[pic] | IL-KUMMISSJONI EWROPEA |

Brussel 23.9.2010

KUMM(2010) 450 finali

KOMUNIKAZZJONI MILL-KUMMISSJONI LILL-KUNSILL, IL-PARLAMENT EWROPEW, IL-KUMITAT EKONOMIKU U SOĊJALI EWROPEW U L-KUMITAT TAR-REĠJUNI

Id-Disa' Komunikazzjoni dwar l-applikazzjoni tal-Artikoli 4 u 5 tad-Direttiva 89/552/KEE, kif emendata bid-Direttiva 97/36/KE u d-Direttiva 2007/65/KE għall-perjodu 2007-2008(Promozzjoni ta' xogħlijiet awdjoviżivi Ewropej u indipendenti)

SEG(2010) 995

KOMUNIKAZZJONI MILL-KUMMISSJONI LILL-KUNSILL, IL-PARLAMENT EWROPEW, IL-KUMITAT EKONOMIKU U SOĊJALI EWROPEW U L-KUMITAT TAR-REĠJUNI

Id-Disa' Komunikazzjoni dwar l-applikazzjoni tal-Artikoli 4 u 5 tad-Direttiva 89/552/KEE, kif emendata bid-Direttiva 97/36/KE u d-Direttiva 2007/65/KE għall-perjodu 2007-2008(Promozzjoni ta' xogħlijiet awdjoviżivi Ewropej u indipendenti)

DAĦLA

Din il-Komunikazzjoni tfasslet skont l-Artikolu 4(3) tad-Direttiva tal-Kunsill 89/552/KEE tat-3 ta' Ottubru 1989 dwar il-koordinazzjoni ta’ ċerti dispożizzjonijiet stabbiliti b'liġi, b’regolament jew b’azzjoni amministrattiva fl-Istati Membri dwar it-twettiq ta’ attivitajiet tax-xandir bit-televiżjoni[1] ('id-Direttiva dwar Televiżjoni mingħajr Fruntieri'), kif emendata bid-Direttiva 97/36/KE tal-Parlament Ewropew u tal-Kunsill tat-30 ta' Ġunju 1997[2] u bid-Direttiva 2007/65/KE tal-Parlament Ewropew u tal-Kunsill tal-11.12.2007 (‘id-Direttiva dwar is-Servizzi tal-Midja Awdjoviżiva’)[3], (minn hawn 'il quddiem imsejħa 'id-Direttiva')[4]. B'din il-Komunikazzjoni, għad-disa' darba mill-adozzjoni tad-Direttiva, il-Kummissjoni tirrapporta dwar l-applikazzjoni tal-Artikoli 4 u 5 għall-perjodu 2007-2008. Il-Komunikazzjoni hija bbażata fuq id-dikjarazzjonijiet statistiċi tal-Istati Membri dwar l-ilħiq tal-proporzjonijiet imsemmija f'dawn l-Artikoli minn kull wieħed mill-programmi televiżivi li jaqgħu taħt il-ġurisdizzjoni tagħhom, u tippreżenta l-opinjoni tal-Kummissjoni dwar l-applikazzjoni ta' dawn id-dispożizzjonijiet, filwaqt li tinkludi l-konklużjonijiet prinċipali li għandhom joħorġu mir-rapporti tal-Istati Membri.

L-għan ta' dan ir-rappurtar ta' kull sentejn huwa doppju. L-ewwel nett, skont l-Artikolu 4(3) tad-Direttiva, il-Komunikazzjoni ġġib id-dikjarazzjonijiet statistiċi tal-Istati Membri għall-għarfien tal-Istati Membri l-oħra, tal-Parlament Ewropew u tal-Kunsill, tal-Kumitat Ekonomiku u Soċjali Ewropew u tal-Kumitat tar-Reġjuni. It-tieni nett, għandha l-għan tivverifika jekk il-miżuri adottati mill-Istati Membri bl-għan li jippromwovu xogħlijiet Ewropej u indipendenti ġewx applikati kif xieraq.

Biex isir dan ir-rappurtar, il-Kummissjoni pprovdiet lill-Istati Membri kollha lista ddefinita minn qabel ta' kanali li ħarġet mill-bażi ta' dejta tal-MAVISE[5] tal-Osservatorju Awdjoviżiv Ewropew. L-iskop kien li tintuża bażi uniformi, għal aktar konsistenza u komparabilità fid-dejta statistika li jipprovdu l-Istati Membri. Skont id-dispożizzjonijiet tad-Direttiva, il-kanali lokali tneħħew mil-lista minħabba li huma esklużi mill-ambitu tal-Artikoli 4 u 5 (skont l-Artikolu 9) kif ukoll il-kanali li jxandru b'lingwa differenti minn dawk tal-Istati Membri tal-UE (il-Premessa 29 tad-Direttiva 97/36/KE) u l-kanali li jxandru b'mod esklussiv għal pajjiżi li mhumiex Stati Membri tal-UE u li ma jistgħux jinqabdu fl-UE (l-Artikolu 2 (6)). Kif diġà kien il-każ fir-rapport preċedenti, il-kanali kollha li jaqgħu taħt il-ġurisdizzjoni ta' Stat Membru speċifiku kellhom jitqiesu indipendentament mill-kwota ta' udjenza tagħhom. Aktar dettalji jistgħu jinstabu fid-dokumenti ta' sfond inklużi fid-Dokument ta' Ħidma tal-Persunal tal-Kummissjoni li jakkumpanja din il-Komunikazzjoni.

