[pic] | KUMMISSJONI TAL-KOMUNITAJIET EWROPEJ |

Brussel 28.7.2009

KUMM(2009) 403 finali

RAPPORT MILL-KUMMISSJONI LILL-KUNSILL U LILL-PARLAMENT EWROPEW

dwar l-esperjenza miksuba mill-applikazzjoni tar-Regolamenti dwar l-iġjene (KE) Nru 852/2004, (KE) Nru 853/2004 u (KE) Nru 854/2004 tal-Parlament Ewropew u tal-Kunsill tad-29 ta' April 2004 {SEC(2009) 1079}

WERREJ

1. SOMMARJU EŻEKUTTIV 3

2. SFOND 4

3. L-ESPERJENZA MIKSUBA MILL-1 TA' JANNAR 2006 5

3.1. L-esperjenza ġenerali 5

3.2. L-ambitu 5

3.3. Id-definizzjonijiet 6

3.4. Il-produzzjoni primarja 6

3.5. L-HACCP 6

3.6. Il-proċeduri ta' reġistrazzjoni u ta' approvazzjoni 7

3.7. L-immarkar tas-saħħa u ta' identifikazzjoni 8

3.8. Il-Gwidi ta' prattika tajba 8

3.9. Il-flessibbiltà 9

3.10. L-importazzjonijiet 9

3.11. Il-kontrolli uffiċjali fir-rigward ta' prodotti ta' oriġini mill-annimali 9

3.12. Il-kriterji mikrobijoloġiċi 10

3.13. It-tneħħija tal-kontaminazzjoni tal-wiċċ 11

3.14. L-Informazzjoni dwar il-Katina Alimentari (FCI - Food Chain Information) 11

3.15. It-tbiċċir ta' emerġenza 12

4. KONKLUŻJONIJIET 12

1. SOMMARJU EŻEKUTTIV

L-Artikolu 16 tar-Regolament (KE) Nru 852/2004[1], l-Artikolu 14 tar-Regolament (KE) Nru 853/2004[2] u l-Artikolu 21 tar-Regolament (KE) Nru 854/2004[3] jinkludu r-rekwiżit legali biex il-Kummissjoni tissottometti, lill-Parlament Ewropew u lill-Kunsill, sa mhux aktar tard mill-20 ta' Mejju 2009, rapport li jirrevedi l-esperjenza miksuba mill-applikazzjoni tagħhom, liema rappport, jekk xieraq, għandu jkun akkumpanjat bi proposti rilevanti. Barra minn hekk, ir-Regolament (KE) Nru 852/2004 jirrikjedi li l-Kummisjoni tikkunsidra jekk huwiex mixtieq jew prattiku li r-rekwiżiti tal-Punt ta' Kontroll Kritiku tal-Analiżi ta' Riskju (HACCP - Hazard Analysis Critical Control Point) ikunu estiżi għall-operaturi fil-kummerċ tal-ikel fil-qasam primarju tal-produzzjoni.

Dan ir-rapport segwa proċess konsultattiv eżawrjenti. Ir-rapport huwa bbażat fuq it-tagħrif li l-Kummissjoni rċeviet mill-awtoritajiet kompetenti fl-Istati Membri, rappreżentanti tal-operaturi fil-kummerċ tal-ikel u organizzazzjonijiet tal-konsumatur fuq livell Ewropew, u l-Uffiċċju Alimentari u Veterinarju tal-Kummissjoni.

Dan ir-rapport jimmira li jippreżenta l-esperjenza miksuba b'mod fattwali, inkluż id-diffikultajiet li l-partijiet interessati ltaqgħu magħhom fl-2006, fl-2007 u fl-2008 matul l-implimentazzjoni tal-pakkett.

Ir-rapport jikkonkludi li l-Istati Membri b'mod ġenerali ħadu l-passi amministrattivi u ta' kontroll neċessarji biex jiżguraw konformità iżda li għad fadal lok għal titjib fir-rigward tal-implimentazzjoni. Il-konklużjonijiet huma appoġġjati mis-sejbiet tal-verifiki u tal-ispezzjonijiet li saru mill-Uffiċċju Alimentari u Veterinarju tal-Kummissjoni. Il-partijiet interessati li kienu kkonsultati jikkunsidraw li l-prinċipji u r-rekwiżiti introdotti mill-pakkett dwar l-iġjene kellhom impatt pożittiv. Dan jindika wkoll il-pożizzjoni ċara tal-Istati Membri u l-partijiet privati interessati biex għalissa r-rekwiżiti tal-proċeduri bbażati fuq l-HACCP ma jkunux estiżi għall-operaturi fil-kummerċ tal-ikel li joperaw fil-produzzjoni primarja.

Id-diffikultatjiet ewlenin identifikati huma relatati ma' ċerti eżenzjonijiet mill-ambitu tar-Regolamenti dwar l-iġjene, ċerti definizzjonijiet stipulati fir-Regolamenti u l-proċedura biex dawn id-definizzjonijiet jkunu adottati, ċerti aspetti prattiċi dwar l-approvazzjoni tal-istabbilimenti fil-maniġġ ta' ikel li ġej mill-annimali u l-immarkar ta' dan l-ikel, ir-reġim tal-importazzjoni għal ċertu ikel, l-implimentazzjoni tal-proċeduri tal-HACCP f'ċerti negozji tal-ikel u l-implimentazzjoni tal-kontrolli uffiċjali f'ċerti setturi.

