[pic] | KUMMISSJONI TAL-KOMUNITAJIET EWROPEJ |

Brussel 13.9.2006

KUMM(2006) 502 finali

KOMUNIKAZZJONI MILL-KUMMISSJONI LILL-KUNSILL, IL-PARLAMENT EWROPEW, IL-KUMITAT EKONOMIKU SOĊJALI EWROPEW U L-KUMITAT GĦAR-REĠJUNI

Nipprattikaw l-għarfien: Strateġija għall-innovazzjoni msejsa fuq bażi wiesgħa għall-UE

KOMUNIKAZZJONI MILL-KUMMISSJONI LILL-KUNSILL, IL-PARLAMENT EWROPEW, IL-KUMITAT EKONOMIKU SOĊJALI EWROPEW U L-KUMITAT GĦAR-REĠJUNI

Nipprattikaw l-għarfien: Strateġija għall-innovazzjoni msejsa fuq bażi wiesgħa g ħall-UE

1. IL-ġEJJIENI TAGħNA JIDDEPENDI MILL-INNOVAZZJONI

F’perjodu ta’ żmien notevolment qasir, il-globalizzazzjoni ekonomika biddlet l-ordni ekonomiku dinji, u ġabet magħha opportunitajiet u sfidi ġodda. F’dan l-ordni ekonomiku ġdid, l-Ewropa ma tistax tikkompeti sakemm ma ssirx aktar inventiva, ma tissodisfax aħjar il-ħtiġiet u l-preferenzi tal-konsumatur u ma tintroduċix aktar tiġdid.

Iċ-ċittadini Ewropej jinsabu mħassba dwar kwistjonijiet importanti li l-firxa tagħhom twassal mit-tibdil fil-klima u t-tnaqqis fir-riżorsi li ma jiġġeddux, sal-bidla demografika u l-ħtiġiet ta’ sigurtà ġodda li qed jitfaċċaw, li jirrikjedu azzjoni kollettiva għall-ħarsien ta’ l-istil ta’ ħajja fl-Ewropa li jgħaqqad flimkien il-prosperità ekonomika u s-solidarjetà. Dan it-tħassib leġittimu jrid jiddawwar f’opportunità biex tiżdied il- kompetittività ekonomika globali ta' l-Ewropa. Aktar ma jkun hemm reazzjoni immedjata, akbar huwa ċ-ċans ta’ suċċess u akbar il-prospett li l-metodu Ewropew iservi bħala mudell globali. Ibda mill-ħarsien ta’ l-ambjent permezz ta’ eko-innovazzjoni u spiċċa bit-titjib tal-benesseri tal-persuna permezz ta’ provvediment infrastrutturali aktar intelliġenti, il-Kummissjoni hija konvinta li t-tiġdid f’sens wiesa’ huwa wieħed mit-tweġibiet prinċipali għat-tħassib materjali taċ-ċittadini dwar il-ġejjieni tagħhom.

L-Unjoni Ewropea għandha potenzjal straordinarju għall-innovazzjoni. L-Ewropa għandha tradizzjoni twila ta’ avvanzi deċiżivi permezz ta' l-iskoperti. Għandha minjiera ta' nies kreattivi u tista' tibni fuq id-diversità kulturali tagħha. Bniet il-bażi għal wieħed mill-akbar swieq uniċi fid-dinja, li fih prodotti u servizzi innovattivi jistgħu jkunu kummerċjalizzati fuq skala kbira. Għandha wkoll tradizzjoni ta’ settur pubbliku qawwi u responsabbli, li għandu jiġi kapitalizzat.

Diġà ttieħdu ħafna miżuri b’saħħithom biex l-ekonomija ta’ l-UE tiġi modernizzata. L- Istrateġija ta’ Liżbona għat-Tkabbir Ekonomiku u l-Impjiegi [1] mnedija fl-2005 tiffissa firxa komprensiva ta’ elementi politiċi u riformi mfassla biex il-qafas regolatorju u ekonomiku ta’ l-Ewropa jagħmluh aktar miftuħ għall-innovazzjoni. Dan jinkludi l-għan kruċjali li titkabbar l-ispiża fuq ir-riċerka u l-iżvilupp sa 3% tal-PGD. Il-ftehim dwar il-Qafas Finanzjarju l-ġdid, inkluża l-politika ta’ koeżjoni, is-Seba’ Programm ta’ Qafas għar-Riċerka u l-Iżvilupp u l-Programm ta’ Qafas għall-Kompetittività u l-Innovazzjoni, jipprovdu pakketti finanzjarji sinifikanti mmirati lejn it-tiġdid. Il-Komunikazzjoni tal-Kummissjoni “Aktar Riċerka u Tiġdid”[2] ta’ Ottubru 2005 stipulat programm ta’ 19-il qasam ta’ azzjoni kemm għall-Komunità kif ukoll għall-Istati Membri, li qed jiġu eżegwiti skond kif ġie ppjanat.

L-Istati Membri qed iwettqu azzjoni ta’ innovazzjoni fil-qafas tal- Programmi Nazzjonali ta’ Riforma , ibbażati fuq il-Linji ta’ Gwida Integrati ta’ l-Istrateġija mġedda ta’ Liżbona għat-Tkabbir Ekonomiku u l-Impjiegi. It-Tabella Ewropea tax-Xejriet dwar l-Innovazzjoni[3] pprovdiet stampa ċara tal-prestazzjoni tagħna fir-rigward ta’ l-innovazzjoni u tas-sistemi nazzjonali għat-tiġdid ta’ l-Istati Membri ta’ l-UE u ta’ fejn hu b'saħħtu u fejn hu dgħajjef f'dawn is-sistemi. It-Tabella tippermetti sorveljanza mill-qrib tal-progress miksub.

Minkejja l-politika ffukata fuq l-innovazzjoni li diġà hija b’saħħitha, id-defiċjenzi ta’ l-UE għadhom ma ġewx affrontati b’biżżejjed saħħa, u l-ekonomija tagħha għadha ma nbidlitx f’ekonomija innovattiva f’sens komprensiv kif tinħtieġ li ssir. Ir-rapport “Noħolqu Ewropa Innovattiva[4]” (ir-Rapport Aho) jidentifika r-raġunijiet ewlenin li jfissru għaliex sa issa dan il-potenzjal għadu ma ġiex sfruttat kompletament u jitlob li tittieħed azzjoni urġenti “qabel ma jkun tard wisq”. Ir-rapport jidentifika bħala interess prinċipali l- ħtieġa tal-ħolqien ta’ ambjent kummerċjali aktar miftuħ għall-innovazzjoni.

Il-Kummissjoni hija konvinta li hemm bżonn aktar minn hekk – l-Ewropa għandha ssir soċjetà verament ibbażata fuq l-għarfien u miftuħa għall-innovazzjoni fejn l-innovazzjoni ma tbeżżax lill-pubbliku imma tintlaqa’ b’dirgħajn miftuħin, ma tiġix imfixkla imma mħeġġa, u fejn l-innovazzjoni tkun parti mill-valuri tal-qalba li jappartjenu lis-soċjetà u tinftiehem bħala forza li taħdem għall-ġid taċ-ċittadini kollha. Huwa għalhekk li Kunsill Ewropew tar-Rebbiegħa talab lill-Kummissjoni Ewropea biex tippreżenta “ strateġija ta’ innovazzjoni msejsa fuq bażi wiesgħa għall-Ewropa li l-investimenti fl-għarfien tittraduċihom fi prodotti u servizzi”.

Din il-komunikazzjoni ta’ qafas tippreżenta din l-istrateġija, b’mod partikolari billi tirreaġixxi għar-rakkomandazzjonijiet li jagħmel ir-rapport Aho. Tippreżenta qafas biex timbotta l-innovazzjoni ’l quddiem billi ġġib flimkien oqsma politiċi differenti li huma relatati ma’ l-innovazzjoni. Hija maħsuba biex tinkwadra diskussjonijiet politiċi dwar l-innovazzjoni fuq il-livelli nazzjonali u Ewropew. Hija tiddeskrivi l-inizjattivi l-aktar importanti - dawk ippjanati u dawk għaddejja, tidentifika oqsma ġodda għall-azzjoni u b’mod partikolari tintroduċi strateġija aktar iffukata biex jiġu ffaċilitati l-ħolqien u l-kummerċ ta’ prodotti u servizzi innovattivi ġodda f’oqsma promettenti – is-“swieq ewlenin”. Għall-implimentazzjoni ta’ din l-aġenda wiesgħa, il-komunikazzjoni mhux qed tipproponi l-ħolqien ta’ strutturi ġodda, imma minflok hija tibni fuq il-qafas legali u istituzzjonali eżistenti tas-Sħubija imġedda ta’ Liżbona għat-Tkabbir Ekonomiku u l-Impjiegi, li diġà stabbilixxa pjattaforma politika għal sħubija bejn l-Istati Membri u l-Kummissjoni.

Illum l-Ewropa m’għandhiex bżonn impenji ġodda; tinħtieġ tmexxija politika u azzjoni deċiżiva. Minflok jippreservaw l-istrutturi stabbiliti, li nkixfu li mhumiex fi grad li jlaħħqu ma’ l-isfidi tas-seklu 21, l-Istati Membri jridu jkunu mħejjija li jinvestu fl-antiċipazzjoni u l-assoċjazzjoni ta’ bidla strutturali. Dan jitlob partikolarment li r-riżorsi jiġu riallokati għall-edukazzjoni, l-ICT, ir-riċerka u l-ħolqien ta’ impjiegi u tkabbir ekonomiku ta’ valuri għolja. Il-Qafas Finanzjarju ta’ l-UE għall-perjodu 2007-2013 huwa l-ewwel pass f’din id-direzzjoni. L-istess bidla fil-prijoritajiet teħtieġ li sseħħ fuq livelli nazzjonali.

L-UE tista’ ssir innovattiva b’mod komprensiv biss jekk l-atturi kollha jkunu involuti u b’mod partikolari jekk fis-suq ikun hemm domanda għal prodotti innovattivi. Jeħtieġ li din l-istrateġija wiesgħa tinvolvi l-partijiet kollha – is-settur kummerċjali, is-settur pubbliku u l-konsumaturi. Dan għaliex il-proċess ta’ l-innovazzjoni ma jinvolvix biss lis-settur kummerċjali, imma wkoll lill-awtoritajiet pubbliċi fuq il-livelli nazzjonali, reġjonali u lokali, l-organizzazzjonijiet tas-soċjetà ċivili, it-trejdjunjins u l-konsumaturi. Sħubija wiesgħa bħal din għall-innovazzjoni toħloq ċirku virtuż li fih il-forniment ta’ ideat ġodda u d-domanda għal soluzzjonijet ġodda kemm jimbuttaw kif ukoll jiġbdu l-innovazzjoni. L-innovazzjoni tiddependi fuq domanda qawwija mill-konsumaturi u ċ-ċittadini għal prodotti u servizzi ġodda u innovattivi. Għalhekk, minbarra l-ħolqien ta’ l-aħjar qafas u possibbiltajiet għall-innovazzjoni, irid ikun hemm suq miftuħ għall-innovazzjoni u domanda għall-produzzjoni. Dan, b’mod speċjali, jitlob il-fiduċja u l-kunfidenza tal-konsumaturi f’dawn il-prodotti u servizzi mhux l-anqas fis-sikurezza (dimostrabbli) tagħhom. Il-kunfidenza tal-konsumaturi fi prodotti u servizzi mhux magħrufa tiddependi parzjalment mill-għarfien dwar l-eżistenza ta’ sistemi b’saħħithom ta’ protezzjoni tal-konsumatur. Is-swieq fejn il-kunfidenza tal-konsumatur tkun għolja huma wkoll aktar faċli għal konkorrenti ġodda biex jidħlu fihom bi prodotti innovattivi.