Għall-ewwel darba, il-Bulgarija u r-Rumanija, li daħlu fl-UE fl-1 ta' Jannar 2007 u taw dejta statistika b'mod volontarju għall-perjodu 2005-2006, wettqu l-obbligu tagħhom li jirrapportaw dwar l-applikazzjoni tal-Artikoli 4 u 5 matul il-perjodu 2007-2008. Għaldaqstant, din hija l-ewwel darba li din il-Komunikazzjoni tinkludi r-rapporti obbligatorji tas-27 Stat Membru kollha tal-UE.

L-OPINJONI TAL-KUMMISSJONI DWAR L-APPLIKAZZJONI TAL-ARTIKOLI 4 U 5

Rimarki ġenerali

L-Artikoli 4 u 5 fil-kuntest tax-xena awdjoviżiva Ewropea

Matul il-perjodu li qed jiġi analizzat, ix-xena awdjoviżiva Ewropea għaddiet mill-istess xejra pożittiva li kienet ġiet irreġistrata fil-perjodu 2005-2006. L-għadd ta' xandara u kanali qiegħed jiżdied kull sena, b'mod partikolari minħabba li bdiet tintuża t-teknoloġija diġitali li tiffavorixxi l-ħolqien ta' pjattaformi ġodda u ta' għadd kbir ta' kanali "tematiċi" speċjalizzati. Dan il-fenomenu wassal għal aktar frammentazzjoni tal-kwota tal-udjenza; xi ħaġa li kienet diġà ġiet enfasizzata fit-Tmien Komunikazzjoni[6]. Skont id-dejta mogħtija mill-Osservatorju Awdjoviżiv Ewropew, l-għadd tal-kanali fl-UE-27 żdied minn 5 151 kanal fl-2006 għal 6 067 kanal fl-2008, li hija żieda ta' 17.8 %. L-għadd ta' kanali b'kopertura nazzjonali żdied minn 1 967 fl-2006 għal 2 702 fl-2008, li hija żieda ta' 37.36 %.

Matul l-istess perjodu, iż-żieda rreġistrata fl-għadd totali ta' kanali koperti[7] mir-rapporti tal-Istati Membri kienet ogħla miż-żieda rreġistrata fis-suq: l-għadd żdied minn 1 107 kanal fl-2006 (UE-27[8]) għal 1 590 fl-2007 u 1 679 fl-2008. Għalhekk, iċ-ċifra għas-sena 2008 tirrappreżenta żieda ta' 51.6 % fuq is-sena 2006.

Din id-differenza bejn ir-rata ta' żieda rreġistrata fis-suq u r-rata ta' żieda fl-għadd ta' kanali koperti tista' tiġi attribwita għall-użu ta' lista ddefinita minn qabel ta' kanali, li tikkostitwixxi bażi ta' kalkolu aktar komprensiva minn dik użata fil-perjodi ta' referenza preċedenti.

Il-metodi ta' implimentazzjoni u monitoraġġ mill-Istati Membri

Il-metodoloġija li tintuża għall-monitoraġġ mhijiex armonizzata u tvarja b'mod sostanzjali bejn Stat Membru u ieħor. Kif ġara fil-każ ta' rapporti preċedenti, fil-biċċa l-kbira tal-Istati Membri, ix-xandara jipprovdu dejta lill-awtoritajiet kompetenti. F'xi wħud minnhom, id-dejta li tinġabar tiġi analizzata mill-awtoritajiet nazzjonali jew minn kumpaniji privati ta' riċerka. F'każ minnhom, id-dejta tiġi mill-monitoraġġ tal-programmazzjoni ta' kuljum li jsir mill-bażi tad-dejta tal-awtorità kompetenti. Il-metodi jistgħu jvarjaw ukoll skont it-tip tax-xandara kkonċernati (xandara pubbliċi jew kummerċjali). Il-monitoraġġ jitwettaq jew abbażi ta' teħid ta' kampjuni jew abbażi tal-ħin totali ta' xandir. F'wieħed mill-pajjiżi[9], il-ġbir tad-dejta statistika ġie ristrett għal kanali li jxandru permezz ta' mezzi terrestri, minħabba li l-leġiżlazzjoni ma tippermettix lill-awtoritajiet nazzjonali jitolbu għal dejta minn kategoriji ta' kanali oħra.

Ta' min jinnota li fl-2008, waħda mill-awtoritajiet nazzjonali (fil-Portugall) tejbed il-mod li bih twettaq il-monitoraġġ billi abbandunat it-teħid ta' kampjuni u bdiet tqis il-ħin totali ta' xandir li jsir matul is-sena sabiex tivvaluta l-prestazzjoni tal-kanali.

L-użu ta' lista ddefinita minn qabel fit-tfassil ta' dan ir-rappurtar wassal għall-ħtieġa ta' kjarifikazzjonijiet kważi fl-Istati Membri kollha, wara li l-awtoritajiet nazzjonali neħħew għadd ta' kanali mil-lista. Ġie indikat it-trattament li għandu jingħata lill-kategoriji ta' kanali differenti, skont il-Linji Gwida tal-Kummissjoni għall-monitoraġġ tal-implimentazzjoni tal-Artikoli 4 u 5 tad-Direttiva[10]. F'żewġ każijiet speċifiċi[11], il-Kummissjoni saħqet b'mod uffiċċjali li l-obbligu ta' rappurtar skont l-Artikolu 4(3) tad-Direttiva japplika għal "kull wieħed mill-programmi tat-televiżjoni" li jaqa' taħt il-ġurisdizzjoni tal-Istati Membri kkonċernati, għajr f'dawk il-każijiet imsemmija b'mod espliċitu fl-Artikolu 4(1)[12].

