[pic] | IL-KUMMISSJONI EWROPEA |

Brussell, 17.11.2010

COM(2010) 674 finali

KOMUNIKAZZJONI MILL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U L-KUMITAT TAR-REĠJUNI

Ċempel 116 000: Il-hotline Ewropew għat-tfal mitlufa

WERREJ

Introduzzjoni 3

1. Liema huma l-ostakli li jipprevjenu l-implimentazzjoni tal-hotline 116000? 4

1.1. Il-passi li għandhom jittieħdu biex il-hotline 116000 isir operattiv 4

1.2. Liema problemi ġew identifikati? 4

1.2.1. Nuqqas ta' informazzjoni 5

1.2.2. L-ispiża tat-tħaddim tal-hotline 5

1.2.3. L-ispiża tat-telefonata lill-hotline 6

2. L-aħjar prattiki 6

2.1.1. Nuqqas ta' informazzjoni 6

2.1.2. Proċess ta' Attribuzzjoni 7

2.1.3. Spejjeż ta' tħaddim 7

2.1.4. Spejjeż tat-telecom 7

3. Standards minimi komuni li jigarantixxu servizz ta' kwalita għolja 7

Konklużjonijiet 8

INTRODUZZJONI

Kuljum qegħdin jintilfu tfal fl-UE kollha. Iżda l-ġenitur ta' tfal mitlufa lil min għandu jistaqsi għall-għajnuna? Hekk kif iżjed u iżjed Ewropej qegħdin jgħixu, jaħdmu u jivvjaġġaw f'pajjiżi oħra tal-UE, dejjem qed isir iktar importanti li l-aċċess għal servizzi essenzjali ma jiddependix fuq "l-għarfien lokali". F'diversi Stati Membri diġà jeżistu hotlines fejn wieħed jista' jċempel biex jirraporta tfal mitlufa, iżda n-numru tat-telefon ivarja minn pajjiż għall-ieħor.

Fil-15 ta' Frar 2007, il-Kummissjoni adottat Deċiżjoni[1] li tirrikjedi lill-Istati Membri jirriservaw il-firxa ta' numri b'sitt ċifri li jibdew bin-numri 116 għal servizzi ta' valur soċjali fl-UE. 116000 kien l-ewwel numru tat-telefon irriservat fl-Istati Membri kollha bħala hotline għar-rappurtar tat-tfal mitlufa. Din kienet waħda mill-ewwel miżuri prattiċi adottota skont il-Komunikazzjoni tal-Kummissjoni "Lejn Strateġija tal-UE dwar id-Drittijiet tat-Tfal"[2]. Il-kombinament "l-istess numru – l-istess servizz" hu maħsub biex jiżgura li l-istess servizz ikun dejjem assoċjat mal-istess numru fl-Unjoni Ewropea kollha. Il-fatt li jkun hemm l-istess numru tal-hotline se jgħin it-tfal u l-ġenituri li jinsabu f'diffikultà biex isibu għajnuna barra l-Istat Membru tal-oriġini tagħhom, pereżempju jekk jintilef/tintilef tifel/tifla waqt vaganza tal-familja.

F'Ġunju 2008, il-Kummissjoni talbet lill-Istati Membri[3] biex jipprovdu dejta dettaljata dwar l-implimentazzjoni tal-hotline 116000. Ir-riżultati tal-istħarriġ urew li l-Istati Membri ftit li xejn għamlu biex jgħarrfu dwar id-disponibbiltà tan-numru. Dan dewwem l-implimentazzjoni tal-hotline tat-tfal mitlufa fl-UE kollha. Ir-reviżjoni tal-"pakkett tat-telecom" adottata f'Novembru 2009 daħħlet obbligu ġdid[4] għall-Istati Membri li tirrikjedihom li jagħmlu dak kollu li jistgħu biex jiżguraw li l-hotline jiġi attivat. Id-data tal-għeluq għat-traspożizzjoni ta' din id-dispożizzjoni mill-Istati Membri hija l-25 ta' Mejju 2011. L-għan tal-Kummissjoni hu li tiżgura li l-hotline 116000 isir operattiv bis-sħiħ kullimkien fl-UE.

