EUR-Lex Access to European Union law
This document is an excerpt from the EUR-Lex website
Document 52007DC0100
Communication from the Commission to the European Parliament and the Council - Gender Equality and Women Empowerment in Development Cooperation [SEC(2007) 332]
Komunikazzjoni mill-Kummissjoni lill-Parlament Ewropew u lill-Kunsill - L-Ugwaljanza bejn is-Sessi u t-Tisħiħ tal-Pożizzjoni tan-Nisa fil-Kooperazzjoni għall-Iżvilupp [SEG(2007) 332]
Komunikazzjoni mill-Kummissjoni lill-Parlament Ewropew u lill-Kunsill - L-Ugwaljanza bejn is-Sessi u t-Tisħiħ tal-Pożizzjoni tan-Nisa fil-Kooperazzjoni għall-Iżvilupp [SEG(2007) 332]
/* KUMM/2007/0100 finali */
Komunikazzjoni mill-Kummissjoni lill-Parlament Ewropew u lill-Kunsill - L-Ugwaljanza bejn is-Sessi u t-Tisħiħ tal-Pożizzjoni tan-Nisa fil-Kooperazzjoni għall-Iżvilupp [SEG(2007) 332] /* KUMM/2007/0100 finali */
[pic] | KUMMISSJONI TAL-KOMUNITAJIET EWROPEJ | Brussel 8.3.2007 KUMM(2007) 100 finali KOMUNIKAZZJONI MILL-KUMMISSJONI LILL-PARLAMENT EWROPEW U LILL-KUNSILL L-Ugwaljanza bejn is-Sessi u t-Tisħiħ tal-Pożizzjoni tan-Nisa fil-Kooperazzjoni għall-Iżvilupp [SEG(2007) 332] KOMUNIKAZZJONI MILL-KUMMISSJONI LILL-PARLAMENT EWROPEW U LILL-KUNSILL L-Ugwaljanza bejn is-Sessi u t-Tisħiħ tal-Pożizzjoni tan-Nisa fil-Kooperazzjoni għall-Iżvilupp Introduzzjoni Huwa ferm rikonoxxut li l-Ugwaljanza bejn is-Sessi m'hijiex biss kruċjali fiha nnifisha imma hija dritt fundamentali u kwistjoni ta' ġustizzja soċjali. Barra minn hekk, l-Ugwaljanza bejn is-Sessi hija essenzjali għat-tkabbir u għat-tnaqqis fil-faqar, u hija importanti biex jintlaħqu l-Għanijiet tal-Millenju għall-Iżvilupp. Minkejja dan, l-inugwaljanzi bejn is-sessi għad għandhom għeruq profondi wisq fis-sistemi kulturali, soċjali u politika ta' bosta pajjiżi. Il-KE u l-Istati Membri ta' l-UE huma parteċipanti ewlenin fl-isforz biex jeliminaw id-differenzi bejn is-sessi fil-partijiet tad-dinja li għadhom qed jiżviluppaw. Fil-livell internazzjonali hemm firmatarji għall-Ftehim Internazzjonali u Dikjarazzjonijiet favur l-Ugwaljanza bejn is-Sessi (1) (għan-noti ta' l-aħħar ara Anness I ). Bl-istess mod, il-politika attwali ta' l-UE għall-iżvilupp tieħu impenn qawwi biex tħaffef il-progress f'dan il-qasam importanti. Għalhekk, il- Konsensus Ewropew (2) jenfasizza l-importanza ta' l-Ugwaljanza bejn is-Sessi fil-kuntest ta' modalitajiet ġodda ta' għajnuna. Filwaqt li l-Ugwaljanza bejn is-Sessi huwa għan komuni u valur komuni għall-UE kollha kemm hi, il-Konsensus jgħaraf l-Ugwaljanza bejn is-Sessi bħala għan fiħ innifsu. Barra minn hekk, id-dokument ta' politika jidentifika l-Ugwaljanza bejn is-Sessi bħala wieħed mill-ħames prinċipji komuni ( 3 ) tal-kooperazzjoni għall-iżvilupp ta' l-UE. Barra minn hekk, l-UE hija impenjata għall-ugwaljanza bejn in-nisa u l-irġiel, il-bniet u s-subien fil-Ftehimiet ta' kooperazzjoni għall-iżvilupp mar-reġjuni ġeografiċi kollha ( 4 ). B'żieda ma' dan, il-'Pjan ta' Rotta għall-Ugwaljanza bejn in-Nisa u l-Irġiel' ( 5 ) jidentifika l-'promozzjoni tad-drittijiet tan-nisa u tisħiħ barra mill-UE' bħala wieħed mis-sitt oqsma ta' prijorità ( 6 ). Biex isir progress lejn Ugwaljanza ikbar bejn is-Sessi, il-parti l-kbira ta' l-Istati Membri u l-Kummissjoni Ewropea s'issa, adottaw strateġija fuq żewġ binarji. Din tinkludi, fuq naħa waħda, l-integrazzjoni ta' l-Ugwaljanza bejn is-Sessi fil-politika, fl-istrateġiji u fl-azzjonijiet kollha u, min naħa oħra, il-finanzjament ta' miżuri li jappoġġjaw it-tisħiħ tan-nisa b'mod dirett (7) . Biex din l-istrateġija tiġi adattata għall-modalitajiet ġodda ta' għajnuna u għar-rekwiżiti tad-Dikjarazzjoni ta' Pariġi dwar l-Effettività ta' l-Għajnuna, il-Kummissjoni, flimkien ma' l-UNIFEM ( 8 ), organizzat Konferenza ewlenija f'Novembru 2005 dwar it-tema "Pussess ta' l-Iżvilupp: Il-Promozzjoni ta' l-Ugwaljanza bejn is-Sessi f'Modalitajiet Ġodda ta' Għajnuna u Sħubija". Din il-Konferenza rrevediet il-progress li sar fl-eliminazzjoni ta' l-inugwaljanza bejn is-sessi fil-pajjiżi li qed jiżviluppaw, u evalwat mill-ġdid ir-rwol ta' l-UE fit-tħaffif ta' l-Ugwaljanza bejn is-Sessi fil-kuntest ta' kambjamenti fl-arkitettura ta' l-għajnuna ta' l-UE għall-iżvilupp. Din il-Komunikazzjoni tibni fuq ir-riżultat ta' dik