[pic] | IL-KUMMISSJONI TAL-KOMUNITAJIET EWROPEJ |

Brussel 12.7.2006

KUMM(2006) 373 finali

2006/0132 (COD)

Proposta għal

DIRETTIVA TAL-PARLAMENT EWROPEW U TAL-KUNSILL

li tistabbilixxi qafas għal azzjoni Komunitarja biex jintlaħaq użu sostenibbli tal-pestiċidi

(ippreżentata mill-Kummissjoni) {SEC(2006) 894}{SEC (2006) 914 }

MEMORANDUM TA’ SPJEGAZZJONI

1. Il-kuntest tal-proposta

- Ir-raġunijiet għall-proposta u l-għanijiet tagħha

Il-pestiċidi huma sustanzi u prodotti attivi ddisinjati biex jinfluwenzaw proċessi fundamentali f'organiżmi ħajjin, u għalhekk, għandhom il-potenzjal li joqtlu jew jikkontrollaw l-organiżmi ta' ħsara. B’konsegwenza, jistgħu jikkawżaw effetti negattivi mhux mixtieqa fuq organiżmi li mhumiex dawk fil-mira, fuq saħħet il-bniedem u fuq l-ambjent. Minħabba ċ-ċirkostanzi partikolari ta’ l-użu tal-pestiċidi (partikolarment għal skopijiet ta' ħarsien tal-pjanti) – ir-rilaxx intenzjonat fl-ambjent -, huma soġġetti għal regolazzjoni fl-Istati Membri u fil-Komunità. Matul is-snin, ġiet stabbilita sistema żviluppata ħafna għall-evalwazzjoni tar-riskji ta' l-użu tal-pestiċidi fuq saħħet il-bniedem u fuq l-ambjent.

Minkejja l-qafas regolatorju eżistenti, ammonti mhux mixtieqa ta’ ċerti pestiċidi għadhom jistgħu jinsabu fl-ambjent fiżiku naturali (partikolarment il-ħamrija u l-ilma), u fil-prodotti agrikoli għadhom jistgħu jiġu individwati residwi li jisbqu l-limiti regolatorji. Sejbiet xjentifiċi ġodda u emerġenti bħall-potenzjal ta’ ċerti kimiċi, fosthom il-pestiċidi, li jfixklu t-tħaddim tas-sistema endokrinali anki f’konċentrazzjonijiet baxxi – jenfasizzaw ir-riskji possibbli għall-bnedmin u għall-ambjent mill-użu ta’ sustanzi bħal dawn.

Fl-adozzjoni tad-Deċiżjoni li tadotta s-Sitt Programm ta' Azzjoni Ambjentali (6EAP), il-Parlament Ewropew u l-Kunsill għarfu li jinħtieġ li jkompli jitnaqqas l-impatt tal-pestiċidi fuq saħħet il-bniedem u fuq l-ambjent, partikolarment dak tal-prodotti għall-protezzjoni tal-pjanti. Enfasizzaw il-ħtieġa li jsir użu iktar sostenibbli mill-pestiċidi u ddeskrivew fil-qosor strateġija b’approċċ doppju:

- L-implimentazzjoni sħiħa u r-reviżjoni xierqa tal-qafas ġuridiku rilevanti

- L-iżvilupp ta’ Strateġija Tematika dwar l-Użu Sostenibbli tal-Pestiċidi

Fil-Komunikazzjoni tagħha ‘Strateġija Tematika dwar l-Użu Sostenibbli tal-Pestiċidi’ [COM(2006) 372], il-Kummissjoni tippreżenta l-miżuri varji li jistgħu jkunu parti mill-istrateġija. Dawn, safejn hu possibli, huma integrati fl-istrumenti ġuridiċi u l-politiki eżistenti. L-għan ta’ l-abbozz tad-Direttiva annessa huwa l-implimentazzjoni ta’ dawk il-partijiet ta’ l-Istrateġija Tematika li jirrikjedu leġiżlazzjoni ġdida.

Minkejja li fid-dokumenti kollha li huma parti mill-Istrateġija Tematika jintuża t-terminu “pestiċidi”, għalissa, il-proposta attwali tiffoka fuq prodotti għall-protezzjoni tal-pjanti. Hemm bosta raġunijiet għal din il-limitazzjoni, inkluż il-fatt li l-prodotti għall-protezzjoni tal-pjanti huma l-iktar grupp ta’ pestiċidi importanti u għandhom l-itwal storja ta’ leġiżlazzjoni. Il-leġiżlazzjoni dwar it-tqegħid ta’ prodotti bijoċidali fis-suq ġiet introdotta biss dan l-aħħar permezz tad-Direttiva 98/8/KE u l-esperjenza tal-Kummissjoni u ta' l-Istati Membri għadha mhix biżżejjed biex tipproponi iktar miżuri. Barra minn hekk, jidher ċar mid-Deċiżjoni tal-Parlament Ewropew u tal-Kunsill li tadotta s-6EAP li, minkejja li jintuża t-terminu ‘pestiċidi’, it-tħassib ewlieni huwa marbut mal-prodotti għall-protezzjoni tal-pjanti. Dan huwa enfasizzat mill-ħames inċiż ta’ l-Artikolu 7(1), li jsejjaħ għal ‘kif ukoll tnaqqis sinifikanti fir-riskji u fl-użu tal-pestiċidi konsistenti mal-protezzjoni neċessarja ta’ l-uċuh tar-raba’’, kif ukoll mill-Artikolu 7(2)(c), li jispeċifika d-Direttiva 91/414/KEE bħala l-qafas ġuridiku applikabbli li għandu jiġi kkomplementat mill-Istrateġija Tematika. Konsegwentement, din il-proposta, għalissa, se tiffoka fuq l-użu tal-prodotti għall-protezzjoni tal-pjanti. Madankollu, jekk fil-ġejjieni jitqies li jinħtieġu miżuri komparabbli għall-bijoċidi, dawn jiġu inkorporati fl-Istrateġija Tematika skond kif ikun jixraq.

- Il-kuntest ġenerali

Minkejja r-riskji għas-saħħa tal-bniedem u l-ambjent marbuta mal-pestiċidi, l-użu tagħhom jiġġenera bosta benefiċċji – fil-biċċa l-kbira ekonomiċi – partikolarment għall-bdiewa. Il-pestiċidi jimmassimizaw il-produzzjoni agrikola u l-kwalità tal-prodotti agrikoli, u jimminimizzaw ix-xogħol involut. Jistgħu jikkontribwixxu għat-tnaqqis ta’ l-erożjoni tal-ħamrija billi jippermettu l-koltivazzjoni b’inqas ħdim ta’ l-art, u jgħinu biex jiżguraw provvisti affidabbli ta' firxa wiesgħa ta' prodotti agrikoli bi prezz għal but kulħadd. Il-prodotti għall-protezzjoni tal-pjanti huma wkoll mezz importanti biex ikunu sodisfatti r-rekwiżiti għas-saħħa tal-pjanti u jippermettu l-kummerċ internazzjonali fil-prodotti agrikoli. Dawn huma r-raġunijiet ewlenin għaliex il-pestiċidi jintużaw ħafna fl-agrikoltura. Barra mis-settur agrikolu, il-pestiċidi għandhom ukoll firxa wiesgħa ta’ użijiet, mill-preservazzjoni ta’ l-injam jew id-drappijiet sal-protezzjoni tas-saħħa pubblika.

Il-politiki u l-leġiżlazzjoni eżistenti ġew introdotti l-ewwel fil-livell Komunitarju fl-1979 u evolvew sewwa matul is-snin biex ikkolminaw fl-adozzjoni tad-Direttiva 91/414/KEE li tikkonċerna t-tqegħid fis-suq ta' prodotti għall-protezzjoni tal-pjanti u tad-Direttiva 98/8/KE dwar it-tqegħid fis-suq tal-prodotti bijoċidali. Dawn jirrikjedu li l-prodotti kollha għall-protezzjoni tal-pjanti u l-prodotti bijoċidali kollha jkunu evalwati u awtorizzati qabel ma jkunu jistgħu jitqiegħdu fis-suq. Minkejja ż-żidiet fl-ispejjeż involuti f’dan il-proċess u n-numru dejjem jonqos ta’ sustanzi attivi fis-suq, il-konsum effettiv u l-użu tal-pestiċidi fl-UE ma naqasx f’dawn l-aħħar għaxar snin. Fl-istess ħin, il-perċentwal ta' kampjuni ta’ ikel u għalf fejn instabu residwi ta’ pestiċidi, jisboq il-limiti regolatorji massimi, iżda jibqa’ madwar 5%. Barra minn hekk, ċerti pestiċidi jinsabu komunement fl-ambjent akkwatiku f’konċentrazzjonijiet 'il fuq sewwa mil-limitu regolatorju, u ma jidher li hemm l-ebda sinjal ta’ tnaqqis. Matul dawn l-aħħar ħmistax-il sena, ġew osservati tibdiliet sinifikanti, iżda mhux uniformi, fl-użu tal-pestiċidi fost l-Istati Membri. Filwaqt li l-użu tal-pestiċidi naqas f’xi Stati Membri, f’oħrajn ġiet osservata żieda f'daqqa. Dawn ix-xejriet diverġenti, li jindikaw differenzi fil-politiki fost l-Istati Membri, jiġġustifikaw azzjoni fil-livell Komunitarju, partikolarment sabiex jiġi armonizzat il-livell ta' protezzjoni tas-saħħa tal-bniedem u ta’ l-ambjent.

Skond l-Artikolu 7(1) tad-Deċiżjoni Nru 1600/2002/KE li tniżżel is-Sitt Programm ta’ Azzjoni tal-Komunità Ambjentali, l-għan komprensiv ta' l-Istrateġija Tematika huwa li jitnaqqsu l-impatti tal-pestiċidi fuq l-ambjent u s-saħħa tal-bniedem, u b'mod aktar ġenerali, li jintlaħaq użu aktar sostenibbli tal-pestiċidi kif ukoll tnaqqis komprensiv sinifikanti fir-riskji u fl-użu tal-pestiċidi, konsistentement mal-livell neċessarju ta’ protezzjoni tal-pjanti mill-organiżmi ta’ ħsara.

Skond l-Artikolu 7(2)(c) tad-Deċiżjoni Nru 1600/2002/KE, l-għanijiet speċifiċi ta’ l-Istrateġija Tematika huma:

- it-tnaqqis tal-perikli u tar-riskji għas-saħħa u għall-ambjent mill-użu tal-pestiċidi;

- it-titjib tal-kontrolli dwar l-użu u d-distribuzzjoni tal-pestiċidi;

- it-tnaqqis tal-livelli ta’ sustanzi attivi perikolużi, inkluż permezz tas-sostituzzjoni ta’ dawk l-aktar perikolużi b'alternattivi aktar sikuri (fosthom dawk mhux kimiċi);

- l-inkoraġġiment ta’ l-użu ta’ ta’ koltivazzjoni ta' uċuħ tar-raba' b’pestiċidi mill-inqas jew mingħajrhom, partikolarment billi jiżdied l-għarfien ta’ l-utenti, permezz tal-promozzjoni ta’ kodiċijiet ta' prassi tajba, u l-kunsiderazzjoni ta’ l-applikazzjoni possibbli ta’ strumenti finanzjarji;

- l-istabbiliment ta’ sistema trasparenti għar-rappurtar u għall-monitoraġġ tal-progress li jkun sar lejn il-ksib tal-miri ta’ l-istrateġija, inkluż l-iżvilupp ta’ indikaturi adegwati;

L-Istrateġiji Tematiċi huma għodod ġodda, li jsegwu kunċett komprensiv fl-indirizzar ta' tema speċifika. L-integrazzjoni tal-miżuri ta’ l-Istrateġija fil-politiki u l-leġiżlazzjoni eżistenti hija element ewlieni. Għaldaqstant, il-miżuri xierqa se jittieħdu preferebbilment fil-qafas ta’ dawn il-politiki. F’dan ir-rigward, miżuri speċifiċi għall-promozzjoni ta’ biedja b’użu mill-inqas tal-pestiċidi diġà huma previsti fil-politika Agrikola Komuni, partikolarment ir-Regolament (KE) Nru 1698/2005 dwar appoġġ għall-iżvilupp rurali. Ir-Regolament (KE) Nru 396/2005 dwar il-livelli massimi ta' residwu ta' pestiċidi fi jew fuq ikel u għalf li joriġina minn pjanti u annimali u jemenda d-Direttiva tal-Kunsill 91/414/KEE, li ġie adottat dan l-aħħar, jipprovdi għal tisħiħ fil-programmi annwali ta' monitoraġġ. Fost oħrajn, il-monitoraġġ ambjentali għall-pestiċidi, se jkun parti mill-attivitajiet ta’ monitoraġġ rikjesti mid-Direttiva ta’ Qafas dwar l-Ilma.

Madankollu, mit-tħejjija għall-Istrateġija Tematika, partikolarment mill-proċess ta' konsultazzjoni u l-evalwazzjoni ta' l-impatt, ħareġ li xi wħud mill-miżuri previsti ma jistgħux jiġu integrati fil-leġiżlazzjoni jew il-politiki eżistenti. Għal ħafna minnhom, deher li l-proposti leġiżlattivi huma l-iktar mezzi effettivi ta’ implimentazzjoni. L-abbozz ta' Direttiva mehmuż fih il-miżuri kollha li għalihom tqies li tinħtieġ leġiżlazzjoni ġdida, b'żewġ eċċezzjonijiet:

- il-ġbir u r-rappurtar ta’ statistika rigward it-tqegħid fis-suq u l-użu tal-prodotti għall-protezzjoni tal-pjanti, li għalihom il-Kummissjoni se tipproponi Regolament separat,

- iċ-ċertifikazzjoni tat-tagħmir għall-applikazzjoni tal-pestiċidi mqiegħed fis-suq, li għalih il-Kummissjoni se tipproponi Direttiva separata li possibbilment se temenda d-Direttiva 2006/42/KE tas-17 ta’ Mejju 2006 dwar il-makkinarju u li temenda d-Direttiva 95/16/KE (tfassil mill-ġdid)[1].

Barra minn dawn it-tliet proposti, il-Kummissjoni se tipproponi reviżjoni komprensiva tad-Direttiva 91/414/KEE li, fost oħrajn, se timplimenta tnejn mill-ħames għanijiet ta’ l-Istrateġija Tematika dwar l-Użu Sostenibbli tal-Pestiċidi: it-tisħiħ tad-dispożizzjonijiet dwar kontrolli uffiċjali tal-konformità mal-kundizzjonijiet kollha marbuta ma' l-użu tal-prodotti għall-protezzjoni tal-pjanti fil-livell tas-suq u ta' l-utent; u dispożizzjonijiet għall-applikazzjoni ta’ evalwazzjoni komparattiva u l-prinċipju tas-sostituzzjoni fl-awtorizzazzjoni tal-prodotti għall-protezzjoni tal-pjanti.

- Id-dispożizzjonijiet eżistenti fil-qasam tal-proposta

Il-qafas regolatorju tal-Komunità dwar il-prodotti għall-protezzjoni tal-pjanti jiffoka partikolarment fuq il-bidu u t-tmiem taċ-ċiklu tal-ħajja ta' prodotti ta' dan it-tip. L-iktar leġiżlazzjoni rilevanti hija:

(1) Id-Direttiva 91/414/KE dwar it-tqegħid fis-suq ta' prodotti għall-protezzjoni tal-pjanti, u

(2) Ir-Regolament (KE) Nru 396/2005 dwar il-livelli massimi ta' residwu ta' pestiċidi fl-ikel u fl-għalf.

L-għan tad-Direttivi 91/414/KEE u 98/8/KE huwa l-prevenzjoni tar-riskji f'ras il-għajn, permezz ta' evalwazzjoni komprensiva ħafna għal kull sustanza attiva u l-prodotti li jkun fihom dik is-sustanza, qabel ma jistgħu jiġu awtorizzati għall-użu. Ir-Regolament (KE) Nru 396/2005 jiffissa livelli massimi ta’ residwi (MRLs) ta’ sustanzi attivi fil-prodotti agrikoli u b’hekk jikkontribwixxi biex jillimita r-riskji lill-konsumatur fi tmiem il-katina alimentari. Barra minn hekk, il-monitoraġġ tal-konformità ma’ l-MRLs huwa għodda importanti biex wieħed jevalwa jekk il-bdiewa ta’ l-UE applikawx korrettament l-istruzzjonijiet u r-restrizzjonijiet marbuta ma’ l-awtorizzazzjoni tal-prodotti għall-ħarsien tal-pjanti.