Il-forom kollha ta’ innovazzjoni jeħtieġ li jkunu promossi , għaliex l-innovazzjoni tiġi f’ħafna suriet differenti u mhux biss bħala tiġdid teknoloġiku. Dawn is-suriet jinkludu tiġdid organizzattiv u tiġdid fis-servizzi. F’dan il-kuntest, filwaqt li ż-żieda fil-kompetizzjoni tikkostitwixxi l-istrument l-aktar effiċjenti biex tkun stimulata l-innovazzjoni, il-miżuri politiċi u l-mekkaniżmi ta’ appoġġ għall-innovazzjoni jistgħu wkoll ikollhom rwol importanti xi jwettqu.

Mill-isfida ta’ l-għan ta’ l-UE tat-3% għar-Riċerka u l-Iżvilupp wieħed jista’ jifhem l-importanza ta’ strateġija aktar komprensiva minn qabel . Diġà ttieħdu passi sinifikanti mill-Istati Membri u l-Komunità lejn il-mira għal finanzjament pubbliku ta’ 1% tal-PGD sa l-2010. Il-kontribuzzjoni tas-settur privat ma tiddependix biss minn dan, imma wkoll minn garanzija ta’ prospetti favorevoli ta’ qligħ mill-investimenti fir-Riċerka u l-Iżvilupp fl-Ewropa. Dan, imbagħad, jiddependi fuq id-domanda għal prodotti u servizzi innovattivi, id-disponibilità ta’ persuni bil-kapaċitajiet u l-ambizzjoni meħtieġa biex ifornu lis-suq b’dawn il-prodotti u servizzi, u qafas regolatorju li bis-saħħa tiegħu dawn jistgħu jsibu posthom malajr fis-suq intern.

2. NAGħMLU LILL-UE AKTAR MIFTUħA GħALL-INNOVAZZJONI

Waħda mir-raġunijiet għaliex il-potenzjal għall-innovazzjoni fl-UE sa issa għadu ma ġiex sfruttat kompletament tinsab fid-dgħufijiet persistenti tal-kondizzjonijiet ta’ qafas u s-sottovalutar persistenti ta’ l-innovazzjoni bħala valur li mhux importanti fis-soċjetà. Dan huwa qasam li fih l-awtoritajiet pubbliċi fil-livelli kollha jistgħu u għandhom jieħdu azzjoni malajr kemm jista’ jkun. Jekk negħlbu dawn l-ostakli nkunu nistgħu nieħdu pass deċiżiv lejn il-ħolqien ta’ spazju Ewropew reali għall-innovazzjoni.

2.1. Pre-kondizzjoni hija l-edukazzjoni

L-ewwel u qabel kollox, mingħajr edukazzjoni bħala politika ewlenija, l-innovazzjoni tibqa’ mingħajr irfid. It-talent u l-kreattività jridu jiġu promossi minn stadju bikri. Fil-Komunikazzjoni tagħha ta’ l-10 ta’ Novembru 2005[5], il-Kummissjoni diġà kienet identifikat il-kompetenzi ewlenin meħtieġa għall-għejxien u x-xogħol f’soċjetà moderna orjentata lejn l-innovazzjoni. Dawn jinkludu kapaċitajiet intraprendenti f’sens usa’, kif ukoll kompetenzi fil-qari u l-kitba, fix-xjenza u l-matematika u kompetenzi fil-lingwi, fil-kapaċitajiet tat-tagħlim dwar kif titgħallem, kif ukoll kompetenzi soċjali u kulturali. Dawn il-kompetenzi jinkludu wkoll kompetenzi fil-qari u l-kitba diġitali, li huma sine qua non għal adozzjoni f’sens wiesa’ ta’ l-ICT u l-potenzjal ta’ l-innovazzjoni tiegħu. Permezz tal-Metodu Miftuħ tal-Koordinazzjoni, il-Kummissjoni għandha tgħin biex jiġu faċilitati l-modernizzazzjoni u r-ristrutturar tas-sistemi edukattivi sabiex ikunu jistgħu jipprovdu dawn il-kompetenzi prinċipali.

In-nuqqas ta’ kapaċitajiet xierqa, b’mod partikolari fl-oqsma tax-xjenza, l-inġinerija u l-ICT, ġie identifikat bħala wieħed mill-ikbar sfidi. Skond data ta’ l-Eurostat dwar ir-Riżorsi Umani fis-Setturi tax-Xjenza u l-Inġinerija, riċentement l-UE kisbet żieda fl-għadd assolut ta’ gradwati fil-matematika, ix-xjenza u t-teknoloġija[6], imma l-kwota globali tal-gradwati fix-xjenza u l-inġinerija qed tkompli tonqos u dan qed jiggrava r-riskju ta’ tqassim ta’ l-etajiet sfavorevoli f’dawn id-dixxiplini f’xi pajjizi u qed joħloq riskju ta’ mminar tal-kapaċità ġejjiena ta’ l-Ewropa biex tiġġedded. Din mhix biss il-problema tal-maġġoranza ta’ l-Istati Membri l-ġodda, imma wkoll ta’ Stati Membri qodma bħalma huma l-Awstrija, il-Ġermanja, l-Italja, l-Olanda u l-Portugall (għalkemm kien hemm xi titjib fl-għadd assolut ta' gradwati fix-xjenza u l-inġinerija matul dawn l-aħħar snin).

Is-sistemi edukattivi ta’ l-Istati Membri għandhom jiżguraw disponibilità suffiċjenti għall-kapaċitajiet ewlenin li jappoġġjaw l-innovazzjoni. L-edukazzjoni għandha timxi maż-żminijiet. Skond qbil li diġà ntlaħaq fil-Linji ta’ Gwida Integrati għat-Tkabbir Ekonomiku u l-Impjiegi, l-Istati Membri huma mistiedna jagħtu prijorità lill-istipular ta’ miri ambizzjużi fil-Programmi Nazzjonali għar-Riforma tagħhom li jkunu jindirizzaw id-dgħufijiet li jeżistu f’dawn l-oqsma.

Trid tikber il-mobilità tar-riċerkaturi, kemm f’sens ġeografiku kif ukoll bejn is-setturi. Mill-perspettiva tal-ksib ta’ għarfien u kapaċitajiet ġodda u tas-sejbien ta’ applikazzjonijiet ġodda, kemm il-mobilità trans-nazzjonali kif ukoll il-mobilità strutturali bejn is-settur akkademiku u dak industrijali huma essenzjali. F’dan il-kuntest, l-eżekuzzjoni ta’ strateġija Ewropea żviluppata kemm mill-Komunità kif ukoll mill-Istati Membri biex jinħoloq suq tax-xogħol miftuħ, uniku u kompetittiv għar-riċerkaturi, bi prospetti attraenti għall-karriera, hija għalhekk ta’ l-akbar importanza. Iż-żewġ partijiet iridu jagħmlu l-parti tagħhom f’din l-eżekuzzjoni, mhux l-anqas biex ikun żgurat li r-riċerkaturi li jitilqu minn settur jew pajjiż biex għal karrierali temporanjament hija aktar attraenti ma jintilfux għal dejjem.

2.2. L-użu tal-potenzjal tas-Suq Intern

Tippersisti l-preżenza tal-barrieri fis-Suq Intern. Dawn ikomplu jxekklu l-mobilità billi jċaħħdu lill-impriżi mill-iskala meħtieġa għall–kapitalizzazzjoni fuq l-investimenti fir-riċerka u l-innovazzjoni u b’hekk ixekklu l-potenzjal ta’ l-innovazzjoni ta’ l-UE. Dawn il-barrieri jeffettwaw mhux biss lill-oġġetti u s-servizzi, u l-konsumaturi li jfittxu aċċess għalihom, imma wkoll lill-mobilità tal-ħaddiema u d-disponibilità ta’ kapital tar-riskju. Biex jinħoloq spazju Ewropew għall-innovazzjoni jeħtieġ li dawn il-barrieri jitkissru. Dan jgħolli wkoll il-livell ta’ kompetizzjoni – l-istimulu ewlieni għall-innovazzjoni.

Preżentement il-Kummissjoni qed twettaq reviżjoni tas-Suq Intern bil-ħsieb li tiffissa prijoritajiet konkreti għall-politika ġejjiena. Din ir-reviżjoni se tikkontribwixxi biex is-Suq Intern isir aktar miftuħ għall-innovazzjoni.

Għandha tingħata attenzjoni speċjali lis- settur tas-servizzi . Dan is-settur joffri opportunità importanti għall-innovazzjoni imma mhux qed jiġi sfruttat biżżejjed[7]. Is-settur privat ma jservix biss ta' qafas għal żewġ terzi tal-PGD u l-impjiegi, imma jeżistu wkoll ħafna possibbiltajiet ta’ sinerġiji ma’ l-innovazzjoni industrijali. Billi ħafna mill-innovazzjoni fis-settur tas-servizzi hija marbuta primarjament mal-mudell kummerċjali aktar milli ma’ teknoloġiji ġodda li qed jiżviluppaw, kultant hija relattivament aċċessibbli għal reġjuni li teknoloġikament huma anqas żviluppati. Id-dħul fis-seħħ tad-Direttiva dwar is-Servizzi se jkun pass importanti lejn il-ħolqien ta' Suq Intern reali għas-servizzi li se jżid stimulu qawwi għat-tiġdid. Sabiex jiġi sfruttat b’mod sħiħ il-potenzjal għall-innovazzjoni fis-settur tas-servizzi, trid tingħata attenzjoni speċjali lill-aċċess għall-finanzjament u lill-ġestjoni ta’ l-innovazzjoni mill-Impriżi żgħar u ta' daqs medju. Fl-ambitu ta’ l-inizjattiva Europe INNOVA , il-Kummissjoni se tiżviluppa metodu aktar proattiv għall-ħolqien u l-appoġġ ta’ impriżi żgħar u ta’ daqs medju li jkunu innovattivi u għadhom ġodda fis-settur tas-servizzi. B’mod partikolari, se tkun qed tagħti appoġġ lil rabtiet aktar effiċjenti bejn l-universitajiet, l-intraprenditorija u l-qasam finanzjarju, bir-riżultat li tinħoloq pjattaforma għal inkubazzjoni pan-Ewropea f’dan is-settur.

Huwa wkoll kruċjali l-ħolqien ta’ kondizzjonijiet li jistgħu jiġġeneraw il-profitti għall-kummerċ ta’ l-UE madwar id-dinja fis-swieq kollha fejn l-esportazzjoni u l-investimenti Ewropej bħalissa jinsabu għaddejjin minn prestazzjoni dgħajfa, bħal ma qed jiġri fl-Ażja. Is-swieq miftuħa madwar id-dinja huma għalhekk importanti għat-tħeġġiġ ta’ l-innovazzjoni fl-UE. Barra minn hekk, il-promozzjoni madwar id-dinja tan-normi u l-istandards u l-inizjattivi innovattivi Ewropej jistgħu jkunu ta’ vantaġġ deċiżiv għall-kumpaniji Ewropej fir-rwol tagħhom ta’ pijunieri fl-ispirtu ta’ l-inizjattiva tas-suq ewlieni ippreżentata hawn taħt.

2.3. It-tisħiħ ta’ l-ambjent regolatorju u l-iżgurar ta’ qafas effettiv ta’ l-IPR

L-innovazzjoni titlob ambjent regolatorju li huwa prevedibbli, li jakkomoda u anke jinkoraġġixxi żviluppi ġodda fl-oġġetti u s-servizzi, li jħares il-proprjetà intellettwali u li jipprovdi standards miftuħa u interoperabbli. Diġà sar progress fil-qasam ta’ Regolamentazzjoni Aħjar[8] kemm fuq livell Ewropew kif ukoll fuq livell nazzjonali. It-tnaqqis fl-ispiża amministrattiva tar-regolamentazzjoni ta’ l-impriżi jkun kontribuzzjoni sinifikanti għal attivitajiet innovattivi. Fl-istess ħin, l-ambjent regolatorju għandu wkoll jirrinforza l-kunfidenza tal-konsumatur billi jiżgura li l-miżuri protettivi li jeżistu jiġu applikati b’mod effettiv għall-prodotti innovattivi bl-istess mod kif jiġu applikati għall-prodotti eżistenti.

