Regolament tal-Kummissjoni (KE) Nru 1064/2009

tal- 4 ta’ Novembru 2009

li jistabbilixxi kwota tariffarja Komunitarja u mod għall-ġestjoni tagħha għall-importazzjoni tax-xgħir tal-maltu minn pajjiżi terzi

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament tal-Kunsill (KE) Nru 1234/2007 tat- 22 ta’ Ottubru 2007 li jistabbilixxi organizzazzjoni komuni ta' swieq agrikoli u dwar dispożizzjonijiet speċifiċi għal ċerti prodotti agrikoli (Ir-Regolament Waħdieni dwar l-OKS) [1], u b'mod partikolari l-Artikolu 144(1) u l-Artikolu 148 tiegħu, flimkien mal-Artikolu 4 tiegħu,

Billi:

(1) F'konformità mal-Ftehim fil-forma ta’ skambju ta’ ittri bejn il-Komunità Ewropea u l-Istati Uniti tal-Amerika skont l-Artikolu XXIV(6), u tal-Artikolu XXVII tal-Ftehim Ġenerali dwar it-Tariffi Doganali u l-Kummerċ (GATT) tal-1994 rigward il-modifika ta’ konċessjonijiet fil-listi ta’ impenn tar-Repubblika Ċeka, ir-Repubblika tal-Estonja, ir-Repubblika ta’ Ċipru, ir-Repubblika tal-Latvja, ir-Repubblika tal-Litwanja, ir-Repubblika tal-Ungerija, ir-Repubblika ta’ Malta, ir-Repubblika tal-Polonja, ir-Repubblika tas-Slovenja u r-Repubblika tas-Slovakkja, fil-qafas tal-adeżjoni tagħhom mal-Unjoni Ewropea [2], approvat bid-Deċiżjoni tal-Kunsill 2006/333/KE [3], u l-Ftehim bejn il-Komunità Ewropea u l-gvern tal-Kanada dwar il-konklużjoni tan-negozjati skont il-paragrafu 6 tal-Artikolu XXIV tal-GATT [4], approvat bid-Deċiżjoni tal-Kunsill 2007/444/KE [5], impenjat ruħha li tiftaħ kwota tal-importazzjoni ta’ 50000 tunnellata xgħir tal-maltu kull sena.

(2) Attwalment, ir-regoli dwar l-implimentazzjoni għall-ġestjoni ta' din il-kwota huma stabbiliti fir-Regolament tal-Kummissjoni (KE) Nru 1215/2008 tal- 5 ta’ Diċembru 2008 li jiftaħ u jipprovdi għall-ġestjoni ta’ kwota tariffarja tal-Komunità għax-xgħir tal-maltu minn pajjiżi terzi u li jieħu d-deroga minn Regolament tal-Kunsill (KE) Nru 1234/2007 [6].

(3) L-użu tal-prinċipju "min jiġi l-ewwel jinqeda l-ewwel" irriżulta pożittiv f'setturi agrikoli oħra, u għal raġunijiet ta’ simplifikazzjoni amministrattiva, jeħtieġ li din il-kwota tiġi amministrata skont il-metodu indikat fl-Artikolu 144(2)(a) tar-Regolament (KE) Nru 1234/2007. Dan għandu jsir skont l-Artikoli 308a, 308b u 308c(1) tar-Regolament tal-Kummissjoni (KEE) Nru 2454/93 tat- 2 ta’ Lulju 1993 li jiffissa d-dispożizzjonijiet għall-implimentazzjoni tar-Regolament tal-Kunsill (KEE) Nru 2913/92 li jistabbilixxi l-Kodiċi Doganali Komunitarji [7].

(4) Fid-dawl tal-partikularitajiet marbutin mat-trasferiment minn sistema ta’ ġestjoni għall-oħra, ikun xieraq li l-Artikolu 308c (2) u (3) tar-Regolament (KEE) Nru 2454/93ma jkunx applikabbli għal perjodu ta' kwota li jibda mill- 1 ta' Jannar 2010 sal- 31 ta' Diċembru 2010.

(5) Ir-Regolament (KE) Nru 450/2008 tal-Parlament Ewropew u tal-Kunsill tat- 23 ta’ April 2008 li jistabbilixxi l-Kodiċi Doganali Komunitarju (Kodiċi Doganali Modernizzat) [8] jipprovdi, fl-Artikolu 166 tiegħu, superviżjoni doganali għall-merkanzija rrilaxxata għaċ-ċirkolazzjoni ħielsa b'dazju mnaqqas minħabba l-użu tagħha għal skopijiet partikulari. Għandu jiġi żgurat li x-xgħir tal-maltu importat skont il-kwota tariffarja jkun maħsub għall-manifattura ta’ birra staġjonata fil-bittijiet li fihom il-fagu, f'konformità mal-impenji internazzjonali Komunitarji.