Iktar minn tliet snin wara l-adozzjoni tad-Deċiżjoni tal-Kummissjoni 2007/116/KE, is-sitwazzjoni xejn mhija sodisfaċenti. Il-hotline 116000 huwa attwalment operattiv fi 13-il Stat Membru biss. Il-Belġju, id-Danimarka, Franza, il-Greċja, l-Ungerija, l-Italja, il-Pajjiżi l-Baxxi, il-Polonja, il-Portugall, ir-Rumanija, is-Slovakkja, Spanja u r-Renju Unit[5].

L-għan ta' din il-Komunikazzjoni jinqasam fi tnejn: Minn naħa waħda, il-Kummissjoni ġġedded is-sejħa tagħha lill-Istati Membri biex jimplimentaw il-hotline tat-tfal mitlufa bħala kwistjoni ta' prijorità. Min-naħa l-oħra, il-Kummissjoni bi ħsiebha tiżgura li l-istess kwalità għolja ta' servizz hija offruta fl-Unjoni kollha.

Għal dan l-għan, il-Kummissjoni bi ħsiebha tipprovdi appoġġ prattiku lill-Istati Membri li għadhom ma implimentawx il-hotline billi tikxef il-problemi li ġew identifikati s'issa u billi tiffaċilita l-iskambju tal-aħjar prattiki.

Il-Komunikazzjoni hija strutturata fi tliet taqsimiet: l-ewwel taqsima tidentifika l-ostakli li jipprevjenu l-implimentazzjoni tal-hotline f'dawk l-Istati Membri fejn is-servizz għadu mhuwiex operattiv. It-tieni taqsima tidentifika l-aħjar prattiki u s-soluzzjonijiet biex jgħinu l-Istati Membri kkonċernati biex jegħlbu l-ostakli identifikati. It-tielet taqsima tipproponi standards minimi komuni li jigarantixxu kwalità għolja ta' servizz għal hotline.

LIEMA HUMA L-OSTAKLI LI JIPPREVJENU L-IMPLIMENTAZZJONI TAL-HOTLINE 116000?

Il-passi li għandhom jittieħdu biex il-hotline 116000 isir operattiv

Skont it-termini tad-Deċiżjoni tal-Kummissjoni 2007/116/KE ("id-Deċiżjoni"), l-Istati Membri huma meħtieġa li jirriservaw in-numru 116000 għal hotline tat-tfal mitlufa. Ladarba jittieħdu l- passi preparatorji neċessarji, l-Istati Membri huma mbagħad meħtieġa li jgħarrfu li n- numru huwa disponibbli għall-attribuzzjoni, sabiex jiġu ppreżentati l-applikazzjonijiet għad-dritt biex jintuża dan-numru. Id-data tal-għeluq għall-konformità ma' dawn ir-rekwiżiti kienet il-31 ta' Awwissu 2007. L-Istati Membru kollha lestew dan il-pass.

Imbagħad l-Istati Membri huma meħtieġa li jassenjaw numru lil organizzazzjoni (bħal pereżempju NGO jew operatur tat-telecom). Sal-lum, 14-il Stat Membru[6] biss lesta dan il-pass.

Wara dan l-assenjar, l-Istati Membri għandhom jagħmlu kull sforz biex jiżguraw li l-hotline huwa operattiv bis-sħiħ.

Liema problemi ġew identifikati?

Il-Kumitat tal-Komunikazzjonijiet stabbilit mid-Direttiva 2002/21/KE dwar qafas regolatorju komuni għan-networks ta' komunikazzjonijiet u servizzi elettroniċi jipprovdi l-mezzi għall-Istati Membri biex jirrappurtaw lura lill-Kummissjoni dwar l-implimentazzjoni tagħhom tal-hotline.

Fid-29 ta' Ġunju 2010, il-Kummissjoni bagħtet kwestjonarju lill-Istati Membri u lil iktar minn 30 organizzazzjoni responsabbli għall-proveddiment ta' servizzi ta' valur soċjali permezz tan-numri 116[7]. L-għan tal-kwestjonarju kien li jiġbor l-informazzjoni dwar i) l-ispejjeż (kemm ġenerali kif ukoll l-ispejjeż speċifiċi tat-telekomunikazzjonijiet), ii) finanzjament tas-servizz, iii) numru tat-telefonati ttrattati, iv) aspetti tekniċi u v) kwistjonijiet rilevanti oħra.