Dan ir-rapport ma jissuġġerixxi l-ebda soluzzjoni ddettaljata għad-diffikultajiet elenkati u mhuwiex, għalhekk, akkumpanjat minn proposti. Madankollu, minħabba d-diffikultajiet identifikati, il-Kummissjoni se tikkunsidra l-bżonn għal proposti biex il-pakkett dwar l-iġjene tal-ikel ikun imtejjeb.

Dan ir-rapport huwa akkumpanjat minn dokument ta' ħidma tal-persunal (SWD) li jinkludi l-annessi msemmija f'dan ir-rapport. L-Anness I tad-dokument li jakkumpanja dan ir-rapport jistipula t-taqsir u t-termini tekniċi użati f'dan ir-rapport.

2. SFOND

Fid-29 ta' April 2004, il-Parlament Ewropew u l-Kunsill adottaw il-"pakkett dwar l-iġjene tal-ikel". Dan jinkludi tliet Atti bażiċi, Regolamenti (KE) Nru 852/2004 u 853/2004 indirizzati lill-operaturi fil-kummerċ tal-ikel (FBO - food business operators) u Regolament (KE) Nru 854/2004, flimkien mar-Regolament (KE) Nru 882/2004 dwar kontrolli uffiċjali, indirizzati lill-awtoritajiet kompetenti (AK)[4]. L-Atti bażiċi huma speċifikati aktar fi tliet Regolamenti tal-Kummissjoni li jistipulaw il-miżuri implimentattivi (ara l-SWD - Anness III). Barra minn hekk, il-Kummissjoni u l-Istati Membri ppubblikaw dokumenti ta' gwida (ara l-SWD – Anness IV).

Dawn ir-Regolamenti l-ġodda bidlu l-approċċ għall-politika tal-iġjene tal-ikel. L-għan ċar ta' dan il-pakkett kien li jissimplifika l-leġiżlazzjoni eżistenti dwar l-iġjene tal-ikel (ara l-SWD - Anness V), jagħmilha aktar koerenti billi jissepara d-dixxiplini differenti (saħħa pubblika, saħħa tal-annimali u kontrolli uffiċjali) u jiffoka fuq l-għanijiet li għandhom jintlaħqu mill-FBO minflok iżomm rekwiżiti ddettaljati ħafna. Ir-Regolamenti jipprovdu diversi possibilitajiet biex ir-rekwiżiti tekniċi tal-pakkett dwar l-iġjene tal-ikel ikunu adattati skont in-natura tal-kummerċ tal-ikel ikkonċernat.

Minħabba n-natura innovattiva tiegħu, il-Parlament Ewropew u l-Kunsill talbu lill-Kummissjoni tissottometti rapport wara tliet snin biss ta' implimentazzjoni (ara l-SWD – Anness VI). Ir-rapport għandu, b'mod partikolari, jirrevedi l-esperjenza miksuba mill-applikazzjoni tar-Regolamenti l-ġodda u jikkunsidra jekk huwiex mixtieq jew prattiku li l-implimentazzjoni tal-prinċipji tal-HACCP ikunu estiżi għal-livell tal-produzzjoni primarja.

Matul il-kumpilazzjoni tar-rapport, il-Kummissjoni kkonsultat mal-partijiet prinċipali interessati bilateralment jew b'mod kollettiv (ara l-SWD - Anness VII)

L-għan ta' dan ir-rapport huwa li jippreżenta l-esperjanza miksuba fl-2006, fl-2007 u fl-2008 mill-implimentazzjoni tal-pakket tal-iġjene mill-AK u mill-organizzazzjonijiet tal-partijiet privati interessati b'mod fattwali, u li jidentifika d-diffikultajiet li ħarġu minn din l-implimentazzjoni.

3. L-ESPERJENZA MIKSUBA MILL-1 TA' JANNAR 2006

3.1. L-esperjenza ġenerali

L-esperjenza ġenerali mill-applikazzjoni tar-Regolamenti dwar l-iġjene tista' titiqies pożittiva. L-Istati Membri, b'mod ġenerali, huma sodifatti bl-istruttura u l-prinċipji tal-leġiżlazzjoni dwar l-iġjene. Dawn huma bic-ċar kontra l-prinċipju li l-leġiżlazzjoni tirrikjedi xi eżaminar mill-ġdid. Għall-ħafna mill-Istati Membri għadu kmieni wisq biex wieħed jagħmel valutazzjoni bbilanċjata u dettaljata tal-esperjenzi li huma ħabbtu wiċċhom magħhom matul l-implimentazzjoni tal-pakkett dwar l-iġjene.

Il-missjonijiet ta' spezzjoni tal-FVO kkonfermaw din is-sejba, billi b'mod ġenerali, l-applikazzjoni tal-pakkett dwar l-iġjene ma wasslitx għal diffikultajiet kbar għall-FBO jew għall-AK. Il-problemi identifikati matul il-missjonijiet kienu, sa ċertu punt, aktar importanti fi stabbilimenti żgħar.