Jinħtieġ li l-istima ta’ l-impatt tar-regolamentazzjoni fuq l-innovazzjoni tiżdied. Ir-regolamentazzjoni għandha tkun prevedibbli, flessibbli, sempliċi, u effettiva. Regolamenti li jiffukaw fuq l-għan politiku, aktar milli fuq is-soluzzjoni teknika li permezz tagħha jinkiseb dan il-għan, iħallu spazju għal soluzzjonijiet innovattivi. Il-Kummissjoni se tkompli tinkoraġġixxi din ix-xorta ta’ leġiżlazzjoni, kif għamlet permezz tal-“Metodu Ġdid” tagħha għar-regolamentazzjoni tal-prodotti. Barra minn hekk, se tkun qed tinkoraġġixxi l-adozzjoni f’waqtha ta’ standards ambizzjużi li jiffukaw fuq il-prestazzjoni aktar milli fuq it-teknoloġija..

Il-Kummissjoni twettaq titjib tal-qafas istituzzjonali ta’ l-istandardizzazzjoni Ewropea . B’mod partikolari, hija tfittex li tħaffef l-adozzjoni ta’ standards miftuħa u interoperabbli u li tintegra aħjar lill-impriżi ż-żgħar u ta’ daqs medju flimkien mal-konsumaturi fil-proċess ta' l-iffissar ta' l-istandards. Fl-oqsma fejn it-teknoloġija timxi 'l quddiem b’pass mgħaġġel, bħal fil-qasam ta’ l-ICT, l-ispeċifikazzjonijiet għall-kumpaniji privati jistgħu faċilment isiru l-istandards għall-industrija b’mod de-facto . Jekk jiġri dan, huwa importanti li dawn l-istandards are jsirux barriera għall-aċċess għas-suq. Barra minn hekk, kif intwera fil-qasam tal-komunikazzjoni ċellulari, l-iffissar rapidu ta’ standards miftuħa u interoperabbli huwa l-muftieħ għas-suċċess globali tal-kumpaniji Ewropej. Il-Kummissjoni se tibqa’ taħdem ma’ l-Organizzazzjonijiet Ewropej ta’ l-Istandards u ma’ l-atturi tas-soċjetà b’mod ġenerali biex jinkiseb dan ir-riżultat. Hija tiżgura li l-leġiżlazzjoni Ewropea tiffaċilita l-użu ta’ dawn l-istandards.

Il-protezzjoni tal-proprjetà intellettwali hija sine qua non oħra għall-innovazzjoni. Mingħajr protezzjoni xierqa ta’ l-invenzjonijiet u l-kreazzjonijiet, ma jkunx hemm motivazzjoni għall-investiment fihom. Barra minn hekk, l-użu tagħhom mill-awturi bħala assi jista’ jkun imxekkel. Il-formulazzjoni ta’ proċeduri għall-privattivi finanzjarjament aċċessibbli li jibbilanċjaw l-ispejjeż mal-kwalità u ċ-ċertezza legali, flimkien ma’ soluzzjoni tat-tilwim f’waqtha, effikaċi fejn jidħlu spejjeż u prevedibbli jridu jkunu prijoritajiet u huma partikolarment meħtieġa fil-każ ta’ l-impriżi żgħar u ta’ daqs medju. Il-konvinzjoni tal-Kummissjoni tibqa’ soda dwar il-fatt li l-adozzjoni ta’ privattiva Komunitarja “effettiva fl-ispiża” hija l-pass l-aktar importanti. Sadattant, sabiex titneħħa barriera sinifikanti għall-innovazzjoni, l-Istati Membri u l-Kummissjoni flimkien għandhom jaraw li s-sistema eżistenti tal-privattivi ssir aktar effiċjenti bir-ratifika tal-Protokoll ta’ Londra u permezz tal-progress fil-Ftehim Ewropew dwar is-Soluzzjoni tat-Tilwim fir-rigward tal-Privattivi filwaqt li jiżguraw il-konformità tagħhom mal-liġi Komunitarja.

Wara li l-Kunsill jasal għall-konklużjonijiet tiegħu[9], u wara li ssir il-konsultazzjoni pubblika mill-Kummissjoni dwar l-istrateġija futura tal-privattivi, il-Kummissjoni tippreżenta strateġija ġdida tal-privattivi qabel tmiem is-sena 2006. Barra dan, hija taħdem fuq strateġija ta’ l-IPR aktar komprensiva biex trawwem iċ-ċirkolazzjoni ta’ ideat innovattivi. Din l-istrateġija trid tkun integrata u n-nefqa għall-eżekuzzjoni tagħha tkun raġonevoli. Hemm bżonn sforzi akbar biex tinħoloq kuxjenza dwar l-aspetti prattiċi tal-protezzjoni tal-proprjetà intellettwali qalb il-komunità innovattiva. L-impriżi ż-żgħar u ta’ daqs medju u l-organizzazzjonijiet pubbliċi tar-riċerka għandhom ikunu l-mira ta’ dawn l-isforzi b’mod partikolari.

Huwa meħtieġ li tiġi indirizzata b’mod speċifiku l-adegwatezza tal-mekkaniżmi eżistenti ta’ l-IPR għas-settur tas-servizzi. Sfida speċifika hija biex tingħata garanzija dwar l-adegwatezza tal-mekkaniżmi eżistenti għaċ-ċertifikazzjoni tad-drittijiet ta’ l-awtur għal serizzi diġitali ġodda. Il-Kummissjoni għaddejja b'eżami ġenerali ta’ l- acquis dwar id-drittijiet ta’ l-awtur bil-ħsieb li jkun żgurat li kemm il-qafas legali u l-applikazzjoni tiegħu jkunu jwasslu għall-iżvilupp ta’ prodotti, servizzi u mudelli kummerċjali ġodda u l-irfinar ta’ l-użu tagħhom li jkun orjentat lejn l-utenti, li jistgħu jiġu offruti bejn il-fruntieri. B'mod partikolari, il-Kummissjoni bi ħsiebha tressaq 'il quddiem inizjattiva dwar “ġbir ta' taxxi fuq id-drittijiet ta’ l-awtur” qabel l-aħħar tas-sena.

Fl-aħħarnett, l-infurzar aħjar ta’ l-IPR fis-swieq barranin huwa kruċjali biex jitħarsu l-kumpaniji Ewropej u l-Kummissjoni tiffoka l-isforzi tagħha fuq għadd ta’ pajjiżi ta’ prijorità. Se jiġu allokati aktar riżorsi għall-appoġġ tad-detenturi tad-drittijiet, b’mod partikolari l-impriżi ż-żgħar u dawk ta’ daqs medju, u għall-għoti ta’ l-għajnuna lil pajjiżi terzi għal problemi speċifiċi ta’ l-IPR.

2.4. Il-promozzjoni ta’ kooperazzjoni bejn il-partijiet interessati

Li impriża tkun parti minn grupp ta’ impriżi huwa ta’ saħħa kompetittiva importanti għan-negozju. Il-Gruppi ta’ Impriżi jgħinu biex jingħalaq id-distakk bejn in-negozju, ir-riċerka u r-riżorsi, u b’hekk iwasslu l-għarfien lejn is-suq b’mod aktar mgħaġġel. Il-gruppi ta’ impriżi li jagħmlu suċċess jippromwovu kompetizzjoni intensa filwaqt li jħeġġu l-kooperazzjoni. Huma jżidu l-produttività, jattiraw l-investiment, jippromwovu r-riċerka, isaħħu l-bażi industrijali, u jiżviluppaw prodotti u servizzi speċifiċi u jsiru l-punt fokali għall-kapaċitajiet li jkunu qed jiżviluppaw. Gruppi ta’ impriżi ta’ klassi dinjija jiġbdu lejhom imħuħ brillanti li jsostnu l-innovazzjoni – l-iżjed eżempju magħruf huwa Silicon Valley.

Huwa għalhekk li “l-politika tal-gruppi ta’ impriżi” saret element importanti fil-politika ta’ innovazzjoni ta’ l-Istati Membri kif joħroġ mill-Programmi Nazzjonali ta’ Riforma, u huwa għalhekk ukoll li l-politika tal-gruppi ta’ impriżi hija appoġġjata mill-istrumenti Komunitarji. Il-ġenerazzjoni l-ġdida tal-programmi Ewropej għall-politika reġjonali għall-perjodu 2007- 2013 tippromwovi metodu bbażat fuq gruppi ta’ impriżi innovattivi reġjonali, mhux biss f’ċentri urbani żviluppati imma wkoll f’reġjuni ifqar jew rurali. Huwa fuq il-livell tar-reġjun li ħafna impriżi, speċjalment l-impriżi ż-żgħar u ta’ daqs medju, jibda jkollhom interazzjoni bejniethom u ma’ ċentri tat-tagħlim u tat-teknoloġija. Dan jagħmel il-prossimità fattur ewlieni fil-proċess ta’ innovazzjoni u jżid l-effikaċja tal-politika ta’ innovazzjoni jekk din tkun imfassla skond il-ħtiġiet reġjonali u lokali. Il-qafas il-ġdid għar-Riċerka, l-Iżvilupp u l-Innovazzjoni għall-għajnuna mill-Istat li se jiġi adottat mill-Kummissjoni qabel tmiem din is-sena għandu jgħin lill-Istati Membri jimmiraw aħjar il-baġits ta’ appoġġ eżistenti tagħhom biex jippromwovu, inter alia , il-gruppi ta' impriżi innovattivi.

Fl-istess ħin, biex l-Ewropa tkun tista’ tisfrutta b’mod sħiħ il-potenzjal tal-gruppi ta’ impriża tagħha, dawn iridu jiksbu wkoll massa kritika u orjentazzjoni strateġika permezz ta’ kooperazzjoni Ewropea tranżnazzjonali akbar u aħjar , bejn il-fruntieri nazzjonali. Dan iqajjem l-aspettattiva ta’ ħolqien ta’ gruppi ta’ impriżi Ewropej ta’ klassi dinjija. Bħala appoġġ għal dan il-proċess, il-Kummissjoni tippreċiża b’mod partikolari liema huma l-punti ta’ saħħa tal-gruppi ta’ impriżi nazzjonali u dawk in-naħa l-oħra tal-fruntiera u tistimula kooperazzjoni prattika bejn l-awtoritajiet reġjonali u l-atturi jew l-assoċjazzjonijiet ekonomiċi rilevanti, filwaqt li tappoġġja l-kooperazzjoni bejn l-inizjattivi tal-gruppi. L-ewwel riżultati ta’ din l-inizjattiva jkunu ppreżentati fil-Ħarifa ta’ l-2007 waqt Konferenza Ministerjali, bil-ħsieb li tinkiseb aġenda komuni għall-Ewropa dwar il-gruppi ta’ impriżi.