(6) Huwa meħtieġ li tiġi pprovduta garanzija ta' livell għoli sabiex tkun żgurata ġestjoni adegwata tal-kwota u li din il-garanzija tkun tapplika matul il-perjodu kollu tal-ipproċessar.

(7) Fid-dawl tal-kwalità speċifika tax-xgħir importat mill-Istati Uniti tal-Amerika fil-qafas ta’ din il-kwota, huwa xieraq li jitnaqqas l-ammont tal-garanzija għall-importazzjonijiet li jkunu akkumpanjati b'ċertifikat ta' konformità li dwaru ntlaħaq ftehim mal-Gvern tal-Istati Uniti, skont il-proċedura ta' kooperazzjoni amministrattiva pprovduta fl-Artikoli 63, 64 u 65 tar-Regolament (KEE) Nru 2454/93.

(8) Għaldaqstant, ir-Regolament (KE) Nru 1215/2008 għandu jitħassar u jinbidel b'Regolament ġdid. Madankollu huwa xieraq li r-Regolament imsemmi jinżamm applikabbli għal-liċenzji tal-importazzjoni maħruġa għall-perjodi tal-kwota tal-importazzjoni ta’ qabel dawk koperti b’dan ir-Regolament.

(9) Il-miżuri pprovduti b'dan ir-Regolament huma konformi mal-opinjoni tal-Kumitat ta' Ġestjoni tal-Organizzazzjoni Komuni tas-Swieq Agrikoli,

ADOTTAT DAN IR-REGOLAMENT:

Artikolu 1

1. Dan ir-Regolament jiftaħ kwota tariffarja fuq l-importazzjoni ta' 50000 tunnellata ta' xgħir tal-maltu li taqà taħt kodiċi NM 100300 maħsuba għall-manifattura ta' birra staġjonata fil-bittijiet li fihom il-fagu. In-numru tas-serje tal-kwota għandu jkun 09.0076.

2. Il-kwota msemmija fil-paragrafu 1 ta’ dan l-Artikolu għandha tiġi amministrata skont l-Artikoli 308a, 308b u 308c(1) tar-Regolament (KEE) Nru 2454/93. L-Artikolu 308c(2) u (3) ta’ dak ir-Regolament ma għandux japplika għal perjodu ta' kwota li jibda mill- 1 ta' Jannar 2010 sal- 31 ta' Diċembru 2010.

3. Il-kwota msemmija fil-paragrafu 1 hija miftuħa fuq bażi annwali, għall-perjodu mill-1 ta’ Jannar sal-31 ta’ Diċembru ("perjodu tal-kwota tariffarja tal-importazzjoni"). Id-dazju fuq importazzjoni li taqa' taħt il-kwota tariffarja għandu jiġi impost bir-rata ta' EUR 8 għal kull tunnellata.

Artikolu 2

Għal finijiet tal-applikazzjoni ta' dan ir-Regolament:

a) "żerriegħa mħassra" tfisser żerriegħa ta' xgħir, ċereali oħra jew ħafur li jidher imħassar u li juri deterjorament ikkawżat minn mard, ġlata, sħana, insetti jew fungus, maltemp u kull xorta oħra ta' ħsara fiżika;

b) "xgħir negozjabbli b'saħħtu u sabiħ" ifisser żerriegħa tax-xgħir jew biċċiet ta' żerriegħa li mhumiex imħassra kif imfisser f'(a), bl-eċċezzjoni ta' żerriegħa mħassra minn ġlata jew fungus.

Artikolu 3

1. Il-benefiċċju tal-kwota tariffarja għandu jingħata jekk ix-xgħir importat jissodisfa dawn il-kriterji li ġejjin:

(a) piż speċifiku: 60,5 kg/hl jew iktar;

(b) żerriegħa mħassra: 1 % jew inqas;

(c) kontenut ta' umdità: 13.5 % jew inqas;

(d) xgħir negozjabbli b’saħħtu u sabiħ: 96 % jew iktar.

2. Konformità mal-kriterji ta' kwalità stabbiliti fil-paragrafu 1 għandha tiġi ċċertifikata permezz ta' wieħed minn dawn id-dokumenti li ġejjin:

(a) ċertifikat ta' analiżi magħmul wara talba tal-impurtatur mill-uffiċċju doganali tal-ħruġ għaċ-ċirkolazzjoni ħielsa; jew

(b) ċertifikat ta' konformità għax-xgħir importat maħruġ minn awtorità governattiva tal-pajjiż ta' oriġini u rikonoxxut mill-Kummissjoni.