L-Istati Membri jqisu t-twaqqif ta' dokumenti ta' gwida, fejn xieraq, intiżi biex jgħinu l-FBO u l-AK fl-implimentazzjoni tar-Regolamenti tal-iġjene, bħala pożittivi.

3.2. L-ambitu

L-Istati Membri, huma, f'ċerti każijiet, mitluba jistipulaw f'liġijiet nazzjonali regoli speċifiċi biex ikopru ċerti attivitajiet esklużi mill-ambitu tal-pakkett dwar l-iġjene

L-Istati Membri nnutaw diffikultatjiet fir-rigward tal-provvista lokali ta' kwantitajiet żgħar ta' ikel meta r-regoli jkunu applikati għal kummerċ transkonfinali fi Stat Membru ta' destinazzjoni li għandu approċċ differenti għal dawn l-attivitajiet. Xi Stati Membri identifikaw diffikultajiet fir-rigward tal-kwistjoni ta' "intrapriżi" li huma kkaratterizzati minn ċerta kontinwità ta' attivitajiet u ċertu ammont ta' organizzazzjoni, u l-applikazzjoni tagħha għal persuni privati li f'ċerti sitwazzjonijiet joperaw fil-maniġġ, fil-preparazzjoni jew fis-servizz tal-ikel.

In-nuqqas ta' applikabbiltà tar-Regolament (KE) Nru 853/2004 għall-attivitajiet tal-bejgħ bl-imnut ikkawżat xi diffikultajiet ukoll. Għall-maġġoranza tal-Istati Membri, hemm inkonsistenza fir-rigward ta' mħażen imkessħa b'attivitajiet simili li huma suġġetti għal regoli u reġimi ta' approvazzjoni differenti, skont jekk il-maħżen imkessaħ jaqax fid-definizzjoni ta' bejjiegħ bl-imnut jew le. Bl-istess mod, l-interpretazzjoni tat-termini "marġinali, lokalizzat u ristrett" fir-rigward tal-eżenzjoni mill-approvazzjoni ta' stabbilimenti tal-bejgħ bl-imnut kienet ukoll għajn ta' diffikultajiet.

Diversi organizzazzjonijiet tal-partijiet privati interessati, għal raġunijiet ta' kompetittività, urew tħassib dwar l-esklużjoni tal-bejjiegħa bl-imnut, b'xi wħud jitolbu estensjoni totali tal-ambitu tar-Regolament (KE) Nru 853/2004 għall-bejjiegħa bl-imnut, u oħrajn jitolbu għal reviżjoni tal-leġiżlazzjoni fir-rigward ta' ċerti attivitajiet li jsiru fil-livell tal-bejgħ bl-imnut (pereżempju kkapuljar, tqattigħ) bil-għan li jkunu applikati l-istess regoli għall-istess attivitajiet madwar il-Komunità.

3.3. Id-definizzjonijiet

Il-kunċett ta' 'prodott kompost' tibqa' diffiċli biex tkun implimentata u tagħti lok għal inċertezzi kemm għall-FBO kif ukoll għall-AK.

Id-definizzjoni ta' bejjiegħ bl-imnut skont ir-Regolament (KE) Nru 178/2002 hija kkunsidrata sors kontinwu ta' diffikultajiet billi jidher li mhix addattata totalment għall-għan tal-pakkett dwar l-iġjene (ara wkoll punt 3.2).

L-Istati Membri u diversi partijiet privati interessati wrew tħassib dwar definizzjonijiet oħrajn (pereżempju djar ta' abitazzjoni, lagomorfi, invertebrati, demm, kisi ta' protezzjoni). Dawn urew ukoll tħassib dwar il-proċedura għat-twaqqif jew l-emenda ta' dawn id-definizzjonijiet.

3.4. Il-produzzjoni primarja

Ir-regoli kurrenti dwar l-iġjene tal-ikel għall-produzzjoni primarja huma b'mod ġenerali kkunsidrati xierqa u adegwati għall-protezzjoni tal-prodotti primarji mill-kontaminazzjoni. Madankollu, ċerti Stati Membri jikkunsidraw li huwa prematur li wieħed jikkunsidra l-impatt tal-pakkett dwar l-iġjene fuq il-produzzjoni primarja. Xi Stati Membri oħrajn irrappurtaw diffikultajiet fir-rigward tan-natura vaga ta' ċerti għanijiet stipulati fir-Regolament (KE) Nru 852/2004 u n-nuqqas ta' gwida ċara għall-produtturi primarji. Il-gwidi dwar prattika tajba, fejn disponibbli, urew li huma għodod kruċjali li jipprovdu għajnuna lill-produtturi primarji biex jonorow l-obbligi tagħhom (ara punti 3.5. u 3.8.).

Ir-reġistrar tal-fatti kien sors ta' diffikultà, f'livelli differenti, f'xi Stati Membri.

3.5. L-HACCP

( B'mod ġenerali, l-implimentazzjoni tal-prinċipji tal-HACCP mhijiex fid-dubju, billi din hija kkunsidrata rilevanti biex l-FBO jilħaq l-għanijiet tiegħu dwar is-sikurezza tal-ikel u li dawn ikunu flessibbli biżżejjed biex ikunu adattati anke għan-negozji ż-żgħar tal-ikel.