L-ekonomija bbażata fuq l-għarfien tistrieħ fuq it-trasferiment ta' l-għarfien mingħand min jiġġenerah għal għand dawk li jużawh u jistgħu jibnu fuqu. It-trasferiment ta' l-għarfien bejn l-organizzazzjonijiet pubbliċi tar-riċerka u terzi (inklużi organizzazzjonijiet industrijali u tas-soċjetà ċivili) jeħtieġ li jitjieb u l-Istati Membri huma mistiedna li jqisu dan fil-politika tagħhom għall-innovazzjoni. B’hekk tkun ingħatat għajnuna biex jinstabu opportunitajiet ġodda kummerċjali għar-riċerka. L-organizzazzjonijiet pubbliċi tar-riċerka, li huma responsabbli għal madwar terz ta’ l-attività relatata mar-Riċerka u l-Iżvilupp fl-Ewropa, għandhom rwol partikolarment importanti f’dan. Kull waħda mill-ħafna forom ta’ trasferiment ta’ l-għarfien – ir-riċerka kuntrattwali, ir-riċerka kollaborattiva u kooperattiva, il-liċenzjar, il-pubblikazzjonijiet, u l-iskambju ta’ riċerkaturi professjonali bejn is-setturi pubbliċi u dawk privati – għandha bżonn tiġi żviluppata aktar u mmaniġġjata aħjar.

Il-Kummissjoni se tippreżenta Komunikazzjoni dwar it-titjib tat- trasferiment ta’ l-għarfien bejn il-bażi pubblika għar-riċerka u l-industrija ma’ l-Ewropa kollha. Dan se jipprovdi gwida dwar kif l-awtoritajiet pubbliċi jistgħu jindirizzaw il-barrieri ewlenin li jeżistu bħalissa u x’inhu l-aħjar mod kif il-pussess u l-esplojtazzjoni tar-riżultati tar-Riċerka u l-Iżvilupp u d-drittijiet ta’ proprjetà intellettwali assoċjati magħhom jistgħu jiġu kkombinati mal-missjonijiet fundamentali ta’ l-organizzazzjonijiet pubbliċi tar-riċerka.

Barra minn hekk, il-Kummissjoni se tirrazzjonalizza n- netwerks ta’ l-appoġġ kummerċjali u l-informazzjoni tagħha . Dan jinkoraġġixxi u jiffaċilita l-adozzjoni ta’ ideat ġodda u t-trasformazzjoni tagħhom fi prodotti u servizzi kummerċjabbli, speċjalment mill-impriżi ż-żgħar u dawk ta’ daqs medju. B’mod speċjali, dan jgħin biex ikun żgurat li ċ-Ċentri għall-Kollegamenti ta’ l-Innovazzjoni u ċ-Ċentri ta’ l-Informazzjoni dwar l-Euro jipprovdu servizzi kummerċjali ta’ l-aqwa kwalità lill-impriżi ż-żgħar u ta’ daqs medju.

Il- Komunikazzjoni “Inwettqu r-riformi meħtieġa għall-modernizzazzjoni tas-settur ta’ l-universitajiet ” [10] diġà indikat għadd ta’ passi importanti li jistgħu jagħmluha possibbli għall-Universitajiet Ewropej li jtejbu l-prestazzjoni tagħhom, ukoll billi jikkontribwixxu b’mod aktar u aktar effiċjenti għall-proċess ta’ innovazzjoni. Il-muftieħ għal dan huwa l-għoti ta’ awtonomija suffiċjenti lill-universitajiet biex jiżviluppaw l-istrateġiji proprji tagħhom. Is-sħubijiet strutturati u strateġiċi bejn is-settur kummerċjali u l-universitajiet jeħtieġ li jissaħħu. Dan jirrikjedi ftuħ akbar għal possibbiltajiet ta’ bdil ta’ staff, tagħlim u inkuraġġiment ta’ imprenditorija fl-universitajiet u t-twaqqif ta’ ċentri tax-xjenza madwar l-universitajiet, b’fondi xierqa disponibbli biex isostnu proġetti ta’ riċerka li jinħolqu bħala effett kollaterali. Dan ikun ta’ għajnuna biex jimtela l-vojt kulturali li ħafna drabi jifred ir-riċerka universitarja mill-ħtiġiet tas-settur kummerċjali. L-iżvilupp ta’ rabtiet bejn l-universitajiet u s-soċjetà ċivili lokali jista’ wkoll iwassal għal adozzjoni aħjar ta’ l-innovazzjoni fuq il-livelli lokali u reġjonali.

F’Ottubru ta’ din is-sena, il-Kummissjoni bi ħsiebha tressaq proposta biex twaqqaf Istitut Ewropew tat-Teknoloġija (l-EIT)[11]. Dan ikun sħubija integrata bejn ix-xjenza, il-kummerċ u l-edukazzjoni, li tinkorpora l-eċċellenza fl-inizjattivi kollha tiegħu. Se jinħoloq biex ikun il-mutur ewlieni u l-mudell ġdid għall-innovazzjoni fl-oqsma interdixxiplinari strateġiċi, fejn hemm il-potenzjal biex jiġu ġġenerati soluzzjonijiet innovattivi u vantaġġi kummerċjali b’impatt kbir fuq il-kompetittività ta’ l-Ewropa. Se jgħaqqad flimkien l-aħjar studenti u riċerkaturi Ewropej biex jikkooperaw ma’ l-aqwa elementi kummerċjali ta’ quddiemnett għall-iżvilupp u l-isfruttar ta’ l-għarfien u r-riċerka, u biex jissaħħu l-kapaċitajiet tal-ġestjoni tar-riċerka u l-innovazzjoni. L-intraprendituri jkunu integrati b’mod sħiħ fl-EIT, minn sħubija fuq il-Bord ta' Tmexxija tiegħu sa involvement fl-aspetti kollha tar-riċerka u l-edukazzjoni, mid-definizzjoni u l-eżekuzzjoni ta’ l-attivitajiet ta’ taħriġ, sa parteċipazzjoni attiva fir-riċerka.

2.5. Imbottatura finanzjarja għar-riċerka u l-innovazzjoni

L-innovazzjoni titlob riċerka eċċellenti, ippjanata u eżegwita b’komunikazzjoni reċiproka bejn ir-riċerkaturi u s-settur kummerċjali. L-attivitajiet Ewropej tar-riċerka diġà saru aktar iffukati bis-saħħa tal- Pjattaformi Teknoloġiċi Ewropej li, immexxija mill-industrija, jġibu flimkien lill-partijiet interessati inkluża l-komunità tar-riċerka u d-dinja finanzjarja. Għalkemm mhumiex strument tal-Programm ta’ Qafas għall-Iżvilupp tar-Riċerka u t-Teknoloġija, il-maġġoranza l-kbira ta’ l-aġendi tar-riċerka definita mill-pjattaformi ġiet ikkunsidrata fil-formulazzjoni tal-proposti tal-Kummissjoni għas-Seba’ Programm ta’ Qafas. Hekk ukoll, fil-Kunsill Ewropew ta’ Marzu 2006, l-Istati Membri kollha ffissaw miri nazzjonali għar-riċerka li, jekk jintlaħqu, il-livell ta’ investiment fir-Riċerka u l-Iżvilupp fl-Unjoni Ewropea minn 1.9% tal-PGD jitla’ għal 2.6% sa l-2010. Dan huwa pass fid-direzzjoni t-tajba, imma l-isfida ewlenija issa tinsab fil-ħolqien ta’ ambjent li jwassal għal investiment privat fir-riċerka, l-iżvilupp u l-innovazzjoni.

Is-Seba’ Programm ta’ Qafas se jagħti mbottatura lill-finanzjament tar-riċerka kollaborattiva fl-Ewropa matul il-perjodu 2007-2013, li se jiġi minn taħlita ta’ skemi eżistenti u oħrajn ġodda. It-twaqqif tal-Kunsill Ewropew tar-Riċerka se jgħolli l-valur tal-kompetizzjoni għall-eċċellenza bil-kanalizzar tal-fondi fuq il-livell ta’ l-UE għall-aqwa riċerka b’mod assolut.

Inizjattivi teknoloġiċi konġunti, skema ġdida ta’ fondi taħt is-Seba’ Programm ta’ Qafas. Din l-iskema toffri qafas ġdid għas-seħħ ta’ aġendi ta’ riċerka u teknoloġija li jkunu partikolarment ambizzjużi u li jitolbu investiment pubbliku u privat qawwi fuq livell Ewropew. Dawn se jkunu inizjattivi li l-iskop u l-iskala tagħhom huma ta’ tip li l-iskemi ta’ fondi eżistenti mhumiex xierqa għall-ksib ta’ l-għanijiet mixtieqa. Bil-ġbir flimkien tal-partijiet interessati biex jaħdmu fuq aġendi li dwarhom ikun hemm qbil komuni u li jkunu misjuqa mis-settur industrijali, l-Inizjattivi Teknoloġiċi Konġunti jħaffu l-pass tal-ħolqien ta’ għarfien ġdid, jintensifikaw l-adozzjoni tar-riżultati tar-riċerka u jitraduċuhom f’teknoloġiji strateġiċi u jrawmu l-ispeċjalizzazzjoni meħtieġa fis-setturi ta’ teknoloġija għolja li jiddeterminaw il-kompetittività industrijali ġejjiena ta’ l-UE. Fil-bidu ġie identifikat il-potenzjal ta’ inizjattivi teknoloġiċi konġunti f’sitt oqsma li joffru potenzjal sinifikanti għall-imbuttar tal-kapaċità innovattiva ta’ l-Ewropa. Oqsma oħra jistgħu jiġu proposti fil-ġejjieni fid-dawl ta’ l-esperjenza.

L-Istati Membri ddeċidew li l-programmi l-ġodda għall-politika ta’ koeżjoni għall-perjodu 2007-2013 għandhom ifittxu li “jwarrbu” parti kbira mill-pakkett totali ta’ 308 biljun € għall-investiment fl-għarfien u l-innovazzjoni. L-Istati Membri u r-reġjuni kollha ġew mistiedna biex jiffissaw miri ambizzjużi f’dan il-qasam. Dan huwa wkoll konformi mal-Linji ta’ Gwida Strateġiċi Komunitarji għal Politika ta’ Koeżjoni 2007-2013, li jistiednu lill-Istati Membri u lir-reġjuni biex jagħmlu dispożizzjonijiet espliċiti għall-isperimentazzjoni u l-investiment fl-innovazzjoni, ibbażati fuq strateġiji ta’ innovazzjoni nazzjonali u reġjonali. Dan jippermetti lill-Istati Membri jsawru sistemi b’saħħithom ta’ riċerka u innovazzjoni fl-Ewropa kollha, inklużi sistemi li jsostnu l-innovazzjoni fuq livell reġjonali. L-azzjonijiet innovattivi jkunu wkoll ko-finanzjati mill-Fond Agrikolu Ewropew għall-Iżvilupp Rurali biex jiġu żviluppati prodotti ġodda ta’ kwalità għolja u ta’ valur miżjud u biex jiġi promoss l-użu sostenibbli tar-riżorsi naturali. Jeħtieġ li jseħħu sinerġiji aħjar bejn l-isforzi nazzjonali u dawk Komunitarji għall-appoġġ ta’ l-innovazzjoni, u l-istrumenti Komunitarji disponibbli kollha għandhom jiġu sfruttati biex jitmexxew ’il quddiem l-aġendi nazzjonali tal-politika ta’ innovazzjoni.

Sabiex isostni l-innovazzjoni, il- Programm għall-Kompetittività u l-Innovazzjoni (is-CIP) ilaqqa' fimkien azzjonijiet b’appoġġ għall-innovazzjoni inklużi azzjonijiet fl-oqsma ta’ l-enerġija, l-eko-innovazzjoni u l-ICT f’koordinazzjoni mill-qrib mas-7 Programm ta’ Qafas għar-Riċerka u l-Iżvilupp. Is-CIP b’mod partikolari jipprevedi żieda ta’ 60% fl-istrumenti finanzjarji b’appoġġ għall-intraprenditorija u l-innovazzjoni. Il-Komunikazzjoni riċenti dwar “L-Iffinanzjar tat-Tkabbir ta’ l-Impriżi ż-Żgħar u ta’ Daqs Medju” irreferiet għal azzjonijiet ulterjuri biex jittejjeb l-aċċess għall-finanzjament, li jista’ jwassal biex sa l-2013 jittripplika l-investiment kapitali ta’ riskju fil-fażijiet bikrija fl-UE.