Wieħed min-nuqqasijiet tal-qafas ġuridiku huwa li l-fażi ta’ l-użu attwali, li hija kruċjali għad-determinazzjoni tar-riskji totali li jġibu magħhom il-pestiċidi, mhijiex indirizzata biżżejjed. Minħabba l-ambitu tagħhom, l-istrumenti legali eżistenti mhux se jkunu jistgħu jilħqu l-għanijiet kollha deskritti fis-6EAP, anki meta jiġu riveduti. Għaldaqstant, il-miżuri fl-Istrateġija Tematika u partikolarment f’dan l-abbozz għal Direttiva jippruvaw jindirizzaw dan in-nuqqas.

- Il-konsistenza ma' politiki u għanijiet oħra ta’ l-Unjoni

Il-proposta hija koerenti bis-sħiħ ma’ l-għanijiet u l-miri tas-Sitt Programm ta’ Azzjoni Ambjenti, bħall-protezzjoni tan-natura u l-bijodiversità, l-ambjent u s-saħħa u l-kwalità tal-ħajja. Hija wkoll konformi ma’ l-Istrateġija ta’ Liżbona, l-Istrateġija ta’ l-Unjoni Ewropea għall-iżvilupp sostenibbli, flimkien ma’ strateġiji tematiċi oħra (partikolarment l-Istrateġiji dwar il-Ħamrija u dwar il-Baħar), il-politika ta’ l-UE dwar il-protezzjoni ta’ l-ilma, is-sikurezza ta’ l-ikel u l-protezzjoni tal-konsumatur.

2. Konsultazzjoni mal-partijiet interessati u l-evalwazzjoni ta’ l-impatt

- Konsultazzjoni mal-partijiet interessati

Metodi ta' konsultazzjoni, is-setturi ewlenin fil-mira u l-profil ġenerali ta’ min ipparteċipa

Skond is-Sitt Programm ta’ Azzjoni Ambjentali, l-Istrateġiji Tematiċi għandhom jiġu żviluppati fi proċess b’żewġ partijiet li jinvolvi l-partijiet interessati kollha. Bil-Komunikazzjoni tagħha msejħa ‘Lejn Strateġija Tematika dwar l-Użu Sostenibbli tal-Pestiċidi’[2], il-Kummissjoni nediet eżerċizzju wiesa’ ta’ konsultazzjoni.

Il-Komunikazzjoni fakkret fin-nuqqasijiet tal-qafas regolatorju attwali fir-rigward tal-fażi ta' l-użu fiċ-ċiklu tal-ħajja tal-prodotti għall-protezzjoni tal-pjanti. Inkludiet tagħrif estensiv ta’ sfond dwar il-benefiċċji u r-riskji meta wieħed juża l-pestiċidi, u ppreżentat lista ta' kwistjonijiet essenzjali li għandhom jiġu indirizzati. Iddiskutiet il-miżuri possibbli biex jitreġġgħu lura x-xejriet negattivi u biex tiġi indirizzata l-fażi ta’ l-użu iktar speċifikament.

Il-konsultazzjoni inkludiet lill-Parlament Ewropew, il-Kunsill, il-Kumitat Ekonomiku u Soċjali Ewropew u l-pubbliku ġenerali (permezz ta' l-internet). Waslu iktar minn 150 kontribut. Barra minn hekk, il-Kummissjoni organizzat Konferenza għall-Partijiet Interessati f’Novembru 2002 b'iktar minn 200 parteċipant mill-gruppi kollha rilevanti tal-partijiet interessati, bħall-industrija tal-pestiċidi, l-organizzazzjonijiet tal-bdiewa, l-awtoritajiet, u organizzazzjonijiet tal-konsumaturi u ta' l-ambjent.

Konsultazzjonijiet oħra saru permezz tal-parteċipazzjoni tal-Kummissjoni f'diversi konferenzi esterni dwar diversi kwistjonijiet speċifiċi (pereżempju, l-evalwazzjoni komparattiva/is-sostituzzjoni, it-tagħmir għall-applikazzjoni, il-kunċett tal-Ġestjoni Integrata ta’ Organiżmi ta’ Ħsara) u f’laqgħat speċifiċi li l-Kummissjoni nnifisha organizzat (pereżempju, dwar il-bexx mill-ajru). F’pass finali ta' konsultazzjoni, il-Kummissjoni nediet konsultazzjoni oħra fuq l-internet permezz ta' 'Leħnek fl-Ewropa' dwar il-miżuri li għandhom jiġu inklużi fl-abbozz anness tad-Direttiva.

Sommarju tar-risposti u kif tqiesu

L-għanijiet u ħafna mill-miżuri possibbli, kif deskritti fil-Kapitolu VI tal-Komunikazzjoni ta’ l-2002, ġew appoġġati b'mod wiesa’ mill-partijiet interessati u l-istituzzjonijiet. Il-kummenti kollha huma disponibbli fil-websajt:http://europa.eu.int/commenvironment/ppps/1st_step_consul.htm.

Id-dokumenti u r-rapporti mill-konsultazzjoni mal-partijiet interessati huma disponibbli fil-websajt: http://europa.eu.int/comm/environment/ppps/1st_step_conf.htm.

Sommarju iktar iddettaljat tal-proċess ta’ konsultazzjoni u r-riżultati tiegħu jinsab fl-Evalwazzjoni ta’ l-Impatt, li hija ppreżentata flimkien ma' dan l-abbozz tad-Direttiva. Il-kontribuzzjonijiet kollha tqiesu fit-tħejjija ta’ l-elementi varji ta’ l-Istrateġija Tematika, inklużi d-Direttiva mehmuża u l-Evalwazzjoni ta’ l-Impatt.

Saret konsultazzjoni miftuħa fuq l-Internet mis-17 ta’ Marzu 2005 sat-12 ta’ Mejju 2005. Il-Kummissjoni rċeviet madwar 1 800 risposta. Ir-riżultati huma disponibbli fil-websajt:http://europa.eu.int/comm/environment/ppps/pdf/stats_consult.pdf.

- Il-ġbir u l-użu ta' l-għarfien espert

Oqsma xjentifiċi/Oqsma ta’ għarfien espert ikkonċernati

L-agrikultura, il-protezzjoni tal-pjanti, il-makkinarju u l-inġinerija (it-tagħmir għall-applikazzjoni, partikolarment l-isprejers u tagħmir relatat), bexx mill-arju, analiżi ta' l-impatti ekonomiċi, soċjali u ambjentali.

Il-metodoloġija użata

Konsultazzjonijiet bilaterali mal-partijiet interessati, organizzazzjoni ta’ laqgħat, parteċipazzjoni f’konferenzi, studji minn konsulenti.

L-organizzazzjonijiet/esperti ewlenin ikkonsultati

Awtoritajiet ta’ l-Istati Membri, l-industrija tal-pestiċidi, l-organizzazzjonijiet tal-bdiewa, l-akkademja, l-Organizzazzjoni Ewropea ta’ l-Istandards(CEN), organizzazzjonijiet ambjentali.

Sommarju tal-pariri li ngħataw u ġew użati

Il-pariri rċevuti kkonfermaw li miżuri addizzjonali rigward il-bexx mill-ajru, l-istandardizzazzjoni u l-ispezzjoni regolari tat-tagħmir għall-applikazzjoni tal-pestiċidi, l-indikaturi u l-ġbir u r-rimi ta' imballaġġ vojt huma meħtieġa, u rekwiżiti bħal dawn ġew integrati fl-abbozz tad-Direttiva.

Il-mezzi użati biex il-pariri ta' l-esperti jsiru disponibbli għall-pubbliku

Bħall-kontributi l-oħra kollha matul il-konsultazzjoni, il-pariri esperti huma disponibbli fuq il-websajt tal-Kummissjoni:http://europa.eu.int/comm/environment/ppps/2nd_step_tech.htm.

- L-evalwazzjoni ta' l-impatt

Għal kull miżura proposta fl-abbozz tad-Direttiva, minn tliet sa ħames għażliet li jvarjaw minn miżuri volontarji għal miżuri mandatorji ġew eżaminati fir-rigward ta' l-impatti ekonomiċi, soċjali u ambjentali fuq id-diversi partijiet interessati u l-awtoritajiet.

Barra minn hekk, tqies xenarju ta’ ‘ebda għażla’ bħala referenza li fuqu setgħu jiġu vvalutati l-ispejjeż u l-benefiċċji antiċipati mill-miżuri proposti.

Il-Kummissjoni wettqet Evalwazzjoni ta' l-Impatt, li r-rapport tagħha huwa ppreżentat fl-istess waqt li qed titressaq din il-proposta, bħala Dokument ta' Ħidma ta' l-Istaff tal-Kummissjoni. Hija disponibbli wkoll fil-websajt: http://ec.europa.eu/environment/ppps/2nd_step_study.htm .

3. L-elementi ġuridiċi tal-proposta

- Sommarju ta' l-azzjoni proposta

Id-Direttiva proposta tal-Parlament Ewropew u tal-Kunsill se timplimenta dawk id-dispożizzjonijiet ta' l-Istrateġija Tematika li ma jistgħux jiġu inklużi fl-istrumenti jew il-politiki eżistenti, bl-eċċezzjoni tal-ġbir ta' l-informazzjoni statistika rigward it-tqegħid fis-suq u l-użu tal-prodotti għall-protezzjoni tal-pjanti. Id-Direttiva proposta se jkun fiha regoli dwar:

- L-istabbiliment ta' Pjanijiet Nazzjonali ta' Azzjoni (NAPs- National Action Plans ) biex jistabbilixxu għanijiet għat-tnaqqis tal-perikli, ir-riskji u d-dipendenza fuq il-kontroll kimiku għall-protezzjoni tal-pjanti, li jippermettu l-flessibilità meħtieġa biex jiġu adattati l-miżuri għas-sitwazzjonijiet speċifiċi fl-Istati Membri.

- L-involviment tal-partijiet interessati fit-twaqqif, l-implimentazzjoni u l-adattament tan-NAPs.

- Il-ħolqien ta’ sistema ta’ taħriġ u ħolqien ta’ kuxjenza għad-distributuri u l-utenti professjonali tal-pestiċidi sabiex ikun żgurat li jkunu konxji bis-sħiħ mir-riskji involuti. Tagħrif aħjar għall-pubbliku ġenerali permezz ta’ kampanji ta’ ħolqien ta’ kuxjenza, informazzjoni mgħoddija permezz tal-bejjiegħa bl-imnut u miżuri xierqa oħrajn.

- L-ispezzjoni regolari tat-tagħmir għall-applikazzjoni sabiex jitnaqqsu l-impatti negattivi tal-pestiċidi fuq saħħet il-bniedem (partikolarment fir-rigward ta’ l-esponiment ta’ l-operaturi) u fuq l-ambjent matul l-applikazzjoni.

- Il-projbizzjoni tal-bexx mill-ajru biex jiġu limitati r-riskji ta' impatti negattivi sinifikanti fuq saħħet il-bniedem u fuq l-ambjent, partikolarment mit-tifrix tal-bexx lil hinn miż-żona fil-mira.

- Miżuri speċifiċi għall-protezzjoni ta' l-ambjent akkwatiku mit-tniġġis bil-pestiċidi.

- Id-definizzjoni taż-żoni ta’ tnaqqis sinifikanti jew waqfien fl-użu tal-pestiċidi f'konformità mal-miżuri meħuda taħt leġiżlazzjoni oħra (bħad-Direttiva ta' Qafas dwar l-Ilma, id-Direttiva dwar l-Għasafar, id-Direttiva dwar il-Ħabitats, eċċ) jew biex jiġu protetti gruppi sensittivi.

- It-tqandil u l-ħżin tal-pestiċidi u l-imballaġġ u l-fdalijiet tagħhom

- L-iżvilupp ta’ standards komuni għall-Komunità dwar il-Ġestjoni Integrata ta’ l-Organiżmi ta’ Ħsara (IPM – Integrated Pest Management ) u l-istabbiliment tal-kundizzjonijiet meħtieġa għall-implimentazzjoni ta’ l-IPM.

- Il-kejl tal-progress fit-tnaqqis tar-riskju permezz ta’ indikaturi armonizzati xierqa.

- L-istabbiliment ta’ sistema ta’ skambju ta’ tagħrif għall-iżvilupp u t-titjib kontinwu ta’ gwida xierqa, l-aħjar prassi u rakkomandazzjonijiet xierqa.

- Il-bażi ġuridika

L-Artikolu 175(1) tat-Trattat tal-KE huwa l-bażi ġuridika xierqa.

- Il-prinċipju tas-sussidjarjetà

Il-prinċipju tas-sussidjarjetà japplika safejn il-proposta ma taqax fil-kompetenza esklussiva tal-Komunità.

L-għanijiet tal-proposta ma jistgħux jintlaħqu biżżejjed mill-Istati Membri għar-raġunijiet li ġejjin.

Fil-preżent, xi Stati Membri diġà adottaw miżuri li jkopru (kompletament jew parzjalment) dak li hu propost fid-Direttiva. Oħrajn għadhom ma ħadux azzjoni bħal din. Dan joħloq sitwazzjoni fejn ma hemmx sitwazzjoni ugwali għall-bdiewa u l-industrija tal-pestiċidi, li tista' tfisser kompetizzjoni inġusta għall-atturi ekonomiċi fi Stati Membri differenti. Barra minn hekk, madwar il-Komunità ma hemmx livell ta’ protezzjoni ugwali fir-rigward tas-saħħa tal-bniedem u ta' l-ambjent u l-użu tal-pestiċidi juri li hemm xejriet diverġenti fost l-Istati Membri.

L-azzjoni Komunitarja għandha tilħaq aħjar l-għanijiet tal-proposta għar-raġunijiet li ġejjin.

Azzjoni Komunitarja biss tista’ ttejjeb is-sitwazzjoni diverġenti attwali fl-Istati Membri billi timplimenta r-rekwiżiti armonizzati u livell ugwali ta' protezzjoni tas-saħħa tal-bniedem u ta' l-ambjent u billi tikkompleta s-suq intern tat-tagħmir għall-applikazzjoni.

It-tqegħid fis-suq tal-pestiċidi diġà huwa armonizzat permezz tal-leġiżlazzjoni Komunitarja. Għalhekk, dan għandu japplika wkoll għal aspetti oħra tal-politika dwar il-pestiċidi. Fil-preżent, l-Istati Membri qegħdin jiżviluppaw il-politiki nazzjonali f’direzzjonijiet differenti u b’livelli differenti ta’ strettezza u ambizzjoni.

It-twaqqif ta’ rekwiżiti u għanijiet uniformi li għandhom jiġu sodisfatti fl-Istati Membri kollha jista’ jsir biss mill-Komunità. Inkella, s-sitwazzjoni ta' llum b’obbligi differenti għall-operaturi ekonomiċi se tkompli. L-iskambju kontinwu ta’ tagħrif fost l-Istati Membri u l-Kummissjoni li hu previst fil-proposta se jippermetti l-iżvilupp ta' gwida xierqa, l-aħjar prassi u rakkomandazzjonijet xierqa, filwaqt li jitqies il-progress xjentifiku u tekniku. Se tinġabar iktar informazzjoni permezz tal-programmi ta’ monitoraġġ u kontroll stipulati f’Direttivi u Regolamenti oħrajn li huma affettwati mill-Istrateġija Tematika. Dan ma jistax jintlaħaq mill-Istati Membri weħidhom.

Il-proposta għaldaqstant tikkonforma mal-prinċipju tas-sussidjarjetà.

- Il-prinċipju tal-proporzjonalità

Din il-proposta tikkonforma mal-prinċipju tal-proporzjonalità għar-raġunijiet li ġejjin.