Ħafna min-negozji industrijali tal-ikel għandhom proċeduri bbażati fuq l-HACCP fis-seħħ. Id-dewmien fl-implimentazzjoni kien innutat fil-biċċeriji ż-żgħar l-antiki li kienu jibbenefikaw minn arranġament tranżitorju.

Madankollu, f'ħafna mill-Istati Membri, id-diffikultajiet b'dawn il-proċeduri kienu identifikati f'negozji żgħar tal-ikel u b'mod partikolari, fi stabbilimenti mikro u żgħar tal-ikel u tal-bejgħ bl-imnut. Id-dispożizzjoni dwar sistemi ġeneriċi mill-konsulenti barranin kienet irrappurtata f'xi każijiet li ma tirriflettix il-realtà tal-istabbiliment u li timponi aktar dokumentazzjoni u reġistrar tal-fatti milli huwa neċessarju. Għaldaqstant, dawn jidhru li mhumiex effiċjenti u li jiswew wisq għan-negozji ż-żgħar. F'xi Stati Membri, l-AK taffew il-kwistjoni, jew billi għamlu valutazzjoni tar-riskji għal ċerti tipi ta' attivitajiet jew billi pparteċipaw fil-ħolqien ta' materjal simplifikat u prattiku għan-negozji ż-żgħar. F'xi Stati Membri oħrajn, is-setturi tal-ikel kienu inkoraġġuti jiżviluppaw gwidi ta' prattika tajba li wrew li huma għodod utli ħafna.

Ir-reġistrazzjoni tal-fatti kienet kultant ikkunsidrata piż amministrattiv min-negozji ż-żgħar tal-ikel. L-Istati Membri ħadu passi biex jissimplifikaw dan l-istadju u jimminimizzaw id-dokumentazzjoni li trid tinżamm.

Xi organizzazzjonijiet privati interessati allegaw li hemm differenza bejn l-Istati Membri fir-rigward tal-valutazzjoni tal-HACCP mill-AK. Xi organizzazzjonijiet indikaw tendenza li l-AK għandhom aspettativi kbar tan-negozji ż-żgħar u li jesaġeraw ir-rekwiżiti ta' dokumentazzjoni f'xi każijiet. Oħrajn indikaw li d-daqs u n-natura tal-kummerċ kienu kkunsidrati u li l-maġġoranza tal-AK jużaw flessibbiltà fl-implimentazzjoni tal-proċeduri bbażati fuq l-HACCP.

Kienu indentifikati xi diffikultajiet ukoll matul il-missjonijiet ta' spezzjonar tal-FVO dwar il-kapaċità tal-AK fil-valutazzjoni adegwata tal-proċeduri HACCP. Kien irreġistrat xi progress mill-ewwel spezzjoni fl-2006 iżda fadal lok għal titijib.

( L-Istati Membri u l-partijiet privati interessati jikkunsidraw li l-estensjoni tar-rekwiżiti bbażati fuq l-HACCP għall-FBO li joperaw fil-produzzjoni primarja mhijiex prattika. Il-gwidi dwar prattika tajba huma ġeneralmenti ikkunsidrati għodod aħjar u aktar prattiċi għall-produtturi primarji mill-proċeduri bbażati fuq l-HACCP.

3.6. Il-proċeduri ta' reġistrazzjoni u ta' approvazzjoni

( B'mod ġenerali ma kienu nnutati l-ebda diffikultajiet fir-rigward tar-reġistrazzjoni tan-negozji tal-ikel. Sistemi speċifiċi jew bażijiet ta' dejta eżistenti kienu użati fir-reġistrazzjoi tan-negozji tal-ikel (pereżempju produtturi primarji). Saru sforzi biex l-informazzjoni li n-negozji huma rikjesti jipprovdu lill-AK tkun armonizzata u minimizzata biex jitnaqqas il-piż amministrattiv.

Madankollu, huwa kultant diffiċli li wieħed jiżgura li l-FBOs kollha jonoraw l-obbligi tagħhom, pereżempju FBO li ma jikkuntattjawx lill-awtoritajiet tagħhom qabel jiftħu negozju tal-ikel, aġenti tal-ikel u kummerċjanti fuq l-internet li diffiċli jintlaħqu. Problemi oħrajn joriġinaw mill-bżonn li persuni privati li kultant joperaw fil-maniġġ, preparazzjoni jew servizz tal-ikel ikunu rreġistrati.

L-AK ma tapplika l-ebda miżata għall-ipproċessar tar-reġistrazzjoni.

( Il-provvista ta' tagħrif dwar l-approvazzjoni lill-AK ma kkawżat l-ebda problemi partikolari. Madankollu, kienu identifikati xi diffikultajiet fir-rigward tat-tip ta' stabbilimenti li jeħtieġu approvazzjoni, b'mod partikolari għal dawk li joperaw f'attivitajiet ġenerali, bħall-ħżin imkessaħ (ara punt 3.2.) u stabbilimenti tal-ippakkjar mill-ġdid.

