proċeduri ta' akkwist pubbliku użati għall-għażla tal-entitajiet ta' implimentazzjoni, billi jevitaw b'mod partikolari skadenzi stretti u billi japplikaw proċeduri formali b'mod iktar sistematiku, kif ukoll billi jiżguraw lill-organizzazzjonijiet li jressqu l-proposti biex jikkonformaw mal-kriterji tal-għażla.

III.B Aspetti pożittivi u negattivi tal-iskema ta' promozzjoni kif rappurtat mill-Qorti tal-Awdituri

F'dan ir-rapport, il-Qorti tal-Awdituri tistabbilixxi l-konklużjonijiet u r-rakkomandazzjonijiet li ġejjin li jenfasizzaw il-punti ta' saħħa u d-dgħufijiet ewlenin tal-iskema ta' promozzjoni kif kienet qed topera għall-inqas fil-perjodu kopert mir-rapport:

- Il-Kummissjoni ila għal xi snin ittejjeb l-arranġamenti ta' ġestjoni u ta' kontrol tan-nefqa konnessa mal-provvediment ta' informazzjoni u l-miżuri ta' promozzjoni għall-prodotti agrikoli. Titjib bħal dan jeħtieġ li jkun ikkonsolidat u mwessa' iktar.

- Is-sistema stabbilita ma tippermettix il-kejl tal-effettività ta' din il-politika. L-impatt tal-politika, għalkemm probabbli huwa wieħed pożittiv, bħalissa huwa diffiċli biex ikun ikkwantifikat. L-għanijiet tal-politika jeħtieġ li jkunu speċifikati u għandhom jiġu stabbiliti indikaturi tal-prestazzjoni li jixirqu, fil-waqt li fl-istess ħin ikun żgurat li l-ambizzjonijiet dikjarati u l-baġits impenjati ikunu konsistenti mod reċiproku.

- Għandha tkun introdotta proċedura formali għall-konsultazzjoni mal-partijiet interessati ewlenin kollha sabiex tgħin tkun stabbilita strateġija kumplessiva u biex tkun żgurata l-kumplimentarjetà mad-diversi miżuri ta' promozzjoni li diġà jeżistu. Wara din ir-rakkomandazzjoni, fit-28 ta' Settembru 2009, twaqqaf Grupp Speċjali mill-Kumitat Konsultattiv dwar il-Promozzjoni.

- Il-Kummissjoni kienet iktar selettiva fl-approvazzjoni ta' programmi li għandhom ikunu kofinanzjati. Dan it-titjib għandu jitkompla, speċjalment fir-rigward tar-rekwiżit għal informazzjoni dwar l-impatt mistenni tal-programm u l-mod li bih se jkun imkejjel. L-Istati Membri għandhom ukoll ikomplu jżidu s-selettività tagħhom.

- Fir-rigward tal-programmi ta' implimentazzjoni u r-regolarità tan-nefqa, l-isforzi għandhom primarjament ikunu ffukati fuq il-kontrolli li għadhom wisq limitati magħmula fuq is-selezzjoni tal-entitajiet ta' implimentazzjoni li għandhom rwol ewlieni. Il-monitoraġġ sussegwenti tan-nefqa mill-Kummissjoni żdied iżda dgħufijiet sinifikanti tal-kontroll jippersistu f'ċertu Stati Membri. Dawn id-dgħufijiet għandhom ikunu segwiti sabiex ikun żgurat titjib mgħaġġel ta' dawn in-nuqqasijiet.

III.C Evalwazzjoni fuq il-livell ta' pajjiżi/żoni jew setturi ta' produzzjoni

L-evalwazzjonijiet tal-informazzjoni kofinanzjata tal-UE u tal-programmi promozzjonali msemmija taħt il-punt II.B.3 twettqu bejn l-2006 u l-2008 minn konsulenti esterni taħt kuntratti ta' qafas.

Erbgħa minnhom jikkonċernaw is-suq intern:

- Is-suq organiku (Novembru 2006)

- Is-settur tal-inbid (April 2007)

- Frott u ħaxix (Novembru 2007)

- Prodotti tal-ħalib (Settembru 2008).

Erbgħa oħra kienu jikkonċernaw setturi ta' prodotti differenti fl-oqsma/pajjiżi terzi :

- L-Istati Uniti u l-Kanada (Novembru 2006)

- L-Isvizzera u n-Norveġja (Mejju 2007)

- Ir-Russja u l-Ġappun (Novembru 2007)

- L-Indja, iċ-Ċina u x-Xlokk tal-Asja (Diċembru 2008).