Abbażi tal-informazzjoni miġbura, żewġ aspetti ewlenin jidhru li qegħdin idewmu l-implimentazzjoni tal-hotline tat-tfal mitlufa: nuqqas ta’ informazzjoni u spiża.

Nuqqas ta' informazzjoni

In-nuqqas ta' informazzjoni dwar l-eżistenza tan-numru 116000 riservat għall-hotline tat-tfal mitlufa huwa rrappurtat minn diversi fornituri tas-servizz li qed ifixkel jew idewwem il-proċess ta' assenjar. Din is-sejba hija kkonfermata minn studju riċenti kofinanzjat mill-Programm Daphne III imwettaq minn Missing Children Europe[8], u mir-riżultati preliminari tal-istudju "Evalwazzjoni tal-Impatt tal-Istrumenti tal-UE li Jaffettwaw id-Drittijiet tat-Tfal"[9].

Skont dawk li wieġbu, in-nuqqas ta' informazzjoni wassal għal inqas applikazzjonijiet minn fornituri potenzjali tas-servizz minħabba li ma kinux konxji dwar id-disponibbiltà tan-numru. Il-fornituri potenzjali tas-servizz kienu qed ikollhom ukoll diffikultà minħabba n-nuqqas ta' informazzjoni dwar liema awtoritajiet pubbliċi għandhom jiġu kkuntattjati sabiex japplikaw għall-assenjar, nuqqas ta' informazzjoni dwar liema proċeduri għandhom isegwu u nuqqas ta' koordinazzjoni bejn l-awtoritajiet tal-Istati Membri u l-awtoritajiet regolatorji nazzjonali.

In-nuqqas ta' kuxjenza dwar il-hotlines tat-tfal mitlufa fost il-pubbliku ġenerali ġie identifikat ukoll bħala problema.

L-ispiża tat-tħaddim tal-hotline

Id-diffikultà ewlenija identifikata mill-fornituri tas-servizz hija l-ispiża tat-tħaddim tal-hotline. Huma indikaw li l-finanzjament huwa wieħed mill-fatturi li jfixklu l-introduzzjoni u l-operazzjoni tal-hotlines.

Id-Deċiżjoni tiddeskrivi s-servizz 116000 kif ġej: is-servizz (a) jirċievi telefonati li jirrapportaw tfal mitlufa u jgħaddihom lill-pulizija; (b) joffri servizzi ta' gwida u sostenn lill-persuni responsabbli għat-tfal mitlufa; (c) jappoġġa l-investigazzjoni. Barra minn hekk, kundizzjoni speċifika marbuta mad-dritt tal-użu tal-116000 teħtieġ li s-servizz ikun disponibbli 24/7 man-nazzjon kollu . Dawk li rrispondew indikaw li dan ir-rekwiżit jimplika li jkun hemm persunal imħarreġ u kompetenzi speċifiċi li mhumiex faċilment disponibbli mingħajr ħlas permezz tal-għajnuna tal-volontiera. Dawk li rrispondew indikaw ukoll li s-servizz m'għandux ikun biss disponibbli bil-lingwa tal-Istat Membru kkonċernat (ċittadini tal-UE li jivvjaġġaw lejn Stat Membru ieħor ħafna drabi ma jitkellmux il-lingwa ta' dak l-Istat Membru). L-ispejjeż relatati mat-taħriġ tal-lingwa għall-persunal jistgħu wkoll ikunu sostanzjali.

Il-fornituri tas-servizz mhux dejjem ikunu f'pożizzjoni biex isostnu l-ispejjeż tal-persunal u l-ispejjeż amministrattivi oħra għall-hotlines. F'ċerti każijiet l-ispejjeż tat-telekomunikazzjonijiet jistgħu wkoll ikollhom ikunu mġarrba mill-fornituri tas-servizz (dawn huma stmati li jirrappreżentaw madwar 5% tal-baġit totali[10]).

It-tliet sorsi ewlenin tal-finanzjament disponibbli huma: finanzjament pubbliku, skemi ta' Responsabbiltà Soċjali Korporattiva (CSR) u fondi privati. L-arranġamenti ta' finanzjament ivarjaw bejn l-Istati Membri.