L-approvazzjoni ta' dawn l-istabbilimenti ta' kapaċità żgħira kienet imressqa minn xi Stati Membri. Is-soluzzjonijiet jinstabu permezz ta' dispożizzjonijiet ta' flessibbiltà li jinsabu fil-pakkett dwar l-iġjene. Madanakollu, dawn id-dispożizzjonijiet jenħtieġ li jkunu promossi fuq livell nazzjonali, li seta' wassal għal diffikultatjiet f'xi Stati Membri (ara punt 3.9.).

Żewġ Stati Membri indikaw li n-negozju kollu tal-ikel kellu jkun approvat fit-territorju tagħhom.

( Filwaqt li l-aċċess mis-sit tal-Kummissjoni għal kull sit nazzjonali li jinkludi listi ta' stabbilimenti tal-ikel approvati issa huwa possibbli, ċerti Stati Membri ma użawx l-ispeċifikazzjonijiet miftiehma biex jarmonizzaw u jikkodifikaw il-preżentazzjoni ta' dawn il-listi biex ifasslu jew jaġġornaw il-listi tagħhom. Il-manutenzjoni tal-ħoloq attivi għas-siti nazzjonali trid tkun imtejba wkoll.

3.7. L-immarkar tas-saħħa u ta' identifikazzjoni

Il-prinċipji ta' mmarkar tas-saħħa u ta' identifikazzjoni ma kinux is-sors ta' diffikultajiet. Madankollu, kienu rrappurtati diffikultajiet fir-rigward ta' ċerti aspetti prattiċi, pereżempju sitwazzjonijiet fejn għandu jkun applikat immarkar għal prodotti mkebba/ippakkjati għall-konsum u fejn l-ikel ikun ippakkjat mill-ġdid. F'dawn il-każijiet, xi Stati Membri huma tal-opinjoni li l-immarkar irid jilħaq ir-rekwiżiti tal-għanijiet tal-kontrolli uffiċjali u l-għanijiet ta' traċċabbiltà.

3.8. Il-Gwidi ta' prattika tajba[5]

( L-Istati Membri ippromovew bis-sħiħ l-iżvilupp ta' gwidi nazzjonali. Il-parteċipazzjoni tal-AK hija differenti minn Stat Membru għall-ieħor, iżda b'mod ġenerali, il-linji gwida għall-iżvlupp ta' dawn il-gwidi, il-pariri prattiċi u l-gwida kienu mogħtija mill-AK lis-setturi tal-ikel. L-AK huma involuti fil-proċess ta' valutazzjoni ta' dawn il-gwidi u xi kultant jappoġġgjaw finanzjarjament il-firxa tagħhom.

Ħafna mill-organizzazzjonijiet tal-partijiet privati interessati esprimew attitudni pożittiva għall-gwidi nazzjonali ta' prattika tajba u għall-inkoraġġiment mogħti mill-AK. L-ebda ċifra dwar il-firxa tal-użu tagħhom ma tista' tingħata.

L-użu tal-gwidi huwa kkunsidrat b'mod differenti mill-AK meta jkunu qed isiru kontrolli uffiċjali. Xi Stati Membri żviluppaw sistema ta' premijiet għall-FBOs li japplikaw gwidi validati li jkun jixirqilhom, li jirriżultaw fi tnaqqis tal-frekwenza tal-kontroll u tal-livell ta' miżati applikati mill-AK għall-kontrolli uffiċjali. F'xi Stati Membri oħrajn, l-ispezzjonar huwa dipendenti fuq l-applikazzjoni ġusta tal-gwidi meta jkun allegat li dawn kienu applikati. Xi Stati Membri oħrajn ma jitolbux lill-FBOs jagħtu prova tal-adegwatezza tal-miżuri ta' kontroll tagħhom jekk isegwu l-gwida. Il-gwidi jistgħu joffru wkoll gwida utli għall-AK u jindikaw l-aħjar prattika meta t-termini 'fejn xieraq', 'fejn hemm bżonn', 'adegwat' u 'biżżejjed' huma użati fil-leġiżlazzjoni.

( Ħames gwidi Komunitarji ġew żviluppati u qegħdin ikunu evalwati. Żewġ gwidi oħrajn qegħdin ikunu żviluppati u se jkunu mibgħuta għall-evalwazzjoni meta jkunu lesti. Madankollu, madwar nofs l-organizzazzjonijiet fuq il-livell tal-UE kienu qed jikkunsidraw, jew kienu qed jikkonsultaw il-membri tagħhom, dwar jekk għandhomx jiżviluppaw abbozzi ta' dokumenti u jsegwu l-proċedura għal rikonoxximent. In-nofs l-ieħor tal-organizzazzjonijiet indikaw li ma kellhom l-ebda pjan biex jiżviluppaw gwidi Komunitarji.

3.9. Il-flessibbiltà

Sabiex tkun protetta d-diversità tal-ikel u biex il-konsumaturi u l-bżonnijiet tal-produtturi fuq skala żgħira ikunu indirizzati, fil-leġiżlazzjoni ġew inklużi dispożizzjonijiet għal flessibbiltà. Skont il-prinċipju ta' sussidjarjetà, l-Istati Membri qegħdin fl-aħjar pożizzjoni biex isibu soluzzjonijiet adegwati bbażati fuq is-sitwazzjonijiet lokali u dwar livelli xierqa ta' iġjene f'dawn in-negozji, mingħajr kompromessi għall-għan tas-sikurezza tal-ikel.