il-Konferenza, il-qafas politiku tal-Konsensus Ewropew, u fuq l-esperjenza prattika li akkwistat s'issa. Il-Komunikazzjoni twieġeb ukoll l-impenji li saru fil-Pjan ta' Rotta għall-Ugwaljanza bejn in-Nisa u l-Irġiel billi tifformula strateġija ta' l-UE għall-progress biex jintlaħqu: - drittijiet indaqs (politiċi, ċivili, ekonomiċi, fl-impjiegi, soċjali u kulturali) għal nisa, irġiel, bniet u subien; - aċċess indaqs, u kontroll fuq, riżorsi għan-nisa u l-irġiel; - opportunitajiet indaqs biex tinkiseb influwenza politika u ekonomika għan-nisa u l-irġiel. Filwaqt li l-'Programm ta' Azzjoni għall-integrazzjoni ta' l-Ugwaljanza bejn is-Sessi fil-Kooperazzjoni għall-Iżvilupp tal-Komunità' ta' qabel validu mill-2001 sa l-2006 pprovda l-bażi għall-bini ta' kapaċità fi ħdan il-Kummissjoni Ewropea, id-dokument preżenti jpoġġi l-Ugwaljanza bejn is-Sessi u t-Tisħiħ tal-Pożizzjoni tan-Nisa f'post prominenti fil-kuntest ta' l-UE u dan bl-intenzjoni li jibgħat sinjal qawwi kemm jista' jkun dwar l-importanza ta' l-Ugwaljanza bejn is-Sessi fl-isforzi futuri kollha fil-kooperazzjoni għall-iżvilupp ta' l-UE. Il-Prinċipji Ġustifikattivi għall-Ugwaljanza bejn is Sessi u t-Tisħiħ tal-Pożizzjoni tan-Nisa In-nisa huma fiċ-ċentru ta' l-iżvilupp soċjali u ekonomiku sostenibbli, it-tnaqqis fil-faqar u l-ħarsien ta' l-ambjent. Minkejja dan, l-inugwaljanza bejn is-sessi hija parti mill-esperjenza ta' kuljum ta' parti kbira tan-nisa fid-dinja. Minkejja n-natura kumplessa ta' inugwaljanzi bħal dawn, l-esperjenza wriet li l-oqsma li ġejjin huma partikolarment sinifikanti fil-fehma tar-relazzjoni bejn l-istatus tan-nisa u t-tnaqqis sostenibbli fil-faqar. Ir-rwol tan-nisa fl-impjieg u attivitajiet ekonomiċi huwa spiss sottovalutat minħabba li l-biċċa l-kbira tan-nisa jaħdmu f'setturi informali , spiss bi produttività u pagi baxxi, kundizzjonijiet ta' xogħol fqar, u bi ftit jew ebda protezzjoni soċjali. Pereżempju fl-Afrika n-nisa huma 52% tal-populazzjoni, jikkontribwixxu 75% tax-xogħol agrikulturali u jipproduċu u jbigħu fis-suq 60 sa 80% ta' l-ikel. Il-forza tax-xogħol tan-nisa fl-Afrika 'l isfel mis-Saħara fl-2005 kienet ta' 73 miljun, li tirrappreżenta 34 fil-mija ta' dawk impjegati fis-settur formali, li jaqalgħu biss 10 fil-mija tad-dħul filwaqt li għandhom 1 fil-mija ta' l-assi ( 9 ). Għalkemm il-liberalizzazzjoni tal- kummerċ kellu impatt pożittiv fuq il-parti l-kbira ta' l-ekonomiji fuq żmien twil, dan jista' jirriżulta wkoll f'konsegwenzi negattivi fil-qasir żmien għall-gruppi vulnerabbli b'effett partikolari fuq in-nisa fqar ( 10 ). Setturi differenti ta' l-ekonomija jistgħu jkollhom impatt kruċjali fuq l-Ugwaljanza bejn is-Sessi: Pereżempju infrastruttura fqira tista' tippreġudika l-edukazzjoni tal-bniet minħabba trasport mhux sikur jew jekk is-sorsi ta' l-ilma qrib 'iġiegħlu' lill-ġenituri jużaw il-bniet għax-xogħol tad-dar. It-Tisħiħ tal-Pożizzjoni tan-Nisa huwa aspett ewlieni ta' l- iggvernar . F'bosta pajjiżi għad hemm tendenza li n-nisa jkunu marġinalizzati bħala dawk li jieħdu d-deċiżjonijiet. Il-Leġiżlazzjoni li tiżgura d- drittijiet indaqs ( 11 ) għan-nisa u l-irġiel kollha hija importanti ħafna u għandha wkoll tkun akkumpanjata b'implimentazzjoni sabiex tipproteġi d-drittijiet fundamentali tan-nisa kif ukoll biex ittejjeb it-tnaqqis fil-faqar u t-tkabbir ekonomiku. F' sitwazzjonijiet ta' kunflitt in-nisa ghandhom rwol importanti ħafna u għandhom ikunu inklużi bis-sħiħ fl-isforzi ta' bini għall-paċi, b'konformità mar-Riżoluzzjoni tal-Kunsill tas-Sigurtà tan-Nazzjonijiet Uniti 1325 ( 12 ). L-inugwaljanza bejn is-sessi rigward aċċess għall- edukazzjoni tippersisti ( 13 ). 