Artikolu 4

1. F'konformità mal-Artikolu 166 tar-Regolament (KE) Nru 450/2008, ix-xgħir importat taħt din it-tariffa għandu jkun soġġett għal sorveljanza doganali, sabiex jiġi żgurat li:

(a) ix-xgħir importat għandu jkun konvertit f'maltu fi żmien sitt xhur mid-data tal-ħruġ għaċ-ċirkolazzjoni ħielsa; u

(b) il-maltu li jirriżulta jrid jintuża fil-manifattura ta' birra staġjonata fil-bittijiet li fihom il-fagu f’mhux aktar minn mija u ħamsin ġurnata mid-data li fiha x-xgħir jiġi pproċessat f'maltu.

L-ipproċessar tax-xgħir importat f'maltu għandu jkun meqjus li sar meta x-xgħir konvertit f'maltu jkun għadda mill-proċess ta' steeping (jiġi mgħaddas fil-likwidu).

2. Sabiex tkun żgurata l-konformità mal-obbligu msemmi fil-paragrafu 1, kif ukoll li jinġabru d-dazji mhux imħallsa fil-każ li dan l-obbligu ma jiġix rispettat, l-importaturi għandhom jiddepożitaw garanzija mal-awtoritajiet kompetenti tad-dwana. Din il-garanzija għandha tammonta għal EUR 85 għal kull tunellata. F'każ li l-kunsinni ta' xgħir tal-maltu huma akkumpanjati minn ċertifikat ta' konformità maħruġ mill-Federal Grain Inspection Service (Servizzi ta' Inspettorat Federali fuq Iż-Żerriegħa) minn issa ’l quddiem imsejjaħ (FGIS), il-garanzija hi mnaqqsa għal EUR 10 kull tunnellata.

3. Il-garanzija msemmija fil-paragrafu 2 titħallas lura malli tiġi pprovduta l-evidenza li ġejja lill-awtoritajiet doganali kkonċernati:

(a) il-kwalità tax-xgħir, stabbilita abbażi taċ-ċertifikat ta' konformità jew ċertifikat ta' analiżi, tissodisfa il-kriterji stabbiliti fl-Artikolu 3(1); u

(b) l-obbligu tal-ipproċessar imsemmi fil-paragrafu 1 twettaq fiż-żmien stipulat.

Artikolu 5

Iċ-ċertifikati maħruġa mill-FGIS għal xgħir tal-maltu destinat li jkun użat fil-manifattura ta' birra staġjonata fil-bittijiet li fihom il-fagu, u li mudell tagħhom jidher fl-Anness għal dan ir-Regolament, għandhom ikunu uffiċjalment rikonoxxuti mill-Kummissjoni skont il-proċeduri amministrattivi ta' kooperazzjoni kif speċifikat fl-Artikoli 63, 64 u 65 ta' Regolament (KEE) Nru 2454/93. Meta l-parametri analitiċi mdaħħlin fiċ-ċertifikat ta’ konformità maħruġ mill-FGIS juri konformità mal-istandards ta’ kwalità tax-xgħir tal-maltu stabbiliti fl-Artikolu 3 ta’ dan ir-Regolament għandhom jittieħdu mill-anqas kampjuni ta’ 3 % tat-tagħbijiet li jaslu f’kull port ta’ dħul matul is-sena tas-suq. Ir-riproduzzjoni tat-timbri awtorizzati mill-Gvern tal-Istati Uniti tal-Amerika għandha tiġi provduta lill-Istati Membri bl-iktar modi xierqa.

Artikolu 6

Ir-Regolament (KE) Nru 1215/2008 għandu jitħassar. Madankollu, ikompli japplika għal-liċenzji tal-importazzjoni maħruġin għas-sena 2009 u sal-iskadenza tagħhom.

Artikolu 7

Dan ir-Regolament għandu jidħol fis-seħħ fit-tielet ġurnata wara l-pubblikazzjoni tiegħu f’Il-Ġurnal Uffiċjali tal-Unjoni Ewropea.

Huwa għandu japplika mill- 1 ta' Jannar 2010.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, l- 4 ta’ Novembru 2009.

Għall-Kummissjoni

Mariann Fischer Boel

Membru tal-Kummissjoni

[1] ĠU L 299, 16.11.2007, p. 1.

[2] ĠU L 124, 11.5.2006, p. 15.

[3] ĠU L 124, 11.5.2006, p. 13.

[4] ĠU L 169, 29.6.2007, p. 55.

[5] ĠU L 169, 29.6.2007, p. 53.

[6] ĠU L 328, 6.12.2008, p. 20.

[7] ĠU L 253, 11.10.1993, p. 1.

[8] ĠU L 145, 4.6.2008, p. 1.

--------------------------------------------------

ANNESS

Ċertifikat vojt ta’ konformità maħruġ mill-Gvern tal-Istati Uniti tal-Amerika għax-xgħir tal-maltu destinat għall-manifattura ta’ birra staġjonata fil-bittijiet li fihom il-fagu.

+++++ TIFF +++++

--------------------------------------------------