L-Istati Membri u l-partijiet privati interessati indikaw li b'mod ġenerali kienu sodisfatti ħafna bil-flessibbiltà pprovduta mill-pakkett dwar l-iġjene, li huwa kkunsidrat imfassal b'mod xieraq biex jindirizza problemi lokali. Madankollu, skont ftit notifiki tal-miżuri nazzjonali rċevuti sa issa u l-kritiki minn ċerti negozji tal-ikel (ara punt 3.6.), l-Istati Membri ma ħadux vantaġġ mill-possibilitatjiet kollha ta' flesibbiltà offruti mil-leġiżlazzjoni.

3.10. L-importazzjonijiet

( L-Istati Membri kkunsidraw li huwa neċessarju li r-regoli tal-importazzjoni jkunu armonizzati aktar għall-prodotti ta' oriġini mill-annimali għal liema r-Regolament (KE) Nru 853/2004 jistipula rekwiżiti speċifiċi (pereżempju saqajn taż-żrinġijiet, bebbux, grass ipproċessat tal-annimali). Huma ħabbtu wiċċhom ma' problemi anke fl-elenkar u l-kontroll ta' biċċiet tal-baħar ta' pajjiżi terzi li r-responsabbiltà ta' ispezzjonar tagħhom kienet delegata lil pajjiż jew Stat Membru għajr l-istat li l-biċċa tal-baħar ittajjar il-bandiera tiegħu.

L-esperjenza turi li hemm bżonn ta' kjarifika tas-sitwazzjonijiet fejn ir-regoli tal-importazzjoni nazzjonali japplikaw fin-nuqqas ta' regoli Komunitarji armonizzati.

( Il-kriżi reċenti minħabba l-importazzjoni ta' prodotti komposti impurtati kkonfermat il-bżonn għal kontroll aħjar ta' dawn il-prodotti. Dan jista' jirrikjedi l-implimentazzjoni ta' leġiżlazzjoni aktar iddettaljata u kontrolli mal-importazzjoni (pereżempju r-rwol tal-importaturi, ċertifikat speċifiku tas-saħħa).

( L-esperjenza wriet ukolll li l-proċedura attwali ta' elenkar għall-istabbilimenti ta' pajjiżi terzi fiha xi diffikultajiet (pereżempju l-perjodu ta' elenkar). Bl-iżvilupp ta' għodod ġodda Komunitarji tal-IT, dawn il-proċeduri jistgħu jkunu reviżjonati.

3.11. Il-kontrolli uffiċjali fir-rigward ta' prodotti ta' oriġini mill-annimali

( Diversi Stati Membri żviluppaw għodod speċifiċi ta' kontroll, inkluż lista ta' kontroll u proċeduri standard ta' operat. Huma investew ukoll fit-taħriġ billi l-attivitajiet ta' kontroll jinvolvu bidla importanti tal-kunċett għall-ispetturi. L-Istati Membri esprimew sodisfazzjon mal-Kummissjoni dwar l-inizjattiva ta' taħriġ, "Taħriġ aħjar għal ikel aktar sikur", li kkumplimentat l-attivitajiet ta' taħriġ tagħhom u li offriet taħriġ speċifiku dwar aspetti importanti tal-pakkett dwar l-iġjene (perezempju l-HACCP).

Madankollu, id-diffikultajiet ikomplu f'diversi Stati Membri fir-rigward ta' kontrolli kif muri mill-missjonijiet ta' spezzjonar tal-FVO. Anke jekk sar progress sinifikanti mill-2006 'l hawn, għad fadal lok għal titjib.

( Għalkemm mid-dħul fis-seħħ tal-pakkett dwar l-iġjene f'Jannar 2006 kienu inkorporati elementi ta' mmodernizzar, diversi Stati Membri u organizzazzjonijiet tal-partijiet privati interessati jikkunsidraw li l-ispezzjoni tal-laħam għandha tkun reviżjonata. Din il-pożizzjoni hija bbażata fuq problemi ta' riżorsi umani li ċerti Stati Membri jiltaqgħu magħhom fl-appuntar tal-veterinarji uffiċjali (VU) għall-biċċerija u miż-żieda fl-importanza tal-perikli għas-saħħa pubblika li mhux faċli wieħed jidentifika permezz ta' spezzjoni konvenzjonali tal-laħam. Inġibdet l-attenzjoni li r-rwol tal-uffiċjali awżiljarji għandu jkun imtejjeb, it-tqassim tar-responsabbiltajiet bejn l-FBO li jamministraw il-biċċeriji u l-AK għandu jkun kkjarifikat u li aktar xogħol ta' spezzjonar għandu jkun delegat lill-persunal tal-biċċeriji.

Diversi Stati Membri u organizzazzjonijiet tal-partijiet privati interessati jikkunsidraw li l-persunal tal-biċċeriji għadhom jingħataw aktar responsabbiltà għal biċċeriji li joqtlu speċji għajr tjur tal-irziezet u lagomorfi.

( Il-missjonijiet tal-FVO wrew li f'xi Stati Membri l-ittestjar għat- Trichinella mhuwiex implimentat b'mod xieraq. Barra minn hekk, jeżistu diffikultatjiet fir-rigward tal-akkreditazzjoni tal-laboratorji fil-biċċeriji f'xi Stati Membri. Madankollu, Stat Membru allega li kien qed juża biss laboratorji akkreditati.