F’kooperazzjoni mal-BEI, il-Kummissjoni se tniedi Faċilità għall-Finanzjament bil-Qsim tal-Riskju (l-RSFF), li, permezz ta’ self u garanziji, se jappoġġja l-investiment fi proġetti ta’ riċerka, żvilupp teknoloġiku u ta’ dimostrazzjoni, li huma ta’ riskju kbir. Il-Komunità se tikkontribwixxi sa biljun € minn għażla ta’ temi u attivitajiet tas-7 Pragramm ta’ Qafas għall-RSFF b’allokazzjoni pariġġ ta' mhux aktar minn biljun € mill-BEI. Permezz ta’ rinfurzar tal-kapaċità finanzjarja tal-BEI fil-qasam tar-riċerka, il-Komunità se timmobilizza l-isforzi ta’ għadd kbir ta’ banek Ewropej u istituzzjonijiet finanzjarji favur ir-riċerka u l-innovazzjoni biex b’hekk jiżdiedu l-investiment u l-iffinanzjar mis-settur privat f’dan il-qasam.

Bħala pass ieħor biex jittejjeb l-aċċess għall-finanzjament biex jiġu żviluppati l-impriżi, inklużi dawk tas-servizzi, il-Kummissjoni u l-Fond Ewropew għall-Investimenti nedew inizjattiva innovattiva għall-użu tal-fondi strutturali biex ikun ipprovdut aċċess għall-finanzjament minn negozji żgħar. Din l-inizjattiva, hekk imsejħa JEREMIE (ir-“Riżorsi Ewropej Konġunti għall-Impriżi Mikro-Sa-Daqs-Medju”- "Joint European Resources for Micro-to-Medium Enterprises" ), tiffunzjona fi ħdan il-qafas tal-programmi għall-politika ta’ koeżjoni biex tappoġġja lill-Istati Membri fl-iżvilupp ta’ strumenti finanzjarji mfassla tajjeb favur l-impriżi ż-żgħar u ta’ daqs medju, fejn l-FEI lest li jgħin lill-amministraturi tal-programm fil-ħidma kumplessa ta’ l-iżviluppar tal-forniment ta’ forom differenti ta’ kapital tar-riskju skond il-ħtiġiet u l-prijoritajiet reġjonali. Bħala sors ulterjuri ta’ kapital u kompetenza, l-Istati Membri huma mistiedna jagħmlu użu sħiħ minn din l-inizjattiva.

Riċentement, il-Kummissjoni adottat Linji ta’ Gwida ġodda dwar l-għajnuna mill-Istat għall-kapital tar-riskju[12]. Sa qabel l-aħħar tas-sena l-Kummissjoni se tadotta Qafas ġdid għall-Għajnuna mill-Istat għar-riċerka, l-iżvilupp u l-innovazzjoni. Bis-saħħa ta’ dawn it-tnejn flimkien l-Istati Membri se jkunu jistgħu jimmiraw aħjar l-għajnuna mill-Istat lejn id-defiċjenzi fis-suq li jimpedixxu l-forniment tal-kapital tar-riskju u ta’ fondi suffiċjenti għall-attivitajiet ta’ riċerka u innovazzjoni. Fil-qafas għar-riċerka, l-iżvilupp u l-innovazzjoni, il-Kummissjoni bi ħsiebha tipprovdi għal kategoriji mwessgħa tar-Riċerka u l-Iżvilupp u l-innovazzjoni u qed tikkunsidra l-inklużjoni ta’ għadd ta’ miżuri mmirati bħala appoġġ għall-innovazzjoni, bħalma huma għajnuna għal impriżi ġodda innovattivi ‘żgħażagħ’, servizzi konsultattivi u ta’ sostenn, self ta’ persunal kwalifikat, innovazzjoni tal-proċessi u l-organizzazzjoni, u gruppi ta’ impriżi innovattivi. L-Istati Membri għandhom iwettqu riorjentazzjoni tal-baġits tagħhom ta’ għajnuna mill-Istat lejn dawn il-miżuri b’rispett sħiħ għall-impenn tagħhom għal “anqas għajnuna u għajnuna mmirata aħjar”.

L-inċentivi fiskali wkoll huma strument politiku potenzjalment importanti li l-Istati Membri jistgħu jużaw biex jistimulaw aktar riċerka kummerċjali, innovazzjoni u investiment privat b’rispett sħiħ għal-liġi Komunitarja. Riċentement, ħafna Stati Membri introduċew inċentivi ġodda, jew saħħew dawk eżistenti. L-Istati Membri għandhom jikkonsidraw ukoll il-prattika t-tajba għal titjib fl-effikaċja ta' l-inċentivi fiskali applikabbli b’mod ġenerali favur ir-Riċerka u l-Iżvilupp u l-isfruttar ta' l-użu tagħhom. Il-Kummissjoni se tippreżenta Komunikazzjoni aktar tard fl-2006 bi gwida dettaljata dwar dawn il-kwistjonijiet li huma rilevanti għat-tfassil u l-valutazzjoni ta’ l-inċentivi fiskali applikabbli b’mod ġenerali għar-Riċerka u l-Iżvilupp.

2.6. Għoti ta’ eżempju: ir-rwol tal-gvernijiet

Is-settur pubbliku nnifsu jrid juri t-triq billi jadotta metodi innovattivi u jisfrutta teknoloġiji u proċeduri ġodda fl-amministrazzjoni pubblika. B’hekk ikun jista’ jindirizza aħjar il-ħtiġiet taċ-ċittadini u jtejjeb il-kwalità tas-servizz pubbliku u wkoll ikabbar il-produttività.

It-teknoloġiji ta’ l-informatika u l-komunikazzjoni (l-ICT) fil-parti l-kbira tagħhom mhumiex sfruttati biżżejjed fl-UE b’mod ġenerali, imma b’mod partikolari fis-settur pubbliku. Dan huwa kruċjali għall-iżvilupp tas-servizzi pubbliċi: adozzjoni u sfruttar aħjar ta’ l-ICT fis-servizzi pubbliċi (pereżempju fis-settur tas-saħħa) mhux biss itejbu l-produttività tas-settur pubbliku imma wkoll jistgħu jiftħu swieq kbar għal prodotti u servizzi innovattivi ta’ l-ICT.

Prattika mtejba ta’ l- appalti pubbliċi tista’ tgħin fit-trawwim ta’ adozzjoni mis-suq ta’ prodotti u servizzi innovattivi, filwaqt li jtejbu l-kwalità tas-servizzi pubbliċi fis-swieq fejn is-settur pubbliku huwa xerrej importanti. L-Awtorità Kontraenti tista’ tagħmel dan billi tiżgura li l-ħtiġiet tagħhom jitfissru b’mod wiesa’ u li dawn ikunu bbażati fuq il-prestazzjoni; dan jagħmilha possibbli għall-appaltaturi li jipproponu soluzzjonijiet aħjar u aktar varjati għall-problemi li jkunu jridu jissolvew. Ix-xerrejja pubbliċi jeħtieġ li jsiru "xerrejja intelliġenti", li jippjanaw x'għandhom jixtru, kif jixtruh u min se jixtrih. Kif suġġerit mir-rapport Aho, għandhom ukoll iqisu l-ispejjeż minfuqa matul il-ħajja sħiħa ta’ prodott jew servizz u mhux sempliċement jiffukaw fuq l-ispejjeż fil-mument tax-xiri. Ix-xerrejja pubbliċi jistgħu wkoll jingħaqdu flimkien għal skambju ta’ kompetenzi u ideat u biex jilħqu massa kritika ta’ l-ordni. Dan jistimula d-domanda għall-innovazzjoni filwaqt li jagħmilha possibbli għall-awtoritajiet pubbliċi li jiksbu prodotti u servizzi ta’ kwalità ogħla.

L-hekk imsejħa akkwisti pubbliċi pre-kummerċjali sa issa huma opportunità li għadha ma ġietx sfruttata mill-awtoritajiet pubbliċi fl-Ewropa. Fl-Istati Uniti, pereżempju, dawn għandhom rwol importanti fl-ekonomija mhux biss għall-innovazzjoni relatata mad-difiża, l-ispazju u s-sigurtà imma wkoll f’setturi pubbliċi oħra bħalma huma t-trasport, is-saħħa, l-enerġija u l-ICT. Meta fis-suq ma jkunux jeżistu soluzzjonijiet kummerċjali, l-akkwisti pre-kummerċjali jistgħu jgħinu lill-awtoritajiet pubbliċi jiksbu soluzzjonijiet teknoloġikament innovattivi żviluppati skond il-ħtiġiet tagħhom. Fl-akkwisti pubbliċi pre-kummerċjali x-xerrejja pubbliċi ma jippreskrivux soluzzjoni speċifika għar-Riċerka u l-Iżvilupp biex tiġi adottata, imma jitolbu soluzzjonijiet alternattivi li jistgħu jindirizzaw problema ta’ interess pubbliku.

Pjani għat-tul li huma kkomunikati lis-suq u djalogu tekniku bejn ix-xerrejja u s-suq jistgħu jgħinu fil-promozzjoni ta’ soluzzjonijiet innovattivi. Id-Direttivi dwar l-appalti pubbliċi[13] adottati fl-2004 joffru skop għal offerti orjentati favur l-innovazzjoni. Barra dan, dawn id-Direttivi jinkludu wkoll dispożizzjonijiet li huma mistennija li jkollhom impatt pożittiv fuq l-iffaċilitar ta’ l-aċċess u l-parteċipazzjoni ta’ l-impriżi ż-żgħar u dawk ta’ daqs medju fis-swieq ta’ l-appalti pubbliċi. L-entitajiet pubbliċi m’għandhomx jagħmlu użu minn dawn l-opportunitajiet. L-Istati Membri huma mħeġġa wkoll biex jieħdu miżuri konkreti biex jiġu stimulati l-innovazzjoni u r-riċerka permezz ta’ prattiċi mtejba għall-appalti pubbliċi fil-Programmi Nazzjonali għar-Riforma tagħhom skond l-istrateġiji ta’ Liżbona, kif proposti fil-Linji ta’ Gwida Integrati għat-Tkabbir Ekonomiku u l-Impjiegi.

Manwal dwar il-possibbiltajiet li joffru d-direttivi dwar l-appalti pubbliċi għal offerti orjentati favur l-innovazzjoni qed jitħejja mis-servizzi tal-Kummissjoni u għandu jiġi ppubblikat aktar tard din is-sena. Dan huwa pass importanti fil-proċess tat-tqajjim tal-kuxjenza dwar il-possibbiltajiet għall-Awtoritajiet Kontraenti biex titrawwem l-innovazzjoni.

3. IFFAċILITAR TAT-TWELID TAS-SWIEQ EWLENIN

Kondizzjonijiet ta’ qafas aktar effiċjenti u kompetittivi huma prerekwiżit għal suċċess fl-adozzjoni ta’ l-innovazzjoni fl-UE imma dawn waħedhom mhux se jkunu biżżejjed biex ipattu għad-defiċit persistenti ta’ innovazzjoni li għandha l-UE mqabbla wiċċ imb’wiċċ ma’ l-akbar kompetituri tagħha. Kif irrimarka tajjeb ir-rapport Aho, l-Ewropa trid tfittex li tiżviluppa swieq miftuħa għall-innovazzjoni b’mod aktar immirat biex toħloq kondizzjonijiet għal faċilitazzjoni tat-traduzzjoni ta’ innovazzjoni teknoloġika u innovazzjoni non-teknoloġika fi prodotti kummerċjali.