57% tat-tfal ta' l-età li jattendu l-iskola li ma jattendux l-iskola huma bniet ( 14 ), filwaqt li kważi żewġ terzi tan-nies illitterati fid-dinja huma nisa ( 15 ). Il-kapaċità tan-nisa u l-bniet li jsaħħu l-pożizzjoni ekonomika u soċjali tagħhom billi jmorru l-iskola jew billi jipparteċipaw f'attivitajiet produttivi u ċiviċi barra d-dar hija limitata bir-risponsabbiltà tagħhom bl-impenji ta' kuljum fil-qasam tax-xogħol domestiku. Fil-qasam tas- saħħa hemm tħassib dwar l-aċċess limitat tan-nisa għas-servizzi bażiċi tas-saħħa. Barra minn hekk, il-qasam ewlieni fejn hemm tħassib serju fuq l-Inugwaljanza bejn is-Sessi huwa fl-isfera tas-saħħa u drittijiet sesswali u riproduttivi (SRHR). Mhux biss żieda fl-investiment SRH jappoġġja d-dritt bażiku uman, imma żieda fl-istatus tas-saħħa tan-nisa għandu effett pożittiv fuq l-ekonomija in ġenerali. Bosta mill-gwadanji mudesti fis-saħħa tan-nisa li saru f'dawn l-aħħar deċennji issa huma mhedda bil-pandemija ta' l-HIV/AIDS. B'żieda ma' dan, ir-rata dejjem tikber ta' l-infezzjoni ta' l-HIV fost in-nisa u l-bniet hija kawża ta' tħassib serju ( 16 ). Il-vjolenza b'karatteristiċi marbuta mas-sess tal-persuna hija vjolazzjoni kemm tad-drittijiet umani tan-nisa kif ukoll ostaklu serju għall-kisba ta' ugwaljanza, żvilupp u paċi. Bosta drabi l-vjolenza sesswali hija assoċjata mal-firxa ta' l-HIV/AIDS. It-Traffikar tan-nisa huwa reat, li għandu l-għeruq fil-faqar mifrux, inugwaljanza, iggvernar dgħajjef, kunflitti armati u nuqqas ta' protezzjoni kontra d-diskriminazzjoni. Analiżi iktar dettaljata dwar l-inugwaljanza bejn is-sessi tinsab fl- Anness II . Progress u Sfidi L-Unjoni Ewropea ħadet passi importanti fl-appoġġ ta' iktar Ugwaljanza bejn is-Sessi kemm fl-Unjoni kif ukoll barra. L-Ugwaljanza bejn is-Sessi qed issir parti rikonoxxuta tad-djalogu ma' iktar u iktar pajjiżi sħab u qed tkun inkluża fil-konsultazzjonijiet ta' l-UE mas-soċjetà ċivili. Dan il-proċess żied il-livell ta' għarfien fis-sħab ta' żvilupp tagħna rigward l-importanza ta' l-Ugwaljanza bejn is-Sessi u t-tisħiħ tal-pożizzjoni tan-nisa u ssensitizzathom b'mod partikolari għar-relazzjoni bejn iktar ugwaljanza u tnaqqis fil-faqar ( 17 ). Dan il-proċess ikkumplementa l-progress kunsiderevoli fil-livell tal-pajjiż fit-tħaffif tal-kisba ta' l-Ugwaljanza bejn is-Sessi permezz ta' proġetti u programmi varji appoġġjati mill-Kummissjoni Ewropea u mill-Istati Membri ta' l-UE ( 18 ). Matul l-10 eżerċizzju ta' programmazzjoni EDF, il-KE enfasizzat partikolarment is-sensitizzazzjoni ta' l-istrateġiji tal-pajjiż rigward il-kwistjonijiet ta' ugwaljanza bejn l-irġiel u n-nisa. Sar progress ċar ukoll fil-qasam tal-bini tal-kapaċitajiet kemm fl-Istati Membri kif ukoll fil-Kummissjoni. (19) Madanakollu, minkejja dan il-progress, għad fadal sfidi sinifikanti. L-ewwelnett, għadna 'l bogħod milli nilħqu l-Għanijiet ta' Żvilupp għall-Millenju. B'mod partikolari, id-data ta' għeluq ta' l-ewwel Għan ta' Żvilupp għall-Millenju ta' l-eliminazzjoni tad-disparitajiet bejn is-sessi fl-edukazzjoni primarja u sekondarja sa l-2005 għaddiet u l-għan ma ntlaħaqx. Id-dħul tal-bniet fl-iskejjel sekondarji meta mqabbla mas-subien kien ta' medja ta' 89% fil-pajjiżi li għadhom qed jiżviluppaw. In-nisa għad għandhom sehem iżgħar ta' impjieg deċenti mill-irġiel, u waħda minn tliet nisa tbagħti minn vjolenza b'karatterstiċi marbuta mas-sess matul ħajjitha. Barra minn hekk, l-attenzjoni ta' l-Għanjiet tal-Millenju għall-Iżvilupp fl-aspetti tas-saħħa u edukazzjoni ta' l-Ugwaljanza bejn is-Sessi ma jolqtux dimensjonijiet b'diversi aspetti ta' l-Ugwaljanza bejn is-Sessi ( 20 ). It-tieni, fil-livell soċjali u kulturali hemm fatturi importanti li jservu biex il-progress jimxi bil-mod fid-direzzjoni tal-kisba ta' Ugwaljanza bejn is-Sessi. Għalhekk, strutturi soċjali tradizzjonali jistgħu joffru biss inċentivi limitati għat-tibdil tad-distribuzzjoni tas-setgħa bejn l-irġiel u n-nisa, speċjalment għal dawk b'interess qawwi li jżommu l- istatus quo . Dan jista' jispjega xi ftit kif azzjonijiet speċifikament relatati ma' l-ugwaljanza m'humiex dejjem meqjusa bħala prijorità għolja u għaliex, fil-parti l-kbira ta' l-istrateġiji tal-pajjiżi, l-ugwaljanza hija kwistjoni sussidjarja ( 21 ). Għal darb'oħra, minkejja l-progress konsiderevoli li sar, huwa ċar li l-integrazzjoni effettiva tas-sessi għadha ma ġietx integrata bis-sħiħ fl-istrateġiji tal-pajjiżi jew fil-prattika tal-kooperazzjoni għall-izvilupp ta' l-UE. Fil-każ tal-Kummissjoni Ewropea 'Evalwazzjoni Tematika ta' l-Integrazzjoni ta' l-Ugwaljanza fil-Kooperazzjoni għall-Iżviupp tal-KE mal-Pajjiżi Terzi' (2003) għarfu x-xogħol kostruttiv li sar mill-Kummissjoni imma kkonkludew li għanijiet speċifiċi ta' politika dwar l-Ugwaljanza bejn is-Sessi u l-integrazzjoni tal-kwistjonijiet relatati ma' l-ugwaljanza fil-kooperazzjoni għall-iżvilupp tal-KE kienu