Globalment, l-għadd ta' rapporti nazzjonali li jiġbru d-dejta għall-kanali koperti kollha naqas bi ftit: 12-il rapport minn 25[13] jipprovdu dejta statistika dwar xogħlijiet Ewropej għall-kanali koperti kollha fl-2007 u 11 fl-2008[14], imqabbel mal-14-il rapport minn 25 fil-perjodu ta' referenza preċedenti. Aktar sinifikanti hija ż-żieda fl-għadd ta' kanali li ma ngħatatx dejta dwarhom minn dawk l-Istati Membri li naqqsu milli jipprovdu d-dejta kollha. Skont it-Tmien Komunikazzjoni, id-dejta dwar xogħlijiet Ewropej ma ngħatatx għal 13-il kanal mir-Repubblika Ċeka fl-2005 u għal 10 kanali mill-Italja fl-2006. Matul il-perjodu ta' referenza, ma ngħatatx dejta dwar xogħlijiet Ewropej għal 97 kanal mill-Italja fl-2007 (83 fl-2008), 47 mill-Ġermanja fl-2007 u l-2008, u 34 minn Franza fl-2007 (35 fl-2008). Din ix-xejra tista' tkun dovuta għaliex fis-suq feġġ għadd kbir ta' kanali żgħar li għamel il-ġbir tad-dejta aktar diffiċli, iżda jista jkun ukoll minħabba l-użu ta' lista ddefinita minn qabel ta' kanali.

Elementi oħra li jwasslu għal diverġenza jistgħu jiġu osservati fl-applikazzjoni tal-Artikoli 4 u 5 tad-Direttiva fl-Istati Membri. Kif diġà ġie enfasizzat fit-Tmien Komunikazzjoni, il-proporzjon minimu ta' xogħlijiet indipendenti meħtieġa skont l-Artikolu 5 tad-Direttiva jista' jirrelata jew għall-ħin ta' xandir tal-kanali jew għall-baġit tagħhom għall-programmar[15]. Il-bażi li tintuża għall-kalkolu tista' tkun differenti wkoll, skont it-tip ta' kanal[16]. Barra minn hekk, għadd ta' Stati Membri stabbilixxew regoli aktar dettaljati u aktar stretti (jew għax-xandara kollha, inkella għax-xandara tas-servizz pubbliku biss), u b'hekk eżerċitaw il-possibbiltà stabbilita b'mod espliċitu fl-Artikolu 3(1) tad-Direttiva.

Il-marġni ta' flessibbiltà awtorizzat mid-Direttiva għall-implimentazzjoni tagħha jagħmilha diffiċli li wieħed ikejjel id-dejta nazzjonali b'mod totalment komparabbli. Madankollu, abbażi tal-konklużjonijiet ippreżentati f'din il-Komunikazzjoni, il-Kummissjoni tista' tiġbed konklużjonijiet affidabbli mir-rapporti nazzjonali dwar l-implimentazzjoni tal-Artikoli 4 u 5 fil-livell tal-UE.

L-għodod ta' analiżi u ta' valutazzjoni

Skont l-Artikolu 4(3) tad-Direttiva, il-Kummissjoni għandha tiżgura l-applikazzjoni tal-Artikoli 4 u 5 skont id-dispożizzjonijiet tat-Trattat. Sabiex jgħin lill-Istati Membri fit-twettiq tal-obbligi ta' monitoraġġ u rappurtar tagħhom, ġie mfassal dokument li fih linji gwida[17]. Dan id-dokument jiddefinixxi għadd ta' termini u jiċċara ċerti kunċetti. Barra min hekk, ġew definiti għadd ta' indikaturi[18] biex jipprovdu għodda ta' analiżi oġġettiva għall-valutazzjoni tad-dejta statistika pprovduta mill-Istati Membri.

L-applikazzjoni tal-Artikolu 4

Din is-sezzjoni tipprovdi analiżi tal-konformità mal-obbligu li l-maġġoranza tax-xandir ikun ta' xogħlijiet Ewropej, fejn huwa prattiku u b'mezzi xierqa, kif stipulat fl-Artikolu 4 tad-Direttiva.

Fl-UE, il-ħin medju ta' xandir iddedikat għal xogħlijiet Ewropej mill-kanali rapportati kollha fl-Istati Membri tal-UE-27 kien ekwivalenti għal 62.64 % fl-2007 u 63.21 % fl-2008, li jirrappreżenta żieda ta' 0.57 punti perċentwali matul il-perjodu ta' referenza[19]. Filwaqt li fl-aħħar perjodu ta' rappurtar ġiet irreġistrata xejra pożittiva, fl-2008 l-proporzjon tal-ħin ta' xandir ddedikat għal xogħlijiet Ewropej reġa' naqas għal-livell li kien fl-2005, b'medja ta' 63.21 %. L-evoluzzjoni f'nofs il-perjodu (2004[20]-2008) tippreżenta xejra relattivament stabbli, bi tnaqqis ċkejken ta' 0.12 punti perċentwali bejn il-medja miksuba fl-2004 (63.52 %) u dik miksuba fl-2008 (63.40 %).