Għalhekk qiegħed jiġi propost il-varar ta’ inizjattiva ġdida ta' suq ewlieni bil-għan li jkunu faċilitati l-ħolqien u t-tqegħid fis-suq ta' prodotti u servizzi innovattivi ġodda f'oqsma promettenti. L-idea hi li jiġu identifikati oqsma fejn it-tneħħija tal-barrieri essenzjalment tkun kontribuzzjoni għall-proċess kompetittiv u twassal għat-twelid ta’ swieq ġodda. Dan jinkludi l-aktar azzjoni koordinata li tikkombina miżuri ta’ provvista, bħalma hu l-appoġġ għar-riċerka, li se jiġi pprovdut taħt is-7 Programm ta’ Qafas b’azzjonijiet immirati lejn l-għarfien u l-istimulu ta’ domanda kummerċjali kompetittiva għal prodotti u servizzi innovattivi. Dawk li jfasslu l-politika jistgħu pereżempju jeżaminaw l-ambjent regolatorju, l-iffissar ta’ l-istandards, jagħmlu użu aħjar mill-opportunitajiet ipprovduti minn regoli ta’ l-appalti u jtejbu l-ambjent ġenerali fis-suq biex jippromwovu kultura aktar miftuħa għall-innovazzjoni. Inizjattiva bħal din tgħin biex jinħolqu ċrieki virtużi dinamiċi ta’ domanda u innovazzjoni li jiffaċilitaw il-prekursuri mingħajr ma “jintgħażlu rebbieħa” jew jiġu mbuttati teknoloġiji speċifiċi.

F’termini konkreti, għandu jintuża trattament sistematiku u prospettiv li jħares lejn l-istrumenti politiċi kollha disponibbli u l-użu tagħhom b’mod kombinat, sfruttati għal kull wieħed mill-oqsma ta' interessi strateġiċi, sabiex ikun żgurat il-feġġ f'waqtu ta' kondizzjonijiet kummerċjali favorevoli u kompetittivi għall-aħjar użu ta' teknoloġiji ġodda. Dan jitlob approċċ miftiehem bejn l-Istati Membri u l-Komunità filwaqt li jitqiesu wkoll inizjattivi simili li jkunu ttieħdu fl-Istati Membri.

L-identifikazzjoni ta’ oqsma ta’ prijorità għandha tkun misjuqa mis-suq, b’rispett sħiħ lejn il-ħtieġa tal-preservazzjoni ta’ kompetizzjoni ħielsa u ġusta. Mingħajr ma jkun eskluż ebda qasam minn din l-inizjattiva, jeżisti b’mod ċar interess pubbliku fl-għoti ta’ għajnuna biex jinbtu soluzzjonijiet li jipprovdu tweġibiet għat-tħassib taċ-ċittadini. Dawn ikunu, partikolarment, oqsma li fihom l-awtoritajiet pubbliċi jkollhom rwol kritiku xi jwettqu biex jiġu eliminati l-barrieri eżistenti għall-adozzjoni mis-suq ta’ prodotti ġodda. Madankollu, dan m’għandux isir bi ħsara għas-sostenn ta' l-innovazzjoni fis-setturi aktar tradizzjonali.

Il-Kummissjoni tinsab konvinta li jekk turi li l-innovazzjoni tista’ tgħin biex jiġi indirizzat dan it-tħassib, approċċ bħal dan jista’ jkun kontribuzzjoni essenzjali għall-ħolqien ta’ soċjetà miftuħa għall-innovazzjoni billi tiżdied il-fiduċja taċ-ċittadini fil-merti tagħha.

F’termini prattiċi, il-Kummissjoni tista’ tibbaża fuq il-Pjattaformi Teknoloġiċi u l-INNOVA, il-Panils ta’ l-Innovazzjoni ta’ l-Ewropa ( Europe INNOVA innovation panels )[14], li jinsabu f’pożizzjoni tajba biex jidentifikaw l-ostakli u l-opportunitajiet fejn jidħlu oqsma u setturi teknoloġiċi speċifiċi. B’mod parikolari, l-aġendi strateġiċi ta’ riċerka fit-tul tal-Pjattaformi Teknoloġiċi jikkostitwixxu bażi soda li fuqha tista’ tiġi valutata l-ħtieġa ta’ azzjoni ulterjuri.

L- eko-innovazzjoni hija qasam li joffri prospetti promettenti għat-twelid ta' suq ewlieni miftuħ għall-innovazzjoni. Il-ġibda ta' l-eko-innovazzjoni tista' tissaħħaħ permezz tal-politika ambjentali, b'mod speċjali permezz ta’ regolamentazzjoni mfassla tajjeb u l-iżvilupp ta’ strumenti orjentati lejn is-suq. Pereżempju, jista’ jiġi adottat mekkaniżmu li permezz tiegħu "l-aħjar prestazzjoni" kurrenti fis-suq fost għadd stipulat ta' prodotti tista' tistabbilixxi l-istandards ta' referenza għal certu perjodu ta’ żmien biex impriżi oħra jitħeġġu biex jadattaw ruħhom skond dawn l-istandards. L-eko-innovazzjoni tista’ wkoll tkun promossa permezz ta’ trawwim ta’ kooperazzjoni bejn ir-riċerka u l-kooperazzjoni f’oqsma promettenti, bħall-kostruzzjoni, il-ġestjoni ta’ l-ilma, il-bijo-industriji, l-iżolament u l-ħażna jew ir-riċiklaġġ tal-karbonju.

Bħala parti mill-eko-innovazzjoni, l-iffissar ta’ miri biex tittejjeb l-effiċjenza ta’ l-enerġija jista’ jservina ta’ mudell għal aspetti oħra fil-qasam ta’ l-enerġija: il-pjan ta’ azzjoni għall-ġejjieni qrib dwar dan is-suġġett se jikkontribwixxi b’mod konkret għal dan il-għan. Dan għandu jitqies fil-kuntest wiesa’ tal-Green Paper[15] riċenti fuq l-istrateġija Ewropea għal enerġija sostenibbli, kompetittiva u sikura u r-reviżjoni ta’ l-Enerġija Strateġika Ewropea li se ssir fil-ġejjieni qrib.

Eżempju ta’ suq ewlieni potenzjali miftuħ għall-innovazzjoni: bini intelliġenti mtella’ b’ammont ta’ enerġija kważi żero

It-twelid ta’ suq ewlieni għal “bini intelliġenti mtella’ b’ammont ta’ enerġija kważi żero” jista’ jiżgura opportunitajiet kummerċjali ġodda (pereżempju servizzi intelliġenti, unitajiet, komponenti u materjali tal-bini, u riżorsi ġodda għall-forniment ta’ l-enerġija) li jikkontribwixxu b’mod sostanzjali biex tittaffa d-dipendenza ta’ l-Ewropa fuq l-enerġiji mis-sorsi fossili u biex titnaqqas l-emissjoni tal-gassijiet b’effett ta’ serra u elementi oħra li jniġġsu.

Il-kunċett ta’ “bini intelliġenti mtella’ b’ammont ta’ enerġija kważi żero” joffri l-prospettiva ta’ suq Ewropew kompletament ġdid li għandu intensità teknoloġika għolja ħafna b'potenzjal ovvju għal esportazzjoni mad-dinja kollha. Il-Pjattaforma Teknoloġika Ewropea tal-Kostruzzjoni diġà ġabret flimkien, b'azzjoni mmexxija mill-industrija, firxa wiesgħa ta' partijiet interessati (pereżempju klijenti/utenti, organizzazzjonijiet, kumpaniji li jfornu l-enerġija, awtoritajiet lokali/reġjonali, produtturi tal-materjali, manifatturi tat-tagħmir, arkitetti, inġiniera, u teknoloġisti ewlenin) biex tiġi żviluppata Aġenda Strateġika għar-Riċerka. Qiegħda wkoll tħares lejn miżuri marbuta mad-domanda li jistgħu jistimulaw domanda għal teknoloġiji u servizzi innovattivi, bħalma huma inizjattivi biex tiġi promossa l-effiċjenza ta’ l-enerġija fis-settur pubbliku, strutturi mtejba għall-appalti pubbliċi u bidliet fit-trattament tad-Drittijiet għall-Proprjetà Intelletwali[16].

Hija meħtieġa aġenda politika Ewropea biex jitneħħew l-ostakli li fadal u jiġu żgurati t-tixrid u l-użu ta’ metodi u kriterji għall-valutazzjoni tal-prestazzjoni, u biex ikunu integrati b’mod konsistenti r-regolamentazzjoni u l-inizjattivi kurrenti, pereżempju, id-direttivi ta' l-UE dwar il-prestazzjoni fl-oqsma tal-kostruzzjoni u l-enerġija, il-pjani ta’ azzjoni ta’ l-UE, ir-regolamentazzjonijiet nazzjonali, il-ktieb l-aħdar dwar l-enerġija u l-impenji ta’ Kyoto dwar l-emissjonijiet.

Eżempji oħra ta’ oqsma bħal dawn jinkludu s-sigurtà u d-difiża interna , qasam li sar kwistjoni ta’ tħassib globali. Jista’ jkun previst approċċ innovattiv f’setturi bħat-trasport pubbliku, l-organizzazzjoni ta’ l-ispazju pubbliku u l-protezzjoni tal-fruntieri. L-ispazju joffri skop kbir għal innovazzjoni ta’ teknoloġija għolja fuq medda ta’ żmien (b’mod partikolari, l-investituri pubbliċi fl-applikazzjoni tagħhom ta’ Galileo[17] u l-GMES - is-Sorveljanza Globali għall-Ambjent u s-Sigurtà ( Global Monitoring for Environment and Security ), il-programmi spazjali tal-Kummissjoni ta’ quddiemnett. Dawn jeħtieġ li jaqsmu l-għarfien tagħhom tas-sistema u l-iskop tagħha għall-kummerċ ma’ utenti potenzjali li jużaw il-prodott liċenzjat wara ħaddieħor ( downstream users ) fis-setturi spazjali u dawk li mhumiex, biex jagħmluhom aktar konxji ta’ soluzzjonijiet potenzjali b’bażi spazjali). It-trasport , fejn id-domanda għall-effiċjenza ta’ l-enerġija tipprovdi opportunitajiet kbar. It-teknoloġiji marittimi u prodotti li jippermettu użu aħjar tal-baħar bħalma huma t-tħaffir fl-ibħra fondi, l-isfruttar bijoteknoloġiku ta’ l-oċeani, marikultura f’baħar miftuħ u enerġiji rinnovabbli u teknoloġiji tal-monitoraġġ u s-sorveljanza ta’ l-ispazji oċeaniċi joffru ambitu promettenti. Is-saħħa li għandha potenzjal enormi għat-tkabbir bi prodotti u servizzi innovattivi (inklużi, b’mod partikolari, l- e-Health , u l-provvediment ta’ soluzzjonijiet personalizzati biex l-anzjani jitħallew ikomplu jgħixu ħajja indipendenti, il-farmaċewtiċi u l-istrumenti mediċi fejn l-innovazzjoni tista’ twassal għal benefiċċji diretti lill-pazjenti u ttejjeb il-kompetittività), jew il-benessri u l-kultura (pereżempju servizzi ta’ kontenut kreattivi li jieħdu dimenzjoni ġdida bl-iżvilupp ta’ netwerks broadband li jħallu liċ-ċittadini jkollhom aċċess għal kull xorta ta’ kontenut kreattiv bħalma huwa t-tagħrif awdjoviżiv, kulturali u logħob fid-dar u barra waqt li jkunu mobbli minn post għall-ieħor) huma eżempji ta’ swieq fejn is-settur pubbliku għandu rwol x’jaqdi.