dgħajfa. B'żieda ma dan, ir-Rapport ikkonkluda li r-riżorsi finanzjarji speċifikament allokati għall-appoġġ ta' l-integrazzjoni tal-kwistjonijiet marbuta ma' l-ugwaljanza fil-kooperazzjoni għall-iżvilupp kienu negliġibbli meta mqabbla mar-riżorsi allokati għal kwistjonijiet orizzontali oħra.L-indikazzjonijiet huma li bosta mir-rakkomandazzjonijiet ta' din l-Evalwazzjoni jibqgħu validi - kemm għall-Kummissjoni kif ukoll għal xi uħud mill-Istati Membri ta' l-UE. (Ara d-9 rakkomandazzjonijiet ewlenin tar-Rapport fl- Anness IV ). (22) Wieħed mill-assi ewlenin li għandha l-UE biex tippromwovi l-Ugwaljanza bejn is-Sessi fir-relazzjonijiet esterni tagħha hija l-esperjenza ta' l-aħjar prassi fl-Unjoni. L-Ugwaljanza bejn is-Sessi hija magħrufa mill-UE bħala dritt fundamentali u kundizzjoni neċessarja għall-kisba ta' l-għanijiet ta' l-UE ta' tkabbir, impjieg sħiħ u koeżjoni soċjali. Bl-istess mod, l-UE investit ħafna fl-Ugwaljanza bejn is-Sessi permezz ta' leġiżlazzjoni (23), integrazzjoni ta' l-ugwaljanza, miżuri speċifiċi għall-avvanz tan-nisa, programmi ta' azzjoni, djalogu soċjali u djalogu mas-soċjetà ċivili. Għandu jinbena approċċ Ewropew ġenwin ibbażat fuq din l-esperjenza twila, kif ukoll fuq in-natura unika ta' l-Ewropa bħala grupp multikulturali u divers ħafna ta' pajjiżi li - minkejja differenzi sinifikanti fil-kultura u tradizzjonijiet - huma kollha magħqudin biex jagħtu attenzjoni kbira għall-kwistjoni ta' ugwaljanza bejn in-nisa u l-irġiel. Bħala għan Ewropew fundamentali ewlieni, l-UE għandha tappoġġja l-pajjiżi terzi biex jikkonformaw, u jimplimentaw, impenji internazzjonali bħall-Pjattaforma għal Azzjoni ta’ Beijing. Strateġija ta' l-UE biex tikseb iktar malajr l-Ugwaljanza bejn is-Sessi L-Unjoni Ewropea issa tinsab f'punt deċiżiv rigward l-Ugwaljanza bejn is-Sessi fil-Kooperazzjoni għall-Iżvilupp. Il-qafas u l-politika huma fis-seħħ - id-domanda l-iktar importanti hija kif ser tkun żgurata l-implimentazzjoni effettiva ta' l-istrateġiji u l-prassi fi ħdan il-modalitajiet ġodda ta' għajnuna li ġenwinament jagħtu riżultati lin-nisa. Irid jidher ċar li l-miżuri għaż-żieda fl-Ugwaljanza bejn is-Sessi, minbarra ż-żieda fil-koeżjoni soċjali u t-tisħiħ tal-protezzjoni tad-drittijiet tan-nisa, għandhom impatt qawwi fuq it-tkabbir ekonomiku, l-impjieg u t-tnaqqis tal-faqar. Għanijiet L-istrateġija l-ġdida ta' l-UE għandha twieġeb żewġ għanijie t: l-ewwel, biex iżżid l-effiċjenza ta' l-integrazzjoni ta' l-ugwaljanza . It-tieni, biex terġa tiffoka azzjonijiet speċifiċi għat-tisħiħ tal-pożizzjoni tan-nisa fil-pajjiżi sħab tagħna. Biex jintlaħqu dawn l-għanijiet strateġiji ta' kooperazzjoni għall-Ugwaljanza bejn is-Sessi u t-tisħiħ tal-pożizzjoni tan-nisa jridu jadattaw għall-arkitettura ġdida ta' għajnuna, primarjament appoġġ mill-baġit. Integrazzjoni effettiva Biex l-integrazzjoni ta' l-Ugwaljanza bejn is-Sessi u t-tisħiħ tal-pożizzjoni tan-nisa jsiru iktar effettivi, huma neċessarji tibdil f'tliet oqsma: 1. Azzjoni politika: 2. L-Ugwaljanza bejn is-Sessi u t-tisħiħ tal-pożizzjoni tan-nisa għandhom ikunu diskussi matul id-djalogu politiku ma' pajjiżi sħab fl-ogħla livell ( 24 ); 3. Kooperazzjoni għall-iżvilupp: 4. Ir-rwol ewlieni tan-nisa fit-tkabbir u l-iżvilupp irid jiġi kkunsidrat fil-preparazzjoni u l-implimentazzjoni ta' l-istrateġiji ta' kooperazzjoni; pereżempju strateġiji ta' sigurtà ta' l-agrikoltura u ta' l-ikel iridu jindirizzaw b'mod ċar ir-restrizzjonijiet differenti li jiffaċċjaw in-nisa rurali, minħabba li f'ċerti pajjiżi li qed jiżviluppaw huma risponsabbli għal sa 80% tal-produzzjoni bażika ta' l-ikel ( 25 ); 5. Sħubija effettiva, djalogu u konsultazzjoni jridu jkunu stabbiliti mal-partijiet interessati rilevanti (inklużi l-gvernijiet, ċentri ta' riċerka, universitajiet, is-soċjetà ċivili, organizzazzjonijiet internazzjonali) fil-preparazzjoni ta' l-istrateġiji tal-pajjiż u programmi ta' għajnuna; 6. Mekkaniżmi ta' kontabilità reċiproka li jinkludu l-Ugwaljanza bejn is-Sessi u t-tisħiħ tal-pożizzjoni tan-nisa jridu jiġu stabbiliti; ir-rwol ta' kontabilità ta' atturi diversi: il-gvern, il-komunitajiet ekonomiċi reġjonali, l-aġenziji għall-iżvilupp, l-istituzzjonijiet internazzjonali, is-soċjetà ċivili, il-parlament u l-midja, għandhom jiġu kkjarifikati; 7. Indikaturi tal-prestazzjoni sensittivi għall-ugwaljanza jridu jiġu żviluppati u wżati; 8. L-appoġġ mill-baġit irid jikkunsidra t-tħassib dwar l-Ugwaljanza bejn is-Sessi billi jorbot il-ħruġ ta' fondi ta' porżjonijiet ta' inċentivi għal indikaturi sensittivi għall-kwistjonijiet relatati mas-sessi u billi jimxi id f'id ma' kwalità għolja ta' djalogu politiku. 