Id-Direttiva proposta toħloq qafas ġuridiku bir-rekwiżiti u l-għanijiet essenzjali. L-Istati Membri jżommu grad sinifikanti ta’ flessibilità biex jiddeterminaw id-dettalji tal-miżuri implimentattivi meħtieġa skond is-sitwazzjonijiet ġeografiċi, agrikoli u klimatiċi speċifiċi tagħhom. Il-Kummissjoni biħsiebha tistabbilixxi grupp speċifiku ta’ esperti, magħmlu mill-Istati Membri u kull parti interessata rilevanti oħra, li jevalwa regolarment it-tagħrif u d- data rrappurtati sabiex ifassal dokumenti ta’ gwida u rakkomandazzjonijiet xierqa. Dan il-“Grupp ta’ Esperti għall-Istrateġija Tematika dwar l-użu sostenibbli tal-pestiċidi” (minn hawn ‘il quddiem “il-Grupp ta’ l-Esperti”) se jitwaqqaf formalment minn Deċiżjoni tal-Kummissjoni fi stadju iktar tard. Kull fejn meħtieġ, il-Kummissjoni se tadotta emendi għall-Annessi tad-Direttiva proposta, hija u ssegwi proċedura regolatorja tal-kumitat fi ħdan il-qafas tal-Kumitat Permanenti dwar il-Katina Alimentari u s-Saħħa ta’ l-Annimali stabbilit mill-Artikolu 58 tar-Regolament (KE) Nru 178/2002.

L-analiżi dettaljata ta’ l-impatti ekonomiċi, soċjali u ambjentali (inklużi l-piżijiet amministrattivi) li twettqet għall-miżuri kollha, ippermettiet lill-Kummissjoni biex tidentifika dawk l-għażliet li jirrappreżentaw l-ispejjeż minimi għall-partijiet interessati kollha, u, ġeneralment, dawk l-ispejjeż huma inqas mill-istima tal-benefiċċji mistennija.

- L-għażla ta' strument

Hija proposta Direttiva ta’ qafas.

Mezzi oħra mhumiex tajba biżżejjed għar-raġunijiet li ġejjin:

Regolament jew Direttiva preskrittiva żżejjed ma kenitx tkun xierqa minħabba li l-punti tat-tluq għal kull kwistjoni huma differenti ħafna minn Stat Membru għall-ieħor; pereżempju, l-istruttura tas-settur agrikolu, il-kundizzjonijiet klimatiċi u ġeografiċi, il-leġiżlazzjoni u l-programmi nazzjonali eżistenti. Min-naħa l-oħra, rakkomandazzjonijiet sempliċi ma jkunux effiċjenti biex jiksbu l-għanijiet previsti għax dawn ma jkunux infurzati. Kull fejn jitqies fattibbli (jiġifieri, għall-ġbir ta’ imballaġġ vojt), id-Direttiva tħalli l-possibbiltà ta' l-awtoregolazzjoni għall-partijiet interessati kkonċernati.

4. Effetti fuq il-baġit

Huwa propost li tinħoloq kariga permanenti fil-Kummissjoni biex tamministra u tikkoordina l-Istrateġija u torganizza l-laqgħat kollha tal-Grupp ta' Esperti għall-iżvilupp tal-gwida, miżuri oħra u l-kalkolu u r-rappurtar ta' l-indikaturi. Infiq ieħor marbut ma’ attivitajiet li jaqgħu taħt din id-Direttiva se jkun kopert mill-istrument finanzjarju għall-ambjent (LIFE+ għall-perjodu 2007-2013). Mhuwiex mitlub ammont addizzjonali.

5. Aktar tagħrif

- Is-simulazzjoni, il-fażi sperimentali u l-perjodu tranżitorju

Mhux se jkun hemm perjodu tranżitorju għall-proposta.

- Klawżola ta' eżami/reviżjoni/estinzjoni

Il-proposta tinkludi klawżola ta' reviżjoni.

- Iż-Żona Ekonomika Ewropea

Din il-proposta tolqot kwistjoni rilevanti għaż-ŻEE, u għalhekk għandha testendi għaż-Żona Ekonomika Ewropea.

- Spjegazzjoni dettaljata tal-proposta

L-Artikolu 1 jiddeskrivi s-suġġett tad-Direttiva.

L-Artikolu 2 jiddeskrivi l-ambitu tad-Direttiva.

L-Artikolu 3 fih id-definizzjonijiet meqjusa neċessarji għall-għanijiet tad-Direttiva.

L-Artikolu 4 jesiġi li l-Istati Membri jwaqqfu pjanijiet nazzjonali ta’ azzjoni (NAPs) biex jidentifikaw l-uċuħ tar-raba’, l-attivitajiet jew iż-żoni fejn ir-riskji huma inkwetani u għandhom jiġu indirizzati bi prijorità u biex jistabbilixxu miri u skedi ta’ żmien biex dawn jintlaħqu. L-esperjenza f’bosta Stati Membri wriet li pjanijiet ta' azzjoni koerenti huma l-aħjar għodda biex jinkisbu l-għanijiet maħsuba. Fid-dawl tas-sitwazzjonijiet differenti fl-Istati Membri u f’konformità mal-prinċipju tas-sussidjarjetà, in-NAPs għandhom jiġu adottati f'livell nazzjonali u/jew reġjonali. Waqt l-istabbiliment jew l-emendar tan-NAPs, il-pubbliku għandhu jingħata opportunitajiet f’waqthom u effettivi biex jipparteċipa fil-proċess, f’konformità ma’ l-ispirtu tad-Direttiva 2003/35/KE li tipprovdi għall-parteċipazzjoni pubblika rigward it-tfassil ta' ċerti pjani u programmi li għandhom x'jaqsmu ma' l-ambjent[3]. Dan se jkun importanti biex tiġi żgurata implimentazzjoni effiċjenti u li jkollha suċċess. L-Istati Membri se jkollhom jagħtu attenzjoni biex iżommu l-koerenza ma' dak li hu inkluż fi pjanijiet rilevanti oħra u li jista' jkollu influwenza fuq l-użu tal-pestiċidi, bħall-ġestjoni tal-baċini tax-xmajjar u pjanijiet ta' żvilupp rurali.

L-Artikolu 5 jirrikjedi lill-Istati Membri iwaqqfu sistemi ta' taħriġ għad-distributuri u l-utenti professjonali tal-pestiċidi, sabiex ikun żgurat għarfien sħiħ dwar ir-riskji involuti. L-attendenza għat-taħriġ, li tkun ippruvata permezz taċ-ċertifikati, ma għandhiex tkun prerekwiżit għall-istabbiliment jew l-impjieg ta’ utenti professjonali tal-pestiċidi. Id-dettalji dwar il-proċeduri u d-dispożizzjonijiet amministrattivi jitħallew f’idejn l-Istati Membri, iżda l-Anness I se jelenka s-suġġetti li dawn il-programmi ta’ taħriġ se jkollhom jindirizzaw.

L-Artikolu 6 jirrikjedi mill-Istati Membri li jiżguraw li għallinqas persuna waħda fl-impjieg ta’ distributuri li jbigħu pestiċidi tossiċi jew tossiċi ħafna tkun disponibbli biex tagħti tagħrif lill-klijenti, u li dawk l-utenti professjonali biss li jissodisfaw ir-rekwiżiti meħtieġa jkollhom aċċess għall-pestiċidi. L-Istati Membri huma obbligati jippreskrivu li prodotti awtorizzati speċifikament biss se jkunu disponibbli għall-bejgħ lil utenti mhux professjonali, minħabba li dawn ma jkunux konxji mir-riskji daqs l-utenti professjonali.

L-Artikolu 7 jobbliga lill-Istati Membri jiffaċilitaw u jippromwovu programmi ta’ għarfien u d-disponibbiltà tat-tagħrif lill-pubbliku dwar il-pestiċidi u l-alternattivi għalihom, sabiex jinfurmaw l-utenti mhux professjonali dwar ir-riskji u miżuri ta' prekawzjoni.

L-Artikolu 8 jirrikjedi lill-Istati Membri li jwaqqfu sistema għall-ispezzjoni teknika u manutenzjoni regolari tat-tagħmir għall-applikazzjoni li jkun qed jintuża. Tagħmir għall-applikazzjoni li jkun miżmum tajjeb u li jaħdem sewwa huwa essenzjali għall-garanzija kontinwa ta’ livell għoli ta’ protezzjoni tas-saħħa tal-bniedem (partikolarment l-operaturi) u l-ambjent fl-applikazzjoni tal-pestiċidi. Sabiex ikunu żgurati spezzjonijiet li jkunu ugwalment stretti madwar il-Komunità, għandhom jintużaw standards komuni u armonizzati, ibbażati fuq ir-rekwiżti essenzjali definiti fl-Anness II. L-aspetti organizzattivi (bħal sistemi ta’ spezzjoni pubbliċi jew privati, kontroll tal-kwalità tal-korpi ta’ spezzjoni involuti, il-frekwenza ta’ l-ispezzjonijiet, l-aspetti ta' l-iffinanzjar, eċċ.) jibqgħu fid-diskrezzjoni ta' l-Istati Membri, li jkollhom jirrappurtaw lill-Kummissjoni.

L-Artikolu 9 jobbliga lill-Istati Membri jipprojbixxu l-bexx mill-ajru iżda jippermetti ċertu derogi. Il-bexx mill-ajru għandu jiġi pprojbit minħabba l-potenzjal għoli tiegħu għal effetti negattivi fuq saħħet il-bniedem u l-ambjent mit-tifrix tal-bexx lil hinn mill-mira. Id-derogi jistgħu jingħataw fejn il-bexx mill-ajru jkollu vantaġġi u benefiċċji ambjentali ċari meta mqabbel ma' metodi ta’ bexx oħrajn jew fejn ma hemm l-ebda alternattiva vijabbli. Ir-rekwiżiti dettaljati għad-deroga jkunu adottati fil-livell ta’ l-Istati Membri, u dawn għandhom jirrappurtawhom lill-Kummissjoni.

L-Artikolu 10 jobbliga lill-Istati Membri li jesiġu li l-bdiewa u l-utenti professjonali oħra tal-pestiċidi jagħtu attenzjoni partikolari lill-protezzjoni ta’ l-ambjent akkwatiku permezz ta’ miżuri bħal strixex marġinali ta' protezzjoni u sisien tal-ħaxix mal-ġenb ta’ mogħdijiet ta’ l-ilma jew miżuri oħra xierqa bil-għan li jillimitaw it-tifrix.

L-Artikolu 11 jobbliga lill-Istati Membri biex jiddeżinjaw żoni fejn ikun permess tnaqqis sostanzjali, jew waqfien, fl-użu tal-pestiċidi f’konformità ma’ miżuri meħuda taħt leġiżlazzjoni oħra (bħad-Direttiva Qafas dwar l-Ilma, id-Direttiva dwar l-Għasafar, id-Direttiva dwar il-Ħabitats, eċċ.). Żoni bħal dawn għandhom jiġu ddeżinjati wkoll sabiex tiġi indirizzata l-protezzjoni speċifika meħtieġa minn gruppi vulnerabbli bħat-tfal. L-Istati Membri għandhom jirrappurtaw dwar il-miżuri meħuda sabiex jiġu żviluppati gwida, kriterji għall-għażla taż-żoni u l-aħjar prassi.

L-Artikolu 12 jobbliga lill-Istati Membri jadottaw miżuri biex jindirizzaw emissjonijiet minn punti individwali partikolarment mit-taħlit, it-tagħbija u t-tindif. Għandhom ikunu obbligati wkoll jieħdu miżuri biex jevitaw operazzjonijiet perikolużi minn utenti mhux professjonali li jużaw il-pestiċidi. Skambju ta’ tagħrif bejn l-Istati Membri dwar l-inizjattivi nazzjonali u dwar il-progress miksub se jkun organizzat permezz ta’ rappurtar li jinvolvi wkoll il-partijiet interessati li huma partikolarment attivi f’dan il-qasam.

L-Artikolu 13 jirrikjedi lill-Istati Membri jieħdu l-miżuri meħtieġa sabiex jistabbilixxu l-kundizzjonijiet essenzjali għall-implimentazzjoni tal-Ġestjoni Integrata ta’ l-Organiżmi ta’ Ħsara (IPM). L-istandards ġenerali għall-ġestjoni integrata ta’ l-organiżmi ta’ ħsara għandhom jiġi żviluppati u għandhom isiru mandatorji mill-2014. Barra minn hekk, l-istandards speċifiċi ta' l-IPM applikati madwar il-Komunità kollha għandhom jiġu żviluppati għal uċuħ tar-raba’ partikolari, iżda l-implimentazzjoni tagħhom għandhom tibqa' volontarja. L-Istati Membri għandhom jirrappurtaw dwar il-miżuri meħuda sabiex jistabbilixxu l-kundizzjonijiet għall-implimentazzjoni tal-Ġestjoni Integrata ta’ Organiżmi ta’ Ħsara, biex tkun żgurata l-implimentazzjoni ta’ standards ġenerali ta’ l-IPM, u biex iħeġġu l-implimentazzjoni ta’ standards ta’ l-IPM speċifiċi għall-uċuħ tar-raba’ minn utenti tal-pestiċidi.

L-Artikolu 14 jipprovdi li l-Istati Membri jkunu obbligati jiġbru u jirrappurtaw informazzjoni ta’ statistika dwar it-tqegħid fis-suq u l-użu tal-pestiċidi – id-dettalji huma proposti fir-Regolament dwar l-istatistika għall-prodotti għall-protezzjoni tal-pjanti. Din l-informazzjoni se tkun il-bażi għall-kalkolu ta’ l-indikaturi tar-riskju xierqa, li jinħtieġu biex ikun immonitorjat il-progress fit-tnaqqis tar-riskji globali mill-użu tal-pestiċidi. Għaddejja ħidma fuq l-iżvilupp ta’ l-indikaturi armonizzati tar-riskju. Meta tkun iffinalizzata, eventwalment se tiġi maqbula ġabra komuni ta’ indikaturi tar-riskju bejn il-Kummissjoni u l-Istati Membri. Sa dak iż-żmien, l-Istati Membri jistgħu jkomplu jużaw l-indikaturi attwali tagħhom. Sabiex ikun evalwat l-impatt ta’ din id-Direttiva u ta’ miżuri oħrajn ta’ l-Istrateġija Tematika fit-tnaqqis tar-riskji globali, il-Kummissjoni għandha tfassal rapporti li janalizzaw ix-xejriet fl-iżvilupp ta’ l-indikaturi rrappurtati mill-Istati Membri.

L-Artikolu 15 jirrikjedi li l-Kummissjoni tirrapporta regolarment lill-Parlament Ewropew u lill-Kunsill, fuq il-bażi tar-rapporti li jipprovdu l-Istati Membri dwar il-miżuri li se jadottaw biex jilħqu l-għanijiet ta’ din id-Direttiva ta’ Qafas.

L-Artikoli 16 sa 22 fihom dispożizzjonijiet standard dwar il-Komitoloġija, l-istandardizzazzjoni, il-penalitajiet u d-dħul fis-seħħ.

Annessi

L-Annessi fihom dettalji dwar miżuri varji li l-Istati Membri għandhom jadottaw skond l-Artikoli tad-Direttiva. L-Annessi jistgħu jiġu mmodifikati skond l-Artikolu 18, fid-dawl ta’ l-esperjenza u l-ħtiġijiet identifikati mis-sistema ta' skambju ta’ informazzjoni u d-diskussjonijiet fil-Grupp ta’ l-Esperti.

L-Anness I jelenka l-elementi li għandhom jiġu indirizzati fil-programmi ta’ taħriġ.

L-Anness II fih ir-rekwiżiti essenzjali għall-ispezzjonijiet u l-verifiki ta’ manutenzjoni li għandhom jitwettqu fuq tagħmir għall-applikazzjoni li jkun qed jintuża.

