Regolament tal-Kummissjoni (KE) Nru 755/2008

tal- 31 ta’ Lulju 2008

li jemenda l-Anness II għad-Direttiva 2005/36/KE tal-Parlament Ewropew u tal-Kunsill dwar ir-rikonoxximent ta’ kwalifiki professjonali

(Test b’relevanza għaż-ŻEE)

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat id-Direttiva 2005/36/KE tal-Parlament Ewropew u tal-Kunsill tas- 7 ta’ Settembru 2005 dwar ir-rikonoxximent ta’ kwalifiki professjonali [1], u b’mod partikolari l-Artikolu 11(c)(ii) tagħha,

Billi:

(1) L-Artikolu 2(3) tad-Direttiva 2005/36/KE jistipula li fejn, għal professjoni speċifika rregolata, jiġu stabbiliti arranġamenti speċifiċi oħra direttament relatati mar-rikonoxximent tal-kwalifiki professjonali, id-dispożizzjonijiet korrispondenti tad-Direttiva 2005/36/KE ma japplikawx. L-Artikolu 3(1) tad-Direttiva 2005/45/KE tal-Parlament Ewropew u tal-Kunsill tas- 7 ta’ Settembru 2005 dwar ir-rikonoxximent reċiproku ta’ ċertifikati tal-baħħara maħruġa mill-Istati Membri u li jemenda d-Direttiva 2001/25/KE [2] jipprovdi għar-rikonoxximent awtomatiku ta’ ċertifikati tal-baħħara maħruġa mill-Istati Membri skond ir-rekwiżiti stipulati fid-Direttiva 2001/25/KE tal-Parlament Ewropew u tal-Kunsill ta’ l- 4 ta’ April 2001 dwar il-livell minimu ta’ taħriġ għall-baħħara [3]. Għalhekk, id-Direttiva 2005/36/KE m’għandhiex tapplika għar-rikonoxximent tal-kwalifiki tal-baħħara li jaħdmu fuq bastimenti li jaqgħu fl-ambitu tad-Direttiva 2001/25/KE.

(2) Ir-Repubblika Ċeka, id-Danimarka, il-Ġermanja, ir-Rumanija u l-Olanda ressqu talbiet raġunati sabiex ineħħu l-professjonijiet ta’ tbaħħir tagħhom li jaqgħu taħt l-ambitu tad-Direttiva 2001/25/KE mill-punt 3(a) ta’ l-Anness II għad-Direttiva 2005/36/KE.

(3) Ir-Repubblika Ċeka, id-Danimarka, il-Ġermanja u r-Rumanija talbu t-tħassir tal-professjonijiet kollha u tad-deskrizzjoni assoċjata tat-taħriġ elenkati għall-pajjiżi tagħhom taħt il-punt 3(a) ta’ l-Anness II għad-Direttiva 2005/36/KE. L-Olanda talbet it-tħassir ta’ żewġ professjonijiet: "l-uffiċjal ewlieni (bastiment kostali) (b’taħriġ addizzjonali) ("stuurman kleine handelsvaart (met aanvulling)")" u "inġinier ta’ bastiment kostali (b’diploma) ("diploma motordrijver")", kif ukoll id-deskrizzjoni assoċjata tat-taħriġ mill-punt 3(a) ta’ l-Anness II għad-Direttiva 2005/36/KE.

(4) Ir-Renju Unit ressaq talba raġunata biex ineħħi l-professjonijiet ta’ tbaħħir tiegħu, li jaqgħu taħt l-ambitu tad-Direttiva 2001/25/KE, mill-punt 5 ta’ l-Anness II għad-Direttiva 2005/36/KE.

(5) Id-Direttiva 2005/36/KE għalhekk għandha tiġi emendata skond dan.

(6) Il-miżuri provduti f’dan ir-Regolament huma skond l-opinjoni tal-Kumitat għar-rikonoxximent tal-kwalifiki professjonali,

ADOTTAT DAN IR-REGOLAMENT:

Artikolu 1

L-Anness II għad-Direttiva 2005/36/KE huwa emendat skond kif stipulat fl-Anness għal dan.