9. Bini tal-kapaċitajiet istituzzjonali: 10. Għodda prattiċi aġġornati jridu jiġu żviluppati fil-fażi ta' l-evalwazzjoni u l-implimentazzjoni ( 26 ); 11. Aċċess imtejjeb għall-informazzjoni u l-aħjar prassi, u taħriġ dwar ugwaljanza għall-pajjiżi sħab u l-istaff iridu jkunu pprovduti. Azzjonijiet speċifiċi għat-tisħiħ fil-pożizzjoni tan-nisa Mill-analiżi f'Sezzjoni 2 t'hawn fuq, jirriżulta li ġew identifikati 41 azzjoni speċifika marbuta ma' l-ugwaljanza fl-oqsma mifruxa li ġejjin: - L- iggvernar (drittijiet tal-bniedem, it-tisħiħ politiku tan-nisa, l-iżvilupp ta' indikaturi, ir-rwol tan-nisa f'sitwazzjonijiet ta' kunflitt u post-kunflitt); - Impjieg u attivitajiet ekonomiċi (titjib fil-pożizzjoni tan-nisa fl-oqsma ekonomiċi u soċjali, impjieg, analiżi tal-baġitjar ta' l-ugwaljanza, ġestjoni pubblika finanzjarja); - Edukazzjoni (tneħħija tal-miżati fl-iskejjel, inċentivi biex il-bniet jintbagħtu l-iskola, titjib fl-ambjent ta' l-iskola, litteriżmu fl-adulti); - Saħħa (skemi ta' protezzjoni soċjali, saħħa u drittijiet sesswali u riproduttivi); - Vjolenza b'karatteristiċi marbuta mas-sess tal-persuna (leġiżlazzjoni, protezzjoni tal-vittmi, żieda fl-għarfien permezz tal-midja, edukazzjoni u taħriġ). Lista indikattiva ta' dawn l-azzjonijiet ta' appoġġ possibbli ġiet imħejja u hija ppreżentata fl- Anness III . Dawn l-attivitajiet huma eżempji biex jgħinu jidentifikaw it-taħlita xierqa ta' programm għal kull pajjiż jew reġjun speċifiku. It-taħlita xierqa ta' attivitajiet tiġi deċiża każ b'każ wara analiżi profonda ta' kull sitwazzjoni individwali. Il-Prinċipju ta' Pussess u l-Modalitajiet Ġodda ta' Għajnuna L-iskop tad-Dikjarazzjoni ta' Pariġi huwa l-prinċipju ta' 'pussess' ta' inizjattivi ta' kooperazzjoni għall-iżvilupp mill-pajjiż li qed jirċevihom. Għal azzjonijiet li jippromwovi l-Ugwaljanza bejn is-Sessi u t-Tisħiħ tal-Pożizzjoni tan-Nisa intwera li l-'pussess' ma jridx jittieħed biss mill-gvernijiet sħab, iżda wkoll min-nisa benefiċjarji stess. Fil-prattika dan spiss ifisser pussess permezz ta' l-involviment tas-CSOs u s-CBOs ( 27 ). Appoġġ għal dawk is-CSOs favur l-Ugwaljanza bejn is-Sessi huwa partikolarment importanti f'każijiet fejn in-numru tan-nisa attivi fil-gvern lokali jew ċentrali jew fil-parlament huwa limitat. L-UE tfittex, għalhekk, l-appoġġ għall-iżvilupp ta' CSOs fejn ma jeżistux u biex jiżguraw investiment sinifikanti fil-bini tal-kapaċitajiet għal organizzazzjonijiet bħal dawn fejn jeżistu imma jeħtieġu tisħiħ pereżempju fil-oqsma ta': ħiliet ta' lobbying , promozzjoni, analiżi ta' l-ugwaljanza u litteriżmu ekonomiku. L-UE tfittex biex tiżgura l-indirizzar effiċjenti ta' l-għajnuna għall-iżvilupp ta' politika ta' ugwaljanza tal-pajjiż fuq il-bażi ta' djalogu politiku profond ma' gvernijiet sħab u partijiet involuti non-governattivi ewlenin. Ir-restrizzjonijiet u ħtiġijiet fil-kuntest ta' kull pajjiż speċifiku jkunu analiżżati sabiex jippermettu l-ħolqien ta' pussess lokali ġenwin kemm fil-livell ta' gvern u fil-livell tas-soċjetà ċivili kif ukoll fi ħdan il-komunità donatriċi. Iċ-ċaqliq fil-mudell irrappreżentat mid-Dikjarazzjoni ta' Pariġi huwa rifless fil-mekkaniżmi ġodda preferuti għall-għotja ta' l-għajnuna, jiġifieri approċċ ta' għajnuna baġitarja u mifruxa fuq is-setturi, kuntrarju għall-appoġġ għal proġetti individwali u iżolati. L-użu ta' l-għajnuna baġitarja hija dipendenti fuq il-preżenza ta' ċerti kundizzjonijiet, b'mod partikolari li għandhom strateġija ta' żvilupp nazzjonali jew settorjali li qed tiġi implimentata, li għandhom programm ta' riforma makroekonomika fis-seħħ mirfud minn donaturi internazzjonali ewlenin (ġeneralment l-IMF) u li għandhom impenn ippruvat għar-riforma. L-għajnuna baġitarja tista' tikkontribwixxi għall-kisba ta' l-Ugwaljanza bejn is-Sessi billi torbot il-ħruġ ta' fondi ta' porzjonijiet varjabbli għat-titjib fl-indikaturi