Kull evalwazzjoni ffukat fuq il-valutazzjoni tal-koerenza, l-effikaċja, l-effiċjenza, l-impatt u l-kumplimentarjetà ta' informazzjoni kofinanzjata mill-UE u programmi ta' promozzjoni implimentati mill-2002.

Barra minn hekk, kull evalwazzjoni kienet ibbażata fuq kampjun ta' programmi meħud minn Stati Membri differenti tal-UE u f'kull każ kienet tammonta għal iktar min-nofs tal-fondi impenjati għal kull settur. Ittieħdet informazzjoni minn sorsi differenti, b'mod partikolari minn dokumentazzjoni u statistika disponibbli, intervisti u sessjonijiet ta' ħidma mal-partijiet ikkonċernati u stħarriġiet estensivi mit-tim.

Ir-rakkomandazzjonijiet ewlenin għas-suq intern kienu:

- Il-programmi għandhom ikunu bbażati fuq analiżi kemm tas-swieq kumplessivi kif ukoll tas-swieq immirati, b'kunsiderazzjoni għad-daqs tagħhom u inkluża definizzjoni ċara ta' ġerarkija ta' għanijiet kwantifikati għall-informazzjoni proposta u/jew kampanja ta' promozzjoni.

- L-impatt intenzjonat fuq id-domanda għandu jkun determinat, kemm globalment kif ukoll minn grupp ta' konsumaturi, skont karatteristiċi speċifiċi tas-suq u riżorsi disponibbli kif ukoll metodoloġija għall-valutazzjoni tiegħu matul l-implimentazzjoni u wara t-tlestija skont l-iktar linjigwida avvanzati.

- Ir-rwoli rispettivi tal-Kummissjoni u l-Istati Membri għandhom ikunu kjarifikati iktar. Il-proċeduri għall-approvazzjoni finali jew ir-rifjut tal-programmi mill-Kummissjoni għandhom ikunu spjegati aħjar kemm lill-awtoritajiet kompetenti tal-Istati Membri kif ukoll lill-organizzazzjonijiet potenzjali li jressqu proposti.

- Il-prattika tas-sejħa għall-offerti (sejħiet għal proposti) fl-interess tal-aħjar proporzjonijiet komparabbli ta' kostijiet vs benefiċċji abbażi ta' standards tas-suq nazzjonali, għandha titkompla

- Evalwazzjonijiet ex-post u għal perjodu ta' żmien medju għandhom ikunu obbligatorji għal programmi u kampanji kbar u l-provvediment għal evalwazzjonijiet għandu jkun inkluż fil-baġits ta' dawn il-programmi.

- Għandhom ikunu provduti iktar inċentivi għal sinerġiji u kumplimentarjetà: bejn programmi kofinanzjati ta' Stati Membri differenti u bejn programmi kofinanzjati bejn l-UE u s-settur privat.

Ir-rakkomandazzjonijiet ewlenin għall-pajjiżi terzi huma:

- L-objettivi kumplessivi tal-miżuri ta' promozzjoni tal-UE għandhom jiffukaw fuq il-fakultà għall-produtturi Ewropej u l-organizzazzjonijiet kummerċjali li jesportaw lejn pajjiżi terzi.

- Il-miżura tal-UE għandha tikkontribwixxi iktar għas-sinerġija bejn il-produtturi u l-programmi.

- Għandhom isiru xi provvedimenti speċifiċi biex ikunu appoġġati produtturi ġodda.

- It-tfassil tal-programm u l-attivitajiet promozzjonali għandhom jikkunsidraw aħjar l-ispeċifiċitajiet tas-swieq emerġenti u/jew imbiegħda.

- Il-qafas ġenerali tal-miżuri tal-UE għandu jitjieb sabiex ikunu solvuti l-ambigwitajiet dwar ir-riferiment għall-oriġini ġeografika u d-ditti.

- Ir-rekwiżiti amministrattivi għandhom ikunu aġġustati għal-limitazzjonijiet tal-programmi.