Il-Kummissjoni se tmexxi analiżi dettaljata bbażata fuq tagħrif minn diversi sorsi, inkluża konsultazzjoni pubblika, biex jiġu identifikati oqsma fejn possibbilment il-kombinazzjoni ta’ miżuri ta’ domanda u provvista jistgħu jgħinu biex jitfaċċaw swieq miftuħa għall-innovazzjoni. Konsultazzjoni informali tal-Pjattaformi Teknoloġiċi Ewropej u l- Europe INNOVA Innovation Panels diġà tnediet b’dan bħala suġġett ta’ interess. Fuq il-bażi ta’ x’joħroġ minn dawn iż-żewġ konsultazzjonijiet u possibbilment minn input utli ieħor (bħal dak min-netwerks reġjonali ta’ l-innovazzjoni taħt ir-Reġjuni għal Bidla Ekonomika li se tidħol fis-seħħ fil-ġejjieni qrib) u minn analiżi tal-miżuri meħtieġa għal għajnuna biex jitfaċċaw swieq ewlenin bħal dawn u ta’ l-impatt tagħhom, il-Kummissjoni tipproponi strateġija komprensiva . Filwaqt li tagħmel dan, tidentifika wkoll l-impatt pożittiv mistenni fuq it-tkabbir ekonomiku u l-impjiegi. Bħala l-ewwel pass, dan il-kunċett jiġi ttestjat fl-2007 billi jiġi applikat f’fażi sperimentali f’għadd limitat ta’ oqsma.

Il-Kummissjoni bi ħsiebha timplimenta din l-inizjattiva ta’ suq ewlieni miftuħ għall-innovazzjoni fi ħdan il-qafas legali u istituzzjonali eżistenti. Il-pass deċiżiv li se jagħmel id-differenza kollha huwa l-impenn politiku sħiħ ta’ l-atturi rilevanti kollha biex jgħinu fl-identifikazzjoni u t-tneħħija tal-barrieri potenzjali għall-feġġ ta’ swieq miftuħa għall-innovazzjoni. Il-Kummissjoni se tkun qed tidderieġi dan il-proċess u trawwem kooperazzjoni mmirata lejn aġenda komuni.

4. TMEXXIJA EWROPEA AħJAR GħALL-INNOVAZZJONI

Għal titjib fil-prestazzjoni innovattiva ta’ l-UE hemm bżonn ta’ impenn fit-tul għal qafas politiku wiesa’. L-ebda azzjoni waħedha jew attur waħdu ma jistgħu jiksbu dan ir-riżultat jew ir-rata ogħla ta’ tkabbir li dan it-titjib jagħmel possibbli. L-isforzi għalenija biss tal-partijiet interessati pubbliċi u privati kollha, jikkooperaw fejn meħtieġ, jikkompetu meta jkun xieraq, iwasslu għall-adozzjoni ta’ l-innovazzjoni mis-soċjetà bil-mod li hu meħtieġ.

It-tmexxija politika hija partikolarment meħtieġa għall-ġestjoni tal- bidla strutturali li hija marbuta b’mod inevitabbli ma’ soċjetà msejsa fuq l-għarfien u miftuħa għall-innovazzjoni li din il-komunikazzjoni qed tfittex li tippromwovi. L-impriżi wkoll iridu jagħmlu l-parti tagħhom u juru sens ta’ responsabbiltà soċjali korporattiva għall-faċilitazzjoni ta’ l-adozzjoni ta’ l-innovazzjoni. Żieda fl-investiment għar-riċerka u l-innovazzjoni hija l-aħjar mezz għat-tkabbir tal-kompetittività tagħhom. Fl-istess ħin, bħala parti minn imġiba responsabbli soċjali, għandhom ikunu konxji tal-fatt li bidla teknoloġika rapida tista’ żżid it-tħassib taċ-ċittadini. Meta ċ-ċittadini jiġu megħjuna jindirizzaw dan it-tħassib tkun qed issir promozzjoni tal-kunfidenza tagħhom fl-innovazzjoni. L-innovazzjoni hemm bżonn li mhux biss tiġi organizzata b’mod li tkun tappoġġja l-aċċettazzjoni tal-bidla imma wkoll li tipprovdi l-opportunitajiet fil-ġestjoni tar-riżorsi umani, li flimkien iwasslu għal produttività akbar.

Fuq livell politiku, l-innovazzjoni trid tkompli tkun rikonoxxuta u konsistentement appoġġjata mill-Istati Membri bħala prijorità ewlenija fi ħdan is-Sħubija eżistenti għat-Tkabbir Ekonomiku u l-Impjiegi . Il-Kunsill Ewropew ta’ l-2005 u l-2006 approva dan l-approċċ uffiċjalment imma hemm bżonn li jsir aktar minn hekk biex l-innovazzjoni tinżamm viżibbli u għolja fuq l-aġenda Ewropea. Il-Kummissjoni tilqa’ bil-ferħ l-intenzjoni tal-Presidenza biex tiddiskuti l-innovazzjoni f’laqgħa informali bejn il-Kapijiet ta’ l-Istat u l-Gvern f’Lahti fl-20 ta’ Ottubru 2006. Bħala riżultat tas-Samit ta’ Lahti, il-Kummissjoni tittama li tara d-dikjarazzjonjijiet li jappoġġjaw l-innovazzjoni tradotti f’azzjoni konkreta mill-Istati Membri.

Biex jiġu eżegwiti l-orjentazzjonijiet politiċi mressqa f’din il-Komunikazzjoni, hija meħtieġa struttura ta’ tmexxija mtejba għall-innovazzjoni . Din għandha tindirizza l-innovazzjoni fuq il-livelli kollha. Il-prijorità trid tkun li jiġu stabbiliti sistemi ta’ innovazzjoni b’saħħithom fl-Istati Membri kollha li jibnu fuq il-muturi kollha ta’ l-innovazzjoni deskritti f’din il-komunikazzjoni, inklużi l-edukazzjoni, ir-riċerka, it-trasferiment ta’ l-għarfien, l-intraprenditorija u l-finanzjament. Għal dan il-għan, qed jiġi ssuġġerit li l-Istati Membri jużaw il-mekkaniżmi ta’ Koordinazzjoni Nazzjonali stabbiliti taħt il-proċess ta’ Liżbona biex jissorveljaw l-eżekuzzjoni effettiva ta’ l-istrateġiji innovattivi tagħhom.

L-istruttura tat-tmexxija ta’ l-Istrateġija mġedda ta’ Liżbona tipprovdi forum għal diskussjonijiet politiċi u l-iskambju ta’ l-aħjar prattika dwar l-innovazzjoni fuq il- livell ta’ l-UE fil-kuntest tas-sorveljanza multilaterali bbażata fuq it-Trattat. Id-diskussjonijiet tematiċi dwar l-innovazzjoni f’diversi formazzjonijiet tal-Kunsill matul ir-Rebbiegħa ta’ l-2006 jipprovdu opportunità biex ir-Rapport Annwali fuq l-istat tal-Progress tal-Kummissjoni għall-2007 u diskussjonijiet ulterjuri tal-Kunsill li se jsiru fir-Rebbiegħa ta’ l-2007 jkunu infurmati. B’mod partikolari, il-Kummissjoni, meta tagħmel valutazzjoni tar-rapporti fuq l-istat tal-progress dwar l-eżekuzzjoni tal-Programmi Nazzjonali għar-Riforma – mistennija sal-15 ta’ Ottubru – tivvaluta bir-reqqa r-riformi u l-politika ta’ l-Istati Membri li jindirizzaw is-sistema ta’ l-innovazzjoni u tirraporta dwar dan fir-Rapport Annwali fuq il-Progress. F’dan il-kuntest, il-Kunsill għall-Kompetittività huwa mistieden biex fuq bażi regolari jistima l-impatt tal-politika ta’ innovazzjoni nazzjonali fuq il-kompetittività.

Iċ-ċiklu ta’ tmexxija ta’ l-Istrateġija mġedda ta’ Liżbona jipprevedi l-adozzjoni ta’ Linji ta’ Gwida Integrati biex jiggwidaw il-proċess matul perjodu ta’ tliet snin. Ir-reviżjoni li jmiss tal-Linji ta’ Gwida Integrati fl-2008 għal ċiklu ġdid ta’ tliet snin tkun opportunità biex issir riflessjoni fuq l-esperjenzi miksuba bis-saħħa tal-Programmi Nazzjonali għar-Riforma fiċ-ċiklu ta’ tmexxija 2005-2008 kif ukoll l-orjentazzjonijiet politiċi l-ġodda mressqa f’din il-komunikazzjoni. L-istimi ta’ l-impatt tal-leġiżlazzjoni Komunitarja diġà jitolbu b’mod espliċitu l-konsiderazzjoni ta’ l-effett tar-regolamentazzjoni fuq l-innovazzjoni: dawn id-dispożizzjonijiet ikunu valutati bil-ħsieb li jissaħħu fil-kuntest tar-reviżjoni ġenerali tal-Linji ta’ Gwida għall-Istima ta’ l-Impatt tal-Kummissjoni.

Il-kompetenza ewlenija biex titrawwem l-innovazzjoni ġeneralment tinstab fuq livell reġjonali. Għalhekk ir-reġjuni għandhom ikunu involuti fit-tħejjija u l-eżekuzzjoni tal-Programmi Nazzjonali għar-Riforma, ukoll billi jiżviluppaw l-istrateġiji reġjonali tagħhom għall-innovazzjoni. Għandhom isiru sforzi ulterjuri biex jiġi ffaċilitat it-tagħlim politiku u t-tixrid tal-prattika t-tajba bejn il-fruntieri. F’dan ir-rigward, il- Pro INNO Europe joffri pjattaforma li ġġib flimkien lil dawk li jfasslu l-politika fuq il-livelli nazzjonali u reġjonali bil-għan li tiġi ffaċilitata l-kooperazzjoni trans-nazzjonali fl-oqsma ta’ interess komuni. Il-gruppi ta’ impriżi industrijali huma eżempju mill-aqwa ta’ dan. Bħala inizjattiva kumplimentari, il-Kummissjoni se tressaq proposti lill-Istati Membri għall-inizjattiva Reġjuni għal Bidla Ekonomika taħt il-programmi l-ġodda ta’ politika ta’ koeżjoni. Din l-inizjattiva ġġib lir-reġjuni flimkien f’netwerks biex tiġi żviluppata l-aħjar prattika f’oqsma ewlenin bħalma huma r-riċerka u l-innovazzjoni u biex jitħeġġeġ it-trasferiment ta’ ideat ġodda għal proġetti li għandhom ikunu appoġġjati taħt il-programmi.

Fl-aħħarnett, il-partijiet interessati privati huma element vitali f’sistema effiċjenti ta’ innovazzjoni u għalhekk iridu jkunu involuti bis-sħiħ fl-iffissar tal-prijoritajiet politiċi. L-Istati Membri huma mistiedna jrawmu, fejn huwa xieraq, sħubijiet bejn is-settur pubbliku u dak privat biex jinvolvu aktar lis-settur privat fl-edukazzjoni, ir-riċerka u l-finanzjament.

5. KALENDARJU TAR-ROTTA GħAL EWROPA AKTAR INNOVATTIVA

In-nuqqasijiet fis-sistema ta’ l-innovazzjoni fl-UE fil-qosor jistgħu jitqiesu bħala defiċjenzi fir-riżorsi u l-kapaċitajiet innovattivi, fl-inċentivi għall-innovazzjoni u fl-interazzjoni bejn l-atturi ta’ l-innovazzjoni.

Fis-snin riċenti, saru sforzi fuq livelli nazzjonali u Komunitarji biex dawn in-nuqqasijiet jissewwew. Il-Pjan ta’ Azzjoni tat-3%[18] u l-Komunikazzjoni tal-Kummissjoni "Aktar Riċerka u Innovazzjoni" ta' Ottubru 2005 kienu stadji ewlenin importanti f'dan ir-rigward.

