Deċiżjoni Tal-Kumitat politiku u ta’ Sigurtà CHAD/1/2008

tat- 13 ta’ Frar 2008

dwar l-aċċettazzjoni ta’ kontributi ta’ Stati terzi għall-operazzjoni militari ta’ l-Unjoni Ewropea fir-Repubblika taċ-Ċad u r-Repubblika Ċentru-Afrikana

(2008/172/PESK)

IL-KUMITAT POLITIKU U ta’ SIGURTÀ,

Wara li kkunsidra t-Trattat dwar l-Unjoni Ewropea u b’mod partikolari t-tielet subparagrafu ta’ l-Artikolu 25 tiegħu,

Wara li kkunsidra l-Azzjoni Konġunta tal-Kunsill 2007/677/PESK tal- 15 ta’ Ottubru 2007 dwar l-operazzjoni militari ta’ l-Unjoni Ewropea fir-Repubblika taċ-Ċad u fir-Repubblika Ċentru-Afrikana [1] (Operazzjoni EUFOR Tchad/RCA), u b’mod partikolari l-Artikolu 10(2) tagħha,

Billi:

(1) Fuq it-talba tal-Kumitat Politiku u ta’ Sigurtà u skond il-kompiti mogħtija mill-Kumitat Militari ta’ l-Unjoni Ewropea (KMUE), il-Kmandant ta’ l-Operazzjoni ta’ l-UE u l-Kmandant tal-Forza ta’ l-UE żammew il-Konferenzi dwar il-Ħolqien ta’ Forza fid- 9, 14 u 21 ta’ Novembru 2007, 19 ta’ Diċembru 2007 u 11 ta’ Jannar 2008.

(2) B’segwitu għar-rakkomandazzjonijiet tal-Kmandant ta’ l-Operazzjoni ta’ l-UE u tal-KMUE dwar kontribut mill-Albanija, il-kontribut mill-Albanija għandu jiġi aċċettat.

(3) Skond l-Artikolu 6 tal-Protokoll dwar il-pożizzjoni tad-Danimarka anness għat-Trattat dwar l-Unjoni Ewropea u għat-Trattat li jistabbilixxi l-Komunità Ewropea, id-Danimarka ma tipparteċipax fl-elaborazzjoni u l-implementazzjoni ta’ deċiżjonijiet u azzjonijiet ta’ l-Unjoni Ewropea li jkollhom implikazzjonijiet ta’ difiża,

IDDEĊIEDA KIF ĠEJ:

Artikolu 1

Kontributi ta’ Stati Terzi

Wara l-Konferenzi dwar il-Ħolqien ta’ Forza, il-kontribut mill-Albanija għandu jiġi aċċettat għall-operazzjoni militari ta’ l-UE fir-Repubblika taċ-Ċad u r-Repubblika Ċentru-Afrikana.

Artikolu 2

Dħul fis-Seħħ

Din id-Deċiżjoni għandha tidħol fis-seħħ fil-jum ta’ l-adozzjoni tagħha.

Magħmula fi Brussell, 13 ta’ Frar 2008.

Għall-Kumitat Politiku u ta’ Sigurtà

Il-President

M. Ipavic

[1] ĠU L 279, 23.10.2007, p. 21.

--------------------------------------------------