2006/0132 (COD)

Proposta għal

DIRETTIVA TAL-PARLAMENT EWROPEW U TAL-KUNSILL

li tistabbilixxi qafas għal azzjoni Komunitarja biex jintlaħaq użu sostenibbli tal-perstiċidi

(Test b'rilevanza għaż-ŻEE)

IL-PARLAMENT EWROPEW U L-KUNSILL TA’ L-UNJONI EWROPEA,

Wara li kkunsidraw it-Trattat li jistabbilixxi l-Komunità Ewropea, u b'mod partikolari l-Artikolu 175(1) tiegħu,

Wara li kkunsidraw il-proposta tal-Kummissjoni[4],

Wara li kkunsidraw l-opinjoni tal-Kumitat Ekonomiku u Soċjali Ewropew[5],

Wara li kkunsidraw l-opinjoni tal-Kumitat tar-Reġjuni[6],

Filwaqt li jaġixxu f'konformità mal-proċedura stipulata fl-Artikolu 251 tat-Trattat,

Billi:

(1) Skond l-Artikoli 2 u 7 tad-Deċiżjoni tal-Parlament Ewropew u tal-Kunsill Nru 1600/2002/KE tat-22 ta’ Lulju 2002 li tniżżel is-Sitt Programm ta’ Azzjoni tal-Komunità Ambjentali[7], għandu jiġi stabbilit qafas ġuridiku komuni għall-ilħiq ta’ użu sostenibbli tal-pestiċidi.

(2) Il-miżuri pprovduti f’din id-Direttiva għandhom jikkomplementaw miżuri stipulati f'leġiżlazzjoni Komunitarja relata oħra, mingħajr ma jaffettwawhom, partikolarment ir-Regolament (KE) Nru [...] dwar prodotti għall-protezzjoni tal-pjanti[8], id-Direttiva tal-Parlament Ewropew u tal-Kunsill 2000/60/KE tat-23 ta’ Ottubru 2000 li tistabilixxi qafas għal azzjoni Komunitarja fil-qasam tal-politika ta' l-ilma[9]; Ir-Regolament tal-Parlament Ewropew u tal-Kunsill (KE) Nru 396/2005 tat-23 ta' Frar 2005 dwar il-livelli massimi ta' residwu ta' pestiċidi fi jew fuq ikel u għalf li joriġina minn pjanti u annimali u jemenda d-Direttiva tal-Kunsill 91/414/[10].

(3) Pjanijiet nazzjonali ta’ azzjoni bil-għan li jistabbilixxu miri għat-tnaqqis tar-riskji, inklużi perikli, u d-dipendenza fuq l-użu tal-pestiċidi u li jippromwovu l-protezzjoni tal-pjanti mingħajr l-użu tal-pestiċidi għandhom jintużaw mill-Istati Membri sabiex jiffaċilitaw l-implimentazzjoni ta’ din id-Direttiva. Il-pjanijiet nazzjonali ta’ azzjoni jistgħu jiġu kkoordinati bi pjanijiet ta’ implimentazzjoni taħt leġiżlazzjoni Komunitarja rilevanti u jistgħu jintużaw biex jingħaqdu flimkien miri li għandhom jintlaħqu skond leġiżlazzjoni Komunitarja oħra marbuta mal-pestiċidi.

(4) L-iskambju ta’ tagħrif dwar il-miri u l-azzjonijiet li l-Istati Membri jistipulaw fil-pjanijiet nazzjonali ta’ azzjoni tagħhom huwa element importanti għall-ilħiq tal-miri ta’ din id-Direttiva. Għaldaqstant, jixraq li l-Istati Membri jintalbu jirrappurtaw regolarment lill-Kummissjoni u l-Istati Membri l-oħra, partikolarment dwar l-implimentazzjoni u r-riżultati tal-pjanijiet nazzjonali ta' azzjoni tagħhom u dwar l-esperjenzi tagħhom.

(5) Għat-tħejjija u l-modifika tal-programmi nazzjonali ta’ azzjoni, jixraq li jsir provvediment għall-applikazzjoni tad-Direttiva tal-Parlament Ewropew u tal-Kunsill 2003/35/KE tas-26 ta' Mejju 2003 li tipprovdi għall-parteċipazzjoni pubblika rigward it-tfassil ta' ċerti pjani u programmi li għandhom x'jaqsmu ma' l-ambjent u li temenda d-Direttivi tal-Kunsill 85/337/KEE u 96/61/KE[11].

(6) Huwa mixtieq li l-Istati Membri jistabbilixxu sistemi ta’ taħriġ għad-distributuri, il-konsulenti u l-utenti professjonali tal-pestiċidi sabiex permezz tagħhom, dawk li jużaw il-pestiċidi, jew li biħsiebhom jużawhom, ikunu konxji bis-sħiħ mir-riskji potenzjali għas-saħħa tal-bniedem u għall-ambjent u dwar il-miżuri xierqa biex dawn ir-riskji jitnaqqsu kemm jista’ jkun. Attivitajiet ta’ taħriġ għall-utenti professjonali jistgħu jiġu kkoordinati ma’ dawk organizzati fil-qafas tar-Regolament tal-Kunsill (KE) Nru 1698/2005 ta' l-20 ta’ Settembru 2005 dwar appoġġ għall-iżvilupp rurali mill-Fond Agrikolu Ewropew għall-Iżvilupp Rurali (EAFRD).[12]

(7) Fid-dawl tar-riskji possibbli mill-użu tal-pestiċidi, il-pubbliku ġenerali għandu jkun infurmat aħjar dwar ir-riskji marbuta ma’ l-użu tal-pestiċidi permezz ta’ kampanji għall-ħolqien tal-kuxjenza, informazzjoni mgħoddija permezz ta’ bejjiegħa bl-imnut u miżuri xierqa oħra.

(8) Sal-punt fejn it-tqandil u l-applikazzjoni tal-pestiċidi jirrikjedu l-istipular ta’ rekwiżiti minimi għas-sikurezza u s-saħħa fuq il-post tax-xogħol li jkopru r-riskji li joħorġu mill-esponiment tal-ħaddiema għal prodotti bħal dawn, kif ukoll ta' miżuri preventivi ġenerali u speċifiċi biex dawk ir-riskji jitnaqqsu, dawk il-miżuri huma koperti mid-Direttiva tal-Kunsill 98/24/KE tas-7 ta' April 1998 dwar il-protezzjoni tas-saħħa u s-sigurtà tal-ħaddiema mir-riskji li għandhom x'jaqsmu ma' l-aġenti kimiċi fuq il-post tax-xogħol[13] u d-Direttiva tal-Parlament Ewropew u tal-Kunsill 2001/37/KE tad-29 ta’ April 2004 dwar il-protezzjoni tal-ħaddiema minn riskji relatati ma’ l-espożizzjoni għal karċinoġeni jew mutaġeni fuq il-post tax-xogħol[14].

(9) Minħabba li d-Direttiva tal-Parlament Ewropew u tal-Kunsill 2006/42/KE tas-17 ta’ Mejju 2006 dwar il-makkinarju u li temenda d-Direttiva 95/16/KE (tfassil mill-ġdid)[15] se tipprovdi għal regoli dwar it-tqegħid fis-suq ta’ tagħmir għall-applikazzjoni tal-pestiċidi u se tiżgura li r-rekwiżiti ambjentali jiġu sodisfatti, sabiex jitnaqqsu iktar l-impatti negattivi tal-pestiċidi fuq saħħet il-bniedem u l-ambjent ikkawżat minn tagħmir bħal dan, jixraq li jiġu pprovduti sistemi għal spezzjonijiet tekniċi regolari tat-tagħmir għall-applikazzjoni tal-pestiċidi li diġà qed jintuża.

(10) Il-bexx mill-ajru għandu l-potenzjal li jikkawża impatti negattivi sinifikanti fuq saħħet il-bniedem u fuq l-ambjent, partikolarment mit-tifrix tal-bexx lil hinn miż-żona fil-mira. Għalhekk, il-bexx mill-ajru għandu jiġi pprojbit b’mod ġenerali bil-possibbiltà ta’ deroga fejn ikun joffri vantaġġi ċari u wkoll benefiċċji ambjentali meta mqabbel ma' metodi oħra ta' bexx, jew fejn ma jkun hemm l-ebda alternattiva vijabbli.

(11) L-ambjent akkwatiku huwa partikolarment sensittiv għall-pestiċidi. Għaldaqstant, jeħtieġ li tingħata attenzjoni partikolari biex ikun evitat it-tniġġis ta’ l-ilma tal-wiċċ u tal-pjan billi jittieħdu miżuri xierqa bħall-istabbiliment ta' strixex marġinali ta' protezzjoni jew it-tħawwil ta’ sisien tal-ħaxix mal-ġenb ta' ilmijiet fil-wiċċ biex jitnaqqas l-esponiment ta’ ilmijiet għat-tifrix tal-bexx. Id-dimensjonijiet taż-żoni marġinali ta' protezzjoni għandhom jiddependu partikolarment fuq il-karatteristiċi tal-ħamrija, il-klima, id-daqs tal-mogħdija ta’ l-ilma, kif ukoll fuq karatteristiċi agrikoli taż-żoni kkonċernati. L-użu tal-pestiċidi f’żoni fejn jittella' l-ilma għax-xorb, fuq rotot għat-trasport jew matulhom, bħal linji tal-ferrovija, fuq uċuħ issiġillati jew permeabbli ħafna jista' jwassal għal riskji ogħla ta' tniġġis ta' l-ambjent akkwatiku. Għaldaqstant, f’żoni bħal dawn, l-użu tal-pestiċidi għandu jitnaqqas kemm jista’ jkun, jew jiġi eliminat jekk ikun il-każ.

(12) L-użu tal-pestiċidi jista’ jkun partikolarment perikoluż f’żoni sensittivi ħafna, bħal siti tan-Natura 2000 li huma protetti skond id-Direttiva tal-Kunsill 79/409/KEE tat-2 ta' April 1979 dwar il-konservazzjoni ta’ l-għasafar selvaġġi[16] u d-Direttiva tal-Kunsill 92/43/KEE tal-21 ta' Mejju 1992 dwar il-konservazzjoni tal-ħabitat naturali u tal-fawna u l-flora selvaġġa [17]. F’postijiet oħrajn bħal parkijiet pubbliċi u grawnds ta’ l-isport jew fejn jilagħbu t-tfal, ir-riskji mill-esponiment tal-pubbliku ġenerali għall-pestiċidi huwa għoli. Għaldaqstant, f’żoni bħal dawn, l-użu tal-pestiċidi għandu jitnaqqas kemm jista’ jkun, jew jiġi eliminat jekk ikun il-każ.

(13) L-użu tal-pestiċidi, inklużi d-dilwizzjoni u t-taħlit tal-kimiċi u t-tindif tat-tagħmir għall-applikazzjoni wara l-użu, u r-rimi taż-żejjed li jibqa’ fit-tank, imballaġġ vojt u pestiċidi li ma ntużawx, għandhom tendenza partikolari li, b’mod mhux intenzjonat, jesponu lill-bnedmin u l-ambjent għall-pestiċidi. Għaldaqstant, jixraq li jiġu pprovduti dispożizzjonijiet biex jindirizzaw dawn l-attivitajiet bħala komplement għall-miżuri pprovduti fl-Artikoli 4 u 8 tad-Direttiva tal-Parlament Ewropew u tal-Kunsill 2006/12/KE tal-5 ta’ April 2006 dwar l-iskart[18], u l-Artikoli 2 u 5 tad-Direttiva tal-Kunsill 91/689/KEE tat-12 ta’ Diċembru 1991 fuq skart perikoluż[19]. Dawk il-miżuri speċifiċi għandhom jinkludu wkoll l-utenti mhux professjonali minħabba li x’aktarx l-użu mhux tajjeb iseħħ f’dan il-grupp ta’ utenti minħabba n-nuqqas ta’ għarfien.

(14) L-applikazzjoni ta' standards ġenerali ta' Ġestjoni Integrata ta’ Organiżmi ta’ Ħsara mill-bdiewa kollha għandha tirriżulta f'użu mmirat aħjar tal-miżuri kollha disponibbli għall-kontroll ta’ l-organiżmi ta’ ħsara, inklużi l-pestiċidi. Għaldaqstant, tikkontribwixxi għal iktar tnaqqis fir-riskji għas-saħħa tal-bniedem u l-ambjent. L-Istati Membri għandhom jippromwovu biedja b'użu mill-inqas tal-pestiċidi, partikolarment Ġestjoni Integrata ta’ Organiżmi ta’ Ħsara u jistabbilixxu l-kundizzjonijiet meħtieġa għall-implimentazzjoni tal-metodi ta’ ġestjoni integrata ta’ organiżmi ta’ ħsara. Barra minn hekk, l-Istati Membri għandhom jinkoraġġixxu l-użu ta’ l-istandards speċifiċi għal-uċuħ tar-raba' tal-Ġestjoni Integratata ta’ Organiżmi ta’ Ħsara.

(15) Jeħtieġ li jitkejjel il-progress miksub fit-tnaqqis tar-riskji u l-impatti ħżiena mill-użu tal-pestiċidi fuq saħħet il-bniedem u l-ambjent. Il-mezzi xierqa huma indikaturi tar-riskju armonizzati li se jiġi stabbiliti fil-livell Komunitarju. L-Istati Membri għandhom jużaw dawn l-indikaturi għall-ġestjoni tar-riskju fil-livell nazzjonali u għal skopijiet ta’ rappurtar, filwaqt li l-Kummissjoni għandha tikkalkula l-indikaturi biex tevalwa l-progress fil-livell Komunitarju. Sakemm isiru disponibbli l-indikaturi komuni, l-Istati Membri għandhom ikunu intitolati jużaw l-indikaturi nazzjonali tagħhom.

(16) L-Istati Membri għandhom jistabbilixxu regoli dwar il-penalitajiet applikabbli għall-ksur tad-dispożizzjonijiet ta' din id-Direttiva u jiżguraw li dawn jiġu implimentati. Il-penalitajiet għandhom ikunu effettivi, proporzjonati u dissważivi.

(17) Minħabba li l-għanijiet tad-Direttiva, jiġifieri biex titħares saħħet il-bniedem u l-ambjent mir-riskji possibbli marbuta ma’ l-użu tal-pestiċidi, ma jistgħux jintlaħqu b’mod suffiċjenti mill-Istati Membri, u għalhekk jistgħu jintlaħqu aħjar fil-livell Komunitarju, minħabba d-daqs u l-effetti ta’ l-azzjoni, il-Komunità tista’ tadotta miżuri, skond il-prinċipju tas-sussidjarjetà, kif stipulat fl-Artikolu 5 tat-Trattat. F'konformità mal-prinċipju ta' proporzjonalita, kif stipulat f'dak l-Artikolu, din id-Direttiva ma tmurx lil hinn minn dak li hu meħtieġ sabiex jintlaħqu dawk il-għanijiet.

(18) Din id-Direttiva tirrispetta d-drittijiet fundamentali u tosserva l-prinċipji rikonoxxuti b'mod partikolari mill-Karta tad-Drittijiet Fundamentali ta' l-Unjoni Ewropea. B'mod partikolari, għandha l-għan li tippromwovi l-integrazzjoni ta' livell għoli ta' protezzjoni ambjentali fil-politiki tal-Komunità, f'konformità mal-prinċipju ta' l-iżvilupp sostenibbli kif stipulat fl-Artikolu 37 tal-Karta tad-Drittijiet Fundamentali ta' l-Unjoni Ewropea.

(19) Il-miżuri meħtieġa għall-implementazzjoni ta’ din id-Direttiva għandhom ikunu adottati skond id-Deċiżjoni tal-Kunsill 1999/468/KE tat-28 ta’ Ġunju 1999 li tistabbilixxi l-proċeduri għal eżerċizzju ta’ poteri ta’ implementazzjoni mogħtija lill-Kummissjoni[20].

ADOTTAW DIN ID-DIRETTIVA:

Kapitolu I Dispożizzjonijiet Ġenerali

Artikolu 1 Suġġett

Din id-Direttiva tistabbilixxi qafas għall-ilħiq ta’ użu iktar sostenibbli tal-pestiċidi billi tnaqqas ir-riskji u l-impatti ta' l-użu tal-pestiċidi fuq saħħet il-bniedem u l-ambjent f'mod li huwa konsistenti mal-ħtiġijiet tal-protezzjoni tal-pjanti.