Meta jiġu meqjusa t-tliet gruppi differenti ta' Stati Membri[21], il-konklużjonijiet huma dawn: il-medji globali kif rapportati mill-15-il Stat Membru jirrappreżentaw xejra pożittiva matul il-perjodu ta' 4 snin (64.19 % fl-2008 mqabbel ma' 63.10 % fl-2005, li jirrappreżenta żieda ta' 1.09 punti perċentwali), filwaqt li l-medji rreġistrati mill-UE-10 kienu jippreżentaw tnaqqis ta' 2.04 punti perċentwali għall-istess perjodu (62.11 % fl-2008 mqabbel ma' 64.15 % fl-2005). Iż-żewġ Stati Membri li ngħaqdu mal-UE fl-2007 (il-Bulgarija u r-Rumanija) rreġistraw żieda fil-medja ta' xogħlijiet Ewropej meta mqabbel mal-perjodu preċedenti: 61.40 % fl-2008 kif imqabbel ma' 59.40 % fl-2005 (2 punti perċentwali). Meta jitqies li dawn il-pajjiżi m'ilhomx li daħlu fl-UE, il-prestazzjoni tagħhom hija ta' min ifaħħarha u tikkonferma li l-integrazzjoni sħiħa tagħhom fil-qasam tad-Direttiva seħħet mingħajr problemi fir-rigward tal-promozzjoni ta' xogħlijiet Ewropej. Għaldaqstant, matul il-perjodu 2005-2008, iċ-ċifri globali baqgħu relattivament stabbli, u ferm ogħla mil-limitu ta' 50 % meħtieġ skont l-Artikolu 4.

Fuq skala tal-Istati Membri, is-sehem medju tal-ħin ta' xandir ddedikat għal xogħlijiet Ewropej matul il-perjodu ta' referenza varja bejn 27.90 % (Ċipru) u 85.00 % (il-Polonja) fl-2007 u bejn 30.00 % (Ċipru) u 83.11 % (il-Polonja) fl-2008. F'termini ta' żieda fis-sehem medju tal-ħin ta' xandir matul l-istess perjodu, ix-xejra reġistrata kienet posiżittiva f'14-il Stat Membru, negattiva fi 11 u stabbli fi tnejn. Għal terminu medju, meta r-riżultati tal-2008 jiġu mqabbla ma' dawk tal-2005, 16-il Stat Membru juru żieda, għalkemm fil-biċċa l-kbira tal-każijiet din iż-żieda hija pjuttost modesta (5 % jew inqas, fi 11-il Stat Membru). Min-naħa l-oħra, 11-il Stat Membru rreġistraw tnaqqis (ta' inqas minn 10 %, fi 8 Stati Membri). Ix-xejriet fil-ħin medju ta' xandir iddedikat għal xogħlijiet Ewropej matul il-perjodu ta' 4 snin (2005-2008) jidhru fi grafiki li ġew elaborati għal kull Stat Membru[22].

Ir-rati ta' konformità għall-kanali koperti kollha fil-livell tal-Istati Membri kienu jvarjaw bejn 12.5 % (Ċipru) u 100 % (Estonja) kemm fl-2007 kif ukoll fl-2008. Fil-perjodu ta' referenza, ir-rati ta' konformità żdiedu fi 12-il Stat Membru, baqgħu l-istess f'disgħa u naqsu f'sitta. Ta' min jinnota li r-rati ta' konformità mhux biss jirriflettu l-progress li għamlu jew ma għamlux il-kanali, fir-rigward tal-proporzjonijiet korrespondenti għax-xogħlijiet Ewropej stipulati fl-Artikolu 4, iżda jixhdu wkoll il-livell ta' dejta kkomunikata/mhux ikkomunikata[23].

Tliet Stati Membri[24] sabuha diffiċli biex jilħqu l-proporzjon meħtieġ ta' xogħlijiet Ewropej tul il-perjodu ta' referenza kollu, għalkemm fit-tliet każijiet l-agħar riżultati ġew irreġistrati fl-2007 segwiti bi ftit titjib fl-2008, li f'żewġ każijiet kien żgħir ħafna. Tnejn[25] minnhom diġà ma kienx irnexxilhom jilħqu l-proporzjon meħtieġ ta' xogħlijiet Ewropej f'waħda mis-sentejn tal-perjodu ta' referenza preċedenti. Il-Kummissjoni tħeġġeġ lill-Istati Membri kkonċernati biex jappoġġaw l-isforzi li l-kanali li jaqgħu taħt il-ġurisdizzjoni tagħhom jagħmlu biex itejbu l-prestazzjoni tagħhom u biex jiksbu titjib kostanti fis-snin li ġejjin.

Dawn ir-riżultati juru li l-prestazzjoni globali baqgħet relattivament stabbli matul il-perjodu ta' referenza, kif imqabbel ma' dak preċedenti; dan juri applikazzjoni ġeneralment korretta tal-Artikolu 4 fl-UE kollha. Huwa minnu li fil-perjodu 2007-2008 ġiet osservata xejra negattiva fil-pajjiżi tal-UE-10, li tista' tiġi spjegata, sa ċertu punt, bl-għadd kbir ta' kanali speċjalizzat maħluqa reċentament, li għandhom rata' ta' udjenza baxxa, u li forsi jeħtieġu perjodu ta' adattament qabel ma jilħqu l-proporzjon meħtieġ ta' xogħlijiet Ewropej. Madankollu, l-Istati Membri huma mistiedna jimmonitorjaw il-progress miksub mill-kanali kollha li jaqgħu taħt il-ġurisdizzjoni tagħhom u biex iħeġġuhom kollha ħalli jiksbu l-proporzjon ta' xogħlijiet Ewropej stipulat fl-Artikolu 4.