Artikolu 2

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu fil-Ġurnal Uffiċjali ta’ l-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, 31 ta’ Lulju 2008.

Għall-Kummissjoni

Charlie McCreevy

Membru tal-Kummissjoni

[1] ĠU L 255, 30.9.2005, p. 22. Id-Direttiva kif emendata l-aħħar bir-Regolament tal-Kummissjoni (KE) Nru 1430/2007 (ĠU L 320, 6.12.2007, p. 3).

[2] ĠU L 255, 30.9.2005, p. 160.

[3] ĠU L 136, 18.5.2001, p. 17 Id-Direttiva kif emendata l-aħħar bid-Direttiva 2005/45/KE (ĠU L 255, 30.9.2005, p. 160).

--------------------------------------------------

ANNESS

L-Anness II għad-Direttiva 2005/36/KE huwa emendat kif ġej:

(1) Il-punt 3(a) jinbidel b'dan li ġej:

"(a) Trasport bil-baħar

Taħriġ għal dawn li ġejjin:

fil-Latvja:

- inġinier ta’ l-elettriku uffiċjal fuq bastimenti (kuģu elektromehāniķis),

- operatur ta' makkinarju tar-refriġerazzjoni (kuģa saldēšanas iekārtu mašīnists).

fl-Olanda:

- uffiċjal tal-VTS (VTS-functionaris),

li jirrappreżentaw taħriġ:

- fil-Latvja:

(i) għal inġinier ta’ l-elettriku uffiċjal fuq bastimenti (kuģu elektromehāniķis),

1. persuna ta' mhux inqas minn 18-il sena;

2. tirrappreżenta edukazzjoni ta' perjodu totali ta' mhux inqas minn 12-il sena u nofs, li jkun magħmul minn mhux inqas minn disa' snin edukazzjoni primarja u mhux inqas minn tliet snin edukazzjoni vokazzjonali. Barra minn hekk, huwa meħtieġ servizz ta’ tbaħħir ta' mhux inqas minn sitt xhur bħala elettriċista ta' bastiment jew bħala assistent ta' l-inġinier elettriku fuq bastimenti li għandhom saħħa ta' ġeneratur ta' aktar minn 750 kW. It-taħriġ vokazzjonali huwa kompletat b'eżami speċjali mill-awtorità kompetenti skond il-programm ta' taħriġ kif approvat mill-Ministeru tat-Trasport.

(ii) għal operaturi tal-makkinarju tar-refriġerazzjoni (kuģa saldēšanas iekārtu mašīnists),

1. persuna ta' mhux inqas minn 18-il sena;

2. tirrappreżenta edukazzjoni ta' perjodu totali ta' mhux inqas minn 13-il sena, li jkun magħmul minn mhux inqas minn 9 snin edukazzjoni primarja u mhux inqas minn tliet snin edukazzjoni vokazzjonali. Barra minn hekk, huwa meħtieġ servizz ta' tbaħħir ta' mhux inqas minn 12-il xahar bħala assistent ta' inġinier tar-refriġerazzjoni. It-taħriġ vokazzjonali huwa kompletat b'eżami speċjali mill-awtorità kompetenti skond il-programm ta' taħriġ kif approvat mill-Ministeru tat-Trasport.

- fl-Olanda

Edukazzjoni ta’ perjodu totali ta' mhux inqas minn 15-il sena, li jkun magħmul minn mhux inqas minn tliet snin edukazzjoni vokazzjonali superjuri (HBO) jew taħriġ vokazzjonali intermedju (MBO), segwiti minn korsijiet ta' speċjalizzazzjoni nazzjonali u reġjonali, li jkunu magħmula minn mhux inqas minn 12-il ġimgħa taħriġ fit-teorija u li kull wieħed jispiċċa b'eżami."

(2) Il-punt 5 huwa emendat kif ġej:

L-għaxar, il-ħdax, it-tnax, it-tlettax u l-erbatax-il inċiż huma mħassra.

--------------------------------------------------