Din il-Komunikazzjoni tqiegħed dawn l-isforzi f'kuntest usa’ . L-għan tagħha hu li tistimula kemm il-kunsinna kif ukoll id-domanda ta’ l-innovazzjoni. B’dan hija tkun qed tirreaġixxi għar-rakkomandazzjonijiet tar-Rapport Aho u tistabbilixxi s-sisien għall-istrateġija ta' innovazzjoni mfassla fuq bażi wiesgħa mitluba mill-Kunsill tar-Rebbiegħa. Għalhekk l-għanijiet tagħha jistgħu jinkisbu biss permezz ta’ eżekuzzjoni msejsa fuq bażi wiesgħa fuq il-livell Komunitarju, ta’ l-Istati Membri u tar-reġjuni tagħhom. Fl-istess ħin, mhux biss l-awtoritajiet pubbliċi huma mitluba jieħdu azzjoni imma wkoll is-settur kummerċjali u s-soċjetà ċivili.

L- 10 azzjonijiet li ġejjin huma ta’ prijorità politika partikolarment għolja bħala parti mill-istrateġija ta' Liżbona għat-tkabbir ekonomiku u l-impjiegi:

Azzjoni 1 : L-Istati Membri huma mistiedna jkabbru b’mod sinifikanti s-sehem ta’ l-ispiża pubblika ddedikat għall-edukazzjoni u l-identifikazzjoni u l-affrontazzjoni ta’ l-ostakli fis- sistemi edukattivi tagħhom li jxekklu l-promozzjoni ta' soċjetà miftuħa għall-innovazzjoni. B'mod partikolari, għandhom jeżegwixxu r-rakkomandazzjonijiet inklużi fil-Komunikazzjoni “Inwettqu r-Riformi Meħtieġa għall-Modernizzazzjoni tas-Settur ta’ l-Universitajiet”[19] għal kapaċitajiet akbar fl-oqsma ta’ l-edukazzjoni u l-innovazzjoni.

Azzjoni 2 : Għandu jitwaqqaf Istitut Ewropew tat-Teknoloġija biex jgħin fit-titjib tal-kapaċità u l-prestazzjoni ta’ l-innovazzjoni ta’ l-Ewropa. Il-Kummissjoni bi ħsiebha tressaq proposta dwar dan f’Ottubru 2006 u l-Istitut għandu jkun operabbli sa l-2009.

Azzjoni 3 : Il-Komunità u l-Istati Membri għandhom ikomplu jiżviluppaw u jeżegwixxu strateġija għall-ħolqien ta’ suq tax-xogħol Ewropew miftuħ, uniku u kompetittiv għar-riċerkaturi , bi prospetti attraenti għall-karriera inklużi inċentivi possibbli għall-mobilità.

Azzjoni 4 : Sabiex tindirizza l-adozzjoni fqira tar-riżultati ta’ riċerka fl-Ewropa, il-Kummissjoni se tadotta Komunikazzjoni fl-2006 – inklużi linji ta’ gwida u azzjonijiet volontarji ta’ l-Istati Membri u l-partijiet interessati konċernati – biex tippromwovi trasferiment ta’ għarfien bejn l-universitajiet u organizzazzjonijiet pubbliċi tar-riċerka oħra u s-settur industrijali.

Azzjoni 5 : Il -politika ta’ koeżjoni ta’ l-UE għall-perjodu 2007-2013 għandha tiġi mmobilizzata biex tappoġġja l-innovazzjoni reġjonali. L-Istati Membri kollha għandhom ifittxu li jwarrbu parti ambizzjuża mit-308 biljun € disponibbli għal investiment fl-għarfien u l-innovazzjoni.

Azzjoni 6 : Qabel tmiem l-2006 l-Kummissjoni għandha tadotta qafas ġdid għal għajnuna mill-Istat għar-riċerka biex tgħin lill-Istati Membri jimmiraw l-għajnuna mill-Istat aħjar lejn il-fallimenti kummerċjali li jxekklu r-riċerka u l-innovazzjoni. L-Istati Membri għandhom jirriorjentaw il-baġits tagħhom ta’ l-għajnuna mill-Istat biex jimmiraw lejn dawn l-għanijiet, b’rispett sħiħ għall-impenn ġenerali tagħhom għall-prinċipju ta’ “anqas għajnuna u għajnuna mmirata aħjar”. Il-Kummissjoni se tippreżenta wkoll komunikazzjoni aktar tard matul l-2006 bi gwida dettaljata għat-tfassil u l-valutazzjoni ta’ inċentivi fiskali għar-Riċerka u l-Iżvilupp li jkunu ġeneralment applikabbli.

Azzjoni 7 : B’referenza għall-konsultazzjoni pubblika riċenti, il-Kummissjoni se tippreżenta strateġija ġdida għall-privattivi qabel l-aħħar tas-sena 2006 u tħejji strateġija ta’ l-IPR aktar komprensiva fl-2007, biex, inter alia , tiffaċilita ċ-ċirkulazzjoni ta’ ideat innovattivi.

Azzjoni 8 : Fuq il-bażi tar-reviżjoni tagħha ta’ l- acquis dwar id-drittijiet ta’ l-awtur, il-Kummissjoni se tissokta bil-ħidma biex tiżgura li l-qafas legali u l-applikazzjoni tiegħu iwasslu għall-iżvilupp ta’ prodotti, servizzi u mudelli kummerċjali diġitali ġodda. B’mod partikolari, il-Kummissjoni se tressaq ’il quddiem inizjattiva għal “taxxi fuq id-drittijiet ta’ l-awtur” qabel tmiem is-sena 2006.

Azzjoni 9 : Fl-2007 l-Kummissjoni se tittestja strateġija mmirata biex tiffaċilita l-feġġ ta’ “swieq ewlenin” miftuħa għall-innovazzjoni. F’dan il-kuntest, wara konsultazzjoni pubblika inklużi b’mod speċjali konsultazzjonijiet mal-panils ta’ l-innovazzjoni tal-Pjattaformi Teknoloġiċi u l- Europe INNOVA , il-Kummissjoni se twettaq analiżi dettaljata tal-barrieri potenzjali li jxekklu l-adozzjoni ta’ teknoloġiji ġodda f’għadd limitat ta’ oqsma. B’mod Parallel għal dan, bl-użu ta’ din l-esperjenza, il-Kummissjoni se tħejji strateġija komprensiva għas-“swieq ewlenin”.

Azzjoni 10 : Sa tmiem l-2006, il-Kummissjoni se tippubblika u tqassam Manwal dwar kif appalti pubbliċi pre-kummerċjali u kummerċjali jistgħu jistimulaw l- innovazzjoni biex tgħin lill-Istati Membri jagħmlu użu mill-opportunitajiet offruti mid-Direttivi l-ġodda dwar l-appalti pubbliċi.

Il-qafas għall-eżekuzzjoni ta’ dawn l-azzjonijiet huwa l-istrateġija riveduta ta’ Liżbona għat-Tkabbir Ekonomiku u l-Impjiegi. Dan jitlob impenn min-naħat kollha u b’mod speċjali mill-Istati Membri biex jaslu għal riformi strutturali biex irawmu l-innovazzjoni. Il-Kummissjoni se tissorvelja l-eżekuzzjoni tal-kalendarju tar-rotta bħala parti mill- proċess ta’ Liżbona . Se tingħata attenzjoni partikolari lil dawn l-oqsma fir-Rapport Annwali fuq il-Progress li jmiss li mistenni joħroġ f’Diċembru ta’ l-2006 u fil-valutazzjoni tal-Programmi Nazzjonali għar-Riforma.

[1] “Azzjonijiet Komuni għat-Tkabbir Ekonomiku u l-Impjieg: Il-Programm Komunitarju ta’ Liżbona” - COM (2005) 330, 20.7.2005

[2] “Aktar Riċerka u Tiġdid – L-investiment fit-tkabbir ekonomiku u l-impjieg: Strateġija Komuni” - COM (2005) 488, 12.10.2005

[3] Tabella tax-Xejriet – Il-Politika ta’ Innovazzjoni fl-UE – ara http://trendchart.cordis.lu/

[4] “Noħolqu Ewropa Innovattiva”: rapport tal-grupp espert indipendenti dwar ir-Riċerka u l-Iżvilupp u l-innovazzjoni maħtur wara s-Samit ta’ Hampton Court u mmexxi mis-Sur Esko Aho

[5] Proposta għal Rakkomandazzjoni tal-Parlament Ewropew u l-Kunsill dwar il-Kompetenzi Ewlenin għat-Tagħlim tul il-Ħajja, il-Kummissjoni Ewropea COM(2005) 548

[6] Id-Dokument ta’ Ħidma ta’ l-Istaff tal-Kummissjoni SEC (2006) 639, p. 19, http://ec.europa.eu/education/policies/2010/doc/progressreport06.pdf

[7] Karta ta’ Ħidma dwar “Tiġdid fis-settur tas-servizzi” se tiġi ppreżentata f’Novembru 2006

[8] Komunikazzjoni mill-Kummissjoni lill-Parlament Ewropew, il-Kunsill, il-Kumitat Ekonomiku u Soċjali u l-Kumitat tar-Reġjuni “L-Eżekuzzjoni tal-Programm Komunitarju ta’ Liżbona: strateġija biex jiġi simplifikat l-ambjent regolatorju” - COM(2005) 535, 19.10.2005.

[9] Il-laqgħa tal-Kunsill dwar il-Kompetittività (is-Suq Intern, l-Industrija u r-Riċerka), 29-30 ta’ Mejju 2006, Konklużjonijiet 9334/06 (verżjoni proviżorja)

[10] Komunikazzjoni mill-Kummissjoni lill-Kunsill u l-Parlament Ewropew - Inwettqu r-riformi meħtieġa għall-modernizzazzjoni tas-settur ta’ l-universitajiet: Edukazzjoni, Riċerka u Innovazzjoni - COM(2006) 208, 10.5.2006.

[11] L-Istitut Ewropew tat-Teknoloġija: passi ulterjuri lejn il-ħolqien tiegħu; Komunikazzjoni mill-Kummissjoni lill-Kunsill Ewropew - COM(2006) 276, 8.6.2006.

[12] Linji ta’ Gwida Komunitarji dwar għajnuna mill-Istat għas-sostenn ta’ l-investimenti ta’ kapital tar-riskju fl-Intrapriżi Żgħar u ta' Daqs Medju tad-19.7.2006, http://ec.europa.eu/comm/competition/state_aid/others/risk_capital_guidelines_en.pdf

[13] Id-Direttivi numri 2004/18/KE u 2004/17/KE

[14] Ara panils innovattivi tal- Europe INNOVA fuq http://www.europe-innova.org/index.jsp

[15] Il-Green Paper dwar l-effiċjenza ta’ l-enerġija - COM(205) 265, 22.06.2005.

[16] Preżentement, is-settur tal-kostruzzjoni ma jserraħx b’mod qawwi fuq mezzi formali għall-protezzjoni tal-proprjetà intellettwali u l-ħruġ tal-privattivi

[17] Bil-għan li jkunu ssodisfati l-ħtiġiet ta’ l-usa’ firxa ta’ utenti, għandha tiġi investigata l-idea ta’ kompetizzjoni għall-inventuri żgħażagħ fil-qasam ta’ l-applikazzjonijiet ġejjiena tas-sinjal Galileo fuq il-livell ta’ l-UE u dan isir f’koordinazzjoni ma’ kompetizzjonijiet li diġà jeżistu.

[18] Il-Komunikazzjoni mill-Kummissjoni “Ninvestu fir-riċerka: pjan ta’ azzjoni għall-Ewropa”, COM(2003) 226 finali/2, 4.6.2003.

[19] Inwettqu l-Aġenda għall-Modernizzazzjoni tas-Settur ta’ l-Universitajiet: Edukazzjoni, Riċerka u Innovazzjoni - COM(2006) 208, 10.5.2006..