L-applikazzjoni tal-Artikolu 5

It-tieni parti ta' din il-Komunikazzjoni tippreżenta r-riżultati miksuba fil-livell Ewropew fir-rigward tal-proporzjon ta' xogħlijiet Ewropej minn produtturi indipendenti (produzzjonijiet indipendenti), stipulat fl-Artikolu 5 tad-Direttiva.

Fl-UE, il-proporzjon medju ddedikat għal produzzjonijiet indipendenti mxandra mill-kanali rapportati kollha fl-Istati Membri kollha ekwivalenti għal 35.26 % fl-2007 u 34.90 % fl-2008, li jirrappreżenta tnaqqis ta' 0.36 punti perċentwali matul il-perjodu ta' referenza. Dan it-tnaqqis ċkejken ġie wara xejra pożittiva li kienet ilha tiġi rreġistrata mill-2003. Għall-perjodu ta' erba' snin bejn l-2005 u l-2008[26], il-medji miksuba fl-2008 jirrappreżentaw tnaqqis ta' 0.83 punti perċentwali meta mqabbla ma' dawk miksuba fl-2005. Għalhekk, l-Istati Membri għandhom iħeġġu lix-xandara li jaqgħu taħt il-ġurisdizzjoni tagħhom biex iżidu l-ħin ta' xandir tagħhom iddedikat għal produzzjonijiet indipendenti sabiex jilħqu, mill-inqas, il-livell miksub fil-perjodu ta' referenza preċedenti.

Fil-perjodu 2007-2008, 13-il Stat Membru rreġistraw żviluppi pożittivi u 14-il Stat Membru rreġistraw żviluppi negattivi. Matul il-perjodu ta' referenza, l-Istati Membri kollha kisbu l-livell minimu ta' 10 % stabbilit għal produzzjonijiet indipendenti. Fil-perjodu ta' referenza preċedenti[27], wieħed mill-Istati Membri ma rnexxilux jikseb dan il-livell minimu. Fil-perjodu ta' 4 snin ta' bejn l-2005 u l-2008, tmien Stati Membri rreġistraw żidiet li jvarjaw bejn 1.40 punti perċentwali (Renju Unit) għal 32.20 punti perċentwali (Ċipru). B'kollox, f'19-il Stat Membru ġie osservat tnaqqis meta mqabbel mal-2005, li kien ivarja bejn -0.20 punti perċentwali (Portugall) u -16.80 punti perċentwali (Svezja). Meta mqabbel maċ-ċifri tal-2005, il-proprzjon ta' produzzjonijiet indipendenti rreġistrat fl-2008 jirrappreżenta tnaqqis ta' 4.36 punti perċentwali għall-UE-15, żieda ta' 4.56 punti perċentwali għall-UE-10 u tnaqqis ta' 1.35 punti perċentwali għall-aktar żewġ Stati Membri reċenti. Il-medja rreġistrata mill-UE-10 fl-2008 (35.10 %) mhix 'il bogħod wisq mil-livell miksub mill-UE-15 fl-istess sena (36.02 %).

Il-medja ta' konformità tal-kanali fl-Istati Membri kollha tal-UE kienet 70.39 % fl-2007 u 72.35 % fl-2008. Fil-perjodu ta' erba' snin bejn l-2005 u l-2008, ir-rata ta' konformità għall-UE-25[28] naqset b' 1.06 punti perċentwali Meta mqabbel mar-riżultati tal-2004, it-tnaqqis kien ta' 7.06 punti perċentwali. Dan it-tnaqqis fiċ-ċifri jista' jiġi attribwit, parzjalment, għal żieda fl-għadd ta' kanali koperti fil-perjodu ta' referenza u għall-ammont ta' dejta mhux ikkomunikata dwar xandir ta' produzzjonijiet indipendenti[29].

Ir-rata medja ta' konformità f'kull Stat Membru tvarja bejn 35.13 % (Bulgarija) u 100 % f'erba' Stati Membri (Estonja, Litwanja, Lussemburgu u Malta) fl-2007 u bejn 35.12 % (Italja) u 100 % fi tliet Stati Membri (Estonja, Litwanja u Malta) fl-2008. Matul il-perjodu ta' referenza, ir-rata medja ta' konformità żdiedet f'10 Stati Membri, baqgħet l-istess fi tmien Stati Membri u naqset f'disgħa Stati Membri. L-UE-10, b'rata medja ta' konformità ta' 78.67 % fl-2007 u 83.30 % fl-2008, kellha rata ogħla minn dik tal-UE-15 li kienet 68.92 % u 69.24 % fl-2007 u fl-2008 rispettivament; dan jikkonferma li l-Artikolu 5 ġie implimentat sew fl-Istati Membri tal-UE-10.