diżaggregati ta' l-ugwaljanza; bit-tisħiħ tas-sistemi ta' ġestjoni ta' finanzi pubbliċi, u bl-istimular ta' djalogu iktar mifrux fuq il-prijoritajiet politiċi ta' pajjiżi sħab. Il-Kummissjoni Ewropea u l-Istati Membri għandhom jappoġġjaw l-iżvilupp ta' indikaturi kif ukoll il-ġbir ta' data rilevanti li tista' ssegwi t-tibdil fl-Ugwaljanza bejn is-Sessi u li tista' tintrabat mal-ħruġ ta' fondi minn porżjonijiet varjabbli. L-Ugwaljanza fl-Istrateġiji Nazzjonali Il-preparazzjoni ta' Dokument Strateġiku ta' Tnaqqis tal-Faqar, Pjan ta' Żvilupp Nazzjonali jew Dokument ta' Strateġija għall-Pajjiż jipprovdi opportunità unika biex tanaliżża l-istatus tan-nisa mqabbel ma' ta' l-irġiel, biex tiddetermina l-ostakli għall-iżvilupp u t-tkabbir u biex tiddefinixxi politiki sensittivi għall-ugwaljanza mifruxa mal-pajjiż. Is-sitwazzjoni ta' l-ugwaljanza f'pajjiż għandha tkun analizzata fis-setturi b'attenzjoni għall-fehma ta' l-implikazzjonijiet tagħha għat-tkabbir u l-faqar. F'dan il-kuntest, il-proċess kontinwu ta' djalogu politiku ta' l-UE mal-pajjiżi sħab jintuża biex ikun żgurat li l-kwistjonijiet ta' Ugwaljanza bejn is-Sessi huma inklużi fl-analiżi ta' varjabbiltajiet ta' faqar. Dan id-djalogu politiku jkun ikkumplimentat mill-għajnuna ta' l-UE għat-tisħiħ ta' ħiliet ta' ugwaljanza ta' awtoritajiet nazzjonali. Għandha ssir enfażi fuq id-definizzjoni tal-faqar mhux biss bħala nuqqas ta' dħul ekononiku jew riżorsi finanzjarji, imma bħala li tiġbor l-idea ta' inugwaljanza f'aċċess għal, u kontroll fuq, il-benefiċċji materjali u non-materjali fis-soċjetà. Dan jinvolvi l-inklużjoni ta' għadd ta' kwistjonijiet fuq l-aġenda politika bħal pereżempju: - Li tiġi aċċettata l-idea multidimensjonali iktar wiesgħa ta' faqar lil' hinn mill-faqar relatat mad-dħul ekonomiku inkluż il-faqar fil-ħin u miżuri ta' impatt differenzjali ta' faqar kemm fuq in-nisa kif ukoll fuq l-irġiel, kif ukoll il-promozzjoni ta' teknoloġija li tnaqqas il-faqar fil-ħin; - Li jintlaħaq fteħim li s-soċjetà ċivili għandha tikkontribwixxi għad-djalogu politiku, formulazzjoni u monitoraġġ ta' l-PRSP kollha minn perspettiva ta' ugwaljanza u ukoll ftehim biex jiġu implimentati miżuri xierqa għall-bini ta' kapaċitajiet; Ħtieġa għal Indikaturi Sensittivi għall-Ugwaljanza L-indikaturi huma neċessarji biex jitkejjlu r-riżultati ta' inklużjoni ta' ugwaljanza u azzjonijiet speċifiċi marbutin ma' l-ugwaljanza ( 28 ). Il-parti l-kbira ta' l-indikaturi li jintuża attwalment għandhom tendenza jirriflettu t-tħassib dwar l-Ugwaljanza bejn is-Sessi fis-setturi soċjali. Hemm ftit indikaturi affidabbli fil-parti l-kbira tal-pajjiżi li qed jiżviluppaw biex ikejjlu tibdil fl-impjieg fost in-nisa, l-ekonomija mhux imħallsa ta' kura, id-drittijiet ċivili, l-inċidenza/prevalenza ta' vjolenza kontra n-nisa, id-dritt ta' wirt/proprjetà u użu ta' l-art, ir-rappreżentanza tan-nisa u l-parteċipazzjoni fit-teħid ta' deċiżjonijiet. Għalhekk l-UE ser tappoġġja l-iżvilupp u l-użu ta' indikaturi sensittivi għall-ugwaljanza u t-tisħiħ ta' statistiċi bażiċi tagħhom biex isir progress fil-firxa kollha tal-kwistjonijiet ta' ugwaljanza u tisħiħ li jridu jiġu indirizzati ( 29 ). Fl- Anness VII hemm lista indikattiva ta' indikaturi possibbli, dwar l-oqsma ta' l-edukazzjoni, is-saħħa, l-iggvernar/ tisħiħ tal-pożizzjoni tan-nisa, l-impjieg/attivitajiet ekonomiċi, l-użu tal-ħin u vjolenza kontra n-nisa. Strateġiji għal Baġits ta' Rispons għall-Ugwaljanza Iż-żieda fl-użu ta' l-għajnuna baġitarja bħala strument ewlieni ta' għotja ta' għajnuna tqajjem il-kwistjoni ta' kif għandha ssir il-promozzjoni ta' l-Ugwaljanza bejn is-Sessi fi ħdan jew permezz ta' programm bħal dan. Sabiex jintlaħaq dan il-għan huwa ta' importanza assoluta li jkun żgurat li l-baġits tal-pajjiżi jintegraw fihom il-kwistjonijiet ta' ugwaljanza. Dan jeħtieġ: - Attenzjoni fuq l-għarfien ta' ugwaljanza u integrazzjoni ta' ugwaljanza fil-proċess ta' baġitjar fil-livelli nazzjonali u lokali; - Prijoritizzazzjoni mill-ġdid ta' l-infiq u l-orjentament ta' programmi fi ħdan setturi biex jinkisbu kemm l-Ugwaljanza bejn is-Sessi kif ukoll l-iżvilupp uman. - Il-monitoraġġ tad-dħul u l-infiq finanzjarju tal-gvern biex ikun żgurat li d-diskrepanza fl-inugwaljanza bejn in-nisa u l-irġiel qiegħda