Id-Danimarka kienet rikonoxxuta bħala reġjun fejn ir-riskju għat- Trichinella huwa żgħir u li jista' jidderoga mir-reġim tal-ittestjar għall-majjal lokali. Kienu rċevuti talbiet min żewġ Stati Membri oħrajn ukoll. Din id-deroga hija bħalissa limitata għall-Istati Membri tal-UE u tista' tkun ikkunsidrata l-estensjoni għal pajjiżi terzi. Żewġ Stati Membri esprimew l-interess li jirrikonoxxu stabbilimenti bħala ħielsa mit- Trichinella .

( Diversi prattiċi ta' frodi kienu identifikati mill-2006 fi mħażen imkessħa f'numru ta' Stati Membri. Kif diskuss fil-kuntest tal-leġiżlazzjoni tal-prodotti tal-annimali, ħafna mill-Istati Membri ħassew il-bżonn li jsaħħu l-istrumenti ta' kontroll li huma fil-kontroll tagħhom.

( Diffikultajiet speċifiċi oħrajn irriżultaw mill-użu, f'xi Stati Membri għal raġunijiet tal-benesseri tal-annimali, ta' metodi kimiċi mhux validati bis-sħiħ minflok analiżi ta' rutina permezz ta' bijoanaliżi bl-użu ta' ġrieden. L-Awtorità Ewropea għas-Sikurezza tal-Ikel (EFSA -European Food Safety Authority) mistennija tagħti opinjoni xjentifika dwar il-limiti attwali għall-bijotossini marini u l-metodi ta' idenfikazzjoni tagħhom sa Diċembru 2009.

3.12. Il-kriterji mikrobijoloġiċi

Skont rapporti tal-FVO, jidher li l-proċeduri tal-operaturi fil-kummerċ tal-ikel żguraw biss fi ftit drabi, fl-ewwel sena tal-applikazzjoni tar-Regolament (KE) Nru 2073/2005, li l-kriterji ta' iġjene tal-proċess u l-kriterji tas-sikurezza tal-ikel kienu milħuqa jew tal-anqas ikkunsidrati. Barra minn hekk, dan kien spiss mhux indirizzat minn superviżjoni uffiċjali tal-AK. Għalkemm is-sitwazzjoni tjiebet fl-2007/2008, għad hemm xi Stati Membri fejn dan ir-Regolament mhuwiex implimentat b'mod sodisfaċenti.

Minn perspettiva tal-Istati Membri, id-diffikultà prinċipali tirrigwarda l-implimentazzjoni tal-kriterju tal- Listeria monocytogenes għal ikel lest għall-konsum li kapaċi jkun ambjent tajjeb biex dan il-patoġenu jikber.

3.13. It-tneħħija tal-kontaminazzjoni tal-wiċċ

L-użu ta' sustanzi biex titneħħa l-kontaminazzjoni tal-wiċċ mill-ikel li joriġina mill-annimali huwa suġġett għall-approvazzjoni tal-proċedura tal-Komitoloġija. Skont l-opinjonijiet tal-EFSA, saret proposta lill-Kummissjoni fl-2008 bħala sforz biex ikun awtorizzat l-użu ta' erba' sustanzi biex titneħħa l-kontaminazzjoni tal-wiċċ mill-karkassi tat-tjur tal-irziezet. Il-Parlament Ewropew, l-Istati Membri u l-maġġoranza tal-organizzazzjonijiet tal-partijiet privati interessati indikaw in-nuqqas ta' qbil tagħhom għal din l-awtorizzazzjoni, anke jekk b'kundizzjonijiet stretti.

Il-possibilità tal-użu ta' metodi oħrajn tat-tneħħija tal-kontaminazzjoni, inkluż stim, ilma sħun jew trattamenti oħrajn, qed tkun diskussa mal-Istati Membri.

3.14. L-Informazzjoni dwar il-Katina Alimentari (FCI - Food Chain Information)

Saru dispożizzjonijiet sabiex l-FCI ikun inkluż sal-aħħar tal-perjodu tranżitorju (31.12.2009). Żewġ Stati Membri indikaw li ma għamlux użu minn dawn id-dispożizzjonijiet.

( L-FCI kellu jkun implimentat fl-1 ta' Jannar 2006 fis-settur tat-tjur tal-irziezet. L-ebda diffikultajiet kbar ma kienu rrappurtati mill-applikazzjoni ta' dispożizzjonijiet simili fil-leġiżlazzjoni preċedenti.

( L-FCI huwa mandatorju fis-settur tal-majjali mill-1 ta' Jannar 2008 u fis-setturi taċ-ċanga vitella u tal-laħam taż-żiemel mill-1 ta' Jannar 2009. Ftit diffikultajiet kienu identifikati fis-settur tal-majjali (ara hawn taħt). Rapporti dwar iċ-ċanga vitella u l-laħam taż-żiemel għandhom mhumiex disponibbli.