Il-medja tal-kwota fl-UE ddedikata għal xogħlijiet Ewropej reċenti minn produtturi indipendenti (xogħlijiet reċenti[30]) kienet ta' 62.99 % (fl-2007) u 63.88 % (fl-2008) tax-xogħlijiet Ewropej kollha li saru minn produtturi indipendenti, li tirrappreżenta żieda żgħira (0.89 punti perċentwali) matul il-perjodu ta' referenza. Madankollu, meta mqabbla mal-medja miksuba fl-2005[31] (68.75 %), il-medja għall-2008 tirrappreżenta tnaqqis ta' 4.87 punti perċentwali. F'nofs il-perjodu, iċ-ċifri jindikaw xejra negattiva kostanti, fejn il-medja ta' 64.88 % miksuba fl-2008 fil-pajjiżi tal-UE-25[32] tirrappreżenta tnaqqis ta' 4.21 punti perċentwali meta mqabbla mal-medja tal-2004 (69.09 %). Din ix-xejra negattiva għandha tiġi mqabbla maż-żieda ta' 4.97 punti perċentwali fil-perjodu ta' bejn l-2001 u l-2006 li ġiet irrapportata fit-Tmien Komunikazzjoni. Meta jitqies il-perjodu 2005-2008, il-medja ta' xogħlijiet reċenti rreġistrata mill-grupp tal-UE-10 fl-2008 (65.39 %) kienet tirrappreżenta tnaqqis ta' 6.90 punti perċentwali meta mqabbla maċ-ċifra tal-2005 (72.29 %). Il-grupp tal-UE-15 kiseb medja aktar baxxa minn dik tal-grupp tal-UE-10, kemm fl-2008 (64.53 %) kif ukoll fl-2005 (66.23 %), iżda t-tnaqqis irreġistrat bejn l-2005 u l-2008 (-1.69 punti perċentwali) kien ukoll inqas milli fil-każ tal-UE-10. Għalhekk, filwaqt li r-riżultati miksuba mill-UE-10 jerġgħu jikkonfermaw li l-Artikolu 5 ġie implimentat sew f'dawn il-pajjiżi, għandhom isiru sforzi biex tiġi indirizzata x-xejra negattiva perċettibbli; u l-istess ħaġa tgħodd għall-UE-15.

L-aktar żewġ Stati Membri reċenti rreġistraw prestazzjoni tajba ħafna (medja ta' 56.7 % fl-2007 u ta' 51.35 % fl-2008) fil-perjodu li qed jiġi analizzat, li jikkonferma li l-integrazzjoni tagħhom fil-qasam tal-Artikolu 5 seħħet mingħajr problemi.

Ir-riżultati juru li r-rekwiżiti tal-Artikolu 5 qegħdin jiġu ssodisfati faċilment fil-livell tal-UE f'termini tax-xandir ta' produzzjonijiet indipendenti, inkluż propozjon adegwat ta' xogħlijiet reċenti, minkejja li fir-rigward tal-livell miksub fl-2005 ġiet osservata xejra ta' tnaqqis. Għaldaqstant, l-Istati Membri qed jiġu mitluba jimmonitorjaw l-applikazzjoni tal-Artikolu 5 mix-xandara li jaqgħu taħt il-ġurisdizzjoni tagħhom u biex iħeġġu żvilupp pożittiv fl-iskedar tal-produzzjonijiet indipendenti u xogħlijiet reċenti Ewropej.

KONKLUŻJONI

Skont id-dejta statistika pprovduta mill-Istati Membri, l-iskedar ta' xogħlijiet Ewropej fil-livell tal-UE rreġistra żieda żgħira ħafna matul il-perjodu ta' referenza attwali. Matul il-perjodu 2005-2008, l-iżvilupp kien stabbli, iżda bejn l-2005 u l-2007 ġew irreġistrati xi ftit varjazzjonijiet (xejra pożittiva segwita bi tnaqqis fl-2007). Madankollu, fl-2008 l-iskedar ta' xogħlijiet Ewropej reġa' ġie għall-istess livell tal-2005 (63.2 % għall-UE-27). Dan jixhed stabbiltà f'livell relattivament għoli, ferm superjuri għall-proporzjon stipulat fl-Artikolu 4. Barra minn hekk, dan ir-riżultat għandu jiġi interpretat fil-kuntest ta' żieda kostanti tal-għadd ta' kanali fis-suq, bil-ħolqien ta' kanali żgħar u speċjalizzati li jistgħu isibuha diffiċli biex jilħqu l-proporzjon meħtieġ ta' xogħlijiet Ewropej minn meta jibdew jaħdmu. Dan l-aspett kien diġà ġie enfasizzat fit-Tmien Komunikazzjoni u għandu jitqies waqt il-valutazzjoni tal-prestazzjoni globali fir-rigward tal-iskedar ta' xogħlijiet Ewropej fl-UE matul il-perjodu ta' referenza attwali.

Minkejja li s-sitwazzjoni ġenerali hija sodisfaċenti, xorta għad fadal lok għall-progress. L-ewwel nett, it-tliet Stati Membri li ma rnexxilhomx jilħqu l-proporzjon meħtieġ ta' xogħlijiet Ewropej fl-2007 u l-2008 għandhom iżidu l-isforzi tagħhom biex itejbu l-prestazzjoni tagħhom u jsaħħu ż-żieda (f'każ minnhom, żgħira ħafna) li diġà rreġistraw fl-2008. Peress li tnejn minn dawn l-Istati Membri jappartienu għall-UE-10, żieda fil-medja tax-xogħlijiet Ewropej tagħhom għandha tħalli impatt pożittiv fuq ix-xejra negattiva rreġistrata mill-UE-10 bejn l-2005 u l-2008, li għandha tiġi indirizzata wkoll.