L-ispiża tat-telefonata lill-hotline

Il-maġġoranza tal-fornituri tas-servizz indikaw li l-hotline 116000 jista' ma jkunx neċessarjament disponibbli għall-utenti tar-roaming tal-mowbajl u għall-persuni li jċemplu minn barra (telefonati internazzjonali). Dan ittellef l-iskop tan-numru uniku 116000, peress li, pereżempju, il-ġenituri u t-tfal li jivvjaġġaw mhux se jkunu jistgħu jċemplu l-hotline mill-mowbajls tagħhom.

L-organizzazzjonijiet tal-helpline jew operaturi tat-telecom li qed jisponsorjaw jistgħu ma jkunux lesti (jew kapaċi) jkopru l-ispejjeż ta' dawn it-telefonati. Peress li l-hotline 116000 hu meħtieġ li jkun numru mingħajr ħlas, l-ispiża tat-telefonata huwa normalment imħallas mill-fornitur tas-servizz li jkun qed jirċievi t-telefonati. Dan jista' jkun diffiċli għall-fornituri tas-servizz li għandhom status karitatevoli, minħabba li l-ispejjeż ta' komunikazzjoni marbuta mar-roaming jistgħu jkunu ta' piż sinifikanti fuq ir-riżorsi tagħhom.

It-trattament regolatorju tan-numri mingħajr ħlas ivarja bejn l-Istati Membri u ma jagħtix garanzija li l-aċċess għan-numru jkun fir-realtà mingħajr ħlas għal dawk kollha li jċemplu. Din id-Deċiżjoni ma timponix obbligi fuq l-Istati Membri biex jiżguraw li t-telefonati lill-hotline tat-tfal mitlufa jkunu mingħajr ħlas. Dawn huwa b'kuntrast għall-qafas legali tal-UE applikabbli lin-numru ta' emerġenza 112, li jeħtieġ li l-Istati Membri jiżguraw li l-utenti finali jkunu jistgħu jċemplu lis-servizzi ta' emerġenza mingħajr ħlas f'kull tip ta' sitwazzjoni.

Kwistjoni oħra identifikata minn dawk li rrispondew dwar is-sitwazzjoni tal-utenti tal-mowbajls li jgħaddu minn Stat Membru jew jivvjaġġaw lejn Stat Membru ieħor, hi marbuta man-nuqqas tal-ftehimiet eżistenti biex ikopru l-ispejjeż tar-roaming.

L-AħJAR PRATTIKI

Skont ir-rispons mill-Kumitat tal-Komunikazzjonijiet, ir-riżultat tal-kwestjonarju, u s-sejbiet tal-istudju Daphne III mwettaq minn Missing Children Europe, f'diversi Stati Membri jeżistu eżempji ta' prattiki tajbin dwar kif għandhom jiġu indirizzati l-problemi ewlenin.

Nuqqas ta' informazzjoni

Fil-25 ta' Mejju 2009 Missing Children Europe , bl-appoġġ tal-programm Daphne III, nediet kampanja wiesgħa biex tqajjem il-kuxjenza pubblika dwar il-hotline permezz ta' distribuzzjoni ta' kartelluni, volantini u brazzuletti f'10 Stati Membri.

Fl-2009, Franza nediet kampanja ta' informazzjoni li tinvolvi d-distribuzzjoni ta' iktar minn 50.000 kartellun u azzjonijiet koordinati mal-puliziji u l-ġendarmerija.

Proċess ta' Attribuzzjoni

L-awtoritajiet Ungeriżi organizzaw konferenza mal-operatturi tat-telecom Ungeriżi dwar l-introduzzjoni tal-116000 fis-sistema ta' numerazzjoni Ungeriża. L-Awtorità Regolatorja Nazzjonali Brittanika talbet lill-Gvern tar-Renju Unit biex jgħinhom fis-selezzjoni għall-assenjar tal-hotline lil fornitur tas-servizz.

F'ċerti pajjiżi l-Awtoritajiet Regolatorji Nazzjonali ħadmu mal-Ministeru tal-Intern biex jiżguraw li jintgħażel l-aħjar fornitur tas-servizz għall-hotline billi tintuża tabella bi kriterji speċifiċi ( Franza ).

Spejjeż ta' tħaddim

Fl- Ungerija l-ispiża totali tas-servizz tal-hotline huwa parzjalment iffinanzjat mill-finanzjament pubbliku, bħala parti mill-programm nazzjonali għall-protezzjoni tad-drittijiet tat-tfal.

Fil- Portugall , l-operatur tas-servizz irnexxielu jikseb finanzjament pubbliku għat-tħaddim sħiħ tas-servizz.