Artikolu 2 Ambitu

1. Din id-Direttiva għandha tapplika għall-pestiċidi f’għamla ta' prodotti għall-protezzjoni tal-pjanti kif definiti fir-Regolament (KE) Nru [… ] dwar it-tqegħid tal-prodotti għall-protezzjoni tal-pjanti fis-suq.

2. Din id-Direttiva għandha tapplika mingħajr preġudizzju għal kwalunkwe leġiżlazzjoni Komunitarja oħra.

Artikolu 3 Definizzjonijiet

Għall-finijiet ta' din id-Direttiva, għandhom japplikaw id-definizzjonijiet li ġejjin:

(a) ‘użu’ tfisser l-operazzjonijiet kollha mwettqa b’pestiċidju, bħall-ħżin, it-tqandil, id-dilwizzjoni, it-taħlit u l-applikazzjoni

(b) ‘utent professjonali’ tfisser kwalunkwe persuna naturali jew ġuridika li tuża l-pestiċidi fil-qafas ta’ l-attività professjonali tagħha, inklużi operaturi, tekniċi, min iħaddem l-impjegati, persuni li jaħdmu għal rashom fis-settur tal-biedja jew f'settur ieħor

(c) ‘distributur’ tfisser kwalunkwe persuna naturali jew ġuridika li tagħmel pestiċida disponibbli fis-suq inklużi l-bejjiegħa bl-ingrossa u bl-imnut, vendituri u fornituri

(d) ‘konsulent’ tfisser kwalunkwe persuna naturali jew ġuridika li tagħti pariri dwar l-użu tal-pestiċidi inklużi servizzi privati ta’ pariri mogħtija minn persuni li jaħdmu għal rashom, aġenti kummerċjali, produtturi ta’ l-ikel jew bejjiegħa fejn ikun rilevanti

(e) ‘tagħmir għall-applikazzjoni tal-pestiċidi’ tfisser kwalunkwe apparat iddiżinjat speċifikament għall-applikazzjoni tal-pestiċidi jew ta’ prodotti li fihom il-pestiċidi

(f) ‘aċċessorji għall-applikazzjoni tal-pestiċidi’ tfisser apparat li jista’ jitwaħħal fuq tagħmir għall-applikazzjoni tal-pestiċidi, li huma essenzjali għat-tħaddim tajjeb tiegħu, bħal żnienen, manometri, filters, passaturi u apparat għat-tindif tat-tank

(g) ‘bexx mill-ajru’ tfisser kwalunkwe applikazzjoni tal-pestiċidi permezz ta’ ajruplan jew elikotteru

(h) ‘ġestjoni integrata ta’ organiżmi ta’ ħsara’ tfisser ġestjoni integrata ta’ organiżmi ta' ħsara kif definita fir-Regolament (KE) Nru […]

(i) ‘indikatur tar-riskju’ tfisser parametru li jista’ jintuża biex jiġu evalwati l-impatti ta’ l-użu tal-pestiċidi fuq saħħet il-bniedem u l-ambjent.

Artikolu 4 Pjanijiet nazzjonali ta’ azzjoni biex inaqqsu r-riskji u d-dipendenza fuq il-pestiċidi

1. L-Istati Membri għandhom jadottaw pjanijiet nazzjonali ta’ azzjoni biex jistabbilixxu miri, miżuri u skedi ta’ implimentazzjoni għat-tnaqqis tar-riskji, inklużi perikli, u d-dipendenza fuq il-pestiċidi.

Huma u jfasslu u jirrevedu l-pjanijiet nazzjonali ta’ azzjoni, l-Istati Membri għandhom iqisu kif jixraq l-impatti soċjali, ekonomiċi u ambjentali tal-miżuri previsti.

2. Fi żmien tliet snin mid-dħul fis-seħħ ta’ din id-Direttiva, l-Istati Membri għandhom jikkomunikaw il-pjanijiet nazzjonali ta’ azzjoni lill-Kummissjoni u lill-Istati Membri l-oħra.

Il-pjanijiet nazzjonali ta' azzjoni għandhom jiġu riveduti għallinqas kull ħames snin u kull bidla fil-pjanijiet nazzjonali ta' azzjoni għandha tiġi rrappurtata lill-Kummissjoni mingħajr dewmien.

3. Fejn ikun rilevanti, il-Kummissjoni għandha tagħmel disponibbli lill-pajjiżi terzi t-tagħrif ikkomunikat skond il-paragrafu 2.

4. Id-dispożizzjonijiet dwar il-parteċipazzjoni pubblika kif stipulata fl-Artikolu 2 tad-Direttiva 2003/35/KE għandhom japplikaw għall-preparazzjoni u l-modifika tal-pjanijiet nazzjonali ta’ azzjoni.

Kapitolu IITaħriġ, Programmi ta’ għarfien u Bejgħ tal-pestiċidi

Artikolu 5 Taħriġ

1. L-Istati Membri għandhom jiżguraw li l-utenti professjonali, id-distributuri u l-konsulenti kollha jkollhom aċċess għal taħriġ xieraq.

It-taħriġ għandu jiġi ddiżinjat sabiex ikun żgurat li jinkiseb biżżejjed għarfien dwar is-suġġetti elenkati fl-Anness I.

2. Fi żmien sentejn mid-data msemmija fl-Artikolu 20(1), l-Istati Membri għandhom jistabbilixxu sistemi ta’ ċertifikazzjoni li jipprovdu evidenza ta’ attendenza għal sessjoni sħiħa tat-taħriġ li, bħala minimu, tkopri s-suġġetti elenkati fl-Anness I.

3. Il-Kummissjoni tista', skond il-proċedura msemmija fl-Artikolu 18(3), tadatta l-Anness I għall-progress tekniku u xjentifiku.

Article 6 Rekwiżiti għall-bejgħ tal-pestiċidi

1. L-Istati Membri għandhom jiżguraw li d-distributuri li jbigħu l-pestiċidi kklassifikati bħala tossiċi jew tossiċi ħafna skond id-Direttiva tal-Parlament Ewropew u tal-Kunsill 1999/45/KE[21] ikollhom għallinqas persuna waħda fl-impjieg tagħhom li għandha ċ-ċertifikat imsemmi fl-Artikolu 5(2) u li għandu jkun preżenti u disponibbli fil-post tal-bejgħ biex jipprovdi tagħrif lill-klijenti rigward l-użu tal-pestiċidi.

2. L-Istati Membri għandhom jieħdu l-miżuri kollha biex jiżguraw li l-bejgħ tal-pestiċidi li mhumiex awtorizzati għal użu mhux professjonali jkunu ristretti għal utenti professjonali li jkollhom fil-pussess tagħhom iċ-ċertifikat imsemmi fl-Artikolu 5(2).

3. L-Istati Membri għandhom jobbligaw lid-distributuri li jqiegħdu fis-suq il-pestiċidi mhux għal użu professjonali biex jipprovdu tagħrif ġenerali dwar ir-riskji ta’ l-użu tal-pestiċidi, partikolarment il-perikli, l-esponiment, il-ħżin tajjeb, it-tqandil u l-applikazzjoni, kif ukoll ir-rimi.

Il-miżuri previsti fil-paragrafi 1 u 2 għandhom jiġu stabbiliti fi żmien erba’ snin mid-data msemmija fl-Artikolu 20(1).

Artikolu 7 Programmi għall-Ħolqien ta’ Kuxjenza

L-Istati Membri għandhom jippromwovu u jiffaċilitaw programmi ta’ għarfien u d-disponibbilità tat-tagħrif marbut mal-pestiċidi lill-pubbliku ġenerali, partikolarment fir-rigward ta' l-effetti tagħhom fuq is-saħħa u l-ambjent u alternattivi li mhumiex kimiċi.

Kapitolu IIITagħmir għall-applikazzjoni tal-pestiċidi

Artikolu 8 Spezzjoni tat-tagħmir li qed jintuża diġà

1. L-Istati Membri għandhom jiżguraw li t-tagħmir u l-aċċessorji għall-applikazzjoni tal-pestiċidi li jintużaw professjonalment ikunu soġġetti għal spezzjonijiet f’intervalli regolari.

Għal dak il-għan, għandhom jistabbilixxu sistemi ta’ ċertifikazzjoni maħsuba biex jippermettu l-verifika ta’ l-ispezzjonijiet.

2. L-ispezzjonijiet għandhom jivverifikaw li t-tagħmir u l-aċċessorji għall-applikazzjoni tal-pestiċidi jissodisfaw ir-rekwiżiti essenzjali għas-saħħa u s-sikurezza u dawk għall-ambjent elenkati fl-Anness II.

It-tagħmir u l-aċċessorji għall-applikazzjoni tal-pestiċidi li huma konformi ma’ l-istandards armonizzati żviluppati skond l-Artikolu 17(1) għandhom jiġu preżunti li huma konformi mar-rekwiżiti essenzjali għas-saħħa u s-sikurezza u għall-ambjent koperti minn standard armonizzat bħal dan.

3. Fi żmien ħames snin mid-data msemmija fl-Artikolu 20(1), l-Istati Membri għandhom jiżguraw li t-tagħmir u l-aċċessorji għall-applikazzjoni tal-pestiċidi li jintużaw professjonalment ikunu ġew spezzjonati għallinqas darba u li tagħmir u aċċessorji għall-applikazzjoni tal-pestiċidi li għaddew mill-ispezzjoni biss ikunu qed jintużaw professjonalment.

4. L-Istati Membri għandhom jaħtru korpi responsabbli għat-twettiq ta’ l-ispezzjonijiet u jikkomunikawhom lill-Kummissjoni.

5. Il-Kummissjoni tista', skond il-proċedura msemmija fl-Artikolu 18(3), tadatta l-Anness II skond il-progress tekniku u xjentifiku li jseħħ.

Kapitolu IVPrattiki u Użijiet Speċifiċi

Artikolu 9 Bexx mill-ajru

1. L-Istati Membri għandhom jipprojbixxu l-bexx mill-ajru soġġett għall-paragrafi 2-6.

2. L-Istati Membri għandhom jiddefinixxu u jagħmlu disponibbli għall-pubbliku tagħrif dwar l-uċuħ tar-raba', iż-żoni u r-rekwiżiti partikolari għall-applikazzjoni fejn, b’deroga mill-paragrafu 1, jista' jiġi awtorizzat il-bexx mill-ajru.

3. L-Istati Membri għandhom jinnominaw l-awtoritajiet kompetenti għall-għoti tad-derogi u għandhom jgħarrfu lill-Kummissjoni bihom minnufih.

4. Id-derogi jistgħu jingħataw biss meta jkunu sodisfatti l-kundizzjonijiet li ġejjin:

1. ma għandux ikun hemm alternattivi vijabbli oħrajn, jew għandu jkun hemm vantaġġi ċari f’termini ta’ impatti mnaqqsa fuq is-saħħa u l-ambjent meta mqabbel ma’ l-applikazzjoni tal-pestiċidi mill-art.

2. il-pestiċidi użati għandhom ikunu awtorizzati espliċitament għall-bexx mill-ajru

3. l-operatur li jbexxex mill-ajru għandu jkollu ċ-ċertifikat imsemmi fl-Artikolu 5(2).

L-awtorizzazzjoni għandha tispeċifika l-miżuri meħtieġa għat-twissija tar-residenti, u persuni fil-qrib u għall-protezzjoni ta’ l-ambjent fil-viċinat taż-żona mbexxa.

5. Utent professjonali li jixtieq japplika l-pestiċidi permezz tal-bexx mill-ajru għandu jressaq talba lill-awtorità kompetenti akkumpanjata minn data ta’ appoġġ li turi li l-kundizzjonijiet imsemmija fil-paragrafu 4 huma sodisfatti.

6. L-awtoritajiet kompetenti għandhom iżżommu reġistru tad-derogi mogħtija.

Artikolu 10 Miżuri speċifiċi ta' emerġenza għall-protezzjoni ta’ l-ambjent akkwatiku

1. L-Istati Membri għandhom jiżguraw li, meta jintużaw pestiċidi qrib l-ilmijiet, tingħata preferenza lil:

4. prodotti li mhumex perikolużi għall-ambjent akkwatiku

5. l-iktar metodi ta’ applikazzjoni effiċjenti, inkluż l-użu ta’ tagħmir għall-applikazzjoni b’tifrix minimu ( low-drift ).

2. L-Istati Membri għandhom jiżguraw li jiġu stabbiliti żoni bafer xierqa, fejn il-pestiċidi ma għandhomx jintużaw jew jinħażnu, fuq għelieqi ma’ ġenb mogħdijiet ta’ l-ilma, u partikolarment biex jiġu mħarsa żoni fejn jittella’ ilma għax-xorb stabbiliti skond l-Artikolu 7(3) tad-Direttiva 2000/60/KE.

Id-dimensjonijiet taż-żoni bafer għandhom jiġu definiti bħala funzjoni tar-riskji ta’ tniġġis u l-karatteristiċi agrikoli taż-żona kkonċernata.

3. L-Istati Membri għandhom jiżguraw li jittieħdu l-miżuri xierqa biex jillimitaw it-tifrix bl-arja tal-pestiċidi, għallinqas f'għelejjel vertikali, inklużi msaġar tas-siġar tal-frott, dwieli, u ħops direttament ma’ ġenb mogħdija ta’ l-ilma.

4. L-Istati Membri għandhom jiżguraw li l-applikazzjoni tal-pestiċidi titnaqqas kemm jista' jkun jew tiġi eliminata skond kif ikun xieraq, fuq jew mal-ġenb ta’ toroq, linji tal-ferrovija, uċuħ permeabbli ħafna jew infrastruttura oħra qrib ta’ ilmijiet fil-wiċċ jew tal-pjan, jew fuq uċuħ issiġillati b'riskju għoli ta’ skular ġo l-ilma tal-wiċċ jew is-sistemi tad-dranaġġ.

Artikolu 11 Tnaqqis ta’ l-użu tal-pestiċidi f'żoni sensittivi

L-Istati Membri għandhom, huma u jqisu r-rekwiżti meħtieġa ta’ l-iġjene u s-sikurezza pubblika, jiżguraw li l-miżuri li ġejjin jiġu adottati:

6. l-użu tal-pestiċidi għandu jiġi pprojbit jew ristrett sa l-inqas punt meħtieġ f’żoni użati mill-pubbliku ġenerali jew minn popolazzjoni sensittiva, għallinqas f’parkijiet, ġonna pubbliċi u grawnds ta’ l-isport jew fejn jilagħbu t-tfal

7. l-użu tal-pestiċidi għandu jiġi pprojbit jew ristrett f’żoni speċjali ta’ konservazzjoni jew żoni oħra identifikati għall-iskopijiet ta’ l-istabbiliment tal-miżuri ta’ konservazzjoni meħtieġa skond l-Artikoli 3 u 4 tad-Direttiva 79/409/KEE u l-Artikoli 6, 10, u 12 tad-Direttiva 92/43/KEE.

Il-projbizzjoni jew ir-restrizzjoni msemmija fil-punt (b) tista' tkun ibbażata fuq ir-riżultati ta' l-evalwazzjonijiet tar-riskju rilevanti.

Artikolu 12 It-tqandil u l-ħżin ta’ pestiċidi u l-imballaġġ u l-fdalijiet tagħhom

1. L-Istati Membri għandhom jadottaw il-miżuri meħtieġa biex jiżguraw li l-operazzjonijiet li ġejjin ma jipperikolawx is-saħħa u s-sikurezza tal-bnedmin u l-ambjent:

8. il-ħżin, it-tqandil, id-dilwizzjoni u t-taħlit tal-pestiċidi qabel l-applikazzjoni

9. it-tqandil ta’ l-imballaġġ u l-fdalijiet tal-pestiċidi

10. it-trattament tat-taħlitiet li jifdal wara l-applikazzjoni

11. it-tindif tat-tagħmir li jintuża għall-applikazzjoni.