Fl-aħħar nett, ta' min jinnota l-livell għoli ta' skedar ta' xogħlijiet Ewropej miksub mill-aktar żewġ Stati Membri reċenti fil-perjodu ta' referenza u ż-żieda li dawn irreġistraw matul il-perjodu 2005-2008.

Fir-rigward tal-implimentazzjoni tal-Artikolu 5 tad-Direttiva, l-iżvilupp globali osservat matul il-perjodu ta' referenza jindika xejra ftit negattiva fil-każ ta' xogħlijiet indipendenti. Skont id-dikjarazzjonijiet statistiċi pprovduti mill-Istati Membri, ġie rreġistrat tnaqqis kemm fil-perjodu ta' referenza attwali kif ukoll fil-perjodu 2005-2008. Għalkemm dan it-tnaqqis mhux sinifikanti (-0.83 punti perċentwali bejn l-2005 u l-2008), xorta jbiddel ix-xejra pożittiva rreġistrata fil-perjodu preċedenti. F'dak li jirrigwarda l-produzzjonijiet indipendenti, ta' min jinnota li l-UE-10 rnexxilhom itejbu l-prestazzjoni tagħhom.

Jidher li kien hemm xejra pjuttost aktar negattiva fir-rigward ta' xogħlijiet reċenti minn produtturi indipendenti matul il-perjodu 2005-2008. L-Istati Membri huma mistiedna jħeġġu l-kanali li jaqgħu taħt il-ġurisdizzjoni tagħhom biex iżidu l-isforzi tagħhom biex iżidu l-iskedar tal-produzzjonijiet indipendenti u x-xogħlijiet reċenti.

Madankollu, ir-riżultati miksuba matul il-perjodu ta' referenza jixhdu li l-implimentazzjoni tal-Artikolu 5 saret b'mod sodisfaċenti, u li l-livell miksub huwa ferm superjuri għall-proporzjonijiet meħtieġa minn din id-dispożizzjoni.

Kif diġà ġie ddikkjarat fit-Tmien Komunikazzjoni, ir-riżultati tal-analiżi tar-rapporti ppreżentati mill-Istati Membri[33] juru li fil-perjodu 2007-2008 ir-rekwiżiti stipulati fl-Artikoli 4 u 5 tad-Direttiva ntlaħqu faċilment, kif jidher mill-Grafika ta' hawn taħt.

L-iżvilupp tal-indikaturi ewlenin bejn l-2005 u l-2008 (UE-27)

[pic]

[1] ĠU L 298, 17.10.1989.

[2] ĠU L 202, 30.07.1997.

[3] ĠU L 332, 18.12.2007.

[4] Dawn it-tliet Direttivi ġew ikkodifikati bħala d-Direttiva 2010/13/UE wara li ntemm il-perjodu ta' traspożizzjoni tad-Direttiva 2007/65/KE. Il-kodifikazzjoni kienet tinvolvi r-rinumerazzjoni tal-Artikoli. L-Artikoli 16 u 17 il-ġodda ssostitwixxew l-Artikoli 4 u 5 ta' qabel, iżda s-sustanza tagħhom ma nbidlitx.

[5] http://mavise.obs.coe.int/.

[6] http://ec.europa.eu/avpolicy/reg/tvwf/implementation/promotion/index_en.htm.

[7] Għad-definizzjoni ta' kanali "koperti", ara l-Indikatur 1 fl-Anness 1 — Dokument ta' Ħidma tal-Persunal: mill-għadd totali ta' kanali identifikati jitnaqqsu l-għadd ta' kanali mhux operattivi u l-għadd ta' kanali eżenti (minħabba n-natura tal-programmi tagħhom) jew kanali esklużi (minħabba eċċezzjonijiet legali).

[8] Għall-fini ta' komparabilità, id-dejta li kkomunikaw il-Bulgarija u r-Rumanija b'mod volontarju għas-snin 2005 u 2006 tqieset fil-kalkolu tal-għadd totali ta' kanali f'dawk is-sentejn.

[9] Ara l-Anness 3, p.120 (Ċipru). Is-sitwazzjoni leġiżlattiva għandha tinbidel fix-xhur li ġejjin.

[10] Ara http://ec.europa.eu/avpolicy/docs/reg/tvwf/eu_works/controle45_en.pdf.

Mill-ambitu tal-Artikoli 4 u 5, huma esklużi biss il-kanali lokali (subreġjonali), flimkien mal-kanali li jxandru b'lingwa differenti minn dawk tal-Istati Membri tal-UE u dawk li jxandru 'l barra mill-UE u li ma jistgħux jinqabdu fl-UE.

[11] Il-Kummissjoni bagħtet ittri lill-Ġermanja u lill-Portugall dwar il-ħtieġa li l-Artikoli 4 u 5 jiġu applikati għall-kanali reġjonali u l-kanali taċ-ċinema rispettivament, peress li l-awtoritajiet nazzjonali kienu qisuhom bħala eżenti. Wara li rċivew l-ittra tal-Kummissjoni, il-Portugall diġà ressaq dejta dwar il-kanali taċ-ċinema għall-2008 filwaqt li l-Ġermanja kkommettiet ruħha biex tiġbor dejta statistika mill-kanali reġjonali għall-perjodu ta' rappurtar li jmiss.