III.D Evalwazzjoni fuq il-livell ta' programmi kofinanzjati

III.D.1 Elementi ta' valutazzjoni introdotti wara l-2006

Fl-ewwel snin tal-implimentazzjoni ta' din l-iskema, il-programmi promozzjonali kofinanzjati kienu meqjusa bħala li għamlu suċċess sempliċiment jekk ikunu ġew implimentati kif pjanat fil-proposta oriġinali. ma kienet mitluba l-ebda valutazzjoni formali u konsegwentement, ma kinux eliġibbli kosti tal-valutazzjoni (jekk issir xi evalwazzjoni).

Ittieħdu diversi passi biex tkun indirizzata din is-sitwazzjoni:

- Dokument li jistabbilixxi linjigwida għall-programmi ta' evalwazzjoni kien imqassam lill-awtoritajiet nazzjonali f'Ottubru 2007, għall-attenzjoni tal-organizzazzjonijiet li jressqu proposti. Dan id-dokument ikkunsidra r-rakkomandazzjonijiet kollha kemm tas-settur tal-awditu kif ukoll tal-konsulenti. Iktar tard reġa' ġie abbozzat u l-parti dwar il-provvedimenti ta' valutazzjoni issa hija inkluża fin-'Nota ta' Sjegazzjoni għal programmi ta' promozzjoni parzjalment finanzjati mill-UE mehmuża mal-formola ta' applikazzjoni. It-tieni parti dwar il-valutazzjoni nfisha ġiet mehmuża mal-'Manwal għall-proċeduri għall-analiżi u l-adozzjoni ta' programmi proposti għall-promozzjoni ta' prodotti agrikoli'.

Il-kuntratt mudell għad-dispożizzjoni tal-awtoritajiet nazzjonali kien emendat sabiex jippermetti r-riżultati tal-programmi li għandhom ikunu evalwati bl-għajnuna ta' entità esterna. Barra minn hekk, il-baġit allokat għall-evalwazzjoni tal-programm żdied minn 3 għal 5 % (għall-evalwazzjoni finali tiegħu) u kwalunkwe baġit tal-ispejjeż ġenerali li ma ntużax jista' jiżdied ukoll mal-iffinanzjar supplimentari għal din l-evalwazzjoni

III.D.2 L-ewwel valutazzjoni tal-impatt tal-programmi

Mill-2008, valutazzjoni tal-impatt tal-programmi issir meta l-programmi jiġu fi tmiemhom u l-valutazzjoni hija inkluża fir-rapporti finali analizzati mill-amministraturi tal-programm. Il-valutazzjoni tuża indikaturi bħar-rata tal-implimentazzjoni baġitarja jew il-konformità tal-programm implimentat ma' dak propost. Il-miżuri inklużi fil-programmi qed ikunu dejjem iktar ta' suċċess. Sa issa r-rapporti kienu ħafna drabi abbozzati mill-istess organizzazzjonijiet li jressqu proposti. Mill-2010 'il quddiem l-evalwazzjonijiet se jibdew isiru minn entitajiet ta' valutazzjoni indipendenti.

Indikatur tajjeb tal-kwalità tal-għodod ta' promozzjoni żviluppati matul l-implimentazzjoni tal-programmi ta' promozzjoni u tal-impatt pożittiv tagħhom, huwa l-fatt li, wara li ħafna programmi jitlestew, l-organizzazzjoni li tressaq proposta tintroduċi talba biex tkun awtorizzata tipproduċi kwantitajiet addizzjonali ta' dawn l-għodod għal użu ulterjuri bi spejjeż għaliha.

III.E. Evalwazzjoni tal-attivitajiet taħt il-ġestjoni diretta tal-Kummissjoni

III.E.1 Missjonijiet ta' livell għoli: evalwazzjoni tal-impatti tagħhom

Missjoni kummerċjali ta' livell għoli fl-Indja (Marzu 2007)

Il-missjoni qdiet ir-rwol 'pijunier' tagħha billi fetħet il-bibien tas-suq relattivament ġdid Indjan għall-esportaturi Ewropej filwaqt li spjegat il-messaġġ tal-kwalità u d-diversità tal-prodotti Ewropej. Iż-żjara kienet milqugħa tajjeb ħafna mill-midja Indjana (kisba ta' prominenza fuq il-mezzi tax-xandir ta' EUR 1.25 miljun. Id-dimensjoni Ewropea kienet partikolarment innutata. Iż-żjara kellha rwol kruċjali fit-tnaqqis mill-Indja tad-dazji eżorbitanti tal-importazzjoni fuq l-alkoħol.