2. L-Istati Membri għandhom jieħdu l-miżuri kollha meħtieġa fir-rigward tal-pestiċidi awtorizzati għal użu mhux professjonali biex jevitaw operazzjonijiet perikolużi waqt l-użu.

3. L-Istati Membri għandhom jiżguraw li ż-żoni ta’ ħżin għall-pestiċidi jkunu mibnija b’tali mod li ma jkunx hemm rilaxxi mhux intenzjonati.

Artikolu 13 Ġestjoni Integrata ta’ Organiżmi ta’ Ħsara

1. L-Istati Membri għandhom jieħdu l-miżuri kollha meħtieġa biex jippromwovu biedja b’użu baxx tal-pestiċidi, inkluża l-ġestjoni integrata ta’ organiżmi ta’ ħsara, u biex jiżguraw li l-utenti professjonali tal-pestiċidi jibdew jagħmlu użu mill-miżuri kollha disponibbli għall-ħarsien ta' l-uċuħ tar-raba' li jiffavorixxu aktar l-ambjent u jagħtu prijorità lil alternattivi b’riskju baxx kulfejn possibbli, u f'kull każ ieħor lill-prodotti bl-inqas impatt fuq saħħet il-bniedem u l-ambjent fost dawk disponibbli għall-istess organiżmu ta’ ħsara.

2. L-Istati Membri għandhom jistabbilixxu jew jappoġġaw l-istabbiliment tal-kundizzjonijiet kollha meħtieġa għall-implimentazzjoni tal-ġestjoni integrata ta’ organiżmi ta’ ħsara.

3. Partikolarment, l-Istati Membri għandhom jiżguraw li l-bdiewa jkollhom għad-dispożizzjoni tagħhom, sistemi, inklużi taħriġ skond l-Artikolu 5, u għodod għall-monitoraġġ ta’ organiżmi ta’ ħsara u t-teħid tad-deċiżjonijiet, kif ukoll servizzi ta' konsulenza dwar il-ġestjoni integrata ta' organiżmi ta’ ħsara.

4. Sat-30 ta' Ġunju 2013, l-Istati Membri għandhom jirrappurtaw lill-Kummissjoni dwar l-implimentazzjoni tal-paragrafi 2 u 3, u partikolarment, jekk il-kundizzjonijiet neċessarji għall-implimentazzjoni tal-ġestjoni integrata ta’ organiżmi ta’ ħsara humiex fis-seħħ.

5. L-Istati Membri għandhom jiżguraw li, sa l-1 ta’ Jannar 2014, l-utenti professjonali kollha tal-pestiċidi jimplimentaw l-istandards ġenerali għall-Ġestjoni Integrata ta’ Organiżmi ta’ Ħsara.

6. L-Istati Membri għandhom jistabbilixxu l-inċentivi neċessarji kollha biex iħeġġu lill-bdiewa jimplimentaw standards ta’ Ġestjoni Integrata ta’ Organiżmi ta’ Ħsara speċifiċi skond il-wiċċ tar-raba’.

7. L-istandards ġenerali għall-Ġestjoni Integrata ta’ Organiżmi ta’ Ħsara msemmija fil-paragrafu 5 għandhom jiġu żviluppati skond il-proċedura stipulata fl-Artikolu 52 tar-Regolament (KE) Nru […].

8. L-istandards speċifiċi għall-wiċċ tar-raba’ għal Ġestjoni Integrata ta’ Organiżmi ta’ Ħsara msemmija fil-paragrafu 6 għandhom jiġu żviluppati skond il-proċedura stipulata fl-Artikolu 6(3) tad-Direttiva 98/34/KE.

Kapitolu VIndikaturi, Rappurtar u Skambju ta’ Tagħrif

Artikolu 14 Indikaturi

1. Il-Kummissjoni għandha, skond il-proċedura msemmija fl-Artikolu 18(3), tiżviluppa indikaturi tar-riskju armonizzati. Sakemm jiġu adottati dawk l-indikaturi, l-Istati Membri jistgħu jkomplu jużaw indikaturi nazzjonali eżistenti jew jadottaw indikaturi xierqa oħra.

2. L-Istati Membri għandhom jużaw data statistika miġbura skond ir-Regolament (KE) Nru [ESTAT…] għall-iskopijiet li ġejjin:

(a) il-kalkolu ta’ l-indikaturi komuni u armonizzati fil-livell nazzjonali

(b) l-identifikazzjoni ta’ xejriet fl-użu ta’ sustanzi attivi individwali, partikolarment meta jkunu ġew stabbiliti restrizzjonijiet fuq l-użu fil-livell Komunitarju skond id-dispożizzjonijiet tar-Regolament (KE) Nru […]

(c) l-identifikazzjoni ta’ sustanzi attivi ta’ prijorità jew uċuħ tar-raba' ta' prijorità jew prassi insostenibbli li jirrikjedu attenzjoni partikolari, jew prassi tajba li tista' tiġi stabbilita bħala eżempju sabiex jintlaħqu l-għanijiet tad-Direttiva fir-rigward tat-tnaqqis tar-riskju u d-dipendenza fuq il-prodotti għall-protezzjoni tal-pjanti.

3. L-Istati Membri għandhom jikkomunikaw ir-riżultati ta’ l-evalwazzjonijiet imwettqa skond il-paragrafu 2 lill-Kummissjoni u lill-Istati Membri l-oħra.

4. Il-Kummissjoni għandha tuża d- data statistika miġbura skond ir-Regolament (KE) Nru [ESTAT…] u l-informazzjoni msemmija fil-paragrafu 3 biex tikkalkula l-indikaturi tar-riskju fil-livell Komunitarju, sabiex tagħmel stima tax-xejriet fir-riskji mill-użu tal-pestiċidi.

Din id- data u l-informazzjoni għandha tintuża wkoll mill-Kummissjoni biex tevalwa l-progress fl-ilħiq ta’ l-għanijiet ta' politiki Komunitarji oħra bil-għan li jnaqqsu l-impatt tal-pestiċidi fuq saħħet il-bniedem u ta’ l-annimali u fuq l-ambjent.

5. Għall-iskopijiet tal-paragrafu 2(a) u l-paragrafu 3, l-indikaturi tar-riskju għandhom jiġu kkalkulati fuq il-bażi tad-dejta mdaħħla rigward il-perikli u l-esponiment, rekords dwar l-użu tal-pestiċidi, data dwar il-karatteristiċi tal-pestiċidi, dwar it-temp u dwar il-ħamrija.

Artikolu 15 Ir-Rappurtar

Il-Kummissjoni għandha tressaq regolarment lill-Parlament Ewropew u lill-Kunsill rapport dwar il-progress fl-implimentazzjoni ta' din id-Direttiva, akkumpanjat fejn xieraq minn proposti għal emendi.

Kapitolu VIDispożizzjonijiet finali

Artikolu 16 Penalitajiet

L-Istati Membri għandhom jiddeterminaw is-sanzjonijiet applikabbli għal każijiet tal-ksur ta' dispożizzjonijiet nazzjonali adottati bis-saħħa ta' din id-Direttiva u għandhom jieħdu l-miżuri kollha biex jiżguraw li dawn ikunu infurzati. Il-penalitajiet għandhom ikunu effettivi, proporzjonati u disważivi.

L-Istati Membri għandhom jinnottifikaw lill-Kummissjoni dwar dawk id-disposizzjonijiet, mhux aktar tard minn tnax-il xahar mid-data msemmija fl-Artikolu 20(1), u għandhom jinfurmawha mingħajr dewmien dwar kull emenda sussegwenti li taffettwahom.

Artikolu 17 L-istandardizzazzjoni

1. L-istandards imsemmija fl-Artikolu 8(2) ta’ din id-Direttiva għandhom jiġu stabbiliti skond il-proċedura pprovduta fl-Artikolu 6(3) tad-Direttiva 98/34/KE.

It-talba għall-iżvilupp ta’ dawn l-istandards tista’ tiġi stabbilita f'konsultazzjoni mal-Kumitat imsemmi fl-Artikolu 18(1).

2. Il-Kummissjoni għandha tippubblika r-referenzi ta' l-istandards armonizzati fil- Ġurnal Uffiċjali ta' l-Unjoni Ewropea .

3. Meta Stat Membru jew il-Kummissjoni jqisu li standard ma jissodisfax kompletament ir-rekwiżiti essenzjali li jkopri, il-Kummissjoni jew l-Istat Membru kkonċernat għandhom iressqu l-kwistjoni quddiem il-Kumitat imwaqqaf mid-Direttiva 98/34/KE u jagħtu l-argumenti tagħhom. Il-Kumitat għandu jagħti l-opinjoni tiegħu mingħajr dewmien.

Fid-dawl ta’ l-opinjoni ta' dak il-Kumitat, il-Kummissjoni għandha tiddeċiedi li tippubblika, li ma tippubblikax, li tippubblika bir-restrizzjonijiet, li żżomm, li żżomm bir-restrizzjonijiet jew li tirtira r-referenzi għall-istandard armonizzat ikkonċernat fil- Ġurnal Uffiċjali ta’ l-Unjoni Ewropea .

Artikolu 18 Kumitati

1. Il-Kummissjoni għandha tkun megħjuna mill-Kumitat Permanenti dwar il-Katina Alimentari u s-Saħħa ta' l-Annimali stabbilit mill-Artikolu 58 tar-Regolament tal-Parlament Ewropew u tal-Kunsill (KE) Nru 178/2002[22].

2. Fejn issir referenza għal dan il-paragrafu, għandhom japplikaw l-Artikoli 3 u 7 tad-Deċiżjoni 1999/468/KE, bil-qies tad-dispożizzjonijiet ta' l-Artikolu 8 tagħha.

3. Fejn issir referenza għal dan il-paragrafu, għandhom japplikaw l-Artikoli 5 u 7 tad-Deċiżjoni 1999/468/KE, bil-qies tad-dispożizzjonijiet ta' l-Artikolu 8 tagħha.

Il-perjodu stabbilit fl-Artikolu 5(6) tad-Deċiżjoni 1999/468/KE għandu jkun ta' tliet xhur.

Artikolu 19 Nefqa

Sabiex ikun appoġġat l-istabbiliment ta’ politika armonizzata u sistemi armonizzati fil-qafas ta’ l-użu sostenibbli tal-pestiċidi, il-Kummissjoni tista’ tiffinanzja:

(a) l-iżvilupp ta’ sistema armonizzata inkluża database għall-ġbir u l-ħżin tat-tagħrif kollu marbut ma’ l-indikaturi tar-riskju tal-pestiċidi, u biex tagħmel dan it-tagħrif disponibbli lill-awtoritajiet kompetenti, partijiet interessati oħrajn u l-pubbliku ġenerali.

(b) it-twettiq ta’ l-istudji neċessarji għall-preparazzjoni u l-iżvilupp ta’ leġiżlazzjoni, inkluż l-adattament ta’ l-Annessi ta’ din id-Direttiva għall-progress tekniku.

(c) l-iżvilupp ta’ gwida u l-aħjar prassi biex jiffaċilitaw l-implimentazzjoni ta’ din id-Direttiva.

Artikolu 20 It-traspożizzjoni

1. L-Istati Membri għandhom iġibu fis-seħħ il-liġijiet, ir-regolamenti u d-dispożizzjonijiet amministrattivi meħtieġa biex jimxu ma' din id-Direttiva sa l-aktar tard sentejn mid-dħul fis-seħħ tiegħu. Għandhom jikkomunikaw minnufih lill-Kummissjoni t-test ta' dawk id-dispożizzjonijiet u tabella ta' korrelazzjoni bejn dawk id-dispożizzjonijiet u din id-Direttiva.

Meta l-Istati Membri jadottaw dawk id-dispożizzjonijiet, għandu jkun fihom referenza għal din id-Direttiva, jew ikunu akkumpanjati minn tali referenza, fl-okkażjoni tal-pubblikazzjoni uffiċjali tagħhom. L-Istati Membri għandhom jiddeterminaw kif għandha ssir din ir-referenza.

2. L-Istati Membri għandhom jikkomunikaw lill-Kummissjoni t-test tad-dispożizzjonijiet ewlenin tal-liġi nazzjonali li jadottaw fil-qasam kopert minn din id-Direttiva.

Artikolu 21 Id-dħul fis-seħħ

Din id-Direttiva għandha tidħol fis-seħħ fi […] jum wara l-jum tal-pubblikazzjoni tagħha fil- Ġurnal Uffiċjali ta' l-Unjoni Ewropea .

Artikolu 22

Din id-Direttiva hija indirizzata lill-Istati Membri.

Magħmula fi Brussell,

Għall-Parlament Ewropew Għall-Kunsill

Il-President Il-President

ANNESS I Programmi ta' taħriġ.

Il-programmi ta' taħriġ għandhom jiġu ddiżinjati sabiex jiżguraw li jkun akkwistat biżżejjed tagħrif dwar is-suġġetti li ġejjin:

1. il-leġiżlazzjoni rilevanti kollha rigward il-pestiċidi u l-użu tagħhom

2. il-perikli u r-riskji assoċjati mal-pestiċidi, u kif jiġu identifikati u kkontrollati, partikolarment:

a) riskji lill-bnedmin (operaturi, residenti, persuni fil-qrib, persuni li jidħlu f’żoni ttrattati u dawk li jmissu jew jieklu l-oġġetti ttrattati) u kif dawn jiggravaw b’fatturi bħat-tipjip.

b) sintomi ta’ avvelenament bil-pestiċidi u miżuri ta’ l-ewwel għajnuna

c) riskji għal pjanti mhux fil-mira, insetti li jagħmlu l-ġid, il-flora u l-fawna selvaġġa, il-bijodiversità u l-ambjent in ġenerali

3. kunċetti dwar strateġiji u metodi għall-ġestjoni integrata ta’ organiżmi ta’ ħsara, strateġiji u metodi għall-ġestjoni integrata ta’ l-uċuħ tar-raba’ u prinċipji tal-biedja organika; informazzjoni dwar standards ġenerali u speċifiċi għall-wiċċ tar-raba' kkonċernat dwar il-ġestjoni integrata ta’ organiżmi ta’ ħsara

4. inizjazzjoni għal evalwazzjoni komparattiva fil-livell ta’ l-utent biex l-utenti professjoni jiġu megħjuna jagħmlu l-iktar għażla xierqa minn fost il-prodotti kollha awtorizzati għal problema speċifika ta’ organiżmu ta’ ħsara f’sitwazzjoni speċifika.

5. miżuri biex jitnaqqsu kemm jista’ jkun ir-riskji lill-bnedmin, lil speċijiet mhux fil-mira u lill-ambjent: prassi ta’ ħidma sikura għall-ħżin, it-tqandil u t-taħlit tal-pestiċidi, u r-rimi ta’ imballaġġ vojt, materjal ieħor ikkontaminat u pestiċidi li jibqa' (inklużi t-taħlitiet li jibqgħu fit-tank) kemm f’għamla ta’ konċentrat kif ukoll f’għamla dilwita; mod rakkomandat għall-kontroll ta’ l-esponiment ta’ l-operatur (tagħmir għall-protezzjoni personali)

6. proċeduri biex it-tagħmir għall-applikazzjoni jitlesta għat-tħaddim, inkluż l-ikkalibrar tiegħu, u għat-tħaddim tiegħu b'riskji minimi għall-utenti, bnedmin oħra, speċijiet ta' annimali u pjanti mhux fil-mira, il-bijodiversità u l-ambjent.

7. l-użu ta’ tagħmir għall-applikazzjoni u l-manutenzjoni tiegħu, u metodi speċifiċi ta’ bexx (eż. bexx b’volum żgħir, żnienen li ma jferrxux ħafna) kif ukoll l-għanijiet tal-kontroll tekniku tal-bexxiexa fl-użu u l-modi kif tittejjeb il-kwalità tal-bexx

8. azzjoni ta’ emerġenza biex tipproteġi s-saħħa tal-bniedem u l-ambjent f’każ ta' tixrid u kontaminazzjoni aċċidentali

9. monitoraġġ tas-saħħa u faċilitajiet ta’ aċċess għar-rappurtar ta’ kwalunkwe inċident jew tħassib

10. żamma ta’ reġistru għal kull użu li jsir mill-pestiċidi, skond il-leġiżlazzjoni rilevanti.