Fil- Belġju l-operatur jirċievi għotja li tiġġedded kull sena min-National Lottery u jaħdem fuq il-bażi ta' sħubija bejn il-pubbliku u l-privat.

Il-fornitur tas-servizz Grieg imexxi s-servizz mingħajr ma jġarrab ebda spiża, peress li l- ispejjeż kollha huma koperti mill-operatur tat-telecom skont il-programm tiegħu ta' responsabbiltà soċjali korporattiva.

Xi Stati Membri (pereżempju l- Belġju u Franza ) ikkonvertew l-hotline f'numru ta' emerġenza, jiġifieri l-linja ta' emerġenza preċedenti tagħhom qalbuha għall-hotline. Bħala linja ta' emerġenza, il-finanzjament pubbliku jkopri l-ispejjeż, u s-servizz hu pprovdut fuq il-bażi ta' sħubija bejn il-pubbliku u l-privat.

Spejjeż tat-telecom

L-operaturi tat-telecom fil- Portugall u fir- Rumanija qablu li jkopru l-ispejjeż tat-telefon. Fil- Polonja l-operaturi kollha tal-mowbajls qablu li ma jżommux flus lill-fornitur tas-servizz għall-ispejjeż tat-telefon. Minħabba f'hekk, is-servizz hu mingħajr ħlas għal dak li jċempel u għall-fornitur tas-servizz.

Fl- Ungerija l-fornitur tas-servizz qabel li jinnegozja "prezz kummerċjali" li kien definit bħala l-prezz minimu li għandu jitħallas minn klijent ta' negozju ta' daqs medju.

STANDARDS MINIMI KOMUNI LI JIGARANTIXXU SERVIZZ TA' KWALITA GħOLJA

Ladarba l-hotline jkun operattiv f'kull Stat Membru, huwa importanti li jitwassal servizz ta' kwalità għolja fl-Unjoni Ewropea kollha, sabiex il-ġenituri u t-tfal jistgħu jiddependu fuq l-istess assistenza, ikunu fejn ikunu. Minkejja li d-Deċiżjoni tenfasizza l-ħtieġa għan-nies li jivvjaġġaw fl-Ewropa biex ikollhom l-istess servizz għad-disponibbiltà tagħhom, hemm evidenza li l-hotlines eżistenti joffru servizzi differenti lil dawk li jċemplu għall-għajnuna wara li jkun intilef/intilfet tifel/tifla.

Apparti r-rekwiżiti miġbura fid-Deċiżjoni (servizz li se jkun disponibbli 24/7 u man-nazzjon kollu) u f'leġiżlazzjonijiet applikabbli rilevanti oħra, bħar-regoli tal-protezzjoni tad-dejta, jistgħu jiġu definiti numru ta' standards minimi li jigarantixxu kwalità għolja ta' servizz, u l-aħjar prattiki diġà qed isiru konkreti skont l-esperjenza f'diversi Stati Membri:

- Is-servizz għandu jkun disponibbli bil-lingwa tal-Istat Membru u għall-inqas bl-Ingliż.

Pereżempju, fir- Rumanija , is-servizz huwa disponibbli wkoll bil-Franċiż, l-Ingliż u l-Spanjol. Fil- Greċja s-servizz huwa disponibbli wkoll bl-Ingliż.

- Il-membri tal-persunal tal-fornitur tas-servizz għandhom ikunu mħarrġa biex iwettqu l-kompiti li ġew assenjati, inkluż taħriġ speċifiku dwar kif għandhom jitrattaw mat-tfal b'mod li hu adattat għall-età u l-maturità tat-tifel/tifla.

It-taħriġ immirat huwa organizzat għall-operaturi fir- Rumanija , l- Ungerija u Spanja fejn il-persunal normalment ikunu ħaddiema soċjali u psikologi. L-operaturi tal-hotline jirċievu taħriġ dwar regoli proċedurali u dwar kif għandhom iwieġbu għat-telefonati u jitrattaw mal-emozzjonijiet ta' min iċempel bħal pereżempju rabja u paniku.

- Każijiet transnazzjonali jridu jerġgħu jiġu indirizzati lill-awtoritajiet rilevanti.

- Jekk ikun xieraq, irid ikun offrut segwitu wara li jingħalaq il-każ.