( L-FCI se jkun disponibbli għal speċi oħrajn (nagħaġ, mogħoż u bovini adulti) sal-1 ta' Jannar 2010. Xi Stati Membri antiċipaw diffikultajiet, b'mod partikolari, b'annimali identifikati b'mod individwali.

Id-dewmien għall-provvista tal-FCI qabel il-wasla tal-annimali kien ikkunsidrat bħala diffiċli biex ikun hemm konformità fil-każijiet kollha fis-settur tal-majjali. Diffikultajiet simili kienu mistennija fil-futur għal setturi oħrajn tal-annimali. L-Istati Membri u ċerti organizzazzjonijiet tal-partijiet interessati privati huma favur flessibbiltà akbar f'dan ir-rigward.

Billi r-responsabbiltà għall-organizzar tal-FBI u l-arranġamenti prattiċi (pereżempju dokumenti, mezz ta' skambju ta' informazzjoni) kien f'idejn l-Istati Membri, kienu nnutati xi diffikultajiet fil-kummerċ intra-Komunitarju tal-annimali u diffikultajiet oħrajn mistennija mal-importazzjonijiet. L-ewwel pass għall-iffaċilitar tal-aċċess għall-informazzjoni rikjesta mill-Istai Membri differenti huwa operattiv fil-livell tal-Kummissjoni. Madankollu, xi Stati Membri indikaw li jista' jkun xieraq li wieħed jiżviluppa formula speċifika għall-kummerċ intra-Komunitarju u possibbilment għall-importazzjonijiet fuq il-livell ta' UE.

L-esperjenza wriet ukoll li hemm bżonn ta' kjarifikazzjoni dwar il-relazzjoni bejn l-FCI u ċ-ċertifikati tas-saħħa tal-annimali fin-negozju tal-animali.

3.15. It-tbiċċir ta' emerġenza

L-Istati Membri ma rrappurtaw l-ebda diffikultajiet partikolari dwar regoli prattiċi għat-tbiċċir ta' emerġenza, iżda wrew tħassib dwar l-immarkar speċjali jew il-limitazzjoni tal-bejgħ ta' dan il-laħam. Xi Stati Membri saħqu l-bżonn li l-immarkar speċjali jkun estiż għal ċerti prodotti derivati minn dan il-laħam ukoll Stati Membri oħrajn ikkunsidraw li ma hemm l-ebda raġuni marbuta mas-sikurezza tal-ikel li tiġġustifika restrizzjoni fit-tqegħid fis-suq ta' dan il-laħam jekk dan ikun identifikat bħala tajjeb għall-konsum mill-bniedem wara spezzjoni qabel u wara t-tbiċċir.

4. KONKLUŻJONIJIET

L-Istati Membri u l-operaturi fil-kummerċ tal-ikel indikaw li huma b'mod ġenerali sodisfatti bir-Regolamenti dwar l-iġjene u li huma għamlu progress tajjeb fl-aġġustament tagħhom għalihom. Hemm appoġġ qawwi għall-prinċipji mdaħħla mir-Regolamenti. L-Istati Membri jikkunsidraw li l-leġiżlazzjoni tirrikjedi aġġustamenti żgħar iżda mhux tfassil mill-ġdid.

Skont l-Istati Membri u l-organizzazzjonijiet tal-partijiet privati interessati, l-applikazzjoni tal-pakket dwar l-iġjene ma wasslitx għal diffikultatjiet kbar b'mod ġenerali għall-operaturi fil-kummerċ tal-ikel u l-awtoritajiet kompetenti. Madankollu, l-ispezzjonijiet li saru mill-Uffiċju Alimentari u Veterinarju mill-bidu tal-2006 'l hawn irrivelaw li hemm bżonn ta' titjib ulterjuri f'numru ta' Stati Membri minħabba problemi kontinwi ta' kontroll u ta' standards dwar l-iġjene fil-produzzjoni. Bħala l-ewwel pass, hemm bżonn ta' infurzar aħjar mill-partijiet kollha interessati, l-FBO u l-AK, biex ikunu indirizzati l-kwistjonijet l-aktar pendenti identifikati fir-rapport.

Skont dan, il-Kummissjoni se tikkunsidra kif dawn id-diffikultajiet jistgħu jkunu indirizzati. Fis-sottomissjoni ta' dawn il-proposti il-Kummissjoni se tagħti każ sewwa li l-benefiċċji ta' simplifikazzjoni akkwistati minn dan il-qafas leġiżlattiv ġdid ikunu miżmuma, kemm jista' jkun.

[1] ĠU L 139, 30.4.2004, p. 1. Regolament kif emendat l-aħħar bir-Regolament (KE) Nru 1019/2008 (ĠU L 277, 18.10.2008, p. 7).

[2] ĠU L 226, 25.6.2004, p. 22. Regolament kif emendat l-aħħar bir-Regolament (KE) Nru 1020/2008 (ĠU L 277, 18.10.2008, p. 8).

[3] ĠU L 226, 25.6.2004, p. 83. Regolament kif emendat l-aħħar bir-Regolament (KE) Nru 1021/2008 (ĠU L 277, 18.10.2008, p. 15).

[4] Ara l-figura fil-qafas legali kurrenti fl-SWD – Anness II.

[5] Ara ħarsa ġenerali dwar gwidi ta' prattika tajba fl-SWD – Anness VIII.