ANNESS II Saħħa u Sikurezza kif ukoll rekwiżiti Ambjentali rigward l-ispezzjoni tat-tagħmir għall-applikazzjoni tal-pestiċidi

L-ispezzjoni tat-tagħmir għall-applikazzjoni tal-pestiċidi għandha tkopri l-aspetti importanti kollha biex jitlaħaq livell għoli ta’ sikurezza u protezzjoni tas-saħħa tal-bniedem u ta’ l-ambjent u effettività sħiħa ta’ l-operazzjoni ta’ l-applikazzjoni billi jkun żgurat tħaddim tajjeb ta’ l-apparat u l-funzjonijiet li ġejjin, fejn ikun xieraq:

(1) L-apparat għat-trażmissjoni ta' l-enerġija

Il-parti protettiva tal- power take-off drive shaft u l-parti protettiva tal- power input connection għandhom jiġu ffittjati u jkunu f'kundizzjoni tajba u l-parts ta’ sikurezza u kull part tat-trażmissjoni ta’ l-enerġija li tiċċaqlaq jew iddur ma għandhomx ikunu affettwati fit-tħaddim tagħhom sabiex tkun żgurata l-protezzjoni ta’ l-operatur.

(2) Il-Pompa

Il-kapaċità tal-pompa għandha tkun adatta għall-ħtiġijiet tat-tagħmir u l-pompa għandha taħdem sewwa sabiex tiżgura rata ta’ applikazzjoni stabbli u affidabbli. Ma għandu jkun hemm l-ebda nixxija mill-pompa.

(3) Aġitazzjoni

It-tagħmir għall-aġitazzjoni għandu jiżgura riċirkolazzjoni tajba sabiex tinkiseb konċentrazzjoni uniformi fil-volum kollu tat-taħlita likwida tal-bexx fit-tank.

(4) It-tank tal-bexx likwidu

It-tankijiet tal-bexx, inklużi l-indikatur tal-kontenut tat-tank, it-tagħmir għall-mili, il-passaturi u l-filtri, l-apparat għall-iżvujtar, u l-apparat għat-taħlit, għandhom joperaw b’tali mod li jkunu mminimizzati t-tixridiet aċċidentali, id-distribuzzjonijiet mhux uniformi tal-konċentrazzjoni, l-esponiment ta’ l-operatur u kontenut residwu.

(5) Is-sistemi ta’ kejl u sistemi ta’ kontroll u regolazzjoni

Il-parts kollha għall-kejl, biex titfi u tixgħel u għall-aġġustament tal-pressjoni u/jew ir-rata tal-fluss għandhom jaħdmu b’mod affidabbli u ma għandu jkun hemm l-ebda nixxija. Il-kontroll tal-pressjoni u l-operazzjoni tal-parts għall-aġġustament tal-pressjoni għandu jkun possibbli faċilment matul l-applikazzjoni. It-tagħmir għall-aġġustament tal-pressjoni għandu jżomm pressjoni kostanti ta’ ħidma b’revoluzzjonijiet kostanti tal-pompa, sabiex ikun żgurat li tiġi applikata rata stabbli tal-volum ta’ l-applikazzjoni.

(6) Pajpijiet u manek

Il-pajpijiet għandhom ikunu f’kundizzjoni tajba biex jevitaw id-disturbi tal-fluss tal-likwidu jew tixridiet aċċidentali fil-każ ta’ falliment. Ma għandu jkun hemm l-ebda nixxija mill-pajpijiet jew mill-manek meta jitħaddmu bil-pressjoni massima ottenibbli għas-sistema.

(7) Filtri

Sabiex ikunu evitati t-turbolenza u l-eteroġeneità fil-mod kif joħroġ il-bexx, il-filtri għandhom ikunu f'kundizzjoni tajba u d-daqs tax-xibka tal-filtru għandu jikkorrispondi għad-daqs taż-żnienen iffittjati fuq l-isprejer. Is-sistema li tindika meta l-filter ikun imblukkat għandha taħdem sewwa.

(8) Id-driegħ tal-bexxiexa (għal tagħmir li jbexxex il-pestiċidi permezz ta’ driegħ ippożizzjonat orizzontalment, li jinsab qrib il-wiċċ tar-raba' jew il-materjali li jrid jiġi ttrattat)

Id-driegħ tal-bexxiexa għandha tkun f’kundizzjoni tajba u stabbli fid-direzzjonijiet kollha. Is-sistema fejn titwaħħal u s-sistema għall-aġġustament u t-tagħmir għat-tnaqqis ta’ movimenti mhux intenzjonati u s-sistema li tikkumpensa għal niżla għandhom jaħdmu b’mod affidabbli.

(9) Żnienen

Iż-żnienen għandhom jaħdmu sewwa biex jikkontrollaw it-taqtir meta jieqaf il-bexx. Biex tkun żgurata l-omoġeneità ta’ kif joħroġ il-bexx, ir-rata ta’ fluss ta’ kull żennuna individwali ma għandhiex tiddevja b'iktar minn 5% mid-dejta fit-tabelli tar-rata tal-fluss ipprovduti mill-manifattur.

(10) Tqassim

It-tqassim trasversali u vertikali (fil-każ ta’ applikazzjonijiet lil uċuħ vertikali) tad-distribuzzjoni tat-taħlita tal-bexx u t-tqassim fid-direzzjoni tas-sewqan għandhom ikunu uniformi. Għandhom ikunu żgurati l-kwantità u d-distribuzzjoni xierqa tat-taħlita tal-bexx fuq iż-żona fil-mira.

(11) Blower (għal tagħmir li jbexxex il-pestiċidi permezz ta’ l-arja)

Il-blower għandu jkun f’kundizzjoni tajb u għandu jiżgura fluss stabbli u affidabbli ta’ arja.

DIKJARAZZJONI FINANZJARJA LEĠIŻLATTIVA

Dan id-dokument huwa maħsub sabiex jakkumpanja u jissupplimenta l-Memorandum ta’ Spjegazzjoni. Għaldaqstant, meta timtela din id-Dikjarazzjoni Finanzjarja Leġiżlattiva, u bla preġudizzju għal-leġibbiltà tagħha, għandu jsir tentattiv ħalli tiġi evitata r-ripetizzjoni ta' l-informazzjoni mogħtija fil-Memorandum ta’ Spjegazzjoni. Qabel timla din l-iskeda, jekk jogħġbok irreferi għal-Linji ta' Gwida speċifiċi li tfasslu sabiex jipprovdu gwida u kjarifika għall-punti li ġejjin.

ISEM IL-PROPOSTA:

Proposta għal Direttva tal-Parlament Ewropew u tal-Kunsill li tistabbilixxi qafas għall-azzjoni Komunitarja għall-ilħiq ta' użu sostenibbli tal-pestiċidi

IL-QAFAS ABM / ABB

Qasam (Oqsma) tal-Politika kkonċernata/i u Attività/ajiet assoċjati:

L-Ambjent (ABB Kodiċi 0703: L-implimentazzjoni tal-Politika u l-Leġiżlazzjoni Komunitarja dwar l-Ambjent

IL-LINJI TAL-BAĠIT

Linji tal-Baġit (linji operattivi u linji ta’ assistenza teknika u amministrattiva relatati (ex- linji B..A)) li jinkludu l-intestaturi:

Strument finanzjarju għall-Ambjent (LIFE+ għall-perjodu 2007-2013) (07.03.07)

It-tul ta’ zmien ta’ l-azzjoni u l-impatt finanzjarju:

Għall-perjodu 2007-2013, l-approprjazzjonijiet rikjesti sejrin ikunu koperti mir-riżorsi diġà previsti fil-programm LIFE+, u mhu qed jintalab l-ebda ammont adizzjonali.

Il-karatteristiċi baġitarji ( żid ir-ringieli jekk ikun meħtieġ):

Il-linja tal-baġit | It-Tip ta' nefqa | Ġdid | Kontribuzzjoni ta’ l-EFTA | Il-kontribuzzjonijiet mill-pajjiżi applikanti | L-intestatura fil-perspettiva finanzjarja |

07 03 07 | Mhux obblig. | Diff | LE | LE | LE | Nru [2] |

SINTEŻI TAR-RIŻORSI

Riżorsi Finanzjarji

Sommarju ta’ l-approprjazzjonijiet għall-impenji (AI) u ta’ l-approprjazzjonijiet għall-ħlasijiet (AĦ)

EUR miljuni (sa tliet ċifri deċimali)

It-tip ta’ nefqa | In-Nru tas-Sezzjoni | 2008 | 2009 | 2010 | 2011 | 2012 | 2013 u wara | Total |

Infiq operattiv[23] |

L-approprjazzjonijiet għall-impenji (AI) | 8.1 | A | 0.227 | 0.161 | 0.161 | 0.134 | 0.134 | 0.107 | 0.924 |

L-approprjazzjonijiet għall-ħlasijiet (AĦ) | B | 0.151 | 0.153 | 0.170 | 0.143 | 0.129 | 0.109 | 0.855 |

Infiq amministrattiv fi ħdan l-ammont ta’ referenza[24] |

L-għajnuna teknika u amministrattiva (NDA) | 8.2.4 | C | 0.000 | 0.000 | 0.000 | 0.000 | 0.000 | 0.000 | 0.000 |

AMMONT TOTALI TA’ REFERENZA |

L-approprjazzjonijiet għall-impenji | A+c | 0.227 | 0.161 | 0.161 | 0.134 | 0.134 | 0.107 | 0.924 |

L-approprjazzjonijiet għall-ħlasijiet | B+c | 0.151 | 0.153 | 0.170 | 0.143 | 0.129 | 0.109 | 0.855 |

Infiq amministrattiv li mhuwiex inkluż fl-ammont ta’ referenza[25] |

Ir-riżorsi umani u l-infiq assoċjat (NDA) | 8.2.5 | D | 0.108 | 0.108 | 0.108 | 0.108 | 0.108 | 0.108 | 0.648 |

L-ispejjeż amministrattivi, barra l-ispejjeż tar-riżorsi umani u l-ispejjeż assoċjati, li mhumiex inklużi fl-ammont ta’ referenza (NDA) | 8.2.6 | E | 0.000 | 0.111 | 0.031 | 0.111 | 0.031 | 0.111 | 0.395 |

L-ispiża finanzjarja totali indikattiva ta’ l-intervent

TOTAL ta’ l-AI li jinkludi l-infiq fuq ir-Riżorsi Umani | a+c+d+e | 0.335 | 0.380 | 0.300 | 0.353 | 0.273 | 0.326 | 1.967 |

TOTALI ta’ l-AĦ li jinkludu l-infiq tar-Riżorsi Umani | b+c+d+e | 0.259 | 0.372 | 0.309 | 0.362 | 0.268 | 0.328 | 1.898 |

Id-dettalji dwar il-kofinanzjament

Jekk il-proposta tinvolvi l-kofinanzjament mill-Istati Membri, jew minn korpi oħra (jekk jogħġbok speċifika liema), għandha tiġi indikata stima tal-livell ta’ dan il-kofinanzjament fit-tabella ta’ hawn taħt (jistgħu jiżdiedu linji addizzjonali jekk huma previsti korpi differenti li jipprovdu l-kofinanzjament):

EUR miljuni (sa tliet ċifri deċimali)

Il-korp ta’ kofinanzjament | 2008 | 2009 | 2010 | 2011 | 2012 | 2013 u wara | Total |

…………………… | f | 0.000 | 0.000 | 0.000 | 0.000 | 0.000 | 0.000 | 0.000 |

TOTAL ta’ AI li jinkludi l-kofinanzjament | a+c+d+e+f | 0.335 | 0.380 | 0.300 | 0.353 | 0.273 | 0.326 | 1.967 |

Il-kompatibbiltà mal-Programmazzjoni Finanzjarja

X Il-proposta hija kompatibbli mal-programmazzjoni finanzjarja eżistenti.

( Il-proposta sejra tinvolvi l-programmazzjoni mill-ġdid ta’ l-intestatura rilevanti fil-perspettiva finanzjarja.

( Il-proposta tista’ teħtieġ l-applikazzjoni tad-dispożizzjonijiet tal-Ftehim Interistituzzjonali[26] (i.e. strument ta’ flessibbiltà jew reviżjoni tal-perspettiva finanzjarja).

Impatt finanzjarju fuq id-Dħul

X Il-proposta ma għandhiex impatt finanzjarju fuq id-dħul

( Il-proposta għandha impatt finanzjarju – l-effett fuq id-dħul huwa kif ġej:

NB: Id-dettalji u l-osservazzjonijiet kollha li għandhom x’jaqsmu mal-metodu tal-kalkolu ta’ l-effett fuq id-dħul għandhom jintwerew f’anness separat.

EUR miljuni (sa ċifra deċimali waħda)

Qabell-azzjoni[2007] | Is-sitwazzjoni wara l-azzjoni |

L-għadd totali ta’ riżorsi umani | 1A*/ AD | 1A*/ AD | 1A*/ AD | 1A*/ AD | 1A*/ AD | 1A*/ AD |

IL-KARATTERISTIĊI U L-GĦANIJIET

Jeħtieġ li d-dettalji tal-kuntest tal-proposta jingħataw fil-Memorandum ta’ Spjegazzjoni. Din is-sezzjoni tad-Dikjarazzjoni Finanzjarja Leġiżlattiva għandha tinkludi l-informazzjoni speċifika suplementari li ġejja:

Il-ħtieġa li għandha tintlaħaq f'qasir żmien jew fit-tul

Protezzjoni mtejba tas-saħħa tal-bniedem u ta' l-ambjent kontra l-effetti ħżiena tal-pestiċidi (ara l-Memorandum ta' Spjegazzjoni, is-sezzjoni 'Ir-raġunijiet għall-proposta u l-għanijiet tagħha'). Għal dan il-għan, jinħtieġu riżorsi finanzjarji għal:

- l-iżvilupp ta' sistema armonizzata, li tinkludi database adegwata għall-ġbir u l-ħżin ta' l-informazzjoni kollha relatata ma' l-indikaturi ta' riskju mill-pestiċidi, u t-tqegħid ta' din l-informazzjoni għad-dispożizzjoni ta' l-awtoritajiet kompetenti, ta' partijiet interessati oħra u l-pubbliku ġenerali.

- it-twettiq ta' studji meħtieġa għall-preparazzjoni u l-iżvilupp ta' leġiżlazzjoni, inkluż l-adattament ta' l-Annessi ta' din id-Direttiva għall-avvanzi tekniċi; kif ukoll

- l-iżvilupp ta' gwida u l-aħjar prattika biex tiġi ffaċilitata l-implimentazzjoni ta' din id-Direttiva.

Il-prinċipji tar-Regolament tal-Kunsill Nru 1605/2002 dwar ir-Regolament Finanzjarju applikabbli għall-baġit ġenerali tal-Komunitajiet Ewropej huma għal kollox imħarsa.

Il-valur miżjud ta’ l-involviment tal-Komunità u l-koerenza tal-proposta ma’ strumenti finanzjarji oħra u sinerġiji possibbli

Mingħajr l-involviment Komunitarju, jissuktaw is-sitwazzjonjiet diverġenti attwali fl-Istati Membri (ara wkoll is-sezzjoni 3 tal-Memorandum ta' Spjegazzjoni).

L-infiq operattiv huwa previst f'dik il-parti tal-baġit ta' LIFE+ li hija soġġetta għall-ġestjoni ċentrali diretta.