Kampanja promozzjonali fiċ-Ċina (Mejju 2008)

Il-prominenza fuq il-mezzi tax-xandir iġġenerata mill-missjoni kienet stmata ekwivalenti għal EUR 450 000 b'kopertura ta' 25 000 000 persuna. Diversi eluf ta' viżitaturi żaru l-istand tal-UE, li kien jinsab fiċ-ċentru tal-paviljuni Ewropej l-oħra. 967 viżitatur ħallew il- business cards tagħhom u mtlew 1 127 kwestjonarju.

Avveniment promozzjonali f'Cape Town, l-Afrika t'Isfel (Settembru 2008)

L-avveniment primarjament kien jikkonsisti f'attività tar-relazzjonijiet pubbliċi indirizzata kemm lejn uffiċjali tal-Afrika t'Isfel kif ukoll lejn esportaturi Ewropej biex jintwera l-appoġġ tal-UE għall-isforzi tagħhom biex jaħkmu swieq dinjija ġodda.

Missjoni kummerċjali ta' livell għoli għaċ-Ċina (Mejju 2009)

Żjara tad-delegazzjoni Ewropea intlaqgħet tajjeb ħafna mill-midja u ġġenerat prominenza fuq il-mezzi tax-xandir stmata ekwivalenti għal EUR 1 500 000 għal kopertura ta' 49 600 000 persuna. Diversi eluf ta' viżitaturi żaru l-istand tal-UE, li bħas-sena ta' qabel, kien jinsab fiċ-ċentru tal-paviljuni Ewropej l-oħra.

Avveniment promozzjonali f'Ħong Kong (Mejju 2009).

Kien hemm 50 parteċipant f'dan is-seminar u 200 fil-festival. Madwar 8 000 persuna żaret l-istand. L-avveniment iġġenera 7 artikoli għall-istampa għal valur stmat ta' EUR 6 656 b'ċirkulazzjoni ta' 260 000.

III.E.2 Valutazzjoni tal-kampanja promozzjonali tal-biedja organika 2006-2009

Ir-riżultati tal-kampanja promozzjonali tal-ikel organiku l-biedja organika kienu pożittivi ħafna. B'baġit limitat, speċjalment meta mqabbel ma' xi kampanji nazzjonali jew privati ikbar, għodod tal-kummerċjalizzazzjoni u l-informazzjoni sempliċi u effikaċi kienu offruti lill-għadd ta' gruppi mmirati differenti. Inħolqu u ġew tradotti wkoll iktar minn 150 paġna ta' test li jipprovdi informazzjoni dwar dan is-settur u li jippromwovih lill-diversi gruppi mmirati.

L-evalwazzjoni turi li l-għodod huma aċċettati u użati minn gruppi mmirati, speċjalment f'pajjiżi fejn is-settur huwa inqas żviluppat u hemm inqas inizjattivi fuq livell nazzjonali. Programmi kofinanzjati għall-promozzjoni ta' prodotti organiċi jagħmlu użu minn dan il-materjal ġdid żviluppat matul il-kampanja. Dan jippermetti li dawk il-programmi jitħaddmu b'baġit iżgħar milli kieku kien ikun possibbli, minħabba li ma għandhomx jiffinanzjaw l-iżvilupp ta' materjal promozzjonali ieħor li għalih diġà jeżisti ekwivalenti.

Id-dejta statistika dwar it-traffiku fuq is-sit tal-internet hija wkoll inkoraġġanti ħafna. Is-sit tal-internet diġà huwa l-iktar sit li żaruh persuni mis-subsiti kollha tad-DĠ AGRI fuq Europa, b'medja ta' 70-80 000 żjara kull xahar u 15 000-30 000 tniżżil ta' materjal. Għall-2008, fl-ewwel ħames xhur wara l-varar tal-kampanja, kienu rreġistrati 186 991 żjara lis-sit tal-internet u dan kien meqjus bħala suċċess. Matul l-2009 kollha, is-sit tal-internet irċieva 1 070 000 żjara (din iċ-ċifra tirrappreżenta 63 % taż-żjarat totali lis-sit tal-internet kollu tad-DĠ AGRI). Bi klassifikazzjoni għolja fuq is-siti tat-tiftix, is-sit tal-internet sar punt ta' referenza għal dawk kollha li jfittxu informazzjoni dwar ikel organiku u biedja organika.