fil-fatt tonqos; Koordinazzjoni u Armonizzazzjoni ma' l-Istati Membri Koordinazzjoni mmirata biex iżżid bis-sħiħ il-kumplimentarità bejn il-programmi ta' l-Istati Membri ta' l-UE u l-Kummissjoni hija element ewlieni fil-promozzjoni effettiva ta' l-Ugwaljanza bejn is-Sessi fil-kooperazzjoni għall-iżvilupp. Il-Kummissjoni għandha tkompli l-prattika li torganizza laqgħat regolari ta' Esperti fl-Ugwaljanza mill-Istati Membri u, flimkien ma' l-Istati Membri, taħdem biex iżżid mhux biss il-koordinazzjoni fl-UE imma wkoll l-armonizzazzjoni ta' attivitajiet dwar il-promozzjoni ta' Ugwaljanza bejn is-Sessi fil-kooperazzjoni għall-iżvilupp. Tingħata prijorità għat-tisħiħ ta' l-esperjenza dwar l-ugwaljanza fill-KE u l-Istati Membri permezz ta' l-identifikazzjoni u l-iskambji ta' l-aħħjar prassi. It-tħejjija ta' Dokument Strateġiku għall-Pajjiż u Strateġiji ta' Assistenza Konġunta jkomplu jkunu l-attenzjoni ta' sforzi msaħħa ta' koordinazzjoni u ta' armonizzazzjoni. Barra minn hekk, id-Delegazzjonijiet tal-KE u l-Ambaxxjati ta' Istati Membri ta' l-UE jkomplu jużaw il-mekkaniżmi ta' koordinazzjoni eżistenti biex jindirizzaw attivitajiet ta' Ugwaljanza bejn is-Sessi f'dan il-qasam. Azzjoni ta' l-UE f'Livelli Internazzjonali u Reġjonali Kooperazzjoni bilaterali mal-pajjiżi sħab dwar il-kwistjoni ta' Ugwaljanza bejn is-Sessi tkun ikkumplimentati mill-azzjoni ta' l-UE fil-livell internazzjonali. Il-presenza ta' vuċi Ewropea magħquda f'dan il-livell issaħħaħ ir-rwol ta' l-UE bħala attur ewlieni globali fil-kooperazzjoni għall-iżvilupp. Il-Kummissjoni u l-Istati Membri ta' l-UE jimpenjaw ruħhom biex javvanzaw l-Ugwaljanza bejn is-Sessi u t-tisħiħ tal-pożizzjoni tan-nisa fil-fora internazzjonali rilevanti. Ta' importanza partikolari hija l-promozzjoni ta' l-estensjoni ta' l-iskop ta' l-Ugwaljanza bejn is-Sessi mis-saħħa u l-edukazzjoni għal oqsma oħra mhux milquta mill-MDG3. Il-kooperazzjoni reġjonali u inter-reġjonali tħeġġeġ il-qsim ta' informazzjoni bejn il-membri ta' organizzazzjonijiet reġjonali dwar għodda speċifiċi ta' ugwaljanza, data , dokumentazzjoni analitika u taħriġ. Il-Kummissjoni u l-Istati Membri għalhekk ikomplu jħeġġu l-kooperazzjoni reġjonali fil-qasam ta' Ugwaljanza bejn is-Sessi kif ukoll jimpenjaw ruħom fin-netwerks internazzjonali u reġjonali eżistenti f'dan il-qasam. Azzjonijiet Speċifiċi tal-KE għall-Promozzjoni ta' l-Ugwaljanza bejn is-Sessi Ir-rwol tal-Kummissjoni Ewropea fl-implimentazzjoni ta' din l-istrateġija tinvoli azzjonijiet fuq dawn it-tliet oqsma: Programmazzjoni fil-Pajjiż Il-Kummissjoni Ewropea għandha tagħti attenzjoni partikolari biex tiżgura li l-Ugwaljanza bejn is-Sessi u t-Tisħiħ tal-Pożizzjoni tan-Nisa jkunu fl-istrateġiji futuri tal-pajjiż u tar-reġjun ( 30 ). Dan għandu jinvolvi l-azzjonijiet li ġejjin: - iktar żvilupp ta' għodod interni u linji gwida ta' programmazzjoni; - il-valutazzjoni sistematika ta' ugwaljanza fl-istrateġiji reġjonali u tal-pajjiż, inklużi r-reviżjonijiet f'nofs terminu u finali ta' dawn l-istrateġiji; - l-aġġustament ta' strateġiji tal-pajjiżi skond ir-riżultati ta' l-evalwazzjonijiet imsemmija hawn fuq; - il-bini ta' sħubiji ma' organizzazzjonijiet internazzjonali rilevanti li għandhom esperjenza sinifikanti fl-integrazzjoni ta' l-ugwaljanza fi proġetti u programmi. (31) Programmi Tematiċi u Strumenti Finanzjarji Oħra Minbarra l-programmi nazzjonali jew reġjonali, riżorsi addizzjonali huma disponibbli permezz ta' programmi tematiċi multiannwali pprogrammati mill-Kummissjoni fil-perspettivi finanzjarji 2007-2013. Il-Programm Tematiku "Investiment fin-Nies" ( 32 ) jinkludi pakkett finanzjarju għall-finanzjament ta' azzjonijiet KE fil-qasam tal-promozzjoni ta' l-Ugwaljanza bejn is-Sessi u t-tisħiħ tal-pożizzjoni tan-nisa. Permezz ta' dan il-Programm Tematiku tal-KE l-finanzjament isir disponibbli għall-firxa wiesgħa ta' oqsma ta' intervenzjonijiet li ġejjin: - attivitajiet ta' politika u promozzjoni li jħeġġu l-implimentazzjoni ta' impenji internazzjonali; - il-bini ta' kapaċitajiet għall-NGOs u assoċjazzjonijiet iddedikati għall-avvanz ta' l-Ugwaljanza bejn is-Sessi u d-drittijiet tan-nisa; - it-tisħiħ tal-kapaċità statistika tal-gvernijiet. Il-fondi jkunu allokati permezz ta' sejħiet għall-proposti minn