L-għanijiet, ir-riżultati mistennija u l-indikaturi relatati tal-proposta fil-kuntest tal-qafas ABM

It-tnaqqis ta’ l-impatti tal-pestiċidi fuq is-saħħa tal-bniedem u fuq l-ambjent, u aktar ġeneralment, sabiex jintlaħaq użu aktar sostenibbli tal-pestiċidi kif ukoll tnaqqis sinifikanti fir-riskji globali u fl-użu tal-pestiċidi, konsistenti mal-protezzjoni neċessarja ta’ l-uċuħ tar-raba’. B'mod partikolari, il-miri speċifiċi:

(i) it-tnaqqis kemm jista' jkun tal-perikli u tar-riskji għas-saħħa u għall-ambjent mill-użu tal-pestiċidi;

(ii) it-titjib ta' kontrolli dwar l-użu u d-distribuzzjoni tal-pestiċidi;

(iii) it-tnaqqis tal-livelli ta’ sustanzi perikolużi attivi, inkluż permezz tas-sostituzzjoni ta’ dawk l-aktar perikolużi minn alternattivi aktar sikuri (inklużi dawk mhux kimiċi);

(iv) l-inkoraġġiment ta’ l-użu ta’ ta’ kultivazzjoni ta’ ftit jew ta’ l-ebda użu ta’ pestiċidi partikolarment billi titqajjem il-kuxjenza ta’ l-utenti, permezz tal-promozzjoni ta’ kodiċijiet ta' prattika tajba, u l-kunsiderazzjoni ta’ l-applikazzjoni possibbli ta’ strumenti finanzjarji;

(v) l-istabbiliment ta' sistema trasparenti għar-rappurtar u għall-monitoraġġ tal-progress li jsir lejn l-ilħiq ta' l-għanijiet ta’ l-istrateġija, inkluż l-iżvilupp ta’ indikaturi adegwati.

F'fażi ulterjuri, għandhom jiġu żviluppati indikaturi armonizzati, u jiġu adottati. Jintużaw għall-monitoraġġ ta' l-implimentazzjoni u l-effetti.

Il-Metodu ta’ Implimentazzjoni (indikattiv)

Hawn taħt uri l-metodu/i[28] magħżul(a) għall-implimentazzjoni ta’ l-azzjoni.

X Ġestjoni Ċentralizzata

XDirettament mill-Kummissjoni

Indirettament b'delega lil:

Aġenziji Eżekuttivi

Korpi mwaqqfa mill-Komunitajiet hekk kif jissemma fl-Artikolu 185 tar-Regolament Finanzjarju

Korpi nazzjonali tas-settur pubbliku jew b'missjoni ta' servizz pubbliku

Ġestjoni maqsuma jew deċentralizzata

Ma’ Stati Membri

ٱMa' Pajjiżi Terzi

ٱĠestjoni konġunta ma’ organizzazzjonijiet internazzjonali (jekk jogħġbok speċifika)

Kummenti rilevanti:

MONITORAĠĠ U EVALWAZZJONI

Sistema ta' monitoraġġ

L-Istati Membri se jkun jeħtiġilhom jirrappurtaw dwar l-azzjonijiet u l-miżuri kollha li jadottaw b'implimentazzjoni ta' din id-Direttiva, u – ġaladarba tkun f'postha l-leġiżlazzjoni meħtieġa – dwar l-użu reali tal-pestiċidi.

Il-kuntratti li tiffirmahom il-Kummissjoni għall-finijiet ta' l-implimentazzjoni tad-Direttiva għandhom jipprovdu għals-superviżjoni u l-kontroll finanzjarju min-naħa tal-Kummissjoni (jew ta' kwalunkwe rappreżentant awtorizzat minnha) u l-verifiki min-naħa tal-Qorti ta' l-Awdituri, jekk ikun hemm bżonn fil-post stess.

L-Evalwazzjoni

Evalwazzjoni ex-ante

Ara l-Evalwazzjoni ta' l-Impatt li takkumpanja din il-proposta bħala Dokument ta' Ħidma ta' l-Istaff tal-Kummissjoni. L-impatti tal-miżuri kollha proposti tqiesu mil-lati ekonomiċi, soċjali, tas-saħħa u ambjentali.

Miżuri meħuda wara evalwazzjoni intermedja/ex-post (tagħlimiet miksuba permezz ta’ esperjenzi simili fl-imgħoddi)

Il-miżuri proposti fid-Diretiva ta' Qafas huma bbażati fuq l-evalwazzjoni tas-sitwazzjoni u fuq l-esperjenza ta' l-Istati Membri. L-Evalwazzjoni ta' l-Impatt qieset dawn il-valutazzjonijiet kollha.

It-termini u l-frekwenza ta’ l-evalwazzjoni fil-ġejjieni

Evalwazzjoni regolari ta' l-effikaċja tad-Direttiva fi ħdan 'il-Grupp ta' Esperti ta' l-Istrateġija Tematika', li sejjer jirrikkmanda l-gwida adegwata, l-aħjar prattika u l-emendi meħtieġa għad-Direttiva u l-implimentazzjoni tagħha.

IL-MIŻURI GĦAL KONTRA L-FRODI

Applikazzjoni sħiħa ta' l-istandards tal-kontroll intern Nri 14, 15, 16, 18, 19, 20 u 21, kif ukoll tal-prinċipji tar-Regolament tal-Kunsill Nru 1605/2002 dwar ir-Regolament Finanzjarju applikabbli għall-baġit ġenerali tal-Komunitajiet Ewropej.

Il-Kummissjoni għandha tiżgura li, meta l-azzjonijiet iffinanzjati taħt din id-Deċiżjoni jkunu implimentati, l-interessi finanzjarji tal-Komunità jitħarsu bl-applikazzjoni preventiva ta’ miżuri kontra l-frodi, il-korruzzjoni u l-attivitajiet illegali oħra permezz ta’ kontrolli effikaċi u bil-ġbir lura ta’ ammonti mħallsa mingħajr ġustifikazzjoni u, jekk jiġu identifikati irregolaritajiet, permezz ta’ pieni effettivi, proporzjonali u dissważivi, f’konformità mar-Regolamenti tal-Kunsill (KE, Euratom) Nru 2988/95 u (Euratom, KE) Nru 2185/96, u mar-Regolament tal-Parlament Ewropew u tal-Kunsill (KE) Nru 1073/1999.

DETTALJI TAR-RIŻORSI

L-GħANIJIET TAL-PROPOSTA F’TERMINI TA’ L-ISPIżA FINANZJARJA TAGħHOM

Approprjazzjonijiet għall-impenji f'EUR miljuni (sa tliet ċifri deċimali)

2008 | 2009 | 2010 | 2011 | 2012 | 2013 |

Uffiċjali jew staff temporanju[29] (XX 01 01) | A*/AD | 1 | 1 | 1 | 1 | 1 | 1 |

B*, C*/AST |

Staff iffinanzjat[30] taħt l-Artikolu XX 01 02 |

Staff ieħor[31] iffinanzjat taħt l-Artikolu XX 01 04/05 |

TOTAL | 1 | 1 | 1 | 1 | 1 | 1 |

Deskrizzjoni tax-xogħlijiet li jidderivaw mill-azzjoni

Verifika ta' l-implimentazzjoni fl-Istati Membri u l-organizzar ta' sistema ta' l-iskambju ta' l-informazzjoni skond l-Artikolu 16 tal-Proposta, li twassal għal miżuri għall-adattament tad-Direttiva jew ta' l-Annessi tagħha, skond ma jkun f'loku, fid-dawl ta' l-avvanzi tekniċi.

Is-sorsi tar-riżorsi umani (statutorji)

(Meta jissemma’ iktar minn sors wieħed, jekk jogħġbok indika l-għadd ta’ karigi li joriġinaw minn kull wieħed minnhom)

( Karigi attwalment allokati lill-ġestjoni tal-programm li għandhom jinbidlu jew jiġu estiżi

( Karigi allokati minn qabel fi ħdan l-eżerċizzju APS/PDB għas-sena n

( Karigi li għandhom jintalbu fil-proċedura APS/PDB li jmiss

X Karigi li għandhom jiġu allokati mill-ġdid permezz tar-riżorsi eżistenti fi ħdan is-servizz ta’ ġestjoni (rijallokazzjoni interna)

( Karigi meħtieġa għas-sena n għalkemm mhumiex previsti fl-eżerċizzju APS/PDB għas-sena kkonċernata

L-Ispiża amministrattiva oħra inkluża fl-ammont ta’ referenza (XX 01 04/05 – L-ispiża għall-ġestjoni amministrattiva)

EUR miljuni (sa tliet ċifri deċimali)

Il-linja tal-baġit (numru u intestatura) | 2008 | 2009 | 2010 | 2011 | 2012 | 2013 u wara | TOTAL |

Assistenza teknika u amministrattiva oħra: |

intra muros |

extra muros |

It-total ta’ l-assistenza teknika u amministrattiva | 0.000 | 0.000 | 0.000 | 0.000 | 0.000 | 0.000 | 0.000 |

L-ispiża finanzjarja tar-riżorsi umani u l-ispejjeż assoċjati li mhumiex inklużi fl-ammont ta’ referenza

EUR miljuni (sa tliet ċifri deċimali)

Tip ta’ riżorsi umani | Is-sena n | Is-sena n+1 | Is-sena n+2 | Is-sena n+3 | Is-sena n+4 | Is-sena n+5 u wara |

L-uffiċjali u l-istaff temporanju (XX 01 01) | 0.108 | 0.108 | 0.108 | 0.108 | 0.108 | 0.108 |

L-istaff iffinanzjat skond l-Artikolu XX 01 02 (awżiljaru, END, staff bil-kuntratt, eċċ.) (speċifika l-linja tal-baġit) |

L-ispiża totali tar-Riżorsi Umani u l-ispejjeż assoċjati (li MHUMIEX fl-ammont ta’ referenza) | 0.108 | 0.108 | 0.108 | 0.108 | 0.108 | 0.108 |

Kalkolu– Uffiċjali u aġenti temporanji

Għandha ssir referenza għall-Punt 8.2.1, jekk applikabbli

Is-salarju standard għal 1A*/AD kif previst fil-Punt 8.2.1 huwa €0.108 m.

Kalkolu – Staff iffinanzjat bis-saħħa ta’ l-Artikolu XX 01 02

Għandha ssir referenza għall-Punt 8.2.1, jekk applikabbli

Infiq amministrattiv ieħor mhux inkluż fl-ammont ta' referenza EUR miljuni (sa tliet ċifri deċimali) |

2008 | 2009 | 2010 | 2011 | 2012 | 2013 u wara | TOTAL |

XX 01 02 11 01 – Missionijiet | 0.000 | 0.004 | 0.004 | 0.004 | 0.004 | 0.004 | 0.020 |

XX 01 02 11 02 – Laqgħat u Konferenzi | 0.000 | 0.080 | 0.000 | 0.080 | 0.000 | 0.080 | 0.240 |

XX 01 02 11 03 – Kumitati[33] | 0.000 | 0.027 | 0.027 | 0.027 | 0.027 | 0.027 | 0.135 |

XX 01 02 11 04 – Studji u konsultazzjonijiet | 0.000 | 0.000 | 0.000 | 0.000 | 0.000 | 0.000 | 0.000 |

XX 01 02 11 05 – Sistemi ta’ l-Informatika | 0.000 | 0.000 | 0.000 | 0.000 | 0.000 | 0.000 | 0.000 |

2 Total ta' l-Infiq ieħor ta' Ġestjoni (XX 01 02 11) |

3 Infiq ieħor ta’ natura amministrattiva (speċifika u inkludi referenza għal-linja tal-baġit) |

Infiq Amministrattiv totali, għajr ir-riżorsi umani u l-ispejjeż assoċjati (li MHUMIEX inklużi fl-ammont ta’ referenza) | 0.000 | 0.111 | 0.031 | 0.111 | 0.031 | 0.111 | 0.395 |

Kalkolu – Infiq amministrattiv ieħor li mhux inkluż fl-ammont ta referenza

Għal kull sena bejn l-2009 u l-2013, huma previsti 4 missjonjiet, bi spiża kull waħda ta' €1 000, biex jispjegaw l-għanijiet u l-miżuri ta' l-Istrateġija Tematika u biex jgħinu lill-Istati Membri jimplimentawha.

L-organizzazzjoni ta' kull konferenza (spiża għal kull waħda: €80 000) hija prevista kull sentejn mill-2009 sa l-2013, sabiex jiġu kkonsultati l-partijiet interessati u l-awtoritajiet kompetenti dwar l-implimentazzjoni tal-miżuri ta' l-Istrateġija Tematika.

Laqgħat tal-Kumitat (spiża kull laqgħa: €27 000) huma previsti kull sena mill-2009 'l quddiem, sabiex ikun jista' jsir l-iskambju ta' l-informazzjoni, bil-għan ta' l-adozzjoni ta' linji ta' gwida u rakkomandazzjonijiet adegwati fit-tfittxija ta' aktar armonizzazzjoni bejn l-Istati Membri.

Il-ħtiġijiet għal riżorsi umani u amministrattivi għandhom ikunu koperti bl-allokazzjoni mogħtija lid-DĠ ta' ġestjoni fil-qafas tal-proċedura għall-allokazzjoni annwali.

[1] ĠU L 157, 9.6.2001, p. 24.

[2] COM(2002) 349.

[3] ĠU L 156, 25.6.2003, p. 17.

[4] ĠU C, , p.

[5] ĠU C, , p.

[6] ĠU C, , p.

[7] ĠU L 242, 10.9.2002, p. 1.

[8] ĠU L […]

[9] ĠU L 327, 22.12.2000, p. 1. Id-Direttiva kif emendata bid-Deċiżjoni (KE) Nru 2455/2001 (ĠU L 331, 15.12.2001, p. 1).

[10] ĠU L 70, 16.3.2005, p. 1, Ir-Regolament kif l-aħħar emendat mir-Regolament tal-Kummissjoni (KE) Nru 178/2006 (ĠU L 29, 2.2.2006, p. 3).

[11] ĠU L 156, 25.6.2003, p. 17.

[12] ĠU L 277, 21.10.2005, p. 1.

[13] ĠU L 158, 30.4.2004, p. 50.

[14] ĠU L 131, 5.5.1998, p. 11. Id-Direttiva kif emendata bl-Att tal-Adeżjoni ta’ l-2003.

[15] ĠU L 157, 9.6.2006, p. 24.

[16] ĠU L 103, 25.4.1979, p. 1. Id-Direttiva kif emendata l-aħħar bir-Regolament (KE) Nru 807/2003 (ĠU L 122, 6.5.2003, p. 36).

[17] ĠU L 206, 22.7.1992, p. 7. Id-Direttiva kif emendata l-aħħar mir-Regolament tal-Parlament Ewropew u tal-Kunsill (KE) Nru 1882/2003 (ĠU L 284, 31.10.2003, p. 1).

[18] ĠU L 114, 27.4.2006, p. 9.

[19] ĠU L 377, 31.12.1991, p. 20. Id-Direttiva kif emendata l-aħħar mir-Regolament tal-Parlament Ewropew u tal-Kunsill (KE) Nru 166/2006 (ĠU L 33, 4.2.2006, p. 1).

[20] ĠU L 184, 17.7.1999, p. 23.

[21] ĠU L 200, 30.7.1999, p. 1.

[22] ĠU L 31, 1.2.2002, p. 1.

[23] Infiq li ma jaqax taħt il-Kapitolu xx 01 tat-Titolu xx ikkonċernat.

[24] Infiq fi ħdan l-Artikolu xx 01 04 tat-Titolu xx.

[25] Infiq skond il-Kapitolu xx 01 għajr l-Artikoli xx 01 04 jew xx 01 05.

[26] Ara l-punti 19 u 24 tal-Ftehim Interistituzzjonali.

[27] Additional columns should be added if necessary i.e. if the duration of the action exceeds 6 years

[28] Jekk jiġi indikat aktar minn metodu wieħed jekk jogħġbok agħti dettalji addizzjonali fit-taqsima "Kummenti Rilevanti" ta’ dan il-punt.

[29] Li l-ispiża tiegħu MHIX koperta mill-ammont ta’ referenza.

[30] Li l-ispiża tiegħu MHIX koperta mill-ammont ta’ referenza.

[31] Li l-ispiża tiegħu hija inkluża fi ħdan l-ammont ta’ referenza.

[32] Għandha ssir referenza għad-dikjarazzjoni finanzjarja leġiżlattiva speċifika għall-Aġenzija/i Eżekuttiva/i kkonċernata/i.

[33] Speċifika t-tip ta' kumitat u l-grupp li għalih jappartjeni.