IV. Konklużjonijiet ġenerali

Matul il-perjodu 2006-2010 saru diversi emendi għall-iskema tal-UE dwar il-programmi kofinanzjati għall-promozzjoni ta' prodotti agrikoli:

-Simplifikazzjoni: iż-żewġ regolamenti tal-Kunsill ingħaqdu f'wieħed u ż-żewġ regolamenti tal-Kummissjoni ingħaqdu f'wieħed.

Il-proċedura tal-għażla għall-programmi l-ġodda fil-livell tal-Kummissjoni tjiebet permezz tal-adozzjoni tal-linjigwida u l-introduzzjoni tal-metodi kwantitattivi ta' evalwazzjoni (evaluation grid) u l-kostijiet ta' referenza għall-azzjonijiet varji inklużi fil-programmi.

- Sar titjib fil-valutazzjoni tal-impatt ta' programmi matul u fl-aħħar tal-implimentazzjoni tagħhom.

- Ġestjoni soda: il-ġestjoni tal-programmi kienet konsegwentement imtejba. Ir-rata ta' implimentazzjoni (nefqa/approprjazzjonijiet) tas-settur żdiedet b'mod sinifikanti, sa kważi 100%.

- Fl-aħħar iżda mhux l-inqas, matul il-perjodu ta' rappurtar, l-iskema ta' promozzjoni kienet intużata biex taffaċċja l-konsegwenzi tal-kriżi f'żewġ każijiet: l-influwenza avjarja (2007) u l-kriżi fis-settur tal-ħalib (2008).

Awditjar riċenti mill-Qorti tal-Awdituri u mill-unità tal-awditjar intern tad-DĠ għall-Agrikoltura u l-Iżvilupp Rurali ikkonfermaw dan it-titjib. Madankollu, għad fadal isir titjib ieħor:

- Il-kwalità tal-programmi mibgħuta lid-dipartimenti tal-Kummissjoni jeħtieġ li tkun imtejba iktar. Il-linji gwida diġà adottati u aġġornati ċertament se jgħinu f'dan ir-rigward.

- L-għażla, il-monitoraġġ u l-awditjar ta' programmi mill-awtoritajiet kompetenti tal-Istati Membri għandhom ukoll jitjiebu b'mod ulterjuri. Għandha tingħata iktar attenzjoni lill-proċeduri ta' sejħiet għall-offerti applikati għall-għażla tal-entitajiet ta' implimentazzjoni. F'dan il-kuntest, kemm l-Artikolu 9(2)(e) kif ukoll l-Artikolu 12(2) jenfasizzaw il-kapaċitajiet tekniċi u finanzjarji li għandhom dawn l-entitajiet sabiex jiżguraw li l-azzjonijiet ta' promozzjoni huma implimentati bl-iktar mod effiċjenti possibbli.

-Il-proċedura stabbilita bħalissa li tapprova l-programmi kofinanzjati hija pjuttost waħda kkumplikata. Il-programmi huma evalwati darbtejn: fuq il-livell tal-Istat Membru u wara fuq il-livell tal-UE. Il-proċedura ta' selezzjoni kollha ddum seba' xhur. Madankollu, kif jidher mit-Tabella 3 f'paġna 6 ta' dan ir-rapport, iktar minn 50 % tal-programmi li jaslu jiġu rifjutati.

L-informazzjoni attwali u l-politika ta' promozzjoni se jkunu riveduti flimkien mad-diskussjoni dwar ir-riforma tal-PAK wara l-2013. L-istrumenti ta' promozzjoni għandhom jipprovdu lill-produtturi tal-UE b'għodda effikaċi filwaqt li fl-istess ħin jippruvaw inaqqsu l-piż amministrattiv.

[1] Ir-Regolament tal-Kunsill (KE) Nru 3/2008 tat-17 ta' Diċembru 2007, ĠU L 3, 5.1.2008, p. 1 .

[2] L-2006 kollha hija koperta minn dan ir-rapport.

[3] Ir-Regolament tal-Kummissjoni (KE) Nru 501/2008 tal-5 ta' Ġunju 2008, ĠU L 147, 6.6.2008, p. 3 .

[4] Il-Kunsill Internazzjonali taż-Żebbuġ

[5] L-implimentazzjoni eċċessiva fl-2007 u l-2008 kienet koperta mit-trasferimenti.

[6] SMART: Specific (speċifiċi), Measurable (jitkejlu), Appropriate (jixirqu), Realistic (realistiċi), Time scheduled (skedati biż-żmien).