organizzazzjonijiet eliġibbli u permezz ta' ftehimiet diretti ma' sħab magħżula. L-Ugwaljanza bejn is-Sessi tkun appoġġjata wkoll permezz ta' l-implimentazzjoni tal-programmi tematiċi dwar l-Ambjent (33) u s-Sigurtà fl-Ikel ( 34 ), kif ukoll taħt l-Istrument Ewropew l-ġdid għad-Demokrazija u d-Drittijiet Umani (EIDHR II) ( 35 ) u l-Istrument għall-Istabbiltà ( 36 ). Il-Monitoraġġ u s-Segwitu Ir-riżultat prattiku ta' din l-Istrateġija l-ġdida ta' l-UE trid tkun segwita. Bl-istess mod, biex jiġi evalwat il-progress li sar u biex l-Istrateġija tiġi rfinuta u adattata għall-bidliet fil-kuntest internazzjonali, fl-2010 l-Kummissjoni Ewropea ser torganizza it-tieni Konferenza Internazzjonali Ewlenija dwar l-Ugwaljanza bejn is-Sessi bil-parteċipazzjoni tal-partijiet interessati ewlenin kollha ( 37 ). B'żieda ma' dan, valutazzjoni f'nofs terminu u finali dwar l-implimentazzjoni ta' din l-istrateġija ssir minn evaltwatur estern fl-2010 u fl-aħħar ta' l-10 Ċiklu EDF. Dawn l-evalwazzjonijiet għandhom jinkludu analiżi ta' l-ugwaljanza tal-baġit tal-proġetti ffinanzjati mill-KE u l-programmi li jinkludu appoġġ baġitarju ġenerali f'ta' l-inqas tnax-il pajjiż magħżula li jkunu fil-proġett pilota. Id-Delegazzjonijiet tal-KE, f'kollaborazzjoni fil-qrib ma' l-Ambaxxjati ta' l-Istati Membri, jkomplu jinkludu fir-rapporti annwali tagħhom, evalwazzjoni tal-promozzjoni u l-kisbiet ta' l-Ugwaljanza bejn is-Sessi fil-pajjiż sieħeb. Barra minn hekk, is-sezzjoni ta' l-Ugwaljanza bejn is-Sessi tar-'Rapport Annwali dwar il-politika għall-iżvilupp u l-implimentazzjoni ta' l-għajnuna esterna tal-Komunità Ewropea' jkompli jippubblika informazzjoni aggregata dwar progress li jkun sar biex tinkiseb l-Ugwaljanza bejn is-Sessi. Il-KE u l-Istati Membri jeżaminaw il-possibbiltà ta' sistema konġunta ta' l-UE għal rapporti annwali li tista' tinkludi l-monitoraġġ ta' inklużjoni ta' ugwaljanza fil-kooperazzjoni għall-iżvilupp ta' l-UE. Konklużjoni L-eradikazzjoni tal-faqar titlob li n-nisa u l-irġiel jingħataw opportunitajiet indaqs fl-oqsma ekonomiċi u soċjali u jingħataw aċċess indaqs għal, u kontroll fuq, ir-riżorsi tas-soċjetà. Madanakollu, jekk irid isir progress sinifikanti fil-kisba ta' iktar Ugwaljanza bejn is-Sessi mill-pajjiżi sħab ta' l-UE li qed jiżviluppaw, l-UE għandha bżonn tindirizza b'mod sistematiku r-restrizzjonijiet fil-kisba ta' dan il-għan li jeżisti kemm fuq in-naħa tal-pajjiżi li qed jiżviluppaw stess kif ukoll preżenti f'xi wħud mill-mekkaniżmi ta' kooperazzjoni għall-iżvilupp ta' l-UE stess. Dawn il-kwistjonijiet jistgħu jiġu indirizzati biss fil-kuntest ta' djalogu politiku msaħħaħ li jinkludi l-kwistjonijiet relatati mas-Sess bħala tema espliċita u li jwitti t-triq għall-UE biex timpenja ruħa attivament ma' dawk is-CSO's u organizzazzjonijiet oħra li jiffurmaw il-kostitwenza għal iktar Ugwaljanza bejn is-Sessi fil-pajjiż involut. Fi ħdan il-qafas, l-istrument ewlieni biex tintlaħaq Ugwaljanza ikbar, l-integrazzjoni ta' l-ugwaljanza trid tintuża b'mod iktar effettiv u prattiku jekk irridu li jsir progress lejn l-għan ta' iktar Ugwaljanza bejn is-Sessi. L-istrument sekondarju, ta' azzjonijiet speċifiċi mmirati , għat-tisħiħ tal-pożizzjoni tan-nisa, irid jintuża sabiex jikkumplimenta l-attivitajiet ta' integrazzjoni u biex jindirriza l-kwistjonijiet strateġiċi ewlenin li għandhom impatt fuq il-benessri u l-opportunitajiet ta' gruppi vulnerabbli partikolari. Għaż-żewġ istrumenti, l-applikazzjoni tagħhom trid tkun sensittiva għal, u tirrifletti, is-sitwazzjoni soċjali u kulturali unika ta' kull wieħed mill-pajjiżi sħab ta' l-UE li qed jiżviluppaw. Biex ikun appoġġjat approċċ ta' dan it-tip, l-attenzjoni ta' l-Ugwaljanza bejn is-Sessi, li, s'issa, kienet fuq is-saħħa u l-edukazzjoni, għandha titwessa u tinfirex biex tinkludi oqsma oħra ta' kooperazzjoni. Taħlita ta' promozzjoni, appoġġ għall-gruppi tan-nisa u azzjonijiet speċifiċi biex ibiddlu t-tendenzi kulturali, soċjali u politiki u d-distribuzzjoni ta' setgħa politika u ekonomika jimmarkaw it-triq 'l quddiem għall-promozzjoni ta' l-Ugwaljanza bejn is-Sessi. Huwa ċar li din ser tkun sfida importanti. Imma l-UE hija impenjata li tappoġġja l-pajjiżi sħab tagħna biex jegħlbu l-ostakli kollha f'din il-mixja importanti.