Għalkemm din il-prattika għadha mhux formalizzata, il-fornitur tas-servizz Belġjan isegwi każijiet individwali permezz tat-telefon sabiex jerġa' jorjenta t-tifel/tifla u/jew il-familja lejn servizzi jew organizzazzjonijiet oħra li jistgħu jipprovdulhom appoġġ addizzjonali.

- Irid jiġi ffirmat ftehim ta' kooperazzjoni bejn il-fornitur tas-servizz u l-awtoritajiet nazzjonali ta' infurzar u/jew awtoritajiet ġudizzjarji.

Eżempji ta' ftehimiet bejn il-fornituri tas-servizz u l-awtoritajiet nazzjonali ta' infurzar u/jew l-awtoritajiet ġudizzjarji jeżistu fir- Rumanija , Spanja , Franza , il- Portugall u l- Belġju .

Konklużjonijiet

Il-pakkett tar-riforma tat-telecom jagħti s-setgħa lill-Kummissjoni biex tadotta miżuri ta' implimentazzjoni biex tiżgura l-implimentazzjoni effettiva tal-firxa ta' numerazzjoni "116", b'mod partikolari n-numru tal-hotline 116000 għat-tfal mitlufa. Madankollu, dan għandu jkun mingħajr ħsara għall-organizzazzjoni ta’ dawn is-servizzi, li għandhom jibqgħu fil-kompetenza esklussiva tal-Istati Membri, u m’għandu jkollu l-ebda impatt fuqhom.

Il-Kummissjoni se tkompli tipprovdi appoġġ lill-Istati Membri għall-introduzzjoni rapida u l-funzjonament sħiħ tal-hotlines tat-tfal mitlufa. Għal dan l-għan, il-Kummissjoni se tkompli tissorvelja u tivvaluta s-sitwazzjoni permezz tal-ħidma tal-Kumitat tal-Komunikazzjonijiet.

Kull sena, il-Kummissjoni se torganizza wkoll laqgħat ta' livell għoli mal-partijiet interessati kollha sakemm il-hotline ikun operattiv f'kull Stat Membru. L-għan ta' dawn il-laqgħat se jkun li jqajjem kuxjenza, sabiex jippermetti l-iskambju tal-aħjar prattiki u biex jidentifika l-għodod prattiċi biex jiġi żgurat li l-hotline tat-tfal mitlufa jsir operattiv u li joffri servizz ta' kwalità għolja fl-Istati Membri kollha. Dawn il-laqgħat se jsiru kull sena fil-25 ta' Mejju jew f'data oħra viċin biex ifakkru l-Jum Internazzjonali tat-Tfal Mitlufa u biex jesprimu solidarjetà mat-tfal mitlufa u l-familji tagħhom.

Il-Kummissjoni hija impenjata biex tagħmel il-hotline tat-tfal mitlufa operattiv bis-sħiħ fl-UE kollha u se tkompli tissorvelja mill-qrib il-progress li jsir f'livell nazzjonali. Jekk ma jkunx sar l-ebda progress ulterjuri fi żmien raġonevoli, il-Kummissjoni se tikkunsidra tippreżenta proposta leġiżlattiva biex tiżgura li għal kull tifel/tifla u għal kull ġenitur, l-għajnuna tkun biss telefonata 'l bogħod, ikunu fejn ikunu fl-UE.

ANNESS

Stat ta' implimentazzjoni għal 116000 |

Stat Membru | 116000 | 116000 |

Assenjat | Operattiv |

L-Awstrija |

Il-Belġju | X | X |

Il-Bulgarija |

Ċipru |

Ir-Repubblika Ċeka |

Id-Danimarka | X | X |

L-Estonja |

Il-Finlandja |

Franza | X | X |

Il-Ġermanja |

Il-Greċja | X | X |

L-Ungerija | X | X |

L-Irlanda |

L-Italja | X | X |

Il-Latvja |

Il-Litwanja |

Il-Lussemburgu |

Malta | X |

Il-Pajjiżi l-Baxxi | X | X |

Il-Polonja | X | X |

Il-Portugall | X | X |

Ir-Rumanija | X | X |

Is-Slovakkja | X | X |

Is-Slovenja |

Spanja | X | X |

L-Isvezja |

Ir-Renju Unit | X | X[11] |

[1] Id-Deċiżjoni tal-Kummissjoni 2007/116/KE tal-15 ta' Frar 2007 dwar l-irriservar tal-firxa nazzjonali ta' numri li jibdew b'116 għal numri armonizzati ta' servizzi armonizzati ta' valur soċjali, ĠU L 49, 17.2.2007, p. 30-33, kif emendata l-aħħar bid-Deċiżjoni tal-Kummissjoni 2009/884/KE. Għal iktar informazzjoni ara wkoll http://ec.europa.eu/information_society/policy/ecomm/current/pan_european/index_en.htm