[12] Mill-obbligu li japplikaw l-Artikoli 4 u 5 huma eżentati biss dawk il-kanali li jxandru aħbarijiet, avvenimenti sportivi, logħob, reklamar, telebejgħ u servizzi tat-teletext.

[13] F'dan il-każ, l-UE-25 tqieset għall-perjodu 2007-2008, biex id-dejta tkun tista' tiġi mqabbla mad-dejta tal-perjodu ta' referenza preċedenti. Fi kwalunkwe każ, iċ-ċifri tal-UE-27 għall-perjodu 2007-2008 huma l-istess.

[14] Dan huwa l-każ tal-Estonja, l-Irlanda, il-Greċja, Ċipru, il-Latvja, il-Litwanja, il-Lussemburgu, Malta, l-Awstrija, il-Polonja, il-Finlandja u r-Renju Unit. Ir-Renju Unit pprovda dejta għat-396 kanal koperti kollha fl-2007, u fl-2008 għamel l-istess għajr għal tnejn minnhom.

[15] Fil-perjodu ta' referenza preċedenti, Franza u l-Italja diġà ħabbru li kienu għażlu t-tieni possibbiltà. Ara t-Tmien Komunikazzjoni.

[16] Dan huwa l-każ tal-kanali diġitali terrestri fi Franza. Il-perċentwali jiġi kkalkulat abbażi tad-dħul tas-sena preċedenti, li huwa bażi ta' kalkolu ogħla minn dak stabbilit mid-Direttiva. Fid-Dokument ta' Ħidma tal-Persunal li jakkumpanja it-Tmien Komunikazzjoni, il-Kummissjoni kienet diġà stiednet lil Franza biex tressaq id-dejta tagħha b'mod li juri ċar li l-kanali Franċiżi jżommu konformità mal-Artikolu 5 tad-Direttiva.

[17] Ara n-nota 10 ta' qiegħ il-paġna hawn fuq.

[18] Ara l-Anness 1, Dokument ta’ Ħidma tal-Persunal.

[19] Iċ-ċifri li ngħataw fil-livell tal-UE huma l-medja matematika tal-medji nazzjonali kollha kkalkulati abbażi tad-dejta statistika mgħotija mill-Istati Membri. Dawn ma ngħatawx piż differenzjat, peress li xi wħud mill-parametri meħtieġa biex jingħata piż differenzjat korrett mhumiex disponibbli għall-kanali kollha.

[20] L-2004 hija l-ewwel sena li d-dejta (UE-25) tagħha tista' titqabbel ma' dik tal-perjodu 2007-2008. Għall-fini ta' komparabilità, il-medja li ngħatat għall-2008 hija kkalkulata għall-UE-25 (mingħajr il-Bulgarija u r-Rumanija).

[21] L-UE-15 (l-Istati Membri oriġinali), l-UE-10 (l-Istati Membri li ngħaqdu mal-UE fl-2004) u l-aktar żewġ Stati Membri reċenti (il-Bulgarija u r-Rumanija) li ngħaqdu mal-UE fl-2007.

[22] Ara l-grafiki li jidhru fil-punt 2 tad-Dokument ta’ Ħidma tal-Persunal: L-applikazzjoni tal-Artikoli 4 u 5: Analiżi dettaljata.

[23] Ara l-Anness 1— Indikatur 3 — Dokument ta’ Ħidma tal-Persunal.

[24] Ċipru (27.9 % ħin ta' xandir iddedikat għal xogħlijiet Ewropej fl-2007, 30 % fl-2008), l-Isvezja (45.1 % ħin ta' xandir iddedikat għal xogħlijiet Ewropej fl-2007, 45.5 % fl-2008) u s-Slovenja (34.1 % ħin ta' xandir iddedikat għal xogħlijiet Ewropej fl-2007, 44.6 % fl-2008).

[25] Is-Slovenja fl-2005 u l-Isvezja fl-2006.

[26] Għall-fini ta' komparabiltà, il-medji meqjusa għall-2005 u l-2006 jinkludu d-dejta li kkomunikaw il-Bulgarija u r-Rumanija b'mod volontarju, li ngħaqdu mal-UE fil-1.1.2007.

[27] Ċipru rreġistra medji ta' produzzjonijiet indipendenti ta' 9.7 % fl-2005 u 6.5 % fl-2006, filwaqt li għall-perjodu ta' referenza l-medji kienu 39.6 % fl-2007 u 41.9 % fl-2008

[28] Il-bażi tal-UE-25 ġiet magħżula biex ikun jista' jsir tqabbil mal-perjodu 2004-2008.

[29] Għall-fini ta' dan l-indikatur, il-kanali li ma tkunx ġiet ikkomunikata dejta dwarhom jitqiesu bħala kanali li mhumiex konformi— ara l-Anness 1: Indikaturi tal-prestazzjoni — Indikatur 5.

[30] jiġifieri xogħlijiet imxandra fi żmien ħames snin mill-produzzjoni tagħhom.

[31] Għall-fini ta' komparabilità, iċ-ċifri ġew ikkalkulati abbażi tal-UE-27

[32] Il-bażi tal-UE-25 ġiet magħżula biex ikun jista' jsir tqabbil maċ-ċifri tal-2004.

[33] Ara l-punt 2 tad-Dokument ta’ Ħidma tal-Persunal: L-applikazzjoni tal-Artikoli 4 u 5: analiżi dettaljata.