[2] Il-Komunikazzjoni tal-Kummissjoni COM (2006) 367 finali tal-4 ta' Lulju 2006: "Lejn Strateġija tal-UE dwar id-Drittijiet tat-Tfal", disponibbli f''dan is-sit:http://eur-lex.europa.eu/LexUriServ/LexUriServ.do?uri=COM:2006:0367:FIN:EN:PDF.

[3] Il-Kumitat tal-Komunikazzjonijiet ġie mwaqqaf mid-Direttiva 2002/21/KE. Permezz ta' dan il-Kumitat, l-Istati Membri jirrappurtaw lill-Kummissjoni dwar l-implimentazzjoni tagħhom tal-Kumitat tal-Komunikazzjonijiet dwar il-hotline, COCOMM 08-06 u COCOMM 08-18.http://circa.europa.eu/Public/irc/infso/cocom1/library?l=/public_documents_2008

[4] L-Artikolu 27a tad-Direttiva dwar is-Servizz Universali (Direttiva 2009/136/KE li temenda d-Direttiva 2002/22/KE) jistabbilixxi li l-Istati Membri għandhom jippromwovu n-numri speċifiċi fil-firxa ta’ numri li jibdew b’"116"; Huma għandhom jinkoraġġixxu l-provvediment fit-territorju tagħhom tas-servizzi li għalihom huma rriservati tali numri; għandhom jiżguraw li l-utenti finali b’diżabbiltà huma kapaċi jaċċedu għas-servizzi u li ċ-ċittadini jkunu infurmati b'mod xieraq dwar l-eżistenza u l-użu tas-servizzi. L-Istati Membri għandhom, barra minn miżuri ta' applikabbiltà ġenerali lin-numri kollha fil-firxa ta' numri "116", jagħmlu minn kollox biex jiffaċilitaw l-aċċess taċ-ċittadini għal servizz li jopera hotline biex jirrapporta każijiet ta' tfal mitlufa. Il-hotline għandu jkun disponibbli fuq in-numru "116000." ĠU L 337/11, 18.12.2009.

[5] Fir-Renju Unit il-hotline huwa operattiv b'mod parzjali.

[6] Il-Belġju, id-Danimarka, Franza, il-Greċja, l-Ungerija, l-Italja, Malta, il-Pajjiżi l-Baxxi, il-Polonja, il-Portugall, ir-Rumanija, is-Slovakkja, Spanja u r-Renju Unit.

[7] Il-Kumitat tal-Komunikazzjonijiet COCOMM10-30, 14 ta' Ottubru 2010. Ir-rapport huwa disponibbli fis-sit: http://circa.europa.eu/Public/irc/infso/cocom1/library?l=/public_documents_2010

[8] L-Istitut tal-Politika Pubblika u tal-Ġestjoni tal-Litwanja qed iwettaq għall-Kummissjoni "Evalwazzjoni tal-Impatt tal-Istrumenti tal-UE li Jaffettwaw id-Drittijiet tat-Tfal bil-Ħsieb li Jivvalutaw il-Livell ta' Protezzjoni u l-Promozzjoni tad-Drittijiet tat-Tfal fl-UE". Ir-Rapport finali se jkunippubblikat fis-sit:http://ec.europa.eu/justice/policies/children/policies_children_intro_en.htm.

[9] Missing Children Europe hija Federazzjoni Ewropea għat-Tfal Mitlufa u Sesswalment Sfruttati. Bħala organizzazzjoni ċentrali, hi tirrappreżenta 24 Organizzazzjoni Governamentali attivi f'16-il Stat Membru tal-Unjoni Ewropea u fl-Isvizzera.

[10] Sors: Il-Kumitat tal-Komunikazzjonijiet COCOMM10-30, 14 ta' Ottubru 2010.

[11] Operattiv b'mod parzjali.